Nga jaʼáyale Jesús

AʼYANÍ ʼyáni chjoón xokjibi kʼoa nga jao chjota xosíkjoan. Jení María Magdalena je chjoón miyole Jesús. Kʼoa ánkjení je xi najño chxoasí yʼakjá. Je María ya tíkotsensʼen ya tsjó jñani kinikájnaya yaole Jesús, ¡tonga je yaole likui tiya kijnani! ʼYáni xi kikao. Kataʼyala.

Kʼianga je kʼien Jesús, je naʼmi kitsole Pilato: “Kʼianga tíjnakonsa Jesús kʼoakitso nga kjoaʼáyanile nga koa̱njanni nichxin. Kuinga, tikasain je xi sikuinda je tsjó. ¡Ánni nga tsín je sichésíni chjota tjenngile je yaole Jesús kʼoa kʼoakuitso nga je jaʼáyanile!” Pilato kʼoakitsole nga katasíkasén soldado.

Kʼianga tajnjioya nga je koanjanni nichxin nga kʼoasʼin kinikʼien Jesús, toxijña jngo ánkjele Jeobá tsʼatsen. Tsakjaʼáxín lajao xi séjnachjoale ya tsjó. Nʼio kitsokjon je soldado xi tjíosíkuinda saʼnda likui tikoan kisikjanni. ¡Xijekoanni kʼianga kiskotsensʼen ya tsjó, je yaole Jesús likui tiya kijnani! Tjínkʼa soldado xi ki ya naxinandá kʼoa tsakʼéyanajmíle je naʼmi. A ʼyaní jméni xi kisʼin je naʼmi tsʼen xokjoan. Tsakʼéchjíle je soldado nga katabʼéndiso, kitsole: “Kʼoatixón nga je chjota tjenngile kikao kʼianga tisoyofao”.

Kʼoa nga kʼoakjima, kichokotsen kʼa yánchjín miyole Jesús ya tsjó. ¡Tokʼoakoanle nga to kijnakjitia nga tsabe! Toxijña, jao ánkje xi ya tjío tsabe xi ñaki fate kjoan najñole. Kitsole: “Ánni nga i̱ tifasjaisíño Jesús. Je jaʼáyanile. Kjitʼanangi tangion kʼoa kʼoatʼinlao je chjota tjenngile”. Kjoan kitoka yánchjín jebi. Tonga jngo chjota kisikinyá ya yandia. ¡Jé Jesús! Kitsole: “Tangion kʼoa kʼoatʼinlao je chjota tjenngina”.

Kʼianga kʼoakitsole yánchjín jebi je chjota tjenngile Jesús kʼianga je tíjnakonni kʼoa nga tsabe, likui nditon koankjainle. ¡Pedro kao Juan kitoka ya tsjó jña kisʼejna yaole Jesús, tonga tokjitia je tsjó nga kichó! Kʼianga ki ijngokʼani, tsakʼejnatjenngi je María Magdalena. Kiskotsensʼen ya tsjó kʼoa jao ánkje tsabe.

A ʼyaní jméni xi koanle je yaole Jesús. Jé Niná xokisʼin nga kicha. Nga kisikjaʼáyale Niná je Jesús a likui tikui yao kisikʼani je xi tjínle ngasʼa. Jngo yao chjotse kitsjoale xi tsín matsen, jokjoan tsʼe ánkje xi tjío ngʼajmi. Tonga nga katabe je chjota tjenngile nga tíjnakon, kui kisikʼóya yaole yao xi matsen. Tojosʼin jchaa xi fisani.