Xi sakʼoa Chjonangiaa

◼ Jméni xi kuenta sʼin je xíngiaa xi mele nga je naxinandále Jeobá sikatío kʼale tsojmi xi tjínle kʼianga jekuiyá kʼoa tsa ngayejeje̱

Kʼianga jebiyaa alikui tiʼyañá jomani tsojmi xi kasʼená (Ecl. 9:5, 6). Kʼoa kuinga tjínsíni chjota xi jngo xo̱n bʼénda ngixko̱n kjoatéxoma kʼoa yaa bʼétʼaxo̱n ʼyá tsʼe koa̱n tsojmile kʼianga je xi jekuiyá (2 Rey. 20:1). Xo̱n jebi kʼoati ya sʼetʼa ʼyáni xi fideicomisario koa̱n kʼoa tsa xi albacea koa̱n, xi tsonile, je xi kjinele nga kʼoasʼin katabitjoson jotso xo̱n xi kasʼenda. Tjín naxinandá jñani nga je chjotaxá síxkoa̱ya kʼoa síkʼabí je tsojmile ʼndíkʼien tsa tsín kabʼénda xo̱n jebi. Kʼiatsa kui tinikjaʼaitsjeen nga je naxinandále Niná si̱katío kʼalee tsojmi xi tjínná kʼoa tsa ngayejeje̱, nʼio machjén nga kʼoéndaa xo̱n jebi kʼoa ndakjoan chjoéjiaan je xi fideicomisario koa̱n kʼoa tsa xi albacea koa̱n. Tsa mesali jchai jonikao kʼiatsa je naxinandále Niná si̱katíolai tsojmili koaan chjónangi ya sucursal.

Je chjota xi fideicomisario ma kʼoa tsa xi albacea ma nʼio tse xá kjinele. Tse nichxin fikao nga sʼexkó ngayeje tsojmi xi kisʼele ʼndíkʼien, nga bʼaile je xi bʼakaole, kʼoa xi ijngosani, nkjín xo̱n sʼenda. Je chjotaxá kʼoati tjíole kjoatéxoma xi tjínnele kuitjoson. Kʼianga chjoéjiaan je xi kui xá jebi kjoánelee ali tsa tokuijin kjuinñá tsa i̱ tíjnajin naxinandále Niná. Je chjoéjiaan je xi kʼoakoa̱nle kʼoa xi ʼyale nga nda sitjoson xá jebi (chótʼai je rebista ¡Despertad! xi tsʼe 8 de diciembre de 1998 ya jñani “Los beneficios de la planificación patrimonial” tso).

Xá xi kjinele je xi fideicomisario ma kʼoa tsa xi albacea ma. Tsa ʼya xi mele nga kui xá tsjoáli, ndakjoanla chósonnilai jokji xá tje̱nkao kʼoa tʼetsʼoalai Jeobá, kʼoa kʼia titjosuin tsa bele tokuin nga kʼoakoa̱nli (Luc. 14:28-32). Xi jekuiyá je ʼndíkʼien, tjínneli si̱kjinrʼoái je xi kisikatíole tsojmile. Xi ijngosani, ji kjineli si̱xkoa̱yai je tsojmile tojo tso je xo̱n xi tsakájna kʼoa tojo tjín je kjoatéxoma. Je chjota xi kjinele xá jebi alikui koa̱n kjoaʼatone jmeni xi tso xo̱n xi tsakájna je ʼndíkʼien, ninga nkjín mani je tsojmi kʼoa ninga tochoa mani. Kʼiatsa ʼyani xi kʼoakʼoe je xo̱n xi kʼoenda nga je naxinandále Jeobá sikatío kʼale tsojmi xi tjínle kʼianga jekuiyá kʼoa tsa ngayejeje̱, tsojmi jebi tsʼe koa̱n naxinandále Jeobá (Luc. 16:10; 21:1-4).