Isaya
3 Taleni! Mwata wa busunga, Yehova wa maswalale,
Atundisa byuma byoshe bije bikwasa Jelusalema na Juda,
Atundisa byakulya na mema,
2 Atundisa banalume ba nzili na baka-kulwa,
Maako na tupolofweto, baka-kumikiya na bakulunu.
3 Atundisa bantwama ba maswalale 50, banu ba bulemu na baka-kunangula
Na baje bazibuka manene manseno na baka-kushasheya ba bitongwe.
4 Njikalingisa banike bapwe bamyata babo,
Co bakabayula ku banu baje bakatenguluka-tenguluka.*
5 Banu bakalilyatelela,
Munu akalyatelela mukwabo munu.
Mwanike akabulumuna mukulunu,
Co uje ibakasingimika kamandondo kakatolilila uje ibakasingimika manene.
6 Umo na umo akakwata ndolome yendi uje yali nendi mu njibo ya ishe na kumuleka ngwendi:
“Uli na cizalo ca helu, pwa ntwama yetu.
Nyunga ou mutumbo wa byuma bibanabiisa.”
7 Oloni ha litangwa olyo, akabyana ngwendi:
“Yange kunjipu muka-kukuta ha bimbandu byeni.
Kunjesi na byakulya nambe bizalo mu njibo yange.
Keti munjipwise ntwama wa banu.”
8 Mwafwa Jelusalema natanuka,
Co Juda nau,
Mwafwa bali na kulwisa Yehova mu majwi abo na bilinga byabo,
Bali na kutindibala ku mesho a uje wa bumpau.
9 Sholwesi ya ha mesho abo ili na kumwesa byuma byabibi bibakalingi,
Co bali na kwendeka bya bubi bwabo citona-mesho ngwe banu ba mu Sodoma.
Kubesi na kubushweka.
Banabindama mwafwa bali na kulikokela bukalu bakebo babenya.
10 Leka banu ba kusungama ngwobe byuma bibendela bwino.
Bakabana cikandelela mwafwa ya byuma bibali na kulinga.
11 Nabindama munu wamubi!
Bukalu bumwizila,
Mwafwa biwanalingi maboko endi babilinga na kuli ikeye.
12 Banu bange bali na kubayandesa kuli baka-kubapangesa,
Co banakazi bakebo bali na kubayula.
Banu bange, baje bali na kumitwamenena bali na kumilingisa muyebangele,
Co bali na kutanganesa bingila byeni byoshe.
13 Yehova nalibwahesela mangana asompe,
Emana mangana asompe miyati ya banu.
14 Yehova asompesa bakulunu na bamyata ba banu bendi.
“Munenyeka lihya lya binyu,
Co bimunebila tuhutu bili mu binjibo byeni.
15 Bika bimuli na kukalukila ngacije kuyandesa banu bange
Na kulyatelela manene tuhutu?” Mukemwo mwanendeka Mwata Wahakamwa ya Byoshe, Yehova wa maswalale.
16 Yehova ngwendi: “Mwafwa bambanda ba mu Siyone banapu ba kulyalesa,
Bali na kwenda oku banatala mwilu,
Kulinga buka na mesho abo, kujombozoka,
Na kulinga kalwa na manjolo* abo.
17 Yehova nendi akanenela bambanda ba mu Siyone mushongo wa mabanda ku mitwe yabo,
Co Yehova akalingisa mitwe yabo ikale na mabula.
18 Ha litangwa olyo, Yehova akabanyeka maseka abakazala ku tusendengele,
Na tubinanga tubakazenge ku mitwe yabo na byuma bya kulicakeya bya kulikondobeka,
19 Akabanyeka masikiyo, maseka, binanga bya kufwika ku mesho,
20 Bitambala, tumalyenge twa senga twa kuzala ku tusendengele,
Binanga bya kuzala ha binulo, tumitumwa twakwaka mazi a lwengo lwalubwa na mikalo.
21 Akabanyeka mariñi a ku minye na mariñi a ku majulu,
22 Mikanjo ya bilika, bizalo bya helu, madresi na bikwama,
23 Biponi byabindondo na bizalo bya lineni,
Bitambala na binanga bya kufwika ku mesho.
24 Nameme hano bali na kunika lwengo lwalubwa lwa mazi a bosamu, kulutwe bakanika cuku ca kubola.
Nameme hano bali na kuzala miba, kulutwe bakazala mikole.
Nameme hano bali na kusakula binkambu byabibwa, kulutwe bakakala na mabula.
Nameme hano bali na kuzala bizalo bya kutula, kulutwe bakazala bikeleya.
Nameme hano mibila yabo ili na kusholoka mwamubwa, kulutwe ikakala na bizibukiso bya bibebe.*
25 Banu ba Siyone bakawa na mukwale,
Co banu bendi ba nzili bakandumuka mu nzita.
26 Bikolo byendi bikalila na kukala mu busiwa,
Co akatumama mu libu oku nasala likalyendi.”