Xorꞹ 18

Soo ri jobi na joo ko e mizhokjimi texe yo paa

Na punkjꞹ kʼo ri tsjaa para ri ñekje da jobi. Texe kʼo ri tsjaa ngekʼua ri jobi na joo ko e Mizhokjimi ñe ma dya ri jiezi, angeze ra mboxkʼꞹ na punkjꞹ. Yo ntee kʼꞹ mi ejmeji e Jesús o xipji: «Ma ri pa̱ra̱ji kʼꞹ na kjuana, ra tempkʼeji libre ma» (Juan 8:32). ¿Pje nee ra mama yo?

Dya kja ri ejme nu kʼo dya ga kjuana. E Satanás me pjotrʼꞹ na punkjꞹ mbʼechjine kʼꞹ dya ga kjuana, nudya yo, soo ri jiezi dya kja xi ri ejme. Dya kja ri mimi nzakja kʼo dya pa̱ra̱ji pje nge kʼo ra tsjaa e Jehová, ngekʼua me jeyaji (Romanos 8:22). Yo joji na joo ko e Mizhokjimi «dya kja ri su̱u̱ rga [tꞹji]» (Hebreos 2:14, 15).

E Mizhokjimi ra tsjaa ne xoñijomꞹ me rga zøø, nu ya nu dya kja ra pɇsʼiji nrrumꞹ. Me ra mⱥkjojme ma dya kja ra pɇsʼiji nrrumꞹ, nge yo ri tebʼegojme axojñi. Kja ne xoñijomꞹ kʼꞹ me rga zøø, dya kja ra kjaji chu̱u̱ yo país, dya kja ra bʼꞹbʼꞹ ndotkʼijeme, dya kja ra bʼꞹbʼꞹ ntee kʼꞹ ra kjaji kʼo na sʼoo. Dya kja ra bʼꞹbʼꞹ ntee kʼꞹ dya pje pɇsʼi, dya kja kjo ra kjogꞹ trjijmi. Yo ntee dya kja ra trjeze dya kja ra tꞹji, dya kja ra su̱ji, dya kja kjo ra tsjapkʼoji kʼꞹ ra kjaji kʼo ixta soji kʼꞹ na jyꞹꞹ. Ne Biblia mama: «Na ngeje kʼꞹ nin Tataji pa̱ra̱ kʼo ni jyonkʼeji» (Mateo 6:8).

Yo joji na joo ko e Mizhokjimi ra mimiji texe yo paa. Yo ntee kʼꞹ jyodʼꞹ ra joji na joo ko e Mizhokjimi ra mimi texe yo paa, nge kʼo ra charkʼꞹji angeze (Romanos 6:23). Ma dya kja ri nrru̱u̱ ri mbeñe da tsʼinrrajme texe kʼo soo ri tsjaa texe yo paa.

Ri mimi na punkjꞹ paa pje nrre ri tsjage. Mbuma gi nee ri pjebʼizhi, ri uɇzhi, ri yaxꞹ zaa. Mbuma gi nee ri pa̱ra̱ na joo texe yo añimale ñe yo nzhⱥjnⱥ. Mbuma xi gi nee ri maa kja nrre nʼaño país ñe ri pa̱ka̱ yo ntee kʼꞹ miminu. Ma ri mimi texe yo paa soo ri tsjage texe kʼo a ro nuji.

Ri mimi na punkjꞹ paa ñe ri jobi na joo ko na punkjꞹ ntee. Ma ri mimi texe yo paa, soo ri pa̱ra̱ na punkjꞹ ntee kʼꞹ a go joji na joo ko e Mizhokjimi, xi ri pa̱ra̱ pje nrre kjaji ñe jaga ngeji, ri jobi na joo ko angezeji. Ra jotrʼka sʼiyabi (1 Corintios 13:8). Ri mimi texe yo paa dya kja ri nrru̱u̱, akjaba soo ri jobi na joo ko texe yo ntee kʼꞹ ra nga̱ra̱ji kja ne xoñijomꞹ. Tsjɇma tsjɇma me na joo ri jobi ko e Jehová. ¡Ri jobi na joo ko e Mizhokjimi texe yo paa!