KULI BAKA-GALATIYA

1 Yange Paulu, nji kapositolo, keti kapositolo ibanangula ku banu, nambe kwitila muli munu, oloni kwitila muli Yesu Kristu na Njambi Tate uje wamusangwile ku batsi. 2 Yange na bandolome boshe banjili nabo tuli na kutuma mitende ku bikungulukilo bya mu Galatiya:

3 Ngozi yakama na kwoloka bya kutunda kuli Njambi Tate yetu na Mwata Yesu Kristu bikale neni. 4 Kristu walyanene ikeye babenya mwafwa ya bubi bwetu mangana ase kutwobola mu katumameno kakabi ka myaka ino* kwesekesa na cizango ca Njambi yetu na Tate yetu. 5 Kuli ikeye kukale bumpau myaka yoshe. Ameni.

6 Njalikomokela ngwange lajoko bene muli na kutunda* kuli Uje wamisanene na ngozi yakama ya Kristu na kungumuka na muzimbu waubwa weka. 7 Keti ngwabo kuli muzimbu waubwa weka, oloni kuli bamo baje bali na kuminenela bukalu na kushaka kuhengesa muzimbu waubwa wa Kristu. 8 Oloni ipwe bene yetu nambe kangelo wa kutunda mwilu akumyambulwila muzimbu weka ngwendi ukewo muzimbu waubwa, keti muzimbu uje utwamyambulwilile, apwe wakusingiwa. 9 Ngwe mutunabanga kwendeka, njicendekamo lalo ngwange woshe akumyambulwila muzimbu weka ngwendi ukewo muzimbu waubwa, keti uje umwatambwile, apwe wakusingiwa.

10 Kuma njili na kushaka kukokweya banu indi Njambi? Kuma njili na kushaka kuzibisa banu kubwaha ndi? Ngwe njicili na kuzibisa banu kubwaha, ngwe keti nji ndungo ya Kristu. 11 Bandolome, njishaka muzibuke ngweni muzimbu waubwa unjamyambulwilile kuutundu ku banu, 12 mwafwa ou muzimbu kunjautambwile kuli munu, co lalo kubalingile wakunjilongesa, oloni njautambwile omwo Yesu Kristu wanjijombolwelelewo.

13 Mwazibile bya futisi yange ya kunima munjakele mu bulombelo bwa Bajuda, munjayandeselele manene cikungulukilo ca Njambi na kucibiisa. 14 Njakele na kulinga mwamubwa manene mu bulombelo bwa Bajuda kutubakana bwingi bwa bakwetu banjapwile hamo nabo ba muyati wange, mwafwa njakele na ntwima manene ha bisemwa bya bakukulwila bange. 15 Oloni Njambi uje wanjitundisile mwimo lya banana na kunjisana mwafwa ya ngozi yendi yakama, wamwene ngwendi kwakubwa 16 kusholola Munendi kwitila muli yange mangana njase kwambulula muzimbu waubwa uje wendeka byendi ku baka-mafuti. Co haje bene kunjehwile munu* byakulinga, 17 co lalo kunjakandukile ku Jelusalema kuli baje balibangele kupwa tupositolo simbu kanda njipwe kapositolo, oloni njaile ku Arabia, co njeluka ku Damasika.

18 Mukwetile myaka itatu, njaile ku Jelusalema na kumona Kefasi,* co njakakele nendi matangwa 15. 19 Oloni naumo kapositolo mukwabo injamwene wahi kubanga Jemusi ndolome ya Mwata. 20 Co kutalesa ku byuma binjili na kumisonekela, njendeka bene busunga ku mesho a Njambi ngwange kunjesi na kukwisa.

21 Kutundaho, njaile mu mutambela wa Silya na Silisha. 22 Oloni ba mu bikungulukilo bya Judeya baje balikwatasanene na Kristu kubanjizibukile. 23 Bakele na kuziba lika ngwabo: “Uje munalume wakele na kutuyandesa hano ali na kwambulula muzimbu waubwa wa likulahelo lije lyabiisile.” 24 Ngeci, bashangumukile kwana Njambi bumpau mwafwa yange.

2 Mukwetile myaka 14, njaile lalo ku Jelusalema na Banabasi, njambatele na Tito. 2 Njaileko mwafwa ya cimona cibanjijombolwelele, co njabambulwilile muzimbu waubwa unjili na kwambulula ku baka-mafuti. Oloni njawambulwile lika kuli baje ba bulemu kutewa ngwange hamo njinakele na kushatuka lika ngoco, nambe njashatukile lika ngoco. 3 Nameme bene Tito injakele nendi kubamusindiiye kuya ku mukanda nameme wapwile Kagriki. 4 Oloni ei ñanda yakatukile mwafwa ya bandolome ba makuli baje bezile mu cikungulukilo mu buse-buse, baje balibembelelemo mangana batanganese kupatuka kutwakele na kulikuwa mu kulikwatasana na Kristu Yesu, mangana batupwise lalo bindungo. 5 Kutwalyakele kwisi yabo embwe. Kutwalingile ngoco nambe kamandondo,* mangana busunga bwa muzimbu waubwa bwase kutwalelelaho kukala neni.

6 Oloni kutalesa kuli baje babamwene ngwabo ba seho (mwoshe-mwoshe mubafwile, kuli yange na kuliseza bene kuliho kwahi, mwafwa Njambi kesi kutala ha cifwa ca munu ca hanja), obo ba bulemu nacimo cuma caciha cibanjilongesele bene cahi. 7 Oloni mubamwene ngwabo bananjana cipangi ca kwambulula muzimbu waubwa kuli baje kubaile ku mukanda ngwe mubanenene Pita cipangi ca kwambulula muzimbu waubwa kuli baje banai ku mukanda, 8 (mwafwa uje wanene Pita nzili ya kupwa kapositolo kuli baje banai ku mukanda ikeye lalo wanjanene nzili ya kupwa kapositolo kuli baka-mafuti) 9 co lalo mubanangukile ngwabo wanjimwesele ngozi yakama, Jemusi na Kefasi* na Iwano baje basholokele kupwa bingunzi bakwatele Banabasi nange mu maboko mu kumwesa ngwabo tuli na kupangela hamo mangana yetu twase kuya kuli baka-mafuti bakebo baye kuli baje banai ku mukanda. 10 Batulombele lika ngwabo twanuke tuhutu, co nange njinalingi mwoshe munjinasela kulinga ngoco.

11 Oloni Kefasi* mwezile ku Antioke, njamubyanenene* citona mesho mwafwa wabiisile bene.* 12 Mwafwa simbu kanda banalume baje batundile kuli Jemusi bete, Pita wakele na kulya na banu ba ku mafuti. Oloni baje banalume mubetele, wecelele kulya na ba ku mafuti, co walyangunwine kuli bakebo mwafwa watewele baje baile ku mukanda. 13 Co na bakwabo Bajuda boshe balikwatasanene nendi mu kulikwisa, ngeci na Banabasi nendi wongumukile nabo mu kulikwisa kwabo. 14 Oloni munjamwene ngwange kubakele na kwenda mu busunga bwa muzimbu waubwa, njalekele Kefasi* ku mesho abo boshe ngwange: “Nga yobe Kajuda uyoya ngwe baka-mafuti, keti ngwe Bajuda, co wasa kushongangeya bati banu ba ku mafuti bayoye ngwe Bajuda?”

15 Yetu Bajuda ba cisemwa, keti baka-bubi ba ku mafuti, 16 tuzibuka ngwetu munu bamusana ngwabo muka-kusungama, keti mwafwa ya bipangi bya lishiko, oloni kwitila mu kukulahela Yesu Kristu. Ngeci, tunakulahela Kristu Yesu mangana batusane ngwabo tu baka-kusungama mwafwa ya kukulahela Kristu, keti mwafwa ya bipangi bya lishiko, mwafwa naumo wahi* ibasana ngwabo muka-kusungama mwafwa ya bipangi bya lishiko. 17 Co nga netu banatuwana ngwabo tu baka-bubi ha simbu ituli na kutonda kutusana ngwetu tu baka-kusungama kwitila muli Kristu, kumoho Kristu napu muka-kupangela bubi ndi? Embwe. 18 Nga byuma bije bene binjasiwile bikebyo nawa binjitunga, co njimwesa ngwange nji muka-kupokola lishiko. 19 Mwafwa kwitila mu lishiko njatsile ku lishiko mangana njase kupwa wa kuyoya kuli Njambi. 20 Bananjipameya ha citi hamolika na Kristu. Keti yange lalo njili na kuyoya, oloni Kristu ikeye ali na kuyoya mu kulikwatasana nange. Cili bene kuyoya kunjili na kuyoya hano mu situ njili na kuyoya mwafwa ya kukulahela Muna Njambi uje wanjizemene, co walyanene ikeye babenya mwafwa yange. 21 Kunjibyana* ngozi yakama ya Njambi, mwafwa nga kusungama kwija kwitila mu lishiko, co nebi byatsililile Kristu bene byahi.

3 Eni baka-Galatiya ba kujeneka mana! Iya namyungumuna, yeni babamwesele Yesu Kristu oku banamupameya ha citi? 2 Njicimihuleko* tahi: Kuma mwatambwile sipilitu kwitila mu bipangi bya lishiko indi mwafwa ya likulahelo lyeni mu byuma bimwazibile? 3 Kuma na mana bene kumwesi nawo ndi? Munashangumukile kwenda mu kulitombola na sipilitu,* kuma kumamaneselelo mwenda mu kulitombola na situ* ndi? 4 Kuma kuyanda kumunayandele kunai lika mwangoco ndi? Njikulahela ngwange kukwaile mwangoco. 5 Kuma uje akamyana sipilitu na kumilingisa mupange bipangi bya nzili mukati keni akalingi ngoco mwafwa ya bipangi byeni bya lishiko indi mwafwa ya likulahelo lyeni mu byuma bimwazibile? 6 Kunapu lika ngwe omwo Abrahamu “wakulahelele Yehova, co bamumwene ngwabo muka-kusungama.”

7 Cili bene muzibuka ngweni baje bali na likulahelo bakebo banapu bana ba Abrahamu. 8 Co ha kuwana ngwe cisoneka camwenenene cimweja ngwaco Njambi akasana banu ba ku mafuti kupwa ba kusungama mwafwa ya likulahelo lyabo, cambulwile cimweja muzimbu waubwa kuli Abrahamu ngwaco: “Mafuti oshe akabezika kwitila muli yobe.” 9 Ngeci, baje bali na likulahelo bali na kubabezikisila hamo na Abrahamu uje wakele na likulahelo.

10 Boshe baje banakulahela bipangi bya lishiko banapu bakusingiwa, mwafwa banasoneka ngwabo: “Woshe katwalelelaho kulinga byuma bibanasoneka mu mabulu a kuzenga a Lishiko, apwe wakusingiwa.” 11 Co lalo bukaleho bumwesa mwamubwa ngwabwo naumo wahi ibasana ngwabo muka-kusungama ku mesho a Njambi mwafwa ya lishiko, mwafwa “muka-kusungama ayoya mwafwa ya likulahelo lyendi.” 12 Lishiko kulyemanene ha likulahelo, oloni “woshe alinga ebi byuma ayoya.” 13 Kristu watulandele, watupatwile ku cisingo ca Lishiko omwo wapwile cisingo mu mwela wetu, mwafwa banasoneka ngwabo: “Munu woshe ibashukika ha citi, napu wakusingiwa.” 14 Eci cafwile ngacije mangana cibezikiso ca Abrahamu cije ku baka-mafuti kwitila muli Kristu Yesu, mangana twase kutambula sipilitu ibatukulahesele kwitila mu likulahelo lyetu.

15 Bandolome, njipangesa cakumwenako cibazibisisa banu: Nga cikumiiyo banacikutu, nameme munu ikeye nacikutu, wahi asa kucizitula nambe kubwezelelako byeka. 16 Co bikulaheso babikulahesele Abrahamu na munendi.* Cisoneka kucendekele ngwaco “na batekulwila* bobe,” kulumbununa babangi. Oloni cinendeka ngwaco “na munobe,”* kulumbununa umolika, Kristu. 17 Co lalo njendeka ngwange Lishiko lije lyezile munima ya myaka 430 kulyasa kuzitula cikumiiyo cabangele kulikumiiya Njambi na kumanesa cikulaheso. 18 Mwafwa nga buswana bunemana ha lishiko, co kubwimana lalo ha cikulaheso. Oloni Njambi mu ngozi yendi wabwanene Abrahamu kwitila mu cikulaheso.

19 Co Lishiko lyabikoni? Balyakeleko mangana lijombolole milonga, kweta noho hakezila mwana* uje ibalingilile eci cikulaheso. Co Lishiko balinenele kwitila mu tungelo, kwitila mu liboko lya muka-kuwanesa. 20 Co kukwesi kukala muka-kuwanesa nga munu umolika alinga cikumiiyo, oloni Njambi walingile ngoco likalyendi. 21 Kuma Lishiko lili na kulwisa bikulaheso bya Njambi ndi? Embwe. Mwafwa ngwe banene lishiko lije lyasa kwana kuyoya, ngwe batusana ngwabo tu baka-kusungama kwitila mu lishiko. 22 Oloni Cisoneka cakele byuma byoshe mu nzili ya bubi, mangana cikulaheso cije cinemana ha kukulahela Yesu Kristu, base kucana kuli baje bamwesa likulahelo muli ikeye.

23 Oloni simbu kanda likulahelo lije, bakele na kutunyungilila mwisi ya lishiko, batwakele mu nzili yalyo oku tubandamena likulahelo lije lyakele hayehi na kulijombolola. 24 Ngeci, Lishiko lyapwile muka-kutunyunga* wa kututwala kuli Kristu, mangana base kutusana ngwabo tu baka-kusungama mwafwa ya kukala na likulahelo. 25 Oloni ha kuwana ngwe likulahelo linaijoni, kutwesi lalo mwisi ya muka-kutunyunga.*

26 Mubaboshe munapu bana ba Njambi, mwafwa ya likulahelo lyeni muli Kristu Yesu. 27 Mwafwa yeni boshe babambwitikile muli Kristu, munazala Kristu. 28 Kukwesi ngwabo ou Kajuda ou Kagriki, kukwesi ngwabo ou ndungo ou wakupatuka, kukwesi ngwabo ou munalume ou munakazi, mwafwa mubaboshe munapu umolika mu kulikwatasana na Kristu Yesu. 29 Co lalo nga munakundama kuli Kristu, munapu bene bana ba Abrahamu, mu baswana kwesekesa na cikulaheso.

4 Hano njimileka ngwange nga swana acili mwanike, kalisezele na ndungo nameme napu mwata wa byuma byoshe, 2 oloni ali mwisi ya baka-kunyunga na bangamba kweta na ha litangwa lyanangwila cimweja ishe. 3 Mu ngila imolika, netu mutwapwile tu banike, twapwile bindungo ba byuma bya mashangumukilo bya kaye. 4 Oloni simbu muyapwilemo, Njambi watumine Munendi uje wasemukile ku munakazi, co wakele mwisi ya lishiko, 5 mangana ase kupatula baje bali mwisi ya lishiko ha kubalanda, mangana twase kupwa bana.

6 Ha kuwana ngwe munapwoni mu bana, Njambi natumu sipilitu ya Munendi mu bimbunge byetu, co ili na kutambeka ngwayo: “Abba,* Tate!” 7 Ngeci, keti mu bindungo lalo, oloni mu bana. Co nga mu bana, co Njambi namipwisa lalo baswana.

8 Nameme ngoco, simbu kanda muzibuke Njambi, mwakele mu bundungo bwa kupangela binjambi ba makuli. 9 Ha kuwana ngwe munazibukoni Njambi, nambe ngwetu Njambi namizibuka, mwiluka bati lalo ku byuma bya mashangumukilo bya kuzeya, bya kujeneka seho, na kushaka kupwa lalo bindungo babyo? 10 Muli na kwaka manene mbunge ku kunyunga matangwa na bingonde na bisimbu na myaka. 11 Njili na lyoba ngwange hamo njalisinine ngoco kumikwasa.

12 Bandolome, njimilomba, pweni ngwe yange, mwafwa nange njapwile ngwe yeni. Nabimo byahi bimunanjibiisila. 13 Oloni muzibuka ngweni kubinja kwange kukekwo kwanjilingisile njakwambulule muzimbu waubwa lwakulibanga kuli yeni. 14 Co nameme kubinja kwange kwapwile ceseko kuli yeni, kumwanjishawile nambe kunjizibila bunyengwe,* oloni mwanjitambwile ngwe kangelo ka Njambi, ngwe Kristu Yesu. 15 Kubwahelela kumwabwahelelele kunai kuli? Mwafwa njana bene bukaleho ngwange ngwe casiwile, ngwe mwacakubwile mesho eni na kunjanawo. 16 Kuma njinapu citozi ceni mwafwa njili na kumileka busunga ndi? 17 Bali na kweseka mwoshe mubasela kumikokela ku mutambela wabo, oloni butumbe bwabo keti bwabubwa. Bashaka kumyangununa kuli yange mangana mubakabangeye. 18 Oloni cinapu cacibwa simbu yoshe nga munu eseka mwoshe mwasela ngwendi mukale ku mutambela wendi nga ali na biyongola byabibwa, keti lika ha simbu injili neni, 19 yeni bana bange babandondo banjili na kuzibila lalo kubabala ngwe mushongo wa kukita, kweta noho hacikasholokela* cifwa ca Kristu muli yeni. 20 Njinashakele ngwange ha simbu ino ngwe njili hamo neni na kwendeka neni mu ngila yeka, mwafwa mwanjimanesa mangana.

21 Acinjilekeni, yeni mushaka kukala mwisi ya lishiko, Kuma kumuzibuka bilyendeka Lishiko ndi? 22 Cakumwenako, banasoneka ngwabo Abrahamu wakele na bana babali, umo wa kuli ngamba wa mumbanda, mukwabo wa kuli munakazi wa kupatuka. 23 Oloni uje wa kuli ngamba wa mumbanda wasemukile ngwe mubakasemuka banu boshe, co uje wa kuli munakazi wa kupatuka, wasemukile kwitila mu cikulaheso. 24 Ebi byuma binasa kwimanenako byuma bimo. Mwafwa aba banakazi bemanena bikumiiyo bibali, cikumiiyo ca ku Munkinda wa Sinai, cije cikita bana ba mu bundungo, cimanena Hagale. 25 Hagale emanena Sinai, munkinda wa ku Arabia, co lelo emanena Jelusalema mwafwa ili mu bundungo na bana bayo. 26 Oloni Jelusalema ya mwilu yapwa ya kupatuka, co yapwa nanetu.

27 Mwafwa banasoneka ngwabo: “Bwahelela, obe munakazi wa mumba, obe kuwesi kukita. Tambeka mu kujolela, obe munakazi kanda uzibeho mushongo wa kukita, mwafwa bana ba munakazi ibanaseze banapu babangi manene kutubakana ba munakazi uje ali na munalume wendi.” 28 Ngeci bandolome, yeni munapu mu bana ba cikulaheso ngwe mwapwile Isaki. 29 Oloni ngecilika uje wasemukile ngwe mubakasemuka banu boshe* mwashangumukile kuyandesa uje wasemukile kwitila mu sipilitu, na hano bene mukemwo mukunafu. 30 Nameme ngoco, bika bicendeka cisoneka? Ngwaco: “Sheka ngamba wa mumbanda na munendi, mwafwa muna ngamba wa mumbanda kakaswana hamolika na muna munakazi wa kupatuka.” 31 Ngeci bandolome, keti tu bana ba ngamba wa mumbanda, oloni tu bana ba munakazi wa kupatuka.

5 Mwafwa Kristu watupatwile mangana tukale noku kupatuka. Ngeci imaneni mbe, co keti mutabe kwiluka lalo ku joko ya bundungo.

2 Yange Paulu, njili na kumileka ngwange nga muya ku mukanda, Kristu kapu wa seho kuli yeni. 3 Co njanukisa lalo munu woshe aya ku mukanda ngwange napande kunyunga Lishiko lyoshe. 4 Nga mushaka bamisane ngwabo baka-kusungama kwitila mu lishiko, co munangunuka kuli Kristu. Munatundu ku ngozi yendi yakama. 5 Mwafwa yetuni, kwitila mu sipilitu tunabandamena manene kusungama kutunalabelela kuje kutunda mu kukala na likulahelo. 6 Mwafwa kuli Kristu Yesu, kuya ku mukanda nambe kujeneka kuya ku mukanda keti kukekwo kwa seho, oloni likulahelo lije lili na kupanga kwitila mu cizemo likelyo lya seho.

7 Munakala na kushatuka mwamubwa. Iya namyonowesa kwononoka busunga? 8 Eci kukokweya ca cifweci kucesi na kutunda kuli Uje ali na kumisana. 9 Tumusima* twatundondo lika tufutunwisa mukasha woshe. 10 Njinakulahela ngwange yeni munalikwatasana na Mwata, kumukala lalo na biyongola byeka. Oloni woshe ali na kuminenela bukalu apwe iya indi iya, bakamwana kashitiko kanamupande. 11 Bandolome, nga yange njicili na kwambulula bya kuya ku mukanda, co bika bibali na kunjiyandesela? Nga mukemwo, co citanwiso ca citi ca kuyandesela* banacitundisako. 12 Kuli yangeni cibwaha manene nga obo banu bali na kushaka kumitanganesa balitundisa bilyo byabo bya lusemo bakebo babenya.*

13 Bandolome, bamisanene ngwabo mupwe ba kupatuka, cakama lika keti mupangese oku kupatuka mu kukabangeya mashungu a situ, oloni umo na umo weni apangele mukwabo mwafwa ya cizemo. 14 Mwafwa Lishiko lyoshe banalishulisilila* mu endekesi imolika ya kwendeka ngwayo: “Unapande kuzema mukweni ngwe muwalizema yobe babenya.” 15 Nga mutwalelelaho kulibulumuna na kulilwisa umo na mukwabo, co muli mu bushonde bwa kulinyongesa umo na mukwabo.

16 Oloni njimileka ngwange twaleleleniho kwenda na sipilitu, co kumulingi mwaya mashungu a situ. 17 Mwafwa mashungu a situ ali na kulwisa sipilitu, co sipilitu ili na kulwisa situ. Ebi byuma bili na kulilwisa mangana keti mulinge byuma bimushaka kulinga. 18 Co lalo, nga sipilitu ili na kumitwamenena, kumwesi mwisi ya lishiko.

19 Bipangi bya situ binasholoka ha kujela, co binapu bupangala,* mazilo, kulinga byuma byabibi kwa kujeneka shwamwa,* 20 kulemesa tumponya, budimona,* bizindo, lwozi, lifuwa, butenu, bimata, kulyangununa, tubibunga twa kulimanena, 21 cipululu, butakwa, bilika bya kalwa,* na byuma bya cifweci. Njili na kuminangwila cimweja ha byuma ebi ngwe munjabangele kuminangula ngwange baje balinga ebi byuma kubakaswana Bumwene bwa Njambi.

22 Oloni bushuka bwa sipilitu bunapu cizemo, kubwahelela, kwoloka, mbunge ya kubandamena, ngozi, bubwa, likulahelo, 23 kuwa mbunge na kukwata mbunge. Kukwesi lishiko libindika byuma bya cifweci. 24 Co baje banakundama kuli Kristu Yesu, banapameya situ yabo ha citi hamolika na bizango byayo na mashungu ayo.

25 Nga tuli na kuyoya na sipilitu, co tutwaleleleniho lalo kwenda mwamubwa na sipilitu. 26 Keti tupwe tu baka-kulijundula na kushongangeya kulihyana umo na mukwabo, na kulizibila cipululu.

6 Bandolome, nameme nga munu ali na kuya mu ngila ya kuhenga simbu kanda azibuke, yeni munakolo ku sipilitu mwololeni mu kuwa mbunge. Oloni umo na umo weni anyanyame kutewa nendi akobela mu ceseko. 2 Twaleleleniho kulyambatesa bitele bya kulema bya umo na mukwabo, omwo mulinga ngoco mushulisilila lishiko lya Kristu. 3 Nga munu asinganyeka ngwendi napu wa seho, okuni wangoco ali na kulikwisa ikeye babenya. 4 Oloni munu na munu elule bilinga byendi babenya, co awana cuma cimuzibisa kubwaha ikeye babenya keti mu kulyesekesa ku munu weka. 5 Munu na munu alyambatela citele cendi babenya.

6 Co lalo woshe ibali na kulongesa lijwi,* alipangele byuma byoshe byabibwa na uje ali na kumwana bilongesa bya cifweci.

7 Keti bamyungumune: Kucitaba kukwisa Njambi. Mwafwa byoshe byakuna munu, bikebyo lalo byateja. 8 Mwafwa woshe akuna na biyongola bya situ yendi, ateja kubola kuje kutunda ku situ yendi, oloni uje akuna na biyongola bya sipilitu, ateja kuyoya kwa myaka yoshe kuje kutunda ku sipilitu. 9 Ngeci, keti tujuke kulinga byuma byabibwa, mwafwa nga kutujuka* tukateja ha simbu inapande. 10 Ngeci, omwo tucili na simbu,* tupangeni bipangi byabibwa ku banu boshe, maneneni ku babushoko bwetu mu kukulahela.

11 Taleni bukama bwa bisona binjinamisonekela na liboko lyange.

12 Boshe baje bali na kushaka kuzibisa banu kubwaha mu situ,* bakebo bali na kumisindiya kuya ku mukanda. Bali na kulinga ngoco mwafwa ya kutewa kubayandesela ha citi ca kuyandesela* ca Kristu. 13 Mwafwa nameme baje bali na kuya ku mukanda kubesi na kunyunga Lishiko, oloni bashaka ngwabo yeni muye ku mukanda mangana balishashele ha situ yeni. 14 Oloni yange kunjilishashela ha cuma ceka, kubanga lika ha citi ca kuyandesela* ca Mwata wetu Yesu Kristu, uje kwitila muli ikeye kaye banakatsii* mu kumona kwange, co nange bananjitsii mu kumona kwa kaye. 15 Mwafwa kuya ku mukanda nambe kujeneka kuya ku mukanda keti kukekwo kwa seho, oloni cuma caciha canatanga Njambi cikeco ca seho. 16 Kuli baje bali na kwenda mwamubwa kwesekesa neci cinangulo, kwoloka na kutetela bikale nabo, eyo, bikale na Isalele ya Njambi.

17 Kutunda hano, kunjishaka munu anjipindisa mwafwa ha mubila wange hali bizibukiso bimwesa ngwabyo nji ndungo ya Yesu.

18 Bandolome, ngozi yakama ya Mwata Yesu Kristu ikale neni mwafwa ya bimbunge byeni byabibwa. Ameni.