HABAKUKI
1 Ou ukewo muzimbu watambwile kapolofweto Habakuki* mu cimona:
2 Obe Yehova, njambata simbu ya kupwa hali oku njitambeka kulomba bukwasi, oloni kuunjizibi?
Njambata simbu ya kupwa hali oku njilomba ngwange unjamene ku bukenya, oloni kuunjamena?*
3 Bika biuli na kunjilingisila njimone bilinga byabibi?
Co bika biuli na kwecelela kulyatelela?
Bika binjili na kumwena byuma bibihya, na kumona bukenya?
Co mwafwa bika kulicokota na kulilwisa kunatumu?
4 Lishiko banalizeyesa,
Co banecela kwakula mwamubwa.
Mwafwa banu bababi banazengeleka banu ba kusungama,
Mukemwo kubesi na kwakula mwamubwa.
5 “Taleni hakati ka baka-mafuti na kwakako mbunge.
Taleni, oku munalikomokela na kulikasamena,
Mwafwa kuli byuma bimo bikalingiwa mu matangwa eni
Bije kumukataba nameme bamilekebyo.
6 Mwafwa hano njituma baKaudiya,
Baje bapwa ba kukenyuka, co lalo baka-bwasi.
Baketi mu mitambela yakama ya ha lifuti-libu
Na kunyeka banu binjibo byabo.
7 Batewesa, co bazibisa lyoba.
Bakula mubanayongwela na kuyula mubanayongwela.
8 Tubalu babo bali na lumbisi kutubakana baingwe,
Co bali na bukalu kutubakana tungunga baje benda butsiki.
Tubalu babo ba nzita bazambwila kulutwe,
Tubalu babo batunda kulako.
Basikumuka ngwe ngonga uje azambwila kuya na kulya.
9 Boshe bali na kwija oku banalibwahesela kulwa.
Bihanga byabo binapu ngwe lihunzi lya ku butuhukilo bwa litangwa.
Bakungulula bafunge ngwe mushekesheke.
10 Bashendumuna bimyene
Na kujola bamyata ba bulemu.
Bajola mwela woshe wa kukola,
Balundika libu na kupanga lilundu mangana baufungulule.
11 Co baita mu lifuti ngwe lihunzi,
Oloni bakala na mulonga,
Mwafwa bendeka ngwabo njambi yabo ikeye nabana nzili.”*
12 Obe Yehova, kuma kuwakeleko myaka yoshe ndi?
Obe Njambi yange, Wakujela wange, kuwesi kutsa.
Obe Yehova, wabangwile mangana ubapangese mu kusompa,
Obe Limanya lyange, wabazamekele mangana ubapangese mu kwana kashitiko.*
13 Mesho obe apwa a kujela manene, co kuwapandele kukenga byuma byabibi.
Co kuwasa kutabesa byuma byabibi.
Bikoni biwecelela baka-kukwisa
Na kwoloka kulu omwo munu wamubi alehula munu wa bilinga bya kusungama kutubakana byendi?
14 Bika biulingisila munu apwe ngwe isi wa mu kalunga-ndonga,
Ngwe byuma bya kulikoka hasi bije kubyesi na muka-kubiyula?
15 Byoshe ebi abikoka* na kalobo.
Abikwata ha bwanda bwendi bwa bisi bwakama,
Co abikungulwila ha bwanda bwendi bwa bisi bwabundondo.
Mukemwo abwahelela manene.
16 Mukemwo ana milambu bwanda bwendi bwa bisi bwakama
Na kwana milambu bwanda bwendi bwa bisi bwabundondo,
Mwafwa bikebyo binamulingisa akale na byakulya byabibwa,*
Na kumulingisa alye bwino.
17 Kuma atwalelelaho kuta bwanda bwendi bwakama na kutundisaho byanawana* ndi?
Kuma atwalelelaho kutsiya baka-mafuti kwa kujeneka kubazibila mema ku mbunge ndi?
2 Njitwalelelaho kwimana ha mwela wange wa kunyungila,
Njimana ha cibumbe ca nganda.
Njitwalelelaho kukenga mangana njizibe byendeka* kwitila muli yange,
Nebi binjikumbulula mubanjipaya.
2 Co Yehova wanjikumbulwile ngwendi:
“Soneka eci cimona, na kucicakula mwamubwa ha mamanya,
Mangana uje atandaho mu kutambeka kumupwile kwakwasi kutanda.*
3 Mwafwa simbu ibanaka yeci cimona kanda yete,
Cili na kuzambwila ku mamaneselelo aco,* co keti ca makuli.
Nameme cishwale,* twalelelaho kucibandamena.*
Mwafwa kubanga cilishulisilile.
Kucikotokela!
4 Tala munu wa kulyalesa,
Kapwile wa kusungama.
Oloni munu wa kusungama ayoya mwafwa ya kulongwa kwendi.*
5 Binyu bikakwisi,
Ngeci, munu wa kulijundula kakashulisilila cilengo cendi.
Alingisa lishungu lyendi lya kulya lyame ngwe Cihilo.*
Napu ngwe kutsa cije kucesi kukuta.
Atwalelelaho kukungulula baka-mafuti boshe
Na kulikungulwila banu boshe.
6 Kuma aba boshe kubakamushendumuna mu bisimo, mu binguli na mu tusau ndi?
Bakendeka ngwabo:
‘Nabindama uje alikungulwila bije keti byendi
Na kubwezelela ku mukuli wendi!
Alinga ngoco ha simbu ya kupwa hali?
7 Kuma baje banakukongwesa kubakakukatukila mu kukomokesa ndi?
Bakemana na kukuningangesa manene,
Co ukapwa cuma cibakapukula.
8 Omwo unapukula mafuti amangi,
Banu boshe banasalaho bakupukula,
Mwafwa unetila maninga a banu
Na kubiisa lifuti-libu,
Unabiisa binganda na kunyongesa baje bakalamo.
9 Nabindama uje akungulwila bakunjibo yendi byanawana mu ngila yaibi,
Mangana atungile lishwa lyendi helu,
Kutewa bukalu bumuwana!
10 Unayongola kushawisa bakunjibo yobe.
Muunyongesa miyati yaingi ya banu, ulibulumwina yobe babenya.*
11 Mwafwa limanya likatambeka ha cibumbe,
Co lishoko lili mu ciluli likalikumbulula.
12 Nabindama uje atunga nganda mu kwitila maninga,
Na uje azameka mbongi mu kujeneka kusungama!
13 Taleni! Kuma Yehova wa maswalale keti ikeye alingisa banu balifwite kupanga byuma bije bikanyonga na tuhya ndi?
Kuma keti ikeye alingisa baka-mafuti balisine ngoco ndi?
14 Mwafwa lifuti-libu likashula na mangana a kuzibuka bumpau bwa Yehova
Ngwe mema muwanashulu mu kalunga-ndonga.
15 Nabindama uje atenuka na kulubala
Na kwana babusamba bendi byakunwa na kubalingisa bapende
Mangana amone bushwamwa bwabo!
16 Ukashauka kutubakana kukala na bumpau.
Nobe nwa na kusholola bushwamwa bwobe bwa kujeneka kuya ku mukanda.*
Nganja ili mu liboko lya cilyo lya Yehova ikaija kuli yobe,
Co kushauka kukafwika bumpau bwobe,
17 Mwafwa bakunyongesa ngwe muwanyongeselele Lebanoni,
Co bakutewesa na kukutsiya ngwe muwateweselele tusitu na kubatsiya,
Mwafwa unetila maninga a banu,
Co unabiisa lifuti-libu,
Unanyongesa binganda na baje bakalamo.
18 Kamponya wa kushonga akwasa bika
Okuni munu ikeye namushongo?
Kamponya wa cikubo na mulongesi wa makuli
Baje bapwa binjambi ba kujeneka seho baje kubasa kwendeka
Bakwasa bika, nameme babenyabo nabakulahela?
19 Lubinda lwa uje aleka citi ngwendi, “Induka!”
Nambe kuleka limanya lije kulyasa kwendeka ngwendi, “Induka! Tulongese!”
Taleni! Banabisalimba na goudi na siuva,
Oloni kubyesi na kuhwima.
20 Oloni Yehova ali mu tempele yendi ya kujela.
Olokeni kulu ku mesho endi yeni boshe muli ha lifuti-libu!
3 Lilombelo lya kapolofweto Habakuki lyalombelele ngwe uje emba myaso ya busiwa:
2 Obe Yehova, njinazibi muzimbu wendeka byobe.
Njalikomokela mwafwa ya bipangi byobe, obe Yehova.
Bilingise bikaleko mu simbu yetu!
Bilingise babizibuke mu simbu yetu.
Twanuke na kututetela mu simbu ya bukalu.
3 Njambi watundile ku Temani,
Wakujela watundile ku Munkinda wa Palani. (Sela)*
Bulemu bwendi bwafwikile melu.
Lifuti-libu lyashulile kumushangazala.
4 Kubyakula kwendi kwapwile ngwe ceke.
Misha ibali yatwile kutunda mu liboko lyendi,
Muje muyalishwekele nzili yendi.
5 Mushongo wa kulitambwisa watwamene kulutwe lwendi,
Co lisika-sika lyakama lyamukabele munima.
6 Wemanene na kuninganga lifuti-libu.
Baka-mafuti bajombokele mwabatalele.
Minkinda ya myaka yoshe yatikikile,
Co malundu a kusañulu atsikamene.
Bingila bya laja binapu byendi.
7 Njamwene bukalu mu bitenti bya Kushani.
Binanga bya tenti bya mu lifuti lya Midiani byaningangele.
8 Kuma unalubalela bindonga, obe Yehova?
Kuma butenu bwobe bunepukila bindonga ndi?
Indi unalubalela kalunga-ndonga?
Mwafwa walondele ha tubalu bobe,
Matemba obe ahyanene.*
9 Unambata buta bwobe bwa lusipa, co unalibwahesela kubunana.
Bimbweti* banabitumu kwesekesa na cikumiiyo. (Sela)
Tepa lifuti-libu na bindonga.
10 Minkinda yaningangele mwafwa ya kuziba kubabala muyakumwene.
Nyonzi yakama yasindumukile.
Nzinga yacumine.
Yemikile maboko ayo mwilu.
11 Litangwa na ngonde byemanene mu myela yabyo ya mwilu.
Mikili yobe yamwashukile ngwe ceke.
Likunga lyobe lyabyakwile ngwe muhyato.
12 Wendanganene ha lifuti-libu oku unalubala.
Walyatangelele* baka-mafuti na butenu.
13 Waile na kwobola banu bobe, mangana wobole wakubwabesa wobe.
Watikile ntwama wa njibo ya banu bababi.
Yabihile, kutunda ku ciluli kweta na ku lubula. (Sela)
14 Watubile mutwe wa baka-kulwa bendi na bitwa* byendi
Mubanjijemukilile mangana banjishandole.
Babwahelelele kunyongesa munu wa kuyanda ku bushweke.
15 Wetile ha kalunga-ndonga na tubalu bobe,
Wetile ha mema amangi a kutenuka.
16 Munjazibile ou muzimbu njalijujukilile,
Co mwafwa ya cilumo cawo, kanwa kange kajajele.
Bitsiya byange byazeyele,
Mendi ange akele na kujaja.
Oloni njiwa mbunge na kubandamena litangwa lya bukalu,
Mwafwa lizila banu baje bali na kutulwisa.
17 Nameme muti wa mukuyu ujeneka kutuhula bishani,
Nameme ku miti ya binyu kujeneka kukala bushuka,
Nameme muti wa olive ujeneka kwima,
Co nameme mu mahya mujeneka kukala byakulya,
Nameme mu limba mujeneka kukala butanga,
Co nameme mu mulaka mujeneka kukala bingombe,
18 Yange njilisamba mwafwa ya Yehova,
Njibwahelela mwafwa ya Njambi yange, muka-kunjobola.
19 Mwata Wahakamwa ya Byoshe Yehova ikeye nzili yange,
Alingisa mendi ange apwe ngwe a ntaba
Na kunjilingisa njilyatangele ha myela ya kulunduka.
Kuli muka-kutwamenena; na bisanzi byange bya mikole.
Hamo kulumbununa “Kubumbateya mu Cizemo.”
Nambe “kuunjobola.”
Nambe hamo “ikeye nzili yabo.”
Nambe “mu kunangula.”
Kulumbununa muka-Kaudiya uje wapwa citozi.
Lijwi na lijwi “bya mazi.”
Nambe hamo “atwalelelaho kushomona mukwale wendi mu cindalo”
Hamo kulumbununa Njambi.
Nambe “atande mwamubwa.”
Nambe “ku kulishulisilila.”
Nambe “cimoneke kwishwala.”
Nambe “cibandamene na mbunge imo.”
Nambe hamo “likulahelo lyendi; byuma byanakulahela.”
Nambe “Sheo,” kulumbununa cihilo ca banu boshe. Taleni Majwi Abanalumbununa.
Nambe “Ubulumwina mwonyo wobe.”
Nambe hamo “na kutalyangela.”
Taleni Majwi Abanalumbununa.
Nambe “obokele.”
Nambe hamo “Mikili.”
Lijwi na lijwi “Wajungwile.”
Lijwi na lijwi “bimbweti.”