Je xi chjotajchínga sʼin tjío nga jngó jngó jtín xi tsʼe relijiónnajin alikui machjíle. Kui choa̱ mangíntjenngijin jokisʼin je naxinandále Cristo nga sʼa kinroatsʼiani. Jé tjoéjin je ndsʼee xi koa̱nle sikuinda naxinandále Niná (Hechos 20:28, NM). Ndsʼee jebi nda tjío ngixko̱n Niná kʼoa jé bándiaale kʼoa síkuinda je jtín. Kui tjíofitjenngi én jebi: “Ali kao kjoanʼiojin nikuindao, tokao kjoandano kʼoasʼiaon. Ali tʼatsʼe xi kuinje̱no xi chʼao tjín, tokao kjoatsjoa kʼoasʼiaon” (1 Pedro 5:1-3). Jósʼin binyakaoná.

Síkuindaná. Je xi chjotajchínga sʼin tjío ya jinjtín bándiaaná kʼoa síkuindaná nga nda kuiyoaa ngixko̱n Niná. Be nga Niná kitsjoale xá jebi kʼoa alikui kʼoasʼin bʼénená josʼín tsa jngo nai, tosa kui kotsenle nga ndasʼin kuiyoaa kʼoa nga tsjoa sa̱tío tokoán (2 Corintios 1:24). Tojo sʼín jngo chjota xi barré koʼnda, nga nʼio nda síkuinda nga jngó jngó barréle, je xi chjotajchínga sʼin tjío bʼénele yaole nga nda bexkon ngatsʼi xi tjíojin ya naxinandále Niná (Proverbios 27:23).

Tsoyaná josʼin si̱tjosoán xále Niná. Je xi chjotajchínga sʼin tjío bationdakao jmeni xi ʼmiyaná ya kjoajtínná nga xki̱ xomana. Kʼoa je kjoajtín jebi sítajasa kjoamakjainná (Hechos 15:32). Ndsʼee jebi kʼoati je bándiaa nga ʼmiyason je énle Niná, tsoyaná jósasʼin kʼuínyaa je énle Niná kʼoa fikaoná nga ʼmiyasoán.

Tsjoánganʼioná nga jngó jngoá. Je xi chjotajchínga sʼin tjío binyakaoná nga ngisa nda biyoaa ngixko̱n Jeobá, físíxatʼaná ya niʼyaná kʼoa fákaonajmíná ya Ndʼia jña chotʼayá. Kʼoa kui Énle Niná síchjén nga binyakaoná kʼoa nga sínʼio tokoán (Santiago 5:14, 15).

Tonga me ngatsʼi xi chjotajchínga sʼin tjío ya jinjtín xi síxá nga bajngiʼa yaole kao familiale. Kʼoa tjínnele nga kʼoati sikuinda familiale. Ngatsʼi ndsʼee jebi bakinle nga jchaxkoán (1 Tesalonicenses 5:12, 13).

• Jmé xá xi kjinele je xi chjotajchínga sʼin tjío ya jinjtín.

• Jósʼin bakó nga mandosinle xi tʼatsaan.

Jao koya chjota síkʼaxki̱ ya Biblia je xi kjinele jme xá xi tjín ya jinjtín. Jéní xi chjotajchínga sʼin tjío kʼoa kao xi siervo ministerial ma (Filipenses 1:1, NM). Nʼio nkjín mani je ndsʼee xi kui xá tjínle nga jngó jngó jtín. Tonga kuila kataʼyaa jmé xá xi kjinele je xi siervo ministerial ma ya jinjtín.

Yaa binyakao je xi chjotajchínga sʼin tjío. Tjíoní siervo ministerial xi sʼa xti kʼoa kao xi jetjínle nó. Ndsʼee jebi nda tjío ngixko̱n Niná kʼoa nda sítjoson je xále. Tsjoánganʼio nga nda katamaxá ya Ndʼia jña chotʼayá. Kʼianga kʼoasʼin nda síxá je siervo ministerial ya jinjtín, je xi chjotajchínga sʼin tjío bitjosonle je xá xi kjinele, nga kʼoasʼin bakóyale kʼoa síkuinda je jtín.

Nʼio chjíle je xá xi sʼín je siervo ministerial. Tjínkʼa xi je kjoeyaná kʼoa síkatíondaná kʼianga bichoaa kjoajtínná. Tjío xi batioʼnda aparato xi tsʼe sonido, tjío xi tsjoá libro kʼoa xi tsjoá rebista, tjío xi je kjinele jotjín tao̱n maña kʼoa jotjín feya, tjío xi je kʼoatsole je ndsʼee jñani koaikakóyason. Ndsʼee jebi kʼoati tsjoánganʼio nga mandachon ya Ndʼia jña chotʼayá kʼoa kʼoati tjío xi tsjoánganʼiole je ndsʼee xi jekoanjchínga josʼin tjínndajinle je xi chjotajchínga sʼin tjío. Nga kʼoasʼin sítjoson tojme xá xi sʼenele je xi siervo ministerial ma, je xíngiaa ngisa fikʼásale kjoaxkóntokon (1 Timoteo 3:13).

Nda choa̱ batíole xi ngikʼa. Je xi siervo ministerial sʼin tjoéjin kuinga bʼainile xá jebi nga kʼoasʼin tjíofikao yaole jotso je Énle Niná. Je kjoanokjoaya xi tsjoá ya jinjtín sítaja kjoamakjainná. Kʼoa nga kʼoasʼin nda tsoyason kʼoati matsjoajinná tsanda ñá. Kʼianga kʼoasʼin tsjoánganʼiole xi chjotajchínga sʼin tjío tse kjoatsjoa sʼe kʼoa jtín sʼin biyoaa ya jinjtín (Efesios 4:16). Je siervo ministerial kʼoati chan chjotajchínga sʼin batio xijemani.

• ʼYáni xi siervo ministerial sʼin batio.

• Jósʼin tsjoánganʼio je xi siervo ministerial ma nga nda katamaxá ya jinjtín.

Ya Escrituras Griegas Cristianas síkʼaxki̱ kjitʼa je Bernabé kʼoa kao pastro Pablo. Nga jao chjota jebi superintendente koan kʼoa kisíxatʼa je jtín xi tjío nga kʼia. Ánni kʼoakisʼinsíni. Kuinga nʼio koanndosinle je xi tongóson sʼin koankjainle. Je pastro Pablo nʼio koanmele nga koaisíxatʼa ijngokʼa je ndsʼe̱ kʼianga skoe̱ josʼin tjíoni. Ki ninga nʼio kjin nga kitsjoánganʼiole je ndsʼe̱ (Hechos 15:36). Kʼoakjoánti tjío kon ndʼaibi je superintendente xi tsʼe circuito.

Sínʼiojinná. Je superintendente xi tsʼe circuito kanla jtín kjinentsja kʼoa jngó jngó fisíxatʼa nga xki̱ xomana. Yaa batiokao jtín jebi kʼoa jao kʼa síxatʼa nga xki̱ nó. Koaan chja̱kaonajmiá ndsʼee xi kʼoasʼin tjíosíxá, kʼoa tsa jechixan kʼoati koa̱n chja̱kaonajmiá je yánchjínle. Tsa kʼoasʼiaan nʼio koasenkaoná jokji kjoafaʼaitsjen jetjínle. Bʼénele yaole nga bexkon ngatsʼi je ndsʼee, ninga xi jejchínga kʼoa ninga xi sʼa xti. Kʼoati nʼio tsjoa male nga fikaoná nga mangínkʼinyasoán kʼoa nga mangínkakoyalee je chjota xi jetiʼmiyalee Biblia. Ndsʼee jebi kʼoati fikao je xi chjotajchínga sʼin tjío nga fisíxatʼa je ndsʼee. Kʼoati tsjoá kjoanokjoaya ya jinjtín kʼoa ya kjoajtíntse xi satío, kʼoa je kjoanokjoaya xi tsjoá nʼio sínʼiojinná (Hechos 15:35, NM).

Mandosinle xi tʼatsaan. Je superintendente xi tsʼe circuito kui xi ngisa fini josʼin tjío ngixko̱n Niná je jtín. Batiojtín kao je xi chjotajchínga sʼin tjío ya jinjtín kʼoa kao xi siervo ministerial ma nga fáoyani josʼin kjimaxá ya jinjtín kʼoa tsjoále kjoafaʼaitsjen tsa jñani tsín kʼoasʼin tjíobitjosonle xále. Kʼoati binyakao je xi precursor sʼin tjíosíxá nga ndasa sʼin katatsoyason. Nʼio tsjoa male kʼianga bexkon je chjota xi tosʼa tjíobichó ya kjoajtínná kʼoa nga tjíobʼénele yaole nga tjíosítjosonle Niná. Nga jngó jngó ndsʼee jebi, ñaki kao kjoatsjoa tjíosíxá xi totʼatsaan (2 Corintios 8:23). Chjénngia kjoamakjainle kʼoa kao josʼin tjíobexkón je Niná (Hebreos 13:7).

• Jmé xá bichósíxatʼani je jtín je superintendente xi tsʼe circuito.

• Jméni xi koa̱n sʼiain nga ngisasa tse kjoanda so̱koli kʼianga bichósíxatʼa je jtín je superintendente.

Kʼianga jngo kjoaxkón sʼe, jin xi testigole Jeobá maijin kjitʼanangi binyakoaijin xíngijin xi kjoaxkón bichóne. Kʼianga kʼoanʼiaijin bakoníjin nga ñaki tsjoachaijin xíngijin (Juan 13:34, 35; 1 Juan 3:17, 18). Jósʼin binyakoaijin xíngijin.

Nikatíoníjin tao̱n xi kʼoasʼin machjén. Nichxin kjoatse, kʼianga jngo kjinrá kisʼe ya Judea, je chjotale Cristo xi ya tsʼe Antioquía kisikasénle tao̱n je ndsʼe̱ xi ya tjío (Hechos 11:27-30). Kʼoati nʼiaijin ndʼaibi, kʼianga sʼejinnajin nga kjoañʼai tjíofaʼatojin je ndsʼaijin ya jñani xin naxinandá, nikatíoníjin tao̱n ya jtínnajin ánni nga je nikasénsínile (2 Corintios 8:13-15).

Binyakaoníjin xíngijin. Je xi chjotajchínga sʼin tjío ya jñani kjoaxkón kasokó básjai ngatsʼi xi ya tjíojin ya jtín jña bʼakaole kʼoa kʼoasʼin majngoni kon. Tsakui nichxin je ndsʼee xi kui xá kjinele nga binyakao xíngiaa jña kjoaxkón kasokó je kʼoendajin nga katabʼaile tsojmi xi ma chine, nandá, najño, nga katamaxkile kʼoa nga kuijnyísjaile niʼya jña koationi je ndsʼee xi kjoaxkón kabichóne. Nʼio nkjín ndsʼaijin kao tichjaijin xi jenʼio nda be josʼin maxá xi fitsjoánganʼio ya jñani kjoaxkón sʼe kʼoa jé be gastole. Tjínkʼa xi kui bʼéndaya je niʼya xi kabitson kʼoa tsakuije̱ Ndʼia jña chotʼayá. Kʼianga kʼoasʼin jtín tiyuijin kʼoa nga nixájtínjin kui xi binyakaonajin nga ngisa xátíya nixáijin ya jñani kjoaxkón bichó. Je xi ngisa binyakoaijin jéní xi tongóson sʼin makjainnajin, tonga kʼoati binyakoaijin chjota xi kjaʼaí jokji tje̱n kʼoamanajin, alikui kui mangínnijin jme relijión tjíojin (Gálatas 6:10).

Ninʼioníjin kon chjota kʼoa ʼmiyalaijin jotso Biblia. Je xi ngisa machjénle je chjota xi kjoaxkón bichóne kuinga si̱nʼio kon. Kʼoa je xi koa̱n tsjoále nganʼio xi machjénle jéní Jeobá, nga̱ jéní “Niná xi tsʼe ngayije kjoanijetakon” (2 Corintios 1:3, 4). Kʼoa kuinga ʼmiyasínilaijin je chjota xi kjoaba tjíojin jme kjoachoya xi tsjoá Biblia, kʼianga je Gobierno xi tsʼe Niná jeme kjoaʼaxin je kjoaxkón xi kʼoasikji kjoaʼaon kao kjoañʼai síkatíojinná (Apocalipsis 21:4).

• Ánni nga kjitʼanangi binyakaosínijin xíngijin kʼianga kjoaxkón bichóne.

• Jméni xi ʼmiyalaijin je chjota xi kjoaxkón bichóne nga ninʼiuijin kon.

Kʼianga kjesa nikʼienjin Jesús, ño chjotale xi tsakjákaonajmí tʼaxin, jéní Pedro, Jacobo (Santiago), Juan kʼoa kao Andrés. Kʼianga jekʼoakitsole chjotale jmeni choa̱ xi sʼe̱ nga kuichokjetʼa nichxin, jngo kjoachjonangi xi nʼio tjínle kjoandosin tsakʼéjna, kitso: “ʼYá ni tsokʼoa je choʼnda xi nʼiotʼakon, xi nda be xá, xi je naile kisikʼéjnaʼnda xikʼa choʼndale, jméni nga tsjoásínile xi koakje̱nni nga fichó choa̱le” (Mateo 24:3, 45; Marcos 13:3, 4). Kʼianga kʼoakitso Jesús ali tsakuijin tsojmi xi ñaki ma chine xokitsole, kui jmeni xi tjínnele jchaa tʼatsʼe Niná xokitsole. Kʼoa nga nai ma je Jesús jngo jtín chjota kiskoejin xi tíbakóya ntsjaintsjaile énle Niná je chjotale nichxin xi totífetʼa. ʼYáni je choʼnda jebi.

Tojngo jao mani je chjotale Cristo xi ya koai ngʼajmi xi ya tjíojin jtín jebi. Je “choʼnda” jebi jéní Cuerpo Gobernante xi tsʼe testigole Jeobá. Kʼoa ñaki kʼiakjoán choa̱le tíbakóyale je énle Niná je choʼndale Jeobá. Tsa tsínlani choʼnda jebi likuijin ñaki choa̱le kʼuínyaná je énle Niná (Lucas 12:42).

Jé kjinele nga síkuinda niʼyale Niná (1 Timoteo 3:15). Je Jesús jé tsakánele jtín jebi nga sikuinda je naxinandá xi tíjnale Jeobá i̱ tʼanangi. Jé síkuinda je tsojmi xi tjínle naxinandále Niná, jé bándiaa josʼin ʼmiyason, kʼoa kui síchjén je jtín xi tjío nga tsoyaná énle Niná. Je choʼnda jebi kʼiakjoán tsoyaná xi tʼatsʼe Niná kʼiani nga machjénná, kʼoa kui síchjén ngayeje xi faʼa ya kjoajtínná, ya kjoajtíntsená, kʼoa kao ngayeje jmeni xi bʼasje je naxinandále Niná jolani tsa je xo̱n xi nichjén nga ʼmiyasoán.

Je “choʼnda” jebi nʼiotʼakon kjima Niná nga̱ kui tjíotsoya jokjoantjínni Énle Niná kʼoa tjíosítjoson xále nga tjíotsoyason je énnda chjotse. Kʼoati xi nda be xá ʼmile nga̱ kjimale tjíosíxákao je tsojmi xi tjíole je Cristo i̱ tʼanangi (Hechos 10:42). Je Jeobá tísíchikontʼain je xá xi tjíosʼín choʼnda jebi, sa nkjín sa nkjín chjota xi testigole Jeobá kjima kʼoa sa nkjín sa nkjín koya xo̱n tjíobʼasje xi énle Niná nroatʼa (Isaías 60:22; 65:13).

• ʼYáni xi tsakánele Jesús nga kuitsoya ntsjaintsjaile chjotale je énle Niná.

• Ánni nga “nʼiotʼakon” kʼoa “nda be xá” ʼmisínile choʼnda jebi.

Nichxin kjoatse, jngo jtín mani je “pastro kao chjotajchínga” xi cuerpo gobernante koan. Kʼoa jé tsakándiaale je naxinandále Cristo (Hechos 15:2). Kʼianga jme xi tsakʼéndajin, Énle Niná kisichjén kʼoa kitsjoaʼnde nga nganʼiotsjele Niná tsakándiaale (Hechos 15:25). Nichxin xi tiyoaa ndʼaibi kʼoati kui choa̱ tífitjenngi je Cuerpo Gobernante.

Jé Cuerpo Gobernante kjimachjén nga tíbitjoson josʼin nga mele Niná. Je ndsʼee xi ya tjíojin je jtín xi Cuerpo Gobernante ʼmi yaa tjínle kjoachoya ya ngʼajmi. Ndsʼee jebi nʼio mandosinle jmeni xi tso je Énle Niná, jenʼio nda be xi tʼatsʼe xále Niná kʼoa josʼin tjínnele koa̱nxá i̱ jinnaxinandále. Xki̱ xomana batioxkó nga fáoyani jmeni xi machjénle je testigole Jeobá xi tjío jngo tjíjtsa Sonʼnde. Tojo kisʼin je pastro nichxin kjoatse, je Cuerpo Gobernante síkasénle xo̱n je jtín kʼianga tsoya jmeni xi tso Biblia, síchjén superintendente xi tsʼe circuito kʼoa kao ndsʼee xi ngikʼa. Kʼoa kuinga tojngo kjoafaʼaitsjen tjínniná ngatsʼiaa kʼoa nga tongóson nʼiasíñá (Hechos 16:4, 5). Kʼoati je kjinele nga batíonda ngayeje xi ʼmiyaná tʼatsʼe Niná, tsjoánganʼioná ngatsʼiaa nga kʼuínyasoán, kʼoa tʼatsʼe nroani tsa ʼyani ndsʼee xi xá kʼoaile i̱ jinnaxinandále Niná.

Jé nganʼiotsjele Niná bándiaale. Je Cuerpo Gobernante kui fitjenngi je ndiaale Jeobá, je Niná xi batéxomale ngayeje, kʼoa kao tsʼe Jesús, xi ngʼajko̱ tíjnale je jtín (1 Corintios 11:3; Efesios 5:23). Ndsʼee jebi alikui je ngʼajko̱ sʼin batiole naxinandále Niná. Tosa je “[tjío]fitjenngile je Barré tojñanibe nga koai”, tojo tjíosʼín xi ngikʼa, xi kʼoati ya ngʼajmi koai (Apocalipsis 14:4). Je Cuerpo Gobernante nʼio tsjoáná kjoanda kʼianga nijéntjé xi tʼatsʼe kʼianga bʼetsʼoaa.

• ʼYáni xi cuerpo gobernante koan ngasʼa.

• Jósʼin básjai ndiaa xi tsʼe Niná ndʼaibi je Cuerpo Gobernante.

Je én xi Betel tso én hebreo jaʼaini kʼoa “Niʼyale Niná” sʼin tsoyanile (Génesis 28:17, 19). Kʼoa kuinga Betel ʼmisíni je sucursal xi tjíosíchjén je testigole Jeobá jngo tjíjtsa Sonʼnde, jña tje̱n tísʼendiaani josʼin tíʼmiyason. Kʼoa je Cuerpo Gobernante yaa tíjna ya sucursal xi tíjna ya Nueva York (Estados Unidos). Yaa tje̱n tíbándiaani josʼin kjimaxá ya sucursal xi tjío ngakjijnda Sonʼnde. Ngatsʼi ndsʼee kao tichjaa xi ya tjíosíxá, familia Betel sʼin ʼyale. Ánni. Kuinga tiya tjíoni kʼoa tiya tjíosíxáni. Ñatje̱n kotʼaya je Biblia kʼoa ñatje̱n kjen ngatsʼi (Salmo 133:1).

Je xi ya tjíosíxá ya Betel kui títjon tjíosíkatío je xále Niná. Je ndsʼee kʼoa kao tichjaa xi ya tjíosíxá, tokui xále Niná tjíomasʼín kʼoa yaa tje̱n tjíotsjoánganʼioni nga kataʼmiyason tʼatsʼe gobiernole Niná (Mateo 6:33). Je xi ya tjíosíxá alikui machjíle. Tonga bʼaile kuarto jñani bationi kao tsojmi xi kjine, kʼoa kʼoati bʼai i̱natjínle xi tsʼe gastole. Jmé xá xi sʼín je xi ya tjío. Tjínkʼa xi oficina tjíosíxá, tjínkʼa xi ya tjíosíxá jña sʼenda tsojmi xi ma chine kʼoa ya jña ma bichi. Kʼoati tjín xi kuarto sítsje, xi najño bané, xi sísinle jotjín niʼya kjio ya Betel, kʼoa xi ya síxá ya jña kjimanda je xo̱n. Kʼoa nkjínsa koya xá xi kjima.

Nʼio tse xá xi kjima ya Betel nga katafison je énnda chjotse. Jmé xá tjíoni je xi Betel ʼmi. Kui xá tjíoni nga katafison énle Niná tojñani nga tjío chjota. Tokuila si̱kjaʼaitsjeen xo̱n jebi. Je xi kʼoakitso jokisʼe jé Cuerpo Gobernante. Xijekoan, computadora koanchjén nga kinikasén ngakjijnda Sonʼnde ya jña tjío je ndsʼee kao tichjaa xi tjíosíkʼatoya xi kjaʼaí én. Kʼoa xijekoan, kʼiaa koannda ya naxinandáyʼai jña tjío je makina xi ngotjo síndani xo̱n jebi kʼoa kʼiaa kinikasénle je xi tsʼato jngo siento kao te jmi mani je jtín xi tjío. Ngatsʼi xi tjíosíxá ya Betel nʼio chjíle xá xi tjíosʼín nga tjíotsjoánganʼio nga kataʼmiyason je énnda chjotse, nga̱ nʼio maxátíyale nga kʼuínyason (Marcos 13:10).

• ʼYáni xi ya tjíosíxá ya Betel kʼoa jméni xi bʼaile.

• Jmé xá xi nʼio maxátíyale tjíotsjoánganʼio je xi ya tjíosíxá ya Betel.

Ya Betel nkjín koya xá tjín. Tjínkʼa xi tjíosíkʼatoya je xo̱n xi énle Niná faʼaitʼa xi kjaʼaí én, tjínkʼa xi ya síxá ya jña tíbitjo xo̱n jebi; tjínkʼa xi ya síxá ya jña xinyánda je xo̱n xi kjimanda; kʼoati tjíokʼa xi ya síxá ya jña ma grabar disko kao pelíkula, kʼoa nkjínsa koya xá xi tjín. Kʼoa je xíngiaa jebi tsa jngo kʼoa tsa nkjínsa naxinandá tjíotsjoánganʼiole nga kataʼmiyason énle Niná kao je xá xi tjíomasʼín.

Xá xi tjínle je Comité xi tsʼe Sucursal. Je Cuerpo Gobernante tsa jan kʼoa tsa nkjínsa ndsʼee xi nʼio nda male tsoya kʼoa xi chjotajchínga sʼin tjío kjoejin nga bánentsja nga jngó jngó sucursal, kʼoa Comité xi tsʼe Sucursal ʼmile. Jmé xá xi tjínle comité jebi. Jé bʼeyanajmíle Cuerpo Gobernante josʼin kjimaxá ya ʼnde xi kjinentsja kʼoa tsa jme kjoa xi sakʼoa sʼe. Kʼoa kui jebi xi basenkao je Cuerpo Gobernante nga tongini batíonda jme xi kjoaʼa ya kjoajtínná kao kjoajtíntsená kʼoa kao xi kjoaʼaítʼa je xo̱n xi skan kʼoasje. Kʼoati síkasén je ndsʼee xi fingajaole nga katatsoyale je Comité xi tsʼe Sucursal josʼin sitjoson xále (Proverbios 11:14). Kʼianga jngo sucursal bichósíxatʼa ndsʼee jebi, xi síkasén je oficina xi tíjnatítjon, jngo kjoajtíntse sʼejna kʼoa jngo kjoanokjoaya tsjoá nga sínʼiojin je ndsʼee kao tichjaa xi tjío ya ʼnde xi kjinentsja sucursal jebi.

Yaa tje̱n sucursal bʼainganʼionile nga jngó jngó jtín. Yaa sʼendajin kʼianga jngo jtín chjotse sʼejna. Kʼoati ya tje̱n tísʼendiaanile josʼín tjíosíxá je precursor, misionero kʼoa kao je xi superintendente xi tsʼe circuito. Kʼoati ya sʼendajinni je kjoajtíntse xi satíoná kʼoa nga sʼenda je Ndʼia jña kotʼaya je Testigole Jeobá. Kʼoati ya tje̱n nikasénnile xo̱n xi énle Niná faʼaitʼa je jtín xi tjío. Ngayeje xá xi kjima ya sucursal tsjoánganʼio nga ndiaa ndiaa kataʼmiyason (1 Corintios 14:33, 40).

• Nga jngó jngó Comité xi tsʼe Sucursal jósʼin binyakao je Cuerpo Gobernante.

• Jmé xá xi kjima nga jngó jngó sucursal.

Tsʼato 750 koya én tíbitjo je xo̱n xi kjimachjén nga tíʼmiyale énnda chjotse “je xi tjío sonʼnde, kao ngayeje nangi, kao ngayije ntje̱, kao ngayije én, kao ngayije naxinandá” (Apocalipsis 14:6). Jósʼin tíbitjosonni nga kʼoasikji xá tjín. Kuinga tjío je xíngiaa xi tjíokji xo̱n kʼoa nʼio nkjín mani je grupo xi nʼio tjíosíxá nga tjíosíkʼatoya xi kjaʼaí én. Kʼoa ngatsʼi testigole Jeobá ma.

Én inglés faʼaitʼa je xo̱n xi títjon satíonda. Jé Cuerpo Gobernante bándiaale Departamento xi tsʼe Redacción xi ya Nueva York tíjna. Kʼoa departamento jebi síkuinda jme xi tjíokji je ndsʼee xi ya tjío kʼoa kao je xi kjaʼaí sucursal tjío. Jókji kjoanda tje̱nkao nga xinxin ʼndele je ndsʼee xi tjíokji je xo̱n xi énle Niná faʼaitʼa. Kuinga bʼéyanajmíná josʼin tjío je naxinandá xi kjaʼaí kʼoa ngisa nkjín chjota xi sasénle nga bʼéxkia je xo̱n xi tíbitjo.

Je xo̱n xi én inglés nikasénle xi síkʼatoya xi kjaʼaí én. Kʼianga je chotʼajin kʼoa bitjo je xo̱n xi én inglés, computadora machjén nga nikasénle je ndsʼee kao tichjaa xi síkʼatoya xi kjaʼaí én. Kʼoa jé síkʼatoya, xijema kotʼajin kʼoa bʼéndayanda tsa jñani tsín kʼoatísʼe. Je xi síkʼatoya én jebi bʼénele yaole nga kui síchjén “énkixi xi ñaki kʼoatjín” xi kʼoakjoan tso jotso je xi inglés kichji (Eclesiastés 12:10).

Ngisa ngotjo sʼendani jngo xo̱n kʼianga computadora machjén. Jngo computadora alikui koa̱nle nga toje kʼoasʼin je xá xi tjíosʼín je ndsʼee xi tjíokji kʼoa kao xi tjíosíkʼatoya xi kjaʼaí én. Tonga nga síchjén diccionario kʼoa kao computadora ngisa ngotjo majngoni je xá xi sʼín. Xi testigole Jeobá maijin tsakʼendaníjin je xi Sistema Electrónico de Edición Plurilingüe ʼmi (MEPS). Kʼoa kao sistema jebi siento én xi kjaʼaí kjaʼaí ma chjiaa ya computadora kʼoa kao kui sʼendani je xo̱n xi bitjo kʼoa kui machjén nga satíotʼa je sén xi faʼaitʼa.

Ánni nga kʼoasikji kjoama̱ tísʼengisíni je én xi kjaʼaí ninga tochoa mani je chjota xi kui én nchja̱. Kuinga je Jeobá “mele nga ngatsʼi chjota kuitjontjai, kʼoa nga kuichonrʼoe xi kjoakixi” (1 Timoteo 2:3, 4).

• Jósʼin tísʼenda je xo̱n xi énle Niná faʼaitʼa.

• Ánni nga nʼio nkjín én tínikʼatoyasíni je xo̱n xi énle Niná faʼaitʼa.

Nga xki̱ nó, siento miyón Biblia kʼoa kao xo̱n xi énle Niná faʼaitʼa chʼasjaijin kʼoa alikui batenalaijin je chjota nga nikáyolaijin. Kʼoati tjíosʼenda sucursal kʼoa kao Ndʼia jña chotʼayá kʼoa kjitʼa kjimasinle ndʼia jebi. Kʼoa je xi ya Betel tjíosíxá kʼoa kao xi misionero ma, xi jejmi mani, tjíobʼai i̱natjínle tsʼe gastole. Kʼoa nikasénlaijin nganʼio je xi kjoaxkón bichóne. Tonga jñá tínroani je tao̱n xi kjimachjén.

Alikui nikʼéchjíjin chjota kʼoa alikui tao̱n sʼeña ya jña biyojtínjin. Alikui tao̱n nijélaijin chjota ningalani nʼio tse tao̱n kjimachjén nga tíʼmiyason. Je Xo̱n xi Bájinkonná xi koanjaoni kitjo kʼoakitso nga ñaki tjíojngo tokuinjin nga je Jeobá títsjoánganʼionajin xá xi tinʼiaijin. Kʼoa i kitsosa: “[Je relijiónná] likuikʼia tao̱n sijéson kʼoa ni chjotajinla sijéle nganʼio”. Je rebista jebi jetsʼato jngo siento nó tjínle nga kʼoakitso, kʼoa kʼoakjima kjoaixi (Mateo 10:8).

Ni̱ma̱ná nroajinni jotjín tao̱n nikʼéjnaa. Nkjín chjota xi sasénle je xá xi tinʼiaijin nga Biblia bakoyaijin, kʼoa saʼnda tsjoánganʼionajin jotjín nroajin ni̱ma̱le. Kʼoa jin xi testigole Jeobá maijin bʼainíjin jotjín nroajin ni̱ma̱najin ánni nga katabitjosonsíni josʼin mele Niná jngo tjíjtsa Sonʼnde. Kʼoati bʼaijin nganʼionajin kʼoa chʼasjeʼaníjin nichxinnajin (1 Crónicas 29:9). Ya Ndʼia jña chotʼayaijin kʼoa ya jña satíonajin kjoajtíntse tjío kaxa̱ jñani ma nikʼatsaoyaa jotjín mená. Kʼoa tsa maije̱, koaan ya tjen kʼoainganʼioñá ya Internet jw.org/mau. Je xíngiaa xi tsjoá jotjín nroajin ni̱ma̱le nʼio nkjín mani xi ma̱ sʼin tjíosíjchá yaole, joni tsa je ʼndíchjoónkʼan xi ndaná kisikʼaxki̱ Jesús kʼianga kisikʼatsaoya ya kaxa̱ xi tjío yo̱ngo̱le Niná je ʼndítao̱n xi tochoa chjíle (Lucas 21:1-4). Ngatsʼi xíngiaa koaan koatiotʼaxin choa tao̱nle kʼoa tsjoá “josʼin kosonnile ni̱ma̱le” (1 Corintios 16:2; 2 Corintios 9:7).

Alikui jao tjínná nga je xíngiaa xi mele kʼoasjengʼa Jeobá kao tsojmichjí xi tjínle tosi tonda tsjoánganʼio nga katabitjoson je xále Niná, nga̱ jé Jeobá xokʼoe ni̱ma̱le. Ánni. Kuinga katabitjoson josʼin mele Jeobá (Proverbios 3:9).

• Jméni xi tsín mangóson je testigole Jeobá kao je relijión xi kjaʼaí.

• Jósʼin kjimachjén je tao̱n xi tsjoá xíngiaa jotjín nroajin ni̱ma̱le.

Ya Ndʼia jña chotʼayaijin kui ʼmiyanajin jmeni xi tsakakóya Jesús kʼianga jaʼai i̱ Sonʼnde (Lucas 8:1).

Yaa ʼyaxkuínjin je Niná. Yaa tje̱n sʼendajinni josʼin ʼmiyason je énnda chjotse (Mateo 24:14). Ndʼia jebi alikui tongóson kjoan kʼoa alikui síxkónkjoan. Kʼoa tjío jñani nkjín jtín batioxkó xi tiyani Ndʼia jebi. Je nó xi tífaʼato jmi Ndʼia jña chotʼayaijin tjíosʼenda. Tome tsa aon tjíosʼenda nga nyaon nyaon. Kui kʼoakjimani nga kjimankjín je jtín. Jñá tínroani je tao̱n xi kjimachjén kʼoa ʼyáni xi tjíobʼénda Ndʼia jebi (Mateo 19:26).

Kui sʼendani je tao̱n xi toxá satíoni nga kʼoasʼin koa̱nchjén. Tao̱n jebi yaa nikasénle sucursal xi bʼakaole. Kʼoa jé sucursal jebi síkinyale je tao̱n xi machjénle je jtín xi jngo Ndʼia jebi mele kʼoenda kʼoa tsamaije̱ tokʼoendaya.

Je ndsʼee xi bʼénda Ndʼia jebi alikui machjíle kʼoa xinxin ʼndele. Tjín naxinandáyʼai jñani tjíosatío xi Grupos de Construcción de Salones del Reino ʼmi. Je ndsʼee xi ya tjíojin grupo jebi fi jñani saʼnda tíjna je jtín xi kui Ndʼia jebi mele kʼoenda. Binyakao je ndsʼee xi ya tsʼe nga bʼénda Ndʼia jña koatiojtín. Kʼoa jñani xin naxinandáyʼai, tjío je ndsʼee xi xá kitjoejinni nga je bándiaa nga sʼenda kʼoa nga sʼendaya je Ndʼia jña chotʼayá xi tjío ya ʼnde jña bʼakaole. Nkjín mani xíngiaa xi tsjoánganʼio xi ñaki kui xále kʼoa alikui machjíle. Tjíokʼa xi chjotajchínga sʼin tjío xi jenʼio nda male bʼénda Ndʼia jebi kʼoa kao xíngiaa xi tsjoánganʼio xi ñaki kui xále. Je xíngia jebi alikui machjíle je xá xi sʼín. Je xi ngisa tsjoánganʼio kʼianga sʼenda Ndʼia jebi jéní xíngiaa xi ya koatiojtín. Je xi nʼio tjíobinyakaonajin nga tíbitjosonnajin xá jebi kui nganʼiotsjele Jeobá kʼoa nga kao kjoatsjoa tsjoánganʼio ngatsʼi xíngiaa (Salmo 127:1; Colosenses 3:23).

• Jósʼin sʼendani jngo tjíjtsa Sonʼnde Ndʼia jña chotʼayá.

Je Ndʼia jña kotʼaya je Testigole Jeobá jaʼaíntsjele Niná yʼa, kʼoa kuinga machjénsíni nga tsje katamachon kʼoa nga nda katamatsen. Kʼoa jngo kjoanda tjínná nga bʼainganʼioá, nga̱ kʼoasʼin bakoñá nga tiʼyaxkoán. Koaan kʼoainganʼioá ngatsʼiaa.

Si̱tsjee nga jefetʼa kjoajtínná. Je xíngiaa xi bichó kjoajtín tsjoánganʼioní nga matsje je Ndʼia jña chotʼayá kʼianga jefetʼa je kjoajtín xi satío. Kʼoa ñandia nga xki̱ xomana nga ñaki nʼio nda matsje Ndʼia jebi. Jngo xi chjotajchínga sʼin tíjna kʼoa tsa jngo siervo ministerial kʼoatso josʼin si̱kao nga sa̱técha, nga koa̱ntsje piso, nga si̱tsje jñani chao tjínle, nga xi̱nyánda je yáxile, nga sa̱néya kʼoa sʼe̱jtenya xki je baño, nga si̱tsje tsa jña chʼao kjoan cho̱tsínle ventana kao cho̱tsín xi chotsensʼen, nga sʼe̱tsao je tjé kʼoa nga katamatsje ya nitsinle. Kʼoa jngo nichxin tjoéjin nga xki̱ nó nga ñaki matsje ngakjijngo. Kʼiatsa kʼoati kʼoaixálee je ʼndíxtiná kʼianga matsje Ndʼia jña chotʼayá kʼoasʼin skoe̱xkónni jña ʼyaxkoán je Niná (Eclesiastés 5:1).

Kʼoainganʼioá kʼianga sʼendaya Ndʼia jña chotʼayá. Nga tsín tse tao̱n kjoeya kʼoa nga nda katasʼentsjai, xki̱ nó chotʼa jokji ya yale kʼoa kao nitsinle ánni nga sʼendayasíni tsa jñani jetíbitson (2 Crónicas 24:13; 34:10). Bakinle nga tsje kji kʼoa nga nda matsen Ndʼia jña jchaxkón je Jeobá. Kʼiatsa kʼoainganʼioá nga sʼendaya kʼoasʼin koakoñá jokji tsjoachaa je Jeobá kʼoa jokji ʼyachjiá je Ndʼia jña chotʼayá (Salmo 122:1). Kʼoa kʼoati tokoa̱nxkónle je chjota xi ya tsʼe jñani kijna Ndʼia jebi (2 Corintios 6:3).

• Ánni nga si̱kuindasíñá je Ndʼia jña ʼyaxkoán je Niná.

• Jónikao je Ndʼia jña chotʼayá kʼianga tsje katasʼentsjai.

A meli nga sʼe̱sali kjoafaʼaitsjen xi faʼaitʼa ya Biblia. A mesali jchai josʼin tínchja̱ni jngo bersíkulole Biblia, tʼatsʼe jngo chjota kʼoa tsa jngo naxinandá xi síkʼaxki̱, kʼoa tsamaije̱ jme xi koan ngasʼa. A sakʼoa chjonangilai yaoli tsa basenkaoná je Biblia nga bʼendajiaan kjoa xi sakʼoa bitjatojiaan. Kʼiatsa jaon, koaan kuijnyísjaijin jebi ya biblioteca xi tíjna ya Ndʼia jña chotʼayá.

Nkjín koya xo̱n xinyá ya biblioteca kʼoa ma nichjén nga jme xi fasjaiyaa. Tsakui nichxin likui kjioyejeli xo̱n xi bʼasje je testigole Jeobá xi kui énli tjítʼa. Tonga ya Ndʼia jña chotʼayá tíjna jngo biblioteca jñani me tjíoyeje xo̱n xi chriansʼa kitjo. Tsakui nichxin kʼoati tjío Biblia xi kjaʼaínile, diccionario kʼoa kao xo̱n xi kjaʼaísanile. Koaan si̱chjain biblioteca jebi nga kjesa fitsʼiajin kjoajtínná kʼoa tsamaije̱ nga jekjoetʼa. Kʼoa tsa tíjna jngo computadora tsakui nichxin tíjnale je programa xi Watchtower Library ʼmi jñani nʼio nkjín xo̱n faʼaitʼa xi jetsakʼasje naxinandále Niná. Koaan kuijnyísjaijin tsa jme xi meli jchai kʼoa tsa jngo bersíkulole Biblia.

Nʼio machjénle je xi jefaʼa ya kjoajtín Tʼatsʼe chjotale Cristo kao Xále Niná. Kʼiatsa jebitjai kjoajtín jebi, koaan si̱chjain je biblioteca xi ya tíjna ya Ndʼia jña chotʼayá kʼianga kʼoéndai kjoanokjoayali. Je xi bʼakaole nga síkuinda jéní je ndsʼee xi kjinele kjoajtín kʼoa jé kotsenle nga katasatío je xo̱n xi sʼa kitjo kʼoa nga katasatío chʼin chʼin. Koaan tsa je ndsʼee jebi kʼoa tsa jeje̱ xi tsoyali Biblia kuitsoyali josʼin kuijnyísjaijin jme xi machjénli. Tonga alikui ma nga ya mangínkoaa ya niʼyaná xo̱n jebi, tjínnele si̱kuindaa kʼoa likui koa̱n nga kʼoéchoaa.

Je Biblia kʼoatso jme xi sʼiaan kʼianga jchaa jokjoantjínni xi tʼatsʼe Niná, tjínnele kʼoasʼin kjoásjee joni tsa tao̱n xi tíjnaʼma (Proverbios 2:1-5). Kʼoa koaan ya kʼoétsʼiakaoñá nga kjoásjee jokjoantjínni xi tʼatsʼe Niná ya biblioteca xi tíjna ya Ndʼia jña chotʼayá.

• Jótjín koya xo̱n nya ya biblioteca xi tíjna ya Ndʼia jña chotʼayá xi koa̱n si̱chjén tsa jme xi kjoásjaiyaa.

• ʼYáni xi koa̱n kuitsoyali josʼin si̱chjain je xo̱n xi nya ya biblioteca jebi.

Je Jesús i kitsole chjotale: “Katamaʼisenle lʼíno ngixko̱n chjota, jméni nga skoe̱síni xándano, kʼoa kʼoasjejeyasíni Nʼaino xi tíjna ngʼajmi” (Mateo 5:16). Kʼianga kuitjosonnajin én jebi tinichjénníjin jmeni xi sʼa tjíosíkʼatsen chjota, jolani tsa je Internet. Je direcciónnajin ya Internet kuiní jw.org kʼoa yaa tsoya jme xi makjainnajin kʼoa jme xá xi tinʼiaijin. Jméni xi koa̱nsjaitʼali ya dirección jebi.

Yaa tsoya jmeni xi nʼio chjonangiaa tʼatsʼe Biblia. Koa̱nsjaili jmeni xi bakóya Biblia tʼatsʼe xi nʼio kjonangile yaole je chjota. Tobʼelañá, je tratado xi ʼmi A chan tjóxin je kjoañʼai xi tjín kʼoa kao A kjoaʼáyanile je kʼien. Xo̱n jebi jetsʼato 600 én jekitjo. Kʼoati ya koa̱nsjaitʼali je Biblia Traducción del Nuevo Mundo, xi jetsʼato 130 én jekitjo. Kʼoa nkjín xo̱n faʼaitʼa xi machjén nga chotʼayá Biblia, jolani je libro xi ʼmi Jmé kjoanni xi bakóya je Biblia kʼoa kao je Xo̱n xi Bájinkonná kao ¡Despertad! xi chriansʼa tjíobitjo. Nʼio nkjín xo̱n jebi xi ma ya bʼexkiaa kʼoa xi ma ya noʼyalee. Kʼoa koaan sʼiaan descargar je grabación xi tjío. Kʼoati tjío MP3, PDF kao EPUB. Kʼoa tsa meli koaan chʼa̱sje kʼai pájina xi énli tjítʼa kʼoa takolai tsa ʼyani xi mandosinle je énnda chjotse. Kʼoati tjín pelíkula xi tsʼe seña, kʼoa nʼio nkjín koya seña tjín. Koaan sʼiain descargar je audiodrama, drama, kʼoa kao músika xi ya Biblia yʼangini, xi koa̱n kuinóʼyalai kʼianga nikjáyai.

Tsoyaná tʼatsʼe testigole Jeobá. Je direcciónnajin faʼaitʼa video xi tochoa minuto faʼa kʼoa kao én xi bájinkonná tʼatsʼe xá xi tinʼiaijin jngo tjíjtsa Sonʼnde. Tsoya josʼin tibinyakoaijin je chjota kʼoa jmeni xi tibitjatojinjin. Bájinkonná tʼatsʼe je kjoajtíntse xi satío. Yaa kʼoatso josʼin tsa ʼyani xi mele kuinchja̱ ya sucursal xi tjíonajin.

Kʼianga kʼoasʼin tinichjainjin ngayeje xi kabʼaxki̱ ibi, tinikʼabísonníjin énle Niná jña saʼnda fetʼa Sonʼnde. Kui kʼoatinʼianijin nga je chjota xi tjío ngakjijnda ʼnde, saʼnda xi tjío ya jña Antártida ʼmi, katabe jokjoantjínni énle Niná. Tibʼetsʼoaníjin nga “je énle Nainá” sasa katafisonni jngo tjíjtsa Sonʼnde ánni nga kuitjojeyasíni Jeobá (2 Tesalonicenses 3:1).

• Jósʼin tinichjainjin je dirección jebi jw.org kʼianga nkjínsa chjota katabe jokjoantjínni énle Niná.

• Jméni xi meli kjoásjaijin ya dirección xi tíjnanajin ya Internet.