BINYENGO
א [Alefu]*
1 Jelusalema uje washulile na banu nasala likalyendi.
Jelusalema uje wakele na mbunga ya banu napwoni ngwe fwile.
Jelusalema uje wapwile lishano hakati ka maprovinsi banamusindiya kupanga.
ב [Bethi]
2 Ali na kulila manene butsiki, co misozi yendi ili na kwolomokela ku binana byendi.
Naumo wahi ku mapangala bendi nai na kumuzembeleka.
Babusamba bendi boshe banamwende bungungu, co banapu bitozi bendi.
ג [Gimeu]
3 Juda nai mu bufunge, co ali na kuyanda manene mu bundungo.
Napande kukala hakati ka baka-mafuti, kesi na kuwana mwela wa kuhwimina.
Baka-kumuyandesa banamuwana ha simbu yali mu bukalu.
ד [Dalethi]
4 Bingila biya ku Siyone bili na kulila mwafwa naumo wahi ali na kuya ku cilika.
Bikolo byendi byoshe banabipokozola, tupilistu bendi banapokoka bimbunge.
Bambanda bendi baje kanda balilaleho laja na banalume bali mu busiwa, co Siyone ali na kuyanda manene.
ה [He]
5 Bitozi bendi banapwoni bashukulu bendi, bitozi bendi kubesi na kulishoshomwena.
Mwafwa Yehova namulingisa akale mu busiwa mwafwa ya milonga yendi yaingi.
Bana bendi banai mu bufunge kuli citozi.
ו [Wau]
6 Bumpau bwoshe bwa muna Siyone wa munakazi bunahu.
Bamyata bendi banapu ngwe bishonge baje kubawanene bulilo,
Co bali na kwenda oku banajuka kulutwe lwa baje bali na kubasheka.
ז [Zayini]
7 Mu matangwa a kayando kendi na mu matangwa anajeneka kwa kukala, Jelusalema ali na kwanuka
Byuma byendi bya seho byakele nabyo kunima.
Banu bendi mubabakwatele kuli citozi cendi, nomwo kakele nou wa kumukwasa,
Bitozi bendi bamumwene na kumujola mwafwa ya kuwa kwendi.
ח [Hethi]
8 Jelusalema nalingi bubi bwakama,
Mukemwo napu cuma cije cizibisa bunyengwe.
Banu boshe baje bamusingimikile bali na kumwombwanesa mwafwa banamono bushwamwa bwendi.
Ali na kukemanga na kulifwika ku mesho mwafwa ya shwamwa.
ט [Tethi]
9 Mazilo endi anasata ha bifunga byendi.
Kasinganyekele ha buyoye bwendi bwa kulutwe.
Kuwa kwendi kunakomokesa manene, kesi nou wa kumuzembeleka.
Obe Yehova, tala ha kayando kange, mwafwa citozi cange nalyamesa ikeye babenya.
י [Yodi]
10 Citozi cendi nambata bufuko bwendi bwoshe.
Jelusalema namono baka-mafuti bakobela mu mwela wendi wa kujela,
Baje bawashikile ngwobe keti bakobele mu cikungulukilo cobe.
כ [Kafu]
11 Banu bendi boshe bali na kuteta, bali na kutonda byakulya.
Bananesa byuma byabo bya seho mangana bawaneko cakulya, mangana batwaleleleleho kuyoya.
Obe Yehova, tala! Njinapu ngwe munakazi* wa kujeneka seho.
ל [Lamedi]
12 Eni muli na kwita mu ngila, kuma eci cinapu cuma cacindondo kuli yeni ndi?
Taleni na kumona!
Kuma kuli umo wazibaho laja kubabala ngwe kubabala cinjazibile
Omwo Yehova wanjanene kashitiko ha litangwa lya butenu bwendi bwakama ndi?
מ [Memu]
13 Natumu tuhya mu bitsiya byange kutunda mwilu, co nabihyana.
Najangumuna bwanda mangana mendi ange atsemo, nanjisindiya kwiluka munima.
Nanjipwisa ngwe munakazi uje ali likalyendi.
Litangwa lyoshe lya mutunu njili na kuziba kubabala.
נ [Nuni]
14 Milonga yange nanjikutililayo ngwe joko, nanjikutililayo na maboko endi.
Nanjisilikayo ha singo yange, co nzili yange inahu.
Yehova nanjana mu maboko a baje kunjasa kuhyana.
ס [Sameki]
15 Yehova nanakwila kulako banalume ba nzili baje banjakele nabo.
Nanjisanena mbunga mangana yakutike bakwenje bange.
Yehova nalyatangela muna Juda wa munakazi mu citikilo ca binyu.
ע [Ayini]
16 Njili na kulila mwafwa yebi byuma. Mu mesho ange muli na kunjululuka misozi.
Mwafwa banu baje banapande kunjizembeleka nambe kunjihwimisa bali kulako nange.
Bana bange kubesi na lilabelelo mwafwa citozi natuhyana.
פ [Pe]
17 Siyone nolola maboko endi, kukwesi munu wa kumuzembeleka.
Yehova nashiki bitozi ba Jakobu baje banamuzengeleka mangana bamulwise.
Jelusalema napu cuma cije cizibisa bunyengwe kuli bakebo.
צ [Sade]
18 Byuma byanalingi Yehova binapu bya kusungama mwafwa kunjononokele mashiko endi.
Tolilileni eni banu boshe, taleni kayando kange.
Bana bange ba banakazi baje kanda balilaleho laja na banalume, na bakwenje bange banai mu bufunge.
ק [Kofu]
19 Njinasana mapangala bange, oloni bananjende bungungu.
Tupilistu na bakulunu bange banatsila mu nganda,
Mubanakala na kushakezeka byakulya mangana bayoye.
ר [Reshi]
20 Obe Yehova, tala, njili mu bukalu bwakama.
Bilyo bya mukati* ka mubila wange bili na kuziba kubabala.
Mbunge yange inapokoka mwafwa njinakutengulukila, mwafwa njinapu muka-kutengulukila.
Mukwale uli na kutsiya bana bange hanja, co mu njibo banu bali na kutsa.
ש [Shini]
21 Banu banazibi miteto yange, oloni naumo wahi anjizembeleka.
Bitozi bange boshe banazibi bya bukalu bwange.
Banabwahelela mwafwa unanjinenela bukalu.
Oloni ukanena litangwa lije liwendekele, co bakapwa ngwe yange.
ת [Tau]
22 Bubi bwabo bwoshe busholoke kuli yobe, co bane kashitiko kakama
Ngwe kashitiko kaje kawanjanene mwafwa ya milonga yoshe injalingile.
Mwafwa njili na kukemanga manene, co mbunge yange ili na kuziba kubabala.
א [Alefu]
2 Yehova nafwikilila muna Siyone wa munakazi mu lishelwa lya butenu bwendi.
Nombila hasi bubwa bwa Isalele kutunda mwilu.
Ha litangwa lya butenu bwendi, kanukile hawakalyata mendi endi.
ב [Bethi]
2 Yehova nalehula mwela wakala Jakobu kwa kujeneka kumuzibila mema ku mbunge.
Nasiula myela ya kukola ya muna Juda wa munakazi mu butenu bwendi.
Nakehesa na kujwalesa bumwene na bamyata babwo
ג [Gimeu]
3 Namanesa nzili yoshe ya Isalele mu butenu bwendi.
Bitozi mubanezile, nashondolwesele munima liboko lyendi lya cilyo,
Co butenu bwendi buli na kwepukila Jakobu ngwe tuhya tuje tuli na kwenyeka byuma byoshe bije binatuzengeleka.
ד [Dalethi]
4 Nanana buta bwendi bwa lusipa ngwe citozi. Nalibwahesela kutulwisa na liboko lyendi lya cilyo ngwe citozi.
Watwaleleleleho kutsiya boshe baje basholokele mwamubwa.
Co wetilile butenu bwendi ngwe tuhya mu bitenti bya muna Siyone wa munakazi.
ה [He]
5 Yehova napu ngwe citozi.
Nalehula Isalele.
Nalehula tuposhi twendi twoshe.
Nanyongesa myela yendi yoshe ya kukola,
Co nalingisa muna Juda wa munakazi alile na kulinyenga manene.
ו [Wau]
6 Nasiula lipapela lyendi ngwe uje asiula cipundo cili mu lihya.
Namanesa* cilika cendi.
Yehova nalingisa banu bebale cilika na sabata mu Siyone,
Co kakele mbunge kuli mwene na kuli kapilistu mwafwa ya kulubala kwendi kwakama.
ז [Zayini]
7 Yehova nabyana mutula wendi.
Nabyana mwela wendi wa kujela.
Co nana bibumbe bya kukola bya tuposhi twa Siyone mu maboko a citozi.
Bali na kukangokela mu njibo ya Yehova, kuwana bene ngwe litangwa lya cilika.
ח [Hethi]
8 Yehova nayongola kunyongesa bibumbe bya muna Siyone wa munakazi.
Najangumuna mukole wa kusetekesa.
Kabindikile liboko lyendi ngwendi keti linyongese.*
Co nalingisa cimpaka na cibumbe bilile.
Byoshe nabizeyesa.
ט [Tethi]
9 Bikolo byendi binashitama mu libu.
Nanyongesa na kupokozola tupateso twendi.
Mwene yendi na bamyata bendi bali mukati ka baka-mafuti.
Kukwesi lishiko, nameme tupolofweto bendi kubesi na kutambula bimona kutundilila kuli Yehova.
י [Yodi]
10 Bakulunu ba muna Siyone wa munakazi banatumama hasi oku banoloka lika kulu.
Bali na kulishawila libu ku mitwe na kuzala bikeleya,
Bambanda ba mu Jelusalema baje kanda balilaleho na banalume banakulamena hasi.
כ [Kafu]
11 Mesho ange anajuka mwafwa ya kulila.
Bilyo byange bya mukati* bili na kuziba kubabala.
Mbunge yange yapokoka manene,* mwafwa bana ba banu bange* banau,
Co lalo mwafwa banike na bimbututu bali na kulezumukila mu myela ya mbunga ya mu bimbongi.
ל [Lamedi]
12 Bali na kutwalelelaho kwihula bainabo ngwabo, “Byakulya na binyu bili kuli?”
Oku bali na kulezumuka ngwe munu ibanabulumwina mu mwela wa mbunga wa nganda,
Oku bali na kutsila mu maboko a bainabo.
מ [Memu]
13 Cakumwenako muka cinjasa kukwana,
Nambe bika binjasa kukwesekesako, obe muna Jelusalema wa munakazi?
Njasa kukwesekesa ku bika mangana njikuzembeleke, obe muna Siyone wa munakazi uje kanda alilaleho na munalume?
Mwafwa bimbandu byobe binapu byakama ngwe kalunga-ndonga. Iya asa kubyolesa?
נ [Nuni]
14 Bimona bibakulekele tupolofweto bobe byapwile bya makuli na bya kujeneka seho,
Co kubendekele bubi bwobe mangana keti uye mu bufunge,
Oloni batwaleleleleho kukuleka bimona bya makuli na kukungumuna na byendeka byabo.
ס [Sameki]
15 Co boshe baje baita mu ngila mubakumona bakanda maboko abo mu kukushendumuna.
Bakumba milozi mu kukomoka na kupikisila mitwe yabo muna Jelusalema wa munakazi na kwendeka ngwabo:
“Kuma ei ikeyo nganda ibendekele ngwabo yaibwa manene, ije inapu kubwahelela kwa lifuti lyoshe ndi’?”
פ [Pe]
16 Bitozi bobe boshe banashama mu tunwa twabo mwafwa yobe.
Bali na kukumba milozi na kwendeka mu butenu ngwabo: “Tunamulehula.
Eli likelyo litangwa litunakala na kubandamena. Linaija, co tunalimono.”
ע [Ayini]
17 Yehova nalingi byayongwele. Nashulisilila byanendekele,
Bije byashikile laja.
Nakunyongesa kwa kujeneka kukuzibila mema ku mbunge.
Nalingisa bitozi babwahelele mwafwa yobe. Nabwezelela nzili ya bitozi bobe.
צ [Sade]
18 Obe muna Siyone wa munakazi,* bana bobe bali na kulilila kuli Yehova.
Misozi icuputuke ngwe muna ndonga butsiki na mutanya.
Keti uhwime, keti uhwimise mesho obe.
ק [Kofu]
19 Katuka, lila butsiki ha simbu ibikashangumuka bilo.
Byoshe bili mu mbunge yobe binungulwile kuli Yehova ngwe mema.
Imika maboko obe mwilu mwafwa ya myonyo ya bana bobe,
Baje bali na kulezumukila mu bitapalo byoshe mwafwa ya njala yakama.
ר [Reshi]
20 Tala obe Yehova, na kukenga uje ibanayandesa manene.
Kuma banakazi banapande kutwalelelaho kulya bana babo baje babanalilelela ndi?
Kuma tupilistu na tupolofweto banapande kubatsiila mu mwela wa kujela wa Yehova ndi?
ש [Shini]
21 Mwanike wa munalume na kakulukazi banatsi muje ngumbanga mu bitapalo.
Bambanda* na bakwenje banatsi ku mukwale.
Banabatsii ha litangwa lya butenu bwobe. Unabatsii kwa kujeneka kubazibila mema ku mbunge.
ת [Tau]
22 Unasana byuma bije binanjizibisa lyoba kutunda ku mitambela yoshe ngwe uje ali na kusana banu baije ku cilika ha litangwa lya cilika.
Ha litangwa lya butenu bwa Yehova, wahi watewele nambe kwoboka.
Citozi cange nanyongesa boshe banjakitile na kulela.
א [Alefu]
3 Njinamono kayando mwafwa Njambi nalubala manene na kutwana kashitiko.
2 Nanjisheke, co nanjilingisa njende mu lisusulungu, keti mu ceke.
3 Cili bene nelukila-ilukila kunjilwisa na liboko lyendi litangwa lyoshe lya mutunu.
ב [Bethi]
4 Nabiisa situ ya mubila wange na cikanda cange.
Napokola bitsiya byange.
5 Natungu cibumbe ca kunjizengeleka. Nalingisa mwila wa bushungu unjizengeleke, co lalo nanjizengeleka na tuyando.
6 Nanjisindiya kukala mu myela muje muli lisusulungu, ngwe banu baje batsile laja mubali mu myela ya lisusulungu.
ג [Gimeu]
7 Nanjitungila cibumbe ca kunjizengeleka mangana keti njitewe.
Nanjikutu malyenge a kopa a kulema.
8 Munjitambeka na kulomba bukwasi, Njambi abyana kutolilila ku lilombelo lyange.
9 Naziki bingila byange na mamanya a kushonga.
Napengapengesa bitapalo byange.
ד [Dalethi]
10 Nanjibandamena ngwe mbeya ngwendi anjilinge mwamubi, ngwe ndumba uje nalishweke.
11 Nanjitundisa mu ngila na kunjisanyozola.*
Nanjilingisa njisale likalyange.
12 Nanana buta bwendi bwa lusipa na kunjisungamesa mukili.
ה [He]
13 Natubu binso byange na mikili ya mu ngonga* yendi.
14 Banu boshe bali na kunjijola, yange ibali na kwimba mu myaso yabo litangwa lyoshe lya mutunu.
15 Nanjishulisa na byuma bya kulula na kunjilingisa njitwaleleleho kunwa mema a cimena ca kulula.
ו [Wau]
16 Namungula mayo ange na mamanya.
Nanjinakwila mu lito.
17 Unanjilingisa njijeneke kukala mu kwoloka. Njinebala byuma byabibwa.
18 Mukemwo njendeka ngwange: “Bumpau bwange bunahu, co lalo lilabelelo lyange muli Yehova linahu.”
ז [Zayini]
19 Anuka kayando kange na cifwa cinjilimo ca kulinga noku kwa kukala kwahi, na mema a cimena ca kulula aunanjinwisa na mwila wa bushungu uje unanjizengeleka.
20 Cili bene ukanjanuka, co ukakulama na kunjikwasa.
21 Njinanuka ebi byuma mu mbunge yange, mukemwo njikala na mbunge ya kubandamena.
ח [Hethi]
22 Kutwanyongele mwafwa ya cizemo ca Yehova cije kucesi kutenguluka,
Mwafwa kutetela cendi kucesi kuhwa.
23 Kutetela cobe cikapu caciha mutondo na mutondo. Kulongwa kwobe kwapwa kwakama.
24 Njinendeka ngwange: “Yehova wapwa mutamba wange mukemwo njikala na mbunge ya kumubandamena.”
ט [Tethi]
25 Yehova wapwa wamubwa kuli munu uje namukulahela, wapwa wamubwa kuli munu uje atwalelelaho kumushakezeka.
26 Kwakubwa kubandamena kwobola kwa Yehova mu kwoloka.*
27 Kwakubwa kwambata joko oku munu acili mwanike.
י [Yodi]
28 Akale likalyendi na kwoloka kulu omwo Njambi amukambekayo.
29 Akulamene hasi na kwaka cihanga cendi mu libu, hamo akala na lilabelelo lya kwoloka.
30 Atele nana yendi kuli uje ali na kumupupa. Atambuleko matuka endi.
כ [Kafu]
31 Mwafwa Yehova katumbila kuti myaka yoshe.
32 Nameme natunenela busiwa, oloni atutetela mwafwa ya cizemo cendi cije kucesi kutenguluka cije capwa cakama.
33 Mwafwa keti cizango cendi ca kuyandesa bana ba banu nambe kubalingisa bakale mu busiwa.
ל [Lamedi]
34 Njambi kecelela munu atike mapanditi boshe ba ha lifuti-libu baje bali mwisi ya mendi endi,
35 Kecelela banu bakule munu mu kuhenga ku mesho a Wahakamwa Manene,
36 Kecelela banu basompe ñanda ya munu mu kuhenga.
Yehova kesi kwecelela byuma bya cifweci.
מ [Memu]
37 Iya asa kwendeka cuma na kucilingisa cilingiwe nga Yehova kashikile ngwendi cilingiwe?
38 Mu kanwa ka Wahakamwa Manene
Kumwesi kutunda byuma byabibi na byuma byabibwa ha simbu imolika.
39 Co bikoni byayayabalela munu ha bukalu bwaliwana nabwo mwafwa ya bubi bwendi?
נ [Nuni]
40 Tuyeni twilule bingila byetu na kubikengesesa mwamubwa, co tuyeni twiluke kuli Yehova.
41 Tuyeni tulambelele Njambi wa mwilu na bimbunge byetu byoshe oku tunemika maboko mwilu ngwetu:
42 “Tunalingi milonga na kukutengulukila, co kuwatukonekelele.
ס [Sameki]
43 Unalubala, co kuwatolililile ku malombelo etu.
Unatukaba na kututsiya kwa kujeneka kutuzibila mema ku mbunge.
44 Unaka lishelwa mukati ketu nobe mangana malombelo etu keti ete kuli yobe.
45 Unatupwisa bilinge byangoco na mazilo a kaye mukati ka baka-mafuti.”
פ [Pe]
46 Bitozi betu boshe bali na kutushendumuna.
47 Simbu yoshe tukazibi lyoba na kuliwana na bukalu, tunasala likalyetu, co lalo tunabulumuka.
48 Misozi ili na kungongomoka mu mesho ange ngwe bana ba bindonga, mwafwa njili na kulila muna banu bange uje nabulumuka.
ע [Ayini]
49 Njitwalelelaho kulila, kunjecela,
50 Kweta noho hatalela hasi Yehova oku ali mwilu na kumona mubali na kuyandela banu bendi.
51 Njili na kuziba manene kubabala ku mbunge munjili na kumona byuma binalingiwa ku bana ba banakazi ba mu nganda yange.
צ [Sade]
52 Bitozi bange bali na kunjiyomba ngwe kazila kwa kujeneka mulonga.
53 Banjumbilile mu bwina mangana banjinyongese. Batwaleleleleho kunjashanga mamanya.
54 Mema anjingumbwile, co njendekele ngwange: “Njinatsi.”
ק [Kofu]
55 Obe Yehova, njakusanene ha lizina oku njili mu bwina.
56 Tolilila lijwi lyange, keti uzike matwi obe munjikulomba ngwange unjikwase na kunjihwimisa.
57 Ha litangwa linjakusanene, wanjishwenesele kuyehi nobe. Wendekele ngwobe: “Keti uzibe lyoba.”
ר [Reshi]
58 Unanjimanena mu biñanda byange, obe Yehova, unapatula mwonyo wange.
59 Obe Yehova, unamono byuma byabibi bibanalingi kuli yange. Njikulomba unjakule mwamubwa.
60 Unamono mubananjilingi shambandinga, unamono matumbe abo oshe abali nawo hali yange a kunjilwisa.
ש [Sini] nambe [Shini]
61 Obe Yehova, unazibi kushaula kubali na kunjishaula, unamono matumbe abo oshe abali nawo hali yange a kunjilwisa,
62 Unazibi majwi abali na kwendeka bitozi bange na byuma bibali na kuyebeta hali yange litangwa lyoshe lya mutunu.
63 Wabamono! Bali na kunjishendumuna mu myaso yabo nga banatumama nambe nga banemana.
ת [Tau]
64 Obe Yehova, ubelwisila kwesekesa na bilinga byabo.
65 Ukabasinga, co bakakaluwa bimbunge.
66 Ukabakilimisa mu butenu bwobe, co ukabanyongesa ha lifuti-libu lyobe Yehova.
א [Alefu]
4 Goldi ije yakele na kubyakula inatsitsibala, goldi ije yapwile yaibwa manene.
Mamanya a kujela analishandangana mu bitapalo byoshe.
ב [Bethi]
2 Bana ba Siyone ba seho baje bapwile ba seho ngwe goldi yaibwa,
Bali na kubamona ngwe binjaba bya buma,
Ngwe bipangi bya muka-kumunga byuma bya buma.
ג [Gimeu]
3 Bimbanje bakajamwesa bana babo,
Oloni muna banu bange napu cikenya ngwe banyamalanda mu mambo.
ד [Dalethi]
4 Bindaka bya bimbututu baje bali na kujamwa bisakamena mu bindakwilo mwafwa ya lihwila.
Banike balomba byakulya, oloni naumo wahi abanako bimo.
ה [He]
5 Baje bakele na kulya majamujamu banalala mu bitapalo oku banatsi njala.
Baje bakele na kuzala bizalo bya ndando ya helu* kushwa ku bwanike bwabo banapwashama ha mitumbo ya lito.
ו [Wau]
6 Kashitiko kabanana muna banu bange kanapu kakama kutubakana kabanene nganda ya Sodoma mwafwa ya bubi bwayo,
Ije ibanyongesele mu simbu imolika kwa kujeneka wa kuikwasa.
ז [Zayini]
7 Banazalite bendi bapwile ba kujela kutubakana mema a kukonda, bapwile ba kutoka kutubakana mabele.
Bapwile ba kubenga kutubakana makolale, bapwile ngwe safaya ya kuceka.
ח [Hethi]
8 Banazibala kutubakama manungu.
Nameme mu bitapalo kubesi na kubazibuka.
Bikanda byabo binasata ha bitsiya byabo, binomu cau ngwe muti wa kuma.
ט [Tethi]
9 Baje bali na kutsa ku mukwale baliko mwamubwa kutubakana baje bali na kutsa ku njala yakama,
Bali na kuyondwa mwafwa ya kujeneka byakulya mu mahya, co banapu ngwe baje babali na kupulyasana na mukwale.
י [Yodi]
10 Maboko a banakazi baje bali na mema ku mbunge anateleka bana babo ba kulikitila.
Banapu byakulya byabo bya mu busiwa ha simbu yanabulumuka muna banu bange.
כ [Kafu]
11 Yehova namwesa kulubala kwendi.
Netila butenu bwendi buje buli na kushukuma.
Co nashwameka tuhya mu Siyone tuje tuli na kwenyeka lubula lwa Siyone.
ל [Lamedi]
12 Bimyene ba ha lifuti-libu na banu boshe baje bakala hasi kubakulahelele ngwabo
Citozi asa kukobela mu bikolo bya Jelusalema.
מ [Memu]
13 Ebi byuma byalingiwile mwafwa ya bubi bwa tupolofweto bendi na milonga ya tupilistu bendi,
Baje betilile maninga a banu ba kusungama mukati ka banu bendi.
נ [Nuni]
14 Bali na kuyebangela mu bitapalo ngwe tupuputwa.
Banajwala na maninga,
Ngeci naumo wahi asa kukwata ku bizalo byabo.
ס [Sameki]
15 Bali na kubaleka ngwabo: “Yeni okwo! Eni ba kujwala! Yeni okwo! Yeni okwo! Keti mutukwate!”
Mwafwa kubesi na kwakukala, co bali na kuyebangela ngoco.
Baka-mafuti banendeka ngwabo: “Aba kubasa kukala netu kuno.
פ [Pe]
16 Yehova nabashandola,
Kakabaka lalo mbunge,
Co banu kubakasingimika tupilistu nambe kwaka mbunge bakulunu.”
ע [Ayini]
17 Hano na mesho etu anajuka kulabelela bukwasi buje kubwesi na kwija.
Tunabandamena ha simbu yailaha bukwasi bwa kutunda ku muyati uje kuwatukwasele.
צ [Sade]
18 Banatuyombo mu myela yoshe, ngeci kutwasa kwenda na mu myela yetu ya mbunga.
Kunyonga kwetu kuli hayehi, matangwa etu anahu mwafwa kunyonga kwetu kunaija.
ק [Kofu]
19 Baka-kutusheka bakele na lumbisi kutubakana bingonga.
Batukilimisile ha minkinda, batubandamenene na mu mambo.
ר [Reshi]
20 Wakubwabesa wa Yehova uje napu ngwe muku wetu wa kuyoya banamulabula mu bwina bwabo bwakama,
Uje itwendekele ngwetu: “Tukakala mu munzinze wendi mukati ka baka-mafuti.”
ש [Sini]
21 Lisambe na kubwahelela obe muna Edomu wa munakazi, yoya muuli na kuyoyela mu lifuti lya Uzi.
Oloni ei nganja nobe bakwanayo, co ukapenda na kusholola bushwamwa bwobe.
ת [Tau]
22 Obe muna Siyone wa munakazi, kashitiko ka milonga yobe kanahu.
Njambi kakakutwala lalo mu bufunge.
Oloni akanuka milonga yobe, obe muna Edomu wa munakazi.
Akajombolola milonga yobe.
5 Obe Yehova, anuka byuma bitunaliwana nabyo.
Tala mutunashaukila.
2 Buswana bwetu banabwana banu baje kutuzibuka, binjibo byetu banabyana baka-kwija.
3 Tunapu bisiwa baje kubesi na ishabo. Bananetu banapu ngwe bifwile.
4 Mema na mema etu, oloni kuwanwa kubanga ngwabo tuwafwetele, co lalo tuli na kufwetela bikuni byetu.
5 Baje bali na kutusheka banatushunanana.
Tunajuka, oloni kubesi na kutwecela tuhwime.
6 Tunolwela maboko etu ku Ijipiti na ku Asiria mangana tuwaneko byakulya.
7 Bakukulwila betu baje balingile bubi batsa laja, oloni yetu tuli na kuyandelamo mwafwa ya milonga yabo.
8 Bangamba bakebo oni bali na kutuyula. Wahi wakutucakununa mu liboko lyabo.
9 Tuli na kwaka buyoye bwetu mu bushonde mutuli na kuya na kwambata byakulya, mwafwa mu mambo muli mukwale.
10 Mibila yetu inashaluka ngwe lutengo mwafwa ya njala yakama.
11 Banakazi ba kushomboka ba mu Siyone na bambanda ba mu binganda bya Juda baje kanda balilaleho laja na banalume banabazibisa shwamwa.*
12 Bamyata babakutile ku liboko limo na limo na kubajenjelesa mu bukambwila, co bakulunu kubabasingimikile.
13 Bakwenje banambata mamanya a kulolela bunga, co banike ba banalume bali na kutalyangela na mikuta ya bikuni.
14 Bakulunu banatundu ku cikolo ca nganda. Bakwenje banecela kwimba myaso yabo.
15 Bimbunge byetu kubyesi na kubwahelela. Kukina cetu cinatenguluka kupwa busiwa.
16 Bilongo bya ku mitwe yetu binau. Tunabindama mwafwa tunalingi bubi.
17 Ebi byuma binalingisa bimbunge byetu bibinje,
Co lalo ebi byuma binalingisa mesho etu atsitsibale.
18 Ha kuwana ngwe munkinda wa Siyone unapu ngundu, bimbanje bali na kwendanganamo.
19 Oloni yobe, obe Yehova unatumama ha litanda lyobe myaka yoshe.
Litanda lyobe lyakalako kutunda ku cisemwa cimo kuya ku cisemwa cikwabo.
20 Bika biunatwibalela myaka yoshe na kutuseza simbu yailaha ngacije?
21 Twilwise kuli yobe, obe Yehova, co twiluka kuli yobe na mbunge imo.
Pwisa matangwa etu ngwe muwapwile matangwa a kunima.
22 Oloni yobe unatubyana kutubyanenena.
Unatwalelelaho kutulubalela manene.
Mu capita 1-4 inapu myaso ya busiwa ije yalikaba kwesekesa na aufabeti ya Cihebelu.
Kutalesa kuli Jelusalema.
Lijwi na lijwi “mila yange.”
Nambe “Nanyongesa.”
Lijwi na lijwi “lilehule.”
Lijwi na lijwi “mila yange.”
Lijwi na lijwi “Lishuli lyange banalitila hasi.”
Endekesi ya mu myaso ije imwesa ngozi nambe mema ku mbunge.
Lijwi na lijwi “cibumbe ca muna Siyone wa munakazi.”
Lijwi na lijwi “bambanda baje kanda balilaleho laja na banalume.”
Nambe hamo “Nanjilingisa njilale kushwanga.”
Nambe “lyumato.”
Nambe “kubandamena na mbunge imo.”
Lijwi na lijwi “bya kubenga,” kulumbununa bizalo bya kubenga bya ndando ya helu.
Nambe “banabapiki.”