E Mizhokjimi ra tsjaa ne Xoñijomꞹ me rga zøø

KʼE LIBRO kʼꞹ ni nguarꞹ kja ne Biblia ngeje kʼe Apocalipsis, o Revelación. Kja kʼe libro e Mizhokjimi xipji yo ntee kʼꞹ me supjre kʼꞹ ra sⱥjⱥ kʼe paa ma ra kjuatꞹ nrrexe yo nrrumꞹ kʼꞹ pɇsʼiji. E Mizhokjimi o tsjapꞹ e apóstol Juan ro jñanrra pje ro kjogꞹ yo paa a maa axojñi, kjanu o opjꞹ kʼe libro. Nuja kjuarꞹ kʼe libro mama e Jeoba ra tsjaa ne Xoñijomꞹ jama nee nrrizi ma go tsjaa.

Primero e Juan o jñanrra e Jesús ajensʼe mi xipji kʼo cristiano kja yo congregación ro jyeziji kʼo na sʼoo ñe ro sido ro tsjaji kʼo mi nee e Mizhokjimi. Kjanu o jñanrra o trono e Mizhokjimi ajensʼe, kjanu o opjꞹ jama kjakʼꞹ, xo o jñanrranu na punkjꞹ anxe kʼꞹ mi unꞹji alabanza e Jeoba.

O jñanrra ma e Mizhokjimi o unꞹ kʼe Tsʼime (Jesucristo) na rollo kʼo mi nꞹtʼꞹ yencho tsʼitrjꞹmꞹ. Ma o xꞹkꞹji kʼo nziyo tsʼitrjꞹmꞹ, o jñanrra nziyo kʼꞹ mi chⱥgⱥ pjadʼꞹ. Kʼꞹ primero o mbɇdyɇ mi chⱥgⱥ na trʼoxpjadʼꞹ mi ngeje e Jesús, kʼꞹ o ñemeji ro tsjaa Rey. Nrro go mbɇdyɇji jñii kʼꞹ mi chⱥgⱥ pjadʼꞹ mi nzi na colorkʼo, mi nee ro mama ro tsjaa chu̱ʼu̱ kja ne Xoñijomꞹ, me ro supjreji trjijmi, yo ntee ro zodyeji, nge yo ri jantrji yo paadya, ya ba chezhi yo paa ma ra nguarꞹkʼo. Ma o xokʼꞹji kʼe yencho tsʼitrjꞹmꞹ kʼꞹ mi nꞹtʼꞹ kja kʼe rollo, o jñanrra yencho anxe mi jꞹ̱ꞹ̱ji trompeta, ma mi pjebʼi nzi na o trompeta nzi na plaga kʼꞹ ma e̱je̱. O zꞹbꞹ Mizhokjimi kʼo ntee o pejñe yencho plaga.

E Juan o jñanrra ajensʼe na nrrinxu kʼꞹ o musʼꞹ na tsʼitrʼi. ¿Pje nee ra mamayo? Ngeje ma o mbꞹrꞹ o manda o Reino e Mizhokjimi ajensʼe. Kjanu o tsjaa na chu̱ʼu̱ ajensʼe, o pjongꞹji e Satanás ajensʼe ñe yo demonio, o pa̱ntrʼa̱ji kja ne Xoñijomꞹ. Kjanu e Juan o dyⱥrⱥ na jñaa kʼꞹ mi mama: “Me ra supjrido texe yo ka̱ra̱ kja ne xoñijomꞹ”. ¿Pjenga ra supjreji? E Satanás pa̱ra̱ kʼe dya kja ra mezhe ra mbotrʼꞹji, ngekʼua me mbekue (Apocalipsis 12:12).

Nukʼua e Juan o jñanrra e Jesús mi bʼꞹbʼꞹ ajensʼe, mi nzakja na tsʼime xo mi bʼꞹbʼꞹnu 144.000 ntee kʼꞹ ra manda, “ra tsjaji jmu ko e Cristo”. Ma ri xorꞹji kʼe libro Apocalipsis, ri tendioji na joo kʼꞹ yo 144.000 nge yo trʼii kʼe ndinxu kʼꞹ ya ro xorꞹji kja kʼe libro Génesis 3:15 (Apocalipsis 14:1; 20:6).

Kjanu ra sⱥjⱥ kʼe Armagedón, nrrexe kʼo manda kja ne Xoñijomꞹ ra jmuriji ngekʼua ra tsjaji chu̱ʼu̱ ko e Mizhokjimi ra chjeji ko e Jesús ñe texe kʼo anxe. ¿Jarga nguarꞹ texekʼo? “Ra ndo̱jo̱ Mizhokjimi.” Ra kjuatꞹ nrrexe yo gobierno, kjanu ra pa̱ntrʼa̱ji e Satanás kja na trʼoʼo kʼꞹ me na je̱e̱. Nukʼua e Jesús ñe yo 144.000 ra mandaji mil kjɇɇ. Ma ra nguarꞹ yo mil kjɇɇ kʼꞹ ra mandaji, ra chjotꞹji e Satanás (Apocalipsis 16:14; 20:4).

¿Jarga mbosʼꞹ yo ntee e Cristo ma ra manda yo mil kjɇɇ? Kʼe apóstol Juan o mama pje ra tsjaa e Jeoba: “Ra ndintsʼpi texe o ngizhoji. Dya kja ra ndu̱u̱ji. Dya kja pje xe ra mbeñeji. Dya kja xo ra gueji. Dya kja xo ra zoʼoji kʼꞹ rra ꞹꞹ. Na ngeje texe kʼo me bi supjridoji kja ne xoñijomꞹ, dya kja ra supjridoji. Ya nde dʼadyo texe” (Apocalipsis 21:4). ¡Me rga zøø ne Xoñijomꞹ jama kjaa kʼe jardín Edén!

Kʼe libro Apocalipsis mama e Jeoba o ñeme e Jesús ra manda kja o Reino. Ngekʼua ra kjuatꞹ yo ntee kʼo dya neeji e Jeoba. Dya kja ra bʼꞹbʼꞹ e Satanás, dya kja ra jñusbʼꞹ bʼechjine e Jeoba. Yo ntee ra manji kʼꞹ ngextrjo e Jeoba manda na joo. Akjanu nguarꞹ o Jñaa e Mizhokjimi kja ne Biblia.

(Nu kʼo gua e̱je̱ba xo ri jyodʼꞹ kja Apocalipsis.)