Ánni nga nʼio sikjáojinña jokjiʼe̱

JÓSʼIAIN TSA JILANI

Tikjaʼaitsjenlai jebi: Kʼianga kotsensʼen cho̱tsín je Julia nʼio ʼmbá kji male. Kʼoa isʼin síkjaʼaitsjen: “Tjínnele nga katafaʼajen”. Je xijchále kʼoa kao miyole kʼoatsole nga nʼio nrʼoe kji.

Je Julia jekjoatse kʼoasʼin tísíkjaʼaitsjen nga mele sikʼajen “jngo jao kilo” yaole. Kʼoa nga kjoaʼajen tojngo jao nichxin kʼoéjnanchjan.

Jósʼiain tsa jilani je Julia.

TINKJÍNLAI TOKUIN

Alikui chʼaotjín nga sakʼoa nikjáojiaan jotisoaa. Saʼnda ya Biblia bʼaxki chjota xi xʼin kao xi yánchjín xi naskákoankjoan. Jolani Sara, Raquel, José, David kʼoa kao Abigail. Tobʼelañá, jngo chjoón xi Abisag tsakʼin xi kʼoasʼin bʼaxki̱ nga “nʼio naskánakisʼe” (1 Reyes 1:4).

Nʼio nkjín xti xi nʼio síkjáojin josʼin matsen. Kʼoa nga kʼoasʼin síkjaʼaitsjen alikui nda bichómani. Tikjaʼaitsjenlai jebi:

• Ya Estados Unidos, 58% xtiyánchjín xi kʼoakitso nga nʼio ai, tonga to 17% koanni je xi nʼio ai kjoaixi.

• Tojo ya Estados Unidos, kʼianga kitjochoya je yánchjín xi choa ai jotjín tjínnele nga ai koa̱n, 45% xi kʼoakitso nga kʼoasʼin síkjaʼaitsjen nga nʼio ʼmbá kjoan.

• Tjínkʼa xti xi nʼio síkjáojin nga nrʼoe katamakjoan kʼoa kui chʼin xi anorexia ʼmi tsaotʼale. Je chʼin jebi nʼio xkón nga̱ je chjota xi kui bʼetʼale likui tinda kjenni kʼoa bichó nichxin nga saʼnda tsín tikjenni.

Kʼiatsa tsen mali nga kui tjínli je chʼin xi anorexia ʼmi kʼoa tsa tsín tinda bichini, ali tobʼejngojin tokuin. Kʼoatʼinlai je xijcháli kʼoa tsa jngoje̱ chjota xi jejchínga xi nʼiotʼai. Je Biblia itso: “Jngo xi ñaki miyo tsjoakená tokʼiani, kʼoa jngoyale ndsʼeñá kʼianga kjoaba tijnajiaan” (Proverbios 17:17).

XI NGISA NDATJÍN XI KOA̱N SʼIAIN

Je xi ngisa chjíle ali tsakuijin josʼin matseen xi to sonngʼa kui jotjío ni̱ma̱ná. Chótsenlalai jotso je Biblia xi tʼatsʼe tile je rey David xi Absalón tsakʼin:

“Ngakjijnda naxinandá Israel, nijngojin chjota xi kʼoasʼin kichʼasjengʼa joni tsa Absalón nga nʼio naskánakisʼe. Tjen teyandso̱ko̱ saʼnda tsjájko̱ nʼio naskákisʼe” (2 Samuel 14:25).

Tonga ti jebi nʼio ngʼakon koan, nʼio xkaiʼa koan kʼoa tsakʼanachaa. Kʼoa kuinga ya Biblia likui nda bʼaxki̱ni. Tosa kʼoasʼin síkʼaxki̱ nga tsín kixi koan kʼoa nga nʼio tsʼen koan.

Kuijin nga i̱ tsoni je Biblia:

Chjóao “je ni̱ma̱ xi chjotse” (Colosenses 3:10).

“Ali tosonngʼalejin nga nda sayolao, nga jo nda bʼenʼio ntsja̱no [ . . . ], tonga tichjáon xi tíjnaʼma jajin ni̱ma̱ná” (1 Pedro 3:3, 4).

Alikui chʼaotjín nga meli nga nda katamatsain, tonga je xi ngisa chjíle kui jokjoain, ali tsakuijin josʼin matsain. Nga jekoa̱nskanni, je xi ngisa kuenta sʼin chjota kui jokjoain ali tsakuijin jotisui. Jngo tsoti xi Phylicia ʼmi itso: “Tsa naskánatisui xi to sonngʼa, ngotjo skoe̱ni chjota, tonga je xi ngisa kjoaʼaítsjenle xi tʼatsi kui jokjoain”.

CHÓTSENLAI YAOLI JOTISUI

A tsín sasénli jotisui.

A jesa kʼoasʼin kinikjaʼaitsjain nga cirugía sʼiain nga nda katamatsen je nkjain kʼoa tsa dieta kuijnaije̱ nga ngisa ndasʼin katamatsain.

Jméni xi meli nga ngisa nda katamatsen jotisui (chjoejin xi faʼaitʼa i̱bi).

• XKUIN

• NITJUIN

• NTSJA̱JKUI

• JOTISUI

• NTSJA̱JÉXKUIN

• JOKJI NKJAIN

Kʼiatsa “jaon” kasi nga jao kjoachjonangi xi títjon kʼoa tsa jao kʼoa tsa jan kachjoejin xi majanni, tikjaʼaitsjain jebi: Tsakui nichxin toji xomali nga chʼaosʼin matsain. Sakʼoaa tokui mangínñá jotisoaa kʼoa tokui nʼio nikjáojiaan (1 Samuel 16:7).