“Katjinroa kjoatéxomali”

Je Jeobá i kitso: “Likui tisʼe̱ni kjoaba, kjoaʼaon, chʼin, ni kjoabiya. Liʼya xi ti skíʼndáni. Alikui tiʼya xi kui kjoaʼaítsjennile jme xi koan ngasʼa”.

Je Jeobá yaa ʼndenaxóle Edén kisikatío je Adán kao Eva nga ya sijchá yaole kʼoa nga tsjoa katasatío kon. Kui xi sʼin tsakai nga je Jeobá kʼoetsʼoale kʼoa nga nʼio nkjín xti sʼe̱le nga sitse sonʼnde. Tonga alikui kisitjoson. Tonga je Jeobá tojo mele kʼoasʼin jme xi tjínndajinle tsakai. Libro jebi kui kitsoyaná nga ñaki sítjoson Jeobá ngayeje jmeni xi tso. Je Chjotaxále nʼio tse kjoanichikontʼain kjoaʼaíkao i̱ Sonʼnde kʼoa kuitjoson jme xi tongini kitsole Jeobá je Abrahán.

Je Na̱i, ánkje tsʼenle kao chjota tsʼen jeme tjóxin. Ngatsʼi chjota xi koatio tojé Jeobá kʼoetsʼoale. Alikui tichʼin sʼe̱niná kʼoa alikui tikuiyáñá. Tosaa ñaki tsjoa sa̱tío tokoán nga nyaon nyaon kʼoa sʼeená nganʼio. Je sonʼnde ʼndenaxó koa̱n. Ngatsʼiaa sʼeená tsojmi xi chi̱nee kao ndʼia xi ndakjoan. Nda chjota koa̱n ngatsʼi, likui tisʼe̱ni chjota xi tsʼen. Je cho̱jñá alikui titsokjonniná kʼoa alikui tikuijkónnilee tsanda ñá.

Nʼiojin tsjoa sa̱tío tokoán nga sikjaʼáyale Jeobá je chjota xi jekʼien. Ñá chjoéyaa je chjota xi tsakatio nichxin kjoatse, jolani tsa Abel, Noé, Abrahán, Sara, Moisés, Rut, Ester kao David. Kʼoa jé kuinyakaoná nga ʼndenaxó si̱koaa sonʼnde. Sʼe̱ntsjainá jme xi sʼiaan kʼoa tsjoa sʼe̱ tokoán.

Je Jeobá mele nga ya kuijnai ya ʼndenaxó. Nga jeya tiyoaa, nʼio tse jmeni xi jchasaa xi tʼatsʼe Jeobá. Kuinga tosi tonda si̱chriantʼanilee ndʼaibi kʼoa tokʼia saʼndani.