EZEKIELE

1 Mu mwaka wa bu 30, ha litangwa lyamucitanu, mu ngonde yamuciwana, munjakele hakati ka banu baje bakele mu bufunge ku ndonga ya Keba, melu ashokolokele, co njashangumukile kumona bimona bya kutunda kuli Njambi. 2 Ha litangwa lyamucitanu omu mu ngonde, kulumbununa mu mwaka wamucitanu kutunda haililile mu bufunge Mwene Jehoyakini, 3 Yehova wendekele na Ezekiele* muna kapilistu Buzi ku ndonga ya Keba mu lifuti lya baKaudiya. Liboko lya Yehova lyezile hali Ezekiele mwakele kuje.

4 Co munjatalele, njamwene lihunzi lyakama litundilila ku kunto, co kwakele lishelwa lyakama na tuhya,* co ceke cakama cabizengelekele, co muje mu tuhya mwakele cuma cije casholokele ngwe cikubo ca kubyakuma ca goudi ya kukumbasana na siuva. 5 Muje mu tuhya mwakele byuma bije byasholokele ngwe byuma bya kutanga bya kuyoya biwana. Co cimo na cimo casholokele ngwe munu. 6 Cimo na cimo cakele na bihanga biwana na mambaba awana. 7 Mendi abyo apwile akwoloka, co bilyato byabyo byapwile ngwe bilyato bya muna ngombe. Co ebi bilyato byakele na kubyakuma ngwe kopa ibanajelesa. 8 Ebi byakutanga bya kuyoya byakele na maboko aje asholokele ngwe maboko a banu mu mitambela yoshe iwana mwisi ya mambaba abyo. Co byoshe biwana byakele na bihanga na mambaba. 9 Mambaba abyo akele na kuliwana. Ebi byakutanga bya kuyoya mubyakele na kuya, kubyakele na kutenguluka. Cimo na cimo cakele na kuya lika kulutwe.

10 Cimo na cimo ca byakutanga biwana casholokele ngacije: Cimo na cimo cabyo cakele na cihanga ca munu kulutwe na cihanga ca ndumba ku cilyo na cihanga ca ngombe ku cimoshwe na cihanga ca ngonga kunima. 11 Omu mukemwo mubyakele na kusholokela bihanga byabyo. Byajangumwinine mambaba abyo mwilu. Cimo na cimo cakele na mambaba abali aje akele na kuliwana, co lalo cakele na mambaba abali aje akele na kufwika mubila waco.

12 Cimo na cimo cakele na kuya lika kulutwe. Cakele na kuya kwoshe kuje kuicitwala sipilitu. Mubyakele na kuya, kubyakele na kutenguluka. 13 Co byakutanga bya kuyoya byasholokele ngwe manungu a tuhya aje akele na kwenyuka. Co byuma bimo bije byasholokele ngwe mitetengo ya tuhya tuje tutwa ceke byakele na kwendangana mukati ka byakutanga bya kuyoya, mubiya mubiluka, co mihyato yakele na kuwemuna kutundilila ha tuhya. 14 Co byakutanga bya kuyoya mubyakele na kuya kulutwe na kwiluka munima, byakele na kusholoka ngwe mihyato ije ili na kuwemuna.

15 Munjakele na kuyongola byakutanga bya kuyoya, njamwene liwili ha lifuti-libu lije lyakele kumukulo wa cimo na cimo ca byakutanga bya kuyoya cije cakele na bihanga biwana. 16 Aje mawili akele na kubyakuma ngwe krisoliti, co oshe awana alifwile. Asholokele ngwe liwili limo lyakobelele mu liwili likwabo.* 17 Muwakele na kwenda, asele kuya mu mitambela yoshe iwana kwa kujeneka kutenguluka. 18 Aje mawili apwile akama manene, co azibisile lyoba. Co helu lyawa mawili awana hashulile mesho. 19 Byakutanga bya kuyoya mubyakele na kwenda, aje mawili nawo akele na kwenda hamo nabyo, co bije byakutanga bya kuyoya mubyakele na kujunduka kutunda ha lifuti libu, aje mawili nawo akele na kujunduka mwilu. 20 Bije byakutanga bya kuyoya byakele na kuya kuje kuyakele na kubitwala sipilitu, kwoshe-kwoshe kuyakele na kuya sipilitu. Aje mawili akele na kujunduka hamo nabyo, mwafwa sipilitu ije yakele na kupanga mu byakutanga bya kuyoya yakele lalo na mu mawili. 21 Ebi byakutanga bya kuyoya mubyakele na kwenda, aje mawili nawo akele na kwenda. Mubyakele na kwimana, nawo akelele na kwimana. Mubyakele na kujunduka mwilu kutunda ha lifuti-libu, aje mawili akele na kujunduka hamo nabyo, mwafwa sipilitu ije yakele na kupanga mu byakutanga bya kuyoya yakele lalo na mu mawili.

22 Helu lya mitwe ya byakutanga bya kuyoya hakele cuma ca kufwa ngwe butenda bwa kristo, cije cakele na kubyakuma ngwe mema a kukonda, co lalo capwile ca kukomokesa. Bacijangumwinine helu lya mitwe yabo. 23 Cimo na cimo ca bije byakutanga bya kuyoya cajangumwinine mambaba aco mwilu* mwisi ya buje butenda bwa kristo. Limo na limo lya aje mambaba aco lyaliwanene na akwabo. Cimo na cimo ca bije byakutanga bya kuyoya cakele na mambaba abali a kufwika mutambela umo wa mubila waco, na mambaba abali a kufwika ku mutambela ukwabo. 24 Munjazibile miyoyo ya mambaba abyo, yazibikile ngwe cilumo ca mema ali na kucuma, ngwe cilumo ca Muka-nzili Yoshe. Mubyakele na kwenda, byazibikile ngwe maswalale bali na kwenda. Mubyakele na kwimana, byakele na kuwisa mambaba abyo.

25 Kwazibikile lijwi helu lya butenda bwa kristo buje bwakele helu lya mitwe yabyo. (Mubyakele na kwimana byakele na kuwisa mambaba abyo.) 26 Helu lya buje butenda, buje bwakele helu lya mitwe ya bije byakutanga hakele cuma casholokele ngwe limanya lya safaya, co califwile na litanda. Co haje ha litanda hatumamene umo uje wamonekele ngwe munu. 27 Njamwene cuma cimo cakele na kubyakuma ngwe cikubo ca goudi ya kukumbasana na siuva, cije capwile ngwe tuhya twakele na kwenyuka. Otu tuhya twakele na kwenyuka kutunda ku cuma casholokele ngwe mbunda yendi kuya kwilu. Co kushangumukila mu mbunda yendi kuya kwisi, njamwene cuma ca kulifwa na tuhya. Co kwakele misha yamuzengelekele 28 ngwe misha ya nkongolo ije ili mu mashelwa ha litangwa lya nyonzi. Omu mukemwo muyasholokele misha ya ceke ije yamuzengelekele. Yasholokele ngwe bumpau bwa Yehova. Munjaimwene, njatsikamene na kukulamena hasi. Co njashangumukile kuziba lijwi lya umo wakele na kwendeka.

2 Co wanjilekele ngwendi: “Muna munu,* imana mangana njisimutwiye nobe.” 2 Mwendekele nange, sipilitu yakobelele muli yange, co yanjikwasele njikatuke mangana njizibe uje wakele na kwendeka nange.

3 Watwaleleleleho kunjileka ngwendi: “Muna munu, njili na kukutuma ku banu ba Isalele, ku muyati wa baka-kutengulukila baje bananjitengulukila. Aba banu na bakukulwila babo banatwalelelaho kupokola mashiko ange kweta na lelo lino. 4 Njikutuma ku bana ba kujeneka kwononoka,* ba bimbunge bya kukaluwa, co unapande kukabaleka ngwobe, ‘Ebi bikebyo byanendeka Mwata Wahakamwa ya Byoshe Yehova.’ 5 Co bakebo ha kupwa muyati wa baka-kutengulukila, nameme batolilila nambe babyana kutolilila, bakazibuka ngwabo hakati kabo hakele kapolofweto.

6 “Oloni yobe muna munu, keti ubazibile lyoba, co lalo keti uzibe lyoba mwafwa ya byuma bibendeka, nameme uli mukati ka mambimbo na mingonga,* co lalo uli mukati ka manyewe. Keti uzibe lyoba mwafwa ya byuma bibendeka, co lalo keti utewe mubili na kusholokela bihanga byabo, mwafwa banapu muyati wa baka-kutengulukila. 7 Unapande kukabaleka majwi ange, nambe batolilila nambe kubatolilila, mwafwa banapu baka-kutengulukila.

8 “Oloni yobe muna munu, tolilila binjikuleka. Keti upwe muka-kutengulukila ngwe aba baka-kutengulukila. Ashama mangana ulye binjikwana.”

9 Munjatalele, njamwene munu umo nolwela liboko kuli yange. Co mu liboko lyendi njamwenemo libulu lya kuzenga lya kusoneka. 10 Mwajangumwine lije libulu ku mesho ange, lyapwile lya kusoneka kulutwe na kunima. Co haje ha libulu basonekeleho myaso ya busiwa, biñanda bya kulila na biñanda bya kumbolozoka.

3 Co wanjilekele ngwendi: “Muna munu, lya ebi bili kulutwe lwobe,* lya eli libulu lya kuzenga, co uye na kwendeka ku bakunjibo ya Isalele.”

2 Ngeci njashamene mu kanwa, co wanjilisile lije libulu lya kuzenga. 3 Watwaleleleleho kunjileka ngwendi: “Muna munu, lya eli libulu lya kuzenga linjikwana, co shulisa lifu lyobe neli libulu.” Ngeci njashangumukile kulilya, co lyatobalele ngwe buki mu kanwa kange.

4 Wanjilekele ngwendi: “Muna munu, ya ku banu bakunjibo ya Isalele ukabaleke majwi ange. 5 Mwafwa kunjesi na kukutuma ku banu baje bakendeka ndaka yaikalu nambe ndaka ije kuuzibuka, oloni njili na kukutuma ku bakunjibo ya Isalele. 6 Kunjesi na kukutuma ku miyati ya banu baje bakendeka ndaka yaikalu nambe ndaka ije kuuzibuka, ije kuwasa kuzibisisa majwi ayo. Ngwe njakutumu kuli bakebo, ngwe bakakutolilila. 7 Oloni bakunjibo ya Isalele babyana kukutolilila, mwafwa kubashaka kunjitolilila. Bakunjibo ya Isalele boshe ba kukola mitwe, co lalo bali na bimbunge bya kukaluwa. 8 Tala! Njinalingisa cihanga cobe cipwe ca kukola ngwe mubinakolo bihanga byabo, co lalo njinalingisa luholo lwobe lupwe lwa kukola ngwe muwanakolo maholo abo. 9 Njinapwisa luholo lwobe ngwe limanya lya daimondi, lunakolo kutubakana limanya lya kukola manene. Keti ubazibile lyoba nambe kutewa mubisholokela bihanga byabo, mwafwa banapu baka-kutengulukila.”

10 Co watwaleleleleho kunjileka ngwendi: “Muna munu, tolilila na kwaka mbunge ku majwi ange oshe anjikuleka. 11 Ya ku bakweni bali mu bufunge ukendeke nabo. Yakabaleke ngwobe, ‘Ebi bikebyo byanendeka Mwata Wahakamwa ya Byoshe Yehova.’ Cili kuli bakebo kutolilila nambe kubyana.”

12 Co sipilitu yanjambatele, co njazibile cilumo cakama munima yange na lijwi lije lyendekele ngwalyo: “Bumpau bwa Yehova babushangazale mu mwela wendi.” 13 Co njazibile miyoyo ya mambaba a bije byakutanga bya kuyoya muwakele na kulimbola, na cilumo ca mawili aje akele kuyehi nabyo, na cilumo cakama. 14 Co sipilitu yanjijundwile na kunjambata, co njaile oku njinalubala na butenu bwakama. Co njazibile nzili ya Yehova ipanga manene muli yange. 15 Ngeci njaile ku banu baje bakele mu bufunge ku Teu-abibi, baje bakele kuyehi na ndonga ya Keba, co njakele kuje kubakele. Njakeleko matangwa 7 oku njalikomokela manene.

16 Matangwa 7 muwahwile, Yehova wanjilekele ngwendi:

17 “Muna munu, njinakwangula kupwa muka-kunyunga bakunjibo ya Isalele, co nga uziba lijwi litunda mu kanwa kange, unapande kunjinangwilabo. 18 Nga njileka munu wamubi ngwange, ‘Ukatsa bene,’ oloni yobe kuumunangula, co wonwa kwendeka mangana unangule uje munu wamubi atunde mu ngila yendi yaibi mangana ayoye, uje munu akatsa mwafwa ya mulonga wendi, oloni maninga endi njikawatondela mu mutwe wobe. 19 Oloni nga unangula munu wamubi, co ikeye katenguluka na kutunda ku bubi bwendi na ku ngila yendi yaibi, co uje munu akatsa mwafwa ya mulonga wendi, oloni yobe ukobola mwonyo wobe. 20 Oloni nga munu wa kusungama ecela kulinga byuma bya kusungama na kushangumuka kulinga byuma byabibi,* njikamwakela citanwiso kulutwe lwendi, co akatsa. Nga kuwamunangwile, akatsa mwafwa ya bubi bwendi, co bilinga byendi bya kusungama kunjikabyanuka lalo, oloni maninga endi njikawatondela mu mutwe wobe. 21 Oloni nga unanangula munu wa kusungama ngwobe keti alinge bubi, co kalingi bubi, uje munu akayoya mwafwa unamunangwile, co nobe wobola mwonyo wobe.”

22 Liboko lya Yehova lyezile hali yange munjakele kuje, co wanjilekele ngwendi: “Katuka uye mu cana, co njikendeka nobe muuketa kuje.” 23 Ngeci njakatukile, njaile mu cana. Munjatalele, njamwene bumpau bwa Yehova ngwe bumpau buje bunjamwene ku ndonga ya Keba, co njatsikamene na kukulamena hasi. 24 Co sipilitu yakobelele muli yange na kunjilingisa njimane, co wanjilekele ngwendi:

“Ya ukalishokelele mu njibo yobe. 25 Oloni yobe muna munu, bakakukuta na mikole mangana keti wase kuya kuli bakebo. 26 Co njikalingisa ndaka yobe isakamene mu ndakwilo yobe, co kuukasa kwendeka, kuukasa kubendekela, mwafwa banapu baka-kutengulukila. 27 Oloni munjisimutwiya nobe, njikulingisa washame, co unapande kubaleka ngwobe, ‘Ebi bikebyo byanendeka Mwata Wahakamwa ya Byoshe Yehova.’ Uje atolilila, atolilile, co uje shendi kutolilila, alikele, mwafwa banapu baka-kutengulukila.

4 “Muna munu, ambata librikisi ulyake kulutwe lwobe na kucakulaho nganda ya Jelusalema. 2 Linga ngwe uizengeleka. Itungile cibumbe ca kuizengeleka, ilundwile lilundu lya kuilwisila. Tunga bilombo bya baka-kuilwisa kuyehi nayo, co izengeleke na bitwa bya kuinyongesa. 3 Ambata cikango ca cikubo, co cake mukati kobe na nganda mangana ipwe ngwe cibumbe ca cikubo. Tala ije nganda, co ipwa ngwe banaizengeleka. Unapande kuizengeleka. Eci cinapu cizibukiso kuli bakunjibo ya Isalele.

4 “Co unapande kulalela ku cimoshwe na kulyaka milonga ya bakunjibo ya Isalele. Ukambata milonga yabo ha matangwa aukalalela ku mati yobe. 5 Co unapande kulinga ngoco ha matangwa 390 kwesekesa na myaka ya milonga yabo, co ukambata milonga ya bakunjibo ya Isalele. 6 Co awa matangwa unapande kuwamanesa.

“Kutundaho, unapande kulinga ngoco lwamucibali. Unapande kulalela ku cilyo na kwambata milonga ya banu bakunjibo ya Juda ha matangwa 40. Litangwa limo na limo likemanena mwaka. Eli likelyo lishiko linjinakwana. 7 Co unapande kutala Jelusalema ije ibanazengeleka oku unafunyu maboko a cikobelo cobe, co unapande kupolofweta byuma bikalingiwa kuli ikeyo.

8 “Tala! Njikakukuta mikole mangana keti wase kutengulukila ku mati ikwabo kweta noho hawakahwila matangwa a kuzengeleka nganda.

9 “Co unapande kwambata tiliku, na mbali, na miyati ibali ya makunde, na mashangu, na speuti na kubyaka mu cikwata cimo na kumungaho likende lyobe. Mwafwa ukalya eli likende ha matangwa 390 aukalalela ku mati imo. 10 Co ha litangwa na litangwa ukapeselesa byakulya bya bulemu bwa kweta ku mashekele* 20 na biukalya. Unapande kukabilya ha bisimbu biunanoneka.

11 “Co ukanwa mema a kuseteka, ukanwa binganja bibali.* Ukabinwa ha bisimbu biunanoneka.

12 “Unapande kulilya ngwe muunesi kulila mukasha wa mbali wa mubundungulu. Unapande kulyocela ha mesho abo, co tuzi twa banu twa kuma tuketwo tuunapande kupangesa kupwa ngwe bikuni.” 13 Yehova wendekele lalo ngwendi: “Omu mukemwo mubakalila baIsalele makende abo, mu kujwala, omwo njikabashandwela mukati ka baka-mafuti.”

14 Co njamukumbulwile ngwange: “Ebi kwahi, Mwata Wahakamwa ya Byoshe Yehova, mwafwa kushwa ku bwanike bwange kweta na lelo lino kanda njicijwaleho mwafwa ya kulya situ ya cimuna wa kulitsila nambe ibanapapozola, co mu kanwa kange kanda mukobeleho laja situ ya kujwala.”

15 Co wanjilekele ngwendi: “Bukalu bwahi, njikutabesa upangese bufwati bwa bingombe keti tuzi twa banu, co hakeho haukoca likende lyobe.” 16 Co wanjilekele ngwendi: “Muna munu, hano njilingisa keti kukale byakulya* mu Jelusalema, co bakalya makende abo a kuweita oku banalishoshomwena manene na kunwa mema abo a kuseteka oku bali na kuziba manene lyoba. 17 Eci cikalingiwa mangana mubakajeneka byakulya na mema bakalitale-tale umo na mukwabo oku banakasama na kunyonga mwafwa ya milonga yabo.

5 “Obe muna munu, ambata mukwale wa kubambuka mangana uupangese ngwe moko ya mbeli ya kutehwisa. Tehula binkambu bya ku mutwe wobe na minjezi yobe, co ambata cipeseleso mangana upeselese obyo binkambu na kubitepa mu mitamba. 2 Matangwa a kuzengeleka nganda muwahwa, co wambata mutamba umo ku mitamba itatu na kuwenyeka na tuhya mukati ka nganda. Co wambate mutamba ukwabo ku mitamba itatu na kuutetanga na mukwale kuzenguluka nganda yoshe, co mutamba wa mamaneselelo ku mitamba itatu, uushandwele mu lihunzi, co njikashomona mukwale na kuusheka.

3 “Unapande lalo kwambata binkambu bimo na kubibungila mu cizalo cobe. 4 Co ambatako binkambu bikwabo ubyumbile mu tuhya na kubyenyeka. Co tuhya tukatundaho tukaya ku bakunjibo ya Isalele boshe.

5 “Mwata Wahakamwa ya Byoshe Yehova nendeka ngwendi: ‘Ou ikeye Jelusalema. Njinamwaka hakati ka mafuti aje anamuzengeleka. 6 Oloni natengulukila kusompa* kwange na mashiko ange, co nalingi manene bubi kutubakana baka-mafuti baje banamuzengeleka. Mwafwa banu bendi banabyana kusompa kwange, co kubakabangeyeye mashiko ange.’

7 “Mwata Wahakamwa ya Byoshe Yehova nendeka ngwendi: ‘Omwo mwapwile ba kujeneka kuziba kutubakana baka-mafuti boshe baje banamizengeleka, co lalo kumwakabangeyeye mashiko ange nambe kukabangeya kusompa kwange, oloni munakabangeya kusompa kwa mafuti oshe aje anamizengeleka, 8 Mwata Wahakamwa ya Byoshe Yehova nendeka ngwendi: “Njikulwisa obe nganda, co yange bene njikusompa oku baka-mafuti bali na kulimwena. 9 Njikakulinga byuma bije kanda njilingeho laja, mwafwa ya bilinga byobe byoshe bya bunyengwe, co byuma binjikakulinga kunjikabilingiho lalo.

10 “‘“Ngeci bisemi ba banalume mukati keni bakalya bana babo ba banalume, co bana ba banalume bakalya baishabo, co njikakusompa, co boshe baje bakasala muli yobe njikabashandwela mu mitambela yoshe.”’

11 “Mwata Wahakamwa ya Byoshe Yehova nendeka ngwendi, ‘Njilisinga ha kuyoya kwange ngwange omwo wajwalesele mwela wange wa kujela na tumponya bobe boshe ba bunyengwe na bilinga byobe byoshe bya bunyengwe, njikakubyana,* kunjikakuzibila ngozi, co kunjikakuzibila mema ku mbunge. 12 Cibunga cimo ca banu mukati kobe cikatsa ku mushongo wa kulitambwisa nambe ku njala yakama. Cibunga cikwabo ca banu bobe cikawa ku mukwale ku mitambela yoshe. Co njikashandwela cibunga ca mamaneselelo ku mitambela yoshe, co njikashomona mukwale na kubakilimisa. 13 Ngeci butenu bwange bukahwa, matoto ange akatula, co njikajauka. Munjikamanesa kubatulila butenu bwange, bakazibuka ngwabo yange Yehova njashaka banu balemese lika yange.

14 “‘Njikakupwisa mwela uje unabihya, co njikakuzibisa shwamwa mukati ka baka-mafuti baje banakuzengeleka na kukuzibisa shwamwa ku mesho a banu baje bakaita kuyehi nobe. 15 Munjikakusompa mu butenu na mu matoto na kukwana kashitiko kakama, ukapwa cuma cije cibashendumuna banu na kujola, co ukapwa cakumwenako na cuma cije cizibisa lyoba baka-mafuti baje banakuzengeleka. Yange Yehova njinendekamo.

16 “‘Njikabatumina mikili ya njala mangana ibanyongese. Mikili injikatuma yakukunyongesa. Njikapwisa njala ipwe yakama manene ha kwonowesa byakulya* kukobela mu nganda. 17 Njikakutumina njala yakama na bikashama ba bukalu, co bikalya bana bobe. Mushongo wa kulitambwisa na maninga aje aketika bikakuzeyesa, co njikakutumina mukwale mangana wakukulwise. Yange Yehova njinendekamo.’”

6 Yehova wanjilekele ngwendi: 2 “Muna munu, tala ku minkinda ya Isalele na kupolofweta byuma bikalingiwa kuli ikeyo. 3 Unapande kwendeka ngwobe, ‘Eni minkinda ya Isalele, tolilileni lijwi lya Mwata Wahakamwa ya Byoshe Yehova: Mwata Wahakamwa ya Byoshe Yehova nendeka ku minkinda na ku malundu na ku bana ba bindonga na ku bingulunga ngwendi: “Taleni! Njikamitumina mukwale mangana wakumilwise, co njakunyongesa myela yeni ya kulunduka. 4 Mitula yeni bakaipujula, bikwatelo byeni bya isense bakabibwabwanya, co bibimbi byeni njikabyumbila kulutwe lwa tumponya beni ba bunyengwe.* 5 Njikombangela bibimbi bya banu ba Isalele kulutwe lwa tumponya babo ba bunyengwe, co njikombangela bitsiya byeni ku mitula yeni yoshe. 6 Mu myela yoshe imukakala, binganda byamwo bakabinyongesa, co myela yamwo ya kulunduka bakaipujula, co ikapwa bingundu. Mitula yeni bakaipujula na kuinyongesa, tumponya beni ba bunyengwe bakabanyongesa, mitula yeni ya isense bakaibwajula, co bipangi byeni bakabizimangana. 7 Co baje bakatsa bakawila mukati keni, co mukazibuka ngweni yange Yehova.

8 “‘“Oloni njikasezako bamo, mwafwa bamo beni bakoboka ku mukwale mukati ka mafuti, mu mafuti muje mumukashandokela. 9 Co baje bakoboka, bakanjanuka mukati ka baka-mafuti muje mubanabatwala mu bufunge. Bakazibuka ngwabo banapokwele mbunge yange mwafwa ya bimbunge byabo bya kujeneka kulongwa bije byatundile kuli yange, na mesho abo aje ashungwiiye tumponya babo ba bunyengwe. Bakaziba shwamwa na kuzinda byuma byoshe byabibi na byuma byoshe bya bunyengwe bibanalingi. 10 Bakazibuka ngwabo yange Yehova, co lalo bakazibuka ngwabo kunjakele na kubajujwisa lika ngoco munjakele na kubaleka ngwange njibanenela bukalu.”’

11 “Mwata Wahakamwa ya Byoshe Yehova nendeka ngwendi: ‘Kanda maboko obe mu kumwesa busiwa, na kulyatangela hasi mu kumwesa ngwobe unabihilila na kulila mwafwa ya byuma byoshe byabibi na byuma byoshe bya bunyengwe bibanalingi bakunjibo ya Isalele, mwafwa bakatsa na mukwale na njala yakama na mushongo wa kulitambwisa. 12 Uje akakala kulako akatsa na mushongo wa kulitambwisa, uje akakala muyehi akatsa ku mukwale, co woshe akoboka ebi byuma na kusalaho, akatsa ku njala yakama, co njikabajukwila butenu bwange bwoshe. 13 Co mukazibuka ngweni yange Yehova omwo bibimbi byabo bikawila ku tumponya babo ba bunyengwe, na ku mitula yabo yoshe, na ha malundu amalaha hoshe, na ha minkinda hoshe, na mwisi ya miti yaibwa yoshe, na mwisi ya minango ya miti yakama muje mubakele na kwanena milambu ya lwengo lwalubwa mangana bazibise kubwaha tumponya babo ba bunyengwe boshe. 14 Njikolola liboko lyange na kubalwisa na kupwisa lifuti lyabo ngundu, co myela yabo yoshe ibakele ikapwa ngundu kutubakana mambo ya kuyehi na Dibla. Co bakazibuka ngwabo yange Yehova.’”

7 Yehova wanjilekele ngwendi: 2 “Obe muna munu, Mwata Wahakamwa ya Byoshe Yehova nendeka kutalesa ku lifuti lya Isalele ngwendi: ‘Njinena mamaneselelo. Mamaneselelo anaija mu bimbango byoshe biwana byeli lifuti. 3 Mamaneselelo anamizila, co njimijukwila butenu bwange na kumisompa kwesekesa na bingila byeni na kumyana kashitiko mwafwa ya bilinga byeni byoshe bya bunyengwe. 4 Kunjikamizibila ngozi nambe kumizibila mema ku mbunge, mwafwa njikaminenela byuma bitunda mu bingila byeni na kumilingisa muliwane na bukalu butunda mu bilinga byeni bya bunyengwe. Co mukazibuka ngweni yange Yehova.’

5 “Mwata Wahakamwa ya Byoshe Yehova nendeka ngwendi: ‘Taleni! Kuli na kwija bukalu, bukalu buje kanda busholokeho laja. 6 Mamaneselelo ali na kwija. Mamaneselelo akaija, akamizila mu kukasumuna. Taleni! Ali na kwija. 7 Simbu* yeni inaija, yeni mwakala mu lifuti. Simbu ili na kwija, litangwa lili muyehi. Ha minkinda hali liwayanga, kuhesi miyoyo ya kubwahelela.

8 “‘Ololo njimitila kulubala kwange na kumijukwila butenu bwange na kumisompa kwesekesa na bingila byeni na kumyana kashitiko mwafwa ya bilinga byeni byoshe bya bunyengwe. 9 Kunjikamizibila ngozi nambe kumizibila mema ku mbunge. Njikaminenela byuma bitunda mu bingila byeni na kumilingisa muliwane na bukalu butunda mu bingila byeni bya bunyengwe. Co mukazibuka ngweni yange Yehova njili na kumyana kashitiko.

10 “‘Taleni! Litangwa lili na kwija. Lili muyehi. Simbu* yeni inete. Mulamu wa kumyanesa kashitiko unabwaha laja, co kulijundula kwa citozi kunalibwezelela. 11 Bukenya bunapwoni mulamu wa bubi. Kubakoboka, co lalo kubakasa kwobola bufuko bwabo nambe mbunga yabo, co lutsimo lwabo lukahwa. 12 Simbu ikaija, co litangwa liketa. Muka-kulanda keti alisambe, co muka-kulandesa keti alile mwafwa butenu buli na kwizila mbunga yabo yoshe.* 13 Mwafwa muka-kulandesa kakeluka lalo ku byuma byalandesele nameme oboka, mwafwa eci cimona cili na kwizila mbunga yoshe. Wahi akeluka, co mwafwa ya milonga yendi, wahi akoboka.

14 “‘Banohyesa lupembo, co banu boshe banalibwahesela, oloni naumo wahi ali na kuya ku nzita, mwafwa butenu bwange bunepukila mbunga yoshe. 15 Mukwale uli hanja, co mushongo wa kulitambwisa na njala yakama bili mukati ka nganda. Woshe ali hanja akatsa ku mukwale, co baje bali mukati ka nganda bakatsa ku njala yakama na ku mushongo wa kulitambwisa. 16 Baje bakoboka, baje bakasa kutewa, bakatewela ku minkinda, co bakapwa ngwe mayembe ba mu cingulunga, co umo na umo wabo akalinyenga mwafwa ya milonga yendi. 17 Maboko abo oshe akatonola, co ha mabuli abo hoshe hakandweka mema.* 18 Banazala bikeleya, co banalijujukila. Boshe bakaziba shwamwa, co mitwe yabo yoshe bakaikongobola.*

19 “‘Bakombila siuva yabo mu bitapalo, co goudi yabo bakaizinda. Siuva yabo nambe goudi yabo kubikasa kubobola ha litangwa lya butenu bwa Yehova. Kubakakuta nambe kushulisa mafu abo mwafwa binapu* bitanwiso bije binabalingisa balinge milonga. 20 Balijundwile mwafwa ya byuma byabo byabibwa bya kulicakeya, co bamungileho* tumponya ba bunyengwe na binjambi ba bunyengwe mukemwo njikabalingisa babizinde. 21 Njikabyana* mu maboko a baka-kwija mangana babipukule na kubyana banu bababi ba ha lifuti-libu mangana babipukule, co bakabijwalesa.

22 “‘Njikabakengesa nima, co bakajwalesa mwela wange uje unabanda,* co mapwepwe bakakobelamo na kuujwalesa.

23 “‘Fula malyenge* mwafwa mu lifuti munashulu maninga a banu babanasompo mu kuhenga, co lalo mu nganda munashulu lwozi. 24 Njikanena baka-mafuti bababi manene, co bakuswana binjibo byabo, co njikamanesa kulyalesa kwa baka-nzili, co lalo myela yabo ya kujela njikaijwalesa. 25 Kayando mukakabezila, bakashakezeka kukala mu kwoloka, oloni kubakaciwana. 26 Bukalu bukaija mu kulikabasana, co mizimbu ikalituta, co banu bakatonda bimona ku tupolofweto, oloni tupilistu kubakalongesa mwamubwa banu lishiko, co bakulunu bakonowa kunangula banu mwamubwa. 27 Mwene akalila, co mwata akombwa, co maboko a banu bomu mu lifuti akajaja mwafwa ya lyoba. Njikabalinga kwesekesa na bingila byabo, co njikabasompa kwesekesa nomu mubanasompela bakwabo. Co bakazibuka ngwabo yange Yehova.’”

8 Co mu mwaka wa bu 6, mu ngonde ya bu 6, ha litangwa lyamucitanu omu mu ngonde, munjatumamene mu njibo yange, na bakulunu ba Juda mubatumamene kulutwe lwange, liboko lya Mwata Wahakamwa ya Byoshe Yehova lyanjikwatele. 2 Munjatalele, njamwene cuma cimo cije casholokele ngwe tuhya. Kutunda mu mbunda yendi kuya kwisi kwakele tuhya, co kutunda mu mbunda yendi kuya kwilu, wakele na kubyakuma ngwe cikubo ca kubyakuma ca goudi ya kukumbasana na siuva. 3 Co wolwele cuma cije casholokele ngwe liboko na kukwata ku binkambu bya ku mutwe wange, co sipilitu yanjijundwilile mu bukambwila na kunjitwala ku Jelusalema kwitila mu bimona bya kutunda kuli Njambi. Yanjitwalele ku cikolo ca lilapa lya mukati cije cinatala ku kunto kuje kwemanene kamponya wa cipululu uje akashongangeya cipululu. 4 Co taleni! Kwakele bumpau bwa Njambi ya Isalele ngwe buje bunjamwene mu cana.

5 Co wanjilekele ngwendi: “Muna munu, Njikulomba wandwile mesho obe ku kunto.” Co njandwilile mesho ange ku kunto, co mu cikolo ca ku kunto cije ciya ku mutula, njamwenemo kamponya wa cipululu. 6 Co wanjilekele ngwendi: “Muna munu, unamono byuma byabibi, byuma bya bunyengwe bije bibali na kulinga bakunjibo ya Isalele kuno, byuma bije bili na kunjilingisa njiye kulako na mwela wange wa kujela ndi? Oloni umona byuma bya bunyengwe kutubakana ebi.”

7 Co wanjitwalele ku cikolo ca lilapa, co munjatalele njamwene mbengwa ha cibumbe. 8 Wanjilekele ngwendi: “Muna munu njikulomba wamese ei mbengwa ili ha cibumbe.” Ngeci njamesele ije mbengwa yakele ha cibumbe, co njamwene cikolo. 9 Wanjilekele ngwendi: “Kobela ukamone byuma byabibi, byuma bya bunyengwe bibali na kulinga kuno.” 10 Ngeci njakobelele na kutala, co njamwene tumponya ba cifwa ca byuma bya kulikoka hasi ba miyati yoshe na bikashama ba bunyengwe na tumponya boshe ba bunyengwe* bakunjibo ya Isalele. Babicakwile ha cibumbe coshe. 11 Co bakulunu 70 bakunjibo ya Isalele bemanene kulutwe lwabo, co Jazaniya muna Shafani wemanene hakati kabo. Umo na umo wabo wakwatele cikango mu liboko lyendi, co bwisi bwa lwengo lwalubwa bwa isense, bwakele na kukakumuka. 12 Wanjilekele ngwendi: “Muna munu, unamono bibali na kulinga bakulunu, ba ku njibo ya Isalele mu lisusulungu ndi? Umo na umo wabo ali mu mulili wa mukati muje muli tumponya bendi mwafwa bali na kwendeka ngwabo, ‘Yehova kesi na kutumona. Yehova natundu muno mu lifuti.’”

13 Co wanjilekele lalo ngwendi: “Umona byuma bikwabo bya bunyengwe bibali na kulinga kutubakana ebi.” 14 Co wanjitwalele ku cikolo ca ku njibo ya Yehova ca ku kunto, co kuje njamweneko banakazi banatumama oku balila njambi wa lizina lya Tamuzi.

15 Co wanjilekele lalo ngwendi: “Muna munu, unamono ebi ndi? Umona byuma bya bunyengwe, co lalo byabibi manene kutubakana ebi.” 16 Ngeci wanjitwalele mu lilapa lya mukati lya ku njibo ya Yehova, co ku cikolo ca tempele ya Yehova, mukati ka mutula na mwela wa kwita mwakele banalume 25 baje bakengesele nima ku tempele ya Yehova, co bihanga byabo byatalesele ku butuhukilo bwa litangwa. Bakele na kutsikamena litangwa ku butuhukilo bwa litangwa.

17 Wanjilekele ngwendi: “Muna munu unamono ebi byuma ndi? Kuma cinapu cuma cacindondo bakunjibo ya Juda mubali na kulinga ebi byuma na kushulisa lifuti na lwozi na kutwalelelaho kunjilubalesa ndi? Bali na kusindikila munango* ku lijulu lyange. 18 Ngeci njikabajukwila butenu bwange. Kunjikabazibila ngozi nambe kubazibila mema ku mbunge, nameme bakalilile mu matwi ange mu kutambeka kunjikabazibi.”

9 Co watambekele kuli yange ngwendi: “Sana baje bana nganda kashitiko. Umo na umo akwate citwa ca kunyongesa mu liboko lyendi.”

2 Njamwene banalume 6 batundilila kuje kwakele cikolo ca helu cije catalesele ku kunto. Umo na umo wabo wambatele citwa ca kunyongesa mu liboko lyendi, co mukati kabo mwakele munalume uje wazalele cizalo ca lineni, co mu mbunda yendi mwakele limbinga lya inki lya muka-kusoneka.* Co bakobelele mukati na kwimana ku mutula wa kopa.

3 Co bumpau bwa Njambi ya Isalele bwatundile helu lya bakerubi haje habwakele, co bwaile ku cikolo ca njibo. Co wasanene munalume uje wazalele cizalo ca lineni, uje wakele na limbinga lya inki lya muka-kusoneka mu mbunda yendi. 4 Yehova wamulekele ngwendi: “Kobela mu nganda ya Jelusalema ukake cizibukiso ha maholo a banu baje bali na kukemanga na kulinyenga mwafwa ya byuma bya bunyengwe bili na kulingiwa mu nganda.”

5 Co walekele baje banalume bakwabo oku njili na kuziba, ngwendi: “Yeni mu nganda. Kabeni uje munalume, co mukatsiye banu. Keti mukabazibile ngozi nambe kubazibila mema ku mbunge. 6 Yeni mukatsiye tukulukazi, na bakwenje, na banakazi baje kanda balilaleho laja na banalume, na banike babandondo, na banakazi ba kukola. Oloni keti mukatsiye munu uje ali na cizibukiso. Munapande kushangumukila mu mwela wange wa kujela.” Ngeci bashangumukilile bakulunu baje bakele kulutwe lwa ije njibo. 7 Co wabalekele ngwendi: “Jwaleseni ei njibo na kushulisa malapa na bibimbi. Yeni!” Ngeci baile, co bakatsiile banu mu nganda.

8 Mubakele na kutsiya banu, njasalele likalyange, co njatsikamene na kukulamena hasi na kutambeka ngwange: “Obe Mwata Wahakamwa ya Byoshe Yehova, kuma unyongesa banu ba Isalele boshe baje banasalako omwo ujukwila butenu bwobe hali Jelusalema ndi?”

9 Wanjikumbulwile ngwendi: “Milonga ya bakunjibo ya Isalele na bakunjibo ya Juda yakama manene. Lifuti linashulu na maninga, co ei nganda inashulu na bilinga bya kuhenga mwafwa bali na kwendeka ngwabo, ‘Yehova natundu muno mu lifuti, co Yehova kesi na kumona.’ 10 Oloni yange kunjibazibila ngozi nambe kubazibila mema ku mbunge. Njibalingisa baliwane na bukalu butunda mu bingila byabo.”

11 Co Njamwene munalume uje wazalele cizalo ca lineni, uje wakele na limbinga lya inki mu mbunda yendi aija na kwambulula ngwendi: “Njinalingi biunanjishiki.”

10 Munjakele na kutala, njamwene cuma cimo helu lya butenda buje bwakele helu lya mitwe ya bakerubi. Cije cuma casholokele ngwe limanya lya safaya helu lyabo, co califwile na litanda. 2 Co walekele uje munalume wazalele cizalo ca lineni ngwendi: “Kobela mukati ka mawili, mwisi ya bakerubi, co ushulise maboko obe abali na manungu a tuha aje ali mukati ka bakerubi, co uwashele ha nganda.” Ngeci wakobelele oku njamutala.

3 Uje munalume mwakobelele, bakerubi bemanene ku cilyo ca ije njibo, co lishelwa lyashulile mu lilapa lya mukati. 4 Co bumpau bwa Yehova bwatundile ha bakerubi na kuya ku cikolo ca njibo, co kamandondo-kamandondo ije njibo yashulile na lishelwa, co lilapa lya mukati lyashulile ceke ca bumpau bwa Yehova. 5 Co miyoyo ya mambaba a bakerubi, yazibikile mu lilapa lya hanja, yazibikile ngwe lijwi lya Njambi Muka-nzili Yoshe nga endeka.

6 Co washikile munalume uje wazalele cizalo ca lineni ngwendi: “Ambata tuhya mukati ka mawili, mukati ka bakerubi,” co wakobelele na kwimana ku liwili. 7 Co kerubi umo wolwelele liboko lyendi ku tuhya tuje twakele mukati ka bakerubi. Wambateleko tumo na kutwaka mu maboko a uje wazalele cizalo ca lineni, co uje wazalele cizalo ca lineni watwambatele na kutuhuka natwo. 8 Mwisi ya mambaba a baje bakerubi mwakele byuma bije byasholokele ngwe maboko a banu.

9 Munjakele na kutala, njamwene mawili awana kumukulo wa baje bakerubi, kumukulo wa kerubi na kerubi kwakele liwili limo, co aje mawili abyakumine ngwe limanya lya krisoliti. 10 Aje mawili oshe awana alifwile, co asholokele ngwe liwili limo lyakobelele mu liwili likwabo. 11 Aje mawili muwakele na kwenda asele kuya mu mitambela yoshe iwana kwa kujeneka kutenguluka, mwafwa akele na kuya kuje kuwatalesele mutwe kwa kujeneka kutenguluka. 12 Mibila yabo yoshe, na myongo yabo, na maboko abo, na mambaba abo, na mawili abo, mawili abo boshe bawana, byoshe byashulile mesho. 13 Co kutalesa ku mawili njazibile lijwi liwashika ngwalyo, “Mawili shangumukeni kwenda.”

14 Umo na umo* wabo wakele na bihanga biwana. Cihanga cakulibanga capwile cihanga ca kerubi, cihanga camucibali capwile cihanga ca munu, cihanga camucitatu capwile cihanga ca ndumba, co cihanga camuciwana capwile cihanga ca ngonga.

15 Co baje bakerubi mubakele na kukatuka, (aba bakerubi bakebo byakutanga bya kuyoya bije binjamwene ku ndonga ya Keba) 16 baje bakerubi mubakele na kwenda, aje mawili nawo akele na kwenda kumukulo wabo. Co bakerubi mubakele na kujundula mambaba abo mwilu mangana bajunduke na kutunda ha lifuti-libu, aje mawili kuwakele na kutenguluka nambe kutunda kumukulo wabo. 17 Baje bakerubi mubakele na kwimana, aje mawili nawo akele na kwimana. Co mubakele na kukatuka, nawo akele na kukatuka hamo nabo, mwafwa sipilitu ije yakele na kupanga mu byakutanga bya kuyoya yakele lalo na mu mawili.

18 Co bumpau bwa Yehova bwatundile ku cikolo ca njibo na kukemana helu lya bakerubi. 19 Co bakerubi bajundwile mambaba abo na kukatuka kutunda ha lifuti-libu oku njibamona. Mawili nawo akele kumukulo wabo mubaile. Bemanene ku cikolo ca ku njibo ya Yehova ca ku butuhukilo bwa litangwa, co bumpau bwa Njambi ya Isalele bwakele helu lyabo.

20 Ebi bikebyo byakutanga bya kuyoya bije binjamwene mwisi ya Njambi ya Isalele ku ndonga ya Keba, ngeci njazibukile ngwange byapwile bakerubi. 21 Boshe bawana bakele na bihanga biwana na mambaba awana na byuma bije byasholokele ngwe maboko a banu mwisi ya mambaba abo. 22 Co bihanga byabo byasholokele ngwe bihanga bije binjamwene ku ndonga ya Keba. Cimo na cimo cakele na kuya lika kulutwe.

11 Co sipilitu yanjijundwile na kunjitwala ku cikolo ca ku butuhukilo bwa litangwa bwa njibo ya Yehova, ku cikolo cije catalesele ku butuhukilo bwa litangwa. Co njamwene banalume 25 kuje ku cikolo, co bamo babo bapwile Jazaniya muna Azale na Pelatiya muna Benaya, baje bapwile bamyata ba banu. 2 Co wanjilekele ngwendi: “Muna munu, aba bakebo banalume bali na kuyongola kulinga byuma byabibi na kwana banu ba muno mu nganda binangulo byabibi. 3 Bali na kwendeka ngwabo, ‘Kuma ino keti ikeyo simbu ya kutunga binjibo ndi? Nganda inapu ngwe ndeho, co yetu tunapu ngwe situ.’

4 “Ngeci polofweta byuma bikalingiwa kuli bakebo. Muna munu, polofweta.”

5 Sipilitu ya Yehova yezile hali yange, co Njambi wanjilekele ngwendi: “Endeka ngwobe, ‘Yehova nendeka ngwendi: “Byuma bimunendeka eni banu bakunjibo ya Isalele binapu bya busunga, co njizibuka bimuli na kusinganyeka. 6 Munatsiisa banu babangi muno mu nganda, co munashulisa bibimbi mu bitapalo bya mu nganda byoshe.”’” 7 “Ngeci, Mwata Wahakamwa ya Byoshe Yehova nendeka ngwendi: ‘Bibimbi bimunashandangana mu nganda binapu ngwe situ, co nganda inapu ngwe ndeho. Oloni yeni bakamitundisamo.’”

8 “Mwata Wahakamwa ya Byoshe Yehova nendeka ngwendi: ‘Munatewe mukwale, oloni njikamitumina mukwale mangana wakumilwise.’ 9 ‘Njikamitundisa omu mu nganda na kumyana mu maboko a baka-kwija, co njikamyana kashitiko. 10 Mukatsa ku mukwale, njikamyana kashitiko ha nginga ya Isalele, co mukazibuka ngweni yange Yehova. 11 Ei nganda kuikapu ndeho ya kumitelekela, co yeni kumukapu situ yomu mu ndeho. Njikamyana kashitiko ha nginga ya Isalele, 12 co mukazibuka ngweni yange Yehova, mwafwa kumwakabangeyeye mashiko ange na kukabangeya kusompa kwange, oloni munakabangeya kusompa kwa mafuti oshe aje anamizengeleka.’”

13 Munjamanesele lika kupolofweta, Pelatiya muna Benaya watsile, co njatsikamene na kukulamena hasi na kutambeka ngwange: “Kekange, Mwata Wahakamwa ya Byoshe Yehova, kuma unyongesa banu ba Isalele banasalako ndi?”

14 Yehova wanjilekele ngwendi: 15 “Muna munu, banu baje bakala mu Jelusalema banaleke bandolome bobe baje bali na lisesa lya kusokola, hamolika na bakunjibo ya Isalele boshe ngwabo: ‘Shondolokeni manene kuli Yehova. Lifuti linapu lyetu, banatwanalyo kupwa buswana bwetu.’ 16 Ngeci baleke ngwobe, ‘Mwata Wahakamwa ya Byoshe Yehova nendeka ngwendi: “Nameme njinabatumu kulako mukati ka baka-mafuti na kubashandwela mu mafuti, oloni ha kasimbu kakandondo njikapwa mwela wabo wa kujela mu mafuti muje mubanai.”’

17 “Ngeci baleke ngwobe, ‘Mwata Wahakamwa ya Byoshe Yehova nendeka ngwendi: “Njikamyambata ku banu na kumikungulula mu mafuti mwoshe mumunashandokela, co njikamyana lifuti lya Isalele.” 18 “Co bakeluka omu mu lifuti na kutundisamo byuma byoshe bya bunyengwe na bilinga bya bunyengwe. 19 Co njikabana mbunge ya kulikwatasana na kubana sipilitu yaiha na kutundisa bimbunge bya mamanya mu mibila yabo na kubana bimbunge bya situ,* 20 mangana bakabangeye mashiko ange na kunyunga kusompa kwange na kubyononoka, co bakapwa banu bange, co yange njikapwa Njambi yabo.”’

21 “‘Mwata Wahakamwa ya Byoshe Yehova nendeka ngwendi: “Oloni baje banakakateya ku byuma byabo bya bunyengwe na ku bilinga byabo bya bunyengwe, njibalingisa baliwane na bukalu butunda mu bingila byabo.”’”

22 Bakerubi bajundwile mambaba abo, co mawili akele kuyehi nabo, co lalo bumpau bwa Njambi ya Isalele bwakele helu lyabo. 23 Co bumpau bwa Yehova bwatundile mu nganda na kukemana ku butuhukilo bwa litangwa bwa nganda. 24 Mu cimona cinjamwene kwitila mu sipilitu ya Njambi, sipilitu yanjijundwile, yanjitwalele ku bafunge baje bakele mu Kaudiya, co cije cimona cinjamwene cazimukile. 25 Co njashangumukile kuleka bafunge byuma byoshe byanjimwesele Yehova.

12 Yehova wanjilekele lalo ngwendi: 2 “Muna munu, uli na kuyoya na baka-kutengulukila. Bali na mesho, oloni kubesi na kumona, bali na matwi, oloni kubesi na kuziba, mwafwa bapwa baka-kutengulukila. 3 Oloni yobe muna munu longekeya bitenga biuya nabyo mu bufunge. Co unapande kuya mu bufunge mutanya oku bali na kukumona. Tunda ku njibo yobe uye ku mwela weka, ulinge ngwe uje aya mu bufunge oku bali na kumona. Hamo bananguka nameme bapwa baka-kutengulukila. 4 Co mutanya, tuhula bitenga biunalongekeya bya kuya nabyo mu bufunge oku bali na kumona, co ku mangwezi unapande kuya ngwe uje ibali na kutwala mu bufunge oku bali na kukumona.

5 “Tuba mbengwa mu cibumbe oku bali na kukumona, co witemo na bitenga biunalongekeya. 6 Litwike bitenga byobe ha citsili oku bali na kukumona, co ubituhule mona kunazibala. Lifwike ku mesho mangana keti umone hasi, mwafwa njikupwisa cimweso ku njibo ya Isalele.”

7 Njalingile muje bene mwanjishikile. Mutanya njatuhwile bitenga binjalongekeyeye bya kuya nabyo mu bufunge, co ku mangwezi njatubile mbengwa ha cibumbe na liboko. Co mukwazibalele, njatuhukile na bitenga byange ha citsili oku bali na kunjimona.

8 Mutondo, Yehova wanjilekele lalo ngwendi: 9 “Muna munu, kuma bakunjibo ya Isalele, baka-kutengulukila kubakwihwile ngwabo, ‘Bika biuli na kulinga’ ndi? 10 Baleke ngwobe, ‘Mwata Wahakamwa ya Byoshe Yehova nendeka ngwendi: “Ou muzimbu wa kusompa unatalesa ku bamyata ba mu Jelusalema na bakunjibo ya Isalele boshe baje bali muno mu nganda.”’

11 “Endeka ngwobe, ‘Njinapu cimweso kuli yeni. Byuma binjinalingi, bikebyo bikalingiwa kuli bakebo. Bakaya mu bufunge, mu bundungo. 12 Mwata uje ali hakati kabo akambata bitenga byendi ha citsili cendi na kuya oku kunazibala. Akatuba mbengwa mu cibumbe na kwitamo na bitenga byendi. Akafwika ku mesho mangana keti amone hasi.’ 13 Njikamutela bwanda, co akatsa ha bwanda bunjikamutela. Njikamutwala ku Babiloni, ku lifuti lya baKaudiya, oloni kakalimono, co okwo bene kukekwo kwakatsila. 14 Co boshe baje banamuzengeleka, baka-kumukwasa na maswalale bendi njikabashandwela ku mitambela yoshe, co njikashomona mukwale na kubakilimisa. 15 Co bakazibuka ngwabo yange Yehova munjikabashandwela mukati ka baka-mafuti na mukati ka mafuti. 16 Oloni bamo njikabobola ku mukwale, na ku njala yakama na ku mushongo wa kulitambwisa mangana bakambulule bya bilinga byabo bya bunyengwe ku baka-mafuti kuje kubakaya. Co bakazibuka ngwabo yange Yehova.”

17 Co Yehova wanjilekele lalo ngwendi: 18 “Muna munu, unapande kulya byakulya oku uli na kujaja na kunwa mema oku uli na kuziba lyoba na kulishoshomwena. 19 Leka banu bomu mu lifuti ngwobe, ‘Mwata Wahakamwa ya Byoshe Yehova nendeka ku banu bakala mu Jelusalema, mu lifuti lya Isalele ngwendi: “Bakalya byakulya byabo oku banalishoshomwena na kunwa mema oku baziba lyoba, mwafwa lifuti lyabo likapwa ngundu mwafwa ya lwozi lwa banu bakalamo. 20 Binganda mubakala, bakabinyongesa, co lifuti likabihya, co mukazibuka ngweni yange Yehova.”’”

21 Co Yehova wanjilekele lalo ngwendi: 22 “Muna munu, mu Isalele muli cisimo ca kwendeka ngwabo, ‘Matangwa mu kwita, oloni bimona byoshe kubyesi na kulishulisilila.’ 23 Ngeci, baleke ngwobe, ‘Mwata Wahakamwa ya Byoshe Yehova nendeka ngwendi: “Njikamanesa ei endekesi, co eci cisimo kubakacendeka lalo mu Isalele.”’ Oloni baleke ngwobe, ‘Matangwa ali muyehi, co bimona byoshe bikalishulisilila.’ 24 Mwafwa bimona bya makuli kubikakalako, co lalo bakunjibo ya Isalele kubakomikiya. 25 ‘Mwata Wahakamwa ya Byoshe Yehova nendeka ngwendi, “Mwafwa yange Yehova njikendeka. Byoshe binjikendeka, njikabilinga kwa kujeneka kukotokela. Mu matangwa eni, eni baka-kutengulukila, njikendeka lijwi na kulinga binjinendeka.”’”

26 Yehova wanjilekele lalo ngwendi: 27 “Muna munu, banu ba Isalele bali na kwendeka ngwabo, ‘Cimona cali na kumona cambata simbu yailaha asina cikalishulisilile, co bupolofweto bwali na kupolofweta bukalishulisilila kulutwe manene.’ 28 Ngeci baleke ngwobe, ‘Mwata Wahakamwa ya Byoshe Yehova nendeka ngwendi: “‘Majwi ange oshe kuwakakotokela kulishulisilila. Byoshe binjinendeka bikalishulisilila,’ ngwendi Mwata Wahakamwa ya Byoshe Yehova.”’”

13 Co Yehova wanjilekele lalo ngwendi: 2 “Muna munu, polofweta byuma bikalingiwa ku tupolofweto ba mu Isalele, co leka baje bali na kupolofweta bya mu mitwe yabo* ngwobe, ‘Zibeni lijwi lya Yehova. 3 Mwata Wahakamwa ya Byoshe Yehova nendeka ngwendi: “Banabindama tupolofweto ba bilema baje bakakabangeya bimbunge byabo nga kubamwene cimona. 4 Obe Isalele, tupolofweto bobe banapu ngwe bimbanje ba mu bingundu. 5 Kumukai na kutungulula mitambela ije inapujuka ha bibumbe bya mamanya bya bakunjibo ya Isalele, mangana Isalele keti akatwaleleleho kulwa nzita ha litangwa lya Yehova.” 6 “Banamono bimona bya makuli, co banapolofweta byuma bya makuli, co lalo bali na kwendeka ngwabo, ‘Yehova nendeka ngwendi,’ okuni Yehova kabatumine, co banabandamena kumona majwi abo muwalishulisilila. 7 Munamono bimona bya makuli, co munapolofweta byuma bya makuli mumunendeka ngweni, ‘Yehova nendeka ngwendi,’ okuni byahi binjinamileke.”’

8 “‘Mwata Wahakamwa ya Byoshe Yehova nendeka ngwendi: “‘Munendeka makuli, co lalo bimona byeni binapu bya makuli, ngeci njimilwisa,’ ngwendi Mwata Wahakamwa ya Byoshe Yehova.” 9 Liboko lyange likalwisa tupolofweto baje bali na kumona bimona bya makuli na kupolofweta byuma bya makuli. Kubakakala hakati ka banu banjazema, co lalo kubakabasoneka mu libulu lya bakunjibo ya Isalele nambe kwiluka mu lifuti lya Isalele, co mukazibuka ngweni yange Mwata Wahakamwa ya Byoshe Yehova. 10 Byoshe ebi bili na kulingiwa mwafwa banongumuna banu bange ha kubaleka ngwabo, “Kuli kwoloka!” okuni kwoloka kwahi. Mubatunga cibumbe ca kujeneka kukola bakwitaho bulombo bwa kutoka.’*

11 “Leka baje bali na kukwita bulombo bwa kutoka ha cibumbe ngwobe cibumbe cikawa. Nyonzi yakama ikaija, nyonzi ya mamanya ikanyoka, co lihunzi lyakama likawisa cibumbe. 12 Co cibumbe mucikawa bakamihula ngwabo, ‘Buje bulombo bumwakwitile bunakwasa bika?’

13 “Ngeci Mwata Wahakamwa ya Byoshe Yehova nendeka ngwendi: ‘Njikahuwisa lihunzi lyakama na kunyokesa nyonzi yakama mwafwa njinalubala. Njikanyokesa nyonzi ya mamanya mangana ibujule cibumbe mwafwa njinalubala manene. 14 Njikabujula cibumbe cije cimwakwitile bulombo bwa kutoka na kuciwisila hasi, co banu bakamona lubula lwaco. Nganda muikasiuka, mukatsila muje mu nganda, co mukazibuka ngweni yange Yehova.’

15 “‘Munjikajukwila butenu bwange ha cibumbe na hali baje banakala na kucikwita bulombo bwa kutoka, njikamileka ngwange: “Cibumbe cinanyongo, na baje banakala na kucikwita bulombo bwa kutoka bananyongo. 16 Tupolofweto ba Isalele bananyongo, baje bakele na kupolofwetela Jelusalema na kumona bimona ngwabo akala mu kwoloka okuni kwoloka kwahi,”’ ngwendi Mwata Wahakamwa ya Byoshe Yehova.

17 “Oloni yobe muna munu tala bana ba banakazi ba banu bobe baje bali na kupolofweta bya mu mitwe yabo, co polofweta byuma bikalingiwa kuli bakebo. 18 Baleke ngwobe, ‘Mwata Wahakamwa ya Byoshe Yehova nendeka ngwendi: “Munabindama eni banakazi muli na kutunga tumikole twa ku maboko* na binanga bya ku mitwe bya bulaha bwa kuliseza-seza mangana muyombe myonyo ya banu. Kuma muli na kuyomba myonyo ya banu bange na kunyungilila myonyo yeni ndi? 19 Muli na kunjishaula hakati ka banu mwafwa ya maboko a kushula a mbali na bimbazubwila bya makende. Muli na kutsiya banu baje kubapandele kutsa na kuseza baje banapande kutsa. Muli na kulinga ngoco ha kukwisa banu bange baje bali na kutolilila ku biñanda byeni bya makuli.”’

20 “Mwata Wahakamwa ya Byoshe Yehova nendeka ngwendi: ‘Eni banakazi njimyana kashitiko mwafwa yotu tumikole tweni tuje tumuli na kupangesa mu kuyomba banu ngwe muli na kuyomba tuzila. Njikatumbitozola ku maboko eni na kupatula banu baje bamuli na kuyomba ngwe tuzila. 21 Njikatabozola binanga byeni na kwobola banu bange mu maboko eni, co mumukabayomba kumukabakwata lalo, co mukazibuka ngweni yange Yehova. 22 Mwafwa munazeyesa mbunge ya munu wa kusungama na makuli eni okuni yange kunjashakele ngwange akale mu bukalu,* co munakanyamesa maboko a muka-bubi mangana keti aseze bingila byendi byabibi ngeci atwaleleleho kuyoya. 23 Ngeci eni banakazi, kumukamono lalo bimona bya makuli nambe kuumikiya, co njikobola banu bange mu maboko eni, co mukazibuka ngweni yange Yehova.’”

14 Co bakulunu ba Isalele bamo bezile na kutumama kulutwe lwange. 2 Co Yehova wanjilekele ngwendi: 3 “Muna munu, aba banu banangula kukabangeya tumponya babo ba bunyengwe,* co banaka citanwiso cije cili na kulingisa banu balinge bubi. Kuma njinapande kubecela banjihule ndi? 4 Endeka nabo na kubaleka ngwobe, ‘Mwata Wahakamwa ya Byoshe Yehova nendeka ngwendi: “Nga kaIsalele nangula kukabangeya tumponya bendi ba bunyengwe na kwaka citanwiso cije cilingisa banu balinge bubi, kutundaho aija na kwihula kapolofweto, yange Yehova njimukumbulula muje munapande kwesekesa na tumponya bendi ba bunyengwe babangi. 5 Mwafwa njikalingisa bakunjibo ya Isalele bazibe lyoba, mwafwa boshe bananjiseze na kukabangeya tumponya babo ba bunyengwe.”’

6 “Co leka bakunjibo ya Isalele ngwobe, ‘Mwata Wahakamwa ya Byoshe Yehova nendeka ngwendi: “Ilukeni, co tundeni ku tumponya beni ba bunyengwe na kwecela bilinga byeni byoshe bya bunyengwe. 7 Mwafwa nga kaIsalele nambe muka-kwija uje ali na kuyoya mu Isalele alyangununa kuli yange, co akabangeya tumponya bendi ba bunyengwe na kwaka citanwiso cije cilingisa banu balinge bubi, co kutundaho aija na kwihula kapolofweto kange, co yange Yehova njimukumbulula. 8 Njikalwisa owo munu na kumupwisa cakumwenako ku bakwabo na cisimo cibendeka banu, co njikamutsiya, co mukazibuka ngweni yange Yehova.”’

9 “‘Oloni nga kapolofweto bamukwisa, co akumbulula uje munu, co yange Yehova njakwisi uje kapolofweto. Co njikolola liboko lyange na kumutsiya mangana keti akale mukati ka banu bange baIsalele. 10 Bakakala na milonga. Mulonga wa muka-kwihula ukapwa hamolika na mulonga wa kapolofweto, 11 mangana bakunjibo ya Isalele keti batunde kuli yange, co lalo becele kulijwalesa bakebo babenya, co bakapwa banu bange, co yange njikapwa Njambi yabo,’ ngwendi Mwata Wahakamwa ya Byoshe Yehova.”

12 Co Yehova wanjilekele ngwendi: 13 “Muna munu, nga banu mu lifuti balinga bubi ku mesho ange ha kupwa ba kujeneka kulongwa, co njolola liboko lyange na kubalwisa na kubalingisa keti bakale na byakulya,* co njibatumina njala na kutsiya banu na bimuna bomu mu lifuti.” 14 “‘Nameme ngwe aba banalume batatu, Nowa na Daniele na Yombi, ngwe bakele omu mu lifuti, ngwe basele lika kulyobola bakebo babenya mwafwa ya kusungama kwabo,’ ngwendi Mwata Wahakamwa ya Byoshe Yehova.”

15 “‘Nameme ngwe njilingisa bikashama ba bukalu baite omu mu lifuti na kulingisa banu batepuluke,* na kulingisa eli lifuti lipwe ngundu mangana keti kukale aitamo mwafwa yaba bikashama, 16 njilisinga ha kuyoya kwange ngwange, nameme bene ngwe aba banalume batatu bakele omu mu lifuti, ngwe kubasele kwobola bana babo ba banalume nambe ba banakazi, ngwe banasa kulyobola lika bakebo babenya, co lifuti ngwe linapu ngundu,’ ngwendi Mwata Wahakamwa ya Byoshe Yehova.”

17 “‘Nameme ngwe njinena mukwale aha ha lifuti na kwendeka ngwange: “Mukwale wite mu lifuti,” na kutsiya banu na bimuna, 18 nameme bene ngwe aba banalume batatu bakele omu mu lifuti, njilisinga ha kuyoya kwange ngwange ngwe kubasele kwobola bana babo ba banalume nambe ba banakazi. Ngwe banasa lika kulyobola bakebo babenya,’ ngwendi Mwata Wahakamwa ya Byoshe Yehova.”

19 “‘Nameme nga njituma mushongo wa kulitambwisa omu mu lifuti na kwitilamo butenu bwange na kutsiya banu babangi na bimuna babangi, 20 nameme bene ngwe Nowa na Daniele na Yombi bakele omu mu lifuti, njilisinga ha kuyoya kwange ngwange ngwe kubasele kwobola bana babo ba banalume nambe ba banakazi. Ngwe banalyobola lika bakebo babenya mwafwa ya kusungama kwabo,’ ngwendi Mwata Wahakamwa ya Byoshe Yehova.”

21 “Mwafwa ebi bikebyo byanendeka Mwata Wahakamwa ya Byoshe Yehova ngwendi: ‘Omu mukemwo mubikafwa munjikatuma tushitiko twange tuwana hali Jelusalema. Njikaitumina mukwale, njala yakama, bikashama ba bukalu na mushongo wa kulitambwisa. 22 Oloni bana bamo ba banalume na ba banakazi baje bakasala mu nganda, bakoboka, co bakabatundisamo. Bakaija kuli yeni, co mumukamona bingila byabo na bilinga byabo mukazibisisa binanjilingisa njinene bukalu hali Jelusalema. Mukazibisisa byuma byoshe binjinailingi.’”

23 “‘Mumukamona bingila byabo na bilinga byabo, mukazibisisa, co mukazibuka ngweni kunjabanenelele lika bukalu kwa kujeneka mulonga,’ ngwendi Mwata Wahakamwa ya Byoshe Yehova.”

15 Yehova wanjilekele ngwendi: 2 “Muna munu, muti wa binyu walisezela haka na muti weka nambe minango ya miti ya mu shwata? 3 Kuma citi cawo basa kucipangesa bipangi bimo ndi? Kuma banu basa kushongaho mbambo ya kushukika byuma ndi? 4 Taleni, bacumbila mu tuhya na kucipwisa cikuni, co tuhya twenyeka ku bishongo byaco na kucibabula hakati, co kubasa kucipangesa cipangi coshe-coshe. 5 Nameme mucapwile ca mutunu kubasele kucipangesa cipangi coshe-coshe. Co cipanga bikoni munima ya kubabuka na kwenya?”

6 “Mwata Wahakamwa ya Byoshe Yehova nendeka ngwendi: ‘Ngecilika munjinapwisa muti wa binyu kupwa bikuni mukati ka miti yoshe ya mu shwata, mukemwo munjikalingila banu bakala mu Jelusalema. 7 Njikabalwisa. Banoboka ku tuhya, oloni tuhya tuketwo tukabenyeka. Co munjikabalwisa mukazibuka ngweni yange Yehova.’”

8 “‘Co eli lifuti njikalipwisa ngundu mwafwa banonowa kupwa ba kulongwa,’ ngwendi Mwata Wahakamwa ya Byoshe Yehova.”

16 Yehova wanjilekele lalo ngwendi: 2 “Muna munu, leka Jelusalema bilinga byendi bya bunyengwe. 3 Unapande kwendeka ngwobe, ‘Mwata Wahakamwa ya Byoshe Yehova nendeka kuli Jelusalema ngwendi: “Yobe watunda ku lifuti lya baKanana, co kukekwo kuwasemukilile. Isho wapwile kaAmoli, co noko wapwile kaHiti. 4 Co ha litangwa liwasemukile, ñowa yobe kubaibatwile, co lalo kubakutanesele na mema mangana ujele. Kubakukwitile mwongwa, co lalo kubakuzengelele mu binanga. 5 Naumo wahi wakuzibilile ngozi mangana akulingile ebi byuma. Wahi wakuzibilile mema ku mbunge, oloni bakumbilile mu shwata mwafwa bakuzindile ha litangwa liwasemukile.

6 “‘“Munjakele na kwita, njakumwene uli na kulinjandungula mu maninga obe, co muwalalele mu maninga obe, njendekele ngwange: ‘Uyoya.’ Eyo njendekele kuli yobe oku unalala mu maninga obe ngwange: ‘Uyoya.’ 7 Njakupwisile mbunga yakama ngwe bimena bije bimena mu shwata, co wakolele na kupwa mumbanda. Co wakele na kuzala byuma bya kulicakeya byabibwa. Mabele obe akolele, co binkambu byobe nabyo byakolele, oloni anga wacikele mushelengwa.”’

8 “‘Munjakele na kwita, njakumwene, co njanangukile ngwange unakolo, co unapuho kukumwesa cizemo. Ngeci njakufwikile cizalo cange mangana njifwike mushelengwa wobe, co njalisingile na kulinga nobe cikumiiyo, co wapwile wange,’ ngwendi Mwata Wahakamwa ya Byoshe Yehova. 9 ‘Kutundaho, njakutanesele na kutundisa maninga obe, co njakukwitile mazi. 10 Njakuzikile cizalo ca kutaleka na kukwana masanda a cilambu cacibwa* na kukubungila mu lineni yaibwa, co njakuzikile bizalo bya kutula. 11 Njakuzikile byuma bya kulicakeya na kukuzika maseka ku maboko obe na lilyenge mu singo yobe. 12 Co lalo njakwakele riñi ku lijulu na masikiyo ku matwi na kukuzika cilongo cacibwa ku mutwe. 13 Co watwaleleleleho kulicakeya byuma bya goudi na siuva, co bizalo byobe byapwile bya lineni yaibwa na binanga bya kutula na bizalo bya kutaleka. Fulawa yaibwa na buki na mazi, bikebyo biwakele na kulya, co wakolele na kupwa uwamubwa manene, co wapandele kupwa lishano.’”

14 “‘Lutsimo* lwobe lwajalakanene mukati ka baka-mafuti mwafwa ya bubwa bwobe. Bubwa bwobe kubwakele na kapenga mwafwa yange njakulingisile upwe uwamubwa manene,’ ngwendi Mwata Wahakamwa ya Byoshe Yehova.”

15 “‘Oloni washangumukile kukulahela bubwa bwobe, co wapwile lihule mwafwa ya lutsimo lwobe. Walingile buhule camulingila na munu woshe wakele na kwita mu ngila, co bubwa bwobe bwapwile bwendi. 16 Wambatele bizalo byobe bimo bya mibala yaibwa na kukabipangesa mu kubwahesa myela ya kulunduka kuje kuwakalingilile buhule. Ebi byuma kubyapandele kulingiwa, co lalo kubyapandele kukalingiwa. 17 Co lalo wambatele byuma byobe bya senga bya goudi na siuva bije binjakwanene na kupangaho tumponya ba banalume na kulinga nabo buhule. 18 Co wambatele bizalo byobe bya kutaleka na kubafwikabyo,* co wabanene mazi ange na isense yange. 19 Co likende lije linjakwanene lya kupanga ha fulawa yaibwa na mazi na buki, lije linjakwanene ngwange ulye, nalyo walyanene kuli aba tumponya mangana linene lwengo lwalubwa. Ebi bikebyo bene biwalingile,’ ngwendi Mwata Wahakamwa ya Byoshe Yehova.”

20 “‘Wambatele bana bobe ba banalume na ba banakazi baje bawanjikitilile na kubalambula ku tumponya. Kuma bilinga byobe bya buhule kubyatubakanesele ndi? 21 Watsiile bana bange ba banalume na kubana kupwa milambu ha kubenyeka mu tuhya. 22 Muwakele na kulinga bilinga byobe bya bunyengwe na bilinga byobe bya buhule kuwanukile matangwa awapwile mwanike muwakele mushelengwa oku ulinjandungula mu maninga obe. 23 Lubinda lwobe, eyo lubinda lwobe, mwafwa unalingi ebi byuma byoshe byabibi,’ ngwendi Mwata Wahakamwa ya Byoshe Yehova. 24 ‘Walipangelele malundu na myela ya kulunduka mu myela ya mbunga yoshe. 25 Unatungila myela yobe ya kulunduka mu myela ya kutsimana manene, mu bitapalo byoshe, co unalingisa bubwa bwobe butenguluke kupwa cuma ca bunyengwe ha kulyana ku munu woshe aita mu ngila, co bilinga byobe bya buhule binatumu. 26 Walingile buhule na bana ba Ijipiti ba banalume baje bawatunga nabo baje bakala na lishungu lyakama, co wanjilubalesele mwafwa ya bilinga byobe byabingi bya buhule. 27 Njikakulwisa na liboko lyange na kutepulula ku byakulya byobe na kukwana mu maboko a banakazi baje bakuzinda, bana ba baFilistiya ba banakazi baje bakomokele mwafwa ya bilinga byobe bya shwamwa.

28 “‘Wakalingile buhule na bana ba Asiria ba banalume mwafwa kuwajaukile, oloni munima ya kulinga nabo buhule anga bene kuwajaukile. 29 Ngeci watwaleleleleho kulinga buhule mu lifuti lya baka-mingoso* na kulinga buhule na baKaudiya. Nameme ngoco, anga bene kuwajaukile. 30 Mbunge yobe yakele na kubinja* muwakele na kulinga ebi byuma byoshe, muwakele na kulinga ngwe lihule wa kujeneka shwamwa,’ ngwendi Mwata Wahakamwa ya Byoshe Yehova. 31 Oloni muwalipangelele malundu mu myela ya kutsimana mu bitapalo byoshe, na myela ya kulunduka mu myela ya mbunga yoshe, kuwapwile ngwe lihule mwafwa wakele na kubyana kukufweta. 32 U munakazi wa cikoi uje akai ku banu beka na kuseza munalume wendi. 33 Banu bakana bwana mahule boshe, oloni yobe uli na kwana bwana boshe baje bali na kukushungwiya, co uli na kubajamba mangana baije kuli yobe, co lalo uli na kubajamba mangana batunde ku mitambela yoshe bakulinge nobe buhule. 34 Unaliseze na banakazi bakweni baje bakalingi buhule. Naumo wahi akalingi buhule ngwe muuli na kubulinga. Yobe ukafwete bakweni, co bakebo kubesi kukufweta. Buhule bwobe bunaliseze nobu bwa bakweni.’

35 “Ngeci, obe lihule tolilila lijwi lya Yehova. 36 Mwata Wahakamwa ya Byoshe Yehova nendeka ngwendi: ‘Omwo unakala na lishungu lyakama manene, co bushwamwa bwobe bunasholoka muunakala na kulinga buhule na mapangala bobe na tumponya bobe ba bunyengwe,* baje baunana mulambu wa maninga a bana bobe ba banalume, 37 ngeci njikakungulwila hamo mapangala bobe boshe baje bawazibisile kubwaha, boshe baje bawazemene na baje bawazindile. Njikabakungulwila hamo kutunda ku mitambela yoshe mangana bakulwise, co njikakushulwila ha mesho abo, co bakamona bushwamwa bwobe bwoshe.

38 “‘Co njikakusompa na kukwana kashitiko kaje kanapande banakazi baje bakalingi bukoi na banakazi baje baketile maninga, co baketila maninga obe mwafwa ya kulubala na lifuwa. 39 Njikakwana mu maboko abo, co bakapujula malundu obe na kusiula myela yobe ya kulunduka, co bakakushulula bizalo na kukunyeka byuma byobe bya kulicakeya byabibwa na kukuseza mushelengwa. 40 Bakakunenela mbunga ya banu, co bakakwasha mamanya na kukutsiya na mikwale yabo. 41 Bakenyeka binjibo byobe na tuhya na kukusompela ha mesho a banakazi babangi, co njikamanesa buhule bwobe, co ukecela kubafweta. 42 Njikatula matoto ange, co kulubala kwange kukahwa. Mbunge yange ikatula, co hakeho hakukahwila kulubala kwange.’

43 “‘Omwo kuwanukile matangwa obe a ku bwanike, co wanjilubalesele ha kulinga ebi byuma byoshe, hanwoni njikulingisa uliwane na bukalu butunda mu bingila byobe,’ ngwendi Mwata Wahakamwa ya Byoshe Yehova, ‘co kuukatwalelelaho kulinga byuma bya shwamwa na bilinga byobe byoshe bya bunyengwe.

44 “‘Tala! Woshe uje akendeka bisimo, akapangesa eci cisimo kuli yobe ngwendi: “Muli mwana muli ina!” 45 Unapu lika ngwe noko uje wazindile munalume wendi na bana bendi, co unapu ngwe bandokazi bobe baje bazindile bana babo na banalume babo. Noko wapwile kaHiti, co isho wapwile kaAmoli.’”

46 “‘Yayobe wa munakazi napu Samaliya uje ali ku kunto* na bana bendi ba banakazi,* co shongo yobe wa munakazi uje ali ku mbwela* napu Sodoma na bana bendi ba banakazi. 47 Kuwakabangeyeye lika bingila byabo na bilinga byabo bya bunyengwe, oloni mu kasimbu kakandondo lika, yobe walingile byuma byabibi manene kutubakana bibalingile bakebo. 48 Mwata Wahakamwa ya Byoshe Yehova nendeka ngwendi: ‘Njilisinga ha kuyoya kwange ngwange ndokazi yobe Sodoma na bana bendi ba banakazi kubalingile byuma biunalingi yobe na bana bobe ba banakazi. 49 Tala! Ou ukewo mulonga wa ndokazi yobe: Ikeye na bana bendi ba banakazi balyalesele, co bakele na byakulya byabingi, co lalo bakele mu kwoloka kwa kujeneka bishoti, oloni kubakwasele baka-kuyanda na tuhutu. 50 Batwaleleleleho kulijundula na kulinga byuma bya bunyengwe ku mesho ange. Ngeci njamwene ngwange kunapande kubanyongesa.

51 “‘Co lalo bubi bwalingile Samaliya kubwetele nambe ha hafu ya bubi buwalingile. Yobe watwaleleleleho kulinga byuma byabingi bya bunyengwe kutubakana bibalingile bakebo, kwetoni na ha simbu ibasholokele bandokazi bobe ngwe banu ba kusungama mwafwa ya bilinga byobe byoshe bya bunyengwe. 52 Ngeci shwamwa ikulye mwafwa unakundwiya bilinga bya bandokazi bobe. Omwo unalingi byuma bya bunyengwe byabingi kutubakana bakebo, banapwoni ba kusungama kutubakana yobe. Ngeci unashauka, co lalo shwamwa ikulye mwafwa unalingisa bandokazi bobe basholoke ngwe ba kusungama.’

53 “‘Co njikakungulula bafunge babo, bafunge ba Sodoma na bana bendi ba banakazi na bafunge ba Samaliya na bana bendi ba banakazi. Njikakungulula lalo bafunge bobe hamolika nabo, 54 mangana shwamwa ikakulye, co ukaziba shwamwa mwafwa ya byuma biunalingi mangana ubazembeleke. 55 Ndokazi yobe Sodoma na bana bendi ba banakazi bakapwa ngwe mubapwile ha kulibanga. Co lalo ndokazi yobe Samaliya na bana bendi ba banakazi nabo bakapwa ngwe mubapwile ha kulibanga, co nobe na bana bobe ba banakazi mukapwa ngwe mumwapwile ha kulibanga. 56 Ha litangwa liwalyalesele kuwapandele nambe kwendeka bya ndokazi yobe Sodoma, 57 simbu kanda bubi bwobe busholoke. Hanwoni bana ba Siria ba banakazi na baje batunga nabo bali na kukushaula. Co bana ba Filistiya ba banakazi baje boshe banakuzengeleka bali na kukushendumuna. 58 Uliwana na bukalu butunda mu bilinga byobe bya shwamwa na bilinga byobe bya bunyengwe,’ mukemwo mwanendeka Yehova.”

59 “Mwafwa Mwata Wahakamwa ya Byoshe Yehova nendeka ngwendi: ‘Hanwoni njikulinga ngwe muunalingi, mwafwa unombwanesa biwalisingile kuli yange omwo unapokola cikumiiyo cinjalikumiiye nobe. 60 Oloni yange njikanuka cikumiiyo cinjalikumiiye nobe ku bwanike bwobe, co njikalinga nobe cikumiiyo ca myaka yoshe. 61 Ukanuka futisi yobe, co ukaziba shwamwa muukatambula bandokazi bobe, bayayobe hamolika na bishongo bobe. Co njikakwanabo mangana bapwe bana bobe ba banakazi, oloni kunjikalingi ngoco mwafwa ya cikumiiyo cinjalikumiiye nobe.’

62 “‘Co yange njikalinga nobe cikumiiyo, co ukazibuka ngwobe yange Yehova. 63 Ukanuka biwalingile, co ukaziba shwamwa kwashama mu kanwa na kwendeka mwafwa ukashauka munjikakonekela bubi bwobe nameme unalingi byuma byoshe ebi,’ ngwendi Mwata Wahakamwa ya Byoshe Yehova.”

17 Yehova wanjilekele lalo ngwendi: 2 “Muna munu, endeka kasau na kuta cisimo cije cinatalesa kuli bakunjibo ya Isalele. 3 Unapande kwendeka ngwobe, ‘Mwata Wahakamwa ya Byoshe Yehova nendeka ngwendi: “Ngonga wakama wa mambaba akama na mahunga amalaha, wa kushula mangona amibala yaibwa, wezile ku Lebanoni na kupokola munango wa mu mutwe wa muti wa sida. 4 Wapokwele munango wa mu mutwe wawo na kuutwala ku lifuti lya baka-mingoso, co wakaukunine mu nganda ya baka-mingoso. 5 Co wambatele mbuto imo ya muje mu lifuti na kukaikuna mu libu lya bwilo. Waikunine ngwe muti wa wilo kuyehi na mema amangi. 6 Ngeci, yamenene na kupwa muti wa binyu wawihi, co minango yawo yashalabele, co maputa awo atalesele mukati, co mizi yawo yatandele mwisi yawo. Ngeci wakolele na kupwa muti wa binyu na kukala na minango yaingi.

7 “‘“Co kwezile lalo ngonga wakama wa mambaba akama na mahunga amalaha. Co muti wa binyu uje wakele ha mihanga, watandelele mizi yawo kuli uje ngonga, co lalo watalesele minango yawo kuli ikeye mangana aushangelele. 8 Baukunine laja mu lihya lyalibwa kuyehi na mema amangi, mangana ukale na minango na kwima bushuka na kupwa muti wa binyu waubwa manene.”’

9 “Endeka ngwobe, ‘Mwata Wahakamwa ya Byoshe Yehova nendeka ngwendi: “Kuma ou muti ukola mwamubwa ndi? Kuma munu katetanga mizi yawo na kulingisa bushuka bwawo bubole na kulingisa minango yawo ije inajobelela ijujwame ndi? Ukoma manene, co kukukatondeka liboko lya nzili nameme banu babangi mangana bautukwile kumo na mizi yawo. 10 Nameme nga baukuna kweka, kuma ukola mwamubwa ndi? Kuma kuumu cau mulihuwilaho lihunzi lije litunda ku butuhukilo bwa litangwa ndi? Uma cau ha mihanga haunamene.”’”

11 Co Yehova wanjilekele lalo ngwendi: 12 “Leka aba baka-kutengulukila ngwobe, ‘Kuma kumwanangukile bibilumbununa ebi byuma ndi?’ Endeka ngwobe, ‘Taleni! Mwene wa Babiloni wezile ku Jelusalema na kwambata mwene wayo na bamyata bayo, co welukile nabo ku Babiloni. 13 Kutundaho, wambatele munu umo wa ku naanga ya bumwene na kulinga nendi cikumiiyo na kumulingisa alisinge. Co wambatele banu ba kutsimana ba muje mu lifuti, 14 mangana buje bumwene bunyekumuke, co keti bukale na nzili ya kwimana lalo, oloni butwaleleleho lika kukalako nga banyunga cikumiiyo cendi. 15 Oloni mamaneselelo mwene wa Juda watengulukilile mwene wa Babiloni ha kutuma tutumwa bendi ku Ijipiti mangana bakambate tubalu na cibunga cakama ca maswalale. Kuma byali na kulinga bibwaha ndi? Kuma ou ali na kulinga ebi byuma kubamwana kashitiko ndi? Kuma asa kupokola cikumiiyo na kutewa ndi?’

16 “‘Mwata Wahakamwa ya Byoshe Yehova nendeka ngwendi: “Njilisinga ha kuyoya kwange ngwange akatsila mu Babiloni, mu mwela mwakala mwene uje wamupwisile mwene, mwafwa wombwanesele byuma byalisingile na kupokola cikumiiyo cendi. 17 Co maswalale babangi ba Falo kubakamukwasa mu nzita omwo maswalale ba Babiloni bakalundula malundu a kulwisila nganda na kuizengeleka na bibumbe mangana banyongese banu babangi. 18 Nombwanesa byuma byalisingile, na kupokola cikumiiyo cibalikumiiye, nameme wakulahesele ngwendi anyunga cikumiiyo, oloni nalingi byuma byoshe ebi, co kakoboka.”’

19 “‘Ngeci, Mwata Wahakamwa ya Byoshe Yehova nendeka ngwendi: “Njilisinga ha kuyoya kwange ngwange njimunenela bukalu mwafwa ya kwombwanesa byalisingile, na kupokola cikumiiyo cange. 20 Njikamutela bwanda bwange, co akatsaho. Njikamutwala ku Babiloni na kukamusompesa, mwafwa kapwile wa kulongwa kuli yange. 21 Maswalale bendi boshe baje bali na kuyebangela bakatsa ku mukwale, co baje bakasalaho bakashandokela mu mitambela yoshe, co mukazibuka ngweni yange Yehova njinendekamo.”’

22 “‘Mwata Wahakamwa ya Byoshe Yehova nendeka ngwendi: “Njikapokola munango wa mu mutwe wa muti waulaha wa sida na kuukuna, co ku minango yawo ije ili na kujobelela, njikapotolako kamunango ka mu mutwe kandembendembe, co yange bene njikakakuna ha munkinda waulaha. 23 Co njikakakuna ha munkinda waulaha wa Isalele, co minango yako ikakola na kwima bushuka na kupwa muti wakama wa sida, co tuzila ba miyati yoshe bakakala mwisi yawo, na kukala mu munzinze wa maputa awo. 24 Co miti yoshe ya mu shwata ikazibuka ngwayo yange Yehova njinanyekumuna muti waulaha na kujundula muti wawihi. Yange njinomisa muti wa maputa a kuzibalela na kulingisa muti wa kuma ujobelele. Yange bene Yehova njinendekamo na kulingamo.”’”

18 Co Yehova wanjilekele lalo ngwendi: 2 “Eci cisimo cimuli na kwendeka mu Isalele ngweni, ‘Bisemi bakebo banali bushuka bwa binyu bwa kungangamena, oloni bana babo bakebo batsa ku mayo,’ cilumbununa bika?

3 “Mwata Wahakamwa ya Byoshe Yehova nendeka ngwendi, ‘Njilisinga ha kuyoya kwange ngwange kumukatwalelelaho kwendeka eci cisimo mu Isalele. 4 Taleni! Myonyo yoshe yapwa yange. Mwonyo wa cisemi na mwonyo wa mwana, yoshe yapwa yange. Mwonyo* uje ulinga bubi ukewo utsa.

5 “‘Munu wa kusungama alinga byuma bya kusungama na byuma byabibwa. 6 Kali milambu ibanana ku tumponya ha minkinda, nambe kukulahela tumponya ba bunyengwe* bakunjibo ya Isalele, nambe kujwalesa munakazi wa munu yatunga nendi, nambe kulilala na munakazi uje ali ku ngonde. 7 Kayandesa munu, oloni elwisa cuma ca munu uje nambata mukuli kuli ikeye cije canakwatelamo. Kebila munu, oloni ana byakulya kuli uje natsi njala na kuzika uje ali mushelengwa. 8 Katondo kumwakelaho cimo kuli munu uje nambata mukuli kuli ikeye nambe kutonda profiti ya kutubakanesa, oloni alinga byuma mwamubwa. Akakula mwamubwa ñanda ya munu umo na mukwabo, 9 na kutwalelelaho kukabangeya mashiko ange na kusompa kwange mangana alinge byuma mu kulongwa. Munu wa cifweci napu wa kusungama, co atwalelelaho kuyoya,’ ngwendi Mwata Wahakamwa ya Byoshe Yehova.

10 “‘Oloni nga uje munu akala na mwana wa mwizi nambe cikelemi, nambe uje akalingi byuma byeka byabibi, 11 (nameme ishe kalingile ebi byuma), oloni mwana alya milambu ibanana ku tumponya ha minkinda, na kujwalesa munakazi wa munu yatunga nendi, 12 na kuyandesa baje bali mu bujene na tuhutu, na kwibila banu byuma, na kujeneka kwilwisa cuma ca munu uje nambata mukuli kuli ikeye cije canakwatelamo, na kukulahela tumponya ba bunyengwe, na kulinga byuma bya bunyengwe, 13 na kutonda profiti ya kutubakanesa nambe kumwakelaho cimo kuli munu uje yanana mukuli, co owo mwana katwalelelaho kuyoya. Bamutsiya bene mwafwa yebi byuma byoshe bya bunyengwe byanalingi. Maninga endi akala mu mutwe wendi babenya.

14 “‘Oloni nga cisemi wa munalume ali na mwana wa munalume uje amona bubi bwoshe bwanalingi ishe, oloni ikeye kalingi byuma bya cifwoco nameme nabimono, 15 kali milambu ibanana ku tumponya ha minkinda, nambe kukulahela tumponya ba bunyengwe bakunjibo ya Isalele, nambe kujwalesa munakazi wa munu yatunga nendi, 16 kayandesa munu, kambatelela cuma ca munu uje nambata mukuli kuli ikeye cije canakwatelamo, nambe kwibila munu. Ana byakulya munu uje natsi njala na kuzika uje ali mushelengwa. 17 Kesi kulyatelela tuhutu, kesi kwambata profiti ya kutubakanesa nambe kutondelaho cimo ha byuma byanana kupwa mukuli, co akononoka kusompa kwange na kukabangeya mashiko ange. Munu wa cifweci katsi mwafwa ya bubi bwa ishe. Atwalelelaho kuyoya. 18 Oloni ishe atsa mwafwa ya bubi bwendi, mwafwa nalyapula banu na kwibila ndolome yendi na kulinga byuma byabibi ku bakwabo.

19 “‘Oloni yeni mukendeka ngweni: “Mwafwa bikoni mwana kubamwanena mulonga wa bubi bwa ishe?” Mwafwa mwana nalingi byuma byabibwa na bya kusungama, na kunyunga mashiko ange, na kuwononoka, ngeci atwalelelaho kuyoya. 20 Mwonyo* uje ulinga bubi ukewo utsa. Mwana kakala na mulonga wa bubi bwa ishe. Co ishe kakala na mulonga wa bubi bwa munendi. Kusungama kwa munu wa kusungama bakacitandela kuli ikeye lika. Co bubi bwa muka-bubi bakabutandela kuli ikeye lika.

21 “‘Co nga munu wamubi ecela kulinga bubi bwoshe bwanalingi na kutwalelelaho kunyunga mashiko ange na kulinga byuma byabibwa na bya kusungama, co atwalelelaho kuyoya. Katsi embwe. 22 Bubi bwoshe bwalingile kunjikamwanenabwo kashitiko.* Atwalelelaho kuyoya mwafwa nalingi byuma bya kusungama.’

23 “Mwata Wahakamwa ya Byoshe Yehova nendeka ngwendi: ‘Kuma njikazibi kubwaha nga muka-bubi atsa ndi? Kuma kunjashakele ngwange muka-bubi aseze bingila byendi mangana atwaleleleho kuyoya ndi?’

24 “‘Oloni nga munu wa kusungama ecela kulinga byuma bya kusungama na kushangumuka kulinga byuma byabibi,* byuma byoshe bya bunyengwe bibakalingi baka-bubi, kuma ayoya ndi? Nacimo cuma calingile ca kusungama cibakanuka cahi. Akatsa mwafwa ya bilinga byendi bya kujeneka kulongwa na bubi bwanalingi.

25 “‘Oloni mukendeka ngweni: “Ngila ya Yehova keti ya kusungama.” Tolilileni, eni bakunjibo ya Isalele! Kuma ngila yange ikeyo keti ya kusungama ndi? Kuma bingila byeni keti bikebyo bya kujeneka kusungama ndi?

26 “‘Nga munu wa kusungama ecela kulinga byuma bya kusungama na kushangumuka kulinga byuma byabibi, akatsa mwafwa ya kulinga ngoco. Eyo, akatsa mwafwa ya bilinga byendi byabibi.

27 “‘Co nga munu wamubi ecela bilinga byabibi byanalingi, na kushangumuka kulinga byuma byabibwa na byuma bya kusungama, co obola mwonyo* wendi. 28 Nga ananguka bubi bwoshe bwanalingi na kubwecela, co atwalelelaho kuyoya. Katsi embwe.

29 “‘Oloni bakunjibo ya Isalele bakendeka ngwabo: “Ngila ya Yehova keti ya kusungama.” Eni bakunjibo ya Isalele, kuma cili bene bingila byange keti bya kusungama ndi? Kuma bingila byeni keti bikebyo bya kujeneka kusungama ndi?’

30 “‘Ngeci njikasompa umo na umo weni kwesekesa na bingila byendi, eni bakunjibo ya Isalele,’ ngwendi Mwata Wahakamwa ya Byoshe Yehova. ‘Tengulukeni, eyo sezeni bingila byeni byabibi byoshe mangana keti bipwe citanwiso cije cimilingisa mukale na mulonga. 31 Eceleni bubi bweni bwoshe bumunalingi, co kaleni* na bimbunge byabiha na sipilitu yaiha, mwafwa bika bimutsila eni bakunjibo ya Isalele?’

32 “Mwata Wahakamwa ya Byoshe Yehova nendeka ngwendi: ‘Kunjesi kuziba kubwaha kumona munu woshe-woshe atsa. Ngeci tengulukeni mangana muyoye.’”

Wabutamene mukati ka bindumba ba nzili na kulela bana bendi.

 3 Umo wa bana balelele wakolele na kupwa ndumba wa kukanyama.

 5 Ina wabandamenene, oloni kukapwa muje, wamwene ngwendi munendi keluka.

Ngeci wambatele munendi mukwabo na kumupwisa muna ndumba wa kukanyama.

 6 Nendi wendanganene mukati ka bindumba bakwabo, co wapwile muna ndumba wa nzili.

Walilongesele kupapozola tusitu, co wakele na kubwonda na banu.

 9 Bamwakele mu camba kupangesa tulobo, co bamutwalele kuli mwene wa Babiloni.

Co bakamushokeleleleko kuje mangana keti azibike ku minkinda ya Isalele.

10 Noko wapwile ngwe muti wa binyu uje uli mu maninga obe,* uje ubakunine ku mema.

Wemine bushuka, co wakele na minango yaingi mwafwa ya aje mema amangi.

11 Wakele na minango ya kukanyama, ije ibasele kupangaho milamu ya baka-kuyula.

Minango yawo ya kukanyama baipokozwele, co yomine, co tuhya twayenyekele.

“‘Ou ukewo mwaso wa busiwa, co ukatsimana.’”

20 Co mu mwaka wa bu 7, mu ngonde yamucitanu, ha litangwa lya bu 10 omu mu ngonde, bakulunu bamo ba Isalele bezile na kutumama kulutwe lwange mangana bakwihule Yehova. 2 Co Yehova wanjilekele ngwendi: 3 “Muna munu, simutwiya na bakulunu ba Isalele ubaleke ngwobe, ‘Mwata Wahakamwa ya Byoshe Yehova nendeka ngwendi: “Kuma munaija na kunjihula ndi? ‘Njilisinga ha kuyoya kwange ngwange kunjimikumbulula,’ ngwendi Mwata Wahakamwa ya Byoshe Yehova.”’

4 “Muna munu, kuma walibwahesela kubasompa ndi? Kuma walibwahesela kubasompa ndi? Baleke byuma bya bunyengwe bibalingile bakukulwila babo. 5 Baleke ngwobe, ‘Mwata Wahakamwa ya Byoshe Yehova nendeka ngwendi: “Ha litangwa linjangwile Isalele njalisingile lalo na ku bana* ba ku njibo ya Jakobu, co njalizimbwile kuli bakebo mu lifuti lya Ijipiti. Eyo, njalisingile kuli bakebo ngwange, ‘Yange Yehova Njambi yeni.’ 6 Ha litangwa lije, njalisingile ngwange njikabatundisa mu lifuti lya Ijipiti na kubatwala mu lifuti linjabatondelele,* mu lifuti muje mwalisala mabele na buki. Eli lifuti lyapwile lyalibwa manene kutubakana mafuti oshe. 7 Co njabalekele ngwange, ‘Umo na umo weni napande kumbila kuti byuma bya bunyengwe* bije biwali na kushungwiya mesho endi. Keti mulijwalese na tumponya ba bunyengwe ba Ijipiti. Yange Yehova Njambi yeni.’

8 “‘“Oloni banjitengulukilile, co kubashakele kunjitolilila. Kubombilile kuti byuma bya bunyengwe bije biwashungwiiye mesho abo, co lalo kubasezele tumponya ba bunyengwe ba Ijipiti. Ngeci njabalekele ngwange njibetila butenu bwange na kubajukwila kulubala kwange kwoshe mu lifuti lya Ijipiti. 9 Oloni binjalingile, njabilingile mwafwa ya lizina lyange mangana keti balijwalese mukati ka baka-mafuti muje mubakele na kuyoya, mwafwa njalizimbwile kuli bakebo* kulutwe lwa aba baka-mafuti munjabatundisile* mu lifuti lya Ijipiti. 10 Mukemwo njabatundisile mu lifuti lya Ijipiti na kubatwamenena mu mambo.

11 “‘“Ngeci njabanene mashiko ange, co njabalekele kusompa kwange mangana uje abikabangeya ase kuyoya. 12 Co lalo Njabanene bisabata byange mangana bipwe cizibukiso mukati kange nabo mangana base kuzibuka ngwabo yange Yehova, yange njili na kubajelesa.

13 “‘“Oloni bakunjibo ya Isalele banjitengulukile mu mambo. Kubakabangeyeye mashiko ange, co babyanene kusompa kwange kuje kulingisa munu ayoye nga abikabangeya. Bajwalesele bisabata byange, ngeci njabalekele ngwange njibetila butenu bwange mu mambo mangana njibanyongese. 14 Oloni binjalingile, njabilingile mwafwa ya lizina lyange mangana keti balijwalese mukati ka baka-mafuti baje babamwene munjabatundisile* mu Ijipiti. 15 Co lalo njalisingile kuli bakebo mu mambo ngwange kunjibakobelesa mu lifuti linjabanene, mu lifuti muje mwalisala mabele na buki, lifuti lyalibwa manene kutubakana mafuti oshe. 16 Mwafwa babyanene kusompa kwange, co kubakabangeyeye mashiko ange, co lalo bajwalesele bisabata byange mwafwa bimbunge byabo byakele na kukaba tumponya babo ba bunyengwe.

17 “‘“Oloni njabazibilile ngozi, co kunjabanyongesele, kunjabanyongeselele mu mambo. 18 Njalekele bana babo mu mambo ngwange, ‘Keti mukabangeye mashiko a bakukulwila beni nambe kukabangeya kusompa kwabo nambe kulijwalesa na tumponya babo ba bunyengwe. 19 Yange Yehova Njambi yeni. Kabangeyeni mashiko ange na kukabangeya kusompa kwange, co byononokeni. 20 Jeleseni bisabata byange, co bipwa cizibukiso mukati kange neni mangana muzibuke ngweni yange Yehova Njambi yeni.’

21 “‘“Oloni bana babo banjitengulukilile. Kubakabangeyeye mashiko ange, co babyanene kukabangeya kusompa kwange kuje kulingisa munu ayoye nga abikabangeya. Bajwalesele bisabata byange, ngeci njabalekele ngwange njibetila butenu bwange na kubajukwila kulubala kwange kwoshe mu mambo. 22 Oloni kunjalingile ngoco. Njalingile binjalingile kutewa lizina lyange balishaula ku mesho a baka-mafuti baje babamwene munjabatundisilemo. 23 Co lalo njalisingile kuli bakebo mu mambo ngwange njikabashandwela mukati ka baka-mafuti na kubashandanganena mu mafuti, 24 mwafwa kubononokele kusompa kwange, co babyanene mashiko ange. Bajwalesele bisabata byange, co bakabangeyeye tumponya ba bunyengwe ba bakukulwila babo. 25 Co lalo njabecelelele bakabangeye mashiko aje kuwapwile amabwa na kusompa kuje kukwasa kubayoyesa. 26 Njabecelelele mangana balijwalese na milambu yabo babenya omwo benyekele bantwatwa babo boshe mu tuhya mangana banyonge ngeci bazibuke ngwabo yange Yehova.”’

27 “Ngeci obe muna munu, simutwiya na bakunjibo ya Isalele na kubaleka ngwobe: ‘Mwata Wahakamwa ya Byoshe Yehova nendeka ngwendi: “Omu mukemwo lalo mubanjishawile bakukulwila beni omwo bonowele kupwa ba kulongwa kuli yange. 28 Njabatwalele mu lifuti linjalisingile ngwange njibana. Mubamwene malundu oshe amalaha na miti ya maputa amangi bashangumukile kwana milambu na bwana bwabo buje bwanjilubalesele. Banene milambu yabo ya lwengo lwalubwa na kwitila bwana bwabo bwa byakunwa. 29 Ngeci njabehwile ngwange: ‘Ou mwela wa kulunduka kumukai wa bika? (Na lelo lino bacili na kuusana ngwabo Mwela wa Kulunduka.)’”’

30 “Co ya ukaleke bakunjibo ya Isalele ngwobe, ‘Mwata Wahakamwa ya Byoshe Yehova nendeka ngwendi: “Kuma muli na kulijwalesa ngwe mubalijwalesele bakukulwila beni omwo bakele na kukabangeya tumponya babo ba bunyengwe mangana balinge nabo buhule bwa ku sipilitu ndi? 31 Kuma mucili na kulijwalesa lalo kweta na lelo lino ha kwana milambu tumponya beni boshe ba bunyengwe omwo muli na kwenyeka bana beni boshe ba banalume mu tuhya ndi? Eni bakunjibo ya Isalele, kuma njinapande kumikumbulula oku muli na kulinga ebi ndi?”’

“Mwata Wahakamwa ya Byoshe Yehova nendeka ngwendi,‘Njilisinga ha kuyoya kwange ngwange kunjimikumbulula. 32 Co bimukasinganyeka kubikalingiwa mumukendeka ngweni, “Tuyeni tupwe ngwe baka-mafuti, ngwe binaanga bya mafuti eka bije bikalombela* miti na mamanya.”’”

33 “Mwata Wahakamwa ya Byoshe Yehova nendeka ngwendi, ‘Njilisinga ha kuyoya kwange ngwange njimiyula ngwe mwene na liboko lyange lya nzili na kukanyama na kumitila butenu bwange. 34 Njikamitundisa mukati ka miyati ya banu na kumikungulwila hamo kutunda mu mafuti muje mumwashandokelele. Njikalinga ngoco na liboko lya nzili lya kukanyama na butenu. 35 Njikaminena mu mambo ya baka-mafuti, co yange bene njikamisompesa.

36 “‘Ngecilika munjasompesele bakukulwila beni mu mambo ya mu lifuti lya Ijipiti, neni njikamisompesa,’ ngwendi Mwata Wahakamwa ya Byoshe Yehova. 37 ‘Njikamilingisa mwite mwisi ya mulamu wa kanyungi na kumilingisa munyunge cikumiiyo. 38 Oloni njikatundisa baka-kutengulukila hakati keni na baje bali na kulinga bubi kuli yange, mwafwa njikabatundisa mu lifuti lyambala mubakele, oloni kubakakobela mu lifuti lya Isalele, co mukazibuka ngweni yange Yehova.’

39 “Oloni yeni bakunjibo ya Isalele, Mwata Wahakamwa ya Byoshe Yehova nendeka ngwendi, ‘Umo na umo weni aye akapangele tumponya bendi ba bunyengwe. Oloni zibukeni ngweni nga kumushangumuka kunjononoka, simbu ikaija omwo kumukajwalesa lalo lizina lyange lya kujela na milambu yeni na tumponya beni ba bunyengwe.’

40 “Mwata Wahakamwa ya Byoshe Yehova nendeka ngwendi: ‘Bakunjibo ya Isalele boshe, boshe bakanjipangela ku munkinda wange wa kujela, ha munkinda waulaha wa Isalele mu lifuti lya Isalele bakanjizibisa kubwaha, co njikatonda milambu yeni na bushuka bwa kulibanga bwa bwana bweni na byuma byeni byoshe bya kujela. 41 Mukanjizibisa kubwaha mwafwa ya lwengo lwalubwa. Ebi bikalingiwa munjikamitundisa mukati ka baka-mafuti na kumikungulwila hamo kutunda mu mafuti mwoshe mumwashandokelele. Njikamimwesa ngwange njapwa nji wa kujela, co baka-mafuti nabo bakamona ngwabo njapwa nji wa kujela.’

42 “‘Co mukazibuka ngweni yange Yehova munjikaminena mu lifuti lya Isalele, mu lifuti lije linjalisingile kuli bakukulwila beni ngwange njibanalyo. 43 Co mumuketa kuje mukanuka futisi yeni na bilinga byeni byoshe bimwalijwalesele nabyo, co mukalizinda yeni babenya mwafwa ya byuma byabibi byoshe bimwalingile. 44 Co mukazibuka ngweni yange Yehova munjikalinga ebi byuma mwafwa ya lizina lyange, keti kwesekesa na futisi yeni yaibi nambe kwesekesa na bilinga byeni byabibi, eni bakunjibo ya Isalele,’ ngwendi Mwata Wahakamwa ya Byoshe Yehova.”

45 Co Yehova wanjilekele lalo ngwendi: 46 “Muna munu, talesa ku mbwela,* co endeka ku mbwela na kupolofwetela shwata ya ku mbwela. 47 Leka shwata ya ku mbwela ngwobe, ‘Tolilila lijwi lya Yehova. Mwata Wahakamwa ya Byoshe Yehova nendeka ngwendi: “Njikushwamekela tuhya. Otu tuhya tukenyeka miti yobe yoshe ya kutonola na miti yobe yoshe ya kuma. Milangi yatwo kubakasa kuizima, co tukababula bihanga byoshe kutunda ku mbwela* kuya ku kunto.* 48 Co banu boshe bakamona ngwabo yange Yehova, yange njatushwameka, co wahi akasa kutuzima.”’”

49 Co njendekele ngwange: “Kekange, Mwata Wahakamwa ya Byoshe Yehova! Bali na kunjendeka ngwabo, ‘Ali na kwendeka mu binguli.’”

21 Yehova wanjilekele lalo ngwendi: 2 “Muna munu, talesa ku Jelusalema na kwendeka byuma bikalingiwa ku myela ya kujela na kupolofweta byuma bikalingiwa ku lifuti lya Isalele. 3 Leka lifuti lya Isalele ngwobe, ‘Yehova nendeka ngwendi: “Njikulwisa, co njishomona mukwale wange mu cindalo cawo na kutsiya banu ba kusungama na banu bababi muli yobe. 4 Njikashomona mukwale wange mu cindalo cawo mangana ulwise banu boshe, kutunda ku mbwela* kutwala ku kunto,* mwafwa njikatsiya banu ba kusungama na banu bababi. 5 Banu boshe bakazibuka ngwabo yange bene Yehova njinashomona mukwale wange mu cindalo cawo. Kunjikawilwisamo lalo.”’

6 “Co yobe muna munu, teta oku uli na kujaja, eyo teta manene kulutwe lwabo. 7 Co nga bakwihula ngwabo, ‘Bika biuli na kuteta?’ Bakumbulule ngwobe, ‘Mwafwa ya muzimbu uli na kwija.’ Mwafwa ou muzimbu ukaija bene, co bimbunge byoshe bikalijujukila manene, co maboko oshe akatepama. Banu boshe* bakazeya, co ha mabuli hoshe hakandweka mema.* Mwata Wahakamwa ya Byoshe Yehova nendeka ngwendi, ‘Tala! Byuma biunazibi bikalishulisilila, bikalingiwa bene.’”

8 Yehova wanjilekele lalo ngwendi: 9 “Muna munu, polofweta na kwendeka ngwobe, ‘Yehova nendeka ngwendi: “Endeka ngwobe, ‘Mukwale! Mukwale banawotola na kuukwakula. 10 Banawotola mangana wase kutsiya banu babangi, na kuukwakula mangana wase kubyakula ngwe muhyato.’”’”

“Kuma kutwapandele kubwahelela ndi?”

“‘Kuma ubyana* mulamu wa munange ngwe muuli na kubyana miti yoshe ndi?

11 “‘Njinabanawo mangana baukwakule na kuupangesa. Ou mukwale banawotola na kuukwakula mangana bawane mu liboko lya muka-kutsiya.

12 “‘Muna munu, lila na kumbolozoka mwafwa mukwale unezila banu bange. Unaija na kulwisa bamyata ba Isalele. Ou mukwale unaija na kulwisa banu bange. Ngeci, pupa litafu lyobe mu kumwesa busiwa. 13 Mwafwa banu bange banabelula. Bika bikalingiwa nga mukwale ubyana mulamu? Kuukakalako,’* ngwendi Mwata Wahakamwa ya Byoshe Yehova.

14 “Muna munu, polofweta na kukanda maboko obe. Co endeka lutatu ngwobe ‘Mukwale!’ Unapu mukwale wa kutsiisa, mukwale unatsii banu babangi, mukwale uje unabazengeleka. 15 Bimbunge byabo bikalijujukila manene, co banu babangi bakawila ku bikolo bya nganda yabo. Njikatsiya banu na mukwale. Eyo, mukwale ukabyakula ngwe muhyato, co banaukwakula mangana utsiye. 16 Obe mukwale! Ya ku cilyo ubatozole. Tengulukila na ku cimoshwe. Ya kwoshe kubunatala bubela bwobe. 17 Co lalo njikakanda maboko ange na kutula butenu bwange. Yange Yehova njinendekamo.”

18 Co Yehova wanjilekele lalo ngwendi: 19 “Oloni yobe muna munu, fundika bingila bibali muje mwita mukwale wa mwene wa Babiloni. Ebi bingila bibali bikatundilile ku lifuti limo. Co unapande kwaka cizibukiso hayangunukila ngila na kukobela mu binganda bibali. 20 Ngila imo iufundika, muje mwita mukwale inapande kuya ku Laba ya baAmoni, co ngila ikwabo inapande kuya ku Juda, ku nganda ya kukola ya Jelusalema. 21 Mwafwa mwene wa Babiloni akemana na kuumikiya ha masambwa-ngila, haje habilipangela bingila bibali. Akaningangesa mikili na kwihula tumponya bendi.* Akelula lishuli. 22 Ngombo ili mu liboko lyendi lya cilyo ikatalesa ku Jelusalema, mangana akake bitwa bya kupangesa mu kuinyongesa na kutambeka mutambi wa kutsiya banu, na mutambi wa nzita na kwaka bitwa bya kupangesa mu kunyongesa bikolo bya nganda, na kulundula lilundu lya kulwisila nganda na kutunga cibumbe ca kuizengeleka. 23 Oloni baje* balisingile kuli bakebo bakamona ngwe kutaha kwendi kwa makuli, oloni akanuka milonga yabo na kubakwata.

24 “Ngeci, Mwata Wahakamwa ya Byoshe Yehova nendeka ngwendi: ‘Munalingisa milonga yeni bayanuke ha kujombolola bubi bweni, co bilinga byeni byoshe binasholola bubi bweni. Ngeci bamikwata na kumitwala nameme kumwashakele, mwafwa banamyanuka.’

25 “Oloni litangwa lyobe linete, obe mwata wamubi wa Isalele, obe unabulumuka manene, simbu ya kashitiko kobe kamamaneselelo inete. 26 Mwata Wahakamwa ya Byoshe Yehova nendeka ngwendi: ‘Tundisa nanga ya ku mutwe, co shulula cilongo. Eci kucikatwalelelaho kupwa ngacije bene. Jundula munu wa kwisi na kukehesa munu wa helu. 27 Obu bumwene* njikabunyongesa, njikabunyongesa, njikabunyongesa. Co naumo wahi akapwa babenyabwo kubanga noho uje ali na lisesa naija, co njikamwanabwo.’

28 “Co yobe muna munu, polofweta na kwendeka ngwobe, ‘Mwata Wahakamwa ya Byoshe Yehova nendeka hali baAmoni na ha matuka abo.’ Endeka ngwobe, ‘Mukwale, mukwale banaushomona mangana utsiye banu. Banaukwakula mangana unyongese, na kubyakula ngwe muhyato. 29 Bimona bibamwene hali yeni byapwile bya makuli, co lalo byuma bibomikiiye hali yeni byapwile bya makuli. Ngeci bakamilundika hamo na bibimbi bya banu bababi. Litangwa lya aba banu bababi linete. Simbu ya kashitiko kabo ka mamaneselelo inete. 30 Wilwise mu cindalo cawo. Njikamisompela mu mwela munjamitangelele, mu lifuti mumwatunda. 31 Njikamitila kulubala kwange. Njikamishokwela tuhya twa butenu bwange, co njikamyana mu maboko a bikenya, mu maboko a banu baje bapwa bitongwe mu kunyongesa. 32 Mukapwa bikuni bya kubwekesa tuhya. Maninga eni aketikila mu lifuti, co kubakamyanuka lalo, mwafwa yange Yehova njinendekamo.’”

22 Yehova wanjilekele lalo ngwendi: 2 “Oloni obe muna munu, kuma unalibwahesela kusompa ei nganda ili na mulonga wa maninga na kuileka byuma byoshe bya bunyengwe biinalingi ndi? 3 Unapande kwendeka ngwobe, ‘Mwata Wahakamwa ya Byoshe Yehova nendeka ngwendi: “Obe nganda uketila maninga mukati kobe, simbu yobe ili na kwija. Yobe ukalimungila tumponya ba bunyengwe* mangana ulijwalese nabo. 4 Maninga aunetila anakulingisa ukale na mulonga, co tumponya bobe ba bunyengwe banakujwalesa. Unazambwisa mamaneselelo a matangwa obe, co mamaneselelo a myaka yobe anaija. Ngeci, njikalingisa baka-mafuti bakushaule na kukushendumuna mu mafuti oshe. 5 Mafuti aje ali hayehi nobe na aje ali kulako nobe akakushendumuna, yobe uli na lizina lyalibi, yobe unashulu na mpindangano. 6 Tala! Umo na umo wa bamyata ba Isalele mukati kobe ali na kupangesa moko yendi mu kwitila maninga. 7 Banu bobe bali na kushaula baishabo na bainabo. Bali na kunyanyamena baka-kwija, co bali na kuyandesa bana ba kujeneka baishabo* na bifwile.”’”

8 “‘Unayengula myela yange ya kujela na kujwalesa bisabata byange. 9 Banu bobe bali na kubiisa bakwabo mazina mangana betile maninga. Banu bobe bali na kulya milambu ha minkinda na kulinga byuma bya shwamwa mukati kobe. 10 Banu bobe bali na kushaula myela ya baishabo,* co bali na kulilala na banakazi ba kujwala baje bali ku ngonde. 11 Banalume bamo mukati kobe bali na kulinga byuma bya bunyengwe na banakazi ba banu babatunga nabo. Bakwabo bali na kujwalesa banakazi ba bana babo ha kulinga nabo bilinga bya shwamwa, co beka bali na kulilala na bandokazi babo, bana ba baishabo ba kubasema. 12 Banu bobe bali na kutambula lizika-kanwa. Uli na kwana mikuli mangana utambwileho bya helu nambe kuwanenaho profiti,* co uli na kwiba bimbongo ku banu bawatunga nabo. Eyo unanjibala bene hibya,’ ngwendi Mwata Wahakamwa ya Byoshe Yehova.

13 “‘Njili na kuziba bunyengwe mwafwa ya byuma biunawana mu linyanyamena na maninga aje abali na kwitila mukati kobe. 14 Kuma utwalelelaho kusimpa ndi? Kuma maboko obe atwalelelaho kukanyama ha matangwa anjikakwana kashitiko ndi? Yange Yehova njinendekamo, co njikakwana kashitiko. 15 Njikakushandwela mukati ka baka-mafuti na kukushandanganena mu mafuti, co njikamanesa kujwala kwobe. 16 Bakakushaula ku mesho a baka-mafuti, co ukazibuka ngwobe yange Yehova.’”

17 Co Yehova wanjilekele lalo ngwendi: 18 “Muna munu, bakunjibo ya Isalele banapwoni ngwe mazilo anayengunuka ku cikubo. Boshe banapu ngwe kopa na tini na cikubo na loto bije bili mu lutengo lwa tuhya. Banapu ngwe mazilo aje anayengunuka ku siuva.

19 “Ngeci Mwata Wahakamwa ya Byoshe Yehova nendeka ngwendi: ‘Omwo mubaboshe munapu ngwe mazilo aje anayengunuka ku cikubo, ngeci njimikungulwila hamo mu Jelusalema. 20 Ngecilika mubakakungulwila hamo siuva na kopa na cikubo na loto na tini na kubyaka mu lutengo lwa tuhya na kupembezela tuje tuhya mangana biyengunuke, neni mukemwo munjikamikungulwila hamolika mu kulubala kwange na mu butenu bwange, co njikamipembezela na kumiyengununa. 21 Njikamikungulwila hamo na kumishokwela tuhya twa butenu bwange, co mukayengunukila mukati ka nganda yeni. 22 Ngecilika mwa siuva mubakaiyengunwina mu lutengo, neni mukayengunukila mu nganda yeni, co mukazibuka ngweni yange Yehova njinetila butenu bwange hali yeni.’”

23 Co Yehova wanjilekele lalo ngwendi: 24 “Muna munu, leka lifuti ngwobe, ‘Unapu lifuti lije kubakajelesa, co nyonzi kuikanyoko muli yobe ha litangwa lya butenu bwange. 25 Tupolofweto bendi banamutengulukila ngwe ndumba ali na kubuluma uje ali na kupapozola kasitu. Bali na kubwonda banu, bali na kunyeka banu bufuko na byuma bya seho. Banalingisa banakazi babangi bapwe bifwile. 26 Tupilistu bendi banapokola lishiko lyange, co banatwalelelaho kujwalesa myela yange ya kujela. Kubesi na kumwesa kuliseza kuli mukati ka byuma bya kujela na byuma kuti, co kubesi na kuleka banu mangana bazibuke byuma bya kujwala na byuma bya kujela. Banabyana kunyunga bisabata byange, co lalo bali na kunjishaula mukati kabo. 27 Bamyata bendi baje bali mukati kendi, banapu ngwe tungunga baje bali na kupapozola tusitu. Bali na kwitila maninga na kutsiya banu mangana bawaneneho byuma mu linyanyamena. 28 Oloni Tupolofweto bendi banashweke bilinga byabo ngwe uje akwita bulombo bwa kutoka ha cibumbe. Bakamono bimona bya makuli na kuumikiya byuma bya makuli, co bendeka ngwabo: “Mwata Wahakamwa ya Byoshe Yehova nendeka ngwendi,” okuni Yehova byahi byanendeka. 29 Banu bomu mu lifuti bananyanyamena banu na kubebila. Banayandesa baje bali mu bujene na tuhutu, co bananyanyamena baka-kwija, co lalo kubabakwile mwamubwa.’

30 “‘Njakele na kutonda munu mukati kabo uje asa kubwahesa cibumbe ca mamanya nambe uje asa kwimana kulutwe lwange haje hacinapujuka cibumbe, mu kwimanenako lifuti mangana keti balinyongese, oloni kunjawanene nambe umo. 31 Ngeci njibetila butenu bwange na kubanyongesa na tuhya twa butenu bwange. Njibalingisa baliwane na bukalu butunda mu bingila byabo,’ ngwendi Mwata Wahakamwa ya Byoshe Yehova.”

23 Yehova wanjilekele lalo ngwendi: 2 “Muna munu, kwakele banakazi babali baje bapwile bana ba munakazi umolika. 3 Bakupwile mahule mu Ijipiti. Kushwa ku bwanike bwabo, balikobelesele mu buhule. Mabele abo bakele na kuwakwata-kwata mubakele kuje, co bakele na kubakwata-kwata ha binulo simbu kanda bazibuke banalume. 4 Lizina lya wa mukulunu lyapwile Ohola,* co ndokazi yendi wapwile Oholiba.* Bakupwile bange, co bakitile bana ba banalume na ba banakazi. Co lizina lya Ohola limanena Samaliya, co lizina lya Oholiba limanena Jelusalema.

5 “Ohola washangumukile kulinga buhule oku acili wange. Washungwiiye manene mapangala bendi, baAsiria baje batungile nabo. 6 Bapwile bangubulu baje bakele na kuzala bizalo bya blu, na baje batele kuli baka-kuyula. Boshe bapwile bakwenje bababwa baje balondele ha tubalu babo. 7 Watwaleleleho kulinga buhule na bana boshe ba banalume ba Asiria bababwa manene, co walijwalesele ikeye babenya na tumponya ba bunyengwe* ba banu baje bashungwiiye. 8 Kasezele buhule bwakele na kulinga ku Ijipiti, mwafwa ku bwanike bwendi balilalele nendi, co bakele na kukwata-kwata mabele endi na kumanesela lishungu* lyabo hali ikeye. 9 Ngeci njamwanene mu maboko a mapangala bendi, bana ba Asiria ba banalume baje bashungwiiye. 10 Basholwele mushelengwa wendi ku banu, co bakwatele bana bendi ba banalume na bana bendi ba banakazi na kumutsiya na mukwale. Wapwile wa kujeneka kuziba manene hakati ka banakazi, co bamusompele.

11 “Ndokazi yendi Oholiba mwamwene ebi, lishungu lyendi lyaile mweka, co buhule bwendi bwatubakanene bwa ndokazi yendi. 12 Washungwiiye baje batungile nabo, bana ba Asiria ba banalume, na bangubulu na baje batele kuli baka-kuyula baje bakele na kuzala bizalo byabibwa na kulonda ha tubalu. Boshe bapwile bakwenje bababwa. 13 Mwalijwalesele ikeye babenya, njamwene ngwange boshe babali bakabangeyeye ngila imo. 14 Oloni watwaleleleleho kulinga manene buhule. Wamwene banu babacakwile ha cibumbe, bikupulo bya baKaudiya bibakwitile bulombo bwa kubenga. 15 Balikutile miba mu bimbunda na binanga bije byatepukile ku mitwe yabo. Bakele na kusholoka ngwe baka-kulwa. Basholokele ngwe baka-Babiloni baje banasemukila mu lifuti lya baKaudiya. 16 Mwabamwene lika, washangumukile kubashungwiiya, co wabatuminine tutumwa mu Kaudiya. 17 Ngeci, bana ba Babiloni ba banalume batwaleleleho kwija ku mwela wendi wa kulilalela na banalume, co bamujwalesele na lishungu* lyabo. Mubamanesele kumujwalesa, wabasezele mwafwa bamuzibisile bunyengwe.

18 “Mwatwaleleleleho kulinga buhule kwa kujeneka shwamwa, na kusholola bushwamwa bwendi, wanjizibisile bunyengwe, co njamusezele, ngwe munjasezele ndokazi yendi mwanjizibisile bunyengwe. 19 Watwaleleleleho kulinga buhule. Wanukile matangwa a ku bwanike bwendi mwalingile buhule mu lifuti lya Ijipiti. 20 Wabashungwiiye ngwe mubakalingi banakazi* baje bali na banalume baje bali na bunalume ngwe bwa donki na baje bali na bunalume ngwe bwa kabalu. 21 Washungwiiye kulinga byuma bya shwamwa bya ku bwanike bwobe biwalingile mu Ijipiti mubakele na kukukwata-kwata ha nulo na kukwata-kwata mabele obe ku bwanike.

22 “Ngeci, obe Oholiba, tolilila byanendeka Mwata Wahakamwa ya Byoshe Yehova, ngwendi: ‘Njikashangumuna mapangala bobe baje bawasezele mwafwa bakuzibisile bunyengwe, co njikakunenelabo kutundilila ku mitambela yoshe mangana bakukulwise. 23 Njikakunenela bana ba Babiloni ba banalume na baKaudiya boshe, banalume ba ku Pekodi na Shoa na Koa, hamolika na bana ba Asiria ba banalume boshe. Boshe aba bapwa bakwenje bababwa na bangubulu na baje banata kuli baka-kuyula na baka-kulwa na baje babanasana,* boshe banalondo ha tubalu. 24 Bakaija na kukulwisa na matemba a mawili a nzita na maswalale babangi baje banambata bintelo byakama na bintelo byabindondo,* baje banazala bitepa. Bakakuzengeleka, co njikabatabesa bakusompe, co bakakusompa kwesekesa nomu mubakamwena ngwabo kunapande. 25 Njikakumwesa ngwange njinakulubalela, co bakakulwisa oku banatenuka. Bakabatula lijulu lyobe na matwi obe, co banu bobe baje bakasalako bakatsa ku mukwale. Bakambata bana bobe ba banalume na ba banakazi, co baje bakasalako bakenya na tuhya. 26 Bakakushulula bizalo na kukunyeka byuma byobe bya kulicakeya. 27 Njikamanesa bilinga byobe bya shwamwa na buhule bwobe, bije byashangumukilile mu lifuti lya Ijipiti. Ukecela kubatala, co kuukanuka lalo Ijipiti.’

28 “Mwata Wahakamwa ya Byoshe Yehova nendeka ngwendi: ‘Njikwana mu maboko a baje bawazinda baje bawasezele mwafwa bakuzibisile bunyengwe. 29 Bakakulwisa mu kulubala, co bakakunyeka byuma byoshe biunapangela na kukuseza mutotototo, co ukakala mushelengwa. Bushwamwa bwobe buje buwakele na kulinga nabwo bupangala, na bilinga byobe bya shwamwa, na buhule bwobe bakabisholola ku banu. 30 Bakakulinga ebi byuma mwafwa wakabangeyeye baka-mafuti ngwe mwakalingi lihule, mwafwa walijwalesele yobe babenya na tumponya babo ba bunyengwe. 31 Unakabangeya ngila ya ndokazi yobe, co njikwaka nganja yendi mu liboko lyobe.’

32 “Mwata Wahakamwa ya Byoshe Yehova nendeka ngwendi:

“Mwafwa yange njinendekamo,” ngwendi Mwata Wahakamwa ya Byoshe Yehova.’

35 “Ngeci Mwata Wahakamwa ya Byoshe Yehova nendeka ngwendi: ‘Omwo munanjibala na kunjombwanesa,* muliwana na bukalu butunda mu bilinga byeni bya shwamwa na mu bilinga byeni bya buhule.’”

36 Co Yehova wanjilekele ngwendi: “Muna munu, kuma usompa Ohola na Oholiba na kubaleka bilinga byabo bya bunyengwe ndi? 37 Banalingi bukoi,* co bali na maninga ku maboko abo. Kubalingile lika bukoi na tumponya babo ba bunyengwe, oloni banenyeka na bana babo ba banalume mu tuhya baje babanjikitilile, mangana bapwe byakulya bya tumponya babo. 38 Co lalo ebi bikebyo bibanalingi kuli yange: Bajwalesele mwela wange wa kujela haje ha litangwa, co lalo bajwalesele bisabata byange. 39 Mubamanesele kutsiya bana babo ba banalume na kubapwisa milambu ku tumponya babo ba bunyengwe, bezile mu mwela wange wa kujela na kuujwalesa ha litangwa lije bene. Ebi bikebyo bibalingile mu njibo yange. 40 Batumine na tutumwa bakasane banalume batunde kulako. Mubakele na kwija, watanene na kulipenta mu mesho na kulicakeya na byuma bya senga. 41 Co watumamene ha citwamo ca bumpau, co kulutwe lwobe kwakele mesa, haje hawakele isense yange na mazi ange. 42 Co kwazibikile miyoyo ya mbunga ya banalume baje bakele na kulya na kunwa. Mukati kabo mwakele bitakwa baje babakashakele mu mambo. Bazikile banakazi maseka ku maboko na kubazika bilongo byabibwa ku mitwe.

43 “Co njendekele kutalesa kuli munakazi uje nahwila mwafwa ya kulinga bukoi ngwange: ‘Hanwoni atwalelelaho kulinga buhule bwendi.’ 44 Ngeci batwaleleleleho kuya kuli ikeye ngwe mwakalingi munu uje aya kuli lihule. Omu mukemwo mubaililile kuli Ohola na kuli Oholiba, banakazi ba bilinga bya shwamwa. 45 Oloni banu ba kusungama bakamusompa mu ngila inapande mwafwa ya bukoi bwendi na maninga anetila, mwafwa banapu baka-bukoi, co lalo bali na maninga ku maboko abo.

46 “Mwafwa Mwata Wahakamwa ya Byoshe Yehova nendeka ngwendi: ‘Njikabatumina maswalale mangana babalwise na kubapwisa cuma ca kukomokesa na kubapukula. 47 Aba maswalale bakabasha mamanya na kubatetanga na mikwale yabo. Bakatsiya bana babo ba banalume na ba banakazi na kwenyeka binjibo byabo na tuhya. 48 Njikamanesa bilinga bya shwamwa mu lifuti, co banakazi boshe bakalilongesako cimo, co kubakatembwinina bilinga byobe bya shwamwa. 49 Bakamilingisa muliwane na bukalu butunda mu bilinga byeni bya shwamwa, na bukalu buje butunda mu bubi bweni bumunalingi na tumponya beni ba bunyengwe, co mukazibuka ngweni yange Mwata Wahakamwa ya Byoshe Yehova.’”

24 Yehova wendekele lalo nange mu mwaka wa bu 9, mu ngonde ya bu 10, ha litangwa lya bu 10 omu mu ngonde, ngwendi: 2 “Muna munu, soneka litangwa lya lelo. Mwene wa Babiloni nashangumuka kulwisa Jelusalema lelo bene. 3 Ngeci endeka eci cisimo cije cinatalesa ku banu baka-kutengulukila, co endeka kutalesa kuli bakebo ngwobe:

“‘Mwata Wahakamwa ya Byoshe Yehova nendeka ngwendi:

“Tumbika ei ndeho ha liko, co akamo mema.

 5 Ambata manga wamubwa manene mu butanga, co aka bikuni ku mitambela yoshe ya liko mwisi ya ndeho.

Teleka bipuka bya situ hamolika na bitsiya bili mu ndeho.”’

6 “Ngeci, Mwata Wahakamwa ya Byoshe Yehova nendeka ngwendi:

‘Inabindama nganda ije iketila maninga ije inapu ndeho ya ñalawe, muje kubatundisile ñalawe.

Tundisamo bipuka bya situ, cimo na cimo, co keti ubatele ñela.

 7 Mwafwa maninga ayetilile ei nganda acili mukati kayo. Yawetilile ha limanya lya kujeneka byuma.

Kuyawetilile hasi mangana yofweleho libu.

9 “Ngeci, Mwata Wahakamwa ya Byoshe Yehova nendeka ngwendi:

‘Inabindama nganda ije iketila maninga.

Njilundikamo mutumbo wa bikuni wakama.

Mazilo ayo akasangunuka, co ñalawe yayo ikenya.

Yumbileni mu tuhya na ñalawe yayo.’

13 “‘Bilinga byobe bya shwamwa bikebyo byakujwalesele. Njesekele kukujelesa, oloni kuwajelele. Utwalelelaho kupwa wa kujwala kweta noho hawakatulila matoto ange. 14 Yange Yehova njinendekamo. Ebi byuma bikalingiwa. Njikalingamo kwa kujeneka kwilukila munima, kwa kujeneka kuziba busiwa nambe kulibeya. Bakakusompa kwesekesa na bingila byobe na bilinga byobe,’ ngwendi Mwata Wahakamwa ya Byoshe Yehova.”

15 Co Yehova wanjilekele lalo ngwendi: 16 “Muna munu, mu simbu yaindondo lika njikunyeka iwazema. Kuwapandele kumwesa busiwa nambe kulila nambe kundwekesa misozi. 17 Kemangela mwisi, co keti ulinge bilika bya kulila batsi. Likute nanga ku mutwe, co zala masanda. Kuwapandele kufwika minjezi ya helu lya kanwa, co keti ulye byakulya bibakunenela bakweni.”

18 Njasimutwiiye na banu mutondo, co ku mangwezi, munakazi wange watsile. Ngeci, mutondo njalingile bibanjishikile. 19 Banu bakele na kunjileka ngwabo: “Tulumbunwine mubinatukundamena ebi byuma biuli na kulinga.” 20 Njabakumbulwile ngwange: “Lijwi lya Yehova linaija kuli yange na kwendeka ngwalyo, 21 ‘Leka bakunjibo ya Isalele ngwobe: “Mwata Wahakamwa ya Byoshe Yehova nendeka ngwendi, ‘Ololo njijwalesa mwela wange wa kujela uje umukalishashela, mwela umwazema manene, kuje kwakala mbunge yeni. Bana beni ba banalume na bana beni ba banakazi baje bamwasezele bakatsa ku mukwale. 22 Co munapande kukalinga ngwe munjinalingi. Kumukafwiki minjezi ya ku tunwa tweni twa helu, co lalo kumukali byakulya bibakaminenela bakweni. 23 Mukalikuta binanga ku mitwe yeni na kuzala masanda ku mendi eni. Kumukamwesa busiwa nambe kulila, oloni mukabolela mu bubi bweni, mukalitala-tala na kukemanga. 24 Ezekiele napu cakumwenako kuli yeni. Mukalinga ngwe mwanalingi. Ebi byuma mubikalingiwa, mukazibuka ngweni yange Mwata Wahakamwa ya Byoshe Yehova.’”’”

25 “Oloni yobe muna munu, ha litangwa linjikatundisako mwela wabo wa kukola, kulumbununa byuma byabo byabibwa bije bikabalingisa babwahelele, byuma bije bibashaka, kuje kuli mbunge yabo, kwambateselela na bana babo ba banalume na bana babo ba banakazi, 26 ha litangwa olyo bene ukatambula muzimbu kuli uje akoboka. 27 Ha litangwa lije, ukashama mu kanwa na kusimutwiya na uje noboka, co kuukoloka lalo, ukapwa cakumwenako kuli bakebo, co bakazibuka ngwabo yange Yehova.”

25 Yehova wanjilekele lalo ngwendi: 2 “Muna munu, talesa ku baAmoni, co polofweta byuma bikalingiwa kuli bakebo. 3 Unapande kwendeka kutalesa ku baAmoni ngwobe, ‘Tolilileni lijwi lya Mwata Wahakamwa ya Byoshe Yehova. Mwata Wahakamwa ya Byoshe Yehova nendeka ngwendi: “Mwendekele ngweni ‘Ewa!’ kutalesa ku mwela wange wa kujela mubaujwalesele, na kutalesa ku lifuti lya Isalele mulyasalele ngundu, na kutalesa ku bakunjibo ya Juda mubaile mu bufunge, 4 ngeci njimyana mu maboko a banu ba ku butuhukilo bwa litangwa mangana mupwe buswana bwabo. Bakashimbika bilombo byabo mukati keni na kushimbika bitenti byabo mukati keni. Bakalya bushuka bweni na kunwa mabele eni. 5 Laba njikaipwisa bulilo bwa tumele, co lifuti lya baAmoni njikalipwisa mwela wa kuhwimina bimuna, co mukazibuka ngweni yange Yehova.”’”

6 “Mwafwa Mwata Wahakamwa ya Byoshe Yehova nendeka ngwendi: ‘Mwakandele maboko eni, na kulyata misindo, na kulisamba mwafwa ya byuma binalingiwa ku lifuti lya Isalele, oku muli na kwendeka majwi a kushendumuna, 7 ngeci njikolola liboko lyange na kumyana ku baka-mafuti mangana bakamipukule. Njikamitsiya hakati ka banu na kuminyongesa mu mafuti. Njikamizilula, co mukazibuka ngweni yange Yehova.’

8 “Mwata Wahakamwa ya Byoshe Yehova nendeka ngwendi: ‘Omwo Mowabi na Seya banendeka ngwabo, “Taleni! Bakunjibo ya Juda banapu lika ngwe baka-mafuti boshe,” 9 njikecelela binganda bili ku nginga ya Mowabi babilwise, kwambateselela na binganda byabibwa bili mu lifuti lya Mowabi bya Bethi-jeshimothi na Bale-meoni hamolika na Kiliyathaimu. 10 Njikana Mowabi hamolika na baAmoni mangana bapwe buswana bwa banu ba ku butuhukilo bwa litangwa, mangana baAmoni keti bakabanuke lalo mukati ka baka-mafuti. 11 Co njikasompa banu ba mu Mowabi, co bakazibuka ngwabo yange Yehova.’

12 “Mwata Wahakamwa ya Byoshe Yehova nendeka ngwendi: ‘Edomu nalingi shambandinga bakunjibo ya Juda, co ali na mulonga wakama ha kubalinga shambandinga. 13 Ngeci, Mwata Wahakamwa ya Byoshe Yehova nendeka ngwendi: “Njikolwela lalo liboko lyange hali Edomu na kutsiya banu na bimuna ba Edomu na kuipwisa ngundu. Kutunda ku Temani kuketa na ku Dedani, bakatsa na mukwale. 14 ‘Njikalinga Edomu shambandinga kwitila mu banu bange baIsalele. Bakanena butenu bwange na kulubala kwange hali Edomu mangana njimulinge shambandinga,’ ngwendi Mwata Wahakamwa ya Byoshe Yehova.”’

15 “Mwata Wahakamwa ya Byoshe Yehova nendeka ngwendi: ‘BaFilistiya banatwalelelaho kuzinda baIsalele, mukemwo banayongola kubalinga shambandinga na kubanyongesa. 16 Ngeci, Mwata Wahakamwa ya Byoshe Yehova nendeka ngwendi: “Njolwela liboko lyange baFilistiya, co njitsiya baKeletite na kunyongesa baje banasalako baje bakala ku ngenge ya kalunga-ndonga. 17 Njikabalinga manene shambandinga na kubana tushitiko twakama, co bakazibuka ngwabo yange Yehova munjikabalinga shambandinga.”’”

26 Mu mwaka wa bu 11 ha litangwa lyakulibanga mu ngonde, Yehova wanjilekele ngwendi: 2 “Muna munu, Tile nendeka kutalesa kuli Jelusalema ngwendi, ‘Ewa! Bikolo bya baka-mafuti banabipokola! Ngeci byuma byoshe bija kuli yange, co hanwoni njifuka mwafwa banamunyongesa.’ 3 Ngeci, Mwata Wahakamwa ya Byoshe Yehova nendeka ngwendi: ‘Njikulwisa obe Tile. Njikunenela baka-mafuti babangi mangana bakukulwise ngecilika kalunga-ndonga mwakakatwila mankimba endi. 4 Bakunyongesa bibumbe bya Tile na kusiula tuposhi twendi, co njikakomba libu na kumupwisa limanya lya kujeneka byuma. 5 Akapwa mwela wa kushanda manda akama hakati ka kalunga-ndonga.’

“‘Mwafwa yange bene njinendeka,’ ngwendi Mwata Wahakamwa ya Byoshe Yehova, ‘co baka-mafuti bakamupukula. 6 Baje* bakala mu binganda byendi bije byakala kulako na bimbongi bakabatsiya na mukwale, co banu bakazibuka ngwabo yange Yehova.’

7 “Mwafwa Mwata Wahakamwa ya Byoshe Yehova nendeka ngwendi: ‘Njinena mwene Nebukadineza wa Babiloni kutunda ku kunto mangana akulwise Tile. Wapwa mwene wa bimyene, co akaija na tubalu na matemba a nzita na banalume baje banalondo ha tubalu na cibunga ca maswalale babangi. 8 Akunyongesa na mukwale binganda byobe bije bili kulako na bimbongi, co akutunga cibumbe ca kuzengeleka nganda na kukulundwila lilundu lya kukulwisila na kukujundwila ntelo yakama. 9 Akasiula bibumbe byobe kupangesa bitwa bya kupangesa mu kunyongesa, co akapangesa bingimbu* byendi mu kusiula tuposhi twobe. 10 Tubalu bendi bakapwa babangi manene, co bakakukakumwina likungu, co cilumo ca baje banalondo tubalu na mawili a matemba a nzita bikalingisa cibumbe cobe cijaje mubakakobela mu bikolo byobe ngwe banalume baje bajemukila mu nganda ya bibumbe bya kusiuka. 11 Bimbemba bya tubalu bendi bikalyatangela mu bitapalo byobe byoshe. Akatsiya banu bobe na mukwale, co akatika bingunzi byobe bya kukola. 12 Bakeba bufuko bwobe na kupukula bitenga byobe bya mingoso na kusiula bibumbe byobe na kusiula binjibo byobe byabibwa, kutundaho bakombangela mamanya obe na byuma byobe bya kushonga, na libu lyobe mu mema.’

13 “‘Njikamanesa miyoyo ya myaso yobe, co cilumo ca tulyalya twobe kubakacizibi lalo. 14 Njikakupwisa limanya lya kujeneka byuma, co ukapwa mwela wa kushanda manda akama. Kubakakutungulula lalo, mwafwa yange Yehova njinendekamo,’ ngwendi Mwata Wahakamwa ya Byoshe Yehova.

15 “Mwata Wahakamwa ya Byoshe Yehova nendeka kuli Tile ngwendi: ‘Mañanda akajaja muwakaziba bya kuwa kwobe, muwakaziba miteto ya baje bakatsa, mubakatsiya baje bali mukati kobe. 16 Bamyata boshe ba mu kalunga-ndonga bakatunda ha bitwamo byabo na kushulula mikanjo yabo na bizalo byabo bya kutaleka, co bakaziba lyoba. Bakatumama hasi na kutwalelelaho kujaja na kukutala oku banalikomokela. 17 Co bakakwimbila mwaso wa busiwa na kwendeka ngwabo:

19 “Mwafwa Mwata Wahakamwa ya Byoshe Yehova nendeka ngwendi: ‘Munjikakunyongesa na kukupwisa ngwe binganda muje kumwesi banu, munjikakungumbula na mema a cingungumuta, na kalunga-ndonga mwakakungumbula, 20 njikakutwala mu cihilo hamolika na baje bali hamo nobe, njikakutwala ku banu ba kusañulu. Njikakulingisa ukale mu mwela wa kwisi manene ngwe myela ya kusañulu ibananyongesa hamolika na baje bakaya mu cihilo mangana keti batunge hali yobe lalo. Co njikana bumpau lifuti lya baka-kuyoya.

21 “‘Njikakuzibisa lyoba, co kuukakalako lalo. Bakakutonda, oloni kubakakuwana lalo,’ ngwendi Mwata Wahakamwa ya Byoshe Yehova.”

“Obe Tile, yobe babenya unendeka ngwobe, ‘Njapwa nji wamubwa manene.’

 8 Baje bakala mu Sidoni na baje bakala mu Avadi bakebo bakujabwile.

Banalume bobe ba bitongwe, obe Tile, bakebo bakujabwile.

 9 Banalume ba bitongwe ba ku Gebo baje bali na lyezi bakebo bazikile myanzi yobe.

Co mato oshe a mu kalunga-ndonga na baka-kuwajabula bezile kuli yobe na kulinga mingoso.

10 Banalume ba ku Pelesha na ku Ludimu na ku Puti bapwile maswalale bobe, bapwile banalume bobe baka-kulwa.

Bashukikile bintelo byabo na bitepa byabo muli yobe, co bakunenelele bumpau.

12 “‘“Banu ba ku Tashishi balingile nobe mingoso mwafwa wakele na bufuko bwabwingi. Bakunenelele siuva, cikubo, tini na loto mangana ubane bitenga byobe. 13 Banu ba ku Javani na ku Tubau na ku Mesheki balingile nobe mingoso. Bakunenelele bindungo na byuma bya kopa mangana ubane byuma byobe bya mingoso. 14 Bakunjibo ya Togama bakunenelele tubalu na bidonki mangana ubane byuma byobe. 15 Banu ba ku Dedani balingile nobe mingoso. Wakobelesele bipangi baka-mingoso ba ha mañanda amangi. Bakwanene mambinga a binjamba na biti bya seho bya kuzibala kupwa mulambu. 16 Banu ba ku Edomu balingile nobe mingoso mwafwa ya byuma byobe byabingi. Bakwanene mamanya a takoizi, bwanda bwa pepo, binanga bya kutaleka, binanga byabibwa, makolale, na mamanya a rubi mangana ubane byuma byobe.

17 “‘“Banu ba ku Juda na banu ba mu lifuti lya Isalele balingile nobe mingoso. Bakwanene tiliku ya ku Minithi na byakulya byabibwa na buki na mazi na bosamu, mangana ubane byuma byobe.

18 “‘“Banu ba ku Damasika balingile nobe mingoso mwafwa ya byuma byobe byabingi na bufuko bwobe bwabwingi. Bakulandesele binyu bya ku Heuboni na bwanda bwa ku Zaha.* 19 Banu ba ku binganda bya Vedani na Javani bije byakala ku Uzau, bakunenelele byuma bya kufula ha cikubo na miti ya kashia* na mahongo a keni* mangana ubane byuma byobe. 20 Banu ba ku Dedani bakunenelele binanga bya kwaka ha myongo ya tubalu. 21 Wakobelesele bipangi baka-Arabia na bamyata boshe ba ku Keda. Aba banu bapwile baka-kulandesa bana ba bimanga na bimanga ba nkomba na bimembe. 22 Baka-mingoso ba ku Sheba na ku Laama balingile nobe mingoso. Bakwanene mazi oshe a lwengo lwalubwa na mamanya a seho na goudi mangana ubane byuma byobe. 23 Banu ba ku Halani na ba ku Kane na ba ku Edeni na baka-mingoso ba ku Sheba na ku Ashu na ku Kiumadi, balingile nobe mingoso. 24 Mu mutambela wobe wa kulandesela balandeselelemo bizalo byabibwa na tumapai tubanatungu ha binanga bya blu na ha binanga bya kutaleka bya mibala yaibwa. Balandeselelemo lalo binanga bya kujala hasi bya mibala ya kuliseza-seza, co byoshe babizengele na kubikuta na mikole.

28 Baka-kukujabula mubakatambeka, myela ya ku ngenge ya kalunga-ndonga ikajaja.

32 Ha simbu ibakalila, bakemba mwaso wa busiwa kutalesa kuli yobe ngwabo:

‘Iya nalifu na Tile uje nolokoni kulu hakati ka kalunga-ndonga?

33 Byuma byobe mubyezile kutunda hakati ka kalunga-ndonga, walingisile baka-mafuti babwahelele.

Bufuko bwobe bwabwingi na byuma byobe bya mingoso byafukisile bimyene ba ha lifuti-libu.

36 Baka-mingoso baje bakala mukati ka baka-mafuti bakakumba milozi mwafwa ya byuma binalingiwa kuli yobe.

28 Yehova wanjilekele lalo ngwendi: 2 “Muna munu, leka ntwama ya Tile ngwobe, ‘Mwata Wahakamwa ya Byoshe Yehova nendeka ngwendi:

“Mbunge yobe muinashangumuka kulyalesa uli na kwendeka ngwobe, ‘Nji njambi.

Njakala ha litanda lya njambi hakati ka kalunga-ndonga.’

 3 Tala! Uli na kusinganyeka ngwobe uli na mana kutubakana Daniele.

Co lalo uli na kusinganyeka ngwobe kukwesi mahungu abasa kukushwekela.

6 “‘Ngeci, Mwata Wahakamwa ya Byoshe Yehova nendeka ngwendi:

 9 Kuma anga ukendeka ngwobe, ‘Nji njambi’ kuli uje akukutsiya ndi?

Kuukapu njambi, oloni ukapwa munu lika mu maboko a baje bali na kukujwalesa.”’

11 Yehova wanjilekele lalo ngwendi: 12 “Muna munu, imba mwaso wa busiwa kutalesa kuli mwene wa Tile, co muleke ngwobe, ‘Mwata Wahakamwa ya Byoshe Yehova nendeka ngwendi:

13 Wakele mu Edeni mu lihya lya Njambi.

Babibwahesele ha litangwa libakutangele.

14 Njakwangwile kupwa kerubi wa kubwabesa, muka-kunyungilila.

Wakele ha munkinda wa kujela wa Njambi, co wakele na kwendangana mu mamanya a tuhya.

17 Washangumukile kulyalesa mwafwa ya bubwa bwobe.

Wabiisile mana obe mwafwa ya bumpau bwobe.

Njikakumbila hasi.

Njikakulingisa upwe cuma cibakayongola bimyene.

18 Unajwalesa myela yobe ya kujela mwafwa ya milonga yobe yakama na mingoso yobe ya linyanyamena.

Njikashwameka tuhya mukati kobe, co tukakwenyeka.

Co ukapwa lito ha lifuti-libu kulutwe lwa baje bali na kukutala.

19 Banu boshe ba ku mafuti eka baje bakuzibukile bakakutala oku banalikomokela.

20 Co Yehova wanjilekele lalo ngwendi: 21 “Muna munu tala ku Sidoni, co polofweta byuma bikalingiwa kuli ikeye. 22 Unapande kwendeka ngwobe, ‘Mwata Wahakamwa ya Byoshe Yehova nendeka ngwendi:

23 Njikakutumina mushongo wa kulitambwisa, co maninga akangongomoka mu bitapalo byobe.

24 “‘“Co bakunjibo ya Isalele kubakakala lalo mukati ka mambimbo na mingonga, kulumbununa banu baje baka-kubashendumuna, co banu bakazibuka ngwabo yange Mwata Wahakamwa ya Byoshe Yehova.”’

25 “‘Mwata Wahakamwa ya Byoshe Yehova nendeka ngwendi: “Munjikakungulula lalo bakunjibo ya Isalele kubatundisa mukati ka baka-mafuti muje mubashandokelele, njikalingisa baka-mafuti bazibuke ngwabo njapwa Njambi wa kujela. Co bakunjibo ya Isalele bakakala mu lifuti lyabo lije linjanene ngamba yange Jakobu. 26 Bakakala muje mu lifuti kwa kujeneka bushonde, co bakatunga binjibo na kukuna mahya a binyu, co bakakala mwamubwa kwa kujeneka bushonde munjikasompa boshe baje banabazengeleka, baje bali na kubashendumuna, co bakazibuka ngwabo yange Yehova Njambi yabo.”’”

29 Mu mwaka wa bu 10, mu ngonde ya bu 10, ha litangwa lya bu 12 omu mu ngonde, Yehova wanjilekele lalo ngwendi: 2 “Muna munu, tala kuli Falo mwene wa Ijipiti, co upolofwete byuma bikalingiwa kuli ikeye na ku lifuti lya Ijipiti lyoshe. 3 Endeka ngwobe: ‘Mwata Wahakamwa ya Byoshe Yehova nendeka ngwendi:

Njalipangeleleyo yange babenya.’

 4 Oloni njikaka tulobo mu bimbange byobe, co njikalingisa bisi ba mu ndonga yobe ya Nailo bakakateye ku mabanda obe.

Njikakutundisa mu ndonga yobe ya Nailo hamolika na bisi boshe ba mu Nailo baje bakakakateya ku mabanda obe.

 5 Njikakuseza mu mambo, yobe na bisi boshe ba mu ndonga yobe ya Nailo.

Ukawila hasi, co kubakakwambata na kukutsinda.

Njikakupwisa byakulya bya bikashama na tuzila.

8 “‘Mwata Wahakamwa ya Byoshe Yehova nendeka ngwendi: “Njikunenela mukwale, co njitsiya banu na tusitu baje bali muli yobe. 9 Lifuti lya Ijipiti likapwa ngundu na mwela uje unabihya, co bakazibuka ngwabo yange Yehova mwafwa unendeka ngwobe, ‘Ndonga ya Nailo yapwa yange, yange njaipangele.’ 10 Ngeci njikulwisa na kulwisa ndonga yobe ya Nailo, co njilingisa lifuti lya Ijipiti libihye na kuma. Njilibiisa na kulipwisa ngundu, kushangumukila ku Migido kutwala ku Siyene kuketa na ku nginga ya Ithopia. 11 Banu na bimuna kubaketimo, co wahi akakalamo ha myaka 40. 12 Njikalingisa lifuti lya Ijipiti libihye manene kutubakana mafuti akwabo, co binganda byalyo bikabihya manene kutubakana binganda bikwabo ha myaka 40. Co njikashandwela baka-Ijipiti mukati ka baka-mafuti na kubashandanganena mukati ka mafuti.”

13 “‘Mwafwa Mwata Wahakamwa ya Byoshe Yehova nendeka ngwendi: “Myaka 40 muikaita, njikakungulula baka-Ijipiti kutunda ku baka-mafuti kuje kunjabashandwelele. 14 Njikelwisa lalo bafunge ba Ijipiti ku lifuti lya Patrosi, ku lifuti lyabo kuje kubatunda, co bakapwa bumwene bwabundondo. 15 Ijipiti ikapwa yaindondo kutubakana bumwene bukwabo, co kuikalyatelela lalo mafuti akwabo, co njikabalingisa bapwe babandondo manene, co kubakasa kufungulula miyati ikwabo. 16 Bakunjibo ya Isalele kubakakulahela lalo Ijipiti, oloni ikabanukisa mulonga ubalingile ha kulomba bukwasi kuli baka-Ijipiti, co bakazibuka ngwabo yange Mwata Wahakamwa ya Byoshe Yehova.”’”

17 Co mu mwaka wa bu 27, mu ngonde ya kulibanga ha litangwa lya kulibanga omu mu ngonde, Yehova wanjilekele ngwendi: 18 “Muna munu, Mwene Nebukadineza* wa Babiloni walingisile maswalale bendi bapange na nzili mu kulwisa Tile. Mitwe yoshe baikongobwele, co bitsili byoshe byatosokele, oloni ikeye na maswalale bendi kubatambwile fweto ha cipangi cibalingile ca kulwisa Tile.

19 “Ngeci, Mwata Wahakamwa ya Byoshe Yehova nendeka ngwendi, ‘Njana lifuti lya Ijipiti kuli Mwene Nebukadineza* wa Babiloni, co akambata bufuko bwalyo na kupukulamo byuma byabingi, co bikebyo bikapwa fweto ya maswalale bendi.’

20 “‘Njikamwana lifuti lya Ijipiti kupwa fweto mwafwa ya cipangi cananjilingila ca kulwisa Tile,’ ngwendi Mwata Wahakamwa ya Byoshe Yehova.

21 “Ha litangwa olyo, njikamenesela limbinga bakunjibo ya Isalele, co njikakutabesa wendeke mukati kabo, co bakazibuka ngwabo yange Yehova.”

30 Co Yehova wanjilekele lalo ngwendi: 2 “Muna munu, polofweta ngwobe, ‘Mwata Wahakamwa ya Byoshe Yehova nendeka ngwendi:

“Mbolozokeni ngweni, ‘Kekange litangwa lili na kwija!’

 3 Mwafwa eli litangwa lili hayehi, eyo, litangwa lya Yehova lili hayehi.

Likapwa litangwa lya mashelwa, likapwa simbu ibanangwila baka-mafuti.

 6 Yehova nendeka ngwendi:

“‘Kushangumukila ku Migido kutwala ku Siyene bakawa ku mukwale omu mu lifuti,’ ngwendi Mwata Wahakamwa ya Byoshe Yehova. 7 ‘Lifuti lyabo bakalibiisa manene kutubakana mafuti akwabo, co binganda byalyo bikabihya manene kutubakana binganda bikwabo. 8 Co bakazibuka ngwabo yange Yehova munjikashwameka tuhya mu Ijipiti na kunyongesa boshe baje bali na kulikwatasana nendi. 9 Ha litangwa olyo, njikatuma tutumwa mu mato mangana bakajajese Ithopia ije yalikulahela. Bakaziba lyoba ha litangwa lije lili na kwizila Ijipiti, mwafwa lili na kwija bene.’

10 “Mwata Wahakamwa ya Byoshe Yehova nendeka ngwendi: ‘Njikanyongesa mbunga ya Ijipiti kupangesa liboko lya Mwene Nebukadineza* wa Babiloni. 11 Ikeye na maswalale bendi baje bapwa ba kukenyuka manene mukati ka baka-mafuti, bakabanena mangana bakunyongese eli lifuti. Bakashomona mikwale yabo na kulwisa Ijipiti na kushulisa lije lifuti na bibimbi. 12 Njikomisa tupila twa Ndonga ya Nailo na kulandesa eli lifuti ku banu bababi. Njikalingisa baka-kwija babiise eli lifuti na byuma byoshe bilimo. Yange Yehova njinendekamo.’

13 “Mwata Wahakamwa ya Byoshe Yehova nendeka ngwendi: ‘Njikanyongesa lalo tumponya ba bunyengwe* na kumanesa binjambi ba kujeneka seho ba Nofu.* Mu lifuti lya Ijipiti kumukakala lalo mwata, co njikalingisa banu ba mu lifuti lya Ijipiti bazibe lyoba. 14 Patrosi njikaipwisa ngundu, co njikashwameka tuhya mu Zoani na kusompa No.* 15 Njiketila butenu bwange hali Sini yanakulahela manene Ijipiti, co njikanyongesa banu ba mu No. 16 Njikashwameka tuhya mu Ijipiti, co baka-Sini bakaziba lyoba, co No bakaituba na kuikobelela, co Nofu* bakailwisa mutanya mwelu. 17 Bakwenje ba mu Oni* na ba mu Pibesethi bakawa ku mukwale, co banu ba mu binganda bakaya mu bufunge. 18 Litangwa likazibala mu Tapanesi munjikapokola joko ya Ijipiti. Co kulyalesa manene kwayo kukahwa, mashelwa akaifwika, co banu ba mu bimbongi byayo bakabafungulula. 19 Njikasompa Ijipiti, co bakazibuka ngwabo yange Yehova.’”

20 Co mu mwaka wa bu 11 mu ngonde ya kulibanga ha litangwa lya bu 7 omu mu ngonde, Yehova wanjilekele ngwendi: 21 “Muna munu, njinapokola liboko lya Falo mwene wa Ijipiti. Kubakalikutu mangana lyole nambe kulizenga nanga mangana likanyame na kwambata mukwale.”

22 “Ngeci, Mwata Wahakamwa ya Byoshe Yehova nendeka ngwendi: ‘Njilwisa Falo mwene wa Ijipiti, co njipokola maboko endi. Njipokola liboko yendi lya kukanyama na lije linapokoka, co njiwisa mukwale mu liboko lyendi. 23 Co njikashandwela baka-Ijipiti mukati ka baka-mafuti na kubashandanganena mukati ka mafuti. 24 Njikakanyamesa maboko* a mwene wa Babiloni na kumwaka mukwale wange mu liboko lyendi, co njikapokola maboko a Falo, co akateta kulutwe lwendi* ngwe munu uje ali na kutsa. 25 Njikakanyamesa maboko a mwene wa Babiloni, oloni maboko a Falo akazeya. Co bakazibuka ngwabo yange Yehova munjikaka mukwale wange mu liboko lya mwene wa Babiloni, co akaupangesa mu kulwisa lifuti lya Ijipiti. 26 Co njikashandwela baka-Ijipiti mukati ka baka-mafuti na kubashandanganena mukati ka mafuti, co bakazibuka ngwabo yange Yehova.’”

 4 Mema amangi aulingisile ukole, tubwelubwelu twa mema twaulingisile upwe waulaha.

 5 Mukemwo wapwile waulaha kutubakana miti ikwabo yoshe ya mu shwata.

 8 Kukwakele muti wa sida weka wa mu lihya lya Njambi walifwile nawo.

Kukwakele muti weka wa mu lihya lya Njambi wapwile waubwa ngwe ukewo.

10 “Ngeci, Mwata Wahakamwa ya Byoshe Yehova nendeka ngwendi: ‘Omwo wapwile waulaha manene, co shongo yawo yaketele na ku mashelwa, co mbunge yawo yalyalesele mwafwa ya bulaha bwawo, 11 ngeci njikawana mu maboko a muka-kuyula wa nzili wa baka-mafuti. Akalimona nawo, co njikaubyana mwafwa ya bubi bwawo. 12 Co baka-kwija, kulumbununa muyati wa kukenyuka manene hakati ka baka-mafuti, bakateta uje muti, co bakauseza ha minkinda, co maputa awo akawila mu bingulunga byoshe, co minango yawo ikapokozoka na kuwila mu bana ba bindonga boshe ba muje mu lifuti. Banu ba miyati yoshe ba ha lifuti-libu bakatunda mu munzinze wawo na kuuseza. 13 Tuzila boshe bakakala ha mungowa wawo uje unau, co tusitu boshe ba mu shwata bakakala ha minango yawo ije inau. 14 Eci cinafu ngacije mangana miti yoshe ije ili kuyehi na mema keti ikole na kupwa yailaha manene nambe kukola manene kuketa na ku mashelwa, co lalo mangana miti yoshe ije ili na kutambula mema amangi keti ipwe yailaha manene na kweta ku mashelwa. Mwafwa yoshe bakainyongesa, co ikashitama mu libu hamolika na bana ba banu baje bali na kuya mu bwina.’*

15 “Mwata Wahakamwa ya Byoshe Yehova nendeka ngwendi: ‘Ha litangwa liukaya mu Cihilo,* njikalingisa banu bakale mu busiwa. Ngeci, njikazika bindonga bya kuloba na kwimika bana babyo ba bindonga mangana mema amangi ecele kwita. Njikazibalesa Lebanoni mwafwa yawo, co miti ya mu shwata yoshe ikajujwama. 16 Miyoyo ya kuwa kwa uje muti ikalingisa miyati ijaje munjikautwala mu Cihilo* hamolika na boshe baje bali na kuya mu bwina, co miti yoshe ya mu Edeni, miti ya kulitila na miti yaibwa manene ya mu Lebanoni, miti yoshe ya kushangelela mwamubwa bakaizembeleka mu libu. 17 Banai mu Cihilo* hamolika nendi, kuli baje babanatsii na mukwale hamolika na baka-kumukundwiya baje bali mukati ka baka-mafuti baje bayoyele mu munzinze wendi.’

18 “‘Miti muka ya mu Edeni yalifwile nobe ku bumpau na bukama? Oloni cili bene bakakusikumwisa mu libu hamolika na miti ya mu Edeni. Ukalala hamolika na banu ba kujeneka kuya ku mukanda, baje babanatsii na mukwale. Ebi bikalingiwa kuli Falo na mbunga yendi yoshe,’ ngwendi Mwata Wahakamwa ya Byoshe Yehova.”

 3 Mwata Wahakamwa ya Byoshe Yehova nendeka ngwendi:

 7 ‘Co muukanyonga, njikafwika melu na kuzibalesa bingongonosi byamwo.

11 Mwafwa Mwata Wahakamwa ya Byoshe Yehova nendeka ngwendi:

‘Mukwale wa mwene wa Babiloni ukakwizila.

Bakamanesa kulyalesa kwa Ijipiti, co mbunga yendi yoshe ikanyonga.

Bakawimbila Ijipiti na mbunga yendi yoshe,’ ngwendi Mwata Wahakamwa ya Byoshe Yehova.”

17 Co mu mwaka wa bu 12, ha litangwa lya bu 15 omu mu ngonde, Yehova wanjilekele ngwendi: 18 “Muna munu, lila mbunga ya Ijipiti na kuleka Ijipiti ngwobe akaya mu libu, ikeye na bana ba banakazi ba miyati ya nzili, hamolika na baje bali na kuya mu bwina.*

19 “‘Obe Ijipiti, kuma usinganyeka ngwobe u wamubwa manene kutubakana bakweni ndi? Ya mu libu, co yaukalale hamolika na baje kubaile ku mukanda.’

20 “‘Bakawila mukati ka baje banatsi ku mukwale. Banamutsii na mukwale. Mupulunye atunde hano hamolika na mbunga yendi yoshe.

21 “‘Baka-kulwa ba nzili manene bakendeka nendi na bakwasi bendi oku ali mu Cihilo.* Bakaya bene mu cihilo, bakabatsiya na mukwale, co bakalala ngwe baje kubaile ku mukanda. 22 Asiria kwali hamolika na mbunga yendi yoshe. Bihilo byabo binamuzengeleka, boshe banatsi ku mukwale. 23 Bihilo byendi bili mu bwina bwa kuloba manene, co mbunga yendi yoshe inazengeleka cihilo cendi, boshe banatsi ku mukwale, mwafwa mubakele na kuyoya bazibisile bakwabo lyoba.

24 “‘Elamu kwali hamolika na mbunga yendi yoshe ije inazengeleka cihilo cendi, boshe banatsi ku mukwale. Baje bazibisile bakwabo lyoba mubakele na kuyoya banai mu libu kwa kujeneka kuya ku mukanda. Hanwoni baziba shwamwa hamolika na baje baya mu bwina.* 25 Banamubwahesela mwela mukati ka bibimbi, hamolika na mbunga yendi yoshe ije inazengeleka bihilo byendi. Boshe kubaile ku mukanda banatsi ku mukwale, mwafwa mubakele na kuyoya bazibisile bakwabo lyoba. Co bakaziba shwamwa hamolika na baje baya mu bwina.* Banamwaka hamo na bibimbi.

26 “‘Kuje kukekwo kwali Mesheki na Tubau na mbunga yabo* yoshe. Bihilo byendi byoshe binamuzengeleka. Boshe baje kubaile ku mukanda banabatubu mukwale, mwafwa mubakele na kuyoya bazibisile bakwabo lyoba. 27 Bakalala hamolika na baka-kulwa ba nzili ba kujeneka kuya ku mukanda baje banau, baje baile mu Cihilo* na bitwa byabo bya nzita. Co bakaka mikwale yabo kwisi ya mitwe* yabo, co bubi bwabo bakabwaka ha bitsiya byabo, mwafwa aba baka-kulwa ba nzili mubakele na kuyoya, bazibisile bakwabo lyoba. 28 Oloni yobe bakakunyongesela mukati ka baje kubaile ku mukanda, co ukalala hamolika na baje banatsi ku mukwale.

29 “‘Edomu na bimyene bendi na bamyata bendi boshe kubali kuje, nameme bakele na nzili, oloni babalangekele hamolika na baje batsile ku mukwale. Nabo bakalala hamolika na baje kubaile ku mukanda na baje bali na kuya mu bwina.*

30 “‘Kuje kukekwo kubali bamyata* boshe ba ku kunto hamolika na baka-Sidoni boshe, baje banai mu cihilo na shwamwa na bibimbi nameme bazibisile bakwabo lyoba mwafwa ya nzili yabo. Bakatsa kwa kujeneka kuya ku mukanda hamolika na baje banatsi ku mukwale, co bakaziba shwamwa hamolika na baje baya mu bwina.*

31 “‘Falo akamona byoshe ebi, co akasimpilaho mwakamona byuma byoshe binalingiwa ku mbunga yendi. Falo na maswalale bendi boshe bakabatsiya na mukwale,’ ngwendi Mwata Wahakamwa ya Byoshe Yehova.

32 “‘Omwo Falo wazibisile bakwabo lyoba mwakele na kuyoya, ikeye na mbunga yendi yoshe bakabatsinda hamo na baje kubaile ku mukanda, baje babanatsii na mukwale,’ ngwendi Mwata Wahakamwa ya Byoshe Yehova.”

6 “‘Oloni nga muka-kunyunga amona mukwale uli na kwija, co kohyesa limbinga na kunangula banu mangana balingeko bimo, co mukwale wija na kutsiya umo mukati kabo, uje munu atsa mwafwa ya mulonga wendi, oloni maninga endi njiwatondela kuli muka-kunyunga.’

7 “Ngeci, yobe muna munu njinakwangula kupwa muka-kunyunga bakunjibo ya Isalele, co nga uziba lijwi litunda mu kanwa kange unapande kunjinangwilabo. 8 Nga njileka munu wamubi ngwange, ‘Obe munu wamubi ukatsa.’ Oloni yobe wonwa kwendeka mangana unangule uje munu wamubi atunde mu ngila yendi, uje munu akatsa na bubi bwendi mwafwa ya mulonga wendi, oloni maninga endi njikawatondela mu mutwe wobe. 9 Oloni nga unangula munu wamubi mangana atunde mu ngila yendi, co ikeye abyana kutunda mu ngila yendi, akatsa mwafwa ya mulonga wendi, oloni yobe ukobola mwonyo wobe.

10 “Co yobe muna munu, leka bakunjibo ya Isalele ngwobe, ‘Munendeka ngweni: “Kutengulukila kwetu na bubi bwetu binatulemena manene, co bili na kutujukisa, co tutwalelelaho bati kuyoya?”’ 11 Baleke ngwobe: ‘Mwata Wahakamwa ya Byoshe Yehova nendeka ngwendi, “Njilisinga ha kuyoya kwange ngwange kunjesi kuziba kubwaha kumona munu wamubi atsa, oloni njashaka ngwange munu wamubi aseze bingila byendi mangana atwaleleleho kuyoya. Tengulukeni, tengulukeni, tundeni mu bingila byeni byabibi, mwafwa bika bimutsila eni bakunjibo ya Isalele?”’

12 “Co yobe muna munu, leka bana ba banu bobe ngwobe, ‘Kusungama kwa munu wa kusungama kukumwobola nga apwa muka-kutengulukila. Co lalo bubi bwa munu wamubi kubumutanwisa nga atenguluka na kuseza bubi bwendi. Co lalo ha litangwa lyalinga bubi munu wa kusungama, katwalelelaho kuyoya mwafwa ya kusungama kwendi. 13 Nga njileka munu wa kusungama ngwange: “Cili bene utwalelelaho kuyoya,” co ou munu akulahela kusungama kwendi na kushangumuka kulinga byuma byabibi,* co bilinga byendi bya kusungama byoshe kunjikabyanuka, oloni akatsa mwafwa ya bubi bwanalingi.

14 “‘Co nga njileka munu wamubi ngwange: “Cili bene ukatsa,” co atenguluka na kuseza bubi bwendi na kushangumuka kulinga byuma byabibwa na bya kusungama, 15 co uje muka-bubi elwisa byuma byanakwatelelemo na kufweta byuma byebile, na kukabangeya mashiko aje ana mwonyo ha kujeneka kulinga byuma byabibi, co atwalelelaho kuyoya. Katsi embwe. 16 Bubi bwoshe bwalingile kunjikamwanenabwo kashitiko.* Atwalelelaho kuyoya mwafwa nalingi byuma byabibwa na bya kusungama.’

17 “Oloni banu bobe banendeka ngwabo, ‘Ngila ya Yehova keti ya kusungama,’ okuni ngila yabo ikeyo ya kujeneka kusungama.

18 “Nga munu wa kusungama ecela kulinga byuma bya kusungama na kushangumuka kulinga byuma byabibi, co napande kutsila bubi bwendi. 19 Oloni nga munu wamubi ecela bubi bwendi na kushangumuka kulinga byuma byabibwa na bya kusungama, co atwalelelaho kuyoya mwafwa ya kulinga ngoco.

20 “Oloni yeni munendeka ngweni, ‘Ngila ya Yehova keti ya kusungama.’ Njisompa umo na umo weni kwesekesa na bingila byendi, eni bakunjibo ya Isalele.”

21 Mukwetile simbu yailaha, mu mwaka wa bu 12, mu ngonde ya bu 10, ha litangwa lyamucitanu omu mu ngonde kutunda hatwaililile mu bufunge, munu umo uje watewele ku Jelusalema wezile kuli yange na kwendeka ngwendi: “Nganda inau.”

22 Co ku mangwezi simbu kanda uje munalume aije, liboko lya Yehova lyezile hali yange, co wanjilingisile njishangumuke lalo kwendeka simbu kanda uje munalume aije mutondo. Ngeci, njashangumukile kwendeka, co kunjapwile lalo kabebebe.

23 Co Yehova wanjilekele ngwendi: 24 “Muna munu, banu baje bali mu binganda binabihya bali na kwendeka kutalesa ku lifuti lya Isalele ngwabo, ‘Abrahamu wapwile munu umolika, oloni waswanene lifuti. Oloni yetu tubabangi, ngeci banatwanalyo kupwa buswana bwetu.’

25 “Ngeci baleke ngwobe, ‘Mwata Wahakamwa ya Byoshe Yehova nendeka ngwendi: “Muli na kulya byakulya bili na maninga, co munakulahela tumponya beni ba bunyengwe,* co lalo muli na kwitila maninga. Ngeci mwasa kuswana bati eli lifuti? 26 Munakulahela mukwale weni, co muli na kulinga byuma bya bunyengwe, co lalo umo na umo weni ali na kujwalesa munakazi wa munu yatunga nendi. Ngeci mwasa kuswana bati eli lifuti?”’

27 “Unapande kubaleka ngwobe, ‘Mwata Wahakamwa ya Byoshe Yehova nendeka ngwendi: “Njilisinga ha kuyoya kwange ngwange baje bali na kuyoya mu binganda bakatsa ku mukwale. Baje bali mu shwata njikabana ku bikashama mangana bapwe byakulya byabo. Co baje bali mu bimpaka na mu mena a mu mamanya bakatsa ku mushongo. 28 Njikabiisa eli lifuti na kulipwisa ngundu, co kulyalesa kukahwa, co minkinda ya Isalele ikapwa ngundu, co naumo wahi akaitako. 29 Co bakazibuka ngwabo yange Yehova munjikabiisa lifuti na kulipwisa ngundu, mwafwa ya byuma byoshe bya bunyengwe bibanalingi.”’

30 “Oloni yobe muna munu, banu bobe bali na kukwendeka kuli umo na mukwabo oku bali ku bibumbe na mu bikolo bya binjibo byabo. Bali na kwendeka kuli umo na mukwabo, munu na ndolome yendi ngwabo, ‘Ijeni. Tuyeni tuzibe lijwi lije litunda kuli Yehova.’ 31 Bakalikungulula na kwija na kutumama kulutwe lwobe ngwe mubakalingi banu bange, co bakaziba majwi obe, oloni kubakawononoka. Mwafwa bakalikwisi kukushangazala na tunwa twabo, oloni bimbunge byabo bili na nuna ya kushaka kuwana byuma mu linyanyamena. 32 Tala! Yobe unapu ngwe mwaso wa cizemo kuli bakebo, uje ubanembi na lijwi lyalibwa, uje lalo ubanembi mu butongwe ha cisanzi ca mikole. Bakaziba majwi obe, oloni naumo wahi akalingako bimo. 33 Co awa majwi akalishulisilila, co muwakalishulisilila bakazibuka ngwabo kapolofweto wakele mukati kabo.”

34 Yehova wanjilekele lalo ngwendi: 2 “Muna munu, polofweta byuma bikalingiwa ku tunyungi ba Isalele. Polofweta na kuleka aba tunyungi ngwobe, ‘Mwata Wahakamwa ya Byoshe Yehova nendeka ngwendi: “Banabindama tunyungi ba Isalele baje bali na kulilisa bakebo babenya. Kuma aba tunyungi kubapandele kulisa butanga ndi? 3 Muli na kulya mazi, co muli na kuzala bizalo bya kutonga ha maka a bimanga, co lalo muli na kutsiya bimuna ba kununa manene, oloni kumwesi na kulisa butanga. 4 Kumwakanyamesele baje banazeye nambe kusaka baje bali na kubinja nambe kukuta bimbandu bya baje banabulumuka nambe kwilwisa baje banongumuka, nambe kushakezeka baje banazimbala, oloni muli na kubayula mu butenu na bukenya. 5 Ngeci bashandokele mwafwa kukwakele kanyungi. Bashandokele, co bapwile byakulya bya bikashama boshe ba mu shwata. 6 Bimanga bange bakele na kushandokela ha minkinda yoshe na ha malundu oshe. Bimanga bange bashandokelele ha lifuti-libu lyoshe, oloni naumo wahi wabashakezekele nambe kubatonda.

7 “‘“Ngeci eni tunyungi, tolilileni lijwi lya Yehova: 8 ‘Mwata Wahakamwa ya Byoshe Yehova nendeka ngwendi: “Njilisinga ha kuyoya kwange ngwange, omwo bimanga bange banapu byakulya bya bikashama ba mu shwata, mwafwa ya kujeneka kanyungi, co lalo mwafwa tunyungi bange kubaile na kutonda bimanga bange, oloni bakele na kulilisa bakebo babenya, co lalo kubalisile bimanga bange,”’ 9 ngeci eni tunyungi, tolilileni lijwi lya Yehova. 10 Mwata Wahakamwa ya Byoshe Yehova nendeka ngwendi: ‘Njilwisa aba tunyungi, co njikatondela bimanga bange mu mitwe yabo, co njikecelesa aba tunyungi kulisa bimanga bange, co aba tunyungi kubakalilisa lalo bakebo babenya. Njikobola bimanga bange ku tunwa twabo, co bimanga bange kubakapu lalo byakulya byabo.’”

11 “‘Mwafwa Mwata Wahakamwa ya Byoshe Yehova nendeka ngwendi: “Taleni! Yange babenya njitonda bimanga bange, co njikabanyunga. 12 Njikanyunga bimanga bange ngwe kanyungi uje nawana bimanga bendi baje banashandokele, co ali na kubalisa. Njikabambata ku mitambela yoshe kuje kubashandokelele ha litangwa lya mashelwa na lisusulungu lyakama. 13 Njikabatundisa mukati ka baka-mafuti na kubakungulula kutunda mu mafuti na kubanena mu lifuti lyabo na kubalisila ha minkinda ya Isalele, ku bana ba bindonga na ku myela yoshe ya kukala. 14 Njikabalisila mu bulilo bwabubwa, co bakalila ha minkinda yailaha ya Isalele. Bakalala kuje ku mitambela yaibwa ya kulila, co bakalila ha bulilo bwabubwa manene bwa ha minkinda ya Isalele.”

15 “‘“Yange babenya njikalisa bimanga bange, co lalo yange babenya njikababutamesa,” ngwendi Mwata Wahakamwa ya Byoshe Yehova. 16 “Njikashakezeka manga uje nazimbala, co uje nongumuka njikamwilwisa mu butanga, co uje nabulumuka njikamukuta nanga, co uje nazeye njikamukanyamesa. Oloni manga wa kununa nou wa kukanyama njikabanyongesa. Njikabana kusompa kupwa byakulya byabo.”

17 “‘Oloni yeni bimanga bange, Mwata Wahakamwa ya Byoshe Yehova nendeka ngwendi: “Ololo njisompa mukati ka manga umo na manga mukwabo, mukati ka bimanga ba nkomba na bimembe ba nkomba. 18 Kuma kukwapwilemo kuli yeni kulya ha bulilo bwabubwa manene ndi? Kuma munapande lalo kulyatangela ha bulilo bweni bwoshe na mendi eni ndi? Munima ya kunwa mema a kujela manene, kuma munapande kuwabundula na mendi eni ndi? 19 Kuma bimanga bange banapande kulya ha bulilo hamunalyatangela na mendi eni na kunwa mema amunabundula na mendi eni ndi?”

20 “‘Ngeci Mwata Wahakamwa ya Byoshe Yehova ali na kubaleka ngwendi: “Taleni, yange babenya njikasompa mukati ka manga wa kununa na manga wa kuyondwa, 21 mwafwa mwapangesele bimati byeni na bitsili byeni mu kusindika baka-kubinja boshe, co mwatwaleleleleho kubanakula na mambinga eni kweta noho hamwabashandwelele kulako. 22 Njikobola bimanga bange, co kubakapu lalo byakulya bya tusitu, co njikasompa mukati ka manga umo na mukwabo. 23 Njikabangwila ngamba yange Devidi mangana apwe kanyungi kabo, co akabalisa. Ikeye akabalisa, co akapwa kanyungi kabo. 24 Co yange Yehova Njambi njikapwa Njambi yabo, co ngamba yange Devidi akapwa mwata mukati kabo. Yange Yehova njinendekamo.

25 “‘“Co njikalinga nabo cikumiiyo ca kwoloka na kutundisa bikashama ba bukalu muje mu lifuti, mangana bakale mwamubwa kwa kujeneka bushonde mu mambo na kulala mu bishwata. 26 Njikababezikisa* na kubezikisa mwela uje unazengeleka lilundu lyange, co njikanyokesa nyonzi ha simbu inapande. Bibezikiso bikanyoka ngwe nyonzi. 27 Miti ya mu lifuti ikema bushuka bwayo, co libu likatuhula bimbuto, co banu bange bakakala mwamubwa kwa kujeneka bushonde mu lifuti. Co bakazibuka ngwabo yange Yehova munjikapokola bijoko byabo na kubapatula kuli baje banabapwisa bindungo. 28 Co kubakapu lalo byakulya bya baka-mafuti, co bikashama ba ha lifuti-libu kubakababwondo, co bakakala mwamubwa kwa kujeneka bushonde, co naumo wahi akabazibisa lyoba.

29 “‘“Njikabana mwela uje ukatsimana mwafwa ya bimbuto bibakunamo, co kubakatsi lalo ku njala mu lifuti, co lalo baka-mafuti kubakabashaula. 30 ‘Ngeci bakazibuka ngwabo yange Yehova Njambi yabo njili hamo nabo, co bakebo banu bakunjibo ya Isalele banapu banu bange,’ ngwendi Mwata Wahakamwa ya Byoshe Yehova.”’

31 “‘Oloni yeni bimanga bange, bimanga baje banjaka mbunge mwapwa mu banu lika, co yange njinapu Njambi yeni,’ ngwendi Mwata Wahakamwa ya Byoshe Yehova.”

35 Yehova wanjilekele lalo ngwendi: 2 “Muna munu, tala ku mutambela wa minkinda ya Seya na kupolofweta byuma bikalingiwa kuli ukewo. 3 Uleke ngwobe, ‘Mwata Wahakamwa ya Byoshe Yehova nendeka ngwendi: “Njikulwisa obe mutambela wa minkinda ya Seya, co njolola liboko lyange na kukulwisa na kukubiisa na kukupwisa ngundu. 4 Njikanyongesa binganda byobe, co ukabihya na kupwa ngundu, co ukazibuka ngwobe yange Yehova. 5 Mwafwa watwaleleleleho kuzinda baIsalele, co wabanene ku mukwale ha simbu ibakele mu bukalu, ha simbu ya kashitiko kabo kamamaneselelo.”’

6 “Mwata Wahakamwa ya Byoshe Yehova nendeka ngwendi, ‘Ngeci njilisinga ha kuyoya kwange ngwange njikalingisa maninga obe bawetile, co kutsa* kukakukaba. Kutsa kukakukaba mwafwa wazindile maninga awetilile.* 7 Njikabiisa mutambela wa minkinda ya Seya na kuupwisa ngundu, co njikatsiya munu woshe uje akaitamo. 8 Co njikashulisa minkinda ya Seya na bibimbi, co baje bakatsa ku mukwale bakawila ha malundu obe na mu bingulunga byobe na mu bana bobe ba bindonga boshe. 9 Njikakupwisa ngundu myaka na myaka, co wahi akakala mu binganda byobe, co ukazibuka ngwobe yange Yehova.’

10 “Omwo wendekele ngwobe, ‘Ei miyati ibali, nawa mafuti abali bikapwa byange, co byoshe bibali tukabiswana,’ nameme Yehova babenya kwakele, 11 ‘ngeci njilisinga ha kuyoya kwange’ ngwendi Mwata Wahakamwa ya Byoshe Yehova, ‘ngwange njikulinga kwesekesa na kulubala na cipululu ciwabamwesele muwabazindile. Co njikalizimbula mukati kabo munjikakusompa. 12 Co ukazibuka ngwobe yange Yehova njinazibi majwi oshe a likamba aunendeka kutalesa ku minkinda ya Isalele muunendeka ngwobe, “Inapu ngundu, co banatwanayo mangana tuibwonde.”* 13 Wendekele majwi amabi hali yange mu kulyalesa, co wendekele byuma byabingi byabibi hali yange. Byoshe njinabizibi.’

14 “Mwata Wahakamwa ya Byoshe Yehova nendeka ngwendi: ‘Lifuti-libu lyoshe likalisamba munjikakubiisa na kukupwisa ngundu. 15 Ngecilika muwalisambele omwo buswana bwa banu bakunjibo ya Isalele bwapwile ngundu, nobe mukemwo munjikakulinga. Ukabihya na kupwa ngundu, obe mutambela wa minkinda ya Seya, eyo Edomu yoshe, co bakazibuka ngwabo yange Yehova.’”

36 “Oloni yobe muna munu, polofweta kutalesa ku minkinda ya Isalele, co endeka ngwobe, ‘Eni minkinda ya Isalele tolilileni lijwi lya Yehova. 2 Mwata Wahakamwa ya Byoshe Yehova nendeka ngwendi: “Citozi namyendeka ngwendi, ‘Ewa! Na myela ya kulunduka ya kusañulu inapu buswana bwetu.’”’

3 “Ngeci, polofweta ngwobe, ‘Mwata Wahakamwa ya Byoshe Yehova nendeka ngwendi: “Omwo banamipwisa ngundu, bamilwisa kutundilila ku mitambela yoshe mangana mupwe buswana bwa baje banoboka* mukati ka baka-mafuti, co lalo banu bali na kumyendeka na kumibiisa lizina. 4 Ngeci, tolilileni lijwi lya Mwata Wahakamwa ya Byoshe Yehova, eni minkinda ya Isalele. Mwata Wahakamwa ya Byoshe Yehova nendeka ku minkinda na ku malundu na ku bana ba bindonga na ku bingulunga na ku myela ije inapu bingundu na ku binganda bibasezele bije bibapukwile, bije lalo bibashendumwine baka-mafuti aje anabizengeleka baje bobokele, 5 kuli boshe aba, Mwata Wahakamwa ya Byoshe Yehova nendeka ngwendi: ‘Njikasompa mu butenu bwange baka-mafuti baje bakoboka, na baka-Edomu boshe baje babwahelelele manene na kumishendumuna, co banendeka ngwabo lifuti lyange linapu buswana bwabo mangana bambate bulilo bwalyo na kulipukula.’”’

6 “Ngeci, polofweta kutalesa ku lifuti lya Isalele, co leka minkinda na malundu na bana ba bindonga na bingulunga ngwobe, ‘Mwata Wahakamwa ya Byoshe Yehova nendeka ngwendi: “Taleni! Njikendeka mu butenu na mu kulubala mwafwa banamizibisa shwamwa baka-mafuti.”’

7 “Ngeci Mwata Wahakamwa ya Byoshe Yehova nendeka ngwendi: ‘Njimika liboko lyange na kulisinga ngwange mafuti anamizengeleka akaziba shwamwa. 8 Oloni yeni, eni minkinda ya Isalele mukamenesa miti ije ikakala na minango yaingi na kwima bushuka bwa banu bange baIsalele, mwafwa ololo beluka. 9 Mwafwa njili hamo neni, co njikamyaka mbunge, co lalo njikamilima na kumikuna bimbuto. 10 Njikatumisa banu beni, bakunjibo ya Isalele boshe, co mu binganda mukakala banu, co mitungo ije inabihya bakaitungulula. 11 Eyo njikatumisa banu beni na bimuna beni. Bakatuma na kupwa babangi, co njikamilingisa bamitunge ngwe mubamitungile kunima. Njikamilingisa muyoye mwamubwa kutubakana mumwakele na kuyoyela kunima, co mukazibuka ngweni yange Yehova. 12 Njikalingisa lalo banu bange baIsalele bende hali yeni, co bakamiswana. Mukapwa buswana bwabo, co kumukabanyeke lalo bana babo.’”

13 “Mwata Wahakamwa ya Byoshe Yehova nendeka ngwendi: ‘Omwo bali na kumileka ngwabo, “Yeni munapu lifuti lije lili na kubwonda banu na kutsiya bana ba miyati yeni,”’ 14 ‘ngeci kumukabwondo lalo banu nambe kunyeka miyati bana,’ ngwendi Mwata Wahakamwa ya Byoshe Yehova. 15 ‘Kunjikamyecelela lalo ngwange baka-mafuti bamituka-tuke nambe kutabesa banu bamishendumune, co kumukatanwisa lalo miyati yeni,’ ngwendi Mwata Wahakamwa ya Byoshe Yehova.”

16 Co Yehova wanjilekele lalo ngwendi: 17 “Muna munu, bakunjibo ya Isalele mubakele mu lifuti lyabo balijwalesele na bingila byabo na bilinga byabo. Bingila byabo byapwile ngwe mazilo a munakazi uje ali ku ngonde. 18 Mukemwo njabetilile butenu bwange mwafwa ya maninga abetilile mu lifuti, co lalo mwafwa bajwalesele lifuti na tumponya babo ba bunyengwe.* 19 Ngeci, njabashandwelele mukati ka baka-mafuti na kubashandanganena mukati ka mafuti. Njabasompele kwesekesa na bingila byabo na bilinga byabo. 20 Oloni mubaile oku ku mafuti, banu bajwalesele lizina lyange lya kujela ha kubendeka ngwabo, ‘Aba banapu banu ba Yehova, oloni banaseze lifuti lyendi.’ 21 Ngeci, njikaka mbunge ku lizina lyange lya kujela lije libanajwalesa bakunjibo ya Isalele mukati ka baka-mafuti mubanai.”

22 “Ngeci, leka bakunjibo ya Isalele ngwobe, ‘Mwata Wahakamwa ya Byoshe Yehova nendeka ngwendi: “Kunjesi na kulinga ebi mwafwa yeni, eni bakunjibo ya Isalele, oloni njili na kubilinga mwafwa ya lizina lyange lya kujela limunajwalesa mukati ka baka-mafuti mumunai.”’ 23 ‘Cili bene njikajelesa lizina lyange lyakama lije lyajwalele hakati ka baka-mafuti, lije limwajwalesele mukati kabo. Co baka-mafuti bakazibuka ngwabo yange Yehova, munjikalijelesa mukati kabo oku banamitala,’ ngwendi Mwata Wahakamwa ya Byoshe Yehova. 24 Njikamitundisa mukati ka baka-mafuti na kumikungulwila hamo kutunda mu mafuti oshe na kuminena mu lifuti lyeni. 25 Njikamishamwina mema a kujela mangana mujele. Njikamijelesa ku mazilo eni oshe na ku tumponya beni boshe ba bunyengwe. 26 Njikamyana mbunge yaiha na kumyaka sipilitu yaiha mu mibila yeni. Njikatundisa bimbunge bya mamanya mu mibila yeni na kumyana bimbunge bya situ.* 27 Njikaka sipilitu yange mu mibila yeni, co njikamilingisa mukabangeye mashiko ange, co mukononoka na kukabangeya kusompa kwange. 28 Co mukakala mu lifuti linjanene bakukulwila beni. Mukapwa banu bange, co yange njikapwa Njambi yeni.’

29 “‘Njikamitundisa ku kujwala kweni kwoshe na kuleka bimbuto ngwange bime manene, co kunjikaminenela njala. 30 Njikatumisa bushuka bwa miti na byakulya bya mu shwata mangana keti mukazibe lalo shwamwa ya kutsa njala mukati ka baka-mafuti. 31 Co mukanuka bingila byeni byabibi na bilinga byeni bije kubyapwile byabibwa, co umo na umo weni akalizinda ikeye babenya mwafwa ya milonga yendi na bilinga byendi bya bunyengwe. 32 Oloni zibukeni eci: Kunjesi na kulinga ebi mwafwa yeni,’ ngwendi Mwata Wahakamwa ya Byoshe Yehova. ‘Oloni zibeni shwamwa na kushauka mwafwa ya bingila byeni, eni bakunjibo ya Isalele.’

33 “Mwata Wahakamwa ya Byoshe Yehova nendeka ngwendi: ‘Ha litangwa linjikamijelesa ku milonga yeni yoshe, njikalingisa mu binganda mukale banu, co mitungo ije inabihya bakaitungulula. 34 Lifuti lije lyapwile ngundu, lije libakele na kumona boshe bakele na kwita, bakalilima. 35 Co banu bakendeka ngwabo: “Lije lifuti lyapwile ngundu linapu ngwe lihya lya Edeni, co binganda bije byabihile na kupwa bingundu na kusiuka binakanyama, co muli banu.” 36 Co mafuti aje anamizengeleka aje akasalaho akazibuka ngwawo yange Yehova, yange njinatungu bije bibasiwile, co njinakunu miti mu lifuti lije libabiisile. Yange Yehova njinendekamo, co njinalingimo.’

37 “Mwata Wahakamwa ya Byoshe Yehova nendeka ngwendi: ‘Njikatabesa lalo bakunjibo ya Isalele banjilombe eci: Ngwabo njitumise mbunga yabo ngwe butanga, co njikalinga ngoco. 38 Binganda bije byabihile bikashula na mbunga ya banu ngwe mbunga ya bakujela, ngwe butanga bwa Jelusalema* ha simbu ya bilika byendi. Co bakazibuka ngwabo yange Yehova.’”

37 Liboko lya Yehova lyezile hali yange, co Yehova wanjambatele na sipilitu yendi na kukanjitumbika hakati ka cana, co muje mu cana mwashulile bitsiya. 2 Wanjitisile mukati kabyo byoshe, co njamwene ngwange muje mu cana mwakele bitsiya byabingi manene, co lalo byomine manene. 3 Co wanjihwile ngwendi: “Muna munu, kuma ebi bitsiya byasa kuyoya lalo ndi?” Co njakumbulwile ngwange: “Mwata Wahakamwa ya Byoshe Yehova yobe uzibuka.” 4 Co wanjilekele ngwendi: “Polofwetela ebi bitsiya na kubileka ngwobe, ‘Eni bitsiya byakuma, tolilileni lijwi lya Yehova:

5 “‘Mwata Wahakamwa ya Byoshe Yehova nendeka kuli ebi bitsiya ngwendi: “Njikalingisa muku ukobele muli yeni, co mukayoya. 6 Njikamyaka mishisha na mishuni na kumifwika cikanda na kumishokwela muku, co mukayoya. Co mukazibuka ngweni yange Yehova.”’”

7 Ngeci njapolofwetele ngwe muje mwanjishikile. Munjamanesele lika kupolofweta, kwakele miyoyo, miyoyo ya bitsiya bili na kulimbolanga, co bije bitsiya byashangumukile kulinungakana cimo na cikwabo. 8 Co njamwene bije bitsiya bishangumuka kukala na mishisha na mishuni, co cikanda cabifwikile. Oloni anga kubyakele na muku.

9 Co wanjilekele ngwendi: “Muna munu, polofweta ku lihunzi. Polofweta na kuleka lihunzi ngwobe, ‘Mwata Wahakamwa ya Byoshe Yehova nendeka ngwendi: “Obe lihunzi,* ija kutunda ku mahunzi awana, co huwila hali aba banu babatsiile mangana bayoye.”’”

10 Ngeci njapolofwetele muje bene mwanjishikile, co muku* wakobelele muli bakebo, co bashangumukile kuyoya, co lalo bemanene na kupwa mbunga yakama manene ya maswalale.

11 Co wanjilekele ngwendi: “Muna munu, ebi bitsiya binapu bakunjibo ya Isalele boshe. Bali na kwendeka ngwabo, ‘Bitsiya byetu binomu, co lilabelelo lyetu linahu. Tunanyongo.’ 12 Ngeci, polofweta na kubaleka ngwobe, ‘Mwata Wahakamwa ya Byoshe Yehova nendeka ngwendi: “Eni banu bange, njifukula bihilo byeni na kumitundisa mu bihilo byeni na kuminena mu lifuti lya Isalele. 13 Co mukazibuka ngweni yange Yehova munjikafukula bihilo byeni na kumitundisa mu bihilo byeni, eni banu bange.”’ 14 ‘Njikaka sipilitu yange muli yeni, co mukayoya, co njikamyaka mu lifuti lyeni, co mukazibuka ngweni yange Yehova njinendekamo na kulingamo,’ mukemwo mwanendeka Yehova.”

15 Yehova wanjilekele lalo ngwendi: 16 “Co yobe muna munu ambata citi usonekeho ngwobe, ‘Citi ca Juda na banu ba Isalele baje bali nendi.’* Co ambata citi cikwabo usonekeho ngwobe, ‘Citi ca Jozefu, citi ca Efremu na bakunjibo ya Isalele boshe baje bali nendi.’* 17 Co biwanese mangana bipwe citi cimolika mu liboko lyobe. 18 Banu bobe mubakakwihula ngwabo, ‘Tuleke, ebi byuma bilumbununa bika?’ 19 unapande kubaleka ngwobe, ‘Mwata Wahakamwa ya Byoshe Yehova nendeka ngwendi: “Njikambata citi ca Jozefu cije cili mu liboko lya Efremu, na miyati ya Isalele ije ili nendi, co njikabawanesa na citi ca Juda. Njikabapwisa citi cimolika, co bakapwa citi cimolika mu liboko lyange.”’ 20 Biti biukasoneka binapande kukala mu liboko lyobe mangana babimone.

21 “Co unapande kubaleka ngwobe, ‘Mwata Wahakamwa ya Byoshe Yehova nendeka ngwendi: “Njikatundisa baIsalele mukati ka baka-mafuti muje mubanai, co njikabakungulwila hamo kutunda ku mitambela yoshe na kubanena mu lifuti lyabo. 22 Njikabapwisa muyati umolika mu lifuti ha minkinda ya Isalele, co mwene umolika akabayula boshe, co kubakapu lalo miyati ibali, nambe kulyangununa lalo kupwa bumwene bubali. 23 Kubakalijwalesa lalo bakebo babenya na tumponya babo ba bunyengwe* na bilinga byabo bya bunyengwe na milonga yabo yoshe. Njikabobola ku kujeneka kulongwa kwabo kuje kwabalingisile balinge bubi, co njikabajelesa. Bakapwa banu bange, co yange njikapwa Njambi yabo.

24 “‘“Ngamba yange Devidi akapwa mwene yabo, co boshe bakakala na kanyungi umolika. Bakakabangeya kusompa kwange na kunyunga mwamubwa mashiko ange. 25 Bakakala mu lifuti linjanene ngamba yange Jakobu, muje mubayoyele bakukulwila beni. Bakakalamo myaka yoshe, bakebo na bana babo na bana ba bana babo. Co ngamba yange Devidi akapwa mwata* wabo myaka yoshe.

26 “‘“Co njikalinga nabo cikumiiyo ca kwoloka, cikapwa cikumiiyo ca myaka yoshe. Njikabazameka na kubatumisa, co njikaka mwela wange wa kujela mukati kabo myaka yoshe. 27 Tenti* yange ikakala hamo nabo,* co yange njikapwa Njambi yabo, co bakebo bakapwa banu bange. 28 Co baka-mafuti bakazibuka ngwabo yange Yehova njili na kujelesa Isalele omwo mwela wange wa kujela ukala mukati kabo myaka yoshe.”’”

38 Yehova wanjilekele lalo ngwendi: 2 “Muna munu, tala kuli Gogi wa ku lifuti lya Magogi, mukulunu wa bamyata* ba ku Mesheki na Tubau,* co polofweta muzimbu wa kumusompa. 3 Polofweta ngwobe, ‘Mwata Wahakamwa ya Byoshe Yehova nendeka ngwendi: “Njikulwisa obe Gogi, mukulunu wa bamyata ba Mesheki na Tubau. 4 Njikakulingisa uye mu ngila yeka na kukwaka tulobo mu bimbange byobe, co njikakulingisa uye na kulwa hamolika na maswalale bobe boshe, na tubalu na baka-kulonda tubalu boshe baje banazala bizalo byabibwa, baje banapu mbunga yakama, baje banambata bintelo byakama na bintelo byabindondo.* Boshe bakahwingisa mikwale. 5 Baka-Pelesha na baka-Ithopia na baka-Puti nabo bakaija hamo nabo, co boshe bakazala bitepa oku banakwata bintelo byabindondo mu maboko. 6 Baka-Goma na maswalale babo boshe, na bakunjibo ya Togama baje bakala ku mitambela ya kulako ya ku kunto, hamolika na maswalale babo boshe nabo bakaija. Banu babangi bakakala hamo nobe.

7 “‘“Libwaheseleni kulwa, co libwaheseleni nzita, yobe na maswalale bobe boshe baje banalikungulwila kuli yobe, co yobe ukapwa muka-kubashika.

8 “‘“Munima ya matangwa amangi bakakwilula.* Ku mamaneselelo a myaka, ukakobelela lifuti lije mubanelwisa banu baje banoboka ku mukwale, baje babanakungulula mukati ka banu babangi na kubelwisa ha minkinda ya Isalele ije inabihile ha myaka yaingi. Banu bakala omu mu lifuti banabelwisa kutunda mukati ka baka-mafuti, co boshe bali mwamubwa kwa kujeneka bushonde. 9 Ukaija na kubalwisa ngwe lihunzi lyakama, co ukafwika eli lifuti ngwe mashelwa, yobe hamolika na maswalale bobe na banu babangi baje bakakala hamo nobe.”’

10 “Mwata Wahakamwa ya Byoshe Yehova nendeka ngwendi: ‘Ha litangwa olyo, ukasinganyekako byuma bimo mu mbunge yobe, co ukamanga butumbe bwabubi. 11 Ukendeka ngwobe: “Njikakobelela lifuti lije lyakala na membo a kujeneka kunyungilila. Njikaya na kulwisa baje bali na kuyoya mwamubwa kwa kujeneka bushonde, kwa kujeneka cuma cibatanganesa, baje boshe bali na kuyoya mu membo a kujeneka bibumbe, nambe tupateso nambe mapito.” 12 Biyongola byobe bikapwa bya kupukula byuma byabingi na kulwisa myela ibabiisile muje munatungu banu na kulwisa banu baje babanakungulula kutunda mukati ka baka-mafuti baje bali na kulikungulwila bufuko na byuma byabingi, baje bali na kuyoya hakati ka lifuti-libu.

13 “‘Baka-Sheba na baka-Dedani na baka-kulinga mingoso ba ku Tashishi na maswalale* babo boshe bakendeka kuli yobe ngwabo: “Kuma uli na kukobelela eli lifuti mangana upukule byuma byabingi ndi? Kuma unakungulula maswalale bobe mangana bambate siuva na goudi na kwambata bufuko na bikwata na kupukula byuma byabingi ndi?”’

14 “Ngeci muna munu, polofweta, co leka Gogi ngwobe, ‘Mwata Wahakamwa ya Byoshe Yehova nendeka ngwendi: “Ha litangwa libakakala banu bange baIsalele mwamubwa kwa kujeneka bushonde ukananguka. 15 Ukaija kutunda mu lifuti lyobe, kutunda ku mitambela ya kulako ya ku kunto, yobe na banu babangi baje bali hamo nobe, boshe bakalonda ha tubalu, co bakapwa mbunga yakama ya maswalale babangi. 16 Ukaija na kulwisa banu bange baIsalele ngwe mashelwa aje afwika lifuti. Ku mamaneselelo a matangwa, njikakunena wakulwise lifuti lyange mangana baka-mafuti bakanjizibuke munjikalijelesa yange babenya kwitila muli yobe oku bali na kumona, obe Gogi.”’

17 “Mwata Wahakamwa ya Byoshe Yehova nendeka ngwendi: ‘Kuma keti yobe injendekele mu matangwa a kunima kwitila mu bangamba bange, tupolofweto ba Isalele, baje bapolofwetele ha myaka yaingi ngwabo njikakunena mangana wakulwise banu bange ndi?’

18 “Mwata Wahakamwa ya Byoshe Yehova nendeka ngwendi, ‘Ha litangwa lije lyakakobela Gogi mu lifuti lya Isalele, butenu bwange bwakama bukepuka. 19 Njikendeka mu butenu bwakama na mu kulubala manene, co ha litangwa lije, kukakala lindunduma lyakama mu lifuti lya Isalele. 20 Njikajajesa bisi ba mu kalunga-ndonga na tuzila na bikashama na byuma byoshe bya kukalaba hasi na banu boshe ba ha lifuti-libu. Co minkinda ikabujuka, mingenyangenya* ikawa, co bibumbe byoshe bikalundumukila hasi.’

21 “Mwata Wahakamwa ya Byoshe Yehova nendeka ngwendi: ‘Njikatumina Gogi mukwale ha minkinda yange yoshe. Munu na munu akapangesa mukwale wendi mu kulwisa ndolome yendi. 22 Njikamusompa,* njikamutumina mushongo wa kulitambwisa, co maninga amangi aketika. Njikamunyokesela nyonzi yakama na nyozi ya mamanya na tuhya na saufa. Njikabinyokesela hali ikeye hamolika na ha maswalale bendi na ha banu babangi baje bali hamo nendi. 23 Co cili bene njikamwesa bukama bwange na kulijelesa yange babenya na kulizimbula kuli baka-mafuti babangi, co bakazibuka ngwabo yange Yehova.’

39 “Co yobe muna munu, polofweta byuma bikalingiwa kuli Gogi, co muleke ngwobe, ‘Mwata Wahakamwa ya Byoshe Yehova nendeka ngwendi: “Njikulwisa obe Gogi mukulunu wa bamyata* ba Mesheki na Tubau. 2 Njikakulingisa uye mu ngila yeka na kukwendesa na kukulingisa utunde ku mitambela ya kulako ya ku kunto na kukunena ha minkinda ya Isalele. 3 Njikapupa buta bwa lusipa buli mu liboko lyobe lya cimoshwe na kupupa mikili ili mu liboko lyobe lya cilyo mangana biwe mu maboko obe. 4 Ukawila ha minkinda ya Isalele, yobe na maswalale bobe boshe na banu baje bakakala hamo nobe. Njikakwana ku tuzila ba kuliseza-seza baje bakali situ na ku bikashama mangana bakulye.”’

5 “‘Ukawila mu shwata mwafwa yange babenya njinendekamo,’ ngwendi Mwata Wahakamwa ya Byoshe Yehova.

6 “‘Co njikatumina Magogi tuhya hamolika na baje bakala mwamubwa ha mañanda kwa kujeneka bushonde, co bakazibuka ngwabo yange Yehova. 7 Njikalingisa banu bange baIsalele bazibuke lizina lyange lya kujela. Co kunjikecelela lizina lyange lya kujela balijwalese lalo. Co baka-mafuti bakazibuka ngwabo yange Yehova Wakujela mu Isalele.’

8 “Mwata Wahakamwa ya Byoshe Yehova nendeka ngwendi, ‘Eyo ebi byuma bikaija, co bikalingiwa. Eli likelyo litangwa linjinendeka. 9 Banu bakala mu binganda bya Isalele bakaya na kukungulula bitwa bya nzita mangana babwekese tuhya. Bakakungulula bintelo byabindondo* na bintelo byakama na mata a lusipa na mikili na bimbweti* na makunga. Co bakabipangesa mu kubweka tuhya ha myaka 7. 10 Kubakashinji miti mu mahya nambe kucaba bikuni mu shwata, mwafwa bakapangesa bitwa bya nzita mu kubweka tuhya.’

“‘Bakapukula byuma bya baje bapukwile byuma byabo na kwambata byuma bya baje bambatele byuma byabo,’ ngwendi Mwata Wahakamwa ya Byoshe Yehova.

11 “‘Ha litangwa lije, njikana Gogi cihilo mu Isalele, mu cingulunga ca baje bakai ku butuhukilo bwa litangwa bwa kalunga-ndonga, co cikazika ngila ya baje baketiko. Kuje kukekwo kubakatsinda Gogi na mbunga yendi yoshe, co bakatumbula uje mwela ngwabo Cingulunga ca Hamoni-Gogi. 12 Bakunjibo ya Isalele bakatsinda aba banu ha bingonde 7 mangana bajelese lifuti. 13 Banu boshe ba mu lifuti bakalinga cipangi ca kutsinda aba banu. Co eci cipangi cikabatsimanesa ha litangwa linjikalyana bumpau yange babenya,’ ngwendi Mwata Wahakamwa ya Byoshe Yehova.

14 “‘Banalume bakabana cipangi ca kwitangana mu lifuti na kutsinda bibimbi bije binasala ha lifuti-libu mangana bajelese lifuti. Bakatwalelelaho kubitonda-tonda ha bingonde 7. 15 Baje bakaita mu lifuti mubakamona citsiya ca munu, bakaka cizibukiso kuyehi naco, co baje babanana cipangi ca kutsinda bakacitsinda mu Cingulunga ca Hamoni-Gogi. 16 Co kuje kukakala lalo nganda ibakatumbula ngwabo Hamona,* co bakajelesa lifuti.’

17 “Oloni yobe muna munu, Mwata Wahakamwa ya Byoshe Yehova nendeka ngwendi: ‘Leka tuzila boshe na bikashama boshe ba mu shwata ngwobe, “Likungululeni, co mwije. Likungululeni na kuzengeleka mulambu uje unjili na kumibwahesela. Mulambu wakama unjili na kumibwahesela ha minkinda ya Isalele. Mukalya situ na kunwa maninga. 18 Mukalya situ ya baka-nzili na kunwa maninga a bamyata ba ha lifuti-libu. Mukalya bimanga ba nkomba, na bana ba bimanga, na bimembe na bingombe. Mukalya tusitu boshe ba kununa ba ku Bashani. 19 Mukalitupwila mazi na kunwa maninga kweta noho hamukapendela mulambu unjikamibwahesela.”’

20 “‘Ku mesa yange mukakuta situ ya tubalu, na ya baka-kulonda mu matemba, na ya baka-nzili, na ya baka-kulwa boshe,’ ngwendi Mwata Wahakamwa ya Byoshe Yehova.

21 “‘Njikamwesa bumpau bwange mukati ka baka-mafuti. Co baka-mafuti boshe bakalimwena byuma binjinasompo, na nzili* injinamwesa mukati kabo. 22 Kutunda ha litangwa olyo kutwala kulutwe, bakunjibo ya Isalele bakazibuka ngwabo yange Yehova Njambi yabo. 23 Co baka-mafuti bakazibuka ngwabo bakunjibo ya Isalele baile mu bufunge mwafwa ya milonga yabo, mwafwa kubapwile ba kulongwa kuli yange, ngeci njabashwekelele cihanga cange na kubana mu maboko a bitozi babo, co boshe batsile ku mukwale. 24 Njabalingile kwesekesa na kujwala kwabo na milonga yabo, co njabashwekelele cihanga cange.’

25 “Ngeci Mwata Wahakamwa ya Byoshe Yehova nendeka ngwendi: ‘Njikelwisa bafunge ba Jakobu na kuzibila ngozi bakunjibo ya Isalele boshe, co njikanyungilila lizina lyange lya kujela na nzili yange yoshe. 26 Munima ya kubazibisa shwamwa mwafwa ya bilinga byabo byoshe bya kujeneka kulongwa kuli yange, bakakala mwamubwa mu lifuti lyabo kwa kujeneka bushonde, co naumo wahi akabazibisa lyoba. 27 Munjikabelwisa kutunda mukati ka baka-mafuti na kubakungulula kutunda mu mafuti a bitozi babo, njikalijelesa lalo yange babenya mukati kabo ku mesho a baka-mafuti babangi.’

28 “‘Bakazibuka ngwabo yange Yehova Njambi yabo munjikabatuma mu bufunge mukati ka baka-mafuti na kubelwisa mu lifuti lyabo kwa kujeneka kusezako nambe umo. 29 Kunjikabashwekela lalo cihanga cange, mwafwa njiketila sipilitu yange ha njibo ya Isalele,’ ngwendi Mwata Wahakamwa ya Byoshe Yehova.”

40 Mu mwaka wa bu 25 utwakele mu bufunge, kumashangumukilo a mwaka, ha litangwa lya bu 10 omu mu ngonde, mu mwaka wa bu 14 kutunda hayawililile nganda, ha litangwa lije bene, liboko lya Yehova lyakele hali yange, co wanjitwalele mu nganda. 2 Kwitila mu bimona bya Njambi, Njambi wanjitwalele ku lifuti lya Isalele na kukanjaka ha munkinda waulaha manene haje hakele mutungo wa kulifwa na nganda ku mbwela.*

3 Mwanjitwalele kuje, njamwene munalume uje washolokele ngwe kopa. Wakele na bwanda bwa fulakisi na lihongo lya kupimisa* mu liboko lyendi, co wemanene mu cikolo. 4 Uje munalume wanjilekele ngwendi: “Muna munu, talesesa mwamubwa na tolilila mwamubwa, co aka mbunge ku byoshe binjikumwesa mwafwa ebi bikebyo biunezila kuno. Leka bakunjibo ya Isalele byoshe biumona.”

5 Njamwene cibumbe cije cazengelekele tempele hanja. Mu liboko lya uje munalume mwakele lihongo lya kupimisa lya bulaha bwa makyubiti 6 (ku kyubiti imo na imo wabwezeleleko bulaha bwa kweta ku mbanda ya liboko).* Uje munalume washangumukile kupima cije cibumbe, co mpimo yaco yapwile hamo na lihongo limo, co bulaha bwaco bwa kuya mwilu bwapwile hamo na lihongo limo.

6 Co wezile ku cikolo cije catalesele ku butuhukilo bwa litangwa na kulonda ha bindendelo byaco. Mwapimine cipamba ca cije cikolo kutunda kushongo imo kuya kushongo ikwabo, mu bwihi capwile hamo na lihongo limo, co mu bwihi bwa cipamba cikwabo kutunda kushongo imo kuya kushongo ikwabo, capwile hamo na lihongo limo. 7 Mulili na mulili wa baka-kunyunga wapwile hamo na lihongo limo mu bulaha, co lalo wapwile hamo na lihongo limo mu bwihi. Co kutunda ha mulili umo wa baka-kunyunga kuya ha mulili ukwabo wa baka-kunyunga kwetile makyubiti atanu. Bulaha bwa cipamba ca cikolo cije cakele kumukulo wa mwela wa kwita uje watalele mukati, bwapwile hamo na lihongo limo.

8 Wapimine uje mwela wa kwita uje watalesele mukati ka tempele, co wapwile hamo na lihongo limo. 9 Kutundaho, wapimine mwela wa kwita wa ku cikolo uje wapwile makyubiti 8, co wapimine na bingunzi byawo bya kumikulo bije byapwile makyubiti abali. Co ou mwela wa kwita wakele ku mutamba uje watalesele mukati ka tempele.

10 Kwakele milili ya baka-kunyunga itatu ku mutambela umo na umo wa cikolo ca kubutuhukilo bwa litangwa. Ei milili itatu yapwile hamo, co bingunzi bya kumikulo nabyo byapwile hamo.

11 Co wapimine cije cikolo. Mu bwihi, capwile makyubiti 10, co mu bulaha capwile makyubiti 13.

12 Mwela ubabatwile na cibumbe uje wakele halutwe lwa milili ya baka-kunyunga ku mitambela ibali, wapwile kyubiti imo. Umo na umo wa milili ya baka-kunyunga uje wakele ku mitambela ibali, wapwile makyubiti 6.

13 Co wapimine cikolo kutunda ku ciluli ca mulili umo wa baka-kunyunga* kuya ku ciluli cikwabo, co capwile makyubiti 25 mu bwihi. Cikolo cimo calitalele na cikolo cikwabo. 14 Co wapimine bingunzi bije byakele kumikulo bije byapwile makyubiti 60 mu bulaha na bingunzi bya kumikulo ya bikolo kuzenguluka lilapa lyoshe. 15 Kutunda kulutwe lwa cikolo ca kukobelela kuya kulutwe lwa mwela wa kwita, ku mutamba uje watalele mukati kwapwile makyubiti 50.

16 Kwakele mawindo aje akele na bipamba* bya kuya mu bulaha ha milili ya baka-kunyunga na ha bingunzi bya kumikulo bije byakele mu cikolo ku mitambela yoshe ibali. Mukati ka cimbimbi namwo mwakele mawindo. Ku mutambela umo na umo kwakele miti ya mashakabale ibacakwile ha bingunzi bya kumikulo.

17 Co wanjitwalele mu lilapa lya hanja, co njamwene milili ya kulila,* na mamanya abajalele mu lilapa lyoshe. Haje ha mamanya abajalele hakele milili ya kulila ya kupwa 30. 18 Mwela wa mamanya abajalele hasi, kumikulo ya bikolo wapwile hamo na bikolo mu bulaha. Awa mamanya akele mwisi.

19 Co wapimine bulaha bwa kutunda ku cikolo ca mwisi kuya ku nginga ya ku lilapa lya mukati. Bulaha bwaco bwapwile makyubiti 100 ku butuhukilo bwa litangwa na ku kunto.

20 Lilapa lya hanja lyakele na cikolo cije catalesele ku kunto, co wacipimine mu bulaha na mu bwihi. 21 Ku mutambela umo na umo kwakele milili itatu ya baka-kunyunga. Bingunzi byayo bya kumikulo na mwela wayo wa kwita byapwile hamo na cikolo ca kulibanga. Wapwile makyubiti 50 mu bulaha na makyubiti 25 mu bwihi. 22 Mawindo ayo na mwela wayo wa kwita na miti ya mashakabale ije ibacakwile byapwile hamo na bije byakele ku cikolo ca kubutuhukilo bwa litangwa. Banu bakele na kwetako mubakele na kulonda bindendelo 7, co halutwe lwabyo hakele mwela wa kwita.

23 Kwakele cikolo mukati ka lilapa cije calitalele na cikolo ca ku kunto na cije calitalele na cikolo ca ku butuhukilo bwa litangwa. Wapimine bulaha bwa kutunda ha cikolo cimo kuya ha cikolo cikwabo, co bwapwile makyubiti 100.

24 Kutundaho, wanjinenele ku mbwela,* co njamwene cikolo ku mbwela.* Wapimine bingunzi bya kumikulo yaco na mwela waco wa kwita, co byapwile hamo na bikwabo. 25 Ku mutambela umo na umo kwakele mawindo na mwela wa kwita. Aje mawindo alifwile na akwabo. Apwile makyubiti 50 mu bulaha na makyubiti 25 mu bwihi. 26 Co kwakele bindendelo 7 bije byakele na kuyako. Co mwela wabyo wa kwita wakele halutwe lwabyo. Co ha bingunzi byakele kumikulo hakele miti ya mashakabale ibacakwileho. Ha ngunzi imo na imo hakele muti umo ubacakwile.

27 Lilapa lya mukati lyakele na cikolo cije catalesele ku mbwela.* Wapimine mutambela wa ku mbwela* kutunda ku cikolo cimo kuya ku cikolo cikwabo. Co bulaha bwapwile makyubiti 100. 28 Kutundaho, wanjitisile mu cikolo ca ku mbwela* na kunjitwala mu lilapa lya mukati. Mwapimine cikolo ca ku mbwela,* capwile hamo na bikolo bikwabo. 29 Milili yaco ya baka-kunyunga na bingunzi byaco bya kumikulo na mwela waco wapwile hamo na bikwabo. Kwakele mawindo kumikulo yaco na ha mwela waco wa kwita. Capwile makyubiti 50 mu bulaha na makyubiti 25 mu bwihi. 30 Kwakele myela ya kwita ku mitambela yoshe ya lilapa. Yapwile makyubiti 25 mu bulaha na makyubiti 5 mu bwihi. 31 Mwela waco wa kwita watalesele ku lilapa lya hanja. Co ha bingunzi bije byakele kumikulo hakele miti ya mashakabale ibacakwileho, co cakele na bindendelo 8 bije byakele na kuyako.

32 Mwanjinenele mu lilapa lya mukati kutunda ku butuhukilo bwa litangwa, wapimine cije cikolo, co capwile hamo na bikwabo. 33 Milili yaco ya baka-kunyunga na bingunzi byaco bya kumikulo na mwela waco byapwile hamo na bikwabo, co kwakele mawindo mumikulo yaco na ha mwela waco wa kwita. Cije cikolo capwile makyubiti 50 mu bulaha na makyubiti 25 mu bwihi. 34 Mwela waco wa kwita watalesele ku lilapa lya hanja. Co ha bingunzi bije byakele kumikulo hakele miti ya mashakabale ibacakwileho, co kwakele na bindendelo 8 bije byakele na kuyako.

35 Co wanjinenele ku cikolo ca ku kunto na kucipima. Capwile hamo na bikwabo. 36 Milili yaco ya baka-kunyunga na bingunzi byaco bya kumikulo na mwela waco wa kwita byapwile hamo na bikwabo. Co kwakele mawindo mumikulo yaco na ha mwela wa waco wa kwita. Cije cikolo capwile makyubiti 50 mu bulaha na makyubiti 25 mu bwihi. 37 Bingunzi byaco bya kumikulo byatalesele ku lilapa lya hanja. Co ha bingunzi bije byakele kumikulo hakele miti ya mashakabale ibacakwileho. Co kwakele na bindendelo 8 bije byakele na kuyako.

38 Co ku bingunzi bya kumikulo ya bikolo kwakele mulili wa kulila uje wakele na cikolo. Muje mu mulili mukemwo mubakele na kukushila bwana bwa mutunu bwa kwenyeka.

39 Kwakele bimesa bibali ku mutambela umo na umo wa uje mwela wa kwita wa ku cikolo haje habakele na kutsiila bimuna ba bwana bwa mutunu bwa kwenyeka na bwana bwa kufwika bubi na bwana bwa milonga. 40 Mu ngila ya kuya ku cikolo ca ku kunto mwakele bimesa bibali hanja ya cikolo. Mwakele lalo bimesa bibali mu mwela wa kwita wa ku cikolo. 41 Kwakele bimesa biwana ku mutambela umo na umo wa cije cikolo. Bije bimesa byoshe byapwile 8 haje habakele na kutsiila bimuna ba milambu. 42 Bimesa biwana haje habakele na kutsiila bimuna ba bwana bwa mutunu bwa kwenyeka babishongele ha mamanya. Byapwile kyubiti imo na hafu mu bulaha na kyubiti imo na hafu mu bwihi na kyubiti imo na hafu mu bulaha bwa kuya mwilu. Bakele na kwakaho bikwata bya kupangesa mu kutsiiya bimuna ba bwana bwa kwenyeka na milambu. 43 Co mukati ka cibumbe mwoshe bakelemo masheufu a kupwa hamo na mbanda ya liboko mu bwihi. Co situ ibakele na kwana kupwa bwana bakele na kuyaka ha bimesa.

44 Hanja ya cikolo ca mukati hakele milili ya kulila ya baka-kwimba. Yakele mukati ka lilapa lya mukati kuyehi na cikolo ca ku kunto. Yatalesele ku mbwela.* Mulili ukwabo wa kulila wakele hayehi na cikolo ca ku butuhukilo bwa litangwa. Watalesele ku kunto.

45 Wanjilekele ngwendi: “Ou mulili wa kulila unatalesa ku mbwela* wa tupiistu baje bali na bipangi mu tempele. 46 Milili ya kulila ije inatalesa ku kunto ya tupilistu baje babanana cipangi ca ku mutula. Banapu bana ba Zadoki ba ku naanga ya baLevi baje babanana cipangi ca kushwena kuli Yehova mangana bamupangele.”

47 Co wapimine lilapa lya mukati, lyapwile makyubiti 100 mu bulaha na makyubiti 100 mu bwihi. Lyapwile hamo mu bimbango byoshe biwana. Mutula wakele halutwe lwa tempele.

48 Co wanjinenele ku mwela wa kwita wa ku tempele, co wapimine ngunzi ya kumukulo wa mwela wa kwita, co yapwile makyubiti atanu ku mutambela umo na makyubiti atanu ku mutambela ukwabo. Mu bwihi cije cikolo capwile makyubiti atatu ku mutambela umo na makyubiti atatu ku mutambela ukwabo.

49 Mwela wa kwita wapwile makyubiti 20 mu bulaha na makyubiti 11* mu bwihi. Banu bakele na kulonda ha bindendelo mangana bayeko. Kwakele bingunzi kumukulo waco. Imo yakele ku mutambela umo, ikwabo yakele ku mutambela ukwabo.

41 Co wanjinenele mu mwela wa kujela* wa hanja, co wapimine bingunzi byawo bya kumikulo. Byapwile makyubiti 6* mu bwihi ku mutambela umo na makyubiti 6 mu bwihi ku mutambela ukwabo. 2 Cije cikolo capwile makyubiti 10 mu bwihi, co bibumbe bya kumikulo ya cikolo byapwile makyubiti atanu ku mutambela umo na makyubiti atunu ku mutambela ukwabo. Wapimine bulaha bwawo, co yapwile makyubiti 40 mu bulaha na makyubiti 20 mu bwihi.

3 Co wakobelele mukati* na kupima ngunzi ya kumukulo wa cikolo. Mpimo yayo yapwile makyubiti abali, co cikolo capwile makyubiti 6 mu bwihi. Bibumbe bya kumikulo ya cikolo byapwile* makyubiti 7. 4 Kutundaho, wapimine mulili uje watalesele ku mwela wa kujela wa hanja, co mu bulaha wapwile makyubiti 20, mu bwihi wapwile lalo makyubiti 20. Co wanjilekele ngwendi: “Ou ukewo Mwela wa Kujela Manene.”

5 Co wapimine cibumbe ca tempele, co mpimo yaco yapwile makyubiti 6. Milili ya kumikulo ya tempele yapwile makyubiti awana mu bwihi. 6 Ei milili ya kumikulo yakele mu mikana itatu ya kulilundakana, co ha mukana na mukana hakele milili ya kupwa 30. Ku cibumbe ca tempele kwakele bwalo bwazengelekeleko haje hakwatelele milili ya kumikulo, oloni obu bwalo kubwakobelele mu cibumbe ca tempele. 7 Ku mitambela ibali ya tempele kwakele bindendelo bya kulizenga bije byakele na kwama mubyakele na kukanduka kutunda ku milili ya hasi kuya ku milili ya helu. Munu mwakele na kutunda ku milili ya kwisi na kwita mu milili ya hakati mangana aye ku milili ya kwilu, ije ndendelo nayo yakele na kuya na kwamenako.

8 Njamwene butenda bwa kujunduka buje bwazengelekele tempele, co mabula a milili ya kumikulo apwile hamo na lihongo lya makyubiti 6 kutunda hasi kweta mu mbango ya kwilu. 9 Mpimo ya cibumbe ca hanja ca milili ya kumikulo yapwile makyubiti 5. Ku milili ya kumikulo ije yapwile mutamba wa tempele kwakele mwela wa kujeneka byuma.*

10 Mukati ka tempele na milili ya kulila mwakele mwela uje wapwile makyubiti 20 mu bwihi ku mutambela na mutambela. 11 Mukati ka milili na mwela wa kujeneka byuma ku kunto mwakele cikolo, co cikolo cikwabo cakele ku mbwela. Mu bwihi uje mwela wa kujeneka byuma wapwile makyubiti atanu kuzengeleka tempele.

12 Mutungo wa ku bulahukilo bwa litangwa uje walitalele na mwela wa kujeneka byuma wapwile makyubiti 70 mu bwihi na makyubiti 90 mu bulaha. Mpimo ya cije cibumbe yapwile makyubiti atanu.

13 Wapimine tempele, co yapwile makyubiti 100 mu bulaha. Mwela wa kujeneka byuma na mutungo* na bibumbe byawo nabyo byapwile makyubiti 100 mu bulaha. 14 Mutambela wa kulutwe lwa tempele uje watalele ku butuhukilo bwa litangwa na ku mwela wa kujeneka byuma wapwile makyubiti 100.

15 Wapimine bulaha bwa mutungo uje watalele mwela wa kujeneka byuma kunima ya tempele, hamolika na myela yawo ya kwita ije yakele ku mitambela ibali, co obu bulaha bwapwile makyubiti 100.

Wapimine lalo na mwela wa kujela wa hanja, na mwela wa kujela wa mukati, na myela ya kwita ije yalitalele na lilapa, 16 na ha bipamba bya bikolo, na mawindo aje ali na mafremu a kuya mu bulaha, na myela ya kwita ije yakele muje mu mitambela itatu. Kuyehi na cipamba ca cikolo kwakele mabaya abapameyeye kutunda hasi kweta ku mawindo, co aje mawindo bawafwikile. 17 Bapimine helu lya cikolo na mukati ka tempele na hanja kuzengulwisa cibumbe coshe. 18 Haje ha cibumbe bacakwileho bakerubi na miti ya mashakabale, mukati ka bakerubi babali mwakele muti wa mashakabale, co kerubi na kerubi wakele na bihanga bibali. 19 Cihanga ca munu catalesele ku muti wa mashakabale ku mutambela umo, co cihanga ca ndumba catalesele ku muti wa mashakabale ku mutambela ukwabo. Omu mukemwo mubabicakwilile mu tempele yoshe. 20 Ha bibumbe bya mwela wa kujela kutunda hasi kweta kwilu kwambateselela na helu lya cikolo, bacakwileho bakerubi na miti ya mashakabale.

21 Bibuliko* bya ku mwela wa kujela byapwile hamo mu mitambela yoshe. Kulutwe lwa mwela wa kujela* kwakele cuma ca kufwa ngwe 22 mutula wa citi uje wapwile makyubiti atatu mu bulaha bwa kuya mwilu na makyubiti abali mu buhewa. Wakele na bingunzi bya mu bimbango, co litako lyawo na mikulo yawo byapwile bya biti. Co uje munalume wanjilekele ngwendi: “Ei ikeyo mesa ili kulutwe lwa Yehova.”

23 Mwela wa kujela wa hanja na mwela wa kujela manene byoshe byakele na mapito abali abali. 24 Lipito na lipito lyakele na mitamba ibali, co lyakele na kulyeteka. Lipito limo na limo lyakele na mitamba ibali. 25 Ha mapito a mwela wa kujela bacakwileho bakerubi na miti ya mashakabale, ngwe mubalingile ha bibumbe. Co lalo hanja kulutwe lwa mwela wa kwita bakeleko tumabaya. 26 Kumikulo ya myela ya kwita, na ha milili ya kumikulo ya tempele, na ha myela ya kwita hakele mawindo aje akele na mafremu a kuya mu bulaha na miti ya mashakabale ibacakwile.

42 Co wanjitwalele ku lilapa lya hanja ku kunto. Co lalo wanjinenele ku njibo ije yakele na milili ya kulila ije yakele ku bulahukilo bwa litangwa,* kuyehi na mwela wa kujeneka byuma. 2 Ku mutambela wa ku kunto wei njibo, kuje kwakele cikolo yapwile makyubiti* 100, co mu bwihi yapwile makyubiti 50. 3 Yakele mukati ka lilapa lya mukati na mamanya abajalele a lilapa lya hanja. Co lije lilapa lya mukati lyapwile makyubiti 20 mu bwihi. Ei njibo yakele na mitamba ibali ya kulitala, co mutamba na mutamba wakele na binjibo bitatu bya kulilundakana. 4 Mukati ka ije milili ya kulila yalitalele mwakele ngila, co ei ngila yapwile makyubiti 10 mu bwihi na makyubiti 100 mu bulaha,* co bikolo bya milili ya kulila byakele ku kunto. 5 Milili ya kulila ya kwilu ya muje mu njibo yapwile yaindondo kutubakana ya kwisi na ya hakati, mwafwa ngila yambateleko mutamba wayo umo. 6 Mwafwa hakele binjibo bitatu bya kulilundakana, oloni kubyakele na bingunzi ngwe bije bingunzi bya ku lilapa. Mukemwo mutamba wakama wa lubula lwayo baulile kutubakana milili ya kwisi nei ya hakati.

7 Cibumbe ca mamanya ca hanja cije cakele kuyehi na milili ya kulila ije yakele kuyehi na lilapa lya hanja lije lyalitalele na milili ya kulila ikwabo capwile makyubiti 50 mu bulaha. 8 Milili ya kulila ije yakele kuyehi na lilapa lya hanja yapwile makyubiti 50 mu bulaha, oloni milili ya kulila ije yalitalele na mwela wa kujela yapwile makyubiti 100 mu bulaha. 9 Kutunda ku lilapa lya hanja kuya ku milili ya kulila kwakele ngila ije yakele ku butuhukilo bwa litangwa.

10 Co lalo kwakele milili ya kulila mukati* ka cibumbe ca mamanya ca lilapa ku butuhukilo bwa litangwa, kuyehi na mwela wa kujeneka byuma na mutungo. 11 Mukati kei milili mwakele ngila ya kulifwa na ije yetile mu milili ya kulila ya ku kunto. Yapwile hamo mu bulaha na mu bwihi, co lalo yakele na butuhukilo bwa kulifwa, na tungisi ya kulifwa. Co bukobelelo bwayo 12 bwalifwile na bukobelelo bwa milili ya kulila ije yatalesele ku mbwela. Ku mashangumukilo a ngila kwakele bukobelelo, simbu kanda mucete ku cibumbe ca mamanya ca ku butuhukilo bwa litangwa kuje kubakele na kukobelela banu.

13 Co wanjilekele ngwendi: “Milili ya kulila ya ku kunto na milili ya kulila ya ku mbwela ije ili kuyehi na mwela wa kujeneka byuma yapwa milili ya kulila ya kujela muje mubakalila bwana bwa kujela manene tupilistu baje baija kuli Yehova. Omu mu milili mukemwo mubakaka bwana bwa kujela manene, bwana bwa binona, bwana bwa kufwika bubi, na bwana bwa milonga mwafwa wapwa mwela wa kujela. 14 Tupilistu mubakobela mu mwela wa kujela, kubapandele kutuhukamo na kuya ku lilapa lya hanja oku banazala bizalo bya kupangesa, mwafwa byapwa bya kujela. Banapande kuzala bizalo byeka asinoni baye ku myela ije ibanatabesa banu boshe-boshe.”

15 Mwamanesele kupima mwela wa tempele wa mukati,* wanjituhwisile hanja kupangesa cikolo cije cinatalesa ku butuhukilo bwa litangwa, co wapimine mwela woshe.

16 Wapimine mutambela wa ku butuhukilo bwa litangwa kupangesa lihongo lya kupimisa.* Kwesekesa na lihongo lya kupimisa, bulaha bwaco bwapwile hamo na mahongo 500* kutunda ku mutambela umo kuya ku mutambela ukwabo.

17 Wapimine mutambela wa ku kunto, co kwesekesa na lihongo lya kupimisa, bulaha bwaco bwapwile hamo na mahongo 500.

18 Wapimine mutambela wa ku mbwela, co kwesekesa na lihongo lya kupimisa, bulaha bwaco bwapwile hamo na mahongo 500.

19 Wazengulukile mutambela wa ku bulahukilo bwa litangwa, co wapimine bulaha bwa kupwa hamo na mahongo 500 kupangesa lihongo lya kupimisa.

20 Wapimine uje mwela mu mitambela yoshe iwana, co kwakele cibumbe cauzengelekele cije capwile hamo na mahongo 500 mu bulaha na mahongo 500 mu bwihi. Eci cibumbe cangunwine mwela wa kujela na wa hanja.

43 Co wanjitwalele ku cikolo cije catalesele ku butuhukilo bwa litangwa. 2 Co kuje njamweneko bumpau bwa Njambi ya Isalele butunda ku butuhukilo bwa litangwa, co lijwi lyendi lyazibikile ngwe cilumo ca mema ali na kucuma, co bumpau bwendi bwatwililile ceke ha lifuti-libu. 3 Binjamwene byafwile ngwe cimona cije cinjamwene munjezile* na kunyongesa nganda,* co byasholokele ngwe binjamwene kuyehi na ndonga ya Keba. Ngeci njatsikamene na kukulamena hasi.

4 Co bumpau bwa Yehova bwakobelele mu tempele* kwitila mu cikolo cije catalesele ku butuhukilo bwa litangwa. 5 Ngeci sipilitu* yanjijundwile na kunjitwala mu lilapa lya mukati, co njamwene ngwange tempele yashulile na bumpau bwa Yehova. 6 Co njazibile munu endeka nange kutundilila mu tempele, co uje munalume wezile na kwimana kumukulo wange. 7 Wanjilekele ngwendi:

“Muna munu, ou ukewo mwela wa litanda lyange na mwela hawalyata mendi ange. Mukemwo munjikala mukati ka banu ba Isalele myaka yoshe. Bakunjibo ya Isalele kubakajwalesa lalo lizina lyange lya kujela, bakebo na bimyene babo ha kulinga buhule bwa ku sipilitu na ha kulemesa tumponya baje babakele na kumona ngwe bimyene babo.* 8 Bajwalesele lizina lyange lya kujela ha kulinga byuma bya bunyengwe bibalingile omwo bakele cipamba cabo kuyehi na cipamba cange, na bibuliko byabo kuyehi na bibuliko byange, kuseza lika cibumbe mukati kange nabo, mukemwo njabanyongesele mu butenu bwange. 9 Ngeci, balikele kulinga buhule bwabo bwa ku sipilitu na kwecela kulemesa tumponya babo baje babakele na kumona ngwe bimyene babo,* co njikakala mukati kabo myaka yoshe.

10 “Oloni yobe muna munu, lumbunwina bakunjibo ya Isalele muinafu tempele mangana bazibe shwamwa mwafwa ya milonga yabo, co lalo banapande kulilongesa muinafu.* 11 Nga baziba shwamwa mwafwa ya byuma byoshe bibanalingi, co unapande kubamwesa mulunafwila lubula lwa tempele, nomu mubanaibwahesela, noku kunakela bikolo byayo bya kutuhukila na bikolo byayo bya kukobelela. Bamwese mulunafwila lubula lwayo na kubalumbunwina mashiko ayo, co byoshe bisoneke oku bali na kumona, mangana bazibuke mulunafwila lubula lwayo na kwononoka mashiko ayo. 12 Eli likelyo lishiko lya tempele. Mwela woshe wa helu lya munkinda wapwa wa kujela manene. Taleni! Eli likelyo lishiko lya tempele.

13 “Aha hakeho haunapu mutula mu biseteko bya makyubiti (ku kyubiti imo banabwezelelako seteko ya kupwa mu mbanda ya liboko).* Litako lyawo linapu kyubiti imo, co mu bwihi linapu kyubiti imo. Kwilu you mutula kuli mungilingili unazengulukako, co mu bwihi ou mungilingili unapu hamo na bulaha bwa kutunda ku munye wakama kweta na ku kamunye kakandondo nga liboko linajangumuka.* Aha hakeho halinapu litako lya mutula. 14 Bulaha bwa kutunda hasi ha litako lya mutula kweta ha bwalo bwa kwisi bunapu makyubiti abali, co obwo bwalo bunapu kyubiti imo mu bwihi. Bulaha bwa kutunda ha bwalo bwabundondo kweta ha bwalo bwakama bunapu makyubiti awana, co obu bwalo bunapu kyubiti imo mu bwihi. 15 Mutamba wa helu wa mutula wa kubwekela tuhya unapu makyubiti awana mu bulaha bwa kuya mwilu, co oku ku mutamba kuli mambinga awana. 16 Ou mutamba wa mutula wa kubwekela tuhya unapu hamo mu mitambela yoshe iwana. Unapu makyubiti 12 mu bulaha na makyubiti 12 mu bwihi. 17 Mitambela yoshe iwana ya bwimaneno bwa mutula inapu makyubiti 14 mu bulaha na makyubiti 14 mu bwihi. Co mungilingili uje ubanazengelekako unapu hafu ya kyubiti, co mpimo ya litako lyawo inatubakana bwalo bwa kwisi na kyubiti imo ku mitambela yoshe.

“Co bindendelo byawo binatalesa ku butuhukilo bwa litangwa.”

18 Co wanjilekele ngwendi, “Muna munu, Mwata Wahakamwa ya Byoshe Yehova nendeka ngwendi: ‘Awa akewo mashiko a mutula ababanene mubamanesele kutunga mutula, mangana baneneho bwana bwa mutunu bwa kwenyeka na kushamwinaho maninga.’

19 “‘Unapande kwana muna ngombe wa ha butanga kupwa bwana bwa kufwika bubi. Unapande kumwana kuli kapilistu wa ku naanga ya baLevi muna Zadoki uje aija kuli yange na kunjipangela,’ ngwendi Mwata Wahakamwa ya Byoshe Yehova. 20 ‘Unapande kwambatako maninga endi amo na kuwaka ku mambinga awana a mutula na ha bimbango biwana bya bwalo na ha mungilingili woshe mangana ujelese mutula na kuwanena mulambu wa kukonekela bubi. 21 Co ambata muna ngombe wa nkomba uje napu bwana bwa kufwika bubi mangana umwenyekele mu mwela ubanangula wa mu tempele, hanja ya mwela wa kujela. 22 Ha litangwa lyamucibali, ukane membe wamubwa wa nkomba kupwa bwana bwa kufwika bubi, co bakajelesa mutula ku bubi ngwe mubaujelesele ha kwana muna ngombe wa nkomba kupwa bwana bwa kufwika bubi.’

23 “‘Muumanesa kuujelesa ku bubi, ukane muna ngombe wamubwa wa nkomba wa ha butanga kupwa bwana, na manga wamubwa wa nkomba wa ha butanga. 24 Unapande kubanena kuli Yehova, co tupilistu banapande kukuba mwongwa hali aba bimuna, co lalo banapande kubana kuli Yehova kupwa bwana bwa mutunu bwa kwenyeka. 25 Ha matangwa 7, ukana membe wa nkomba kupwa bwana bwa ha litangwa na litangwa bwa kufwika bubi, ukana lalo na muna ngombe wa nkomba wa ha butanga na manga wa nkomba wa ha butanga. Ukana bimuna ba kujeneka kapenga* kupwa bwana. 26 Ha matangwa 7, banapande kwanena mutula bwana bwa kukonekela bubi, co banapande kuujelesa na kuubwahesa mangana bashangumuke kuupangesa. 27 Nga matangwa 7 aneti, co ha litangwa lya bu 8 na matangwa anatako, tupilistu bakana ha mutula bwana bweni bwa mutunu bwa kwenyeka na milambu ya kulila hamo, co mukanjizibisa kubwaha,’ ngwendi Mwata Wahakamwa ya Byoshe Yehova.”

44 Wanjinenele ku cikolo ca hanja ya mwela wa kujela cije catalesele ku butuhukilo bwa litangwa, co capwile ca kushoka. 2 Co Yehova wanjilekele ngwendi: “Eci cikolo citwalelelaho kupwa ca kushoka. Wahi napande kucishokolola, co lalo naumo wahi akobelelamo, mwafwa mukemwo munjinakobelela yange Yehova Njambi ya Isalele, ngeci cinapande kutwalelelaho kupwa ca kushoka. 3 Oloni mwata akatumamamo na kulya makende kulutwe lwa Yehova, mwafwa napu mwata. Akakobelela mu mwela wa kwita uje uli ku cikolo, co lalo akatuhukilamo.”

4 Co wanjinenele kulutwe lwa tempele kwitila mu cikolo ca ku kunto. Munjatalele, njamwene ngwange bumpau bwa Yehova bwashulile muje mu tempele ya Yehova. Ngeci njatsikamene na kukulamena hasi. 5 Co Yehova wanjilekele ngwendi: “Muna munu, tala na kutolilila mwamubwa na kwaka mbunge ku byuma byoshe binjikuleka na ku mashiko a tempele ya Yehova. Aka mbunge ku bukobelelo bwa tempele na ku bikolo byoshe bya kutuhukila bya mwela wa kujela. 6 Unapande kuleka bakunjibo ya Isalele baje banapu baka-kutengulukila ngwobe, ‘Mwata Wahakamwa ya Byoshe Yehova nendeka ngwendi: “Eni bakunjibo ya Isalele, munahyanesa bilinga byeni bya bunyengwe. 7 Mumukanene baka-kwija mu mwela wange wa kujela baje kubaile ku mukanda mu bimbunge byabo na mu situ, bakajwalesa tempele yange. Muli na kunjana makende na mazi na maninga okuni muli na kupokola cikumiiyo cange mwafwa ya bilinga byeni byoshe bya bunyengwe. 8 Kumwanyungile byuma byange bya kujela. Oloni munana bakweni bipangi bimunapandele kunjipangela mu mwela wange wa kujela.”’

9 “‘Mwata Wahakamwa ya Byoshe Yehova nendeka ngwendi: “Kukwesi muka-kwija uje ali na kuyoya mu Isalele uje kaile ku mukanda mu mbunge yendi na mu situ napande kukobela mu mwela wange wa kujela.”’

10 “‘Oloni baLevi baje bongumukile omwo Isalele wongumukile na kuya na kulemesa tumponya ba bunyengwe,* bakaliwana na bukalu buje butunda mu milonga yabo. 11 Co bakapwa bakakupangela mu mwela wange wa kujela mangana banyunge bikolo bya tempele na kupangela ku tempele. Bakatsiya bimuna kupwa bwana bwa mutunu bwa kwenyeka na mulambu wa banu, co bakemana kulutwe lwa banu na kubapangela. 12 Bakele na kupangela banu kulutwe lwa tumponya babo ba bunyengwe, co batanwisile bakunjibo ya Isalele na kubalingisa balinge bubi, mukemwo njinabolwela liboko lyange na kulisinga,’ ngwendi Mwata Wahakamwa ya Byoshe Yehova, ‘co baliwana na bukalu butunda mu milonga yabo. 13 Kubakanjishwene na kunjipangela ngwe tupilistu bange, nambe kushwena ku cuma cange coshe-coshe ca kujela, nambe kushwena ku byuma byange bya kujela manene, co bakaziba shwamwa mwafwa ya bilinga byabo bya bunyengwe bibalingile. 14 Oloni munima yebi, njikabapwisa baka-kutala bipangi bya ku tempele na kupanga bipangi byakwo na byuma byoshe bije binapande kulingiwako.’

15 “‘Oloni tupilistu ba ku naanga ya Levi, bana ba Zadoki baje bakele na kupanga bipangi ku mwela wange wa kujela omwo baIsalele bongumukile, bakebo bakashwena kuli yange na kwimana kulutwe lwange na kunjana mazi na maninga,’ ngwendi Mwata Wahakamwa ya Byoshe Yehova. 16 ‘Bakebo bakakobela mu mwela wange wa kujela na kushwena ku mesa yange mangana banjipangele, co bakapanga bipangi binjinabana.

17 “‘Mubaija mu bikolo bya lilapa lya mukati, banapande kuzala bizalo bya lineni. Kubapandele kuzala bizalo bya kutunga ha bwanda bwoshe-bwoshe mubaija na kupangela mu bikolo bya lilapa lya mukati nambe mukati ka lilapa. 18 Banapande kuzala binanga bya lineni ku mitwe yabo na kuzala tuputula twa lineni tuje tufwika bintungi byabo. Kubapandele kuzalo byuma byoshe-byoshe bije bibalingisa batukute. 19 Simbu kanda baye ku lilapa lya hanja kuje kubali banu, banapande kushulula bizalo bibanakala na kupangesa na kubyaka mu milili ya kujela ya kulila. Co banapande kuzala bizalo byeka mangana keti bashambwisile banu kujela kwitila mu bizalo byabo. 20 Kubapandele kukongobola mitwe yabo nambe kwecelela binkambu byabo bikole manene. Banapande kukamba binkambu bya ku mitwe yabo. 21 Tupilistu kubapandele kunwa binyu mubakobela mu lilapa lya mukati. 22 Kubapandele kwambata fwile nambe munakazi wa kulukulula, oloni banasa kwambata munakazi wa ku naanga ya Isalele uje kanda alilaleho laja na munalume nambe fwile ya kapilistu.’

23 “‘Tupilistu banapande kulongesa banu bange kuliseza kuli mukati ka byuma bya kujela na byuma kuti, co lalo banapande kubalongesa kuliseza kuli mukati ka byuma bya kujwala na byuma bya kujela. 24 Banapande kusompa biñanda. Banapande kusompa mu kulitombola na kusompa kwange. Banapande kunyunga mashiko ange na byuma binjinabaleke kutalesa ku bilika byange byoshe na kujelesa bisabata byange. 25 Tupilistu kubapandele kushwena cibimbi, keti ngoconi bapwa ba kujwala. Oloni banasa kulijwalesa bakebo babenya nga owo natsi napu ishabo, inabo, munabo wa munalume, munabo wa munakazi, ndolome yabo, nambe ndokazi yabo wa kujeneka kushomboka. 26 Munima ya kujelesa kapilistu, nanapande kubandamena matangwa 7, asina eluka ku cipangi. 27 Ha litangwa lyakobela mu mwela wa kujela mu lilapa lya mukati mangana akapangele mu mwela wa kujela, napande kwana bwana bwendi bwa kufwika bubi,’ ngwendi Mwata Wahakamwa ya Byoshe Yehova.

28 “‘Co obu bukebwo bupwa buswana bwabo: Yange njipwa buswana bwabo. Kumwapandele kubana buswana bwoshe-bwoshe mu Isalele, mwafwa yange buswana bwabo. 29 Bakebo bakalya bwana bwa binona na bwana bwa kufwika bubi na bwana bwa mulonga, co byuma byoshe bibanana kuli Njambi mu Isalele bikapwa byabo. 30 Bushuka bweni bwoshe bwabubwa manene buje bulibanga kuhya, na milambu yeni yoshe bikapwa bya tupilistu. Co munapande kwana tupilistu bunga bweni bwa bimbuto bya kulibanga buje buli na bitsetsi. Oku kulingisa bakubinjibo byeni babezike. 31 Tupilistu kubapandele kulya kazila nambe kasitu uje nalitsila nambe ibanasanyozola.’

45 “‘Mumutabula libu kupwa buswana, munapande kwanako mutamba umo wolyo libu kuli Yehova, co ou mutamba upwa wa kujela. Ou mutamba unapande kupwa makyubiti* 25,000 mu bulaha na makyubiti 10,000 mu bwihi. Mwela wawo woshe upwa wa kujela. 2 Mukati kowo mutamba munapande kukala mwela wa tempele wa kupwa hamo mu mitambela yoshe iwana. Co mutambela na mutambela wou mwela unapande kupwa makyubiti 500, co lalo ou mwela unapande kukala na bulilo bwa makyubiti 50 ku mutambela na mutambela. 3 Ku mwela ubanapimi, unapande kupima mwela wa kweta ku makyubiti 25,000 mu bulaha, na makyubiti 10,000 mu bwihi. Co mukati kawo mukakala tempele ije ikapwa cuma ca kujela manene. 4 Ukapwa mwela wa kujela wa tupilistu baje bakapangela mu tempele, baje bakashwene kuli Yehova mangana bamupangele. Ou ukewo ukapwa mwela wa binjibo byabo na mwela wa kujela wa tempele.

5 “‘Co mutamba wa baLevi baje bakapangela ku tempele ukapwe makyupiti 25,000 mu bulaha na makyubiti 10,000 mu bwihi. Co milili ya kulila ya kupwa 20 ikapwa buswana bwabo.

6 “‘Munapande kwana nganda mwela wa makyubiti 25,000 mu bulaha (wa kupwa hamo na mwela umwana kuli Njambi), co mu bwihi upwe makyubiti 5,000. Ou mwela ukapwa wa bakunjibo ya Isalele boshe.

7 “‘Co mwata bakamutetela libu ku mwela wa kujela ubanana kuli Njambi na ku mwela wa nganda. Eli libu likalyata na libu lya kujela libanana kuli Njambi na libu lya nganda. Eli libu likakala ku mutambela wa ku bulahukilo bwa litangwa na ku mutambela wa ku butuhukilo bwa litangwa. Eli libu mu bulaha kutunda ku nginga ya ku bulahukilo bwa litangwa kutwala ku nginga ya ku butuhukilo bwa litangwa linapande kupwa hamo na umo wa mitamba ya miyati. 8 Eli libu likapwa buswana bwendi mu Isalele. Bamyata bange kubakayandesa lalo banu bange, co bakana libu bakunjibo ya Isalele kwesekesa na miyati yabo.’

9 “Mwata Wahakamwa ya Byoshe Yehova nendeka ngwendi: ‘Eni bamyata ba Isalele munahyanesamo.’

“‘Eceleni lwozi lweni na kulyatelela banu bange, co lingeni byuma byabibwa na bya kusungama. Eceleni kunyeka banu bange libu,’ ngwendi Mwata Wahakamwa ya Byoshe Yehova. 10 ‘Munapande kupangesa bipeseleso bya kusungama, efa* ya kusungama na bathi* ya kusungama. 11 Kunapande kukala cipeseleso cimolika ca efa na cipeseleso cimolika ca bathi. Mu bathi munapande kukobela mahoma* 10, co lalo mu efa namwo munapande kukobela mahoma 10. Homa ikeyo imunapande kupimisa. 12 Shekele* inapu hamo na magera* 20. Co ha mashekele 20 kwakaho mashekele 25 na kwakaho mashekele 15, co ipwa mena* imo.’

13 “‘Ou ukewo mulambu umunapande kwana: mukane mutamba umo wa bu 6 wa efa mu homa na homa ya tiliku, na mutamba umo wa bu 6 mu homa na homa ya mbali. 14 Mazi amwana, banapande kuwapimina mu bathi. Mu kori* mukobela mabathi 10, co mabathi 10 anapu homa, mwafwa mabathi 10 anapu hamo na homa. 15 Co mu butanga bwa bimuna ba baIsalele, ha bimanga 200 banapande kwanaho umo. Ebi byoshe bakabipangesa kupwa bwana bwa binona na bwana bwa mutunu bwa kwenyeka na mulambu wa kulila hamo mangana bakonekele banu,’ ngwendi Mwata Wahakamwa ya Byoshe Yehova.

16 “‘Banu boshe ba muje mu lifuti bakana ou mulambu kuli mwata mu Isalele. 17 Oloni mwata ikeye akatala bya bwana bwa mutunu bwa kwenyeka, na bwana bwa binona, na bwana bwa byakunwa ha bilika, na bilika bya kutenama kwa bingonde, na Bisabata, na bilika byoshe bya bakunjibo ya Isalele. Ikeye akabwahesa bya bwana bwa kufwika bubi, na bwana bwa binona, na bwana bwa mutunu bwa kwenyeka, na mulambu wa kulila hamo mangana bakonekele bubi bwa bakunjibo ya Isalele.’

18 “Mwata Wahakamwa ya Byoshe Yehova nendeka ngwendi: ‘Mu ngonde ya kulibanga, ha litangwa lya kulibanga omu mu ngonde, munapande kwambata muna ngombe wamubwa wa nkomba mu butanga na kujelesa mwela wa kujela ku bubi. 19 Kapilistu akambata maninga amo a bwana bwa kufwika bubi na kuwaka ha bibuliko bya ku tempele na mu bimbango biwana bya bwalo buje bunazengeleka mutula na ha bibuliko bya ku cikolo ca lilapa lya mukati. 20 Ebi bikebyo biukalinga ha litangwa lya bu 7 omu mu ngonde, mwafwa ya munu uje nasebuka nambe uje nalingi bubi kwa kujeneka kuzibuka, co ukana mulambu wa tempele wa kukonekela bubi.

21 “‘Mu ngonde ya kulibanga, ha litangwa lya bu 14 omu mu ngonde, mukalinga cilika ca Paseka. Mukalya makende a kujeneka musima ha matangwa 7. 22 Ha litangwa olyo, mwata akana muna ngombe wa nkomba kupwa bwana bwa kufwika bubi bwendi na bubi bwa banu boshe ba muje mu lifuti. 23 Ha matangwa 7 a cilika, ou mwata akabwahesela Yehova bana ba bingombe 7 bababwa na bimanga ba nkomba 7 bababwa ha matangwa 7 kupwa bwana bwa mutunu bwa kwenyeka. Akana na membe wa cizamba ha litangwa na litangwa kupwa bwana bwa kufwika bubi. 24 Napande lalo kubwahesa efa imo ya binona ije yaana hamolika na muna ngombe wa nkomba umo na umo, na efa ikwabo ije yaana hamolika na manga na manga wa nkomba, hamolika na hini* ya mazi ha efa na efa.

25 “‘Mu ngonde ya bu 7, ha litangwa lya bu 15 omu mu ngonde ha matangwa 7 a cilika, ou mwata napande kubwahesa bwana bwa kufwika bubi bwa kulifwa na bwana bwa mutunu bwa kwenyeka na bwana bwa binona na mazi.’”

46 “Mwata Wahakamwa ya Byoshe Yehova nendeka ngwendi: ‘Cikolo ca lilapa lya mukati cije catalesa ku butuhukilo bwa litangwa cinapande kutwalelelaho kupwa ca kushoka ha matangwa 6 a kupanga, oloni ha litangwa lya Sabata na ha litangwa lya cilika ca kutenama kwa ngonde, munapande kucishokolola. 2 Mwata akatunda hanja na kukobelela ku cikolo ca mwela wa kwita, co akemana ku cibuliko ca cikolo. Tupilistu bakana bwana bwendi bwa mutunu bwa kwenyeka, na milambu yendi ya kulila hamo, co akakulama ha cipamba ca ha cikolo na kutuhuka, oloni cikolo kucapandele kupwa ca kushoka kweta na ku mangwezi. 3 Banu ba mu lifuti nabo bakatsikama kulutwe lwa Yehova ku cikolo ha Bisabata na ha bilika bya kutenama kwa ngonde.

4 “‘Bwana bwa mutunu bwa kwenyeka bwakana mwata kuli Yehova ha litangwa lya Sabata bunapande kupwa bwa bana ba bimanga bababwa ba nkomba ba kupwa 6 na manga wamubwa wa nkomba. 5 Bwana bwa binona bumwana hamolika na manga wa nkomba bunapande kupwa efa* imo, na byuma byoshe-byoshe byanasa kwana hamolika na bana ba bimanga ba nkomba hamolika na hini* ya mazi ha efa na efa. 6 Ha litangwa lya cilika ca kutenama kwa ngonde, mwata napande kwana bwana bwa muna ngombe wa nkomba wamubwa wa ha butanga, na bana ba bimanga ba nkomba ba kupwa 6, na manga wa nkomba. Aba bimuna boshe banapande kupwa bababwa. 7 Napande kwana efa ya bwana bwa binona hamolika na muna ngombe wa nkomba, na efa hamolika na manga wa nkomba, na byuma byoshe-byoshe byanasa kwana hamolika na bana ba bimanga ba nkomba. Co napande kwana hini ya mazi ha efa na efa.

8 “‘Mwata mwakobela, napande kukobelela ku cikolo ca mwela wa kwita, co mukemwo mwanapande kutuhukila lalo. 9 Co banu ba mu lifuti mubakaija kulutwe lwa Yehova ha simbu ya bilika, baje bakakobelela ku cikolo ca ku kunto mubakaija na kulemesa, banapande kutuhukila ku cikolo ca ku mbwela, co baje bakakobelela ku cikolo ca ku mbwela, banapande kutuhukila ku cikolo ca ku kunto. Wahi napande kutuhukila mu cikolo canakobelela mwafwa banapande kutuhukila mu cikolo cinalitala nabo. 10 Co mwata uje ali mukati kabo napande kukobela mubakobela, co napande kutuhuka mubatuhuka. 11 Ha bilika, na ha simbu ya bilika bikwabo, bwana bwa binona bunapande kupwa efa hamolika na muna ngombe na efa hamolika na manga wa nkomba na coshe-coshe canasa kwana munu hamolika na bana ba bimanga ba nkomba, hamolika na hini ya mazi ha efa na efa.

12 “‘Nga mwata abwahesa bwana bwa mutunu bwa kwenyeka nambe milambu ya kulila hamo kupwa bwana bwa kulishakela kuli Yehova, co banapande kumushokolwela cikolo cije cinatalesa ku butuhukilo bwa litangwa. Co akabwahesa bwana bwendi bwa mutunu bwa kwenyeka na milambu yendi ya kulila hamo ngecilika mwakalingi ha litangwa lya Sabata. Mwatuhukamo, banapande kushoka cikolo kunima yendi.

13 “‘Ha litangwa na litangwa munapande kubwahesa muna manga wa nkomba wamubwa uje ali na mwaka umo kupwa bwana bwa mutunu bwa kwenyeka kuli Yehova. Unapande kulinga ngoco mutondo na mutondo. 14 Muubwahesa ou mulambu, mutondo na mutondo unapande kubwahesa mutamba wa bu 6 wa efa kupwa bwana bwa binona hamolika na mutamba wamucitatu wa hini ya mazi a kushamwina ha fulawa yaibwa kupwa bwana bwa binona bubana simbu yoshe kuli Yehova. Eli linapu lishiko lya myaka na myaka. 15 Banapande kubwahesa muna manga wa nkomba na bwana bwa binona na mazi mutondo na mutondo kupwa bwana bwa mutunu bwa kwenyeka bubana simbu yoshe.’

16 “Mwata Wahakamwa ya Byoshe Yehova nendeka ngwendi: ‘Nga mwata ana bwana kuli umo na umo wa bana bendi ba banalume kupwa buswana, obu buswana bupwa bwa bana bendi. Bunapu buswana bwabo bubanaswana. 17 Oloni nga mwata ana umo wa bangamba bendi bwana kutunda ku buswana bwendi, buje bwana bukapwa bwa ngamba yendi kweta na mu mwaka wa kupatuka, co akabwilwisa kuli mwata. Oloni bwana bwanana mwata kuli bana bendi bukapwa bwabo myaka na myaka. 18 Mwata kapandele kunyeka banu buswana bwabo bwoshe-bwoshe ha kubasindiya ngwendi batunde ha libu lyabo. Napande kwana bana bendi ba banalume buswana bwa libu lyendi babenya mangana keti kukale umo hakati ka banu bange ibatundisa ha libu lyendi.’”

19 Co wanjikobelesele mukati kwitila mu cikolo cije cakele kumukulo wa cikolo cije ciya ku milili ya kulila ya kujela ya tupilistu ije yatalesele ku kunto. Co kuje njamweneko mwela kunima, ku bulahukilo bwa litangwa. 20 Co wanjilekele ngwendi: “Ou ukewo mwela ubakatelekela tupilistu bwana bwa milonga na bwana bwa kufwika bubi, co lalo kukekwo kubakocela bwana bwa binona mangana keti bambate cuma coshe-coshe na kucitwala mu lilapa lya hanja na kushambwisila kujela ku banu.”

21 Wanjituhwisile na kunjitwala mu lilapa lya hanja, co wanjitisile mu bimbango biwana bya lilapa, co njamwene lilapa mu mbango na mbango ya lilapa lya hanja. 22 Mu bimbango biwana bya lilapa mwakele tumalapa twatundondo tuje twapwile makyubiti 40* mu bulaha na makyubiti 30 mu bwihi. Co otu tumalapa twoshe tuwana twapwile hamo. 23 Kumikulo ya tuje tumalapa tuwana bazengulwisileko bwalo, co kwisi ya bwalo batungilileko myela ya kutelekela bwana. 24 Co wanjilekele ngwendi: “Ebi bikebyo binjibo mubakatelekela baka-kupangela ku tempele milambu ya kutunda ku banu.”

47 Co wanjinenele lalo ku bukobelelo bwa tempele, co kuje njamwene mema akele na kwita kuya ku butuhukilo bwa litangwa. Akele na kutunda kwisi ya cipamba ca tempele, mwafwa tempele yatalesele ku butuhukilo bwa litangwa. Mema akele na kwita kutundilila kwisi ku cilyo ca tempele, ku mbwela ya mutula.

2 Co wanjituhwisilile mu ngila ije iya ku cikolo ca ku kunto na kunjitwala hanja na kukanjizengulwisa ku cikolo ca hanja cije cinatalesa ku butuhukilo bwa litangwa, co njamwene mema ali na kundweka ku cilyo.

3 Uje munalume mwaile hanja ku butuhukilo bwa litangwa oku nakwata mukole wa kupimisa mu liboko lyendi, wapimine makyubiti* 1,000, co wanjilekele ngwendi njite mu mema. Aje mema asikisilile mu tusendengele.

4 Co wapimine lalo makyubiti 1,000 na kunjileka ngwendi njite lalo muje mu mema, co mema asikisilile mu mabuli.

Wapimine lalo makyubiti 1,000, co wanjilekele ngwendi njitemo, co aje mema asikisilile mu bintungi.

5 Mwapimine makyubiti 1,000 lalo, yapwile ndonga, co kunjasele kuijabuka na mendi mwafwa yalobele manene, co munu wapandele kulapa asina aijabuke. Munu kasele kujabuka ije ndonga na mendi.

6 Wanjihwile ngwendi: “Muna munu, unamono ebi ndi?”

Co wanjilekele ngwendi njende na kukanduka ha nunda ya ije ndonga. 7 Munjelukile, njamwene miti yaingi ku ngenge ya ije ndonga ku mitambela yoshe ibali. 8 Co wanjilekele ngwendi: “Awa mema ali na kwita na kuya ku mutambela wa ku butuhukilo bwa litangwa, co atwalelelaho na kuketa mu Alaba* na kukakobela mu kalunga-ndonga. Muikakobela mu kalunga-ndonga, mema alimo bakawakangwisa. 9 Byuma byoshe bya kuyoya bya mu ndonga bikasa kuyoya kwoshe kuwakaya mema.* Kukakala bisi babangi, mwafwa awa mema akayako. Mema a mu kalunga-ndonga bakawakangwisa, co byoshe bikayoya kwoshe kuje kuya ndonga.

10 “Baka-kutsiya bisi bakemana kumukulo wayo kutunda ku Eni-gedi kuketa na ku Eni-egilaimu, kuje kukakala mwela wa kushanda manda akama. Kukakala bisi babangi ba miyati ya kuliseza-seza, ngwe bisi ba mu Kalunga-ndonga Wakama.*

11 “Kukakala bishanja* na mashali, co ei myela kubakaikangwisa. Ikatwalelelaho kukala na mwongwa.

12 “Miti yoshe ya kuliseza-seza ije ibakali ikamena ku mitambela ibali ya ije ndonga. Maputa ayo kuwakajujwama, co kuikonwa kwima bushuka. Ngonde na ngonde ikema bushuka, mwafwa mema ayo ali na kutunda ku mwela wa kujela. Bushuka bwayo bukapwa byakulya, co maputa ayo akapwa bumbanda.”

13 Mwata Wahakamwa ya Byoshe Yehova nendeka ngwendi: “Ou ukewo mutambela umukana ku miyati 12 ya Isalele kupwa buswana bwa libu, co Jozefu akakala na mitambela ibali. 14 Mukaswana eli lifuti na kutambula myela ya kupwa hamo.* Njalisingile ngwange njana bakukulwila beni eli lifuti, co hano banamyanalyo kupwa buswana bweni.

15 “Ei ikeyo nginga ya lifuti ku kunto: Itunda ku Kalunga-ndonga Wakama na kwita ngila ya Hethiloni kuya na ku Zedadi, 16 na ku Hamathi, na ku Belotha, na ku Sibulaimu ije ili mukati ka mutambela wa Damasika na mutambela wa Hamathi, kuya na ku Haze-hatikoni ije ili ku nginga ya Haulani. 17 Ngeci, nginga ikatunda ku kalunga-ndonga na kuya ku Haza-enoni, kuketa ku nginga ya Damasika ku kunto, na ku nginga ya Hamathi. Ei ikeyo nginga ya ku kunto.

18 “Nginga ya ku mutambela wa butuhukilo bwa litangwa iketa mukati ka Haulani na Damasika, kumukulo wa Jodani mukati ka Giliyadi na lifuti lya Isalele. Munapande kupima bulaha bwa kutunda ku nginga ya ku kunto kuketa na ku kalunga-ndonga wa ku butuhukilo bwa litangwa.* Ei ikeyo nginga ya ku butuhukilo bwa litangwa.

19 “Nginga ya ku mbwela ikatunda ku Tamala na kuya ku mema a Melibathi-kadeshi, co iketa na ku Muna Ndonga* na ku Kalunga-ndonga Wakama. Ei ikeyo nginga ya ku mbwela.

20 “Nginga ya ku bulahukilo bwa litangwa inapu Kalunga-ndonga Wakama. Itunda ku nginga ya ku mbwela kuketa naha hailitalela na Lebo-Hamathi.* Ei ikeyo nginga ya ku bulahukilo bwa litangwa.”

21 “Munapande kulipangela eli lifuti mukati keni, mukati ka miyati 12 ya Isalele. 22 Munapande kulipangela eli libu kupwa buswana mukati keni na mukati ka baka-kwija baje bali mukati keni, baje banakukitila bana mukati keni. Co munapande kukabamona ngwe baIsalele bene. Bakatambula buswana mukati ka miyati ya Isalele hamolika neni. 23 Munapande kwana muka-kwija buswana mu mutambela wa muyati wanaija na kukala,” mukemwo mwanendeka Mwata Wahakamwa ya Byoshe Yehova.

48 “Awa akewo mazina a miyati kushangumukila ku nginga ya ku kunto. Mutambela wa Dani uneti mu ngila ya Hethiloni kuya ku Lebo-hamathi* kuya na ku Haza-enani, ku nginga ya Damasika ku kunto kuyehi na Hamathi. Co ou mutambela utunda ku nginga ya ku butuhukilo bwa litangwa kuketa na ku nginga ya ku bulahukilo bwa litangwa. 2 Mutambela wa Asha unalibatwila nginga na mutambela wa Dani, kushangumukila ku nginga ya ku butuhukilo bwa litangwa kweta ku nginga ya ku bulahukilo bwa litangwa. 3 Mutambela wa Nafutali unalibatwila nginga na mutambela wa Asha, kushangumukila ku nginga ya ku butuhukilo bwa litangwa kuketa ku nginga ya ku bulahukilo bwa litangwa. 4 Mutambela wa Manase unalibatwila nginga na mutambela wa Nafutali, kushangumukila ku nginga ya ku butuhukilo bwa litangwa kuketa ku nginga ya ku bulahukilo bwa litangwa. 5 Mutambela wa Efremu unalibatwila nginga na mutambela wa Manase, kushangumukila ku nginga ya ku butuhukilo bwa litangwa kuketa ku nginga ya ku bulahukilo bwa litangwa. 6 Mutambela wa Rubeni unalibatwila nginga na mutambela wa Efremu, kushangumukila ku nginga ya ku butuhukilo bwa litangwa kuketa ku nginga ya ku bulahukilo bwa litangwa. 7 Mutambela wa Juda unalibatwila nginga na mutambela wa Rubeni, kushangumukila ku nginga ya ku butuhukilo bwa litangwa kuketa ku nginga ya ku bulahukilo bwa litangwa. 8 Mutambela wa libu umukana kuli Njambi kupwa bwana ukalitabwila nginga na mutambela wa Juda, kushangumukila ku nginga ya ku butuhukilo bwa litangwa kuketa ku nginga ya ku bulahukilo bwa litangwa. Ou mwela unapande kupwa makyubiti* 25,000 mu bwihi, co lalo mu bulaha unapande kupwa hamo na mitambela ya miyati, kushangumukila ku nginga ya ku butuhukilo bwa litangwa kuketa ku nginga ya ku bulahukilo bwa litangwa. Co mwela wa kujela unapande kukala hakati kawo.

9 “Co mulambu wa libu umwakela Yehova kumukulo unapande kupwa makyubiti 25,000 mu bulaha na makyubiti 10,000 mu bwihi. 10 Ou mwela ukapwa mulambu wa kujela wa tupilistu. Ukapwa makyubiti 25,000 ku kunto na makyubiti 10,000 ku bulahukilo bwa litangwa na makyubiti 10,000 ku butuhukilo bwa litangwa na makyubiti 25,000 ku mbwela. Mwela wa kujela wa Yehova ukakala hakati kawo. 11 Lije libu likapwa lya tupilistu babanajelesa baje batunda ku bana ba Zadoki baje bapangele bipangi binjabanene, co lalo kubongumukile omwo baIsalele na baLevi bongumukile. 12 Bakakala na mutamba ku mulambu wa libu uje ubanaka kumukulo kupwa cuma ca kujela. Bakalibatwila nginga na baLevi.

13 “Mutamba wa libu lya baLevi ukata ku mwela wa tupilistu. Mu bulaha ukapwa makyubiti 25,000, co mu bwihi ukapwa makyubiti 10,000. (Mu bulaha bwoshe ukapwa makyubiti 25,000 na makyubiti 10,000 mu bwihi.) 14 Kubapandele kulilandesa nambe kulilandakana nambe kwanesa mutamba woshe-woshe weli libu lyalibwa manene, mwafwa linapu cuma ca kujela kuli Yehova.

15 “Co mwela ukasalako wa makyubiti 5,000 mu bwihi uje ukalibatwila nginga na mwela wa makyubiti 25,000, ukapwa wa kupangesa banu boshe-boshe mu nganda. Ukapwa wa kutungaho binjibo na mwela wa bulilo, co nganda ikakala hakati kawo. 16 Ebi bikebyo biseteko bya nganda: Nginga ya ku kunto inapu makyubiti 4,500, nginga ya ku mbwela inapu makyubiti 4,500, nginga ya ku butuhukilo bwa litangwa inapu makyubiti 4,500, co lalo na nginga ya ku bulahukilo bwa litangwa inapu makyubiti 4,500. 17 Bulilo bwa nganda bukapwa makyubiti 250 ku kunto, na makyubiti 250 ku mbwela, na makyubiti 250 ku butuhukilo bwa litangwa, na makyubiti 250 ku bulahukilo bwa litangwa.

18 “Bulaha bwa mwela ukasalako bukapwa hamo na mwela ubanana kupwa mulambu wa kujela. Ukapwa makyubiti 10,000 ku butuhukilo bwa litangwa na makyubiti 10,000 ku bulahukilo bwa litangwa. Bukapwa hamo na mwela ubanana kupwa mulambu wa kujela, co byakulya bikatundamo bikapwa bya baje bali na kupanga mu nganda. 19 Baje bali na kupangela nganda ba ku miyati yoshe ya Isalele bakalima eli libu.

20 “Libu lyoshe lije libakana kupwa mulambu, likapwa makyubiti 25,000 mu mitambela yoshe iwana. Munapande kulyaka kumukulo kupwa mulambu wa kujela hamolika na libu lya nganda.

21 “Mutamba uje ukasala ku mitamba ibali ya libu lije libanana kupwa mulambu wa kujela na libu lya nganda, bikapwa bya mwata. Ukalibatwila binginga na mutambela wa makyubiti 25,000 uje uli ku nginga ya ku butuhukilo bwa litangwa na uje uli ku bulahukilo bwa litangwa bwa uje mulambu. Ukapwa hamo na mitambela inalyata nawo, co ukapwa wa mwata. Mulambu uje ubanana kupwa libu lya kujela na mwela wa kujela wa tempele bikakala hakati kawo.

22 “Libu lya baLevi na libu lya nganda likakala mukati ka libu lya mwata. Mutambela wa mwata ukakala mukati ka libu lya Juda na libu lya Benjamini.

23 “Omu mukemwo muikapwa mitamba ya miyati inasalako: Mutamba wa Benjamini, ukashangumukila ku nginga ya ku butuhukilo bwa litangwa kuya ku nginga ya ku bulahukilo bwa litangwa. 24 Mutambela wa Simyoni ukalyata na mutambela wa Benjamini, kushangumukila ku nginga ya ku butuhukilo bwa litangwa kuya ku nginga ya ku bulahukilo bwa litangwa. 25 Mutambela wa Isakale ukalyata na mutambela wa Simyoni, kushangumukila ku nginga ya ku butuhukilo bwa litangwa kuya ku nginga ya ku bulahukilo bwa litangwa. 26 Mutambela wa Zebuloni ukalyata na mutambela wa Isakale, kushangumukila ku nginga ya ku butuhukilo bwa litangwa kuya ku nginga ya ku bulahukilo bwa litangwa. 27 Mutambela wa Gadi ukalyata na mutambela wa Zebuloni, kushangumukila ku nginga ya ku butuhukilo bwa litangwa kuya ku nginga ya ku bulahukilo bwa litangwa. 28 Nginga ya Gadi ije ili ku mbwela ikatunda ku Tamala na kuya ku mema a Melibathi-kadeshi, co iketa ku Muna Ndonga na ku Kalunga-ndonga Wakama.

29 “Eli likelyo libu limunapande kupangezela miyati ya Isalele kupwa buswana, co ei ikeyo ikapwa mitamba yabo,” ngwendi Mwata Wahakamwa ya Byoshe Yehova.

30 “Ebi bikebyo bikapwa bikolo bya kutuhukila bya nganda: Mutamba wa ku kunto ukapwa makyubiti 4,500.

31 “Bikolo bya nganda bakabiluka kwesekesa na miyati ya Isalele. Ha bikolo bitatu bya ku kunto hakakala cikolo ca Rubeni, cikolo ca Juda, na cikolo ca Levi.

32 “Mutambela wa ku butuhukilo bwa litangwa ukapwa makyubiti 4,500 mu bulaha, co kukakala bikolo bitatu, cikolo cimo cikapwa ca Jozefu, cikwabo cikapwa ca Benjamini, cikwaboco ca Dani.

33 “Mutambela wa ku mbwela ukapwa makyubiti 4,500, co ukakala na bikolo bitatu. Cikolo cimo cikapwa ca Simyoni, cikwabo cikapwa ca Isakale, cikwaboco ca Zebuloni.

34 “Mutambela wa ku bulahukilo bwa litangwa ukapwa makyubiti 4,500 mu bulaha, co ukakala na bikolo bitatu, cimo ca Gadi, cikwabo ca Asha, cikwaboco ca Nafutali.

35 “Nganda yoshe kuizenguluka ikapwa makyubiti 18,000, co kutunda lije litangwa kuya kulutwe lizina lya ije nganda likapwa, Yehova Kwali.”