MALAKI

1 Muzimbu wa kutunda kuli Njambi:

Yehova wendekele na baIsalele kwitila muli Malaki* ngwendi:

2 “Njamimwesa cizemo eni banu,” ngwendi Yehova.

Oloni ngweni: “Watumwesa bati cizemo?”

Yehova nendeka ngwendi: “Kuma Isau kapwile ndolome ya Jakobu ndi? Oloni njazemene Jakobu 3 na kuzinda Isau. Njalingisile minkinda yendi ipwe ngundu na kulingisa buswana bwendi bupwe mambo mubayoya bimbanje.”

4 “BaEdomu bali na kwendeka ngwabo, ‘Banatushandola, oloni twiluka na kutungulula bingundu byetu.’ Nameme ngoco, Yehova wa maswalale nendeka ngwendi, ‘Bakatunga, oloni njikapujula bibakatunga, co mutambela wabo bakausana ngwabo “mutambela wa bilinga byabibi,” bakeboco bakabasana ngwabo “banu baanasingi Yehova myaka yoshe.” 5 Mesho eni akalimwena ebi byuma, co mukendeka ngweni: “Yehova bamwamese mu mutambela woshe wa Isalele.”’”

6 “Yehova wa maswalale ali na kuleka yeni tupilistu muli na kwombwanesa lizina lyendi ngwendi: ‘Mwana asingimika ishe, ngamba asingimika shukulu yendi. Co nga nji ishweni, kasingimiko kananjipande kali kuli? Nga nji shukulu yeni, bika kumunjizibila lyoba* linanjipande?’

“‘Oloni ngweni: “Tunombwanesa bati lizina lyobe?”’

7 “‘Muli na kwana byakulya* bya kujwala ha mutula wange.’

“‘Kutundaho mwendeka ngweni: “Twakujwalesa bati?”’

“‘Mumuli na kwendeka ngweni: “Mesa ya Yehova inapu cuma ca kwombwanesa.” 8 Co nga mwana kasitu wa kutsa mesho kupwa mulambu, mwendeka ngweni: “Nebi binabihyaho bene byahi.” Co nga mwana kasitu wa kutenguka nambe wa kubinja, mwendeka ngweni: “Nebi binabihyaho bene byahi.”’”

“Esekeni kubyana kuli ngubulu yeni. Kuma abwahelela nambe kumitambula mwamubwa ndi?” ngwendi Yehova wa maswalale.

9 “Co hano shukulu-kambu, lambeleleni Njambi atuzibile ngozi. Nga mwana milambu ya cifweci, kuma amitambula mwamubwa ndi?” ngwendi Yehova wa maswalale.

10 “Co iya hakati keni alitabela kushoka bikolo?* Mwafwa kumwasa nameme kushwameka tuhya ha mutula wange kwa kujeneka fweto. Kumwesi na kunjibwasa, co bwana bwoshe bumuli na kunjana kubwesi na kunjizibisa kubwaha,” ngwendi Yehova wa maswalale.

11 “Kutunda ku butuhukilo bwa litangwa kuya ku bulahukilo bwalyo, lizina lyange likapwa lyakama hakati ka baka-mafuti. Bakanjenyekela milambu mu myela yoshe, co bakana bwana mwafwa ya lizina lyange, kupwa bwana bwa kujela. Mwafwa lizina lyange likapwa lyakama hakati ka baka-mafuti,” ngwendi Yehova wa maswalale.

12 “Oloni muli na kushaula lizina lyange* mumuli na kwendeka ngweni, ‘Mesa ya Yehova inajwala, co bushuka bwayo, kulumbununa byakulya byayo, byangoco.’ 13 Muli na kwendeka lalo ngweni, ‘Bijukisa!’ na kubishendumuna,” ngwendi Yehova wa maswalale. “Co muli na kunena tusitu ba kwiba, ba kutenguka na ba kubinja. Eyo, muli na kunena byuma bya cifweci kupwa bwana. Kuma njinapande kubitambula ndi?” ngwendi Yehova.

14 “Nabindama munu wa linyanyamena uje ali na cimuna wamubwa ha butanga bwendi, oloni alikumiiya, kutundaho ana cimuna wa kapenga kupwa mulambu kuli Yehova. Mwafwa nji Mwene wakama,” ngwendi Yehova wa maswalale, “co lizina lyange lizibisa baka-mafuti lyoba.”

2 “Co hano eni tupilistu, eli likelyo lishiko linjimyana. 2 Nga mubyana kutolilila na kujeneka kwaka mbunge ku kwana bumpau lizina lyange,” ngwendi Yehova wa maswalale, “Njimitumina cisingo, co njitengulula bibezikiso byeni kubipwisa bisingo. Eyo, njatengulula bibezikiso byeni kubipwisa bisingo mwafwa kumwesi na kwakako mbunge.”

3 “Taleni! Njibiisa bimbuto bimunakunu mwafwa ya bilinga byeni, co njishamwina tuzi ku mesho eni, tuzi twa tusitu ba milambu ya ha bilika byeni, co bakamyumbila ha mutumbo watwo. 4 Co mukazibuka ngweni njinamyana eli lishiko mangana cikumiiyo cange na Levi citwaleleleho,” ngwendi Yehova wa maswalale.

5 “Cikumiiyo cange nendi capwile ca kumwana kuyoya na kwoloka, bije binjamwanene mangana anjizibile lyoba.* Wanjizibilile lyoba, eyo, wazibilile lyoba lizina lyange. 6 Lishiko* lya busunga lyakele mu kanwa kendi, co kendekele byuma bya kujeneka kusungama. Wendele nange mu kwoloka na mu kusungama, co walingisile banu babangi becele kusebuka. 7 Mwafwa kanwa ka kapilistu kanapande kunyunga mangana, co banu banapande kushakezeka lishiko* mu kanwa kendi, mwafwa napu katumwa ka Yehova wa maswalale.

8 “Oloni yeni munatundu mu ngila. Munalingisa babangi batanuke mwafwa ya kujeneka kukabangeya lishiko.* Munapokola cikumiiyo ca Levi,” ngwendi Yehova wa maswalale. 9 “Ngeci, njimilingisa bamyombwanese na kumikehesa ku mesho a banu boshe, mwafwa kumwanyungile bingila byange, co munapangesa lishiko na kangu.”

10 “Kuma tatetu keti umolika ndi? Kuma keti Njambi umolika watutangele ndi? Co bikoni bituli na kulilingila mwamubi umo na mukwabo, na kujwalesa cikumiiyo ca bakukulwila betu? 11 Juda nalingi byuma byabibi, co mu Isalele na mu Jelusalema munalingiwa byuma bya bunyengwe, mwafwa Juda nombwanesa kujela* kwa Yehova kuje kwazema, nambata mwana wa munakazi wa njambi weka. 12 Yehova atundisa munu alinga byuma bya cifweci mu bitenti bya Jakobu, atundisamo munu woshe-woshe, nameme anene bwana kuli Yehova wa maswalale.”

13 “Co lalo kuli cuma cikwabo* cimuli na kulinga, cije cinalingisa mutula wa Yehova ushule misozi, na kulila na binyengo, mukemwo necela kwaka mbunge ku bwana bweni nambe kutambula byoshe bimumwana. 14 Co ngweni, ‘Mwafwa bika?’ Mwafwa Yehova napu mukaleho mukati kobe na munakazi wa mu bukwenje bwobe, uje iunalingi mwamubi nameme napu mukweni, co lalo munakazi wobe kwesekesa na cikumiiyo.* 15 Oloni kuli bamo hakati keni baje kubalingile ngoco, mwafwa bakele na sipilitu ya Njambi. Co bika bibatondele? Batondele kukala na bana baje bapwa bana* ba Njambi. Ngeci, nyungeni biyongola byeni, co keti mulinge mwamubi banakazi ba mu bukwenje bweni. 16 Mwafwa njazinda kutsiya bulo,” ngwendi Yehova Njambi ya Isalele, “co lalo njazinda uje alinga bukenya,” ngwendi Yehova wa maswalale. “Ngeci, nyungeni biyongola byeni, co keti mulilinge mwamubi umo na mukwabo.

17 “Munafutula Yehova na majwi eni. Oloni ngweni, ‘Tunamufutula bati?’ Mumuli na kwendeka ngweni, ‘Woshe uje alinga byabibi napu wamubwa mu mesho a Yehova, co amuzibisa kubwaha,’ Nambe kwendeka ngweni, ‘Njambi uje akakula mwamubwa ali kuli?’”

3 “Taleni! Njituma katumwa kange kulutwe lwange, co akanjibwahesela ngila. Mwata wa busunga uje imuli na kushakezeka akaija mu tempele yendi mu kukasumuna. Co katumwa wa cikumiiyo imunashungwiya kumona akaija. Eyo, akaija bene,” ngwendi Yehova wa maswalale.

2 “Oloni iya akakolesa ha litangwa lya kwija kwendi, co iya akasa kwimana mwakasholoka? Mwafwa akapwa ngwe tuhya twa muka-kujelesa bikubo, na kupwa ngwe mulola wa baka-kukusha bizalo. 3 Co akatumama ngwe muka-kujelesa siuva na kujelesa bana ba Levi. Akabajelesa ngwe goudi na siuva, co bakapwa banu baje bana Yehova bwana mu kusungama. 4 Co bwana bwa Juda nobu bwa Jelusalema bukazibisa Yehova kubwaha, ngwe mukwafwililile mu matangwa a kunima, ngwe mukwafwililile kusañulu.

5 “Njimishwena mangana njimisompe, co njizambula kwana bukaleho bwa kulwisa baka-kupanda, baka-bukoi, baka-kulisinga bisingo bya makuli, na baje balyapula muka-kupanga wa kukumuna, na fwile, na mwana wa kujeneka ishe,* na baje babyana kukwasa* munu wa ku lifuti lyeka. Aba banu kubanjizibilile lyoba,” ngwendi Yehova wa maswalale.

6 “Mwafwa yange Yehova, kunjesi kutenguluka.* Co yeni bana ba Jakobu, kanda muziluke. 7 Kushwa mu matangwa a bakukulwila beni, munatundu ku mashiko ange, co kumwawanyungile. Ilukeni kuli yange, co njiluka kuli yeni,” ngwendi Yehova wa maswalale.

Oloni ngweni: “Tunapande kwiluka bati kuli yobe?”

8 “Kuma munu asa kwibila Njambi ndi? Oloni yeni muli na kunjibila.”

Co ngweni: “Tunakwibila bati?”

“Mu cabulikumi na mu bwana. 9 Mubakusinga, mwafwa muli na kunjibila. Eyo, lifuti lyoshe lili na kulinga ngoco. 10 Neneni cabulikumi coshe mu njibo ya kutulikila, mangana mu njibo yange mukale byakulya. Shukulu-kambu, njesekeni mu ngila ei,” ngwendi Yehova wa maswalale, “mangana mumone indi kunjimishokolwela bikolo bya mwilu na kumijukwila* bibezikiso, kweta noho neci cimukajeneka cahi.”

11 “Njikatenukila uje akabiisa* byuma byeni, co kakabiisa bushuka mu lifuti lyeni. Miti ya binyu kuikakala kwa kujeneka kwima bushuka mu mahya eni,” ngwendi Yehova wa maswalale.

12 “Baka-mafuti boshe bakamitumbula ngwabo mubakubwahelela, mwafwa mukapwa lifuti lya kubwahelela,” ngwendi Yehova wa maswalale.

13 Yehova nendeka ngwendi: “Majwi amunanjendeka a likamba.”

Co ngweni: “Majwi muka a likamba atunakwendeka?”

14 “Muli na kwendeka ngweni, ‘Na seho ya kupangela Njambi bene yahi. Bika bitunawana mu kulinga byatonda Yehova wa maswalale na kwenda mu kulikehesa ku mesho endi? 15 Hano tumona ngwetu banu ba kulijundula banabwahelela. Co lalo byuma bili na kwendela bwino baje bali na kulinga byuma byabibi. Bali na kweseka Njambi, oloni kubesi na kutambula kashitiko.’”

16 Ha simbu oyo, baje bazibila Yehova lyoba balyendekesele umo na mukwabo, umo na umo wabo na kabusamba kendi, co Yehova watwaleleleleho kwakako mbunge na kutolilila. Co libulu lya canukiso balisonekele halutwe lwendi. Basonekelemo bya baje bazibila Yehova lyoba na kusinganyekesesa ha* lizina lyendi.

17 Yehova wa maswalale ngwendi: “Co bakapwa banu bange, ha litangwa linjikabalingisa bapwe banu bange ba kulitila.* Njikabazibila mema ku mbunge, ngwe munu mwakazibila mema ku mbunge uje ali na kumupangela. 18 Co mukamona kuliseza kuli mukati ka munu wa kusungama na munu wamubi, mukati ka uje ali na kupangela Njambi na uje kesi na kumupangela.”

4 Yehova wa maswalale nendeka ngwendi: “Taleni! litangwa lili na kwija, litangwa lya kushaluka ngwe lutengo, co banu boshe ba kulijundula na baje boshe bali na kulinga byuma byabibi bakapwa ngwe bishati. Bakanyonga ha litangwa olyo, co kubakasala na muzi nambe munango. 2 Oloni yeni muli na kusingimika* lizina lyange, litangwa lya kusungama likamitwila ceke, misha yalyo ikamikangwisa, co mukajombozoka ngwe bana ba bingombe ba kununa.”

3 “Mukalyatangela banu bababi, mwafwa bakapwa ngwe likungu mwisi ya mendi eni ha litangwa linjikalingako bimo,” ngwendi Yehova wa maswalale.

4 “Anukeni Lishiko lya ngamba yange Mosesa, kulumbununa mashiko na kusompa kwange binjashikile ku Holebu ngwange baIsalele boshe babyononoke.

5 “Taleni! Njituma kapolofweto Eliya kuli yeni, simbu kanda litangwa lya Yehova lyakama lya kutewesa lyete. 6 Co akelwisa bimbunge bya bisemi ba banalume ku bana babo, na kwilwisa bimbunge bya bana kuli baishabo, mangana keti njije na kupupa lifuti-libu na kulinyongesa.”

(Awa akewo mamaneselelo a Bisoneka bya CiHebelu na CiAlamaiki, co kwata Bisoneka bya CiGriki bya Baka-Kristu)