Ezekiele
12 Yehova wanjilekele lalo ngwendi: 2 “Muna munu, uli na kuyoya na baka-kutengulukila. Bali na mesho, oloni kubesi na kumona, bali na matwi, oloni kubesi na kuziba, mwafwa bapwa baka-kutengulukila. 3 Oloni yobe muna munu longekeya bitenga biuya nabyo mu bufunge. Co unapande kuya mu bufunge mutanya oku bali na kukumona. Tunda ku njibo yobe uye ku mwela weka, ulinge ngwe uje aya mu bufunge oku bali na kumona. Hamo bananguka nameme bapwa baka-kutengulukila. 4 Co mutanya, tuhula bitenga biunalongekeya bya kuya nabyo mu bufunge oku bali na kumona, co ku mangwezi unapande kuya ngwe uje ibali na kutwala mu bufunge oku bali na kukumona.
5 “Tuba mbengwa mu cibumbe oku bali na kukumona, co witemo na bitenga biunalongekeya. 6 Litwike bitenga byobe ha citsili oku bali na kukumona, co ubituhule mona kunazibala. Lifwike ku mesho mangana keti umone hasi, mwafwa njikupwisa cimweso ku njibo ya Isalele.”
7 Njalingile muje bene mwanjishikile. Mutanya njatuhwile bitenga binjalongekeyeye bya kuya nabyo mu bufunge, co ku mangwezi njatubile mbengwa ha cibumbe na liboko. Co mukwazibalele, njatuhukile na bitenga byange ha citsili oku bali na kunjimona.
8 Mutondo, Yehova wanjilekele lalo ngwendi: 9 “Muna munu, kuma bakunjibo ya Isalele, baka-kutengulukila kubakwihwile ngwabo, ‘Bika biuli na kulinga’ ndi? 10 Baleke ngwobe, ‘Mwata Wahakamwa ya Byoshe Yehova nendeka ngwendi: “Ou muzimbu wa kusompa unatalesa ku bamyata ba mu Jelusalema na bakunjibo ya Isalele boshe baje bali muno mu nganda.”’
11 “Endeka ngwobe, ‘Njinapu cimweso kuli yeni. Byuma binjinalingi, bikebyo bikalingiwa kuli bakebo. Bakaya mu bufunge, mu bundungo. 12 Mwata uje ali hakati kabo akambata bitenga byendi ha citsili cendi na kuya oku kunazibala. Akatuba mbengwa mu cibumbe na kwitamo na bitenga byendi. Akafwika ku mesho mangana keti amone hasi.’ 13 Njikamutela bwanda, co akatsa ha bwanda bunjikamutela. Njikamutwala ku Babiloni, ku lifuti lya baKaudiya, oloni kakalimono, co okwo bene kukekwo kwakatsila. 14 Co boshe baje banamuzengeleka, baka-kumukwasa na maswalale bendi njikabashandwela ku mitambela yoshe, co njikashomona mukwale na kubakilimisa. 15 Co bakazibuka ngwabo yange Yehova munjikabashandwela mukati ka baka-mafuti na mukati ka mafuti. 16 Oloni bamo njikabobola ku mukwale, na ku njala yakama na ku mushongo wa kulitambwisa mangana bakambulule bya bilinga byabo bya bunyengwe ku baka-mafuti kuje kubakaya. Co bakazibuka ngwabo yange Yehova.”
17 Co Yehova wanjilekele lalo ngwendi: 18 “Muna munu, unapande kulya byakulya oku uli na kujaja na kunwa mema oku uli na kuziba lyoba na kulishoshomwena. 19 Leka banu bomu mu lifuti ngwobe, ‘Mwata Wahakamwa ya Byoshe Yehova nendeka ku banu bakala mu Jelusalema, mu lifuti lya Isalele ngwendi: “Bakalya byakulya byabo oku banalishoshomwena na kunwa mema oku baziba lyoba, mwafwa lifuti lyabo likapwa ngundu mwafwa ya lwozi lwa banu bakalamo. 20 Binganda mubakala, bakabinyongesa, co lifuti likabihya, co mukazibuka ngweni yange Yehova.”’”
21 Co Yehova wanjilekele lalo ngwendi: 22 “Muna munu, mu Isalele muli cisimo ca kwendeka ngwabo, ‘Matangwa mu kwita, oloni bimona byoshe kubyesi na kulishulisilila.’ 23 Ngeci, baleke ngwobe, ‘Mwata Wahakamwa ya Byoshe Yehova nendeka ngwendi: “Njikamanesa ei endekesi, co eci cisimo kubakacendeka lalo mu Isalele.”’ Oloni baleke ngwobe, ‘Matangwa ali muyehi, co bimona byoshe bikalishulisilila.’ 24 Mwafwa bimona bya makuli kubikakalako, co lalo bakunjibo ya Isalele kubakomikiya. 25 ‘Mwata Wahakamwa ya Byoshe Yehova nendeka ngwendi, “Mwafwa yange Yehova njikendeka. Byoshe binjikendeka, njikabilinga kwa kujeneka kukotokela. Mu matangwa eni, eni baka-kutengulukila, njikendeka lijwi na kulinga binjinendeka.”’”
26 Yehova wanjilekele lalo ngwendi: 27 “Muna munu, banu ba Isalele bali na kwendeka ngwabo, ‘Cimona cali na kumona cambata simbu yailaha asina cikalishulisilile, co bupolofweto bwali na kupolofweta bukalishulisilila kulutwe manene.’ 28 Ngeci baleke ngwobe, ‘Mwata Wahakamwa ya Byoshe Yehova nendeka ngwendi: “‘Majwi ange oshe kuwakakotokela kulishulisilila. Byoshe binjinendeka bikalishulisilila,’ ngwendi Mwata Wahakamwa ya Byoshe Yehova.”’”