XORꞸ 2
¿Pje o kjogꞹ kja Edén?
Na anxe o tsjaa kʼo na sʼoo, o jiotrʼꞹ e Adán ñe e Eva ngekʼua dya ro dyⱥtⱥbi Mizhokjimi, ngekʼua nudya ri pɇsʼiji pekado ñe ri tu̱u̱ji
MA DYA bʼe mi ka̱ra̱ ntee kja ne Xoñijomꞹ, e Mizhokjimi otrʼꞹ o dyⱥtrʼⱥ yo anxe ajensʼe. Na anxe dya go dyⱥtⱥ e Mizhokjimi, kʼe anxe o dyompꞹ e Eva ngekʼua ro zii kʼe lulu kʼꞹ e Mizhokjimi o xipji dya ro ziibi. Kʼe anxe ngeje Satanás ñe Diablo.
Na nu paa na kʼijmi o zopjꞹ e Eva, kʼe kʼijmi dya mi ñaa, mi ngeje e Satanás kʼꞹ mi ñaa. E Satanás o xipji ma ro zii kʼe lulu dya ro nrru̱u̱, ma ro zii ro pjechi na punkjꞹ nzakja Mizhokjimi, ro tsjabi kʼo mi negui. Dya ma kjuanakʼo, e Satanás o dyompꞹ e Eva. E Satanás o tsjapꞹ ro mbeñe ke e Mizhokjimi dya mi nee ro unꞹ kʼo ma joo, ke dya o mama kʼo na kjuana. Kʼe Diablo, nge kʼꞹ primero o mama bʼechjine. E Satanás nee ke ra mbeñeji ke dya ga joo o mandamiento Mizhokjimi, ke dya ga joo ke ra kjaji kʼo mama angeze, nee ke ra manji: ¿Kjo ngeje Mizhokjimi ngekʼua ra mandazgoji? Nee ke ra mbeñeji ke dya ga joo jaga manda Mizhokjimi.
E Eva o ngotrʼbʼꞹ ñiʼi e Satanás. O ngijñi ma joo ma ro zii kʼe lulu, nuʼma, o zii, kjanu o maa unꞹ o xira, xo go ziikʼꞹ. Angezebi mi pa̱ra̱bi na joo kʼo mi kjabi. Zo e Jeoba o unꞹ kʼo me ma joo, angezebi dya go dyⱥtⱥbi e Jeoba o tsjabi kʼo mi neebi, o pekabi.
“Angeze ra nrripʼkʼi in ñiʼige ko a ngua, nutsʼkʼe ri sapꞹ o nzhingua.” (Génesis 3:15)
Nu kʼo go tsjaa e Satanás, e Adán ñe e Eva dya go jyesto ga kjatrjokʼo, e Mizhokjimi o dyotꞹji nguenrra. Nukʼua nge ma e Mizhokjimi o mama ke ro pejñe Naja kʼꞹ ra mbotrʼꞹ e Satanás kʼꞹ dya ga joo. Mizhokjimi o xipji e Adán ñe e Eva ro nrru̱u̱bi, kʼe nrramekʼꞹ dya go nrru̱u̱bi, e Mizhokjimi xi go jyestobi ro mimibi ro musʼꞹ trʼii e Eva. E Jeoba o juentsʼe yo chʼii kʼꞹ ro tsja̱nja̱bi, ngekʼua o mama ro pejñe Naja kʼꞹ ro mbosʼꞹji ro ngꞹsʼꞹ kʼe pekado, ngekʼua dya kja ro nrru̱u̱ji. Kja ne Biblia o opjꞹji jargua kjogꞹ nu kʼo go mama Mizhokjimi ro tsjaa. ¿Kjo nge kʼꞹ ro pejñe ñe pje ro tsjaa ngekʼua ro mbosʼꞹ yo ntee?
Nukʼua e Mizhokjimi o pjongꞹ a trji e Adán ñe e Eva kja kʼe xoñijomꞹ kʼꞹ ma zøø. Nudya ro pepjibi na punkjꞹ ngekʼua ro chotrʼꞹbi pje ro zii, ro pepjibi kja juajma nukʼo ro xɇpjɇ nge kʼo ro ziibi. Kjanu o nrrunte e Eva o musʼꞹ na tsʼitrʼi o jñuspʼꞹ Caín. Dya ngextrjokʼꞹ, xo go musʼꞹ na punkjꞹ chʼii ñe xuntrʼi, o musʼꞹ e Abel, ñe kʼe Set. E Noé o e̱je̱ kja o pjamilia e Set.
(Nu kʼo gua e̱je̱ba xo ri jyodʼꞹ kja Génesis nu capítulo 3 ra zⱥtrʼⱥ nu capítulo 5 ñe Apocalipsis 12:9.)