MUKANDA WAMUCIBALI KULI BAKA-KORINTE

1 Yange Paulu, kapositolo ka Kristu Yesu ngwe muje mwaya cizango ca Njambi, njili na ndolome yetu Timothi. Njili na kusonekela cikungulukilo ca Njambi cije cili mu Korinte na bakujela boshe baje bali mu Akaya, ngwange:

2 Ngozi yakama na kwoloka kwa kutunda kuli Njambi, Tate yetu na Mwata Yesu Kristu bikale neni.

3 Bashangazale Njambi, Ishe ya Mwata wetu Yesu Kristu, Tate uje washula na mema ku mbunge, Njambi uje akatuzembeleka mu byuma byoshe, 4 uje akatuzembeleka* mu byeseko* byetu byoshe, mangana netu twase kuzembeleka bakwetu mu byeseko* byoshe-byoshe bibaliwana nabyo na kuzembeleka cali na kutuzembeleka naco Njambi. 5 Mwafwa ngecilika tuyando twa Kristu mutunamena muli yetu, mukemwo lalo mucinamena na kuzembeleka cali na kutuzembeleka naco Kristu. 6 Nga tuliwana na byeseko,* oku kunapande kumizembeleka na kumyobola. Co nga bali na kutuzembeleka, oku kunapande kumizembeleka mangana mukolese mu tuyando twa kulifwa notu tutuli na kuliwana natwo netu nawa. 7 Lilabelelo lituli nalyo hali yeni linakanyama, mwafwa tuzibuka ngwetu ngwe mumuli na kuliwanena na tuyando tutuli na kuliwana natwo yetu, mukemwo lalo mumuwanena kuzembeleka cituli na kuwana yetu.

8 Mwafwa bandolome, kutushaka ngwetu mukale kunzimba ha kayando katwaliwanene nako ku provinsi ya Asia. Twakele mu bukalu bwakama manene buje bwatubakanene nzili yetu, co kutwazibukile ngwetu tuyoya indi bati. 9 Twalizibile ngwetu banatusompela kutsa. Eci cafwile ngacije mangana keti tulikulahele yetu babenya, oloni tukulahele Njambi uje akasangula batsi. 10 Watwobwele muje mu bushonde bwakama bwa kutsa, co akatwobola. Co tuli na lilabelelo muli ikeye ngwetu atwalelelaho kutwobola. 11 Neni lalo mwasa kutukwasa ha kutulambelelako kuli Njambi. Nga banu babangi batukundika mu malombelo abo, co twasa kuwana bukwasi mubakumbulula awa malombelo. Ngeci, banu babangi bakandelela mwafwa yobu bukwasi butunatambula.

12 Mwafwa cuma citulishashela eci: citakutaku cetu cili na kwana bukaleho ngwaco yoyesi yetu mu kaye, maneneni kuli yeni inapu ya kujela, co lalo ya busunga, itunda kuli Njambi, keti ngwe ku mana a bunu, oloni mu ngozi yakama ya Njambi. 13 Mwafwa kutwesi na kumisonekela byuma byeka kubanga bije bimwasa kutanda* na kuzibisisa. Co njinakulahela ngwange mutwalelelaho kuzibisisa ebi byuma mu kushula.* 14 Ngecilika mumunazibisisila lalo ngweni yetu tunapu cuma cimulishashela, neni lalo mukemwo mumukapwila cuma citukalishashela mu litangwa lya Mwata Yesu.

15 Ngeci, mwafwa ya kukala neli likulahelo, njayongwele ngwange njilibange tahi kwija kuli yeni mangana mwakubwahelele lwamucibali.* 16 Mwafwa njayongwele kwita kuli yeni munjiya ku Masedonia, nomu munjiluka kutunda ku Masedonia, co mwakunjisindikiyeko ku Judeya. 17 Munjayongwele ngoco kuma njakele na kulinga lika sanda ndi? Indi njikayongola byuma mu kumona kwa bunu, mangana munjendeka ngwange “Eyo, eyo” kutundaho lalo ngwange “Embwe, embwe” ndi? 18 Njambi wapwa wa busunga, na majwi etu nawo apwa a busunga, kutwasa kwendeka ngwetu “eyo,” co kutundaho twendeka lalo ngwetu “embwe.” 19 Mwafwa Muna Njambi, Yesu Kristu uje ibambulwile mukati keni kwitila muli yetu, kulumbununa kwitila muli yange na Siuvenasi na Timothi, kapwile “eyo” kutundaho lalo apwe “embwe,” oloni “eyo” yapwile “eyo” kuli ikeye. 20 Mwafwa bikulaheso bya Njambi, nambe bipwe byabingi bati binapu “eyo” kwitila muli Kristu. Ngeci kwitila muli ikeye twendeka kuli Njambi ngwetu “Ameni” mangana twane Njambi bumpau. 21 Oloni Njambi ikeye nakulahesa ngwendi yeni, netu, twakundama kuli Kristu, co lalo ikeye watubwabesele. 22 Natwaka lalo ciganto cendi, co natwana cishimbikiya ca byuma bili na kwija, kulumbununa sipilitu ije ili mu bimbunge byetu.

23 Co njilisinga ku mesho a Njambi kupwa mukaleho wange ngwange hano kunjezile tahi ku Korinte mangana keti njimizibise manene kubihya ku bimbunge. 24 Keti ngwabo tuli na kwendesa likulahelo lyeni embwe, oloni tuli na kupangela hamo neni mangana mubwahelele, mwafwa munemana mwafwa ya likulahelo lyeni.

2 Mwafwa njinangula bene ngwange keti njije kuli yeni lalo na kumizibisa kubihya. 2 Mwafwa nga njimizibisa kubihya, co iya anjizibisa kubwaha? Naumo wahi, kubanga yeni bene banjazibisile kubihya. 3 Njamisonekelele mukanda mangana munjija okwo keti njakuzibe kubihya mwafwa ya baje banapande kunjilingisa njibwahelele, mwafwa njili na likulahelo lya kushula ngwange byuma binjizibisa kubwaha bikebyo lalo bizibisa yeni mubaboshe kubwaha. 4 Mwafwa ya kayando kakama na kuziba manene kubabala ku mbunge, njamisonekelele mukanda na misozi yaingi, keti ngwe mu kushaka kumizibisa kubihya, oloni njashakele ngwange muzibuke ngweni njamizema manene.

5 Nga kuli umo nazibisa bakwabo kubihya, kazibisile yange kubihya. Oloni mu ngila imo, mubaboshe namizibisa kubihya, nameme ngoco kunjishaka kwendeka awa majwi na butenu. 6 Eci kutenuka cibanatenuka banu babangi, kutenukila munu wa cifweci cinapumo. 7 Co hano munapande kumukonekela na kumuzembeleka mangana busiwa bwa kutubakanesa keti bumuhyane.* 8 Ngeci njimishongangeya ngwange mumumwese cizemo. 9 Co lalo njamisonekelele mukanda mangana njimone indi cili bene mwononoka mu byuma byoshe. 10 Nga mukonekela munu ha cuma coshe-coshe, co nange njimukonekela. Byoshe binjinakonekela (nga kuli bimo binjinakonekela), njinalingi ngoco mwafwa yeni ku mesho a Kristu, 11 mangana Satana keti atuhyane* mwafwa tuzibuka milali* yendi.

12 Co munjetele mu Troasi na kwambulula muzimbu waubwa wa Kristu cikolo canjishokolokelele muli Mwata, 13 oloni sipilitu yange kuyashubulukile mwafwa kunjawanene ndolome yange Tito. Ngeci, njabasalesele na kuya ku Masedonia.

14 Oloni tukandelela kuli Njambi, uje akatutwamenena simbu yoshe mu cendo ca baka-kuhyana baje balisamba mu kulikwatasana na Kristu, co kwitila muli yetu Njambi ali na kulingisa lwengo lwa mangana endi lujalakane mu mitambela yoshe. 15 Mwafwa kuli Njambi tunapu lwengo lwa kutobala lwa Kristu mukati ka baje babali na kwobola na baje bali na kunyonga. 16 Kuli baje bali na kunyonga, tunapu cuku ca kutsa cije citwala ku kutsa, kuli baje babali na kwobola tunapu lwengo lwa kuyoya, luje lutwala ku kuyoya. Co iya napwisamo kulinga ebi byuma? 17 Yetu bene mwafwa keti tu baka-kulandesa* lijwi lya Njambi, ngwe mubali na kulinga babangi, oloni tuli na kwendeka busunga ha kupwa banu banatumu Njambi. Tuli na kulinga ngoco ku mesho a Njambi mu kulikwatasana na Kristu.

3 Kuma tunapande kulishangala lalo yetu babenya ndi? Nambe ngeci mwa banu bamo, kuma tutonda mikanda ya kutushangala ya kwija kuli yeni nambe ya kutunda kuli yeni ndi? 2 Yeni bene mukanda wetu ubanasoneka mu bimbunge byetu uje ubazibuka banu boshe, co banu boshe bali na kuutanda. 3 Mwafwa yeni munasholoka kupwa mukanda wa Kristu utunasoneka yetu ha kupwa baka-kupangela, keti wa kusoneka na inki oloni wa kusoneka na sipilitu ya Njambi wa kuyoya, keti wa kusoneka ha bimbazubwila bya mamanya oloni wa kusoneka ha bimbazubwila bya situ, ha bimbunge.

4 Twakulahela manene Njambi, kwitila muli Kristu. 5 Keti ngwabo yetu babenya tunalilingisa tupwisemo mangana tumone ngwetu cuma coshe-coshe citunda kuli yetu, oloni Njambi ikeye natulingisa tupwisemo. 6 Njambi ikeye bene natulingisa tupwisemo mangana tupwe baka-kupangela cikumiiyo caciha, keti baka-kupangela lishiko lya kusoneka, oloni baka-kupangela sipilitu mwafwa lishiko lya kusoneka litwala ku kutsa, oloni sipilitu iyoyesa.

7 Nga lishiko lije litwala ku kutsa, lya bisona bya kucakula ha limanya lyezile na bumpau bwa cifwa cije, buje bwalingisile na Baisalele bonwe kutala cihanga ca Mosesa mwafwa ya bumpau bwa cihanga cendi, bumpau buje buhwa, 8 kuma sipilitu kuyapandele kwija na bumpau bwakama manene ndi? 9 Nga Lishiko lije litwala ku kutsa lili na bumpau, co cipangi cije cikwasa banu bapwe ba kusungama cili na bumpau bwakama manene. 10 Cili bene cije cibanene bumpau banacinyeke bumpau mwafwa ya bumpau buje bunacitubakana. 11 Mwafwa nga cije cinahu bacinenele na bumpau, co cije cikalakoni cikala na bumpau bwakama manene.

12 Ha kuwana ngwe tuli neli lilabelelo, tuli na kwendeka mu kuzituka manene, 13 co kutwesi na kulinga ngwe mwalingile Mosesa uje wakele na kufwika nanga ku mesho endi, mangana bana ba Isalele keti batale shwii kumamaneselelo a cuma cije cihwa. 14 Oloni kubazibisisile. Mwafwa kweta na lelo lino ei nanga anga icinabafwiki mubakatanda cikumiiyo ca laja, mwafwa yasa kutunda lika kwitila muli Kristu. 15 Co kweta na litangwa lya lelo mubakatanda Bisoneka bya Mosesa, nanga anga inafwikila bimbunge byabo. 16 Oloni nga munu atenguluka na kwija kuli Yehova, ei nanga bamutundisayo. 17 Yehova wapwa Sipilitu, co kuje kuli sipilitu ya Yehova kuli kupatuka. 18 Co tubaboshe ha simbu ino ituli na bihanga bije bibanafukula nanga bije bili na kubyakula ngwe biponi mu kusholola bumpau bwa Yehova, bali na kututengulula mu cifwa cendi kutunda ha bumpau obu kuya ha bumpau bukwabo, ngwe muje bene mwatondela Yehova uje wapwa Sipilitu.

4 Ngeci, ha kuwana ngwe tuli neci cipangi kwitila mu kutetela kubanatutetela, kutujuka. 2 Oloni tunecela bilinga bya shwamwa, bya kushwekesa, kutwesi na kwenda mu makuli nambe kulumbula lijwi lya Njambi. Oloni omwo tuli na kusholola busunga tuli na kulizimbula ku bitakutaku byoshe bya banu ku mesho a Njambi. 3 Nga muzimbu waubwa utuli na kwambulula banaushweke mu nanga, co banaushwekela baje bali na kunyonga, 4 baka-kujeneka kutaba baje njambi wa katumameno ka myaka ino* natsitsibalesa biyongola byabo mangana ceke ca bumpau bwa muzimbu waubwa wa Kristu uje wapwa cifwa ca Njambi, keti cibatwile. 5 Mwafwa kutwesi na kwambulula byetu babenya, oloni tuli na kwambulula bya Yesu Kristu ngwetu napu Mwata, nomu mutunalipwisa bindungo beni mwafwa ya Yesu. 6 Mwafwa Njambi ikeye wendekele ngwendi: “Ceke citwe mu lisusulungu,” co napangesa cihanga ca Kristu mu kutwila ceke mu bimbunge byetu, mangana abiteteke na bumpau bwa mangana a kuzibuka Njambi.

7 Oloni tuli nobu bufuko mu binjaba bya buma mangana nzili ya kutubakana nzili ya bunu itunde kuli Njambi, keti kuli yetu. 8 Banatusindakana mu byuma byoshe, oloni keti ngwabo na kushwena bene kutwasa, tuli mu citanga, oloni keti ngwabo noku kwa kutuhukila bene kwahi.* 9 Bali na kutuyandesa, oloni Njambi katumbilile kuti, bali na kutundyanga hasi, oloni kutwanyongele. 10 Simbu yoshe mu mibila yetu tuli na kukolesa mu tuyando tuje tutwala ku kutsa, ngwe tuje twamwene Yesu mangana yoyesi ya Yesu isholoke mu mibila yetu. 11 Mwafwa yetu tuli na kuyoya, simbu yoshe tuli na kulitala mesho na mesho na kutsa mwafwa ya Yesu, mangana yoyesi ya Yesu isholoke na mu mibila yetu ya situ ije yasa kutsa. 12 Ngeci, kutsa cili na kupanga muli yetu, oloni kuyoya cili na kupanga muli yeni.

13 Ha kuwana ngwe tuli na sipilitu ya likulahelo ya kulifwa na ije ibanendeka mu Bisoneka ngwabo: “Njakele na likulahelo, ngeci njendekele,” mukemwo netu tuli na likulahelo ngeci tuli na kwendeka, 14 mwafwa tuzibuka ngwetu uje wasangwile Yesu netu lalo akatusangula ngwe mwasangwile Yesu, co yetu hamolika neni bakatunena kuli Yesu. 15 Mwafwa byoshe ebi bili na kulingiwa mwafwa yeni mangana ngozi yakama ya Njambi yame manene, mwafwa banu babangi bali na kukandelela kuli Njambi mangana bumpau buye kuli Njambi.

16 Ngeci kutujuka, oloni nameme munu wetu wa hanja ali na kubihya, munu wetu wa mukati bali na kumupwisa wamuha ha litangwa na litangwa. 17 Mwafwa nameme kayando* katuli na kuliwana nako kanapu ka simbu yaindondo lika, co lalo kakehu, oloni kali na kutunenela bumpau bwakama* manene, co lalo bwa myaka yoshe. 18 Mukemwo tunatala mesho etu shwii ha byuma bije kutumono, keti ha byuma bije bitumona, mwafwa byuma bitumona bya kasimbu kakandondo lika, oloni bije kutumono bya myaka yoshe.

5 Mwafwa tuzibuka ngwetu nga njibo yetu ya hano hasi, ei tenti, isiuka,* co tukala na mutungo wa kutunda kuli Njambi, keti njibo ya kutunga na maboko ije ikalako myaka yoshe mwilu. 2 Mwafwa muno mu njibo* cili bene tuli na kukemanga, tunashungwiya manene kuzala njibo yetu* ya kutunda mwilu,* 3 mangana mutuizala keti batuwane mutotototo. 4 Yetu tuli omu mu tenti tuli na kukemanga, tunalemuwa, mwafwa kutushaka kushulula ino tenti, oloni tushaka kuzala ije ikwabo mangana cije casa kutsa base kucilehula ku kuyoya. 5 Co ou natubwahesela eci bene cuma napu Njambi, uje watwanene sipilitu kupwa cishimbikiya ca byuma bili na kwija kulutwe.

6 Ngeci, simbu yoshe tunasimpi, co tuzibuka ngwetu simbu ituli na limbo lyetu mu mubila, kutwesi hamolika na Mwata, 7 mwafwa tuli na kwenda na likulahelo keti na kumona na mesho. 8 Oloni tunasimpi, co tushaka ngwetu keti tukale omu mu mubila mangana tukatunge limbo lyetu na Mwata. 9 Ngeci, nambe tukale nendi kwimbo nambe tujeneke kukala hamolika nendi, cilengo cetu cinapu ngwetu atutambule. 10 Mwafwa tubaboshe tunapande kwimana* kulutwe lwa citwamo ca kusompela ca Kristu mangana umo na umo wetu bamwilwisile kwesekesa na byuma byanalingi ha simbu yanakele omu mu mubila, bipwe byabibwa nambe byabibi.

11 Ngeci, ha kuwana ngwe tuzibuka bikulumbununa kuzibila Mwata lyoba, tutwalelelaho kukokweya banu, oloni Njambi atuzibuka mwamubwa. Njikulahela ngwange na bitakutaku byeni bituzibuka mwamubwa. 12 Kutwesi na kulizimbula lalo kuli yeni, oloni tuli na kumilingisa mulishashele hali yetu mangana mwase kukumbulula baje balishashela ha sholwesi ya hanja, keti ha byuma bili mu mbunge. 13 Mwafwa nga tunazalukile, co tunazalukile mwafwa ya Njambi. Nga tuli na kusinganyeka mwamubwa, co tuli na kusinganyeka mwamubwa mwafwa yeni. 14 Mwafwa cizemo cali naco Kristu cikatushongangeya, mwafwa twazibukoni ngwetu munu umo watsililile banu boshe, ngeci boshe batsile. 15 Co watsililile banu boshe mangana baje bayoya keti baliyoyele lalo bakebo babenya, oloni bayoyele uje wabatsililile, co bamusangwile.

16 Ngeci kutunda hano, kutumono lalo munu kwesekesa na bisinganyeka bya bunu.* Nameme twamwene Kristu kwesekesa na bisinganyeka bya bunu,* oloni kutumumono lalo mu ngila oyo. 17 Ngeci, nga munu nalikwatasana na Kristu napu cuma caciha canatanga Njambi. Byuma bya laja bineti. Taleni! Byuma byabiha binaija. 18 Nameme ngoco, byuma byoshe byatunda kuli Njambi uje watwilwisile kuli ikeye kwitila muli Kristu, co watwanene cipangi ca kukwasa banu beluke kuli ikeye. 19 Oku kulumbununa ngwabo kwitila muli Kristu, Njambi nelwisa kaye kuli ikeye, kesi na kubatandela lalo milonga yabo. Co watwanene cipangi ca kuleka banu ngwabo beluke kuli Njambi.

20 Ngeci, tunapu miluwa baje bali na kwimanenako Kristu, kunapu lika ngwe Njambi ali na kulomba banu kwitila muli yetu. Ha kupwa baka-kwimanenako Kristu, tuli na kulomba ngwetu: “Ilukeni kuli Njambi.” 21 Uje kazibukile bubi, Njambi wamupwisile bwana bwa kufwika bubi bwetu, mangana kwitila muli ikeye twase kupwa ba kusungama ku mesho a Njambi.

6 Ha kuwana ngwe tuli na kupanga hamo nendi, tumishongangeya lalo ngwetu keti mutambule lika ngozi yakama ya Njambi na kuloja byanamyanenayo. 2 Mwafwa nendeka ngwendi: “Mu simbu ya kuzibila banu ngozi, njakuzibile, co ha litangwa lya kwobola, njakukwasele.” Tala! Ino ikeyo simbu ya kuzibila manene banu ngozi. Tala! Lino likelyo litangwa lya kwobola.

3 Kutushaka kulinga cuma cije citanwisa banu mangana cipangi cetu keti baciwanene mulonga. 4 Oloni mu byuma byoshe tuli na kulizimbula yetu babenya ngwetu tu baka-kupangela Njambi: mu kukolesa manene, mu tuyando, mu simbu ya bujene, mu bukalu, 5 mu kutupupa, mu kutwaka mu tumenga, mu bimpindangano, mu kupanga na nzili, mu kujeneka kulala, mu bisimbu bya kujeneka byakulya, 6 mu kujela, mu mangana, mu mbunge ya kubandamena, mu ngozi, mu sipilitu ya kujela, mu cizemo ca kujeneka kulikwisa, 7 mu majwi a busunga, mu nzili ya Njambi. Kwitila mu bitwa bya kusungama bije bili mu liboko lya cilyo* na mu liboko lya cimoshwe,* 8 kwitila mu bumpau na mu kushauka, kwitila mu mizimbu yaibi na mu mizimbu yaibwa. Bali na kutumona ngwe tuli na kukwisa banu, oloni tuli na kwendeka busunga, 9 bali na kutumona ngwe nabamo bahi batuzibuka, oloni batuzibuka mwamubwa, bali na kutumona ngwe tuli na kutsa,* oloni taleni! tuli na kuyoya, bali na kutumona ngwe banatwana kashitiko,* oloni kubatutsiile, 10 bali na kutumona ngwe tuli mu busiwa, oloni simbu yoshe tunabwahelela, bali na kutumona ngwe tunahutwa, oloni tuli na kufukisa babangi, bali na kutumona ngwe kutwesi na cimo, oloni tuli na byuma byoshe.

11 Tunashama mu tunwa twetu mangana twendeke* neni baka-Korinte, co tunashokolola manene bimbunge byetu. 12 Yetu tunazituka kumimwesa cizemo cetu, oloni yeni kumwazitukile kutumwesa cizemo ceni. 13 Ngeci, njili na kwendeka kuli yeni ngwe bana bange bene, ngwange neni nawa shokololeni manene bimbunge byeni.

14 Keti mulikutiiye ku joko* imo na baka-kujeneka kutaba. Mwafwa likwatasano muka lili mukati ka bilinga bya kusungama na kupokola mashiko? Nambe likwatasano muka lili mukati ka ceke na lisusulungu? 15 Co lalo kulikwatasana muka kuli mukati ka Kristu na Beliale?* Nambe muka-kutaba* na muka-kujeneka kutaba baliwanena hali?* 16 Co lizibasano muka lili mukati ka tempele ya Njambi na tumponya? Mwafwa yetu tunapu tempele ya Njambi wa kuyoya, ngwe mwendekele Njambi ngwendi: “Njikakala mukati kabo na kwenda mukati kabo, co njikapwa Njambi yabo, co bakebo bakapwa banu bange.” 17 “‘Ngeci, tundeni mukati kabo na kulyangununako,’ ngwendi Yehova, ‘likeleni kukwata byuma bya kujwala,’” “‘co njikamitambula.’” 18 “‘Co njikapwa Ishweni, yenico mukapwa bana bange ba banalume naba ba banakazi,’ ngwendi Yehova Muka-nzili Yoshe.”

7 Ngeci eni banjazema, ha kuwana ngwe tuli nebi bikulaheso, tuyeni tulijelese ku kujwala kwoshe kwa situ na sipilitu mangana tupwe ba kujela manene omwo tuzibila Njambi lyoba.

2 Tutambuleni mu bimbunge byeni. Kutwabiisilile munu, kutwalumbwile munu, kutwanyanyamenene munu. 3 Kunjesi na kwendeka ebi mangana njimihise, mwafwa njinendeka laja ngwange muli mu bimbunge byetu mangana tutse hamo na kuyoya hamo. 4 Njinazituka manene kwendeka kuli yeni. Njili na kulishasha manene mwafwa yeni. Bananjizembeleka manene. Njinabwahelela manene mu tuyando twetu twoshe.

5 Mutwetele mu Masedonia, mibila* yetu kuyahwimine, oloni twatwaleleleleho kuyanda mu bingila bya kuliseza-seza. Hanja bakele na kutulwisa, mukati twakele na lyoba. 6 Oloni Njambi muka-kuzembeleka baje banombwa, watuzembelekele kwitila mu kukalako kwa Tito. 7 Co keti kwitila lika mu kwija kwendi, oloni kwitila lalo na mu kutuzembeleka kutunatambula mwafwa yeni omwo watutangelele muzimbu ngwendi munashungwiya manene kunjimona, co muli na kuziba manene busiwa, co lalo mwanjaka manene mbunge.* Ngeci, njabwaheleloni manene.

8 Mwafwa nameme njamizibisile kubihya ku mbunge mu mukanda wange unjamisonekelele, kunjesi na kulibeya. Nameme njalibeyele hakulibanga (munjamwene ngwange uje mukanda wamizibisile kubihya ku mbunge nameme te ha kasimbu kakandondo lika), 9 hano njinabwahelela, keti lika mwafwa munazibile kubihya ku mbunge, oloni mwafwa munazibile kubihya ku mbunge na kutenguluka. Munazibile kubihya ku mbunge mu ngila ije izibisa Njambi kubwaha, co kumwabulumukile mwafwa yetu. 10 Mwafwa kuziba kubihya ku mbunge mu ngila ije izibisa Njambi kubwaha kunena kutenguluka kuje kutwala ku kwoboka, co kukwesi kulingisa munu alibeye. Oloni kuziba kubihya ku mbunge ngwe banu ba mu kaye kunena kutsa. 11 Taleni binatundu mu kupanga kweni na nzili kuje kunaija mwafwa ya kuziba kubihya ku mbunge mu ngila ije izibisa Njambi kubwaha: munalijelesa, munazindi byabibi, munazibila Njambi lyoba, munashungwiya manene kutenguluka, muli na ntwima, munasungamesa bubi bumunalingile, mu byuma byoshe munamwesa ngweni mu ba kujela mu ñanda ei. 12 Nameme njamisonekelele mukanda, oloni kunjasonekelele uje wabiisile nambe uje ibabiisilile, oloni njamisonekelele mangana kupanga kweni na nzili kumoneke mwamubwa mukati ketu ku mesho a Njambi. 13 Mukemwo banatuzembeleka.

Oloni kubwezelela ku kutuzembeleka kubanatuzembeleka, twabwahelelele manene mwafwa ya kubwahelela kwa Tito, mwafwa mubaboshe mwahwimisile sipilitu yendi. 14 Njalishashele kuli Tito mwafwa yeni, co kunjazibile shwamwa. Ngecilika byuma byoshe bitwamilekele mu binapu bya busunga, na kulishasha kwetu kuli Tito nakwo kunapu kwa busunga. 15 Co lalo cizemo cendi kuli yeni cili na kwamenako lika mwakanuka kwononoka kweni mubaboshe, mumwamutambwile na lyoba na kasingimiko kakama. 16 Njinabwahelela mwafwa mu byuma byoshe bimuli na kulinga muli na kunjitakamesa.*

8 Bandolome, hanwoni tushaka muzibuke bya ngozi yakama ya Njambi ibanamwesa bikungulukilo bya mu Masedonia. 2 Ha simbu ibakele mu ceseko cakama mwafwa ya kayando, banene mu kubwahelela manene nameme bakele mu buhutu bwakama, co oku kwamwesele ngwabo bafukile manene mu kwana. 3 Mwafwa banene kwesekesa na muje mubakwatelele, mwa busunga bene banene kutubakana na muje mubakwatelele. 4 Bakebo babenya batwaleleleleho kutulambelela manene ngwabo nabo bakale neci kubezika ca kwana mangana nabo bakwase mu cipangi ca kukwasa bakujela. 5 Co byuma bibalingile byatubakanene bitwasinganyekele, mwafwa hakulibanga babangele tahi kulyana kuli Mwata na kuli yetu kwitila mu cizango ca Njambi. 6 Ngeci, twashongangeyeye Tito ngwetu ngecilika mwashangumukile eci cipangi mukati keni, napande lalo kumanesa eci cipangi ca kulifwa ca kukungulula bwana bweni bwa ngozi. 7 Co ngecilika mumunafukila mu byuma byoshe, mu likulahelo na mu lijwi na mu mangana na mu kupanga na nzili na mu cizemo cetu kuli yeni, fukeni lalo na mu kwana bwana bwa ngozi bwa cifweci.

8 Njili na kwendeka ebi keti ngwe kumishika, oloni mangana muzibuke mubali na kupangela na nzili bakweni na kweseka cizemo ceni mangana tumone indi ca busunga. 9 Mwafwa muzibuka ngozi yakama ya Mwata wetu Yesu Kristu, ngweni nameme wapwile wa kufuka, oloni wapwile kahutu mwafwa yeni mangana mwase kupwa ba kufuka kwitila mu buhutu bwendi.

10 Co ha ñanda ei biyongola byange ebi: Eci cuma cinalingiwa mangana cimikwase ha kuwana ngwe kuneti oni mwaka kutunda hamwashangumukilile cipangi. Kumwashangumukile lika cipangi, oloni mwamwesele lalo na lishungu lya kucipanga. 11 Ngeci, hano maneseni bimwashangumukile mangana mumanese eci cipangi na lishungu limwashangumukile nalyo kwesekesa na byuma bimuli nabyo. 12 Mwafwa nga lishungu libanga kukalako, Njambi atambula bwana buje bwana munu, kwesekesa na byuma byali nabyo, keti kwesekesa na byuma bije kesi nabyo. 13 Mwafwa kunjishaka ngwange bakweni njibasiwisile byuma, yeni njimikaluwisilebyo. 14 Oloni njishaka ngwange mubaboshe mupwise hamo, njishaka ngwange byuma byeni bije binasalaho ha simbu ino byase kubakwasa mu bujene bwabo, co lalo byuma byabo bije bisalaho neni byase kukamikwasa mu bujene bweni, mangana mubaboshe mupwise hamo. 15 Kunapu lika ngwe mubanasoneka ngwabo: “Munu uje wakele na byabingi kakele na byabingi manene na munu uje wakele na byabindondo kakele na byabindondo manene.”

16 Tukandelela Njambi mwafwa nana Tito mbunge ya kulishoshomwa yeni ngwe yetu mutwalishoshomwa yeni, 17 mwafwa cili bene nataba mutunamushongangeya, ikeye babenya nayongola kwija kuli yeni, co nashungwiya manene kulinga ngoco. 18 Oloni tuli na kumutuma hamo na ndolome uje ibali na kushangazala mu bikungulukilo byoshe ha bipangi byali na kulinga mwafwa ya muzimbu waubwa. 19 Keti obyo lika embwe, oloni bikungulukilo byamwangwile lalo mangana ende hamo netu omwo tutwala obu bwana bwa ngozi mangana Mwata atambule bumpau na kumwesa ngwetu twashungwiya manene kukwasa. 20 Kutushaka ngwetu munu atuwanene mulonga ha cipangi cetu ca kutwala bwana bubanana kutundilila kwisi ya bimbunge. 21 Mwafwa ‘tukalingi byuma byoshe mu busunga, keti ku mesho a Yehova lika, oloni na ku mesho a banu.’

22 Co lalo tuli na kubatuma na ndolome yetu uje ituneseka lwalwingi, co tunawana ngwetu wapwa muka-kuundangana mu byuma byabingi, oloni hano ali na kupanga manene na nzili mwafwa namikulahela manene. 23 Co nga muli na bihula hali Tito, napu kabusamba kange, mukwetu mutukapangela mu kumikwasa. Nambe nga muli na bihula ha bandolome betu, banapu tupositolo mu bikungulukilo na bumpau bwa Kristu. 24 Ngeci, bamweseni cizemo ceni na kumwesa bikungulukilo byuma bitwalishashelele hali yeni.

9 Co kutalesa ku cipangi ca bakujela, kunjapandele bene kumisonekela, 2 mwafwa njizibuka mbunge yeni ya kulyana ije injili na kulishashela kuli baka-Masedonia, ngwange bandolome mu Akaya kuneti oni mwaka kutunda habanalibwahesela kukwasa, co ntwima yeni ili na kushongangeya babangi mukati kabo. 3 Oloni njili na kutuma bandolome mangana kulishasha kutuli na kulishasha hali yeni keti kupwe kwangoco ha ñanda ei, mangana mulibwahesele bwino ngwe muje munjendekele ngwange mwalibwahesela. 4 Co nga baka-Masedonia beja hamo nange na kuwana ngwabo kumwalibwaheselele, shwamwa yakutulya, maneneni yeni, mwafwa twamikulahela. 5 Ngeci, njinamono ngwange njinapande kushongangeya bandolome balibange kwija mangana bakukungulule cimweja bwana bumwakulahesele, mangana obu bwana bumubwahesela cimweja bupwe bwa kutundilila kwisi ya mbunge keti bwa kumisindiya.

6 Oloni anukeni ngweni woshe akuna mu bundondo, akateja mu bundondo lalo, co woshe akuna mu bwingi akateja mu bwingi lalo. 7 Munu na munu alinge ngwe muje mwanayongwela mu mbunge yendi, keti kwana na bimbunge bibali* nambe mu kulisindiya, mwafwa Njambi wazema uje ana na kubwahelela.

8 Co lalo Njambi asa kulingisa ngozi yendi yakama yame manene kuli yeni mangana simbu yoshe mukale na bya kupwamo mu byuma byoshe, co lalo mukale na byuma byabingi bya kupangesa mu cipangi coshe cacibwa. 9 (Kunapu lika ngwe mubanasoneka ngwabo: “Nana ku mitambela yoshe, nana tuhutu. Kusungama kwendi kutwalelelaho myaka yoshe.” 10 Co uje akana bimbuto mu bwingi kuli muka-kukuna na likende lya kulya, akamyana bimbuto na kubitumisa mangana mukune, co akabwezelela ku kuteja kweni kwa kusungama.) 11 Mu byuma byoshe bali na kumifukisa mangana mwase kwana mu bingila bya kuliseza-seza, co oku kulingisa bakandelele manene Njambi, kwitila muli yetu. 12 Mwafwa eci cipangi ca kupangela mbunga kucesi na kukwasa lika bakujela mu byuma bibatonda, oloni cili na kutumisa lalo majwi amangi a kukandelela Njambi. 13 Kwitila mu bukaleho bucili na kwana eci cipangi ca kukwasa, bali na kwana bumpau kuli Njambi, mwafwa munalyaka kwisi ya muzimbu waubwa wa Kristu ngwe mumwawambulwile ku mbunga, co lalo munana bwana bweni kuli bakebo na ku banu boshe. 14 Co lalo mubakamilambelelela kuli Njambi, bakendeka mubamizemena mwafwa ya ngozi yakama manene ya Njambi ije yanamimwesa.

15 Tukandelela kuli Njambi ha bwana bwendi buje kutwasa kulumbununa.

10 Yange Paulu, njili na kumilambelela na kuwa mbunge kwa Kristu na ngozi yendi, yange imukamono ngweni nji wa kuzeya nga njili hamo neni, co lalo ngweni nji wa kukaluka nga kunjesi hamo neni. 2 Njilomba ngwange munjija okwo keti njakukaluke na kulinga mwamukalu ngwe munjinayongwela kulinga obo bali na kutumona ngwabo tuli na kwenda kwesekesa na situ. 3 Mwafwa nameme tuli na kwenda mu situ, kutwesi na kulwa nzita kwesekesa nomu mutunafu mu situ. 4 Mwafwa bitwa bituli na kulwa nabyo keti bya situ, oloni bitwa bya nzili ya Njambi bije bihyana byuma bya kukola manene. 5 Mwafwa tuli na kuhyana bisinganyeka bya kuhenga na matumbe oshe a kulijundula bije bili na kulwisa mangana a kuzibuka Njambi, co tuli na kwaka bisinganyeka byoshe mu bundungo mangana byononoke Kristu. 6 Co twalibwahesela kwana kashitiko woshe uje kononoka munima ya kumwesa ngweni munononoka mu byuma byoshe.

7 Muli na kumona byuma kwesekesa nomu mubisholokela hanja. Nga kuli umo nakulahela ngwendi nakundama kuli Kristu asinganyeke lalo ha simpi ei: Ngecilika mwanakundama lalo kuli Kristu, netu lalo mukemwo mutunakundamena kuli Kristu. 8 Nameme nga njilishashela manene moko yanatwana Mwata ya kumitunga keti ya kumisiula, kunjizibi shwamwa. 9 Mwafwa kunjishaka kusholoka ngwe njakele na kumijujwisa na mikanda yange. 10 Mwafwa bakendeka ngwabo: “Mikanda yendi keti kulema na nzili, oloni nga ali netu wapwa munu wa kuzeya, co na byendeka byendi byangoco.” 11 Munu wa cifwoco azibuke ngwendi byuma bitukendeka mu mikanda nga tubahi, bikebyo bitwakulinga* mutwija. 12 Mwafwa kutushaka kulyaka haje habali bakebo, nambe kulyesekesa na baje bali na kulishangala bakebo babenya, oloni mubalipeselesa bakebo babenya kuli bakebo babenya na kulyesekesa bakebo babenya kuli bakebo babenya, bamwesa ngwabo keti baka-kuzibisisa.

13 Nameme ngoco, kutukalishashela hanja ya binginga byetu, oloni tukalishashela mukati ka citingitingi canatubatwila Njambi, mangana twakwete nokwo kuli yeni. 14 Cili bene kutwesi na kujomboka binginga byetu ngwe ngwabo nokwo kutweteleko, mwafwa yetu twapwile bakulibanga kwa kweta kwoshe okwo kuli yeni na muzimbu waubwa wa Kristu. 15 Kutwesi na kulishashela hanja ya binginga hanafwitangana munu weka, oloni twakulahela ngwetu omwo likulahelo lyeni litwalelelaho kulibwezelela, bitunalingi nabyo bilibwezelela mu citingitingi cetu. Co bipangi byetu nabyo byama manene 16 mangana twambulule muzimbu waubwa ku mafuti ali kulako, mangana keti tulishashele ha cipangi cibanapanga laja mu citingitingi ca munu weka. 17 “Oloni uje alishasha, alishashele hali Yehova.” 18 Mwafwa uje ibataba keti uje alishangala ikeye babenya, oloni uje ibashangala kuli Yehova.

11 Njishaka ngwange munjizibisise nameme njisholoka ngwe nji munu wa kujeneka kuzibisisa. Co muli na kunjizibisisa bene. 2 Mwafwa njili na kumizibila lifuwa, ngwe lifuwa* lya Njambi, mwafwa njamikulahesele kumishombwesa kuli munalume umolika mangana njimyane kuli Kristu kupwa ngwe mumbanda wa kujela uje kanda alilaleho na munalume. 3 Oloni njili na lyoba ngwange hamo ngecilika linyoka mwakokweyeye Eva na makuli endi, bisinganyeka byeni nabyo binasa kungumuka kutunda ku busunga na ku kujela bije bimunapande kwana Kristu. 4 Njendeka ngoco mwafwa nga munu weka aija na kwambulula bya Yesu weka keti uje itwamyambulwilile, nambe nga mutambula sipilitu yeka keti ije imwatambwile, nambe nga amyambulwila muzimbu waubwa weka keti uje umwatambwile, ou munu mumutolilila. 5 Mwafwa nacimo cahi cinamwesa ngwaco nji wamundondo kuli obo tupositolo beni bakama. 6 Nameme keti nji mutongwe mu kwendeka, oloni njili na mangana. Cili bene twawasholwele mwamubwa kuli yeni mu bingila byoshe na mu byuma byoshe.

7 Indi njalingile bubi munjalikehesele mangana yeni bamijundule, munjamyambulwilile muzimbu waubwa wa Njambi mu kubwahelela kwa kujeneka kumifwetesa? 8 Njapukwile bikungulukilo byeka munjatambwile bukwasi bwabo mangana njipangele yeni. 9 Oloni munjakele neni ha simbu injakele mu bujene, kunjapwile citele ku munu nambe umo, mwafwa bandolome baje batundile ku Masedonia banjanene byuma binjatondele mu bwingi. Cili bene mu byuma byoshe kunjashakele ngwange njipwe citele kuli yeni, co njitwalelelaho kulinga ngoco. 10 Njilisinga busunga bwa Kristu buli muli yange ngwange, kunjilikele kulishasha mu mitambela ya Akaya. 11 Mwafwa bika? Kuma kunjamizemene ndi? Njambi azibuka ngwendi njamizema.

12 Oloni binjili na kulinga njitwalelelaho kubilinga mangana njimanese makuli obo bali na kushaka kuwana ha kulikwisila ngwabo banapwisa hamo netu mu byuma bibali na kulishashela. 13 Banu ba cifwoco banapu tupositolo ba makuli, bali na kukwisa lika banu, bali na kulikwisa ngwe banapu tupositolo ba Kristu. 14 Kutukomoka mwafwa Satana natwalelelaho kulikwisa kupwa ngwe kangelo ka ceke. 15 Ngeci, kukukomokesa manene nga baka-kumupangela nabo balikwisa kupwa ngwe baka-kupanga bya kusungama. Oloni mamaneselelo abo akapwa bene kwesekesa na bipangi byabo.

16 Njendeka lalo ngwange keti kukale munu asinganyeka ngwendi kunjesi kuzibisisa. Oloni nameme musinganyeka ngoco, njitambuleni bene ngwe munu wa kujeneka kuzibisisa mangana nange njilishasheko kamandondo. 17 Binjili na kwendeka hano keti ngwe njili na kukabangeya mwanja wa Mwata, oloni ngwe munu wa kujeneka kuzibisisa uje ali na kulishasha na kulikulahela babenya. 18 Ha kuwana ngwe banu babangi bali na kulishasha kwesekesa na situ,* nange bene njilishasha. 19 Ha kuwana ngwe yeni munapu “baka-kuzibisisa,” mwasa kuzibisisa mwamubwa baje kubesi na kuzibisisa. 20 Yeni ngwetu mukazibisisa woshe amipwisa ndungo, woshe amilila bufuko bweni, woshe aminyeka bimuli nabyo, woshe alijundula hali yeni na woshe amipupa ku mesho.

21 Njendeka ngoco mangana tushauke, mwafwa cisholoka ngwe tu ba kuzeya.

Oloni nga bakwetu banalingi byuma mu kusimpa, njili na kwendeka ngwe munu wa kujeneka kuzibisisa, nange njinalingi byuma mu kusimpa. 22 Kuma bapwa Bahebelu ndi? Nange nji Kahebelu. Kuma bapwa Baisalele ndi? Nange nji Kaisalele? Kuma bapwa bana* ba Abrahamu ndi? Nange nji munendi? 23 Kuma banapu baka-kupangela Kristu ndi? Njikumbulula ngwe munu wa kuzaluka, njinabatubakanena kulako-lako: Njinapanga bipangi byabingi, bananjikutu lwalwingi, njinamono kayando ka bipumu bije kunjasa kutanda, co lwalwingi njinelukila ha cala. 24 Bajuda banjipupile makote 39 lutanu. 25 Banjipupile na bimbweti lutatu, banjashele mamanya lumolika, lutatu njakele mu bwato buje bwabihilile ha ndonga, njakele mu kalunga-ndonga litangwa lyoshe lya mutunu, butsiki na mutanya. 26 Njakutile mangenzi amangi, njaliwanene mu bushonde bwa ha ndonga, mu bushonde bwa mapwepwe, mu bushonde bwa kutunda ku banu bange, mu bushonde bwa baka-mafuti, mu bushonde bwa mu nganda, mu bushonde bwa mu mambo, mu bushonde bwa ha kalunga-ndonga, mu bushonde bwa kutunda ku bandolome ba makuli. 27 Mu kufwitangana na mu kuundangana, mu kujeneka kumona tulo kushwa kumo, mu njala na mu lihwila, mu kujeneka kukala na byakulya kakangi, mu lisika na mu buzu.*

28 Kubwezelela ku byuma bya hanja, kuli byuma bili na kunjipindisa mukati ha litangwa na litangwa:* kulishoshomwena bikungulukilo byoshe. 29 Iya nazeye yange njijeneke kuzeya? Iya natanuka yange njijeneke kulubala?

30 Nga njilishasha, njilishashela ha byuma bije bimwesa buzeye bwange. 31 Njambi, Ishe ya Mwata Yesu Kristu, Uje ibanapande kushangazala myaka yoshe azibuka ngwendi kunjesi na kukwisa. 32 Mu Damasika, ngubulu uje wakele mwisi ya mwene Aletasi wakele na kunyungilila nganda ya baka-Damasika mangana anjikwate. 33 Oloni banjakele mu cizuma na kunjisosela munjanena ije yakele ha cibumbe ca nganda, co njobokele mu maboko endi.

12 Njinapande kulishasha. Nameme ngoco, byahi binjiwanamo, oloni njendeka bya bimona na byuma byananjijombolwela Mwata. 2 Njizibuka munalume uje nalikwatasana na Kristu, uje myaka 14 kunima (kunjizibuka indi te na mubila, indi te keti na mubila kunjizibuka, Njambi ikeye azibuka) bamukwebwile na kumutwala mu lilu lyamucitatu. 3 Eyo njizibuka munu wa cifwoco (indi te na mubila, indi te keti na mubila kunjizibuka, Njambi ikeye azibuka) 4 uje ibakwebwile na kumutwala mu paradaisi, co wazibile majwi aje kubasa kwendeka, co kubatabesa munu kuwendeka. 5 Njilishashela byou munalume wa cifweci, oloni kunjilishashela byange babenya, kubanga bya buzeye bwange lika. 6 Mwafwa nameme nga njishaka kulishasha, kunjipu wa kujeneka kuzibisisa, mwafwa njendeka busunga. Oloni kunjilishasha mangana keti kukale umo anjishangazala manene kutubakana byali na kumona nebi byali na kuziba kuli yange 7 mwafwa lika ya kunjijombolwela byuma bya kulitila.

Oloni hakulinga mangana keti njilijundule manene, banjanene mungonga mu situ, kangelo ka Satana, atwaleleleho kunjibwakula* bimbanda mangana keti njilijundule manene. 8 Bisimbu bitatu njalombele Mwata ngwange ou mungonga unjitunde. 9 Oloni wanjikumbulwile ngwendi: “Ngozi yange yakama inapumo kuli yobe, mwafwa nzili yange ikasholoka mu kushula nga unazeye.” Ngeci njibwahelela manene na kulishashela ha buzeye bwange mangana nzili ya Kristu ikale hali yange ngwe tenti. 10 Mukemwo njikabwahelela nga njinazeye, nga banjituka, nga njili mu bujene, mu tuyando na mu bukalu mwafwa ya Kristu. Mwafwa nga njinazeye, hakeho hanjikela na nzili.

11 Njinapwoni wa kujeneka kuzibisisa. Yeni mwanjisindiiye, mwafwa yeni mwapandele kunjishangala. Nameme yange nji wangoco, keti nji wamundondo nambe mu cuma cimo kuli obo tupositolo beni bakama. 12 Cili bene, bukaleho bumwesa bupositolo bwange njabusholwele mukati keni na kukolesa kwakama, na bizibukiso, na bikomokeso,* na bipangi bya nzili. 13 Mwafwa mu ngila muka ije kumwabezikile ngwe mubanabezika bakweni? Ngwetu kubanga yange kunjapwile citele kuli yeni! Njikonekeleniko manene ha ñanda ei.

14 Taleni! Luno lwamucitatu lunjinalibwahesela kwija kuli yeni, co kunjakupu citele kuli yeni, mwafwa yeni banjitondako keti bufuko bweni, mwafwa bana keti bakebo banapande kutulikila bisemi babo bufuko, oloni bisemi bakebo banapande kutulikila bana babo bufuko. 15 Ngecimwangeni, njibwahelela kupangesa byuma binjili nabyo na kulyana yange babenya mu kushula mwafwa yeni.* Nga njamizema manene ngacije, kuma yeni munapande kunjizema kamandondo ndi? 16 Oloni munjinendeka ngoco, kunjamyanene citele. Nameme ngoco, mukendeka ngweni njakele na “linyanyamena,” co njapangesele “makuli” mu kumilabula. 17 Kuma njaminyanyamenene kwitila mu banu banjatumine kuli yeni ndi? 18 Njashongangeyeye Tito aije kuli yeni, co njamutumine na ndolome umo. Kuma Tito waminyanyamenene ndi? Kuma kutwendele mu sipilitu ya kulifwa ndi? Kuma kutwendele mu myanja ya kulifwa ndi?

19 Kuma simbu yoshe ei mwakele na kusinganyeka ngweni twakele na kulyamena ku mesho eni ndi? Tuli na kwendeka ku mesho a Njambi mu kulikwatasana na Kristu. Oloni yeni banjazema, byoshe bituli na kulinga tuli na kubilinga mangana tumitunge. 20 Mwafwa njili na lyoba ngwange munjija okwo, hamo kunjakumiwana ngwe munjishakela, nange lalo hamo kunjakufu ngwe mumushakela, oloni hamo kwakukala lwozi, cipululu, butenu, bimata, kulyendeka mwamubi, kufweya, kulijundula na liwayanga. 21 Hamo munjija okwo lalo Njambi akunjilingisa njizibe shwamwa ku mesho eni, co hamo njakulila banu babangi baje balingile bubi, oloni kubatengulukile ku mazilo na ku bupangala* na ku kulinga byuma byabibi kwa kujeneka shwamwa* bije bibakele na kulinga.

13 Olu lupwa lwamucitatu lunjija kuli yeni. “Ha bukaleho* bwa banu babali nambe batatu ñanda yoshe ikale na bukaleho bwa kushula.” 2 Nameme kunjesi hamo neni hano, oloni kunapu lika ngwe njinakele hamo neni lwamucibali, co njili na kulekela cimweja baje balingile bubi kunima na bakwabo boshe ngwange nga njija okwo lalo kunjakubecelela, 3 mwafwa muli na kutonda bukaleho buje bumwesa ngwabwo Kristu uje kapwile wa kuzeya kuli yeni, oloni uje wapwa wa kukanyama mukati keni, ikeye bene ali na kwendeka kwitila muli yange. 4 Mwafwa cili bene bamutsiilile ha citi, mwafwa ya buzeye,* oloni ali na kuyoya mwafwa ya nzili ya Njambi. Cili bene, netu tunazeye hamo nendi, oloni tukayoya hamo nendi mwafwa ya nzili ya Njambi ije ili hali yeni.

5 Twaleleleniho kulyeseka mangana mumone indi mucili mu kukulahela. Twaleleleniho kulilula mangana mumone mumunapu. Kuma kumwanangukile ngweni Yesu Kristu nalikwatasana neni ndi? Kubanga nga banamibyana. 6 Njakulahela bene ngwange munanguka ngweni kubatubyanene.

7 Tulomba kuli Njambi ngwetu keti mulinge cuma cacibi, keti ngwabo yetu tushaka kusholoka ngwe banatutaba, oloni tushaka mulinge byuma byabibwa nameme yetu tusholoke ngwe banatubyana. 8 Mwafwa kutwesi kulinga cuma cilwisa busunga, oloni tukakundwiya lika busunga. 9 Cili bene tukabwahelela mumukakala na nzili nameme yetu tunazeye. Co cuma citulomba lika ngwetu bamisungamese. 10 Mukemwo njili na kumisonekela ebi byuma simbu kunjesi neni mangana munjikala neni keti njakupangese manene moko yananjana Mwata, mangana njakumitunge keti kumisiula.

11 Mukumanesa, bandolome, twaleleleniho kupwa ba kubwahelela, na kutaba kumyolola, na kutaba kumizembeleka, na kusinganyeka mu kulitombola na kuyoya mu kwoloka. Co Njambi wa cizemo na kwoloka akala neni. 12 Limenekeni umo na mukwabo na kulitsemba ca kujela. 13 Bakujela boshe banamimeneka.

14 Ngozi yakama ya Mwata Yesu Kristu, na cizemo ca Njambi, na bukwasi bumuli na kutambwila hamo kwitila mu sipilitu ya kujela bikale neni mubaboshe.