Totʼatsʼee Jeobá kao Jesús nga ndái kuiyoaa

Jmé kjoa xi bitjatojin nga nyaon nyaon. A jko̱ sʼin tijnalai ya yaniʼyali kʼoa a ji kjineli nga bijnyiʼai je familiali. Axo toji tinijchái je ʼndíxtili kʼoa ñʼai sokóli xi machjénli nga jetífe sá. A sʼa skuela titomjai kʼoa a totaon beli xti ya ndʼiaskuelali. A chʼin tíbʼetʼali axo tsín tichókjoanili nga jekjimajchíngai. Ngatsʼiñá nga kjoa bitjatojiaan tonga kʼoati tjín ndsʼee xi ngisasa tse kjoa faʼatojin. Xi basenkaoná kuinga ʼyaa nga jeme ndái kuiyolee je kjoa xi tjín ndʼaibi (2Co 4:16-18).

Jokji nga tichoyá, nda sʼe tokoán nga ʼyaa nga je Jeobá majinle jme kjoa xi bitjatojiaan, chjí be nga kixi kjimaa kʼoa nga chókjoajinná kʼoa tsee kjoanichikontʼain tsjoáná nichxin xi nroaján (Jer 29:11, 12). Je Jesús kʼoati mandosinle xi tʼatsaan. Kʼianga bʼenelee yaoná nga bitjosonná je xá xi kjinená, kʼoatso nga je tíjnakaoná ngantsjai nichxin (Mt 28:20). Kʼiatsa si̱kʼayaa nichxin nga si̱kjaʼaitsjenjiaan je kjoanda xi kjoaʼaíkao je Chjotaxále Niná, ngisaa nʼio sʼe̱jna je kjoachoya xi tjínná kʼoa chókjoajinná je kjoa xi bitjatojiaan (Ro 8:19-21).

KʼIANGA JECHÓTSENLAI JE VIDEO NGA JEMACHRIANLE KJOAXKÓN, TOSI TONDA JE CRISTO CHÓTSENLEE, CHÓTʼAYAJIN KJOACHJONANGI JEBI:

• Jósʼin tsakinyatʼaxinle chjota je Niná kʼoa jósʼin tíbichómani.

• Jmé kjoanda xi koyale je chjota xi kixi fitʼale Jeobá.

• Jókoa̱nnile nga ndasʼin kuiyoñá nichxin xi nroaján.

• Jméni xi nʼio tichoyalai nga kuitjoson ya sonʼndenaxó.