HAGAI

1 Mu mwaka wamucibali wa ciyulo ca Mwene Daliasi, mu ngonde ya bu 6, ha litangwa lyakulibanga omu mu ngonde, Yehova wendekele na kapolofweto Hagai* mangana aleke Zelubabeu ngubulu wa Juda, muna Shalatiele, na kapilistu wahakamwa Joshua, muna Jehozadaki, ngwendi:

2 “Yehova wa maswalale ngwendi, ‘Aba banu bali na kwendeka ngwabo, “Simbu ya kutunga* njibo* ya Yehova kanda yete.”’”

3 Yehova walekele lalo kapolofweto Hagai ngwendi: 4 “Kuma ino ikeyo simbu imunapande kukala mu binjibo byeni bimunatungu mwamubwa na mabaya, okuni njibo yange inabihya ndi? 5 Yehova wa maswalale ngwendi, ‘Akeni mbunge ku* bingila byeni. 6 Munakubu bimbuto byabingi, oloni muteja byabindondo. Mulya, oloni kumukuta. Munwa, oloni bimunwa kumubizibi. Muzala bizalo, oloni naumo wahi aziba kushaluka. Uje ibanakumuna aka fweto yendi mu ngonga ya kutubazeka.’”

7 Yehova wa maswalale ngwendi, ‘Akeni mbunge ku* bingila byeni.’

8 “‘Kandukeni ha munkinda mukanene mabaya. Co mutunge njibo, mangana injizibise kubwaha na kulingisa banu banjane bumpau,’ ngwendi Yehova.”

9 “‘Yehova wa maswalale nendeka ngwendi, ‘Mwasinganyekele ngweni muwana byabingi, oloni mwawanene byabindondo, co mumwabinenele mu njibo, njabipekumwine. Mwafwa bika?’ Mwafwa njibo yange inabihya, okuni umo na umo weni nazezama kubwahesa njibo yendi. 10 Ngeci, melu kuwanyokesele lime, co lifuti-libu kulyamenesele bimbuto. 11 Ngeci, njalingisile ha lifuti-libu na ha minkinda hakale lilanga, co binona, binyu, mazi, na bimena byoshe byakehele, co yeni hamolika na bimuna beni muli na kuyanda. Byoshe bimunondangana binai mwangoco.’”

12 Zelubabeu muna Shalatiele na kapilistu wahakamwa Joshua muna Jehozadaki na banu boshe batolililile ku lijwi lya Yehova Njambi yabo na ku majwi a kapolofweto Hagai, mwafwa Yehova Njambi yabo ikeye wamutumine, co banu bashangumukile kuzibila Yehova lyoba.

13 Co Hagai katumwa ka Yehova wetesele ou muzimbu ku banu, kwesekesa na cipangi camwanene Yehova ngwendi: “‘Eni banu, njili hamo neni,’ mukemwo mwanendeka Yehova.”

14 Co Yehova walingisile ngubulu wa Juda Zelubabeu muna Shalatiele, na kapilistu wahakamwa Joshua muna Jehozadaki, na banu boshe bakale na ntwima, co bezile na kushangumuka cipangi ca kubwahesa njibo ya Yehova wa maswalale, Njambi yabo. 15 Eli lyapwile litangwa lya bu 24 lya ngonde ya bu 6 mu mwaka wamucibali wa ciyulo ca Mwene Daliasi.

2 Mu ngonde ya bu 7, ha litangwa lya bu 21 omu mu ngonde, Yehova walekele kapolofweto Hagai ngwendi: 2 “Shukulu-kambu ihula Zelubabeu, ngubulu wa Juda, muna Shalatiele, na kapilistu wahakamwa Joshua muna Jehozadaki, na banu boshe ngwobe: 3 ‘Iya nasalako hakati keni uje wamwene ei njibo* mu bumpau bwayo bwakulibanga? Hano muimona bati? Kuma kuimoneka ngwe yangoco nga mubyesekesa ndi?’

4 “Oloni hano kanyama, obe Zelubabeu,’ mukemwo mwanendeka Yehova, ‘nobe kapilistu wahakamwa Joshua, muna Jehozadaki.’

“‘Kanyameni na kupanga, eni banu boshe ba mu lifuti,’ mukemwo mwanendeka Yehova.

“‘Mwafwa njili neni,’ mukemwo mwanendeka Yehova wa maswalale. 5 ‘Anukeni binjamikulahesele mumwatundile mu Ijipiti, co sipilitu yange icili hamo neni.* Keti muzibe lyoba.’”

6 “Mwafwa Yehova wa maswalale nendeka ngwendi: ‘Hano lalo munima ya simbu yaindondo lika, njikaningangesa melu na lifuti-libu na kalunga-ndonga na nunda.’

7 “‘Njikaninganga mafuti oshe, co byuma bya seho* bya mafuti oshe bikaija muno mu njibo, co njikaishulisa na bumpau,’ ngwendi Yehova wa maswalale.

8 “‘Siuva yapwa yange, goudi nayo yapwa yange,’ mukemwo mwanendeka Yehova wa maswalale.

9 “Yehova wa maswalale nendeka ngwendi: ‘Bumpau buikakala nabwo ei njibo kulutwe bukapwa bwakama kutubakana bwakulibanga,’

‘Co njilingisa kwoloka kukale omu mu mwela,’ mukemwo mwanendeka Yehova wa maswalale.”

10 Ha litangwa lya bu 24 lya ngonde ya bu 9, mu mwaka wamucibali wa ciyulo ca Daliasi, Yehova walekele kapolofweto Hagai ngwendi: 11 “Yehova wa maswalale ngwendi, ‘Shukulu-kambu, ihula tupilistu bya lishiko ngwobe: 12 “Nga munu nabungila situ ya kujela ha cizalo cendi, co oco cizalo cimbola likende nambe musozi nambe binyu nambe mazi nambe cakulya coshe-coshe, kuma oco cuma cipwa ca kujela ndi?”’”

Tupilistu bamukumbulwile ngwabo: “Embwe!”

13 Co Hagai wabehwile ngwendi: “Nga munu nalijwalesa mwafwa ya kumbola cibimbi, co akwata cimo ha byuma ebi, kuma cipwa ca kujwala ndi?”

Tupilistu bamukumbulwile ngwabo: “Cipwa ca kujwala.”

14 Ngeci, Hagai wendekele ngwendi: “‘Mukemwo mubanafu naba banu, co mukemwo muunafu ou muyati kuli yange,’ mukemwo mwanendeka Yehova, ‘co mukemwo mubinafu na bipangi byoshe bya maboko abo. Byoshe bibanena binapu bya kujwala.’

15 “‘Oloni hano, shukulu-kambu, akeni mbunge ku* cuma eci, kutunda litangwa lya lelo kuya kulutwe: Simbu kanda bake limanya limo helu ya limanya likwabo mu tempele ya Yehova, 16 byuma byafwile bati? Munu mwakele na kuya ku mutumbo wa binona ngwendi akambate biseteko 20, wawanene lika biseteko 10, co munu mwakele na kuya ku citikilo ca binyu ngwendi akakupule biseteko 50 mu lingolengole lya binyu, mwakele lika biseteko 20. 17 Njamyanene kashitiko omwo njabiisile bipangi byoshe bya maboko eni na lihunzi lya kushaluka na mbundu ya ku bimbuto na nyonzi ya mamanya, oloni naumo wahi hakati keni watengulukilile kuli yange,’ mukemwo mwanendeka Yehova.

18 “‘Shukulu-kambu, akeni mbunge ku* cuma eci, kutunda litangwa lya lelo kuya kulutwe, kutunda litangwa lya bu 24 lya ngonde ya bu 9, lije libajalele lubula lwa tempele ya Yehova, akeni mbunge ku cuma eci: 19 Kuma mu cishete* muli laja bimbuto ndi? Miti ya binyu, miti ya mikuyu, miti ya mapomagraneti na miti ya olive kanda ime, indi bati? Kutunda litangwa lya lelo njimibezikisa.’”

20 Yehova walekele lalo Hagai lwamucibali ha litangwa lya bu 24 omu mu ngonde ngwendi: 21 “Leka Zelubabeu, ngubulu wa Juda ngwobe, ‘Njikaninganga melu na lifuti-libu. 22 Njikafungulula matanda a bimyene na kumanesa nzili ya bumwene bwa mafuti. Njikabiisa matemba na kunyongesa baka-kuwendesa, co tubalu na baka-kubalonda bakawa. Umo na umo wabo akawa ku mukwale wa ndolome yendi.’”

23 “Yehova wa maswalale nendeka ngwendi: ‘Ha litangwa olyo, njikambata yobe ngamba yange Zelubabeu muna Shalatiele,’ mukemwo mwanendeka Yehova, ‘co njikakupwisa ngwe riñi ya kugantesa, mwafwa yobe injinangula,’ mukemwo mwanendeka Yehova wa maswalale.”