Kʼo profeta mi nⱥdʼⱥji o jñaa e Mizhokjimi

KʼO PAA ma mi ka̱ra̱ rey kʼo mi manda a Samaria ñe a Jerusalén, e Mizhokjimi o ñeme profeta ro nⱥdʼⱥji o jñaa angeze. Mi bʼꞹbʼꞹ ntee kʼꞹ dya mi neeji kʼo profeta pje nrre mi kjapꞹji kʼo na sʼoo. Kʼo profeta mi enchʼeji kja o mꞹbʼꞹ o jñaa e Mizhokjimi, ngekʼua kʼo profeta dya mi su̱u̱ji kʼo ntee. Ra nugojidya pje mi nⱥdʼⱥji kʼo profeta.

1. Ma o chjotꞹji kʼo babilonio e Jerusalén. Na punkjꞹ profeta nzakja e Isaías ñe e Jeremías o zopjꞹji kʼo ntee, go manji ke e Jerusalén ro chjotꞹji, dya kja ro nga̱ra̱ nteenu, na punkjꞹ paa ma kja o zⱥdʼⱥ kʼo jñaa kʼo bi manji. O zꞹbꞹ e Jeoba kʼo nteekʼo, nange mi manji mi matrʼꞹkjimi pero dya ma kjuana, mi kjaji kʼo na sʼoo mi matrʼꞹ kʼo tsʼita ñe kʼo tsʼinana, xo mi obꞹji ko kʼo nrrinxu kʼo ix mi ka̱ra̱ kja kʼo løsi jakʼo mi bʼꞹbʼꞹ kʼo tsʼita ñe kʼo tsʼinana, ma pje mi pøʼøji dya mi sꞹtʼꞹji na joo mi ponꞹji, dya mi pjosʼꞹ kʼo mi tsʼiprobe dya mi kjapꞹji justicia, mi kjapji chu̱ʼu̱ ko o minteji (2 Reyes 21:10-15; Isaías 3:1-8, 16-26; Jeremías 2:1–3:13).

2. Ma o nzhogꞹji a Jerusalén. E Mizhokjimi o mama ke ma ro zⱥdʼⱥ kʼo setenta kjɇɇ kʼꞹ ro nga̱ra̱ji a Babilonia, kʼo ntee ro nzhogꞹji na yeje a Jerusalén ro mbeñeji e Jeoba, nrro ro jyⱥbʼⱥji kʼe templo ja mi matrʼꞹjikjimi Jeoba (Jeremías 46:27; Amós 9:13-15). O kjogꞹ komo dosciento kjɇɇ ante ke ro zⱥdʼⱥ kʼo jñaa kʼo bi mama kʼe profeta Isaías, ix ko mama ro ngeje e Ciro ro nrro̱mpꞹ kʼe rey a Babilonia ñe ro xipji kʼo israelita ro nzhogꞹji a Jerusalén. E Isaías o mama jargua tsjapꞹ e Ciro ngekʼua ro ngichi a Babilonia (Isaías 44:24–45:3).

3. Ma ro sⱥjⱥ kʼe Mesías ñe jargua kjaa. Kʼe profeta Miqueas o mama kʼe Mesías ro musʼꞹji a Belén (Miqueas 5:2). Kʼe profeta Zacarías go mama kʼe Mesías dya ro kjapꞹ na nojokʼꞹ, ma ro zⱥtrʼⱥ a Jerusalén ro chⱥgⱥtrjo na tsʼiburru (Zacarías 9:9). Kʼe profeta Isaías o mama ke ma ro e̱je̱ kʼe Mesías zo me ro sʼiya kʼo ntee, angezeji dya ro neeji (Isaías 42:1-3; 53:1, 3). Ro tsjapꞹji ro supjre na punkjꞹ ro mbotrʼꞹji, e Mizhokjimi ro xosꞹ ro bʼꞹbʼꞹtrjo na yeje. Kʼe profetakʼꞹ, o mama ro nrru̱u̱ kʼe Mesías ngeje kʼꞹ rgui ngꞹzʼꞹ in pekadoji (Isaías 53:4, 5, 9-12).

4. Ma ra manda kʼe Mesías. Yo gobierno kʼo bʼꞹnjiba kja ne Xoñijomꞹ dya pjechiji jarga mandaji. Kʼe Mesías me xo rga jonte, ra mboxkʼꞹgoji ngekʼua ra mimiji na joo ñe dya kja ra kjaji chu̱ʼu̱ (Isaías 9:6, 7; Jeremías 10:23). Ma ra manda kʼe Mesías ndeze ajensʼe kja ne Xoñijomꞹ, ra ñꞹnbꞹ o mꞹbʼꞹ kʼo ntee ra dyⱥtⱥji Mizhokjimi, kʼo añimale kʼꞹ na sate dya kja pje ra tsjakʼoji (Isaías 11:3-7). Yo ntee dya kja ra zodyeji (Isaías 33:24). Dya kja ra nrru̱u̱ji (Isaías 25:8). E Jesús ra xosꞹ yo ntee yo ya nrru̱u̱ nrro ra mimitrjo na yeje (Daniel 12:13).

(Nu kʼo gua e̱je̱ba xo ri jyodʼꞹ kja kʼe libro Isaías, Jeremías, Daniel, Amós, Miqueas ñe Zacarías.)