Mukanda Wakulibanga wa Samwele

25 Mu kwita kwa simbu, Samwele watsile, co Baisalele boshe balikungulwile mangana bamulile na kumutsinda ku njibo yendi mu Lama. Co Devidi wakatukile na kusikumuka mu mambo ya Palani.

2 Kwakele munalume umo mu Maoni uje wakele na kupangela mu Kameu.* Owo munalume wafukile manene. Wakele na bimanga 3,000 na bimembe 1,000, co ha simbu oyo te ali na kutehula bimanga bendi mu Kameu. 3 Ou munalume lizina lyendi Nabale, munakazi wendico wapwile Abigeu. Munakazi wendi wapwile wa kunanguka, co lalo wapwile wamubwa. Oloni munalume wendi uje wapwile wa ku naanga ya Kalebu wakaluwile mbunge, co futisi yendi yapwile yaibi. 4 Devidi mwakele mu mambo wazibile ngwabo Nabale wakele na kutehula bimanga bendi. 5 Ngeci, Devidi watumine bakwenje 10 kuli ikeye, co walekele obo bakwenje ngwendi: “Yeni ku Kameu, co mumuketa kuli Nabale, mukanjihwileye ciindu cendi. 6 Kutundaho mukendeke ngweni, ‘Yoya simbu yailaha, ukale mwamubwa,* bakunjibo yobe nabo bakale mwamubwa, co na byuma byoshe biuli nabyo bikale mwamubwa. 7 Njinazibi ngwabo uli na kutehula bimanga bobe. Tunyungi bobe mubanakele netu, kutwabalingile mwamubi, co lalo nacimo cahi cazimbalele ku byuma byabo ha simbu yoshe ibakele mu Kameu. 8 Ihula bakwenje bobe, co bakuleka. Tetela bakwenje bange, mwafwa tuneja ha simbu ya kubwahelela.* Ngeci, shukulu-kambu ana bangamba bobe na munobe Devidi byoshe-byoshe biwasa kwaka kumukulo.’”

9 Bakwenje ba Devidi baile kuli Nabale na kukamuleka ebi byuma byoshe mu lizina lya Devidi. Mubamanesele, 10 Nabale wakumbulwile bangamba ba Devidi ngwendi: “Devidi iyajo? Co muna Jesi iya? Ano matangwa bangamba babangi bali na kuseza bashukulu babo. 11 Co yange njane makende ange na mema ange na situ injinatsiila baka-kunjitehwila bimanga ku banu baje kunjizibuka noku kubatunda?”

12 Bangamba ba Devidi mubazibile ngoco belukile na kukamuleka awa majwi oshe. 13 Oho bene Devidi walekele banalume bakele nendi ngwendi: “Shweleni mikwale yeni mubaboshe!” Ngeci, boshe bashwelele mikwale yabo, Devidi nendi washwelele mukwale wendi, co banalume ba kweta ku 400 baile hamo na Devidi, co ba kupwa 200 basalele na bitenga.

14 Umo wa bangamba ba Nabale walekele Abigeu munakazi wa Nabale ngwendi: “Tala! Devidi natumine tutumwa kutunda mu mambo mangana bakushungwiye shukulu yetu bubwa, oloni ikeye nabatuka-tuka. 15 Baje banalume banatulingile mwamubwa manene. Kubatulingile mwamubi, co kukwakele nambe cuma cimo citwazimbalesele ha simbu yoshe itwakele nabo mu shwata. 16 Bapwile ngwe cibumbe ca kutunyungilila cije catuzengelekele butsiki na mutanya simbu yoshe itwakele nabo mutwakele na kunyunga butanga. 17 Angula byakulinga hano bene, mwafwa banayongola kunenela shukulu yetu bukalu hamolika na bakunjibo yendi boshe, co lalo ou shukulu yetu wapwa cilinge cangoco, co nou asa kwendeka nendi bene wahi.”

18 Ngeci, Abigeu bwasi-bwasi wambatele mikasha 200 ya makende, binjaba bibali byakama bya binyu, bimanga batanu ba kujubila cimweja, masiya* atanu a binona bya kwoca, makende 100 a bushuka bwa binyu bwa kuma na makende 200 a bikuyu bya kuma, co wabyakele ha bidonki.* 19 Kutundaho walekele bangamba bendi ngwendi: “Twameni kulutwe, njimikaba.” Oloni nabimo byahi byalekele munalume wendi Nabale.

20 Mwakele na kusikumuka ha munkinda oku nalondo ha donki,* oho bene wamwene Devidi ali na kwija na banalume bakele nendi, co waliwanene nabo. 21 Devidi wakele na kwendeka ngwendi: “Njalisinine ngoco kunyunga byuma byou munalume mu mambo. Nacimo cahi ku byuma byendi cazimbalele, oloni ikeye anjilinga mwamubi okuni njamulingi mwamubwa. 22 Njambi alinge cuma ca kulifwa ku bitozi ba Devidi* na kubwezelelako nga njitabesa nameme munalume* umo ku bakunjibo yendi ayoye kweta mutondo.”

23 Abigeu mwamwene Devidi, watundile ha donki bwasi-bwasi, watsikamene kulutwe lwa Devidi na kukulamena hasi. 24 Kutundaho, wawililile ku mendi endi na kwendeka ngwendi: “Shukulu, ana yange mulonga. Tabesa ngamba yobe asimutwiye nobe, co tolilila ku majwi a ngamba yobe. 25 Shukulu, keti wake mbunge kuli ou Nabale wa kujeneka seho, mwafwa napu lika ngwe lizina lyendi. Nabale* likelyo lizina lyendi, co kesi na mana. Oloni yange ngamba yobe shukulu te kunjamwene bangamba bobe baunatumine. 26 Ngeci, shukulu yange, njilisinga hali Yehova wa kuyoya na hali yobe ngwange, Yehova ikeye nakubindika mangana keti witile maninga na kulinga shambandinga* na liboko lyobe. Bitozi bobe na baje bashaka kukubulumuna bapwe ngwe Nabale. 27 Ngeci, shukulu yange atambule bwana bwanamunenela ngamba yendi na kubwana bakwenje bali na kumukaba. 28 Shukulu-kambu konekela mulonga wange ngamba yobe, mwafwa cili bene Yehova atungila shukulu yange njibo ije ikalako myaka yaingi, mwafwa shukulu yange ali na kulwa binzita bya Yehova, co kukwesi bubi bwanalingi mu matangwa endi oshe. 29 Nga munu umo akatuka na kukushakezeka mangana akutsiye, Yehova Njambi yobe abungila mwonyo* wobe shukulu mu ngonga ya mwonyo na kuunyungilila, oloni ombila kuti myonyo* ya bitozi bobe ngwe mamanya abanasha na cipapa. 30 Co Yehova mwakakulingila byuma byoshe byabibwa byanakukulahesa yobe shukulu na kukwangula kupwa ntwama wa Isalele, 31 kuukazibi kubihya ku mbunge nambe kulibeya* mwafwa ya kwitila lika ngoco maninga na kwecelela liboko lyobe lilinge shambandinga.* Yehova mwakwana byuma byabibwa shukulu, anuka ngamba yobe.”

32 Co Devidi walekele Abigeu ngwendi: “Bashangazale Yehova Njambi ya Isalele, uje nakutumu mangana wakuliwane nange lelo! 33 Njambi akubezikise mwafwa ya mana obe! Akubezikise mwafwa ya kunjibindika kwitila maninga lelo na kulinga shambandinga* na maboko ange. 34 Keti ngoconi, njilisinga hali Yehova wa kuyoya, Njambi ya Isalele uje nanjecelesa kumilinga mwamubi ngwange ngwe kuwazambwile kwija na kuliwana nange, mutondo ngwe naumo wahi nesi kuyoya hakati ka banalume* ba ku njibo ya Nabale.” 35 Ngeci, Devidi watambwile byamunenelele na kumuleka ngwendi: “Ya ku njibo yobe mu kwoloka. Tala, njinazibi biunanjileke, co njilinga biunanjilombo.”

36 Kutundaho, Abigeu welukile kuli Nabale uje wakele na kulisamba ngwe mwene mu njibo yendi. Nabale wabwahelelele, co lalo wapendele manene. Abigeu kamulekele cuma coshe-coshe kweta noho kwakile. 37 Mutondo, bwala mubwahwile Nabale, munakazi wendi wamulekele ebi byuma. Co mbunge yendi yapwile ngwe mbunge ya munu wa kutsa, wapwile ngwe muka-kalepa, co walalele ngwe limanya. 38 Mukwetile matangwa a kweta ku 10, Yehova wanene Nabale cihiso, co watsile.

39 Devidi mwazibile ngwabo Nabale natsi, wendekele ngwendi: “Bashangazale Yehova uje nanjimanena mu ñanda ya kunjishaula kuli Nabale na kubindika ngamba yendi mangana keti alinge cuma coshe-coshe cacibi, co Yehova nelwisila Nabale bubi bwendi!” Kutundaho, Devidi watumine majwi kuli Abigeu, a kumutonda mangana amwambate apwe munakazi wendi. 40 Ngeci, bangamba ba Devidi bezile kuli Abigeu ku Kameu na kumuleka ngwabo: “Devidi natutumu kuli yobe mangana tuye nobe ukapwe munakazi wendi.” 41 Oho bene wakatukile na kutsikama na kukulamena hasi na kwendeka ngwendi: “Ndungo yeni ou mangana akapwe ngamba wa kujwelesa bangamba ba shukulu yange ku mendi.” 42 Kutundaho, Abigeu wakatukile bwasi-bwasi na kulonda ha donki,* co bangamba bendi batanu ba banakazi bakele na kwenda munima yendi. Waile hamo na tutumwa ba Devidi na kukapwa munakazi wendi.

43 Devidi te nambata na Ahinoamu wa ku Jezilele, co boshe babali bapwile banakazi bendi.

44 Oloni Saulu te nashombwesa munendi Mikali munakazi wa Devidi kuli Paliti muna Laishi wa ku Galimu.