NAHAMU
1 Ou ukewo muzimbu wa kusompa Ninive: Libulu lya cimona ca Nahamu* muka-Elikoshi:
2 Yehova wapwa Njambi uje watonda kumulemesa endilika, co akalingi shambandinga.
Yehova akalingi shambandinga, co nalibwahesela kumwesa butenu bwendi.
Yehova akalingi shambandinga ku bitozi bendi,
Co akatulikila bitozi bendi butenu bwendi.
3 Yehova kesi kulubala bwasi, co wakala na nzili yakama,
Oloni Yehova kakecelela baka-bubi kwa kujeneka kubana kashitiko kanabapande.
Ngila yendi ili mu lihunzi lije linyongesa, na mu lihunzi lyakama,
Co mashelwa anapu likungu lya ku mendi endi.
4 Atenukila kalunga-ndonga na kumumisa,
Omisa bindonga byoshe.
Bimena bya mu Bashani na mu Kameu bijujwama,
Co bintemo bya Lebanoni bijujwama.
5 Minkinda ininganga mwafwa yendi,
Co malundu asosonyoka.
Lifuti-libu lijaja mwafwa ya cihanga cendi,
Hamolika na kaye na byoshe byakalamo.
6 Iya asa kwimana kulutwe lwendi nga natenuka?
Co iya asa kukolesa nga nalubala?
Butenu bwendi bwitika ngwe tuhya,
Co mamanya atikika mwafwa yendi.
7 Yehova wapwa wamubwa, wapwa cimpaka ha litangwa lya bukalu.
Waka mbunge* baje batewela kuli ikeye.
8 Anyongesa Ninive na libazi lyakama,
Co bitozi ba Njambi bakala mu lisusulungu.
9 Butumbe muka buutumbila Yehova?
Akunyongesa.
Bukalu kubukaija lalo lwamucibali.
10 Mwafwa banu ba mu Ninive banalitapasana ngwe mingonga,
Co banapu ngwe baje banapende bwala,*
Oloni banyonga ngwe bishati bya kuma bibanenyeka.
11 Muli yobe mukatunda uje akatumba matumbe amabi a kulwisa Yehova,
Co akana cinangulo ca kujeneka seho.
12 Yehova nendeka ngwendi:
“Nameme bali manene na nzili, co lalo banatumu,
Babateta, co kubakalako.*
Njakuyandesa,* oloni kunjikakuyandesa lalo.
13 Hano njipokola joko yanakujeke,
Co njibatula malyenge obe hakati.
14 Yehova nashiki kutalesa kuli yobe,*
Ngwendi, ‘Lizina lyobe kulitwalelelaho kukalako.
Njinyongesa tumponya bobe ba kushonga na tumponya bobe ba bikubo mu njibo* ya binjambi bobe.
Njikubwahesela cihilo, mwafwa uzibisa bunyengwe.’
15 Taleni! Ha minkinda hali mendi a uje anena muzimbu waubwa,
Uje ambulula bya kwoloka.
Linga bilika byobe, obe Juda, shulisilila bikumiiyo byobe,
Mwafwa uje wa kujeneka seho kaketi lalo muli yobe.
Bamunyongesa.”
2 Muka-kushandola naija na kukulwisa.*
Nyunga myela ya kukola.
Kenga ku ngila.
Libwahesele na kupangesa nzili yobe yoshe.
2 Mwafwa Yehova elwisa bumpau bwa Jakobu
Na bumpau bwa Isalele,
Mwafwa baka-kubiisa byuma banababiisa,
Co banabiisa minango yabo.
3 Bintelo bya banu bendi ba nzili banabikwiti bulombo bwa kubenga,
Baka-kulwa bendi banazala bizalo bya kubenga.
Bikubo bya ku matemba endi a nzita bibyakula ngwe tuhya
Ha litangwa lyalibwahesela kulwa,
Bahwingisa makunga a bikundo bya junipa.
4 Matemba a nzita ashatuka lumbisi mu bitapalo.
Akanduka na kusikumuka mu myela ya mbunga.
Atwa ceke ngwe mitetengo na kubyakula ngwe muhyato.
5 Asana* maswalale bendi.
Batanuka mubatwalelelaho kwenda.
Bashatukila ku cibumbe ca nganda,
Bainyungilila.
6 Bikolo bya bindonga babishokolola,
Co lipela balisiula.
7 Banendeka ngwabo: Banamushaula,
Banamwambata, co bindungo bendi ba banakazi bali na kulila,
Bazibika ngwe mayembe omwo bali na kulipupa ha binulo.*
8 Mu matangwa ayo oshe, nganda ya Ninive yapwile ngwe lishali lya mema,
Oloni hano banu bali na kutewamo.
Bali na kubaleka ngwabo, “Imaneni! Imaneni!
Oloni naumo wahi eluka.
9 Pukuleni siuva, pukuleni goudi!
Bufuko bunatumu.
Nganda inashulu miyati yoshe ya byuma bya seho.
10 Nganda inasala mupulungwa, inabihya, inapu ngundu!
Bimbunge bya banu binalijujukila mwafwa ya lyoba, mabuli abo alimbola-mbola, bintungi byabo bijaja,
Boshe bamoneka kulishoshomwena.
11 Mwela wa bindumba uli kuli, mubakalila bana ba bindumba,*
Mwakatundu ndumba oku atwamenena munendi,
Kwa kujeneka umo wa kubazibisa lyoba?
12 Ndumba wasanyozwelele bana bendi situ yaingi,
Co watikinyilile bindumba ba lwabo bakele nabo tusitu.
Washulisile mena endi na situ,
Washulisile myela yendi na tusitu basanyozwele.
13 “Tala! Njikulwisa,” mukemwo mwanendeka Yehova wa maswalale,
“Njenyeka matemba obe a nzita, co akakumuka bwisi,
Co mukwale utsiya bana ba bindumba bobe.
Njikwecelesa kupukula bakweni ha lifuti-libu,
Co cilumo ca tutumwa bobe kucizibika lalo.”
3 Inabindama nganda ije ili na banu bali na kwitila maninga!
Inashulu na makuli na bwizi.
Simbu yoshe ili nebi bibanapukula.
2 Muli na kuzibika cilumo ca bibanzi na kwohya kwa mawili,
Muli na kuzibika misindo ya tubalu na matemba ali na kungwanjanga.
3 Muli banu banalondo ha tubalu, muli mikwale ibyakula, na makunga aje abyazima,
Muli banu babangi babanatsii, na mitumbo ya bibimbi,
Bibimbi bili na kulibwezelela.
Bali na kutwalelelaho kutanuka ha bibimbi.
4 Ebi byuma bilingiwa mwafwa ya kutuma kwa bilinga bya buhule bya lihule,
Uje wapwa wamubwa kumutala na mesho, muka-kupanda wa munakazi,
Uje atela baka-mafuti miheto kwitila mu buhule bwendi na kutela binaanga miheto kwitila mu kupanda kwendi.
5 Yehova wa maswalale nendeka ngwendi, “Tala! Njikulwisa,*
Njikambula mukanjo wobe kweta na ku cihanga cobe,
Njilingisa baka-mafuti bamone bushwamwa bwobe,
Na kulingisa bumwene bumone kushauka kwobe.
6 Njumbila mazilo hali yobe
Na kukulingisa uzibise bunyengwe.
Njikulingisa upwe cuma cibayongola banu.
7 Woshe akumona atewa kuli yobe na kwendeka ngwendi,
‘Ninive banamubiisa!
Iya amuzembeleka?’
Njiwana kuli baka-kukuzembeleka?
8 Kuma watubakana No-amoni,* uje wakele ku mema a mu tupila twa Nailo?
Mema amuzengelekele,
Bufuko bwendi bwapwile kalunga-ndonga, cibumbe cendi naco capwile kalunga-ndonga.
9 Wakele na kuwana nzili yakama kuli Ithopia na kuli Ijipiti.
Puti na baka-Libia bapwile bakwasi bendi.*
10 Oloni nendi wapwile funge,
Waile mu bufunge.
Bana bendi nabo babatikilile mu bitapalo byoshe.
Batelelele ñela banalume bendi ba bulemu,
Co banalume bendi boshe ba nzili babakele mu tukunju.
11 Nobe ukapenda,
Ukabanda.
Ukatonda kwa kutewela mwafwa ya citozi.
12 Myela yobe yoshe ya kukola inapu ngwe miti ya mikuyu ili na bushuka bwakulibanga buje bunahi.
Nga babuninganga buwila mu tunwa twa baka-kulya.
13 Tala! Maswalale bobe banapu ngwe banakazi.
Bikolo bya lifuti lyobe bikasala casi mangana bitozi bobe bakobele.
Tuhya tukenyeka tupateso twa bikolo byobe.
14 Tekwila cimweja mema aupangesa mubakuzengeleka.
Kanyamesa myela yobe ya kukola.
Sikumuka mu mandoba na kulyatangela buma,
Kwatelela cikombole.
15 Nameme ngoco, tuhya anga tukwenyeka.
Mukwale ukuteta.
Ukulya ngwe bana ba bimbimba mubakalila byuma.
Banu bobe batume ngwe bana ba bimbimba!
Eyo, batume ngwe mwa bimbimba!
16 Unabwezelela baka-mingoso bobe kutubakana bingongonosi bya mwilu.
Muna mbimba alijubula na kupulwila kweka.
17 Baka-kukunyunga banapu ngwe bimbimba,
Co baka-kukobelesa maswalale bobe banapu ngwe njame ya bimbimba.
Batunga cilombo mu mamanya ha litangwa lya kutonola,
Oloni litanya mulitwa, bapulwila kweka,
Co naumo wahi azibuka kubali.
18 Tunyungi bobe bali na kunenguka, obe mwene wa Asiria.
Banu bobe ba bulemu bali mu binjibo byabo.
Banu bobe banalishandokela ha minkinda,
Co naumo wahi abakungulwila hamo.
19 Wahi akukwasa omwo uliwana na bukalu.
Mbandu yobe kuyolo.
Boshe baziba muzimbu wendeka byobe bakanda maboko,
Mwafwa iya kayandele mwafwa ya bukenya buunatwalelelaho kukala nabwo?”
Kulumbununa “Muka-kuzembeleka.”
Nambe “Akanyungu.” Lijwi na lijwi “Azibuka.”
Nambe “bwala bwa tiliku.”
Nambe hamo “baita.”
Kulumbununa Juda.
Kulumbununa Asiria.
Nambe “tempele.”
Kulumbununa Ninive.
Hamo kulumbununa mwene wa Asiria.
Lijwi na lijwi “bimbunge.”
Nambe “bana ba bindumba ba kukola.”
Kulumbununa Ninive.
Kulumbununa Tebesi.
Lijwi na lijwi “bobe.”