Ningalani bakóle kjoaxkóntokon bandera je testigole Jeobá, ánni nga tsín ya tsjonjinni yaole jmeni xi ma kʼianga bitjole sʼuí

Jin xi testigole Jeobá maijin ʼyaxkónníjin je chjotaxá kʼoa kao bandera kʼoa kʼoati tsín bʼechjoalaijin ʼyani xi sʼín saludar bandera, tsa juramento tsjoále kʼoa tsa ʼya xi himno nacional sé.

Jin xi testigole Jeobá maijin alikui chʼasjaijin sʼuí jebi nga̱ ʼyaníjin nga kʼoatso Biblia nga chʼaotjín nga kʼoanʼia. ʼYaxkónníjin josʼin makjainle xi kjaʼaí tonga kʼoati nda satío tokuinjin nga ʼya xi bexkón josʼin makjainnajin.

I̱ artículo jebi jchaní:

• Jméni xi tso je Biblia tʼatsʼe sʼuí jebi

• Jónʼiaijin kʼiatsa kjoanʼio kʼoenenajin je kjoatéxoma

• A kʼoaʼmilaijin chjota nga jngo partido katatsjoánganʼiole

Jméni xi tso je Biblia tʼatsʼe sʼuí jebi

Jaola kjoafaʼaitsjen xi tsjoá Biblia kataʼyai jña chʼanginijin josʼin makjainnajin:

• Tojé Niná xi tjínnele jchaxkoán. “Jé Nináli kuisenxkónyʼintʼalai, jchaxkuín, kʼoa toje tojngo xi si̱xálai” (Lucas 4:8). Kʼianga ʼya xi juramento tsjoále bandera kʼoa nga himno nacional se kʼoatso nga kui títjon sikʼéjna nga skoe̱xkón naxinandále tikʼoajinni tojmeni xi kjaʼaí. Kuinga tsín nʼianijin saludar kʼoa tsín jndanilaijin bandera xi testigole Jeobá maijin.

  Kʼianga ma saludar bandera ya mangóson joni tsa xkóson sʼetsʼoale, kʼoa ya Biblia bʼéchjoa kjoa jebi (1 Corintios 10:14). Tjínkʼa chjota xi kʼoatso nga kʼoasʼin bekon bandera je religión joni tsa xkóson. Je chjota xi Carlton Hayes tsakʼin itso xi kiski: “Je bandera kui xi ngisa nʼio bexkón je chjota”.a Kʼoa kʼianga je kinchja̱ni je chjotale Cristo xi tsakatio ngasʼa, je Daniel Mannix i kitso: “Je chjotale Cristo [...] alikui kʼoati kisʼin tsanda je nga tjín xi kitsjoatʼale chjota je chjotaxá [romano], yaa mangóson ndʼaibi joni nga tsín ma saludar bandera”.b

  Ningalani tsín nʼiaijin saludar bandera tonga bakolaijin kjoaxkóntokon, alikui jtichaijin kʼoa alikui bakaijin.

• Ngatsʼiaa tongósonñá xi kao Niná (Hechos 10:34, 35). Ya Biblia kʼoatso nga je Niná tojngo chjota “kisindani ngatsʼi [...] chjota” (Hechos 17:26). Kui kʼoabixónnijin xi testigole Jeobá maijin nga chʼaotjín nga chjota chjaʼajiaan. Bakolaijin kjoaxkóntokon toʼya chjotani kʼoa tojñani tsʼe (1 Pedro 2:17).

Jónʼiaijin kʼiatsa kjoanʼio kʼoenenajin je kjoatéxoma

Xi testigole Jeobá maijin alikui kontra tiyolaijin je chjotaxá. Kʼoati ʼyaijin nga je Niná xi títsjoáʼnde nga tjío chjotaxá ánni nga katasʼeni kjoatéxoma (Romanos 13:1-7). Kʼoati ʼyaijin nga je chjotale Cristo tjínnele nga sitjosonle je chjotaxá (Lucas 20:25).

Tonga, jónʼiaijin tsa jngo kjoatéxoma kuitjo xi kontra tíjnale jmeni xi tso Niná. Sakʼoa jngo xo̱n nikasénle je chjotaxá tsa koa̱n sikʼantjaiyajin je kjoatéxoma.c Kʼoa kʼianga tsín síkʼantjaiyajin kjoatéxoma je chjotaxá, bakoníjin kjoaxkóntokon, tonga ngisaa nitjosonlaijin je “Niná kaoni tsa chjotasonʼnde” (Hechos 5:29).

A kʼoaʼmilaijin chjota nga jngo partido katatsjoánganʼiole

Mai. Xi testigole Jeobá maijin alikui kjoa política nojinjin yaonajin. Alikui juramento bʼaijin, alikui nʼiaijin saludar bandera kʼoa alikui himno nacional jndaijin. Ali tsakuijin kʼoanʼianijin tsa kontra tiyolaijin kʼoa tsa tsín sasénnajin jotso je chjotaxá, kui kʼoanʼianijin nga nitjosuinjin jmeni xi tso je Biblia.