KULI BAKA-LOMA

1 Yange Paulu, ndungo ya Kristu Yesu, ibanasana kupwa kapositolo, ibanangula kwambulula muzimbu waubwa wa Njambi, 2 muzimbu uje wakulahesele cimweja Njambi mu Bisoneka bya kujela kwitila muli tupolofweto bendi, 3 kutalesa kuli Munendi uje watundile ku naanga ya Devidi omwo wasemukile kupwa munu. 4 Twalimwena mwamubwa ngwetu ou ikeye Muna Njambi, mwafwa Njambi wapangesele nzili ya sipilitu yendi ya kujela kumusangula ku batsi, (ou ikeye bene Yesu Kristu Mwata wetu, 5 co kwitila muli ikeye, twatambwile ngozi yakama na bupositolo mangana tukwase banu boshe ba ku mafuti bakale na likulahelo, bononoke, na kusingimika lizina lyendi. 6 Neni muli mukati ka baka-mafuti babanasanena kuli Yesu Kristu). 7 Kuli yeni boshe muli mu Loma, yeni babazema kuli Njambi, babanasana kupwa bakujela:

Ngozi yakama na kwoloka bya kutunda kuli Njambi Tate yetu na kuli Mwata Yesu Kristu, bikale neni.

8 Hakulibanga, njikandelela kuli Njambi yange kwitila muli Yesu Kristu hali yeni mubaboshe, mwafwa likulahelo lyeni bali na kulyendeka mu kaye koshe. 9 Mwafwa Njambi uje injili na kupangela cipangi ca kujela na mbunge yange yoshe ha kwambulula muzimbu waubwa wa Munendi, napu mukaleho wange munjikamyaka mu malombelo ange simbu yoshe, 10 oku njilambelela ngwange nga citaba njase kwijoni kuli yeni, nga mukemwo munai cizango ca Njambi. 11 Mwafwa njinashungwiya kumimona mangana njakumyane bwana bwa sipilitu, mangana mukanyame, 12 nambe ngwange twase kulitakamesa umo na mukwabo kwitila mu likulahelo lya umo na umo wetu, lyeni neli lyange.

13 Oloni bandolome njishaka muzibuke ngweni kakangi njashakele kwija kuli yeni, oloni kuli byuma bimo binanjonowesa, kweta na lelo lino. Njashakele njije okwo mangana nokwo njakuwaneko bushuka ngwe munjinabuwanena kuli baka-mafuti eka oshe. 14 Njili na mukuli kuli Bagriki na kuli baka-kwija,* kuli baka-mana na kuli baka-kujeneka mana. 15 Ngeci, njashungwiya kwa kwambulula muzimbu waubwa nokwo kuli yeni ku Loma. 16 Kunjizibila shwamwa muzimbu waubwa, mwafwa ukewo nzili ya Njambi ya kwobwelamo munu woshe uje ali na likulahelo, hakulibanga kuli Kajuda, co na kuli Kagriki. 17 Mwafwa kwitila mu muzimbu waubwa, Njambi ali na kusholola kusungama kwendi kuli baje bali na likulahelo, co likulahelo lyabo lili na kukanyama, ngwe mubanasoneka ngwabo: “Oloni munu wa kusungama ayoya mwafwa ya likulahelo lyendi.”

18 Mwafwa butenu bwa Njambi buli na kusholoka kutunda mwilu mu kulwisa bilinga byoshe bya kujeneka kuzibila Njambi lyoba na bilinga byoshe bya kuhenga bya banu baje bali na kulyatelela busunga mu ngila ya kuhenga, 19 mwafwa bibanasa kuzibuka hali Njambi bali na kulimwenabyo mwamubwa mukati kabo, mwafwa Njambi nabisholola kuli bakebo. 20 Bifwa byendi bije kutwasa kumona, kulumbununa nzili yendi ya myaka yoshe na Bunjambi bwendi, banalimwenabyo mwamubwa tunde bene ha kutanga kwa kaye kutwala kulutwe, mwafwa bakabinangukila mu byuma byakutanga, mangana keti base kuwana mwakulipatungwila. 21 Mwafwa nameme bazibukile Njambi kubamwanene bumpau ha kupwa Njambi yabo, co kubamukandelelele, oloni bisinganyeka byabo byapwile byangoco, co lalo bimbunge byabo bya bulema byazibalele. 22 Nameme balimwene ngwabo bali na mana, oloni batengulukile kupwa bilema. 23 Kutubakana kwana bumpau Njambi uje kesi kutsa, bakebo banene bumpau ku tumponya ba cifwa ca banu baje bakatsi, naba ba cifwa ca tuzila, naba ba cifwa ca tusitu ba mendi awana, naba ba cifwa ca byuma bya kukalaba.

24 Ngeci Njambi wabecelelele balinge byuma bya mazilo kwesekesa na cizango ca bimbunge byabo, mangana bashawise mibila yabo. 25 Batabele makuli kutubakana kutaba busunga bwa Njambi, co balemesele byakutanga na kubipangela cipangi ca kujela kutubakana kulemesa Muka-kutanga uje ibakashangazala myaka yoshe. Ameni. 26 Mukemwo Njambi wabecelelele bakale na mashungu a kulilala a kutubakanesa, mwafwa banakazi mukati kabo batengulwile cifwa cabo ca kulilala na banalume na kushangumuka kulilala na bakwabo banakazi. 27 Co na banalume nabo basezele cifwa cabo ca kulilala na banakazi na kushangumuka kulishungwiya mwabomwabo, banalume na bakwabo banalume, balingile byuma bya mazilo, co batambwile kashitiko* kabo mu kushula kwesekesa na bubi bwabo.

28 Ha kuwana ngwe kuzibuka Njambi bacimwene kupwa cangoco, Njambi wabecelelele bakale na bisinganyeka bije katabesele mangana balinge byuma bije kubyapandele. 29 Co bashulile na bilinga byoshe bya kuhenga, na bubi, na nuna* na byuma byabibi, bashulile na cipululu, kutsiya banu, lwozi, kukwisa na bizindo, bapwile baka-kufweya, 30 baka-kwendeka bakwabo mwamubi, baka-kuzinda Njambi, baka-likamba, baka-kulyalesa, baka-kulishasha, baka-kutumba butumbe bwa kulinga byuma byabibi, baka-kujeneka kwononoka bisemi, 31 baka-kujeneka kuzibisisa, baka-kujeneka kushulisilila bikulaheso, baka-kujeneka kuzema bakwabo na baka-kujeneka kutetela. 32 Nameme aba banu bazibuka mwamubwa lishiko lya Njambi lya kusungama, lya kwendeka ngwalyo banu bali na kulinga ebi byuma banapande kutsa, kubesi lika na kutwalelelaho kubilinga, oloni bali na kutabesa na baje bali na kubilinga.

2 Ngeci obe munu, nameme upwe yobe iya, kuwesi nomu muwasa kulipatungwila nga usompa mukweni. Mwafwa nga usompa mukweni, ulihisa yobe babenya, mwafwa yobe usompa mukweni ukalingi byuma byakalingi ikeye. 2 Oloni tuzibuka ngwetu Njambi mwakasompo baka-kulinga ebi byuma, kusompa kwendi kukalitombola na busunga.

3 Obe munu, kuma usinganyeka ngwobe wasa kutewa kusompa kwa Njambi omwo uli na kusompa bakweni okuni nobe uli na kulinga byuma bibali na kulinga ndi? 4 Indi uli na kulumbilisa bukama bwa ngozi ya Njambi na mbunge ya kwecelela na mbunge yendi ya kubandamena? Kuuzibuka ngwobe Njambi mu ngozi yendi ali na kukukwasa utenguluke ndi? 5 Oloni mwafwa ya kutindibala kwobe na mbunge yobe ya kujeneka kutenguluka, uli na kulitulikila butenu bwa Njambi yobe babenya. Njambi akasholola obu butenu ha litangwa lyakasompa mu kusungama. 6 Co akelwisila munu na munu kwesekesa na bipangi byendi: 7 Akana kuyoya kwa myaka yoshe kuli baje bali na kutwalelelaho* kulinga byuma byabibwa. Aba banu bali na kutonda bumpau na kasingimiko na kuyoya kuje kunapu kwa myaka yoshe. 8 Oloni baje bali na bimata na kujeneka kwononoka busunga, baje bononoka byuma bya kuhenga, bakamona butenu na bukalu bwa Njambi. 9 Kayando na bukalu bikaija ku munu* woshe uje ali na kupanga bipangi byabibi, hakulibanga kuli Kajuda, co na kuli Kagriki. 10 Oloni woshe apanga bipangi byabibwa awana bumpau na kasingimiko na kwoloka, hakulibanga kuli Kajuda, co na kuli Kagriki. 11 Mwafwa Njambi kakele na kangu.

12 Mwafwa boshe baje balingile bubi kwa kujeneka lishiko, bakanyonga kwa kujeneka lishiko. Oloni boshe baje balingile bubi oku bali mwisi ya lishiko, bakabasompa na lishiko. 13 Mwafwa baka-kuziba lishiko, keti bakebo ba kusungama ku mesho a Njambi, oloni baka-kulinga bili mu lishiko bakebo babakendeka ngwabo ba kusungama. 14 Mwafwa banu ba ku mafuti kubesi na lishiko, oloni nga balinga byuma bya mu lishiko kwesekesa na cisemwa, aba banu, nameme kubesi na lishiko, banapu lishiko kuli bakebo babenya. 15 Bakebo babenya bali na kumwesa ngwabo bililongesa lishiko banabisoneka mu bimbunge byabo, co bitakutaku byabo bili na kulitabasana nabo. Co lalo bisinganyeka byabo bili na kubapaya nambe kubemanena. 16 Ebi byuma bikalingiwa ha litangwa lije Njambi kwitila muli Kristu Yesu akasompa byuma bya kushwekesa bya banu kwesekesa na muzimbu waubwa unjili na kwambulula.

17 Nga yobe ulisana ngwobe u Kajuda, co unajendamena ha lishiko na kulishasha mwafwa ya busamba bwobe na Njambi, 18 co unazibuka cizango cendi na kutaba byuma byabibwa mwafwa banakulongesa* majwi a kutunda mu Lishiko, 19 co lalo unataba ngwobe yobe ntwama wa tupuputwa, u ceke ca baje bali mu lisusulungu, 20 u muka-kunangula bakujeneka mana, u muka-kulongesa banike babandondo, co unazibukako lika bilongesa byamaputukilo na busunga mu Lishiko—, 21 yobe uli na kulongesa mukweni bika kuulilongesela yobe babenya? Yobe uli na kwambulula ngwobe, “Keti wibe,” kuma ukebi ndi? 22 Yobe uli na kwendeka ngwobe, “Keti ulinge bukoi,” kuma ukalingi bukoi ndi? Yobe wazinda tumponya, kuma ukebi byuma bya mu bitempele ndi? 23 Yobe uli na kulishasha mwafwa uzibuka lishiko lya Njambi, kuma uli na kushaula Njambi ha kupokola Lishiko ndi? 24 Mwafwa “lizina lya Njambi bali na kulishaula mukati ka baka-mafuti mwafwa yobe,” ngwe mubanasonekela.

25 Kuya ku mukanda kwasa lika kukukwasa nga wononoka lishiko, oloni nga u muka-kupokola lishiko, co kuya kwobe ku mukanda kunapu lika ngwe kuwaile ku mukanda. 26 Ngeci, nga munu wa kujeneka kuya ku mukanda anyunga byuma bya kusungama bya mu Lishiko, kuma kubamumono ngwabo nai ku mukanda ndi? 27 Banakulongesa bya kuya ku mukanda, na lishiko lya kusoneka, oloni kuwesi na kulikabangeya. Ngeci, nga munu wa kujeneka kutuhuka akabangeya lishiko, co akusompa. 28 Kupwa Kajuda wa busunga keti kwa hanja embwe, na kuya ku mukanda kwa busunga keti kwa ku mubila embwe. 29 Kupwa Kajuda wa busunga kunapu kwa mukati na kuya ku mukanda kunapu kwa ku mbunge kwitila mu sipilitu ya kujela keti mu kukabangeya lishiko lya kusoneka, embwe. Munu wa cifweci bamushangazala kuli Njambi keti ku banu, embwe.

3 Bubwa bwa kupwa Kajuda buli halyoni, nambe bukwasi muka buli mu kuya ku mukanda? 2 Kuli bubwa bwabwingi. Cakulibanga, babanene majwi a kujela a Njambi. 3 Co bukalu buli halyoni? Nga bamo bajenekele likulahelo, kuma kujeneka likulahelo kwabo kumanesa kulongwa kwa Njambi ndi? 4 Embwe! Njambi bamuwana kupwa muka-busunga nameme banu boshe bapwa baka-makuli, ngwe mubanasoneka ngwabo: “Mangana bakumone kupwa wa kusungama mu majwi obe, co uhyane mubakusompesa.” 5 Oloni nga bilinga byetu bya kuhenga bimwesa kusungama kwa Njambi, co bikoni bitwendeka? Kuma twendeka ngwetu Njambi ali na kuhengesa mwali na kusholola butenu bwendi ndi? (Njili na kwendeka mubakasinganyekela banu bamo.) 6 Embwe! Indioni Njambi akasompa bati kaye?

7 Oloni nga makuli ange analingisa busunga bwa Njambi busholoke manene na kumwana bumpau, co bika banjisompela ngwabo nji muka-bubi? 8 Co bikajo kutwendeka ngwe mubali na kutubangeya banu bamo ngwabo tuli na kwendeka ngwetu, “Tulingeni byuma byabibi mangana tuwane byuma byabibwa”? Aba banu bali na kwendeka ngacije bakabakula mu kusungama.

9 Kuma yetu Bajuda tunatubakana bakwetu ndi? Embwe! Mwafwa tunamwesa laja ngwetu Bajuda na Bagriki boshe bali na bubi, 10 ngwe mubanasoneka ngwabo: “Kukwesi muka-kusungama nambe bene umo. 11 Kukwesi munu azibisisa, kukwesi munu atonda-tonda Njambi. 12 Banu boshe banalumbuka, boshe banapu bangoco, naumo wahi ali na kumwesa ngozi, nambe umo bene wahi.” 13 “Milibu yabo inapu bihilo bije binashama, bali na kukwisa na bindaka byabo.” “Kwisi ya tunwa twabo kuli bushungu bwa manyoka.” 14 “Tunwa twabo tunashulu na bisingo na majwi a kulula.” 15 “Mendi abo akazambwila kwitila maninga.” 16 “Mu bingila byabo muli kunyonga na kayando, 17 co ngila ya kwoloka kubaizibukile.” 18 “Kubesi kuzibila Njambi lyoba.”

19 Tuzibuka ngwetu, byuma byoshe bilinendeka Lishiko, linabyendeka kuli baje bali mwisi ya Lishiko mangana tunwa twoshe batwolwese kulu na kumwesa ngwabo kaye koshe kali na mulonga kuli Njambi, co banapande kukana kashitiko. 20 Ngeci, naumo wahi ibasana ngwabo muka-kusungama ku mesho a Njambi mwafwa ya bipangi bya lishiko, mwafwa lishiko likelyo linatulingisa tukale na mangana a busunga a kuzibuka bubi.

21 Oloni hano Njambi nasholola kusungama kwendi kwa kujeneka lishiko, ngwe mulyendekele Lishiko na Bisoneka bya Tupolofweto. 22 Kuli boshe baje banamwesa likulahelo, busunga bwa Njambi bunasholoka kuli bakebo kwitila mu kukala na likulahelo muli Yesu Kristu. Mwafwa kukwesi kuliseza. 23 Mwafwa boshe banalingi bubi, co banonwa kweta ha seteko ya bumpau bwa Njambi. 24 Njambi nabana bwana ha kubasana ngwendi banapu baka-kusungama kwitila mu ngozi yendi yakama ha kubapatula na ndando ya kupatula ya Kristu Yesu. 25 Njambi wanene Yesu kupwa bwana bwa kwilwisa banu kuli Njambi* kwitila mu kukulahela mu maninga a Yesu. Walingile ngoco mangana amwese kusungama kwendi, mwafwa wakele na kwecelela* banu na kukonekela bubi bwalingiwile kunima. 26 Kwapwile ngoco mangana amwese kusungama kwendi mu simbu ino, mangana apwe muka-kusungama omwo asana munu uje ali na likulahelo muli Yesu ngwendi muka-kusungama.

27 Kuma kuli bimo bitunapande kulishashela ndi? Embwe, nabimo byahi! Kuma tunapande kulishashela kwononoka lishiko ndi? Embwe! Tunapande kulishashela lika bya kukabangeya lishiko lya likulahelo. 28 Mwafwa tunamono ngwetu munu bamusana ngwabo muka-kusungama mwafwa ya likulahelo, keti mwafwa ya bipangi bya lishiko. 29 Kuma wapwa Njambi ya Bajuda lika ndi? Kuma kapwile lalo Njambi ya banu ba ku mafuti ndi? Eyo, wapwa lalo Njambi ya banu ba ku mafuti. 30 Ha kuwana ngwe Njambi wapwa umolika, asana banu ba kuya ku mukanda ngwendi ba kusungama mwafwa ya likulahelo lyabo. Co lalo asana banu ba kujeneka kuya ku mukanda ngwendi ba kusungama, mwafwa ya likulahelo lyabo. 31 Kuma tumanesa lishiko mwafwa ya likulahelo lyetu ndi? Embwe! Oloni tukundwiya lishiko.

4 Ha kuwana ngwe mukemwo mubinafu byuma ngoco, twendeka ngwetu bika byawanene kukulwila yetu Abrahamu? 2 Cakumwenako, ngwe Abrahamu bamusanene ngwabo wa kusungama mwafwa ya bipangi byendi, ngwe wawanene hakulishashela, oloni keti kulishashela ku mesho a Njambi embwe. 3 Bika bicendeka cisoneka? “Abrahamu wakulahelele Yehova, co bamumwene ngwabo muka-kusungama.” 4 Munu uje wapanga, fweto yendi kubaimono ngwabo inapu ngozi yakama, oloni baimona ngwabo inapu cuma cibanapande kumwana.* 5 Co munu uje kesi kupanga, oloni akala na likulahelo muli Uje asana munu wa kujeneka kuzibila Njambi lyoba ngwendi wa kusungama, ou munu bamumona ngwabo wa kusungama mwafwa ya likulahelo lyendi. 6 Omu mukemwo mwanendeka na Devidi ha kubwahelela kwaziba munu yanatumbula Njambi ngwendi wa kusungama kwa kujeneka bipangi byanalingi, ngwendi: 7 “Banabwahelela baje babanakonekela bilinga byabo bya kupokola mashiko na baje babanafwikila* bubi bwabo. 8 Nabwahelela munu uje Yehova kakanuka bubi bwendi.”

9 Kuma eci kubwahelela cinapu ca baje banai lika ku mukanda, indi na baje kubaile ku mukanda? Mwafwa tukendeka ngwetu: “Abrahamu bamumwene ngwabo muka-kusungama mwafwa ya likulahelo lyendi.” 10 Simbu muka ibamusanene ngwabo wa kusungama? Te nai ku mukanda indi te kanda aye ku mukanda? Te kanda aye ku mukanda. 11 Co bamwanene cizibukiso, eci cizibukiso cinapu kuya ku mukanda, kuje kwapwile ciganto ca kumwesa ngwaco napu wa kusungama mwafwa ya likulahelo lyakele nalyo simbu kanda aye ku mukanda. Capwile ngoco mangana apwe ishe ya boshe baje bali na likulahelo nameme kubaile ku mukanda ngeci babamone ngwabo banapu ba kusungama. 12 Wapwile lalo ishe ya bana baje banai ku mukanda, keti lika ishe ya baje bali na kunyunga lishiko lya kuya ku mukanda, oloni na baje bali na kwenda mu kulongwa mu kukulahela kwakele nakwo tate yetu Abrahamu, simbu kanda aye ku mukanda.

13 Mwafwa Abrahamu nambe bana bendi* kubatambwile eci cikulaheso ca kuswana kaye kwitila mu lishiko embwe, oloni bacitambwile kwitila mu busunga bwendi mwafwa ya kukala na likulahelo. 14 Mwafwa nga baje bali na kunyunga lishiko banapu baswana, co likulahelo linapu lyangoco, co lalo na cikulaheso banacimanesa. 15 Mwafwa Lishiko likanene butenu, oloni kuje kukwesi lishiko na kupokola lishiko cahiko.

16 Mukemwo eci cikulaheso cezile kwitila mu likulahelo mwafwa capwa bwana bwa ngozi yakama ya Njambi, mangana eci cikulaheso cipwe ca busunga ku bana ba Abrahamu boshe, keti lika baje bali na kunyunga lishiko, oloni na baje bali na kunyunga likulahelo lya Abrahamu uje wapwa tate yetu tubaboshe. 17 (Oku kunapu lika ngwe mubanasoneka ngwabo: “Njinakwangula upwe ishe ya baka-mafuti amangi.”) Omu mukemwo mwamumwene Njambi uje yakulahelele, uje akalingisa batsi bayoye na kusana byuma bije byahiko ngwe kubili.* 18 Nameme kukwakele byuma byasele kulingisa Abrahamu akale na lilabelelo lya kukala na bana, oloni mwafwa ya lilabelelo, wakulahelele ngwendi apwa ishe ya baka-mafuti amangi kwesekesa nomu mwamulekele Njambi ngwendi: “Omu mukemwo mubakafwa bana* bobe.” 19 Nameme likulahelo lyendi kulyazeyele, oloni wamwene mubila wendi ngwe unatsi, (mwafwa wakele na myaka ya kweta ku 100), co lalo wamwene Sala ngwendi natubakana myaka ya kukita. 20 Oloni mwafwa ya cikulaheso ca Njambi, Abrahamu kauwasanene nambe kuzeya mu likulahelo, oloni likulahelo lyendi lyamukanyamesele, co wanene Njambi bumpau. 21 Co watabele bene ngwendi byuma byamukulahesele Njambi, Njambi wasele lalo kubilinga. 22 Ngeci, mwafwa ya likulahelo lyendi, “bamumwene ngwabo wa kusungama.”

23 Nameme ngoco, lijwi lya kwendeka ngwalyo “bamumwene” kubalisonekelele lika ikeye, 24 oloni balisonekelele netu lalo, yetu babanamono ngwabo ba kusungama, mwafwa tunataba muli Uje wasangwile Mwata wetu Yesu ku batsi. 25 Njambi watabesele banu batsiye Yesu mwafwa ya byuma bitwabulumwine, co bamusangwile ku batsi mangana batusane ngwabo tu ba kusungama.

5 Ngeci, ha kuwana ngwe banatusana ngwabo tu baka-kusungama mwafwa ya likulahelo lyetu, tulikuweni kwoloka* na Njambi kwitila muli Mwata wetu Yesu Kristu. 2 Likulahelo lyetu muli Yesu litulingisa tushwene kuli Njambi na kulikuwa ngozi yendi yakama, co tubwaheleleni,* mwafwa tuli na lilabelelo lya kutambula bumpau bwa kutunda kuli Njambi. 3 Keti ebi lika, oloni tubwaheleleni* ha simbu ituli mu tuyando, mwafwa tuzibuka ngwetu tuyando tukanene kukolesa, 4 kukolesa kulingisa tuzibise Njambi kubwaha, kuzibisa Njambi kubwaha kutulingisa tukale na lilabelelo, 5 co lilabelelo kulituzibisa shwamwa, mwafwa cizemo ca Njambi banacishulisa mu bimbunge byetu kwitila mu sipilitu ya kujela ije ibatwanene.

6 Co ha simbu itwapwile ba kuzeya, Kristu watsililile banu ba kujeneka kuzibila Njambi lyoba ha simbu ibanangula. 7 Kwakukalu manene kuwana munu ataba kutsila muka-kusungama, ikeyeni hamo kwasa kukala munu akaluka na kutaba kutsila munu wamubwa. 8 Oloni Njambi nasholola cizemo cendi kuli yetu, mwafwa ha simbu itwapwile tu baka-bubi, Kristu watutsililile. 9 Ha kuwana ngwe banatusana ngwabo tu baka-kusungama mwafwa ya maninga a Yesu, tukulahela manene ngwetu tukoboka ku butenu bwa Njambi kwitila muli ikeye. 10 Nga ha simbu itwapwile tu bitozi ba Njambi, twelukile kuli ikeye kwitila mu kutsa kwa Munendi, co tukulaheloni manene ngwetu mutuneluka kuli Njambi, tukoboka mwafwa ya kuyoya kwa Yesu. 11 Keti ebi lika, oloni tuli na kubwahelela lalo muli Njambi kwitila muli Mwata wetu Yesu Kristu uje muli ikeye tuneluka kuli Njambi.

12 Bubi bwakobelele mu kaye kwitila muli munu umolika, co bubi bwanenele kutsa. Mukemwo kutsa kunajalakana ku banu boshe, mwafwa boshe balingile bubi—. 13 Mwafwa bubi bwakele mu kaye simbu kanda kukale Lishiko, oloni kukwesi munu ibana mulonga wa bubi nga kukwesi lishiko. 14 Nameme ngoco, kutsa kunayulu ngwe mwene kutunda kuli Adama kweta na kuli Mosesa, kunayulu bene na baje kubalingile bubi ngwe muje mwapokwele lishiko Adama, uje nalifu na uje ibabandamenene ngwabo akaija.

15 Oloni bwana bwa Njambi kubwalifwile na kubulumuna kwa Adama, mwafwa nga kubulumuna kwa munu umolika kunatsiisisa banu babangi, co ngozi yakama ya Njambi na bwana bwendi bwangoco bije byanana kwitila mu ngozi yakama ya munu umolika, Yesu Kristu, binama manene ku banu babangi! 16 Bwana bwa Njambi na bubi bwa munu umolika binalisezela lalo aha: Kusompa kubasompele munima ya kubulumuna lumolika kwapwile kuhisa, oloni bwana bubanene munima ya kubulumuna lwalwingi bwalingisile banu babasane ngwabo ba kusungama. 17 Mwafwa nga kubulumuna kwa munu umolika kunalingisa kutsa kuyule ngwe mwene kwitila muli uje munu umolika, co tukulahela ngwetu baje bakatambula mu bwingi ngozi yakama na bwana bwa busunga, bakayoya na kuyula bene ngwe bimyene kwitila muli munu umolika Yesu Kristu!

18 Ngeci, ngwe omwo kubulumuna kwa munu umolika kunalingisa banu ba miyati yoshe babahise, mu ngila imolika, kwitila mu cuma ca busunga calingile munu umolika, banu ba miyati yoshe babasana ngwabo baka-kusungama mangana bakayoye. 19 Mwafwa ngwe omwo kujeneka kwononoka kwa munu umolika kunalingisa banu babangi bapwe baka-bubi, na kwononoka kwa munu umolika lalo kulingisa banu babangi babapwise baka-kusungama. 20 Co Lishiko lyezile mangana limwese mukunalibwezelela kubulumuna. Oloni kuje kubwamene bubi, kukekwoni kuyamene manene ngozi yakama. 21 Mwafwa bika? Mangana ngwe omwo bubi bunayulu hamolika na kutsa ngwe mwene, na ngozi yakama nayo yase kuyula ngwe mwene kwitila mu busunga buje butwala ku kuyoya kwa myaka yoshe kwitila muli Yesu Kristu Mwata wetu.

6 Co bikoni bitwendeka? Kuma tunapande kutwalelelaho mu bubi mangana ngozi yakama ilibwezelele ndi? 2 Embwe. Ha kuwana ngwe twatsile ku bubi, twasa kutwalelelaho bati kuyoya mu bubi? 3 Indi kumuzibuka ngweni tubaboshe babambwitikile muli Kristu Yesu, batumbwitikile mu kutsa kwendi ndi? 4 Ngeci, batutsindile hamolika nendi mu kutsa kwendi kwitila mu cimbwitiko cetu, mangana ngwe omwo Kristu bamusangwile ku batsi kwitila mu bumpau bwa Tate, netu lalo twende mu kuyoya kwakuha. 5 Nga tunalikwatasana nendi mu ngila ya kulifwa naije yatsilililemo, co tukalikwatasana lalo nendi na mu ngila ya kulifwa naije yasangukililemo. 6 Mwafwa tuzibuka ngwetu bunu bwetu bwa laja babupameyeye ha citi hamolika nendi, mangana mibila yetu ya bubi keti ikale na nzili, ngeci keti tutwaleleleho kupwa bindungo ba bubi. 7 Mwafwa uje natsi, nasamba* ku bubi bwendi.

8 Co lalo nga tunatsi na Kristu, tutaba ngwetu tukayoya nendi lalo. 9 Mwafwa tuzibuka ngwetu Kristu mwanasangukoni ku batsi, kakatsi lalo. Kutsa kukwesi lalo na nzili hali ikeye. 10 Watsile lumolika mangana amanese bubi,* co hano ali na kuyoyela kulinga cizango ca Njambi. 11 Mu ngila imolika, limoneni yeni babenya ngweni munatsi ku bubi, oloni kuli Njambi muli na kuyoya kwitila muli Kristu Yesu.

12 Ngeci, keti mutabese bubi butwaleleleho kuyula ngwe mwene mu mibila yeni ya bunu na kwononoka cizango cabwo. 13 Keti mwane mibila* yeni ku bubi kupwa bitwa bya kupangesa mu kulinga byuma bya kujeneka kusungama, oloni lyaneni yeni babenya kuli Njambi ha kuwana ngwe munayoyo ku batsi. Co lalo aneni mibila* yeni kuli Njambi kupwa bitwa bya kupangesa mu kulinga byuma bya kusungama. 14 Mwafwa bubi kubwapandele kukala na nzili hali yeni ha kuwana ngwe kumwesi mwisi ya lishiko, oloni muli mwisi ya ngozi yakama.

15 Co twendekoni ngwetu bati? Kuma tunapande kulinga bubi mwafwa kutwesi mwisi ya lishiko, oloni tuli mwisi ya ngozi yakama ndi? Embwe. Kucapandele kufwa ngoco. 16 Kuma kumuzibuka ngweni nga mulyana yeni babenya ku munu umo na kumwononoka ngwe bindungo, co mulipwisa bindungo bendi ndi? Cili bene, mupwa bindungo ba bubi buje butwala ku kutsa, nambe bindungo ba kwononoka kuje kutwala ku busunga. 17 Oloni tukandelela Njambi ngwetu nameme mwapwile bindungo ba bubi, hano munononoka kutundilila kwisi ya bimbunge byeni bilongesa bimwatambwile. 18 Ha kuwana ngwe bamipatwile ku bubi, mwapwile oni bindungo ba busunga. 19 Njili na kupangesa majwi aje abazibisisa banu mwafwa ya buzeye bwa situ yeni. Ngwe mumwanene bilyo byeni kupwa bindungo ku mazilo na ku kupokola mashiko kuje kutwala ku kupokola mashiko, na hano aneni bilyo byeni kupwa bindungo ku kusungama kuje kutwala ku kujela. 20 Mwafwa mumwapwile bindungo ba bubi, kumwatondekele kulinga byuma byabibwa.

21 Bushuka muka bumwakele na kwima ha simbu ije? Mwakele na kulinga byuma bimuli na kuzibila shwamwa ha simbu ino. Ebi byuma bitwala ku kutsa. 22 Oloni ha kuwana ngwe bamipatwile ku bubi na kupwa bindungo ba Njambi, hano muli na kwima bushuka mu ngila ya kujela, co byuma bitundamo binapu kuyoya kwa myaka yoshe. 23 Mwafwa fweto ya bubi inapu kutsa, oloni bwana bwali na kwana Njambi bunapu kuyoya kwa myaka yoshe kwitila muli Kristu Yesu Mwata wetu.

7 Bandolome, (njili na kwendeka kuli baje bazibuka lishiko) indi hamo kumuzibuka ngweni Lishiko lili na nzili hali munu nga acili na kuyoya ndi? 2 Cakumwenako, munakazi wa kushomboka nakutiwa na lishiko kuli munalume wendi ha simbu yaciyoya munalume wendi. Oloni nga munalume wendi natsi, co napatuka ku lishiko lya munalume wendi. 3 Ngeci, nga munakazi wa kushomboka ashomboka kuli munalume weka ha simbu yaciyoya munalume wendi, co bamusana ngwabo muka-kulinga bukoi. Oloni nga munalume wendi natsi, co napatuka ku lishiko lya munalume wendi, ngeci kubamusana lalo ngwabo muka-kulinga bukoi nga ashomboka kuli munalume weka.

4 Ngeci bandolome bange, neni bamitsiile ku Lishiko kwitila mu mubila wa Kristu mangana mupwe ba weka, uje ibasangwile ku batsi mangana mwime bushuka kuli Njambi. 5 Mwafwa mutwakele na kuyoya kwesekesa na situ, mashungu a bubi aje alyakatwile Lishiko akele na kupanga mu mibila yetu mangana eme bushuka bwa kutsa. 6 Oloni hano banatupatula ku Lishiko mwafwa tunatsi ku byuma bije byatukutile, mangana tupwe bindungo mu ngila yaiha kwitila mu sipilitu, keti mu ngila ya laja kwitila mu lishiko lya kusoneka.

7 Twendekoni ngwetu bati? Kuma Lishiko linapu bubi ndi? Embwe. Cili bene, ngwe Lishiko kwahi, ngwe kunjazibukile bubi. Cakumwenako, ngwe Lishiko kulyendekele ngwalyo, “Keti ushungwiye cambala,” ngwe kunjizibuka ngwange kushungwiya cambala kwapwa kwakubi. 8 Oloni bubi bwapangesele eli lishiko mu kwindula mashungu ange oshe amabi, mwafwa kwa kujeneka lije lishiko, bubi bwatsile. 9 Simbu kanda kukale lishiko, njakele na kuyoya. Oloni mulyezile lishiko, bubi bwashangumukile lalo kuyoya, co yange njatsile. 10 Co lishiko lije lyapandele kunjitwamenena ku kuyoya, lyanjitwamenenene ku kutsa. 11 Mwafwa bubi bwapangesele eli lishiko mu kunjikokweya na kunjitsiya. 12 Ngeci, Lishiko lya Mosesa lyapwa lya kujela, co na mashiko alimo apwa a kujela, a kusungama, co lalo amabwa.

13 Kuma byuma byabibwa bikebyo byanenele kutsa kwange ndi? Embwe. Bubi bukebwo bwanenele kutsa kwange. Lishiko lyapwa lyalibwa, oloni lyasholwele mwamubwa ngwalyo bubi bukebwo bwanenele kutsa kwange. Ngeci, lishiko lyajombolola mubwabihya bubi. 14 Tuzibuka ngwetu Lishiko lyapwa lya ku sipilitu, oloni yange nji munu wa situ ibanalandesa mu bundungo bwa bubi. 15 Kunjizibisisa binjili na kulinga. Mwafwa kunjesi na kulinga binjishaka, oloni njili na kulinga byuma binjazinda. 16 Nameme ngoco, nga njilinga byuma bije kunjishaka kulinga, anga njitaba ngwange Lishiko lyapwa lyalibwa. 17 Oloni hano keti yange njili na kubilinga, bubi buje buli muli yange bukebwo buli na kubilinga. 18 Mwafwa njizibuka ngwange muli yange, kulumbununa mu situ yange, na cimo cacibwa bene cilimo cahi. Mwafwa njili na cizango ca kulinga byuma byabibwa, oloni kunjesi na nzili ya kubilinga. 19 Mwafwa kunjesi na kulinga byuma byabibwa binjishaka, oloni njili na kulinga byuma byabibi bije kunjishaka kulinga. 20 Ngeci, nga njili na kulinga byuma bije kunjishaka, keti yange njili na kubilinga, oloni bubi buje buli muli yange bukebwo buli na kubilinga.

21 Njinawana eli lishiko kupwa lya busunga muli yange: Munjishaka kulinga byabibwa, co byabibi bili laja muli yange. 22 Mu mbunge yangeni njazema manene lishiko lya Njambi, 23 oloni mu mubila wange njili na kumonamo lishiko likwabo lije lili na kulwisa lishiko lili mu bisinganyeka byange, co lili na kunjitwala mu bundungo bwa lishiko lya bubi lije lili mu mubila wange. 24 Yange munu wa kubindama! Iya anjobola ku mubila ou uli na kunjitwala oku ku kutsa? 25 Njikandelela Njambi mwafwa ali na kunjobola kwitila muli Yesu Kristu Mwata wetu! Ngeci bene, mu bisinganyeka byange, nji ndungo ya lishiko lya Njambi, oloni mu situ yange nji ndungo ya lishiko lya bubi.

8 Ngeci bene, baje banalikwatasana na Kristu Yesu kubesi na mulonga. 2 Mwafwa lishiko lya sipilitu ije yana kuyoya mu kulikwatasana na Kristu Yesu linamipatula ku lishiko lya bubi na kutsa. 3 Lishiko kulyakele na nzili ya kumipatula, mwafwa banu bapwa ba kuzeya, co lalo baka-bubi. Njambi wamipatwile ha kutuma Munendi uje wezile mu cifwa ca banu baka-bubi mangana amanese bubi. Ngeci, Njambi wapayele bubi buje buli mu situ 4 mangana byuma bya kusungama bya mu Lishiko bilishulisilile muli yetu, yetu tuli na kwenda kwesekesa na sipilitu, keti kwesekesa na situ. 5 Mwafwa baje bayoya kwesekesa na situ baka bisinganyeka byabo ku byuma bya situ, oloni baje bayoya kwesekesa na sipilitu baka bisinganyeka byabo ku byuma bya sipilitu. 6 Mwafwa kwaka bisinganyeka byetu ku byuma bya situ kunena kutsa, oloni kwaka bisinganyeka byetu ku byuma bya sipilitu kunena kuyoya na kwoloka. 7 Mwafwa kwaka bisinganyeka byetu ku byuma bya situ kutupwisa bitozi ba Njambi, mwafwa situ kuyesi kulyaka kwisi ya lishiko lya Njambi, co lalo kuyasa kulyakako. 8 Baje bali na kuyoya kwesekesa na situ kubasa kuzibisa Njambi kubwaha.

9 Oloni nga sipilitu ya Njambi ili muli yeni, co munalikwatasana na sipilitu keti na situ. Oloni nga umo kesi na sipilitu ya Kristu, co ou munu kakundamene kuli ikeye. 10 Oloni nga mwalikwatasana na Kristu, sipilitu imiyoyesa mwafwa ya busunga, nameme mubila unatsi mwafwa ya bubi. 11 Nga sipilitu ya uje wasangwile Yesu ku batsi ili muli yeni, co uje wasangwile Kristu Yesu ku batsi alingisa mibila yeni ya situ iyoye kwitila mu sipilitu ije ili muli yeni.

12 Ngeci bandolome, kubatusindiiye ngwabo twononoke situ mangana tuyoye kwesekesa na situ embwe. 13 Mwafwa nga muyoya kwesekesa na situ, co mutsa bene. Oloni nga mutsiya bilinga bya mubila kupangesa sipilitu, co muyoya. 14 Mwafwa boshe baje baili na kutwamenena sipilitu ya Njambi banapu bene bana ba Njambi. 15 Kumwatambwile sipilitu ya bundungo ije imilingisa muzibe lalo lyoba, oloni mwatambwile sipilitu ije yamipwisile bana ba Njambi. Ei sipilitu ili na kutulingisa tutambeke ngwetu: “Abba,* Tate!” 16 Sipilitu ya Njambi ili na kwana bukaleho na sipilitu yetu ngwayo tu bana ba Njambi. 17 Co nga tu bana ba Njambi, tunapu lalo tu baswana, baswana ba Njambi bene, oloni baswana baje banalikwatasana na Kristu, cakama lika nga tuyanda hamo nendi, mangana netu tukatambwile hamo nendi bumpau.

18 Mwafwa tuyando tutuli na kumona ha simbu ino, kutulyeseka na bumpau bubakasholola muli yetu. 19 Byakutanga bili na kubandamena na kushungwiya manene kusholoka kwa bana ba Njambi. 20 Mwafwa byakutanga babilingisile biyoye buyoye bwangoco, keti ngwe ku cizango cabyo, oloni ku cizango ca uje wabilingisile ngoco, co wabyanene na lilabelelo 21 ngwendi byakutanga bakabipatula lalo ku bundungo bwa kubola na kubyana bumpau bwa kupatuka kwa bana ba Njambi. 22 Mwafwa tuzibuka ngwetu byakutanga byoshe binatwalelelaho kukemanga na kuzibila hamo kubabala kweta na lelo lino. 23 Oloni hano tuli na sipilitu, ije inapu bushuka bwakulibanga bwa byuma bili na kwija. Tuli na kukemanga simbu tucibandamena kutupwisa bana ba Njambi. Ha simbu oyo, bakatupatula ku mibila yetu kwitila mu ndando ya kupatula. 24 Mwafwa mubatwobwele, twatambwile eli lilabelelo, oloni cuma cibali na kulabelela nga cinamoneka, kubacilabelela lalo. Nga munu namono cuma, kuma napande lalo kucilabelela ndi? 25 Oloni nga tulabelela cuma cije kutwamwene, tutwalelelaho kucibandamena manene na kukolesa.

26 Mu ngila imolika, sipilitu nayo ikatukwasa mu buzeye bwetu. Bukalu lika kutuzibuka bitunapande kulomba ngwe mututondela, oloni sipilitu ikatulambelelako ha binyengo byetu bije kutwendekele. 27 Oloni Njambi uje ali na kwilula bimbunge azibuka biili na kwendeka sipilitu, mwafwa ili na kulambelelako bakujela mu kulitombola na kujela kwendi.

28 Tuzibuka ngwetu Njambi akalingisa bipangi byendi byoshe bilikwatasane hamo mangana bikwase baje bazema Njambi, baje babanasana kwesekesa na biyongola byendi. 29 Hakulibanga, wabangele tahi kwaka mbunge kuli bakebo, co wabangwilile cimweja ngwendi bapwe ngwe Munendi mangana Munendi apwe ntwatwa mukati kaba bandolome babangi. 30 Co lalo baje bangwilile cimweja bakebo basanene, co baje basanene bakebo lalo basanene ngwendi baka-kusungama. Mamaneselelo, baje basanene ngwendi baka-kusungama, bakebo lalo banene bumpau.

31 Co twendeka bikoni ha byuma ebi? Nga Njambi ali netu, co iyajo atulwisa? 32 Ha kuwana ngwe kabyanene kwana Munendi, oloni watwaneneye mangana atsile yetu tubaboshe, kuma kakatwana lalo byuma bikwabo byoshe kubwezelela kuli Munendi ndi? 33 Iya asa kwana mulonga baje banangula Njambi? Njambi ikeye nabasana ngwendi baka-kusungama. 34 Iya asa kubahisa? Kristu Yesu ikeye wabatsililile, co lalo wasangukile ku batsi. Hano ali ku liboko lya cilyo lya Njambi, ali na kutulambelelako.

35 Kuma kuli cuma cimo casa kutwangununa ku cizemo ca Kristu ndi? Kayando ndi, bukalu ndi, mapakeso ndi, njala ndi, buzu ndi, bushonde ndi, indi moko ya mukwale? 36 Kunapu lika ngwe mubanasoneka ngwabo: “Tuli na kulitala na kutsa simbu yoshe* mwafwa yobe. Banu bali na kutumona ngwe bimanga baje babali na kutwala na kutsiya.” 37 Oloni mu byuma byoshe ebi, tuli na kuhyana, mwafwa ya uje watuzemene.* 38 Mwafwa njinataba ngwange, kutsa, nambe kuyoya, nambe tungelo, nambe bifulumende, nambe byuma biliko hano, nambe bikaija kulutwe, nambe binzili, 39 nambe bulaha bwa kuya mwilu, nambe kuloba, nambe cuma ceka ca kutanga, nacimo cahi casa kutwangununa ku cizemo ca Njambi cije cinasholoka kwitila muli Kristu Yesu Mwata wetu.

9 Njili na kwendeka busunga muli Kristu. Kunjesi na kukwisa, ngwe omwo citakutaku cange cili na kwanena bukaleho mu sipilitu ya kujela, 2 ngwange njili mu busiwa bwakama, co mbunge yange ili na kuziba kubabala simbu yoshe. 3 Ngwe citaba, ngwe yange njangunuka kuli Kristu na kupwa ngwe wakusingiwa mwafwa ya bandolome bange, babushoko bwange ku situ, 4 baje banapu Baisalele. Babangwile kupwa bana ba Njambi, wabamwesele bumpau bwendi na kubana bikumiiyo na Lishiko na cipangi ca kujela na bikulaheso. 5 Batunda kuli bakukulwila betu, kuje lalo kwatundile na Kristu mwakupwile munu. Njambi uje ali hakamwa ya boshe bamushangazale ku myaka yoshe. Ameni.

6 Oloni keti ngwabo lijwi lya Njambi linonwa embwe. Mwafwa keti boshe batunda kuli Isalele banapu bene “Baisalele.” 7 Co lalo keti boshe babasana ngwabo bana ba Abrahamu, banapu bana bendi embwe, oloni “Baje babakasana ngwabo bana bobe bakapwa baje bakatunda kuli Isaki.” 8 Oku kulumbununa ngwabo bana ba ku situ keti bana ba Njambi bene. Oloni bana baje babakulahesele, bakebo babakamona ngwabo bana. 9 Mwafwa Njambi wakulahesele ngwendi: “Njikaija ha simbu ino, co Sala akakala na mwana wa munalume.” 10 Omu mukemwo lalo mukwafwile na kuli Rabeka mwemitile bana bampasa ba kukulwila yetu Isaki. 11 Mwafwa simbu kanda basemuke, co lalo simbu kanda balinge cuma cacibwa nambe cacibi, Njambi wamwesele ngwendi biyongola byendi bya kwangula, kubimana ha bipangi, oloni bimana hali Uje asana. 12 Co walekele Rabeka ngwendi: “Mwana wa mukulunu akapwa ndungo kuli shongo yendi.” 13 Kunapu lika ngwe mubanasoneka ngwabo: “Njazemene Jakobu, oloni Isau njamuzindile.”

14 Co bikoni bitwendeka? Kuma Njambi akakula mu kuhengesa ndi? Embwe. 15 Mwafwa ali na kwendeka kuli Mosesa ngwendi “Njikatetela woshe injikashaka kutetela, co njikamwesa mema ku mbunge woshe injikashaka kumwesa mema ku mbunge.” 16 Ngeci, kukwemanene ha kushaka kwa munu nambe ha kulifwita kwendi, oloni kunemana hali Njambi muka-kutetela. 17 Mwafwa cisoneka cinendeka hali Falo ngwaco: “Ebi bikebyo binjakwecelelele mangana njimwese nzili yange kwitila muli yobe na kulingisa lizina lyange balyambulule hasi hoshe.” 18 Ngeci, akatetela woshe yashaka kutetela, oloni akecelela woshe uje atindibala atindibale.

19 Umo asa kunjihula ngwendi: “Bika byali na kutondela tupenga muli yetu? Iya asa kubyana cizango cendi?” 20 Oloni obe munu, yobe iyajo mangana ulikumbulule na Njambi? Kuma cuma ca kumunga casa kwendeka kuli uje nacimungu ngwaco: “Bika biunanjimungila ngacije?” 21 Kuma muka-kumunga byuma bya buma kesi na nzili ha buma na kupangaho cuma ca kupangesa ku byuma bya bulemu na kumungaho cikwabo ca kupangesa ku byuma bya kujeneka bulemu ha buma bumolika ndi? 22 Omu mukemwo mukunafu na kuli Njambi. Wayongwele ngwendi amwese butenu bwendi na kumwesa nzili yendi, oloni wakele na mbunge ya kubandamena, co wecelelele baje bamulubalesele, baje bapandele kunyonga. 23 Walingile ngoco mangana amwese bumpau bwendi bwakama kuli baje bakatambula kutetela kwendi. Nababwahesela ngwendi akabane bumpau. 24 Yetu bene basanene, keti hakati ka Bajuda lika, oloni na baka-mafuti. 25 Kunapu lika ngwe mwanendeka ku Hosiya ngwendi: “Baje kubapwile banu bange, njikabasana ngwange ‘banu bange.’ Co munakazi uje kubazemene, njikamusana ngwange ‘muka-cizemo cange.’ 26 Co ku mwela kuje kubabendekelele ngwabo, ‘Keti mu banu bange,’ kukekwo kubakabasanena ngwabo, ‘bana ba Njambi wa kuyoya.’”

27 Co lalo Isaya watambekele hali Isalele ngwendi: “Nameme bana ba Isalele banasa kutuma ngwe mushekesheke wa ku kalunga-ndonga, oloni kukoboka lika baje banasalaho. 28 Mwafwa Yehova akasompa lifuti-libu, akalinga ngoco bwasi-bwasi.” 29 Co lalo ngwe mwapolofwetele Isaya ngwendi: “Ngwe Yehova wa maswalale katusezelele mwana, ngwe tunapu lika ngwe Sodoma, co lalo ngwe tunalifu na Gomola.”

30 Co bikoni bitwendeka? Twendeka ngwetu banu ba ku mafuti nameme kubakabangeyeye busunga, oloni bawanene busunga, busunga buje butunda mu kukala na likulahelo. 31 Oloni Baisalele, nameme bakele na kukabangeya lishiko lya busunga, bonowele kuwana lije lishiko. 32 Mwafwa bika? Mwafwa balikabangeyeye kwitila mu bipangi keti kwitila mu likulahelo. Batanukile ha “limanya lya kutanwisa,” 33 ngwe mubanasoneka ngwabo: “Taleni! Njili na kwaka limanya lya kutanwisa mu Siyone na libwe lya kulubalesa, oloni woshe uje akulahela eli limanya kakalibeye.”

10 Bandolome, byuma binjishaka mu mbunge yange na byuma binjili na kulambelela Njambi, binapu bya kushaka ngwange Baisalele boboke. 2 Mwafwa nange njitaba ngwange bali na ntwima ya kupangela Njambi, oloni keti kwesekesa na mangana a busunga. 3 Ha kuwana ngwe kubazibuka busunga bwa Njambi, banatondo busunga bubanalisinganyekela bakebo babenya, mukemwo kubalyakele kwisi ya busunga bwa Njambi. 4 Mwafwa Kristu namanesa Lishiko mangana woshe amukulahela apwe wa kusungama.

5 Mosesa wasonekele bya kusungama kuje kunemana ha Lishiko, ngwendi: “Munu alinga ebi byuma ayoya.” 6 Oloni lijwi lya Njambi linendeka ha busunga buje butunda mu kukala na likulahelo, ngwalyo: “Keti wendeke mu mbunge yobe ngwobe, ‘Iya aya mwilu?’ kulumbununa kukashulwisa Kristu hasi, 7 nambe ngwobe, ‘Iya asikumuka mu mbulu?’* kulumbununa kukasangula Kristu ku batsi.” 8 Oloni bika bilinendeka lijwi lya Njambi? Linendeka ngwalyo: “Lijwi lili hayehi nobe, lili mu kanwa kobe, co lalo lili mu mbunge yobe,” kulumbununa “lijwi” lya likulahelo lituli na kwambulula. 9 Mwafwa nga wambulula ku mbunga na kanwa kobe ngwobe Yesu ikeye Mwata, na kukulahela mu mbunge yobe ngwobe Njambi wamusangwile ku batsi, co ukoboka. 10 Mwafwa munu amwesa likulahelo na mbunge yendi mangana apwe wa kusungama. Oloni ambulula na kanwa kendi ku mbunga mangana oboke.

11 Mwafwa cisoneka ngwaco: “Naumo wahi amukulahela, akalibeya.” 12 Mwafwa kukwesi kuliseza mukati ka Kajuda na Kagriki. Banu boshe Mwata wabo umolika, uje akana bibezikiso byabingi manene kuli boshe baje bamusana. 13 Mwafwa “woshe asana ha lizina lya Yehova akoboka.” 14 Oloni bamusana bati nga kubamukulahelele? Co bamukulahela bati nga kubazibile byendi? Co baziba bati byendi nga wahi abambulwila? 15 Co bambulula bati nga kubabatumine? Kunapu lika ngwe mubanasoneka ngwabo: “Mendi a baje bambulula muzimbu waubwa wa byuma byabibwa apwa amabwa manene!”

16 Nameme ngoco, keti boshe bononokele muzimbu waubwa. Mwafwa Isaya ngwendi: “Yehova, iya nakulahela byuma byanazibi kuli yetu?”* 17 Ngeci, likulahelo lija munima ya kuziba lijwi, co lijwi baliziba nga munu endeka bya Kristu. 18 Oloni njihula hali Baisalele ngwange, Kuma kubazibile ndi? Mwafwa Bisoneka byendeka ngwabyo: “Cilumo cabo caile mu kaye koshe, co muzimbu wabo wetele na ku banu ba ku mitambela ya kulako hano hasi.” 19 Njihula lalo ngwange, Kuma Baisalele kubazibukile ndi? Mosesa wendekele ngwendi: “Njikamizibisa lifuwa kwitila mu banu baje kubapwile muyati. Njikamilingisa mulubale manene kwitila mu muyati wa kweba.” 20 Oloni Isaya wasimpile manene na kwendeka ngwendi: “Banu baje kubakele na kunjitonda bakebo banjiwanene. Banu baje kubakele na kwihula byange bakebo bazibukile byange.” 21 Oloni kutalesa kuli Isalele, nendeka ngwendi: “Litangwa lyoshe lya mutunu njinolwela maboko ange kuli aba banu ba kujeneka kwononoka, banu ba kutindibala.”

11 Co njihula lalo ngwange, kuma Njambi wabyanene banu bendi ndi? Embwe! Mwafwa nange nji Kaisalele, nji muna* Abrahamu, njitunda ku muyati wa Benjamini. 2 Njambi kabyanene banu bendi baje bangwile hakulibanga. Kuma kumuzibuka bicendeka cisoneka kutalesa kuli Eliya, mwalambelelele Njambi na kuyayabala hali Baisalele ndi? 3 Wendekele ngwendi: “Yehova, banakindula mitula yobe, banatsii tupolofweto bobe, yange lika njinasalako, co hanwoni yange ibashaka kutsiya.” 4 Oloni lijwi lya Njambi lyendekele bika kuli ikeye? Lyendekele ngwalyo: “Njicili na banu 7,000 baje kubatsikamenene Bale.” 5 Mu ngila imolika, na hano kucili baje banasalako babanangula mwafwa ya ngozi yakama ya Njambi. 6 Ngeci, nga banabangula mwafwa ya ngozi yakama, co kutwendeka lalo ngwetu banabangula mwafwa ya bipangi byabo. Ngwe ngoconi, ngwe ngozi yakama kutuyendeka lalo ngwetu inapu ngozi yakama.

7 Bikoni bitwendeka? Banu ba Isalele kubawanene byuma bije bibatondele manene, oloni babandondo lika baje babangwile bakebo babitambwile. Aba boshe bonowele kuzibisisa. 8 Kunapu lika ngwe mubanasoneka ngwabo: “Njambi nabana sipilitu ya kulala tulo twakama, mesho abo kuwesi na kumona, co matwi abo kuwesi na kuziba, kweta na lelo lino.” 9 Co lalo Devidi wendekele ngwendi: “Mesa yabo ipwe muheto na ciliba na citanwiso na cuma ca kubanenaho kashitiko. 10 Mesho abo azibale mangana keti bamone, co balingise bakulame simbu yoshe.”

11 Ngeci, njihula ngwange, Kuma Baisalele batanukile na kuwa kuwililila ndi? Embwe! Oloni kusebuka kwabo kunanene kwoboka ku banu ba ku mafuti mangana Baisalele bazibe lifuwa. 12 Nga kusebuka kwabo kunanene bufuko mu kaye, na kutepuluka kwabo kunanene manene bufuko ku banu ba ku mafuti, co mbunga yabo yoshe mubakaikungululani, bufuko bukalibwezelela manene!

13 Hanwoni njendeka kuli yeni banu ba ku mafuti. Ha kuwana ngwe nji kapositolo ku baka-mafuti, njana cipangi cange bumpau* 14 mangana njimone indi njasa kuzibisa lifuwa banu bange,* na kwobolako bamo mukati kabo. 15 Nga kubabyana kunalingisa kaye keluke kuli Njambi, co kubatambula kukapwa bene kubelwisa ku kuyoya kutunda ku batsi. 16 Co lalo nga mutamba wa mukasha uje ubamona ngwe bushuka bwakulibanga unapu wa kujela, co na mukasha woshe unapu wa kujela. Co nga muzi wa muti unapu wa kujela, na minango yawo lalo inapu ya kujela.

17 Oloni minango imo ya kuje ku muti baipamwine, co yobe bakunungilile mukati ka ije minango ikwabo, nameme wapwile u muti wa olive wa mu shwata. Hanwoni nobe uli na kulya bufuko bwa muzi wa muti wa olive. 18 Keti usinganyeke ngwobe u wa seho kutubakana minango ikwabo. Nga usinganyeka ngwobe u wa seho kuitubakana, co anuka ngwobe, keti yobe unakwata muzi, oloni muzi ukewo unakwata yobe. 19 Co ukendeka ngwobe: “Minango baipamwine mangana banungileko yange.” 20 Mukemwo bene, babapamwineko mwafwa kubakele na likulahelo. Oloni yobe unemana mwafwa ya likulahelo lyobe. Ngeci keti ulyalese, kala na lyoba. 21 Mwafwa nga Njambi kecelelele minango hayo ya muti, usinganyeka ngwobe yobe akwecelela ndi? 22 Nobe walimwena ngwobe Njambi ali na ngozi, co lalo ali na butenu. Wakele na butenu kuli baje bawile, mwafwa kubakele na likulahelo. Oloni Njambi nakuzibila ngozi, cakama lika nga utwalelelaho kukala mu ngozi yendi, keti ngoconi nobe bakakutetako. 23 Co nabo lalo nga bashangumuka kukala na likulahelo bakabanungilako, mwafwa Njambi asa kubanungilako lalo. 24 Mwafwa nga yobe ibatetele ku muti wa olive wa mu shwata, bakunungilile ku muti wa olive wa kukuna, nameme kubesi kulinga ngoco kakangi, co ije minango ibatetele ku muti wa olive wa kukuna ibwaha manene kuinungila lalo ku muti kubaitetele!

25 Mwafwa njishaka ngwange muzibuke eli lihungu lya kujela bandolome, mangana keti mulimone kupwa ba kunyanyama: Baisalele bamo batwalelelaho kujeneka kuzibisisa kweta noho haikapwilamo mbunga yoshe ya banu ba ku mafuti. 26 Co mu ngila ei mukemwo mubakobokela Baisalele boshe. Kunapu lika ngwe mubanasoneka ngwabo: “Mwobole akatunda mu Siyone, co akatundisa bilinga byabibi ku batekulwila ba Jakobu. 27 Co eci cikeco cikapwa cikumiiyo cange nabo munjikatundisa bubi bwabo.” 28 Cili bene banapu bitozi ba muzimbu waubwa, co oku kunamikwasa. Oloni Njambi ikeye wabangwile, co wabazema mwafwa ya bakukulwila babo. 29 Njambi kakalibeye ha bwana bwanana, co lalo kakalibeye ha kusana baje banasana. 30 Mwafwa kumwakele na kwononoka Njambi, oloni hano banamitetela mwafwa ya kujeneka kwononoka kwabo. 31 Hano bakebo kubesi na kwononoka, co Njambi namitetela, oloni nabo lalo asa kubatetela ngwe mwamitetelele yeni. 32 Mwafwa Njambi nashokelele boshe mu kujeneka kwononoka mangana boshe abatetele.

33 Bufuko bwa Njambi na mana endi na mangana endi byapwa bya kuloba manene! Iya asa kuzibisisa kusompa kwendi? Iya asa kuzibisisa bingila byendi? 34 Mwafwa “iyajo nazibuka bisinganyeka bya Yehova? Nambe iya napu muka-kumunangula?” 35 Nambe “iya wabangele kwana Njambi cuma, mangana Njambi amwilwisileco?” 36 Mwafwa byuma byoshe byatunda kuli Njambi, co kubili mwafwa yendi, co lalo mwafwa ya biyongola byendi mukemwo biliko. Bumpau bukale kuli ikeye ku myaka yoshe. Ameni.

12 Ngeci, bandolome, ha kuwana ngwe Njambi namimwesa mema ku mbunge, njimilambelela ngwange aneni mibila yeni kupwa mulambu wa kuyoya, wa kujela, uje watambula Njambi, kulumbununa cipangi ca kujela cimupanga na nzili yeni ya kusinganyeka. 2 Keti mutabese katumameno ka myaka ino* kamimunge, oloni tengululeni bisinganyeka byeni mangana mulimwene yeni babenya cizango ca Njambi, cije capwa cacibwa, ca kulumbunuka, catabesa Njambi.

3 Mwafwa kwitila mu ngozi yakama ibananjimwesa, njileka munu na munu mukati keni ngwange keti asinganyeke ngwendi napu wakama kutubakana mwanapu. Oloni akale na bisinganyeka byabibwa, munu na munu kwesekesa na likulahelo lyanamwana Njambi. 4 Ngecilika mwa mubila muwakela na bilyo byabingi nameme ebi bilyo byoshe kubyesi kupanga cipangi cimolika, 5 netu lalo nameme tubabangi tunapu mubila umolika muli Kristu, oloni tu bilyo bije binalinungakana hamolika. 6 Tubaboshe tuli na bwana bwa kuliseza-seza kwesekesa na ngozi yakama ibanatumwesa. Nga kupolofweta, tupolofweteni kwesekesa na likulahelo lyetu. 7 Nga kupanga cipangi, tupangeni eci cipangi. Uje alongesa, alongese, 8 uje ashongangeya,* ashongangeye,* uje ana,* ane na mbunge yendi yoshe, uje atwamenena,* alinge ngoco na nzili yendi yoshe,* co uje atetela, alinge ngoco mu kubwahelela.

9 Cizemo ceni keti cipwe ca kulikwisa. Zindeni byuma byabibi, kakateyeni ku byuma byabibwa. 10 Mu cizemo ca kuzema bandolome, lizemeni manene umo na mukwabo. Mu kulisingimika umo na mukwabo, pweni bakulibanga. 11 Pangeni na nzili,* keti mupwe bolwa.* Kaleni na ntwima ya sipilitu, pangeleni Yehova. 12 Bwaheleleni mwafwa ya lilabelelo lyeni. Koleseni nga muli mu tuyando. Twaleleleniho kulombela. 13 Lipangeleni byuma bimuli nabyo na bakujela kwesekesa na bujene bwabo. Kaleni na cifwa ca kutambula bangenzi. 14 Twaleleleniho kubezikisa baje bamiyandesa, babezikiseni, keti mubasinge. 15 Bwaheleleni na baje bali na kubwahelela. Lileni na baje bali na kulila. 16 Moneni bakweni ngwe mumukalimwena yeni babenya. Keti mukale na bisinganyeka bya kulijundula, oloni tabeseni biyongola bya kulikehesa bimitwamenene. Keti mulimone kupwa ba kunyanyama.

17 Keti mwilwisile munu bubi. Lingeni byuma byabibwa bije bibamona banu boshe* ngwabo byabibwa. 18 Nga citaba, lingeni mwoshe mumwasela mangana mukale mu kwoloka na banu boshe. 19 Eni banjazema, keti mulinge shambandinga, oloni eceleni Njambi amwese butenu bwendi, mwafwa banasoneka ngwabo: “‘Yange njilinga shambandinga, yange njilwisila,’ ngwendi Yehova.” 20 Oloni “nga citozi cobe natsi njala, mwane byakulya, nga natsi lihwila, mwaneko bimo byakunwa, mwafwa mu kulinga ngoco, ulundika manungu a tuhya ha mutwe wendi.”* 21 Keti mutabese bubi bumihyane, oloni twaleleleniho kuhyana bubi ha kulinga byabibwa.

13 Munu* woshe alyake kwisi ya baje bali na moko ya kuyula, mwafwa kukwesi moko yasa kukalako kwa kujeneka kuitabesa kuli Njambi. Baka-kuyula bali mu myela yabo mwafwa Njambi ikeye nabatabesa bakalemo. 2 Ngeci, woshe uje alwisa baje bali na moko ya kuyula, ali na kulwisa byuma byanabwahesa Njambi. Baje balwisa byuma byanabwahesa Njambi bakabasompa. 3 Mwafwa baka-kuyula batewesa kuli baje bali na kulinga byuma byabibi, keti kuli baje bali na kulinga byuma byabibwa. Kuma ushaka ngwobe keti utewe baje bali na moko ya kuyula ndi? Twalelelaho kulinga byabibwa, co bakushangazala. 4 Mwafwa banapu bangamba ba Njambi baje bali na kulinga bipangi bije bikukwasa. Oloni nga uli na kulinga byuma byabibi, bazibile lyoba mwafwa kubesi kwambata lika ngoco moko ya mukwale. Banapu bangamba ba Njambi, baka-kulinga shambandinga mangana bamwese butenu* ku munu uje ali na kulinga byuma byabibi.

5 Ngeci munapande kulyaka kwisi, kesi lika mwafwa ya butenu, oloni mwafwa ya citakutaku ceni lalo. 6 Mukemwo lalo muli na kufweta mitelo, mwafwa Njambi ali na kubapangesa mangana bapangele banu simbu yoshe. 7 Aneni banu boshe bije binabapande: uje atonda mutelo, mwaneni mutelo, uje atonda mulambu, mwaneni mulambu, uje atonda kumuzibila lyoba, muzibileni lyoba, uje atonda kumusingimika, musingimikeni.

8 Keti mukale na mukuli ku munu kubanga mukuli wa kulizema umo na mukwabo, mwafwa woshe uje azema mukwabo munu, nashulisilila lishiko. 9 Mwafwa lishiko ngwalyo, “Keti ulinge bukoi, keti utsiye munu, keti wibe, keti ushungwiye cambala,” co mashiko oshe aliko banawakumbasana mu majwi awa a kwendeka ngwawo: “Unapande kuzema mukweni ngwe muwalizema yobe babenya.” 10 Cizemo kucesi kulingisa munu alinge mukwabo mwamubi, ngeci cizemo cikeco cishulisilila lishiko.

11 Co lingeni ngoco mwafwa muzibuka simbu, ngweni simbu ya kwinduka ha tulo inete, mwafwa hano kwoboka kwetu kuli muyehi kutubakana ha simbu itwatengulukile na kupwa baka-kutaba. 12 Butsiki ololo buhwoni, litangwa lili muyehi, ngeci tumbileni kuti bipangi bije binakundama ku lisusulungu, co tuzaleni bitwa bya ceke. 13 Twendeni mwamubwa ngwe baje bali na kwenda mutanya. Keti mu bilika byakalwa* na mu butakwa, keti mu bupangala na mu kulinga byuma byabibi kwa kujeneka shwamwa,* keti mu lwozi na mu cipululu. 14 Oloni zaleni Mwata Yesu Kristu, co keti musinganyekele cimweja mwakukutisila mashungu a bubi a situ.

14 Tambuleni uje ali na likulahelo lya kuzeya, oloni keti musompe munu ali na biyongola* bya kuliseza nebi byeni. 2 Umo ali na likulahelo lya kulya byuma byoshe, oloni uje nazeye, ikeye alya lika bisapasapa. 3 Uje alya, keti alumbilise uje kali, co lalo uje kali keti asompe uje alya, mwafwa Njambi namutambula. 4 Yobe iyajo mangana usompe ngamba ya mukweni? Emane nambe awe, oco cili kuli shukulu yendi. Cili bene, emana, mwafwa Yehova asa kumukwasa emane.

5 Umo amona litangwa limo ngwendi linatubakana likwabo, mukwabo amona litangwa limo ngwendi linapu hamo na matangwa akwabo oshe. Ngeci, munu na munu akulahele ngwendi byanataba binapu bya busunga. 6 Uje anyunga litangwa, alinyunga mwafwa ya Yehova, co lalo uje alya, alya mwafwa ya Yehova, mwafwa akandelela kuli Njambi. Co uje kali, kali mwafwa ya Yehova, oloni anga akandelela Njambi. 7 Naumo wahi ayoya mwafwa yendi babenya lika, co lalo naumo wahi atsa mwafwa yendi babenya lika. 8 Mwafwa nga tuyoya, tuyoya mwafwa ya Yehova, co lalo nga tutsa, tutsa mwafwa ya Yehova. Ngeci, nga tuyoya nambe nga tutsa, tu ba Yehova. 9 Mwafwa ebi bikebyo byatsililile Kristu na kuyoya lalo mangana apwe Mwata wa baje banatsi na baje bali na kuyoya.

10 Oloni bika biusompela ndolome yobe, nambe bika biulumbilisila ndolome yobe? Mwafwa tubaboshe tukemana kulutwe lwa citwamo ca kusompela ca Njambi. 11 Mwafwa banasoneka ngwabo: “‘Njilisinga na kuyoya kwange,’ ngwendi Yehova, ‘mabuli oshe akanjitsikamena, co bindaka byoshe bikalitabela ha kujela ngwabyo yange Njambi.’” 12 Ngeci, umo na umo wetu akalitabela kuli Njambi.

13 Ngeci, keti mulisompe lalo umo na mukwabo, oloni lingeni mwoshe mumwasela mangana keti mwakele ndolome yeni citanwiso nambe cuma cije cimuwisa. 14 Njizibuka, co njinataba muli Mwata Yesu ngwange nacimo cahi cinapu ca kujwala aco lika, kubanga cije camona munu ngwendi cinapu ca kujwala, co kuli ikeye cinapu bene ca kujwala. 15 Mwafwa nga ulubalesa ndolome yobe mwafwa ya byakulya biulya, co kuwesi na kwenda lalo mu cizemo. Keti unyongese uje yanatsila Kristu mwafwa ya byakulya byobe. 16 Ngeci, keti mulingise byuma byabibwa bimulinga babyendeke ngwabo byabibi. 17 Mwafwa Bumwene bwa Njambi kubwapwile kulya na kunwa, oloni bwapwa busunga na kwoloka na kubwahelela kwitila mu sipilitu ya kujela. 18 Mwafwa woshe apangela Kristu mu ngila ei bamutambula kuli Njambi, co banu bamusingimika.

19 Ngeci, tukabangeyeni byuma bije binena kwoloka na byuma bije bitunga bakwetu. 20 Keti munyongese bipangi bya Njambi mwafwa ya byakulya lika. Cili bene, byuma byoshe binapu bya kujela, oloni cibihya manene nga munu alya byakulya bije bitanwisa mukwabo. 21 Kwakubwa manene kujeneka kulya situ, nambe kunwa binyu, nambe kulinga cuma coshe-coshe cije citanwisa ndolome yobe. 22 Likulahelo liuli nalyo likale mukati kobe na Njambi. Nabwahelela munu uje kalizibi mulonga mwafwa ya kulinga byuma bije bikamuzibisa kubwaha. 23 Oloni nga auwasana, co nalihisa laja nga alya, mwafwa bije byalya kabili na likulahelo. Cili bene, byuma byoshe bije kubyemanene ha likulahelo binapu bubi.

15 Yetu tunakanyama, tunapande kwambata buzeye bwa baje kubakanyamene, co keti tulinge byuma bije bizibisa lika yetu kubwaha. 2 Umo na umo wetu azibise mukwabo kubwaha, alinge byuma bije bizibisa mukwabo kubwaha mangana amutunge. 3 Mwafwa nameme Kristu kalingile byuma bije byazibisile ikeye lika kubwaha, oloni walingile ngwe mubanasoneka ngwabo: “Kushaula kwa baje bali na kukushaula kunawila hali yange.” 4 Mwafwa byuma byoshe bibasonekele kusañulu, babisonekelele kutulongesa, co tuli na lilabelelo mwafwa ya kukolesa kwetu na kutuzembeleka kutuli na kuwana mu Bisoneka. 5 Co Njambi uje akana kukolesa na kuzembeleka amyane biyongola bya kulifwa na bije byakele nabyo Kristu Yesu 6 mangana mulikwatasane na lijwi limolika* mu kwana bumpau kuli Njambi, Ishe ya Mwata wetu Yesu Kristu.

7 Ngeci, litambuleni umo na mukwabo ngwe mwamitambwilile Kristu mangana bumpau buye kuli Njambi. 8 Mwafwa njimileka ngwange Kristu wakupwile muka-kupangela baje banai ku mukanda mwafwa ya busunga bwa Njambi, mangana amwese bikulaheso byakulahesele Njambi kuli bakukulwila babo ngwendi byapwile bya busunga, 9 co lalo mangana baka-mafuti bane Njambi bumpau mwafwa ya kutetela kwendi. Kunapu lika ngwe mubanasoneka ngwabo: “Mukemwo njikakuzumbangeya ku mbunga mukati ka baka-mafuti, co njikemba myaso ya kushangazala lizina lyobe.” 10 Co nendeka lalo ngwendi: “Eni baka-mafuti, bwaheleleni hamolika na banu bendi.” 11 Co lalo ngwendi: “Shangazaleni Yehova yeni baka-mafuti oshe, co banu boshe bamushangazale.” 12 Co lalo Isaya ngwendi: “Kukakala muzi wa Jesi, akakatuka na kuyula baka-mafuti, co baka-mafuti bakaka lilabelelo lyabo hali ikeye.” 13 Njambi uje akana lilabelelo amishulise na kubwahelela kwoshe na kwoloka mwafwa mwamukulahela, mangana lilabelelo lyeni lyame kwitila mu nzili ya sipilitu ya kujela.

14 Co nange njinataba, bandolome bange, ngwange neni munashulu na bubwa, munashulu na mangana oshe, co mwasa kulinangula* umo na mukwabo. 15 Oloni njinamisonekela byuma bimo kwa kujeneka kumishwekela, mangana njimyanukisebyo lalo, mwafwa ya ngozi yakama yananjimwesa Njambi 16 mangana njipwe ngamba ya Kristu Yesu ku baka-mafuti. Njili na kupanga cipangi ca kujela ca muzimbu waubwa wa Njambi mangana aba baka-mafuti bapwe bwana bubatambula, bubanajelesa na sipilitu ya kujela.

17 Ngeci, njilisamba muli Kristu Yesu ha byuma binakundama kuli Njambi. 18 Mwafwa kunjikendeka byuma byeka kubanga byanalingi Kristu kwitila muli yange mangana baka-mafuti bononoke kwitila mu lijwi lyange na bilinga byange, 19 na mu nzili ya bizibukiso na bikomokeso, na mu nzili ya sipilitu ya Njambi, mangana kutunda ku Jelusalema na kulizenga kuketa bene na ku Irikamu, njambulule muzimbu waubwa wa Kristu. 20 Ngeci, mu ngila ei, njesekele mwoshe munjaselele mangana keti njambulule muzimbu waubwa kuje kubanambulula laja lizina lya Kristu mangana keti njitunge ha lubula lwa mukwetu. 21 Kunapu lika ngwe mubanasoneka ngwabo: “Kuli baje kuwetele muzimbu wendi, bakamona, co baje kubazibile byendi, bakazibisisa.”

22 Ebi bikebyo lalo byanjonowesele ha bisimbu byabingi kwija kuli yeni. 23 Oloni hano kukwesi myela ije kunjambulwilile omu mu mitambela, co ha myaka yaingi* njinashungwiya kwija kuli yeni. 24 Ngeci, munjiya ku Speni, njikulahela ngwange njakumimona, co mwakunjisindikiyako kamandondo munima ya kusikama neni ha simbu yaindondo. 25 Oloni hano njishaka kuya ku Jelusalema mangana njikapangele bakujela. 26 Mwafwa baje bali mu Masedonia na mu Akaya banabwahelela kwana byuma byabo kupwa bwana kuli bakujela bamo ba kuhutwa ba mu Jelusalema. 27 Cili bene banabwahelela kulinga ngoco, co bakele na mukuli kuli bakebo. Mwafwa nga bakujela ba mu Jelusalema bananako baka-mafuti byuma byabo bya ku sipilitu, co baka-mafuti nabo banapande kwanako bakujela ba mu Jelusalema byuma byabo bya ku mubila. 28 Co munjimanesa ebi, na kwetesa mwamubwa bwana* kuli bakebo, njakwita kuli yeni munjiya ku Speni. 29 Co lalo njizibuka ngwange munjija kuli yeni, njija na bibezikiso bya kushula bya kutunda kuli Kristu.

30 Co hano njimilambelela manene bandolome kwitila muli Mwata wetu Yesu Kristu na kwitila mu cizemo ca sipilitu ngwange, koleseni hamo nange mu kunjilombelela kuli Njambi, 31 mangana banjobole ku baka-kujeneka kukulahela ba mu Judeya, co lalo mangana cipangi ca kupangela bakujela ba mu Jelusalema bakacitambule mwamubwa, 32 mangana nga Njambi nataba, njije kuli yeni mu kubwahelela, co lalo njakulikuwe kukala neni. 33 Njambi uje akana kwoloka akale neni mubaboshe. Ameni.

16 Njili na kuzimbula* ndokazi yetu Febi kuli yeni, uje napu muka-kupangela mu cikungulukilo ca Senkeliya, 2 mangana mumutambule muli Mwata mu ngila ije inapande kutambwilamo bakujela, co mumwane byoshe byatonda, mwafwa nemanena babangi, kwambateselela nange bene.

3 Njimenekeleniko Priska na Akwila, bakwetu mutukapangela muli Kristu Yesu, 4 baje banaka kuyoya kwabo* mu bushonde mwafwa yange. Yange na bikungulukilo byoshe bya baka-mafuti tuli na kubakandelela. 5 Njimenekeleniko lalo na cikungulukilo cili mu njibo yabo. Njimenekeleniko Epaneta, mukwetu injazema uje wapwa bushuka bwakulibanga bwa Kristu mu Asia. 6 Menekeni Maliya uje namipangela na nzili. 7 Menekeni Andronika na Juniasi, babushoko bwange, bakwetu mapanditi, banalume babazibuka mwamubwa ku tupositolo, co lalo banalikwatasana na Kristu ha simbu yailaha kutubakana yange.

8 Njimenekeleniko Ampiliatu, mukwetu injazema muli Mwata. 9 Menekeni Ubenasi, mukwetu mutukapangela muli Kristu, menekeni na Stakisi mukwetu injazema. 10 Menekeni Apelesi, wa kulongwa muli Kristu, menekeni na bakunjibo ya Alistobulu. 11 Menekeni kabushoko kange Helodioni. Menekeni bakunjibo ya Nasisu baje bali muli Mwata. 12 Menekeni Trifena na Trifosa, banakazi baje bali na kupanga na nzili muli Mwata. Menekeni Pesisi, mukwetu itwazema, mwafwa napanga na nzili muli Mwata. 13 Menekeni Lufusi, uje ibanangula muli Mwata na ina uje wapwa ngwe nana. 14 Menekeni Asinkrita, Filegoni, Hemesi, Patrobasi, Hemasi na bandolome baje bali hamo nabo. 15 Menekeni Filologasi na Julia, na Nelusi na ndokazi yendi, na Olimpasi, na bakujela boshe baje bali hamo nabo. 16 Limenekeni umo na mukwabo mu kulitsemba ca kujela. Bikungulukilo byoshe bya Kristu byamimeneka.

17 Hanwoni bandolome, njimishongangeya ngwange munyanyame na baje banena kulyangununa na byuma bije bitanwisa, bije bililwisa na byuma bimunalilongesa, co bajenjukeni. 18 Mwafwa banu ba cifweci kubapwile bindungo ba Mwata wetu Kristu, oloni bapwa bindungo ba mashungu* abo babenya. Co bali na kungumuna baje kubesi na lyezi kupangesa tumajwi twabo twa kuzembeleka na tumajwi twabo twa kukwata-kwata banu ha mesho. 19 Banu boshe banazibuka bya kwononoka kweni, co njinabwahelela hali yeni. Oloni njishaka ngwange mupwe ba kunyanyama, mupwe ba kujeneka mulonga na kujenjuka ku byuma byabibi. 20 Oloni Njambi uje akana kwoloka, ololo atikila Satana kwisi ya bilyato byeni. Ngozi yakama ya Mwata wetu Yesu ikale neni.

21 Timothi mukwetu mutukapangela namimeneka, na babushoko bwange ba Lushasi, Jasoni, na Sospata nabo banamimeneka.

22 Yange Teshasi njasoneka ou mukanda, njamimeneka muli Mwata.

23 Gayasi kuje kunjinatulila, babenya njibo mucikakungulukila cikungulukilo coshe, namimeneka. Elastasi muka-kutala bimbongo bya nganda* namimeneka, na ndolome yendi Kotasi nendi namimeneka. 24 ——

25 Njambi asa kumikanyamesa kwitila mu muzimbu waubwa unjili na kwambulula, na kwitila mu kwambulula bya Yesu Kristu. Ebi biñanda banabijombolola kwitila mu lihungu lya kujela lije libashwekele ha myaka yaingi, 26 oloni hano banatumwesalyo* na kutulekalyo kwitila mu Bisoneka bya bupolofweto. Njambi yetu uje wakalako ku myaka yoshe nashiki ngwendi ebi biñanda babyambulule mukati ka baka-mafuti mangana binene kwononoka kuje kunemana ha likulahelo. 27 Njambi uje ikeye lika wapwa muka-mana, kuli ikeye kukale bumpau ku myaka yoshe kwitila muli Yesu Kristu. Ameni.