Kjoafaʼaitsjen xi koasenkao xi totaon ʼya ya yaniʼya
Je Organización Mundial de la Salud (OMS) kʼoatso nga kʼoasʼin totaon ʼya je yánchjín jngo tjíjtsa Sonʼnde yaa mangóson joni jngo chʼinʼbi, kʼoa nga machjén nga kjitʼanangi sʼe̱ndajin kjoa jebi. Je OMS kʼoatso nga nʼio nkjín yánchjín xi totaon ʼya kʼoa xi saʼnda ʼyataon. Je nó xi jaʼato je ONU kʼoakitso kʼianga jngó jngó nichxin mela 137 yánchjín nikʼien kʼoa nga tije xokisikaoni je xi xʼinle ma kʼoa tsa jeje̱ xi xínkjín mani.a
Jebi kui bakóná nga nʼio nkjín mani xi totaon ʼya ya yaniʼya, ningalani tsín majinle je chjota jokji kjoañʼai faʼá kʼoa josatío kon xi kui kjoa faʼatojin.
A kui kjoa tibitjatojin. A ʼyaxkon jngui je xi kui kjoa tífaʼatojin. Tsa kʼoalani koasenkaono kjoafaʼaitsjen jebi.
Kuicho nichxin nga tsín ʼya xi titotaon jchani
Jósʼin kuisenkoaa je xi totaon ʼya
Alikui ji tjínli jée
Jmeni xi tso Biblia: “Kʼoasʼin ngatsʼiaabi kʼoailee kuinda Niná xi titʼatsʼe yaonáni nga jngójngoá” (Romanos 14:12).
Tikjaʼaitsjain jebi: Je chjota xi totaon tíbeli, kuenta tsjoále Niná.
Kʼiatsa kʼoakuitsoli je xʼinli nga kui kʼoasíkaonili nga ji tjínli jée, ali makjainjinli. Je yánchjín tjínnele nga tjao jcha alikui koa̱n nga totaon jcha (Colosenses 3:19).
Sakʼoa kui kʼoasʼín kʼani je chjota nga chʼin tjínle, tsakuije̱ nga kui kjoa jaʼatojin nga sʼa koanjchínga kʼoa tsa nʼio xán ʼbi. Ninga kʼoalani, kuenta tsjoále Niná josʼin skoe̱konli. Kʼoa jé xi tjínnele nga sikʼantjaiya yaole.
Tijái nganʼio
Jmeni xi tso Biblia: “Ndasʼin bichótsjoá nga nkjín ma xi tsjoá kjoafaʼaitsjen” (Proverbios 15:22).
Tikjaʼaitsjain jebi: Tsa xkón tijnai kʼoa tsa tsín ʼyai jmeni xi sʼiain, tijái nganʼio.
Ánni tjínnesínile nga si̱jái nganʼio. Tobʼelañá, tsa totaon tíʼyali nkjínjin koya tjínni xi nikjáojin kʼoa alikuijin ʼyai jmeni xi sʼiain. Tsakui nichxin kui jebi xi ñʼai kjimali:
Nga xkón tijnai
Nga xkón tjío je ʼndíxtili
Nga tsínli tao̱n
Nga tsjoachai je xʼinli
Tsakui nichxin kʼoasʼin nikjaʼaitsjain nga chan sikʼantjaiya yaole je xʼinli
Toxá kʼoama sakʼoani nga tsín ʼyaa jmeni xi nʼia kʼoa sakʼoa kʼoasʼin nikjaʼaitsjeen nga tsínkʼia sʼe̱ndajin kjoaná. ʼYáni xi koa̱n si̱jélai nganʼio.
Koaan je tijélai nganʼio jngo xíngi kʼoa tsa miyoli. Tsa kʼoasʼiain koasenkaoli kʼoa tsjoánganʼioli. Kʼiatsa je kʼoéyanajmílai je xi mandosinle xi tʼatsi nda sʼe̱ tokuin.
Katasatíoli númerole teléfonole je chjota xi binyakao je yánchjín xi totaon ʼya. Tsa ya kuinókjoai, kjitʼa nangi kuinyakaoli. Chjota jebi kui xá tjíoni nga koasenkaoli jokoa̱n sʼiain kʼiatsa totaon tíʼyali. Tsa je xʼinli xi mele sikʼantjaiya yaole kʼoati koa̱n ya kuinókjoai, kʼoa jé kʼoakuitsole jmeni xi tjínnele sʼin.
ʼYasa xi kʼoati koa̱n koasenkaoli. Koaan kuinókjoalai chjinexki kʼoa tsa ʼyasa xi koasenkaoli kʼianga xkón tijnai.
Alikui toji tijnai
Jmeni xi tso Biblia: “Je Jeobáb chrian tíjnale je xi nʼio aon tjío ni̱ma̱le; bʼasjentjai xi jekisikinroajen kon” (Salmo 34:18).
Tikjaʼaitsjain jebi: Je Niná kʼoatso nga koasenkaoli.
Je Jeobá makjáojinle xi tʼatsi (1 Pedro 5:7). Be jme kjoa xi tibitjatojin, be jotjín kjoafaʼaitsjenli kʼoa jotjín tokuin. Kui Biblia sichjén nga koasenkaoli. Kʼoatso nga koa̱n kʼoétsʼoalai, nga si̱jélai kjoachjine kao nganʼio ánni nga chókjoajinnili je kjoa xi tibitjatojin (Isaías 41:10).
Kuicho nichxin nga tsín ʼya xi titotaon jchani
Jmeni xi tso Biblia: “Nga jngó jngó yaa koationgi xka̱totseele kao yá higole, kʼoa liʼya xi kuinyaxkónle” (Miqueas 4:4).
Tikjaʼaitsjain jebi: Ya Biblia kʼoatso nga chan kuicho nichxin nga tsín tijme kjoa sʼe̱ni ya yaniʼya.
Jé Jeobá xi koa̱nle tondiaa kʼoendajin je kjoa xi tjínná. Ya Biblia itso: “Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male” (Apocalipsis 21:4). Nga kui nichxin cha̱jinná je kjoa xi tibitjatojiaan ndʼaibi, kʼoa tokuisa kjoaʼaítsjenná je xi ndatjín (Isaías 65:17). Kui jebi je kjoanda xi tsjoáli je Niná nichxin xi sʼa nroá.
a ʼYani xi tínchja̱ni i̱bi jéní xi yánchjín, tonga kʼoati matʼain sakʼoa xi xʼin.
b Ya Biblia kʼoatso nga Jeobá ʼmi je Niná.