Xorꞹ 10

¿Jaga nee e Mizhokjimi kʼꞹ ra matrʼꞹji?

Ma gi nee ri jobi na joo ko e Mizhokjimi, peski ri matrʼꞹ e Mizhokjimi kʼua jaga mama angeze. E Jesús o mama nu kʼo bʼemi matrʼꞹji Mizhokjimi kʼua jaga nee angeze, ra matrʼꞹji «kʼo nu kʼꞹ na kjuana» (Juan 4:23, 24). Bʼꞹnkʼo nrre nʼaño ga matrʼꞹji Mizhokjimi, ma ra matrʼꞹji kʼua jaga mama angeze, nge ma ra kjaji kʼo na kjuana ma (Efesios 4:4-6). Ma ri matrʼꞹ e Mizhokjimi kʼua jaga nee angeze ri mimi texe yo paa. Ma dya ri matrʼꞹ e Mizhokjimi kʼua jaga nee angeze, nuʼma ra kjuatrkʼꞹ ma (Mateo 7:13, 14).

Bʼꞹbʼꞹ ntee kʼꞹ matrʼꞹji e Mizhokjimi kʼua jaga nee angeze, ma ri jñanrra yo ntee kʼꞹ kjaji ga kjanu, soo ri pa̱ra̱ jaga nee e Mizhokjimi kʼꞹ ri matrʼꞹ. E Jehová me na jonte, ngekʼua kʼo matrʼꞹji kʼua jaga nee angeze peski ra jonteji. Nzakja da nrrora kʼꞹ na joo, kisʼi na joo nrrora, akjaba yo ntee kʼꞹ matrʼꞹji Mizhokjimi kʼua jaga nee angeze, nujnu bʼꞹbʼꞹ ntee kʼꞹ na jontejnu (Mateo 7:15-20).

Yo joji na joo ko e Jehová ⱥtⱥji kʼo mama ne Biblia. Pa̱ra̱ji kʼe ne Biblia nge nu jñaa e Mizhokjimi. Nguekʼua mimiji kʼua jaga mama ne Biblia ñe nge dya nu ga mbosʼꞹji ma kjogꞹ nrrumꞹ, xi ga mbosʼꞹ ra pa̱ra̱ji na joo e Mizhokjimi (2 Timoteo 3:16). Kʼo jizhiji yo ntee nge kʼo kjaji angezeji.

Yo joji na joo kʼo e Jehová na jotrʼka sʼiyaji in dyojui. E Jesús o jizhi yo ntee kjo nge e Mizhokjimi ñe mi jokꞹ kʼo mi sodye akjaba o ñetsʼe kʼu me mi sʼiya yo ntee. Yo matrʼꞹji Mizhokjimi kʼua jaga nee angeze xi ga sʼiya yo ntee. Nzakja e Jesús sʼiyaji yo ntee kʼꞹ dya pje pʼɇsi, xi neji texe yo ntee kʼo ka̱ra̱ kja ne xoñijomꞹ. E Jesús o mama kʼꞹ yo ntee ro pa̱ra̱ji kjo nge o discípulo, ma ro nuji kjo nge kʼo na jotrʼka sʼiyaji in dyojui (Juan 13:35).

Yo joji na joo ko e Mizhokjimi me sʼiyaji ñe respetao o chju̱u̱ e Mizhokjimi kʼꞹ ngeje: e Jehová. Ma kjo ko dya nee ra nⱥnkʼe in chju̱u̱, ¿Kjo soo ri jobi na joo ko angeze? Iyo. Ma i̱ jobi na joo ko da ntee ma gi zopjꞹ, gi nⱥdⱥ in chju̱u̱ ñe gi xipji yo ntee jaga nge angeze. Ngekʼua kʼo nee ra joji na joo ko e Mizhokjimi ra nⱥdⱥ o chju̱u̱ ñe ra xipjiji yo ntee jaga nge angeze. E Jehová nee kʼꞹ ra kjaji akjanꞹ (Mateo 6:9, NTD; Romanos 10:13, 14).

Nzakja e Jesús, yo joji na joo ko e Mizhokjimi jizhiji yo ntee pje nge nu Reino e Mizhokjimi. Angezeji jizhiji yo ntee kʼe in Reino e Mizhokjimi nge da gobierno kʼꞹ bʼꞹbʼꞹ ajensʼe, kʼe ra tsjaa ne xoñijomꞹ me rga zøø, nujyo nge dʼadyo jñaa yo (Mateo 24:14).

Yo nrrestigo e Jehová nee ra joji na joo ko e Mizhokjimi. Angezeji ⱥtⱥji kʼo mama ne Biblia ñe jotrʼka sʼiyaji in dyojui. Angezeji nⱥdⱥji in chju̱u̱ e Mizhokjimi ñe me sʼiyaji in chju̱u̱ angeze, ñe jizhiji yo ntee pje nge nu Reino e Mizhokjimi. Kja ne xoñijomꞹ kʼo na kjuana kʼꞹ matrʼꞹji e Mizhokjimi, ngeje yo nrrestigo e Jehová.