Nʼio nkjín chjota xi tsín tifini yo̱ngo̱le, nga̱ tsín ʼmiyale jmeni xi nʼio kjonangile yaole kʼoa likui ʼya xi sínʼio kon. Tonga ánni nga koa̱n kʼuínsíni je kjoajtín xi satíonajin. Jmé kjoanda xi sʼe̱li tsa kʼuín.

Tsjoa sʼe̱ tokuin nga ya kuijnajinlai je chjota xi ndʼé kʼoa xi tsjoake xínkjín. Je chjotale Cristo xi títjon tsakatio, tsakatiojtín nga tsakʼétsʼoale Niná, nga kiskotʼaya xo̱nle Niná kʼoa nga kisinʼio kon xínkjín. Kʼoa nkjín jtín kisatio (Hebreos 10:24, 25). Tsjoake koan xínkjín kʼoa ñaki miyo koanle xínkjín (2 Tesalonicenses 1:3; 3 Juan 14, 15). Kʼoa kʼoati kui choa̱ mangíntjenngijin kʼoa kʼoati nʼio tsjoa tjíonajin.

Koaanli si̱chjain kjoafaʼaitsjen xi faʼaitʼa Biblia. Tojo koan nichxin kjoatse nga tsakatioxkó xi xʼin xi yánchjín kʼoa kao ʼndíxti, kʼoatima tsanda ndʼai. Tjío xi nda bakóya Biblia, xi síchoyandaná josʼin si̱chjén ngantsjai je kjoafaʼaitsjen xi faʼaitʼa ya Biblia (Deuteronomio 31:12; Nehemías 8:8). Ngatsʼi xi bichó kjoajtín jebi ma mjénngʼa ntsja kʼianga nchja̱ kʼoa kʼoati se. Kʼoa kʼoasʼin bakóni kjoamakjain xi tjínle (Hebreos 10:23).

Ngisasa nda koa̱nkjainli xi tʼatsʼe Niná. Je pastro Pablo i kitsole jngo jtín nichxin kjoatse: “Kjaínga mena nga skoeno, [...] jméni nga sʼe̱sínino nganʼio. Kui xi tsole nga tojngo si̱jetakoán xíngiaa kao josʼin makjainná kao jon kao an” (Romanos 1:11, 12). Kʼianga ntsjaintsjai mangián kjoajtín jebi, nitajangañáñá kjoamakjainná kʼoa ngisa sʼená nganʼio nga kʼoasʼin mangínkoaa yaoná jotso énle Niná.

Tsa tsjoá ʼmi je kjoajtín xi satíonajin kʼoa jisoa kataʼyai ngayeje jebi. Nda chjoéyalaijin nga kuichui. Alikui machjí nga bitjasʼeen kʼoa alikui tao̱n sʼeña.

• ʼYá tsʼe choa̱ xi mangíntjenngijin kʼianga kʼoasʼin biyojtínjin.

• Jmé kjoanda xi sʼe̱li tsa kʼuín kjoajtín xi satíonajin.

Je testigole Jeobá ntsjaintsjai fi kjoajtínle ninga jñájchá faʼatojin kʼoa ninga sakʼoa chʼao machon nichxin. Ningala ñʼai tjíosíjchá yaole kʼoa ningala jekijtale nga faʼaini tʼaxále bʼénele yaole nga fi kjoajtínle. Ánni kʼoasʼínni.

Tse kjoanda sokóná nga jngó jngoá. Je pastro Pablo kinchjani tʼatsʼe je xíngiaa xi ngóson sʼin makjainná kʼoa i kitso: “Si̱kjaʼaitsjenjinnía xíngiaa nga jngójngoá” (Hebreos 10:24). Je én jebi kui xi tsonile nga tjínnele nga nda kataʼyaxkoaan xíngiaa. Je pastro Pablo kʼoatsoná nga katamandosinná xi ngikʼa. Kʼianga ʼyaxkoaan familia xi kjaʼaí ʼyañá nga tjínkʼa xi kʼoati kui kjoa jaʼatojin xi tibitjatojiaan ñá kʼoa xíngiaa jebi binyakaoná nga tosi tonda kaná.

Sokóná xi ñaki miyo. Je xi bichó kjoajtínná ñaki miyo maná ali tsa toxkia chjotajin. Kʼoa sakʼoa chʼasjeʼaa nichxin nga bʼetsaojiaan kao xíngiaa jebi. Jmé kjoanda xi sokóná nga kʼoasʼin je fajtaa. ʼYachjíñá nga jngó jngó xíngiaa kʼoa kui jebi xi ngisasa jtín síkatíoná. Kʼianga kjoa faʼatojin je ndsʼee kao tichjaa kjitʼanangi binyakoaa nga̱ miyoná mani (Proverbios 17:17). Kʼianga nimiyoaa ngatsʼi je xi bichó kjoajtínná bakoñá nga makjaojinná xíngiaa (1 Corintios 12:25, 26).

Je timiyui je chjota xi kui kʼoatjíosʼín josʼin mele Niná, je testigole Jeobá. Ali bʼaiʼndejin nga tjín xi kʼoechjoali nga si̱miyonáijin.

• Jmé kjoanda xi tje̱nkao nga nimiyoaa ngatsʼi xi bichó kjoajtínná.

• Kʼiáni meli kʼuín ya jña chotʼayaijin.

Nichxin kjoatse, kʼianga tsakatío kjoajtínle je chjotale Cristo, kisení, tsakʼétsʼoaní, tsakʼéxkianí kʼoa kiskotʼayajtínní je Énle Niná, alikui tokjaʼaíngá kisʼin (1 Corintios 14:26). Kʼiatsa kʼuín je kjoajtín xi satíonajin jchaní nga kʼoati nʼiaijin.

Je én xi sakóya yaa Biblia yʼangini kʼoa nʼio basenkaoná. Kʼianga biyojtínjin nga xoto kʼoa tsa taingo jngo kjoanokjoaya xi ya Biblia yʼangini faʼa. Kjoanokjoaya jebi basen ora sʼejna kʼoa kui bakóyaná nga je Biblia koaan koasenkaoná nichxin xi tiyoaa ndʼaibi. Kʼoa fasjaijinñá Biblianá je testo xi bʼaxki̱. Xijema, kʼiaa sʼejna je kjoajtín Nga chotʼaya Xo̱n xi Bájinkonná xi toxá kʼoasʼin sʼendani, kʼoa jngo ora chotʼaya. Je kjoaʼmiya xi chotʼayajin kui tsoyaná josʼin si̱chjén kjoafaʼaitsjen xi faʼaitʼa Biblia. Ngatsʼi xi bichó ma mjénngʼa ntsja kʼiatsa mele kuinchja̱. Kʼoa tikui rebista kotʼayani ngatsʼi jtín xi tsʼe testigole Jeobá jngo tjíjtsa Sonʼnde, xi tsʼato jngo siento kao te jmi mani.

Basenkaoná nga ngisa nda kʼuínyaa Énle Niná. Ngi jngo kjoajtín xi jan tíkjao sʼejnanajin nga toxkia nichxin kʼoa Tʼatsʼe chjotale Cristo kao Xále Niná ʼmi. Kui yʼangini je Xo̱n xi tjítʼa jme xi chotʼayá ya kjoajtín xi xki̱ sá bitjo. Kui títjon fitsʼiani je “Én xi nʼio chjíle xi nya Biblia” kʼoa basenkaoná nga ngisa nda ʼyaa jmeni xi tso je kapítulole Biblia jña maxkia nga xki̱ xomana. Xijema, kui fitsʼia “Nda koakoyaa Énle Niná”, faʼachoya xíngiaa kʼoa kui bakóya josʼin kʼuínyalee Énle Niná je chjota. Je xi bándiaa kjoajtín jebi kotsenle josʼin nchja̱yajin je xi faʼa kʼoa tsjoále kjoafaʼaitsjen xi koasenkao nga ngisa nda kuinchja̱ kʼoa nga ngisa nda kʼoexkia (1 Timoteo 4:13). Xi fetʼani, “Jonʼia xi chjotale Cristo maa” kui sakóya josʼin si̱chjén kjoafaʼaitsjen xi faʼaitʼa je Biblia nga nyaon nyaon. Kʼoa je kjoajtín jebi, ngisaa nda majinná jmeni xi bakóya je Biblia nga̱ kjoachjonangi satío.

Kʼianga kʼuín kjoajtín jebi tokʼoajin koa̱nli jokji nda koa̱njinli Biblia (Isaías 54:13).

• Jméni xi kuinóʼyalai kʼiatsa kʼuín kjoajtín xi satíonajin.

• Jñánile kjoajtín xi kabʼaxki̱ xi meli kʼuín.

Tsakui nichxin jetsaʼyai foto xi faʼaitʼa xo̱n jebi josoyuijin kʼianga mangínjin kjoajtínnajin. Ánni nga nda nikuindasínijin yaonajin jokjoan najño xi chʼakjáijin kʼoa josoyuijin.

Kuinga nokjonchaijin je Niná. Jin xi testigole Jeobá maijin nda soyuijin kʼianga biyojtínjin nga̱ kʼoasʼin bakonilaijin kjoaxkóntokon je Niná kʼoa kao xíngijin, ninga tsínlani kui xi ngisa kuenta sʼín Niná xi tosonngʼa (1 Samuel 16:7). Si̱kjaʼaitsjenla jebi: Kʼiatsa jngolani chjotaxá timangínchonlee, a tsí chósonnilee josóyoaa nga̱ xángʼa tjínle chjota jebi. Kuinga nda soyonijin kʼianga mangínjin kjoajtínnajin nga̱ jé tiʼyaxkuínjin je Jeobá, je xi “Chjotatítjon xi batéxomantsjai” tsole Biblia, kʼoa kʼoati kuinga ʼyaxkuínjin jñani biyojtínjin (1 Timoteo 1:17).

Kuinga katabe chjota nga nitjosuinjin kjoatéxomale Niná. Je Biblia kʼoatsole je chjotale Cristo nga kui “katabʼakjá najño xi nda xi bakinle” kʼoa nga “katasʼe i̱tséle kjoasoatakon” (1 Timoteo 2:9, 10). Je xi sítjoson én jebi ali tsakuijin bʼakjá najño xi síxkónkjoan, xi koto kjoan kʼoa tsa xi matsenya. Xi ijngosani, ali tsa tokjaʼaíngájin fayo. Nkjín koya najño tjín xi nda matsen je xi koa̱n chjoéjiaan. Kʼiatsa ndasʼin matsen je najño xi kichʼakjá skoee chjota nga nʼio ndatjín jme xi tsoyaná je Niná xi bʼasjentjainá, kʼoa kʼoasʼin kuitjongʼani Niná ninga tsínkjoan én kuinókjoaa (Tito 2:10, NM; 1 Pedro 2:12). Kʼianga kʼoasʼin nda soyuijin nga mangínjin kjoajtínnajin yaa nroani nga nda síkʼaxki̱ chjota je naxinandále Jeobá.

Kʼianga nda koa̱ntsen josóyoaa ali tsakuijin xi tsonile tsa najñochjí chʼa̱kjá kʼoa tsakui xi síxkónkjoan. Ali tsa tokuijin najño bʼéchjoali kʼiatsa meli kʼuín ya Ndʼia jña chotʼayaijin.

• Ánni nga nʼio chjísínile nga nda sóyoaa kʼianga koanngián ya jña ʼyaxkón Jeobá.

• Jñánile kjoafaʼaitsjen xi faʼaitʼa Biblia xi bándiaaná jokjoan najño xi chʼa̱kjá.

Kʼiatsa jetichotʼayai Biblia kao testigole Jeobá tochale tongini chotʼayajin jmeni xi chotʼayao nga ñandia ñandia. Tonga kʼoati machjén nga tongini chótʼayajin jmeni xi faʼa ya kjoajtínná ánni nga ngisa nda koa̱njinsínili. Kʼoa xi ngisa nda koasenkaoli kuinga kʼoéndajin jme nichxinni kʼoa jme orani nga chótʼayai kʼoa nga tsínkʼia si̱kʼatui.

Tongini tʼendajin jmé nichxinni chótʼayai kʼoa jñáni. Jóchon nga ngisa majinli jmeni xi chotʼayai. A kʼiaa nga tanjio nga kje ʼminixájin axo kʼiaa nga manjio nga jekjiofe xtiʼndíli. Ninga tsín nanda maʼali, tʼendajin jotjín tse chótʼayai nga ñandia ñandia kʼoa ali bʼaiʼndejin nga tojme xi kʼoechjoali. Ya chótʼayai jñani jñá chon kʼoa tikitsʼaolai je radio, telebisión kʼoa kao teléfonoli ánni nga tsínkui sijtisínili. Kʼoa nga chótʼayai tʼetsʼoalai Niná ánni nga tsínla xin koaisíni kjoafaʼaitsjenli kʼoa nga tsínla jme xi si̱kjaojinsíni (Filipenses 4:6, 7).

Tjandiaangilai je párrafo kʼoa tjenngʼai ndsai nga kʼoai énli. Kʼianga koa̱njinli jme xi tínchja̱ni je xi chótʼayai, títjon kjoanla chótsenlai jóʼmi je kjoaʼmiya xi chótʼayai kʼoa kao jña ngisa jma kjoan letrale. Kʼoati chótsenlai jotjín sén faʼaitʼa kʼoa kao kjoachjonangi xi kʼia chotʼayajin nga jefetʼa. Xijekoa̱n, xki̱ párrafo tʼexkiai kʼoa tjasjaijin jmeni xi tso je kjoachjonangile. Tjasjaijin testole Biblia kʼoa tinkjínlai tokuin josʼin mangóson jme xi tínchja̱ni testo jebi kao jme xi tínchja̱ni je kjoaʼmiya xi tichotʼayai (Hechos 17:11). Kʼianga jekoa̱nsjaijinli ya párrafo jmeni xi tso je kjoachjonangile tokui tjandiaangilai je én xi sikjaʼaitsjenjinli ánni nga koa̱n kjoénngʼasíni ndsai ya kjoajtínná kʼoa tojngo jao én kuinókjoasíni jme xi kamajinli.

Kʼiatsa kʼoasʼin tongini chótʼayai jotjín koya xi ʼmiyaná ya kjoajtín xi satíoná nga xki̱ xomana, ngisa koa̱ntsesa kjoafaʼaitsjen xi tísʼeli xi tʼatsʼe Biblia (Mateo 13:51, 52).

• Jósʼin koa̱n kʼoéndajin jme nichxinni kʼoa jme orani nga chótʼayai jme xi faʼa ya kjoajtínná.

• Jósʼin kuijnandai nga kʼoai énli ya kjoajtínná.

Saʼnda ngasʼa, je Jeobá kʼoasʼin mele nga chʼa̱sjeʼaa nichxin nga chótʼayajtían énle ya niʼyaná ánni nga koa̱nchriantʼasínilee kʼoa nda kuiyokaosíñá xíngiaa (Deuteronomio 6:6, 7). Kuinga chʼasjeʼasínijin nichxinnajin nga xki̱ xomana nga chotʼayajtínjin énle Niná ya niʼyanajin. Kʼoa kui chotʼayaijin jmeni xi koasenkaonajin nga jngó jnguíjin josʼin nda kuiyuijin ngixko̱n Niná. Kʼoa je xíngiaa xi toje tjío ya niʼyale kʼoati ma kui batiotsʼinya jmeni xi mesale skoe̱ tʼatsʼe Biblia.

Kʼianga chotʼayajtían énle Niná ya niʼyaná jé Jeobá machriantʼalee. “Tichriantʼalao Niná, kʼia kʼoati je sichriantʼano nga jon.” (Santiago 4:8.) Ngisasa nda ʼyaa je Jeobá kʼianga bʼexkiaa je Biblia, nga̱ yaa ʼyañá jokjoan kʼoa josʼín. Jósʼin koa̱n kʼoétsʼiakoaa nga chótʼayajtían énle Niná ya niʼyaná. Koaan kui kʼoéxkiaa kapítulo tsʼe Biblia xi bʼakaole nga xki̱ xomana ya kjoajtín Tʼatsʼe chjotale Cristo kao Xále Niná. Koaan si̱xkoa̱yaa jotjín bersíkulo kʼoakaoná nga kʼoéxkiaa kʼoa kʼia cho̱bayañá jmeni xi kamajinná nga jekabʼexkiaa ngatsʼiaa.

Kʼianga chotʼayajtían énle Niná ya niʼyaná ngisa nda biyokoaa xíngiaa. Je xi jechixan ngisa manʼiotʼa xínkjín nga ñatje̱n kotʼaya Biblia kʼoa kʼoati ma je ʼndíxti kao xijchále. Je xi mená kuinga ñaki tsjoa katasatíoná ngatsʼiaa kʼoa nga tsín kjoa katasʼe nichxin nga chotʼayajtían, ánni nga ñaki chóyasínilee nga xki̱ xomana. Je xi xijchá ma koaan ya skoénile Xo̱n xi Bájinkonná kao ¡Despertad! kʼoa tsa yaje̱ ya Internet ya jw.org, jme xi koakoyale ʼndíxtile, tonga kui koaini jmeni xi koasenkao. Kʼoati koa̱n kui koakoyale jme kjoa xi faʼatojin ʼndíxtile ya ndʼiaskuela kʼoa josʼin koa̱n kʼoendajin. Koaan skótsenle je programa xi tsʼe JW Broadcasting (tv.jw.org) kʼoa kjaoyani ngatsʼi. Kʼoa kʼoati koa̱n sé je kjoajnda xi jndaa ya kjoajtínná. Kʼoa xi jeskótʼaya koaan ski̱ne kʼoa skʼuí tsa jme xi kabʼenda.

Jotjín tse nichxin chʼasjeʼaa nga xki̱ xomana nga ʼyaxkoán Jeobá ya niʼyaná basenkaoná ngatsʼiaa nga ngisa matsjoachaa nga chotʼayá Biblia. Kʼoa je Niná sichikontʼainná nga kʼoasʼin tibʼenelee yaoná (Salmo 1:1-3).

• Ánni nga chʼasjeʼasíñá nichxinná nga chotʼayajtían énle Niná ya niʼyaná.

• Jméni xi koa̱n sʼin je xi xijchá ma nga ñaki tsjoa katasatíole ʼndíxtile nichxin nga kotʼayajtín énle Niná.

A tiʼyaní jokji tsjoa tjíole chjota xi faʼaitʼa ibi. Kuinga tsjoa tjíonile nga jngo kjoajtíntse tjío. Tojosʼin kisʼenele je naxinandále Niná nichxin kjoatse kʼianga jan kʼa koa̱nña nga jngo nó, kʼoati tjíosʼín ndʼaibi je testigole Jeobá (Deuteronomio 16:16). Kʼoa kui jebi nga jan kjoajtíntse xi satíonajin nga jngo nó: jao kjoajtíntse xi jngo nichxin kao jngo kjoajtíntse xi jan nichxin. Jmé kjoanda xi sokóná nga mangián kjoajtíntse jebi.

Ngisa jtín síkatíoná kao ngatsʼi ndsʼee kao tichjaa. Je chjota israelita nʼio tsjoa kisatiole kʼianga tsakʼasjengʼa Jeobá ya “jinle chjotankjín”, kʼoa kʼoati nʼio tsjoa satíoná tsanda ñá kʼianga ʼyaxkoán je Jeobá kao ngatsʼi ndsʼee kʼianga satío je kjoajtíntse (Salmo 26:12; 111:1). Nga satío kjoajtín jebi tsaojinñá je ndsʼee kao tichjaa xi kjaʼaí jtín bʼakaole kʼoa kao xi saʼnda xin naxinandá faʼaini. Kʼoa kʼianga bichóka nyisen yaa bichaa jña tísʼejna je kjoajtíntse kʼoa ma nimiyosaa je xi ngikʼa (Hechos 2:42). Kʼoa yaní jñani ngisa ʼyaa nga je xi jtín tjíosíkatíoná jngo tjíjtsa Sonʼnde kuiní nga tsjoachaa xíngiaa (1 Pedro 2:17).

Ngisasa nda síkatíoná ngixko̱n Niná. Nichxin kjoatse, je chjota israelita nʼio kitsjoanganʼiole kʼianga “koanjinle je én xi tsakʼinyale” xi tʼatsʼe kjoatéxomale Niná (Nehemías 8:8, 12). Kʼoa nichxin xi tiyoaa ndʼaibi, nʼio chjí ʼyatokoán jmeni xi ʼmiyaná ya kjoajtíntse xi satíoná. Nga jngó jngó kjoajtíntse xi satío jngo testo xi tsʼe Biblia bʼangini. Faʼa xíngiaa xi nchja̱yajin kʼoa kao xi bakóchoya josʼin si̱xálee Niná. Kʼoa kʼoati tsjoánganʼioná nga noʼyalee je ndsʼee josʼin tjíokale je kjoa xi tjíofaʼatojin nga chjotale Cristo ma. Ya kjoajtíntse xi jan nichxin sʼejna faʼa xi drama ʼmi, jñani kʼoafayo je xíngiaa xi faʼa jotsakjayo je chjota xi tsakatio nichxin kjoatse. Drama jebi nʼio nda kaníya jkoaa jme xi tínchja̱ni je Biblia kʼoa nʼio chjíle jme xi bakóyaná. Kʼoa jotjín kjoajtíntse satío kʼiaa fisʼenngindá je xíngiaa xi jekitsjoatʼale yaole je Niná.

• Ánni nga tse kjoatsjoa tje̱nkaosíni je kjoajtíntse xi satío.

• Jmé kjoanda xi so̱koli tsa kʼuín je kjoajtíntse xi satíonajin.

Nga tojeme si̱kʼien Jesús i kitso: “Je énnda xi tʼatsʼe je kjoatéxomale ngʼajmi kuinókjoayani ngakijnda sonʼnde, nga si̱kixiyandale ngatsʼi naxinandá. Kʼia kjoaʼaí xi kjoetʼa” (Mateo 24:14). Jósʼin kuitjoson xá jebi jngo tjíjtsa Sonʼnde. Tjínnele kʼoatisʼin kʼuínyason josʼin kitsoyason Jesús nga tsakʼejna i̱ Sonʼnde (Lucas 8:1).

Xki̱ niʼya mangínchonlaijin chjota. Je Jesús kʼoasʼin tsakakóyale chjotale nga xki̱ niʼya katatsoyason je énnda chjotse (Mateo 10:11-13; Hechos 5:42; 20:20). Kʼoa je xi títjon chjotale koan tsen kitsʼaile ʼnde jña tje̱n kuitsoyason (Mateo 10:5, 6; 2 Corintios 10:13, NM). Nichxin xi tiyoaa ndʼaibi, kʼoati nʼio nda tjínndajin josʼin ʼmiyasuinjin. Nga jngó jngó jtín tsen tjínle ʼnde jñani tje̱n tsoyason. Kʼoasʼin tíbitjosonni jme xi tsakʼéne Jesús nga kʼuínyasonle chjota ngakjijnda Sonʼnde (Hechos 10:42).

Fasjainíjin chjota tojñani tjío. Je Jesús kʼoati tsakakóya tojñani nga tjín chjota, jolani ya ndaindáchikon kʼoa kao ya jña tíjna jngo xjáonandá (Marcos 4:1; Juan 4:5-15). Kʼoa jinjin kʼoati tinʼiaijin. Chjakaoníjin énle Niná chjota tojñani nga tjío, jolani ya yandiaa, ya jña negosio tjín, ya jña tjín parque kʼoa saʼnda nichjénníjin teléfono nga ʼmiyalaijin chjota. Kʼoati chjakaonajmíjin je chjota ndainiʼyanajin, je xi ñatje̱n nixáijin, je xi ñatje̱n mangínjin skuela kʼoa kao xíngijin. Nga kʼoasʼin tiʼmiyaijin, nʼio nkjín chjota tjíonrʼoé ngakjijnda Sonʼnde je énnda chjotse xi koa̱n kʼoasjentjai (Salmo 96:2).

Tikjaʼaitsjenlai jngo chjota xi meli nga kʼoéyanajmílai je énnda chjotse xi tʼatsʼe gobiernole Niná kʼoa jme kjoanda xi so̱kole chjota jebi. Ali tojijin bʼejintokuin énnda jebi, tʼeyanajmílai chjota.

• Jmé “énnda” xi tjínnele kʼuínyasoán.

• Jósʼin tjíokjenngile Jesús je testigole Jeobá kʼianga tjíotsoyason.

Je én xi precursor tso, jé xotsole jngo chjota xi jngo ndiaa kjoʼai kʼoa xi fitítjon nga koa̱n kjoaʼa xi nroatje̱nngi. Je Jesús kui koan, nga̱ kui xá kinikasénni i̱ Sonʼnde nga katatsoya én xi kjoabijnachon tje̱nkao kʼoa jngo ndiaa tsakájnale je chjota nga koa̱n kuitjontjai (Hebreos 12:2). Kʼoa ndʼaibi, kui choa̱le mangíntjenngijin. Kuinga chʼasjeʼasínijin nichxinnajin jokji tje̱n kʼoamanajin nga ninkjínjin je chjotale Cristo (Mateo 28:19, 20). Kuinga tjíokʼasíni xíngijin xi precursor sʼin tjíosíxá.

Xi precursor tjíosíxá. Ngatsʼijin xi testigole Jeobá maijin ʼmiyasonníjin je énnda chjotse xi tʼatsʼe Niná. Tonga tjínkʼa xi kʼoasʼin bʼéndajin nga kui xá kjoé xi precursor regular ʼmi, xi jankan kao te ora tsoyason nga xki̱ sá. Kʼoa nga bitjosonle xá jebi kui básjai je xá xi tsín tse nichxin fáʼale. Kʼoa kʼoati tjínkʼa xi toxá tjoéjinni nga kui xá bʼaile xi precursor especial ʼmi kʼoa yaa nikasén jñani nga nʼio machjén xi tsoyason. Je xi kʼoasʼin síxá jngo siento kao kante ora tsoyason nga xki̱ sá kʼoa tsa tsʼatosaje̱. Je xi precursor sʼin tjíosíxá tomanile josʼin sokóʼale yaole kʼoa jé Jeobá sínʼiotʼa nga je tsjoále jme xi machjénle (Mateo 6:31-33; 1 Timoteo 6:6-8). Kʼoa ʼyani xi tsín kʼoamale nga kui xá jebi kjoé, kʼoatima nga precursor auxiliar sʼin síxá. Je xi kui xá jebi kjoé kante kʼoa tsa ñachante ora tsoyason nga xki̱ sá.

Je xi precursor síxá kui kʼoasʼínni nga tsjoake Niná kao chjota. Joni tsa Jesús kʼoati ʼyaijin nga nʼio machjénle je chjota nga katasʼejinle jotjínni xi tʼatsʼe Niná kʼoa jme xi tjínndajinle (Marcos 6:34). Kʼoa nga jeʼyaijin ʼmiyalaijin chjota, nga̱ kui xi koasenkao ndʼaibi nga sʼe̱le kjoachoya tʼatsʼe nichxin xi nroaján. Jméni xosíkao je xi precursor sʼin síxá nga bʼasjeʼasíni nichxinle kʼoa nga síkjesíni nganʼiole nga tsoyale chjota jokjoantjínni xi tʼatsʼe Niná. Kuinga tsjoake je chjota (Mateo 22:39; 1 Tesalonicenses 2:8). Kʼoa nga kʼoasʼín, matajasa kjoamakjainle, ngisa machriantʼasale Niná kʼoa nʼio tsjoa satío kon (Hechos 20:35).

• Jméni xi sʼín je xi precursor ʼmi.

• Ánni nga precursor sʼin síxá kʼasíni je xíngiaa.

Je testigole Jeobá ñaki kʼoasʼin tíbʼaile kjoachjine xi tsʼe Niná saʼnda ngasʼa. Kʼoa ñaki tsen satío skuela jña nichjine je xi ñaki tokui xá sʼín nga tsoyason xi tʼatsʼe Chjotaxále Niná. Ánni. Kuinga ñaki nda kuitjosonle je xá xi kjinele (2 Timoteo 4:5).

Skuela xi tsʼe Precursor. Kʼianga jejngo nóle nga precursor sʼin tísíxá tsa jngo ndsʼee kʼoa tsa jngo tichjaa, yaa fi jngo skuela xi jaon nichxin sʼejna ya jngo Ndʼia jña chotʼayá xi chrian koa̱nle. Jmé xá fini skuela jebi. Kuinga katasíchriantʼasale Jeobá, nga ngisa nda katabitjosonle xá xi kitjenkao nga ʼmiyasoán kʼoa nga tosi tonda kʼoasʼin sixá.

Skuela xi síchjine je xi bakóyason tʼatsʼe Chjotaxále Niná. Jao sá nichjine je precursor xi jenkjín nó nga kʼoasʼin tjíosíxá, xi tjíonda nga síkatío ʼndele nga ya fikakóyason jñasani nʼio machjén nganʼiole. Xíngiaa jebi ñaki i tjíotso: “I tijnabi. An tikasénnái”, kʼoa jé tjíokjenngile je Jesucristo, xi tsakʼejna i̱ Sonʼnde kʼoa xi ngisasa nʼio nda kitsoyason énnda chjotse (Isaías 6:8; Juan 7:29). Kʼianga kʼoasʼin tʼaxin fikakóyason, kʼoasʼin batio josʼin tjío je chjota xi ya tjín. Síngale yaole ninga kjaʼaí kjoan tsojmi xi kjine je chjota xi ya tsʼe, ninga kjaʼaí chon ʼnde jebi kʼoa ninga kjaʼaí kostumbre tjínle. Kʼoa tsakui nichxin saʼnda tjínnele kjaʼaí én koa̱nle. ʼYáni xi ma fi skuela jebi. Jéní ndsʼee kao tichjaa xi jechixan kʼoa kao xi sʼa tjíotoje, xi tje̱n kanjan nóle saʼnda jankan kaoni aon nóle. Skuela jebi nʼio binyakao nga kʼoamakjoan josʼin mele Niná kʼoa nkjín koya josʼin machjine. Ánni. Kuinga kui koa̱nchjénle ya jñani ni̱kasén kʼoa nga ngisa nda sixále je Jeobá kʼoa kao naxinandále.

Skuela xi tsʼe Galaad. Jetsʼato jin jmi ndsʼee kao tichjaa jeki Skuela xi tsʼe Galaad josaʼnda nga kisʼejnatítjon nga nó 1943. Kʼoa misionero sʼin tjíonikasén nga katafitsoyason “jña saʼnda fetʼani sonʼnde” (Hechos 13:47). Kʼianga sʼa kichotítjon je misionero ya naxinandá Perú nijngojinla jtín tjín. Tonga ndʼaibi jetsʼato jngo jmi jtín tjío. Kʼoa kʼianga kinikaséntítjon misionero ya naxinandá Japón, saʼnda tsín te mani testigole Jeobá xi ya tjín. Tonga ndʼaibi jetsʼato jao siento jmi mani. Skuela jebi aon sá sʼejna kʼoa kui Énle Niná xi nʼio nda chotʼayason. ʼYáni xi ma fi skuela jebi. Jéní precursor especial, xi jo misionero sʼin tjíosíxá, xi ya tjíosíxá ya sucursal kʼoa tsa jeje̱ superintendente viajante. Xíngiaa jebi kui xá nichjineni nga tsjoánganʼio je xá xi kjima jngo tjíjtsa Sonʼnde.

• Jmé xá satíoni je Skuela xi tsʼe Precursor.

• ʼYáni xi ma fi je Skuela xi síchjine je xi bakóyason tʼatsʼe Chjotaxále Niná.