KULI BAKA-EFESO

1 Yange Paulu, kapositolo ka Kristu Yesu kwitila mu cizango ca Njambi. Njili na kusonekela bakujela bali mu Efeso baje banapu ba kulongwa mu kulikwatasana na Kristu Yesu ngwange:

2 Ngozi yakama na kwoloka bya kutunda kuli Njambi Tate yetu na Mwata Yesu Kristu bikale neni.

3 Bashangazale Njambi, Ishe ya Mwata wetu Yesu Kristu, mwafwa natubezikisa na bibezikiso byoshe bya ku sipilitu mu myela ya mwilu mu kulikwatasana na Kristu 4 mwatwangwile ngwendi tulikwatasane nendi* simbu kanda kaye kakaleko, mangana tumwese cizemo na kupwa ba kujela na kujeneka cuma ca kutupayela ku mesho endi. 5 Mwafwa watwangwile cimweja mangana atupwise bana bendi kwitila muli Yesu Kristu, kwesekesa nomu mwashakela na kwesekesa na cizango cendi, 6 mangana bamushangazale mwafwa ya ngozi yendi yakama yanatumwesa kwitila muli uje yazema. 7 Co kwitila muli ikeye, banatupatula na ndando ya kupatula kwitila mu maninga endi, eyo, banatukonekela byuma bitwabulumuna mwafwa ya bufuko bwa ngozi yendi yakama.

8 Nalingisa ei ngozi yakama yame manene kuli yetu mu mana oshe na mu kuzibisisa kwoshe 9 omwo natujombolwela lihungu lya kujela lya cizango cendi. Mukushaka kwendi wayongwele ngwendi 10 kukale kutwamenena ha simbu ibiketa kumamaneselelo bisimbu bibanangula, mangana akungulwile byuma byoshe hamo muli Kristu, byuma bya mwilu na byuma bya hasi. Eyo, muli ikeye 11 uje itunalikwatasana nendi, co lalo banatwangula kukaswana hamo nendi ha kupwa baje babangwilile cimweja kwesekesa na biyongola bya uje akalingi byuma byoshe ngwe mwakangwila kulinga byuma kwesekesa na cizango cendi, 12 mangana bamushangazale na kumwana bumpau kwitila muli yetu twalibangele kukala na lilabelelo muli Kristu. 13 Oloni neni lalo mwakele na lilabelelo muli ikeye mumwazibile lijwi lya busunga lije linapu muzimbu waubwa wa kwoboka kweni. Mumwapwile baka-kutaba bamyakele ciganto ca sipilitu ya kujela ije ibakulahesele kwitila muli ikeye, 14 ije inapu cishimbikiya cibanatwanena cimweja ca buswana bwetu, mangana bufuko bwa Njambi bupatuke kwitila mu ndando ya kupatula, mangana bamwane bumpau na kumushangazala.

15 Mukemwo nange lalo kushwa bene hanjazibilile bya likulahelo limuli nalyo muli Mwata Yesu na cizemo cimuli na kumwesa bakujela boshe, 16 kunjalikelele kukandelela Njambi mwafwa yeni. Njinatwalelelaho kumyaka mu malombelo ange, 17 ngwange Njambi ya Mwata wetu Yesu Kristu, Tate wa bumpau amyane sipilitu ya mana nei ya kujombolola omwo mukala na mangana a busunga a kumuzibuka. 18 Natonesa mesho a bimbunge byeni mangana muzibuke lilabelelo lyamisanenene, muzibuke bumpau bwa bufuko bwanatulika kupwa buswana bwa bakujela, 19 na kuzibuka bukama bwa nzili yendi yanamwesa yetu baka-kutaba, 20 ije yanamwesa kwitila mu bipangi byanapanga mu nzili yendi ije yamwesele hali Kristu mwamusangwile ku batsi na kumwaka ku liboko lyendi lya cilyo mu myela ya mwilu. 21 Namujundula manene kutubakana bifulumende byoshe na moko yoshe na nzili yoshe na bumwata bwoshe na lizina lyoshe libanaluku, keti lika mu katumameno ka myaka ino,* oloni na muli kaje kali na kwija. 22 Wakele lalo byuma byoshe mwisi ya mendi endi na kumupwisa mutwe wa byuma byoshe mu cikungulukilo, 23 cije cinapu mubila wendi, cije cinashulu ikeye, co ikeye muka-kushulisa byuma byoshe.

2 Kutundaho lalo, Njambi wamiyoyesele nameme mwapwile ngwe batsi mwafwa ya kubulumuna kweni na bubi bweni. 2 Omu mukemwo mumwakele na kwenda kwesekesa na katumameno* ka mu kaye kano, ngwe muje mwashaka muka-kuyula uje ali na moko ya kwendesa ei mpunzi, kulumbununa sipilitu ije ili na kupanga mu bana ba kujeneka kwononoka. 3 Cili bene, tubaboshe simbu imo twayoyele kwesekesa na mashungu a situ yetu mukati kabo. Twalingile cizango ca situ yetu na bisinganyeka byetu, co twapwile tu bana ba butenu ngwe mwa banu boshe. 4 Oloni ha kuwana ngwe Njambi washula na kutetela mwafwa ya cizemo cendi cakama cije catumwesele, 5 watuyoyesele hamo na Kristu nameme twapwile ngwe batsi mwafwa ya kubulumuna kwetu. Oloni Njambi namyobola kwitila mu ngozi yendi yakama. 6 Co lalo, watusangwile hamo nendi na kutwaka hamo nendi mu myela ya mwilu mu kulikwatasana na Kristu Yesu, 7 mangana mu tutumameno twa myaka* tuje tuli na kwija kulutwe Njambi ase kumwesa bufuko bwendi bwabwingi manene bwa ngozi yendi yakama mwafwa ya bubwa bwendi kuli yetu mu kulikwatasana na Kristu Yesu.

8 Kwitila omu mu ngozi yendi yakama, banamyobola mwafwa ya likulahelo, co eci kucalingiwile mwafwa ya kulifwita kweni, oloni bwana bwa Njambi lika. 9 Kucapwile ngoco mwafwa ya bipangi byabibwa embwe, mangana keti kukale umo awana hakulishashela. 10 Tunapu tu bipangi bya maboko a Njambi, co watutangele mu kulikwatasana na Kristu Yesu mangana tupange bipangi byabibwa bije byatuyongwelele cimweja Njambi ngwendi tubipange.

11 Ngeci, anukeni ngweni simbu imo yeni banu ba ku mafuti ba kusemuka ku situ bamisanene ngwabo “bakujeneka kuya ku mukanda” kuli “baje banai ku mukanda” wa ku situ ubakalingi na maboko a banu. 12 Ha simbu ije kumwakele na Kristu, mwangunukile ku muyati wa Isalele, mwapwile mu bangenzi ku bikumiiyo bya cikulaheso, kumwakele na lilabelelo, co kumwakele na Njambi mu kaye. 13 Oloni hano mu kulikwatasana na Kristu Yesu, yeni mwakele kulako munaija hayehi mwafwa ya maninga a Kristu. 14 Mwafwa ikeye kwoloka kwetu, ikeye wakumbasanene bibunga bibali na kubipwisa cibunga cimolika, na kubujula cibumbe cije cakele mukati kabo, cije cabangunwine. 15 Kwitila mu situ yendi wamanesele cizindo, kulumbununa Lishiko lya Mosesa lije lili na mashiko, mangana alingise ebi bibunga bibali binalikwatasana nendi bipwe munu umolika wamuha na kunena kwoloka. 16 Co welwisile ebi bibunga bibali kuli Njambi mu mubila umo kwitila mu citi ca kuyandesela,* mwafwa watsiile eci cizindo kwitila mu mubila wendi. 17 Co lalo wezile na kwambulula muzimbu waubwa wa kwoloka kuli yeni mwakele kulako na kuli baje bakele hayehi. 18 Mwafwa kwitila muli ikeye, yetu bibunga bibali twazituka kushwena kuli Tate kwitila mu sipilitu imolika.

19 Ngeci, keti mu bangenzi lalo, nambe baka-kwija, oloni mu bakwetu bandambo bakujela na banu bakunjibo ya Njambi, 20 co banamitungu ha lubula lwa tupositolo na tupolofweto, co Kristu Yesu ikeye limanya lya mu mbango lya lubula. 21 Mu kulikwatasana nendi, mutungo woshe unalikwatasana na kulinungakana hamolika, co uli na kukola na kupwa tempele ya kujela ya Yehova. 22 Mu kulikwatasana nendi neni lalo, bali na kumitunga hamolika mangana mupwe mwela wakala Njambi kwitila mu sipilitu.

3 Mwafwa yeci cuma, yange Paulu lipanditi lya Kristu Yesu mwafwa yeni, yeni banu ba ku mafuti—. 2 Cili bene munazibi bya cipangi ca bungamba ca ngozi yakama ya Njambi canjanene mwafwa yeni, 3 ngwabo banjijombolwelele lihungu lya kujela ngwe munjinabanga kumisonekela mu bwihi. 4 Ngeci, nga mutanda ebi byuma mwasa kunanguka munjizibisisila lihungu lya kujela lya Kristu. 5 Mu bisemwa bya kunima, eli lihungu kubalijombolwele ku bana ba banu ngwe mubanalijombolwela ku tupositolo na tupolofweto bendi ba kujela kwitila mu sipilitu, 6 lije lya kwendeka ngwabo banu ba ku mafuti nabo bapwe baswana na kupwa bilyo bya mubila umolika netu na kukala na mutamba mu cikulaheso hamolika netu mu kulikwatasana na Kristu Yesu na mu muzimbu waubwa. 7 Njapwile muka-kupanga weli lihungu lya kujela kwesekesa na bwana bwa ngozi yakama ya Njambi bubanjanene kwitila mu bipangi bya nzili yendi.

8 Yange wakwisi kuli wamundondo ku bakujela boshe, banjimwesele ngozi yakama mangana njambulule muzimbu waubwa kuli baka-mafuti na bufuko bwa Kristu buje kubwesi naha habwalenga, 9 co lalo mangana njase kulingisa munu woshe amone mubali na kwendeselamo lihungu lya kujela lije libanashweke ha myaka yaingi muli Njambi uje watangele byuma byoshe. 10 Eci cafwile ngoco mangana ha simbu ino, kwitila mu cikungulukilo, mana a Njambi aje anasholoka mu bingila bya kuliseza-seza bawajombolole ku bifulumende na kuli baje bali na moko ya kuyula mu myela ya mwilu. 11 Eci cinalitombola na biyongola bya myaka yoshe byayongwele mu kulikwatasana na Kristu Yesu Mwata wetu. 12 Kwitila muli ikeye twazituka kwendeka ngacije, co twazituka kushwena kuli Njambi mu kusimpa kwitila mu likulahelo lituli nalyo muli Kristu. 13 Ngeci, njimilomba ngwange keti muzeye mwafwa ya tuyando twange tunjili na kuyanda omwo yeni, mwafwa otu tuyando tuminenela bumpau.

14 Ngeci, njitsikama ha mabuli kuli Tate, 15 kuje kwatunda lizina lya naanga yoshe ya mwilu nei ya hasi. 16 Njilomba ngwange Njambi akanyamese munu weni wa mukati kwitila mu bumpau bwendi bwakama na nzili ya sipilitu yendi. 17 Njilomba lalo ngwange kwitila mu likulahelo lyeni, Kristu ase kukala mu bimbunge byeni na cizemo. Shimbikeni mizi na kuzama ha lubula 18 mangana yeni hamolika na bakujela boshe mwase kuzibisisa byuma mu kushula, mu bwihi, mu bulaha, mu bulaha bwa kuya mwilu na mu kuloba, 19 na kuzibuka cizemo ca Kristu cije citubakana mangana oshe, mangana mwase kushula na byuma byoshe byabibwa bije byali na kwana Njambi.

20 Co kuli Njambi uje asa kulinga byuma byakama manene kutubakana na bije bitulomba nambe bitusinganyeka, kwesekesa na nzili yendi ije ili na kupanga muli yetu, 21 kuli ikeye kukale bumpau kwitila mu cikungulukilo na kwitila muli Kristu Yesu ku bisemwa byoshe myaka yoshe. Ameni.

4 Ngeci, yange lipanditi mwafwa ya Mwata, njimilomba ngwange mwende mwamubwa kwesekesa na kusana kubamisanene, 2 na kulikehesa kwoshe,* na kuwa mbunge, na mbunge ya kubandamena, na kwecelela tupenga twa bakweni mu cizemo 3 oku mulinga mwoshe mumwasela kunyungilila likwatasano lya sipilitu mu kwoloka kuje kunamikutila hamo. 4 Kuli mubila umolika na sipilitu imolika, ngwe mubamisanenene ku lilabelelo limolika lije libanamisanena. 5 Kuli Mwata umolika na likulahelo limolika na cimbwitiko cimolika. 6 Kuli Njambi umolika, Ishe ya boshe, uje ali helu ya byoshe, uje akapangesa boshe na kupanga muli boshe.

7 Co umo na umo wetu watambwile ngozi yakama ya kutunda kuli Njambi, co Kristu ikeye wasetekelele umo na umo wetu obu bwana. 8 Mwafwa Bisoneka ngwabyo: “Mwakandukile, waile na bafunge. Wanene banalume kupwa bwana.” 9 Co lijwi lya kwendeka ngwalyo “mwakandukile” lilumbununa bika? Lilumbununa ngwalyo wasikumukile lalo mu mitambela ya mwisi, kulumbununa hasi. 10 Uje bene wasikumukile ikeye lalo wakandukile na kutubakana melu oshe mangana alingise byuma byoshe bipwe bya kushula.

11 Co wanene bamo kupwa tupositolo, bamo tupolofweto, bamo baka-kwambulula,* bamo tunyungi na balongesi, 12 mangana base kwolola* bakujela na kupanga bipangi bya cikungulukilo na kutunga mubila wa Kristu, 13 kweta noho hatukalikwatasanena mu likulahelo tubaboshe, na mu mangana a busunga a kuzibuka Muna Njambi na kupwa banu ba kukola, na kweta ha seteko ya citalamo ca kushula ceteleho Kristu. 14 Ngeci, keti tupwe lalo banike, na kungumuka ngwe baje bongumuka na mankimba, na kupekumukila noku-noku na lihunzi lyoshe lya bilongesa kwitila mu makuli a banu na linyanyamena lije lyungumuna. 15 Oloni omwo twendeka busunga, tukoleni mu cizemo mu byuma byoshe muli Kristu uje napu mutwe. 16 Mwafwa kuli ikeye kukekwo kubananungila bilyo bya mubila byoshe, co uli na kupangela hamo kwitila mu linunga na linunga lije lili na kwana bije binapande. Nga cilyo na cilyo cipanga mwamubwa, co oku kulingisa mubila ukole omwo ulitunga ukewo babenya mu cizemo.

17 Ngeci, ebi bikebyo binjendeka na kwana bukaleho muli Mwata ngwange keti mutwaleleleho lalo kwenda ngwe baka-mafuti mu bisinganyeka byabo byangoco. 18 Bisinganyeka byabo bili mu lisusulungu, co banangunuka ku kuyoya kuje kwakundama kuli Njambi mwafwa bali kunzimba, co lalo mwafwa ya kushilitila* kwa bimbunge byabo. 19 Ha kuwana ngwe shwamwa inabahu, banalyecelela bakebo babenya mu kulinga byuma byabibi kwa kujeneka shwamwa* mangana balinge na nuna miyati yoshe ya mazilo.

20 Oloni kumwalilongesele ngweni Kristu wafwa ngacije. 21 Cili bene mwazibile byendi, co bamilongesele kwitila muli ikeye, ngecilika omwo busunga buli muli Yesu. 22 Bamilongesele ngwabo mushulule bunu bweni bwa laja buje bwendelela na futisi yeni ya kunima buje lalo buli na kubola kwesekesa na mashungu abwo aje ongumuna. 23 Co munapande kutwalelelaho kupwa babaha mu bisinganyeka byeni bije bili na kumitwamenena,* 24 na kuzala bunu bwabuha buje bubatangele kwesekesa na cizango ca Njambi mu kulitombola na kusungama kwa busunga na kulongwa cije kucesi kutenguluka.

25 Ngeci, ha kuwana ngwe munombila kuti makuli, umo na umo weni endeke busunga kuli umo na mukwabo mwafwa tu bilyo bya mubila umolika. 26 Nga mulubala, keti mulinge bubi, keti mutokese litangwa oku mucinalubala. 27 Keti musezele Liyabolo bukobelelo. 28 Uje akebi keti ebe lalo, oloni apange na nzili, apange bipangi byabibwa na maboko endi mangana ase kuwana bya kulipangela na uje ali mu bujene. 29 Mu kanwa keni keti mutunde lijwi lya kubola, oloni mutunde lika byabibwa bije bitunga kwesekesa na bujene buliko, mangana bikwase baje bali na kutolilila. 30 Co lalo keti muzibise busiwa sipilitu ya kujela ya Njambi ije ibamyakele kupwa ciganto mangana bakamipatule na ndando ya kupatula ha litangwa lya kwobola.

31 Umbileni kuti byuma byoshe byabibi bya kulula, butenu, kulubala, kuyalumuka, na majwi amabi na byuma byoshe byabibi. 32 Oloni lizibileni ngozi umo na mukwabo, lizibileni mema ku mbunge, likonekeleni umo na mukwabo na mbunge imo ngwe Njambi nendi mwamikonekelele na mbunge imo kwitila muli Kristu.

5 Ngeci, tembwinineni Njambi ha kupwa bana baje bazema, 2 co twaleleleniho kwenda mu cizemo ngwe Kristu mwatuzemene* na kulyana ikeye babenya mwafwa yetu* kupwa bwana na mulambu, ngwe lwengo lwalubwa kuli Njambi.

3 Bupangala* na mazilo oshe, nambe nuna keti mubyendeke na kubyendeka mukati keni, ngwe muje mukunapande kuli bakujela, 4 nambe bilinga bya shwamwa, nambe byendeka bya bulema, nambe sanda yaibi, ebi byuma kubyapandele, oloni kandeleleni Njambi. 5 Muzibuka eci cuma, muzibuka mwamubwa yeni babenya ngweni kukwesi muka-bupangala,* nambe muka-mazilo, nambe muka-nuna, kulumbununa muka-kulemesa tumponya, uje akakala na buswana mu Bumwene bwa Kristu na Njambi.

6 Keti kukale munu amikwisa na majwi a kujeneka seho, mwafwa butenu bwa Njambi buli na kwija ha bana ba kujeneka kwononoka, mwafwa yebi byuma. 7 Ngeci, keti mulikwatasane nabo. 8 Mwafwa mwapwile lisusulungu, oloni hano munapwoni ceke, mu kulikwatasana na Mwata. Twaleleleniho kwenda ngwe bana ba ceke, 9 mwafwa bushuka bwa ceke buli na miyati yoshe ya bubwa na kusungama na busunga. 10 Twaleleleniho kunanguka byuma byatabesa Mwata. 11 Co likeleni kulikwatasana nabo mu bipangi bya kujeneka kwima bushuka, bya lisusulungu, oloni bijombololeni muje bene mubinafu. 12 Mwafwa byuma bibakalingi ku bushweke binapu bya shwamwa nambe kubyendeka. 13 Co byuma byoshe bije bili na kusholoka hashandangala, ceke cili na kubisholola, mwafwa byuma byoshe bije bibanasholola binapu ceke. 14 Mukemwo kwakala endekesi ya kwendeka ngwayo: “Tona, obe muka-kulala, sanguka ku batsi, co Kristu akutwila ceke.”

15 Ngeci nyanyameni mumwendela mangana keti mwende ngwe banu ba kujeneka mana, oloni mwende ngwe banu bali na mana. 16 Pangeseni mwamubwa simbu yeni,* mwafwa ano matangwa anapu amabi. 17 Ngeci, keti mupwe ba kujeneka kuzibisisa, oloni twaleleleniho kunanguka cizango ca Yehova. 18 Co lalo keti mupende binyu mwafwa bikalingisa munu alikobelese manene mu bilinga byabibi,* oloni twaleleleniho kushula na sipilitu ya kujela. 19 Lyendekeseni umo na mukwabo* na bisamu, na kushangazala Njambi, na myaso ya ku sipilitu, na kwimba myaso ya kushangazala Yehova mu bimbunge byeni. 20 Simbu yoshe kandeleleni Njambi yetu na Tate yetu mwafwa ya byuma byoshe mu lizina lya Mwata wetu Yesu Kristu.

21 Lyakeni kwisi ya umo na mukwabo mwafwa ya kuzibila lyoba Kristu. 22 Banakazi balyake kwisi ya banalume babo ngwe mubakalingi kuli Mwata, 23 mwafwa munalume napu mutwe wa munakazi wendi ngwe Kristu mwanapu mutwe wa cikungulukilo ha kupwa ikeye mwobole wou mubila. 24 Ngecilika mwa cikungulukilo mucikalyaka kwisi ya Kristu, banakazi nabo banapande kulyaka kwisi ya banalume babo mu byuma byoshe. 25 Eni banalume, twaleleleniho kuzema banakazi beni ngwe Kristu nendi mwazemene cikungulukilo na kulyana mwafwa yaco, 26 mangana acijelese na kucitanesa na mema kwitila mu lijwi, 27 mangana cikungulukilo cipwe cacibwa mu mesho endi, ca kujeneka bitoma-bitoma, nambe minkonya, nambe byuma bya cifweci, oloni cipwe ca kujela, ca kujeneka kapenga.

28 Mu ngila imolika, banalume banapande kuzema banakazi babo, ngwe mubazemena mibila yabo. Munalume uje wazema munakazi wendi, walizema ikeye babenya. 29 Mwafwa kukwesi munu wazinda mubila* wendi, oloni aulisa na kuwaka mbunge, ngwe Kristu mwakalingila cikungulukilo, 30 mwafwa tu bilyo bya mubila wendi. 31 “Ngeci bene, munalume akaseza ishe na ina na kulipandakana* na munakazi wendi, co aba babali bakapwa situ imolika.” 32 Eli lihungu lya kujela linapu lyakama. Co hano njili na kwendeka bya Kristu na cikungulukilo. 33 Nameme ngoco, umo na umo weni napande kuzema munakazi wendi ngwe mwalizema ikeye babenya, co munakazi napande kusingimika manene munalume wendi.

6 Eni bana, ononokeni bisemi beni mu kulikwatasana na Mwata mwafwa eci cinapu ca kusungama ku mesho a Njambi. 2 “Singimika isho na noko,” eli likelyo lishiko lyakulibanga lije lili na cikulaheso ca kwendeka ngwaco: 3 “Mangana byuma bikwendele mwamubwa, co lalo wase kuyoya simbu yailaha hano hasi.” 4 Co neni baishe ya bana, keti mulubalese bana beni, oloni twaleleleniho kubalongesa na kubanangula* na binangulo bya Yehova omwo mubalela.

5 Neni bindungo, ononokeni bashukulu beni ba banu.* Lingeni ngoco na lyoba na kujaja kwa kutundilila kwisi ya bimbunge byeni ngwe mumukalingi kuli Kristu, 6 keti lika ha simbu ibanamitalelela, mangana muzibise lika banu kubwaha, oloni ononokeni ha kupwa bindungo ba Kristu baje bali na kulinga cizango ca Njambi na myonyo* yabo yoshe. 7 Pangeni na biyongola byabibwa ngwe baje bapangela Yehova keti banu, 8 mwafwa muzibuka ngweni byuma byoshe byabibwa byalinga munu akabitambwila cikandelela kuli Yehova, apwe ndungo nambe wa kupatuka. 9 Co lalo neni bashukulu, twaleleleniho kulinga mwamubwa bindungo beni, keti mubajujwise, mwafwa muzibuka ngweni Shukulu yeni uje lalo napu Shukulu yabo, ali mwilu, co kuli ikeye kukwakele kangu.

10 Mukumanesa, twaleleleniho kuwana nzili muli Mwata na mu kukanyama kwa nzili yendi. 11 Zaleni bizalo byoshe bya nzita bya kutunda kuli Njambi mangana mwase kulwisa bilinga* bya linyanyamena bya Liyabolo, 12 mwafwa kutwesi na kulwa na maninga na situ, oloni tuli na kulwa na bifulumende, na baje bali na moko ya kuyula, na baka-kuyula kaye kano kali mu lisusulungu, na basipilitu bababi ba mu myela ya mwilu. 13 Ngeci, ambateni bizalo byoshe bya nzita bya kutunda kuli Njambi mangana mwase kulwa ha litangwa lyalibi, co mumumanesa byuma byoshe, mwimane mbe.

14 Ngeci, imaneni mbe oku munakutu mwiba wa busunga mu mbunda yeni na kuzala cikinga-nulo ca bilinga bya kusungama, 15 na kuzala masanda ku mendi eni mu kulibwahesela kuya na kwambulula muzimbu waubwa wa kwoloka. 16 Co kubwezelela kuli ebi byuma, ambateni ntelo yakama ya likulahelo ije imikwasa muzime mikili yoshe ya tuhya ya uje wamubi. 17 Co lalo tambuleni tepa ya kwoboka na moko ya mukwale ya sipilitu, kulumbununa lijwi lya Njambi, 18 oku mutwalelelaho kulombela simbu yoshe mu sipilitu kwitila mu miyati yoshe ya malombelo na mu kulambelela. 19 Nange njilombeleleni ngweni banjane majwi a kwendeka omwo njashama mu kanwa kange, mangana njase kwendeka mu kusimpa omwo njambulula lihungu lya kujela lya muzimbu waubwa 20 uje unjinapwila muluwa oku njili mu malyenge, co lalo mangana njase kuwendeka mu kusimpa ngwe muje munjinapande kuwendekela.

21 Co nga mushaka kuzibuka byange nebi binjili na kulinga, Tikikasi ndolome itwazema, muka-kupanga wa kulongwa muli Mwata, akumileka byuma byoshe. 22 Ebi bikebyo binjili na kumutumina kuli yeni mangana muzibuke mutunendukila, co lalo akumizembeleke.

23 Kwoloka na cizemo cije cendelela na likulahelo bije bitunda kuli Njambi Tate yetu na kuli Mwata Yesu Kristu bikale na bandolome. 24 Ngozi yakama ikale na boshe baje bali na cizemo kuli Mwata wetu Yesu Kristu cije kucesi kuhwa.