Fitsʼiakjoanni sá septiembre, je Xo̱n xi tjítʼa jme xi chotʼayá jngo koya kjoaʼaítʼa chjotse xi koasenkaoná josʼin kʼuínyaa Énle Niná kʼoa i kʼuín: “Si̱chjén Biblia nga kʼuínyaa”. Kui xi mená nga koakoyalee chjota jmeni xi bakóya je Biblia kʼoa nga jngo kjoachjonangi kʼoa jngo testole Biblia si̱chjén.

Kʼiatsa koa̱nndosinle je chjota kjoásjailee jokʼuínlee nga koa̱n kjuinchón ijngokʼalee kʼoa kʼoailee jngo xo̱n xi Énle Niná faʼaitʼa kʼoa tsa maije̱ koakolee jngo video xi faʼaitʼa ya jw.org. Alikui nʼio nkjín nichxin si̱kʼatoaa nga kjuinchón ijngokʼalee. Je xi kjoaʼaítʼa chjotse Xo̱n xi tjítʼa jme xi chotʼayá yaa kʼoangini je kjoaʼmiya xi faʼaitʼa je libro Jmé kjoanni xi bakóya je Biblia. Ya rekuadro xi tjío jña fetʼani kjoaʼmiya faʼaitʼasa testole Biblia xi nʼio basenkaoná jokʼuínlee chjota nga kjuinchón ijngokʼalee kʼoa tsa estudio kʼoailee, nga ñaki tokui Biblia si̱chjén.

Tojngoo mani je ndiaa xi kjoabijnachon kuichokaoná (Mt 7:13, 14). Ngatsʼi je chjota xi chjakaoñá Énle Niná kjaʼaí kjaʼaí kjoamakjainle tjínle kʼoa xinxin tsʼe. Kuinga kjoásjaisínilee josʼin kʼuínyalee je Énle Niná nga kamandosinle (1Ti 2:4). Kʼoa nga jenkjín koya sʼe̱ya jkoaa jmeni xi faʼaitʼa Biblia kʼoa nga nda si̱chjén “én xi kjoakixi”, ngisaa tsjoa sʼe̱ná kʼoa ngisa nda kuichotsjoá nga kʼuínyalee Énle Niná je chjota xi kjaʼaí (2Ti 2:15).

Ngakjijnda Sonʼnde je chjota machjénle nga si̱nʼio kon (Ec 4:1). Ngisa nʼio kʼoénelee yaoná nga kjoáyoaa Xo̱n xi Bájinkonná xi tsʼe septiembre 2016, xi kui tínchja̱ni nga si̱nʼioá kon je chjota. Kʼoénelee yaoná nga si̱kʼabísoan ngakjijnda. Nga kui xi mená nga si̱nʼioá kon je chjota, kuinga ñaki jesoa kʼoainilee je rebista ʼndele nga toya kjoáyoaa ya niʼyale.

JOSʼIN SI̱KÁJNAA JE REBISTA

“Ngatsʼiñá nga sakʼoa machjénná nga ʼya xi sinʼio tokoán. Tonga, jméni xi sinʼio tokoán [tʼexkiai 2 Corintios 1:3, 4]. Rebista jebi kui tsoya josʼin sínʼio tokoán je Niná”.

Kʼiatsa koa̱nndosinle je chjota kʼoa skoé je rebista:

TAKÓLAI JE VIDEO ÁNNI NGA MACHJÉNSÍNI NGA CHÓTʼAYAI BIBLIA

Xijekoa̱n, kʼoatʼinlai josʼin ʼmiyaa Biblia.

CHÓSONNILAI JOKʼUÍNLAI NGA KOA̱N KʼUÍNCHON IJNGOKʼALAI

Jngo kjoachjonangi si̱kʼéjnalee xi kʼia kʼuínyalee nga kuichochon ijngokʼalee kʼoa koaan i̱ kʼuínlee: “Ánni nga títsjoáʼndesíni Niná nga kjoañʼai tjín”.