KJOAʼMIYA 49
Jósʼin nga nda koatiokao xínkjín xi jechixan (xi títjon)
Kʼianga tosʼa bixan chjota nʼio tsjoa satío kon, kʼoa kui xi mele nga tojo kʼoakji tsjoa sa̱tío kon tokʼia saʼndani. Kʼoa koaan kʼoasʼin koatio. Je chjotale Cristo xi jekjoatse chixankao xínkjín be kʼianga nda biyokoaa xíngiaa kʼianga nitjosoán je kjoafaʼaitsjen xi tsjoá je Biblia.
1. Jmé kjoafaʼaitsjen xi tsjoále Biblia je xi xʼin ma
Je Jeobá kui xá kitsjoale je xi xʼin ma nga je koandiaale je familiale (tʼexkiai Efesios 5:23). Kʼoa kui xi mele Jeobá nga kui kʼoakatasʼín je xi xʼin jmeni xi nda sikatío je familiale. Je Biblia itso kjoafaʼaitsjen xi tsjoále: “Tsjoacha katamao yánchjínno” (Efesios 5:25). Jósʼin tínchja̱ni én jebi. Je xi tsjoake chjoónle tjao be kʼianga toje tjío kʼoa kʼianga ʼya xi tjíokao, síkuindaa, tsjoále jmeni xi machjénle kʼoa kuenta sʼín jotjín kon (1 Timoteo 5:8). Xi ijngosani, basenkao je chjoónle nga nda kʼoéjna ngixko̱n Jeobá (Mateo 4:4). Tobʼelañá, koaan ñatjen kʼoetsʼoa kʼoa ñatjen kʼoexkia Biblia. Tsa nda sikuinda je chjoónle, nda kʼoéjna ngixko̱n Jeobá (tʼexkiai 1 Pedro 3:7).
2. Jmé kjoafaʼaitsjen xi tsjoále Biblia je xi chjoón ma
Je Énle Niná kʼoatso nga “je xi chjoón xkón katabe xʼinle” (Efesios 5:33). Jméni xi koasenkao nga skoe̱xkón xʼinle. Koaan kui kuenta sʼin jñani nda sʼín xʼinle, nga síkuinda je kʼoa kao je ʼndíxtile. Kʼoati koakole kjoaxkóntokon tsa tsjoánganʼiole jmeni xi kʼoendajin, tsa ngasin nganda kjoakao kʼoa tsa nda kuinchja̱ni xi tʼatsʼe ninga tsín je Jeobá síxále.
3. Jósʼin xi jechixan nga nda koatiokao xínkjín
Je Biblia itso tʼatsʼe xi jechixan: “Tokoa̱njngoni yaole” (Mateo 19:5). Kui xi tsonile jebi nga machjén nga sikuinda yaole nga jngó jngó ánni nga tsín koa̱nkjinnile xínkjín. Machjén nga sikʼayale nichxin xínkjín kʼoa nga ngasin nganda kʼoakuitsole xínkjín josʼin síkjaʼaitsjen kʼoa jotjío kon. Xi ijngosani, jé títjon tíjna xʼinle kʼoa tsa chjoónle, ali ʼyasa chjota xi kjaʼaí. Tojékjoán Jeobá xi ngisa títjon tíjna. Kʼoa tjínnele nga nʼio sikuinda yaole nga tsín kjaʼaí xi nʼio simiyo.
KATAʼYASAI JME XI TÍNCHJA̱NI
Kataʼyala jmé kjoafaʼaitsjen xi faʼaitʼa Biblia xi kuinyakao je xi jechixan nga ngisa nda koatiokao xínkjín.
4. Jon xi xʼin mao tsjoacha katamao je yánchjínno kʼoa tikuindao
Je Biblia itso: “Xi xʼin tsjoake katama yánchjínle, joni tsa titsʼeni yao” (Efesios 5:28, 29). Jósʼin tínchja̱ni én jebi. Chótsenlao VIDEO kʼoa cho̱bayaño jebi:
Jósʼin koako je xi xʼin ma nga tsjoake je chjoónle kʼoa nga kuenta sʼín jotjín kon.
Tʼexkiao Colosenses 3:12 kʼoa cho̱bayaño jebi:
Tojo tso texto jebi, jméni xi tjínnele sʼin je xi xʼin ma nga nda kʼoéjnakao je chjoónle.
5. Jon xi yánchjín mao tsjoacha katamao je xʼinno kʼoa jchaxkón
Je Biblia kʼoatso nga je xi chjoón ma tjínnele skoe̱xkón je xʼinle ni je Jeobá síxále kʼoa ni mai. Tʼexkiao 1 Pedro 3:1, 2 kʼoa cho̱bayaño jebi:
Tsa tsín je Jeobá síxále je xʼinli kuijin xi meli nga je katasíxále. Jméni xi ngisa nda nga sʼiain, a kuinga kʼuínya ʼndeʼndelai jotso je Énle Niná axo kuinga skoe̱ nga nda chjotai, nga ndʼéjin kʼoa nga koakolai kjoaxkóntokon. Ánni.
Kʼianga fáoyani je xi xʼin kao je xi chjoón jmeni xi sʼín ngisaa nda bichómani. Tsakui nichxin sakʼoa likui koa̱nngóson nga jao, tonga tsa totseni tsín sasénle je chjoón jme xi kuitso je xʼinle, tjínnele nga ngasin nganda kjoakao kʼoa kʼoakuitsole josʼin síkjaʼaitsjen. Tonga machjén nga kuenta sʼin je xi chjoón ma nga je Jeobá kui xá kitsjoale je xi xʼin ma nga je koandiaale je familiale. Machjén nga tsjoánganʼiole je xʼinle kʼiatsa jme xi kabʼéndajin. Tsa kʼoasʼin nda koatiokao xínkjín. Tʼexkiao 1 Pedro 3:3-5 kʼoa cho̱bayaño jebi:
Jósʼe kon je Jeobá kʼianga bexkón xʼinle je xi chjoón ma.
6. Koaan kʼoendajin je kjoa xi sʼe sakʼoale xi jechixan
Sakʼoa kjoa sʼele xi jechixan nga̱ chjotajée maa ngatsʼiaa. Kuinga machjénsíni nga tsjoánganʼiongañále xínkjín nga kʼoendajin je kjoa xi sʼe̱le. Chótsenlao VIDEO kʼoa cho̱bayaño jebi:
Jókoanni nga koankjinle xínkjín xi faʼa ya video.
Jókisʼin nga nda tsakatio ijngokʼani.
Tʼexkiao 1 Corintios 10:24 kao Colosenses 3:13. Kʼianga jekʼoéxkiao nga jngó jngó texto, cho̱bayaño jebi:
Ánni nga ngisa nda batiokaoni xínkjín xi jechixan kʼianga fitjenngi kjoafaʼaitsjen jebi.
Je Biblia kʼoatso nga tjínnele jchaxkoán xíngiaa. Kʼoati tjínnele nga tjao katamaná xíngiaa. Tʼexkiao Romanos 12:10 kʼoa cho̱bayaño jebi:
A ndatjín tsa kʼoasʼin sikjaʼaitsjen je xi xʼin kʼoa tsa je xi chjoón nga jekjoanla títjon kataʼyaxkón. Ánni.
TJÍNKʼA XI I̱ TSO: “Alikui tikʼoasʼin tiyokaonijin xíngijin josʼin tiyuijin ngasʼa”.
Jósʼin kʼuínyalai nga koasenkao jmeni xi tso je Biblia.
XI KACHOTʼAYÁ
Koaan nda koatiokao xínkjín xi jechixan kʼiatsa tsjoake xínkjín, tsa skoe̱xkón xínkjín kʼoa tsa sitjoson je kjoafaʼaitsjen xi tsjoá je Biblia.
Jmé xi kamajinli
Jókoa̱n sʼin je xi xʼin ma nga ngisa nda kʼoéjnakao je chjoónle.
Jókoa̱n sʼin je xi chjoón ma nga ngisa nda kʼoéjnakao je xʼinle.
Tsa jechixain, jmé kjoafaʼaitsjen xi faʼaitʼa Biblia xi koasenkaoli nga ngisa nda kuiyokao xíngio.
XI KOASENKAOSALI
Kataʼyai je kjoafaʼaitsjen xi koasenkaoli nga ngisa nda kuiyo ya yaniʼya.
Tinóʼyalai canción jebi, kui tsoya je kjoanichikontʼain xi sokóle xi jechixan kʼianga fitjenngi je kjoafaʼaitsjen xi tsjoá je Niná.
Kataʼyai jósʼin tsoyanile nga ʼyaxkoán je xá xi kjinele je xi xʼin ma.
Jmé xi tsakinyakao chjota jebi nga nda tsakatio ijngokʼani ninga tse kjoa kisʼele tsakai.
Jé Jeobá tsakasenkaonajin nga nda tsakiyokao ijngokʼaijin xíngijin (5:14)