Mukanda Wakulibanga wa Samwele
1 Kwakele munalume umo wa mu Lamathaimi-zofimu,* mu mutambela wa malundu wa Efremu wa lizina lya Elikana muna Jelohamu, muna Elihu, muna Tohu, muna Zufu, co wapwile muka-Efremu. 2 Wakele na banakazi babali, umo lizina lyendi Hana, mukwabo lizina lyendi Penina. Penina wakele na bana, oloni Hana kakele na bana. 3 Ou munalume wakele na kutunda mu nganda yendi na kuya na kulemesa* Yehova wa maswalale mu Shilo na kumwana milambu mwaka na mwaka. Oku kukekwo kubakele na kupangela bana ba Eli babali, Hofini na Finihasi, baje bapwile tupilistu ba Yehova.
4 Litangwa limo, Elikana mwanene mulambu, wanene munakazi wendi Penina mutamba umo wowo mulambu, na kwana bana bendi ba banalume na ba banakazi boshe mitamba yabo. 5 Oloni wanene Hana mutamba wa kulitila mwafwa ikeye yazemene manene, nameme Yehova kamwanene bana.* 6 Co muka-lifuwa lyendi wakele na kumushendumuna manene mangana amulubalese, mwafwa Yehova kamwanene bana. 7 Mukemwo mwakele na kulingila mwaka na mwaka. Simbu yoshe Hana mwakele na kuya ku njibo ya Yehova, muka-lifuwa lyendi wakele na kumushendumuna manene, co Hana wakele na kulila na kujeneka kulya. 8 Oloni munalume wendi Elikana wamwihwile ngwendi: “Hana, bika biuli na kulila, bika kuwesi na kulila byakulya, co bika biunalubala?* Kuma keti nji wa seho manene kuli yobe kutubakana bana ba banalume 10 ndi?”
9 Mubamanesele kulya na kunwa mu Shilo, Hana wakatukile. Ha simbu oyo, kapilistu Eli watumamene ha citwamo ku cikolo ca tempele* ya Yehova. 10 Hana wakele na kuziba manene kubabala ku mbunge, co washangumukile kulombela kuli Yehova na kulila manene. 11 Co walikumiiye eci cikumiiyo ngwendi: “Obe Yehova wa maswalale, nga utala kayando ka ngamba yobe na kunjanuka na kujeneka kwibala ngamba yobe na kwana ngamba yobe mwana wa munalume, njikakwanaye obe Yehova, matangwa oshe a kuyoya kwendi, co biñambu byendi kubakabitehula.”
12 Mwakele na kulombela kuli Yehova ha simbu yailaha, Eli wakele na kukenga kanwa kendi. 13 Hana wakele na kulombelela mu mbunge, kanwa kendi lika kakeko kakele na kuyabula, oloni lijwi lyendi kulyakele na kuzibika. Ngeci Eli wasinganyekele ngwendi napende. 14 Wamulekele ngwendi: “Bika biuli na kulinga kuno okuni unapende? Ecela kunwa binyu.” 15 Hana wamukumbulwile ngwendi: “Embwe obe mwata wange, njili mu bishoti byakama. Kunjanwile binyu nambe bwala bwoshe-bwoshe. Njili na kuleka Yehova byoshe bili ku mbunge yange. 16 Keti usinganyeke ngwobe ngamba yobe napu munakazi wa cilema. Njinakala na kulombela kweta na simbu ino mwafwa ya kuziba kubabala na kushota mbunge.” 17 Eli wamukumbulwile ngwendi: “Ya mu kwoloka, co Njambi ya Isalele akwane biunamulombo.” 18 Hana wendekele ngwendi: “Tetela ngamba yobe.” Ngeci waile, wakalile, co kombwele lalo.
19 Co bendukile mutondo-tondo na kutsikama ku mesho a Yehova, kutundaho belukile ku njibo yabo ku Lama. Elikana walilalele na munakazi wendi Hana, co Yehova wamwanukile. 20 Mu mwaka umolika,* Hana wemitile na kukita mwana wa munalume, co wamulukile ngwendi Samwele,* mwafwa wendekele ngwendi: “Njinamulombo kuli Yehova.”
21 Mu kwita kwa simbu, Elikana waile na bakunjibo yendi boshe kukana mulambu wa ha mwaka kuli Yehova na kukana mulambu wendi wa cikumiiyo. 22 Oloni Hana kaileko, mwafwa walekele munalume wendi ngwendi: “Mwanike acishumuka lika, njimunena mangana akusholoke ku mesho a Yehova, co akakala kuje kutunda bene oho.” 23 Munalume wendi Elikana wamulekele ngwendi: “Linga biumona ngwobe binapande.* Sala ha njibo kweta noho haukamushumwina. Yehova alinge biunendeka.” Co uje munakazi wasalele ha njibo na kujamwesa munendi kweta noho hamushumwinine.
24 Mwamushumwine lika, wamutwalele ku Shilo. Wambatele ngombe wa nkomba wa myaka itatu, na efa* imo ya fulawa, na njaba yakama ya binyu, co waile ku njibo ya Yehova ku Shilo hamolika na mwanike. 25 Co batsiile uje ngombe wa nkomba na kunena mwanike kuli Eli. 26 Hana wendekele ngwendi: “Lisesa mwata. Njilisinga ha mesho obe shukulu ngwange yange uje munakazi wemanene nobe muno mu mwela na kulombela kuli Yehova. 27 Ou mwana ikeye injalombele, co Yehova nanjana binjamulombele. 28 Ngeci hano njimwana kuli Yehova. Njinamwana kuli Yehova ha matangwa oshe a kuyoya kwendi.”
Co watsikamene* kuje, halutwe lwa Yehova.