Xorꞹ 16

Yo ntee ra unꞹji nguenrra kʼe gi sʼiya e Mizhokjimi ma ri tsjaa kʼo nee angeze

Ma i̱ jobi na joo ko da ntee, ma gi nee ri sido ri jobi na joo ko angeze dya ri jiezi ri ñabi. Ma ga ñaa in jobi gi ⱥrⱥ, xo akjatrjo angeze ma gi ñage ⱥrⱥ kʼo i̱ xipji. Ma gi zopjꞹ ko dyaja ntee gi xipji kʼꞹ in jobi me na jonte, akjaba ra kjaji ma nee ra joji na joo ko e Mizhokjimi, jñanrra pje mama ne Biblia kʼꞹ ra kjaji.

Pama pama ri dyotꞹ e Jehová. «Sido ri dyotꞹji angeze.» (Romanos 12:12.)

Ri xorꞹ nu jñaa e Mizhokjimi, ne Biblia. «Texe kʼo o dyopjꞹ o jñaa Mizhokjimi, nge o Espíritu Mizhokjimi o ñꞹnbꞹ o mꞹbʼꞹji o dyopjꞹji. Me ni mubi o jñaa Mizhokjimi para ra jichkʼoji yo ntee kʼꞹ na kjuana jaga kjaa Mizhokjimi, ñe jarga pjønguendaji kja kʼo dya kjuana. Me xo ni mubi o jñaa Mizhokjimi para ra zopjꞹji kʼo kjaa na sʼoo, ngekʼua ra jieziji kʼo, ra tsjaji kʼo na joo.» (2 Timoteo 3:16.)

Ri ma zopjꞹ yo ntee kjo nge Mizhokjimi. «Ngekʼua nutsʼkʼeji ri mokjeji kja yo ntee yo ka̱ra̱ texe kja ne xoñijomꞹ, ri xopꞹji o jñaa Mizhokjimi ngekʼua ra ñejmezꞹji. [...] Ri xopꞹji yo ntee ra tsjaji texe kʼo ya ro xitsʼiji.» (Mateo 28:19, 20.)

Ri chezhi ko yo a go joji na joo ko e Mizhokjimi. «Ma ri dyokje ko nu kʼo me pa̱ra̱ na punkjꞹ xo akjatrjozge me ri pa̱ra̱ na punkjꞹ.» (Proverbios 13:20.)

Ri ma nuja jmurꞹji yo nrrestigo e Jehová. «Xo ni jyodʼꞹ ra potꞹ rga zopjꞹji yo mi kjuarmaji, ngekʼua ra sʼiyaji yo nin minteji y ra pjøskʼoji yo. [...] Ni jyodʼꞹ ra jmurꞹgoji y ra potꞹ rga zopjꞹji.» (Hebreos 10:24, 25.)

Soo ri unꞹ merio akjaba ri pjosʼꞹ in bʼepji e Jehová. «Ri unꞹgeji ja kʼo nzi ba ngijñi in mꞹbʼꞹgeji nzi natsʼkʼeji. Dya ri sentio rgi unꞹji. Dya xo ri unꞹji nzakja kʼꞹ ri kjakʼꞹji a pjuersa. Mizhokjimi me nee nu kʼꞹ me mⱥjⱥ ga unꞹ.» (2 Corintios 9:7.)