A ʼyaní

Jósʼin kisokonile chjota nichxin kjoatse je lʼí xi kisichjén kʼianga kjin ki

YA Génesis kʼoatso nga Niná kʼoakitsole je Abrahán nga kjin katafi nga tjín xi tsjoátʼale. Je Biblia itso: “Je Abrahán kiskoé je chikín xi sichjén nga koaká je xi tsjoátʼa kʼoa jé Isaac kisikʼa, kʼoa kiskoé je lʼí kao kuchiyo kʼoa ki nga jao” (Génesis 22:6).

Je Biblia alikui kʼoatso jósʼin tsakʼétse lʼí je chjota nichxin kjoatse. A títjonkjoanla tsakʼétse lʼí je Abrahán kao Isaac kʼoa a kui tsakʼa nga ki. Jngo chjota xi kotʼayason tʼatsʼe Biblia kʼoatso nga tsínjinxó kichokjoale je lʼí tsakui tsakʼa nga̱ nʼio kjin ki. Kʼoa kʼoatsosa nga tsakuixó nichxin je Abrahán kao Isaac tsakʼa jmeni xi tsakʼétseni je lʼí.

Tonga tjínkʼa chjota xi kʼoati tʼatsʼe Biblia kotʼayason xi kʼoatso nga ñʼai koanle je chjota nga kʼia josʼin tsakʼétse je lʼí. Kuinga sakʼoa je xólʼíle chjota xi tiyani tsʼe kisichjénni nga tsakʼétse je lʼí. Nʼio nkjín xi kʼoatso nga je Abrahán tsakʼa je xólʼí saʼnda nga sʼa ki. Kʼoatso nga tsakui nichxin je xi tsakatíoya xólʼí jo tii kji kʼoa kadena je nʼóle (Isaías 30:14). Kʼianga tsakʼétse lʼí je Abrahán tsakui nichxin xólʼí kisichjén kao xjoa̱yá xi kixí.