Jótjín testigole Jeobá ʼyaxkuin. Tsakui nichxin kui kʼa chjota ndaindʼiali, xi ñatje̱n nixái kʼoa tsa jeje̱ xi ñatje̱n ʼmi skuela. Kʼoa tochale jesa tsakjákaoli tʼatsʼe Biblia. Tonga, ʼyákjoánnijin kʼoa ánni nga ʼmiyasonsínijin jme xi makjainnajin.

Toxkia chjotaníjin. Kjaʼaí kjaʼaí kinʼiaijin ngasʼa kʼoa kjaʼaí kjaʼaísʼin koanjcháijin. Kjaʼaí relijión tiyojinjin ngasʼa kʼoa tjínkʼa xi tsín makjainle tsakai tsa tíjna je Niná. Kʼianga kjesa testigole Jeobá maijin, títjon kjoanla nda kichotʼayaijin jme xi bakóya je Biblia (Hechos 17:11). Koankjainnajin jme xi tsakʼinyanajin kʼoa liʼya xi tsakʼénenajin nga kʼoasʼin je Niná Jeobá tiʼyaxkuínjin.

Nda tiyuijin nga kʼoasʼin Biblia chotʼayaijin. Kʼoati kjoa bitjatojinjin kʼoa kʼoati kui tibixkantʼakoaijin je jée xi kichʼá. Tonga kʼianga tinichjainjin kjoafaʼaitsjen xi faʼaitʼa Biblia ngisa nda tibiyuijin (Salmo 128:1, 2). Kʼoa kuinga kʼoasʼin ʼmiyasínilaijin chjota jmeni xi jeʼyaijin tʼatsʼe Biblia.

Kʼoasʼin mangínkoaijin yaonajin jotso je Biblia. Je Énle Niná basenkaoná nga nda biyokoaa xíngiaa, nga ʼyaxkoán xíngiaa, nga chjotakixi maa kʼoa nga bakoá kjoanda. Je kjoatéxomale Niná kʼoati binyakao chjota nga tsín yaole tsjoáchʼinle, nga chjotanixá ma, nga jtín sʼin batio ya yaniʼyale kʼoa nga tsje fikao yaole. Ñaki tjíojngo tokuinjin kʼianga je “Niná tongóson fikao ngatsʼi” chjota. Jinjin jtín tiyuijin jngo tjíjtsa Sonʼnde nga̱ tojngo kjoamakjain tjínnajin, tojngo naxinandá maijin ngatsʼijin. Alikui mangínnijin josʼin tsen yaole xi ngikʼa kʼoa alikui kjoa polítika nojinjin yaonajin. Tsínsa ijngo relijión xi kʼoasʼin tjíojtín josʼin tiyojtínjin (Hechos 4:13; 10:34, 35).

• Jmé kjoa xi kʼoati bitjatojinjin xi testigole Jeobá maijin.

• Jósʼin tíbasenkaonajin Biblia kʼianga kui tichotʼayaijin.

Nʼio nkjín chjota xi kʼoasʼin síkjaʼaitsjen nga tosʼa tsʼatsen je relijiónnajin. Tonga jetsʼato jao jmi kao ñato siento nó nga testigo sʼin ʼyale je choʼndale Niná Jeobá (Isaías 43:10-12). Kʼoa nga kjesa bichójin nó 1931, Chjota xi kotʼaya Biblia sʼin ʼyanajin tsakai. Ánni nga testigole Jeobá sʼin tsakʼai jaʼaínsínilaijin relijiónnajin nga kicho nó jebi.

Je jaʼaín xi kichʼaijin kui síkʼéjnatsen joʼmi Niná. Je xo̱njchá xi kjimasjai xi Énle Niná nya jmi kʼa faʼaitʼa je jaʼaínle Jeobá. Tonga nʼio nkjín Biblia xi kitjoxinle jaʼaín jebi kʼoa ʼndele nga Jeobá kuitso to Señor kʼoa to Niná tso. Tonga je Niná kʼoakitsole Moisés nga Jeobá ʼmi je jaʼaínle, kitsole: “Kui jebi jaʼaínna tokʼia saʼndani” (Éxodo 3:15). Kʼoa kʼoasʼin kisikʼéjnatsen nga tsín mangóson kao niná ndiso xi tjín. Jinjin nʼio tsjoa tjíonajin nga je jaʼaíntsjele Niná kichʼaijin.

Je jaʼaín xi kichʼaijin kui bakó nga tʼatsʼe Jeobá nokjoanijin. Nʼio nkjín chjota tjíobatio saʼnda ngasʼa xi kʼoasʼin tjíobakó kjoamakjainle tʼatsʼe Jeobá, fitsʼiakjoanni Abel. Xijekoanni, “ali tokʼoa kji nkjín chjota testigo” tsakatiosa jolani tsa Noé, Abraham (Abrahán), Sara, Moisés kao David (Hebreos 11:4–12:1). Kʼoa tojo sʼín jngo testigo nga nchja̱ntjai jngo chjota xi tsín jme jée tjínle ya ngixko̱n kjoatéxoma, kʼoatisʼin nokjoantjaijin jokjoantjínni xi tʼatsʼe Niná.

Kui choa̱le Jesús mangíntjenngijin. Ya Biblia “testigonda xi ñaki kjoakixi” ʼmile je Jesús (Apocalipsis 3:14). Je Jesús kisikʼéjnatsen je jaʼaínle Niná kʼoa tsakakóya jokjoantjínni xi tʼatsʼe Niná (Juan 17:26, NM; 18:37). Kʼoatisʼinni ndʼaibi, je xi ñaki chjotale Cristo ma tjínnele nga kʼoejnatsen jaʼaínle Jeobá kʼoa nga kui jaʼaín jebi kʼoa̱. Kʼoa kui xi tinʼiaijin xi testigole Jeobá maijin.

• Ánni nga testigole Jeobá sʼin tsakʼai jaʼaínsínilaijin relijiónnajin.

• Jójetjín tse nga testigo tjíole je Jeobá i̱ Sonʼnde.

• ʼYáni xi “testigonda” ʼmile.

Je Biblia tongini kʼoakitso kʼianga sʼe̱ chjota xi sikitsónjin jmeni xi tso je Énle Niná kʼianga jekuiyá Cristo (Hechos 20:29, 30). Kʼoa kʼoakoan. Chjota xokjoan tojngo kisʼin jmeni xi tsakakóya Jesús kʼoa jmeni xi tsakakóya je relijión ndiso, kʼoa je relijión xi kisikʼatsen tondisoni ninga chjotale Cristo kitsole yaole (2 Timoteo 4:3, 4). Tonga jósʼin ʼyanijin nga ñaki nda kjimajinnajin jme kjoanni xi bakóya je Biblia.

Jekicho nichxin nga tísíkʼéjnatsen Jeobá jokjoantjínni énle. Je Jeobá tongini kʼoakitso kʼianga je nichxin xi kjoetʼa sa tse sa tse jchale jokjoantjínni énle (Daniel 12:4). Kʼianga nó 1870, jngo jtín mani chjota tsakatio xi mele skoe̱ jokjoantjínni xi tʼatsʼe Biblia kʼoa tsabe nga to kjoandiso tjíobakóya je relijión. Kuinga tsakatiotsʼinyasíni jokjoansʼin tsoyanile je Biblia kʼoa jé Jeobá tsakasenkao nga koanchoyale.

Tsakatio chjota xi ñaki nda kiskotʼayason jmekjoanni xi bakóya je Biblia. Josʼin kiskotʼaya Biblia chjota jebi kʼoatisʼin chotʼayá tsanda ñá saʼnda nichxin xi tiyoaa ndʼaibi. Jngó jngó koya kiskotʼayajin jmeni xi tínchja̱ni je Biblia. Kʼoa jméni xi kisʼin nga sakʼoa tsín koanjinle jmeni xi kiskotʼaya. Kjaʼaí bersíkulo kisingósonkao xi tikui tínchja̱ni ánni nga koanchoyasínile. Kʼoa nga jekoanchoyale kʼoa tsabe nga tsín jña kjántʼa ngakjijngo Biblia jmeni xi koanjinle, tsakʼétʼaxon. Kʼoa nga kʼoakisʼin tiyaa Biblia koansjaitʼanile jokjoantjínni tʼatsʼe jaʼaínle Niná, tʼatsʼe Gobiernole Niná, jmeni xi tjínndajinle kao chjotasonʼnde, josʼin tjío xi jekʼien kʼoa kao kjoachoya xi tjínle nga kjoaʼáyanile. Kʼoa nga jekoansjaiyale jotjínni alikui tikʼoakisʼinni josʼín chjota kʼoa alikui tikui kjoamakjain kisʼenile (Juan 8:31, 32).

Kʼianga nó 1879 je choʼndale Niná koanjinle kʼianga jekicho nichxin nga sʼe̱jnatsen jngo tjíjtsa Sonʼnde jokjoantjínni xi tʼatsʼe Niná. Kʼoa nga kui nó jebi kʼiaa tsakʼétsʼiakao nga tsakʼasje je rebista xi ʼmi: Xo̱n xi Bájinkonná tʼatsʼe Chjotaxále Jeobá. Kʼoa nichxin xi tiyoaa ndʼaibi 240 naxinandáyʼai tíʼmiyason énle Niná kʼoa tsʼato 750 én tíbitjo je xo̱n xi tíbʼabíson. Nisañandiajinla nga kʼoasikji tísʼejnatsen énle Niná.

• Jméni xi kinikao je énle Niná kʼianga jekʼien Cristo.

• Jméni xi tíbasenkaoná nga tiʼyaa jokjoantjínni xi tʼatsʼe Niná.

Je testigole Jeobá nkjín koya Biblia kisichjén ngasʼa. Tsakʼasje kʼoa kisikʼabíson Biblia jebi. Tonga tsabe nga jngo Biblia machjénle chjota xi ñaki koasenkao “nga kuichonrʼoe xi kjoakixi”, kʼoa jé Niná xi kʼoasʼin mele (1 Timoteo 2:3, 4). Kʼianga kicho nó 1950 kʼiaa choa choa kitjo je Biblia xi én inglés faʼaitʼa je xi Traducción del Nuevo Mundo ʼmi. Biblia jebi kui én síchjén xi machjén ndʼaibi kʼoa ñaki kʼoakisʼe jotjío je xo̱njchá xi kjio saʼnda ngasʼa kʼoa tsʼato 130 én tíbitjo.

Jngo Biblia machjén xi sasa koa̱njinniná. Én xi nokjoaa bijbi bʼantjaiya jokji nga faʼato nichxin. Nkjín Biblia kjio xi énjchá síchjén kʼoa xi tsín timajinniná én xi faʼaitʼa. Kʼoati kjimasjai xo̱njchá xi Énle Niná nya. Xo̱n jebi ngisa mangóson kao je xo̱n xi títjon kichji. Kʼoa ngisa basenkaoná nga machoyaná nga jan én xi títjon kichji Biblia, je én Hebreo, Arameo kʼoa kao Griego.

Jngo Biblia machjén xi ñaki kʼoasʼe̱ jotso je Énle Niná. Je chjota xi síkʼatoya Biblia alikui koa̱n nga tokʼoakʼoe Biblia josʼin mele, tjínnele kʼoakʼoe jokjoantjín je xo̱n xi títjon kichji. Tonga ndʼaibi, nʼio nkjín Biblia xi tsín faʼaitʼa jaʼaínle Niná nga Jeobá ʼmi.

Jngo Biblia machjén xi kʼoakuitso ʼya tsʼe je én xi nya (2 Samuel 23:2). Je Traducción del Nuevo Mundo mela ñato jmi kʼa faʼaitʼa je jaʼaínle Niná josʼin jaʼaitʼa je xo̱njchá xi kjio ngasʼa, tojosʼin bakó xo̱njchá xi faʼaitʼa ngitsʼin ibi (Salmo 83:18). Je Biblia jebi ñaki nda maxkianá josʼin jaʼatoya je kjoafaʼaitsjenle Niná, nga̱ je xi kisikʼatoya nʼio nkjín nó tsakatiotsʼinya. Ni jekijna Biblia jebi kʼoa ni mai je én xi nokjoai, tingalai yaoli nga nyaon nyaon tʼexkiai je Énle Niná (Josué 1:8; Salmo 1:2, 3).

• Ánni nga jngo Biblia tsakʼasjesíni je testigole Jeobá.

• Jméni xi ndatjín nga sʼin nga nyaon nyaon ʼyani xi mele skoe̱ jme xi mele Niná.