Jelemiya
47 Ebi bikebyo byanendeka Yehova kuli kapolofweto Jelemiya kutalesa ku baFilistiya, simbu kanda Falo ahyane Gaza. 2 Yehova nendeka ngwendi:
“Taleni! Mema ali na kwija kutunda ku kunto.
Akapwa libazi.
Co lifuti lyoshe na byuma byoshe bilimo bikajalela,
Nganda na banu balimo bakajalela.
Banu bakalila,
Co munu woshe wakala omu mu lifuti akambolozoka.
3 Bisemi ba banalume mubakaziba misindo ya citozi,
Na cilumo ca matemba endi a nzita,
Na cilumo ca mawili endi,
Bakaziba manene lyoba, co kubakasa nameme kutenguluka mangana bakwase bana babo,
Mwafwa maboko abo akatonola,
4 Mwafwa litangwa lije lili na kwija likanyongesa baFilistiya boshe.
Likanyongesa boshe baje banasalako baje banalikwatasana na Tile na Sidoni.
Yehova akanyongesa baFilistiya,
Ba ku liñanda lya Kafuta* baje banasalako.
5 Baka-Gaza bakalikongobola.*
Baka-Ashikeloni banabolwesa.
Eni munasalako mu cana,
Simbu ya kupwa hali imutwalelelaho kulilengozola?
6 Obe mukwale wa Yehova,
Wambata simbu ya kupwa hali oku kuwoloka?
Iluka mu cindalo cobe.
Hwima na kwoloka.
7 Mukwale wasa kwoloka bati
Okuni Yehova nawana lishiko?
Nawana cipangi ca kulwisa Ashikeloni
Na mutambela wa ku ngenge ya kalunga-ndonga.”