Én xi kichjitʼa ya tʼaxjáo

JMÉNI xi kjima ibi. Jngo sʼuíje tjíosʼejnale chjota xokjoan. Je reyle Babilonia nkjín jmi chjota xi xángʼa tjínle kinchjale. Kui tjíosíchjén je chxoa̱ kʼoa chotsín xi taonsiné kʼoa xi taonchxoa koanndani xi tsakʼasje ya yo̱ngo̱le Jeobá ya Jerusalén. Toxijña, jngo ntsja chjota koantsen jinsén kʼoa kiskitʼa tʼaxjáo. Ñaki kitsokjon ngatsʼi chjota.

Xi rey tíjna jé Belsasar, tindaile Nabucodonosor. Kiskiʼndáxá nga katafichʼale chjota chjinele, kitso. “ʼYani xi koa̱nle kʼoexkia én jebi kʼoa kʼoakuitsona josʼin tsoyanile, nʼio nkjín tsojmi kʼoai kjoatjaole kʼoa je koa̱njanni jña tibatexoma”. Tonga, nijngojinla chjota chjinele xi koanle tsakʼéxkia én xi kisʼetʼa tʼaxjáo, ni koanjinle josʼin tsoyanile.

Je na̱le rey kinrʼoé jmeni xi kjima kʼoa jaʼasʼen ya jña tjíokjen chjota. Kʼoa kitsole je rey: “A likʼoajin sikji nʼio nokjuin. Tíjna jngo chjota i̱ jña tibatexomai je xi bexkon je niná xi tsje tjío. Kʼianga rey tsakʼejna je Nabucodonosor pajcháli, je kisikaséjna títjonle ngatsʼi chjota chjinele. Daniel ʼmi. Tinókjoalai, kʼoa kʼoakuitsoli josʼin tsoyanile ngayeje jebi”.

Kjitʼanangi kichʼa Daniel. Kʼoa likui kiskoe tsojmi xi tsakʼai kjoatjaole, je Daniel kʼoakitsole Belsasar xi tʼatsʼe Nabucodonosor je pajchále kʼianga je Jeobá tsakjáʼa choatsele xále nga tsínti rey koanni. Kitso Daniel: “Nʼio ngʼakon koan. Kʼoa Jeobá kjoañʼai kitsjoale”.

Je Daniel kitsole Belsasar: “Tonga tjínjinli jmeni xi koanle, kʼoa kʼoatisʼin ngʼakon kjimai jokoankjoan je Nabucodonosor. Kui jaʼaikoai je chotsín kʼoa kao chxoa̱ xi tjío yo̱ngo̱le Jeobá kʼoa kui tiʼyoyai. Kui tibʼetsʼoalai niná xi to yá kʼoa xi to lajao koanndani, kʼoa likui tiʼyaxkuín xi kisindaná. Kuinga ntsja chjota kasíkasénsíni Niná kʼoa kakjisíni én jebi”.

Kitso Daniel: “Je xi tjítʼa kui jebi, MENÉ, MENÉ, TEKEL KʼOA PARSÍN”.

“MENÉ kui tsoyanile nga tíbʼéxki Niná je nichxin xi tibatexomai kʼoa je tísíkjetʼa. TEKEL kui tsoyanile nga kao libra tísʼechoyani kʼoa tíʼyale nga tsín nda tinʼiai. PARSÍN kui tsoyanile nga je ʼnde jña tjen tibatexomai je kʼoaile chjota medo kʼoa kao chjota persa.

Kʼianga tínchjasa Daniel, je chjota medo kao chjota persa jaʼasʼen Babilonia. Kiskoe naxinandá kʼoa kisikʼien Belsasar. ¡Je én xi kisʼetʼa tʼaxjáo tiʼakʼia kitjosonni nga kui nitjen! Tonga, jókoanni je chjota israelita. Kʼia jchaa, kuila kataʼya xi tʼatsʼe Daniel, jméni xi koanle.