Kʼo carta kʼꞹ o mbejñe e Pablo ja mi jmurꞹji kʼo kjuarma

KʼE CONGREGACIÓN cristiana kʼꞹ kja mi pjꞹrꞹtrjo soo ro tsjaji kʼo mi nee e Jeoba. Kʼo paakʼo, kʼo ntee dya mi neeji kʼo cristiano dya mi kreoji mi mbotrʼꞹji, dya ngextrjokʼo, nuja mi jmurꞹji xo mi bʼꞹbʼꞹ ntee kʼo mi dyompꞹji o kjuarmaji. ¿Pje ni mbe kʼꞹ o mbosʼꞹ kʼo kjuarma ngekʼua dya ro jyezi Mizhokjimi? Kja ne Biblia kʼo Escrituras Griegas Cristianas gua e̱je̱ veintiun carta kʼꞹ o opjꞹji, yo jñaayo o pjosʼꞹ yo kjuarma ro mba̱ra̱ji pje ro tsjaji ñe jargua minji, ma o dyⱥrⱥji kʼo jñaakʼo me ko mⱥjⱥji.

E Pablo o opjꞹ catorce carta, ga mbꞹrꞹ kja kʼe carta Romanos je ni nguarꞹ kja Hebreos. Ma e Pablo mi opjꞹ na carta mi junsʼꞹ o trju̱u̱ ja nge nu ro zⱥtrʼⱥ, ma ro nge na ntee o ma ro nge na congregación. Ra nujiba pje ma jñaa o opjꞹ kʼe apóstol Pablo.

¿Pje nge kʼo na sʼoo kʼꞹ dya ra kjaji ñe jarga minji? Kʼo ntee kʼo kjaji kʼo na sʼoo ompꞹji o xira, ompꞹji o suu, kʼo tsja̱ja̱ji nrrinxu, tsja̱ja̱ji bʼɇzo, ma dya ra jyezijikʼo dya ra nuji ma ra manda o Reino e Mizhokjimi (Gálatas 5:19-21; 1 Corintios 6:9-11). Kʼo ntee kʼo kjaji kʼo nee e Jeoba dya ra juajnꞹji o kjuarma kjo nge kʼꞹ ra neeji, ra sʼiyaji nrrexeji zo ri nge nʼaño jargi ñe̱je̱ji (Romanos 2:11; Efesios 4:1-6). Ra mbosʼꞹji yo kjuarma ma pje bʼɇtsʼpiji ra unꞹji (2 Corintios 9:7). Kʼe apóstol o mama ke ra xipjiji e Jeoba ko texe in mꞹbʼꞹji nu kʼo ri kjogꞹji, o mama: “Dya ri jyezi rgui dyotꞹji Mizhokjimi” (1 Tesalonicenses 5:17; 2 Tesalonicenses 3:1; Filipenses 4:6, 7). E Mizhokjimi ra dyⱥtkⱥ ma ri dyotꞹ ko texe in mꞹbʼꞹge (Hebreos 11:6).

¿Pje go mama e Pablo pje ra tsjaji yo pjamilia? E Pablo o mama: Kʼo bʼɇzo kʼo ñʼeje o suu, ra sʼiyaji kʼua jango ga sʼiyatsjeji. Nutsʼkʼeji nrrinxu ri respetao in xirageji. Nutsʼkʼe trʼii ri dyⱥtⱥji ni tataji ñejni nanaji jango mama e Mizhokjimi. Nutsʼkʼeji kʼꞹ i̱ tataji ñe kʼo i̱ nanaji ri zopjꞹji na joo yo in chʼiigeji, ri jichiji o Jñaa e Mizhokjimi (Efesios 5:22–6:4; Colosenses 3:18-21).

Nukʼo mi nee e Mizhokjimi. E Mizhokjimi o unꞹ kʼe Ley e Moisés ngekʼua kʼo israelita ro mba̱ra̱ pje ro tsjaji ñe jargua mimiji asta ma ro sⱥjⱥ kʼe Mesías, nuʼma dya kja ro jyodʼꞹ jargua dyⱥtⱥji kʼe Ley (Gálatas 3:24). Kʼe carta kʼꞹ e Pablo o penpe kʼo hebreo, nujnu o mama pjenga o unꞹ kʼe Ley e Mizhokjimi kʼo israelita ñe o mama jargua tsjaa e Cristo kʼo nee e Mizhokjimi. E Pablo o mama kʼo mandamiento kʼꞹ bi opjꞹ e Moisés mi ngeje profecía kʼꞹ o cumple mꞹ o sⱥjⱥ kʼe Mesías. O mama kʼo añimale kʼo mi pⱥsbʼⱥji Mizhokjimi nukʼo dya kja ro tsjaji, e Jesús o e̱je̱ o ne̱e̱ ngꞹxkꞹgoji in pekadoji (Hebreos 10:1-4). Ngekʼua ma o nrru̱u̱ e Cristo dya kja ro kjaji kʼo mama kʼe Ley (Colosenses 2:13-17; Hebreos 8:13).

Jaga pepjiji yo cristiano. Yo kjuarma kʼo otrʼꞹ axojñi ra mimiji jaga mama ne Biblia, xo ni jyodʼꞹ ra mba̱ra̱ji na joo pje nee Mizhokjimi (1 Timoteo 3:1-10, 12, 13; Tito 1:5-9). Ni jyodʼꞹ kʼo kjuarma dya ra jyeziji ra jmuriji ngekʼua ra sido ra pjechiji o jñaa e Mizhokjimi, ni jyodʼꞹ ra potꞹ rga ñaaji ñe ra pjoxteji (1 Corintios 14:26, 31; Hebreos 10:24, 25).

A Roma e Pablo ma oʼo kja pjorꞹ mi tebʼe pje ro manji kja justicia, kʼo paakʼo, nrro go opjꞹ nʼaño carta kʼꞹ o penpe e Timoteo. O bʼꞹbʼꞹ janzi kjuarma kʼꞹ dya mi su̱u̱ji o maa nuji e Pablo kja pjorꞹ. E Pablo mi pa̱ra̱ ke ya mi chezhi kʼe paa ma ro nrru̱u̱ ngekʼua o mama: “Ri chjentkjo [...] nzakja kʼꞹ ya tsjaa na joo na carrera, ro sido kja o ñiji Mizhokjimi, ro kjago kʼo o xitsʼi. Y ri sido ri ejmegokʼꞹ” (2 Timoteo 4:7). E Pablo dya kja o mimi na punkjꞹ paa bʼꞹma nge kʼo paa ma o mbotrʼꞹji. Kʼo mi cristiano mi xorꞹ kʼo carta kʼo go zogꞹ e Pablo, nujyo carta o mbosʼꞹ kʼo discípulo sido ro tsjaji na joo kʼo mi nee Mizhokjimi ñe yo paa yo ri ka̱ra̱jidya xe ga mboxkʼꞹgoji kʼo cartakʼo.

(Nu kʼo gua e̱je̱ba xo ri jyodʼꞹ kja Romanos, 1 Corintios, 2 Corintios, Gálatas, Efesios, Filipenses, Colosenses, 1 Tesalonicenses, 2 Tesalonicenses, 1 Timoteo, 2 Timoteo, Tito, Filemón ñe Hebreos.)