KULI BAKA-FILIPI

1 Yange Paulu, njili hamo na Timothi, tu bindungo ba Kristu Yesu. Njili na kusonekela bakujela boshe baje banalikwatasana na Kristu Yesu baje bali mu Filipi hamolika na tunyungi na bangamba ba cikungulukilo ngwange:

2 Ngozi yakama na kwoloka bya kutunda kuli Njambi Tate yetu na kuli Mwata Yesu Kristu bikale neni.

3 Njikakandelela Njambi yange simbu yoshe injikamyanuka 4 mu kulambelela kwange kunjikamilambelelako mubaboshe. Njikalambelela Njambi mu kubwahelela 5 mwafwa ya bipangi bimunapanga mu kutwala lutwe muzimbu waubwa kushwa bene ha litangwa lyakulibanga kweta na lelo lino. 6 Mwafwa njakulahela bene ngwange uje washangumukile cipangi cacibwa mukati keni akacetesa na kumamaneselelo, kutwala na ha litangwa lya Kristu Yesu. 7 Kunapande kusinganyeka ebi byuma hali yeni mubaboshe mwafwa muli mu mbunge yange, yeni muli na kutambwila hamo nange ngozi yakama mu malyenge na mu kwimanena muzimbu waubwa na kuuzameka na mashiko.

8 Mwafwa Njambi napu mukaleho wange, azibuka munjinashungwiiya manene kumimona mubaboshe na cizemo ngwe cije cali naco Kristu. 9 Co eci cikeco cinjinatwalelelaho kulomba ngwange cizemo ceni citwaleleleho kwamenako hamolika na mangana a busunga na kunanguka mwamubwa, 10 mangana mwase kunanguka byuma bya seho manene, mangana keti mukale na kapenga na kujeneka kutanwisa bakweni kweta na ha litangwa lya Kristu, 11 co lalo mangana mushule na bushuka bwa kusungama buje bwija kwitila muli Yesu Kristu, mangana bane Njambi bumpau na kumushangazala.

12 Bandolome, njishaka muzibuke ngweni byuma binalingiwa kuli yange binalingisa muzimbu waubwa uye lutwe. 13 Ngeci, kunjikuta mu malyenge mwafwa ya Kristu banacizibuka kuli baka-kunyunga mwene boshe na ku banu boshe. 14 Co bwingi bwa aba bandolome betu muli Mwata banakanyama mwafwa ya malyenge ange, co hano banasimpioni manene kwendeka lijwi lya Njambi kwa kujeneka lyoba.

15 Cili bene, bamo bali na kwambulula Kristu mwafwa ya cipululu na kulihyana, nameme ngoco bamo bali na kulinga ngoco na biyongola byabibwa. 16 Oloni aba banjinendeka kumamaneselelo bali na kwambulula Kristu mwafwa ya cizemo, mwafwa bazibuka ngwabo bananjangula mangana njimanene muzimbu waubwa, 17 oloni aba banjinabanga kwendeka bali na kulinga ngoco na bimata, keti na biyongola byabibwa, mwafwa bali na kushaka kunjinenela bukalu muno mu malyenge munjili. 18 Co byuma muka binatundumo? Kristu bali na kumwambulula ipwe mu kulikwisa nambe mu busunga, co njili na kubwahelela ha cuma eci. Cili bene njitwalelelaho kubwahelela 19 mwafwa njizibuka ngwange eci cinena kwoboka kwange kwitila mu kulambelela kweni, na mu bukwasi bwa sipilitu ya Yesu Kristu. 20 Eci cinalitombola na byuma binjili na kushungwiya manene na lilabelelo linjili nalyo, ngwange kunjikazibi shwamwa mu ngila yoshe-yoshe, oloni njakulahela ngwange njitwalelelaho kwendeka mu kuzituka mangana njamese Kristu ha simbu ino ngwe munjamwamesele kunima. Njimwamesa kwitila mu kuyoya* kwange nambe mu kutsa kwange.

21 Mwafwa yange nga njiyoya, njiyoyela Kristu, nga njitsa, co njabezika. 22 Co nga njitwalelelaho kuyoya mu situ, co obu bunapu bushuka bwa bipangi byange. Oloni binjasa kwangula kunjibyendeka. 23 Njili hakati na kati ka byuma ebi bibali mwafwa njinashungwiya kupatuka na kukakala na Kristu, cuma cije cinapu cacibwa manene. 24 Nameme ngoco, kunapu kwakubwa kuli yeni nga njikala mu situ. 25 Co ha kuwana ngwe njakulahela cuma eci, njizibuka ngwange njisala neni na kutwalelelaho kukala neni mubaboshe mangana mukole, na kubwahelela mwafwa ya likulahelo lyeni, 26 mangana kulisamba kweni kupwe kwakama manene muli Kristu Yesu mwafwa yange, munjikala hamo neni lalo.

27 Oloni yoyeni lika mu kulitombola na muzimbu waubwa wa Yesu Kristu mangana nambe njije na kumimona, nambe njijeneke kwija na kumimona njase kuziba byeni na kuziba ngwabo munemana mbe mu sipilitu imolika na mu mwonyo umolika* oku muli na kufwitanganena hamo likulahelo lya muzimbu waubwa 28 na kujeneka kuzibila lyoba baka-kumilwisa. Eci bene cuma cinapu bukaleho bwa kunyonga kwabo, oloni kuli yeni cinapu bukaleho bwa kwoboka kweni, co citunda kuli Njambi. 29 Mwafwa munabezika kukulahela Kristu na kumuyandela. 30 Mwafwa muli na kuliwana na bukalu bwa kulifwa na buje bumwanjimwene njiliwana nabwo buje bumunazibi ngweni njicili na kuliwana nabwo.

2 Simbu yoshe imulishongangeya muli Kristu, simbu yoshe imulizembeleka mu cizemo, simbu yoshe imulikwatasana ku sipilitu,* simbu yoshe imumwesa cizemo na mema ku mbunge, 2 njilingiseni njibwahelele manene omwo mumwesa ngweni muli na biyongola bimolika na cizemo cimolika, na kulikwatasana manene na kukala na bisinganyeka bimolika. 3 Keti mulinge cuma na bimata nambe na kulijundula, oloni pweni ba kulikehesa* na kumona bakweni ngweni banamitubakana, 4 oku mwaka mbunge na ku byuma bibatonda bakweni, keti ku byuma bimutonda yeni lika.

5 Kaleni na bisinganyeka byakele nabyo Kristu Yesu. 6 Nameme wakele mu cifwa ca Njambi, oloni kasinganyekele nambe bya kulipwisa hamo na Njambi. 7 Kalingile ngoco embwe, oloni wasezele byuma byoshe* na kupwa ngwe ndungo, co wakupwile munu.* 8 Co lalo mwakupwile munu,* walikehesele, co wononokele kweta na ku kutsa, eyo kutsila ha citi ca kuyandesela.* 9 Mwafwa yeci bene cuma, Njambi wamujundwile na kumwaka ha mwela wa helu manene, co mu ngozi yendi wamwanene lizina lije linatubakana mazina oshe, 10 mangana mu lizina lya Yesu mabuli oshe atsikame, mabuli a baje bali mwilu na baje bali hasi na baje bali kwisi ya libu, 11 co ndaka yoshe ilitabele ha kujela ngwayo Yesu Kristu ikeye Mwata mangana bumpau buye kuli Njambi Tate.

12 Ngeci eni banjazema, ngwe mumunononoka simbu yoshe ya kunima, keti lika ha simbu injakele neni, oloni maneneni ha simbu ino kunjesi neni, twaleleleniho kupangela kwoboka kweni na lyoba na kujaja. 13 Mwafwa Njambi ikeye amikanyamesa kwesekesa na kushaka kwendi, amyana lishungu na nzili ya kulinga byuma. 14 Twaleleleniho kulinga byuma byoshe kwa kujeneka kuyayabala, na bimata, 15 mangana mujeneke cuma ca kumipayela na kujeneka mulonga, mupwe bana ba Njambi ba kujeneka citoma mukati keci cisemwa ca kupengapenga na kuka, muje mumuli na kutwa ceke ngwe manongo mu kaye, 16 oku mutwalelelaho kukwata na nzili lijwi lya Njambi lije lyana kuyoya. Co njikawana cuma cikanjizibisa kubwaha ha litangwa lya Kristu ha kuzibuka ngwange kushatuka kwange kukwaile mwangoco, co lalo kuundangana kwange kukwaile mwangoco. 17 Nameme bali na kunjitila ngwe bwana bwa byakunwa ha mulambu wa cipangi ca kujela uje unamilingisa mukale na likulahelo, oloni njinabwahelela, co njili na kubwahelela hamo neni mubaboshe. 18 Mu ngila imolika, neni nawa joleleni na kubwahelela hamo nange.

19 Nga cinapu cizango ca Mwata Yesu, ololo njimitumina Timothi mangana njakukanyame munjakutambula muzimbu weni. 20 Mwafwa kunjesi na munu weka injasa kutuma wa kufwa ngeci mwendi uje akumyaka manene mbunge. 21 Mwafwa aba bakwabo boshe bali na kutonda lika byabo, keti bya Yesu Kristu. 22 Oloni muzibuka mwanja waubwa wamwesele Timothi, ngweni ngwe mwa mwana na ishe, walyanene kupanga hamo nange mu kutwala lutwe muzimbu waubwa. 23 Ngeci, ikeye injinayongola kutuma, njicimone lika mubinjendelamo byuma. 24 Cili bene, nga cinapu cizango ca Mwata, nange bene ololo njija.

25 Oloni hano njinamono ngwange kunapande kumitumina Epafroditu, ndolome yange, mukwetu mutukapangela, mukwetu liswalale, uje napu katumwa na ngamba yange uje akanjikwasa mu bujene bwange, 26 mwafwa nashungwiya manene kumimona mubaboshe, co nazeye mwafwa mwazibile ngweni wabinjile. 27 Cili bene wabinjile kushaka na kutsa, oloni Njambi wamuzibilile ngozi, co keti ikeye lika yazibilile ngozi, oloni nange bene wanjizibilile ngozi mangana keti njikale mu busiwa kushwa kumo. 28 Ngeci, njili na kumutuma mu bwasi-bwasi mangana mumwakumumona mubwahelele lalo, co nange njitepulule ku bishoti byange. 29 Ngeci mutambuleni mu kubwahelela ngwe mumukatambwila boshe muli Mwata. Banu ba cifweci twaleleleniho kubakwata na maboko abali, 30 mwafwa washakele kutsa mwafwa ya bipangi bya Kristu,* wakele kuyoya* kwendi mu bushonde mangana amimaneneko mu kunjipangela ha kuwana ngwe kumwesi kuno.

3 Mukumanesa, bandolome bange, twaleleleniho kubwahelela muli Mwata. Yange kunjesi na bukalu kumisonekela byuma bya kulifwa, njili na kulinga ngoco mangana njiminyungilile.

2 Nyanyameni na tutali. Nyanyameni na baje babulumuna. Nyanyameni na baje bakundwiya bya kuya ku mukanda.* 3 Baka-kuya ku mukanda ba busunga banapu yetu bene, yetu tuli na kupanga cipangi ca kujela kwitila mu sipilitu ya Njambi na kulishashela muli Kristu Yesu, co kutwesi kukulahela mu situ. 4 Oloni nga kuli umo ali na byuma bya kulishashela mu situ, napu yange.

Nga kuli umo asinganyeka ngwendi ali na byuma bimulingisa akulahele mu situ, yangeni njili na byabingi: 5 Banjitwalele ku mukanda ha litangwa lya bu 8, nji Kaisalele wa ku muyati wa Benjamini, nji Kahebelu wa kusemuka ku Bahebelu, co nga tuya ku lishiko, nji Kafalisi. 6 Kutalesa ku kukala na ntwima, njayandesele cikungulukilo, co kutalesa ku bilinga bya kusungama bije binemana ha lishiko, njamwesele ngwange kunjakele na cuma ca kunjipayela. 7 Nameme ngoco, byuma binjamwene kupwa bya seho kuli yange, njabimono kupwa byangoco* mwafwa ya Kristu. 8 Cakama maneneni, njili na kumona ebi byuma byoshe kupwa byangoco* mwafwa ya mangana a kulitila a kuzibuka Kristu Yesu. Mwafwa yendi, njinombila kuti byuma byoshe, co njili na kubimona ngwe mazilo angoco mangana njiwane Kristu, 9 co lalo bakunjiwane njinalikwatasana nendi, keti mwafwa ya kusungama kwange kuje kutunda mu kukabangeya Lishiko, oloni mwafwa ya kusungama kwange kuje kwija mu kukulahela Kristu, kusungama kwa kutunda kuli Njambi kuje kunemana ha likulahelo. 10 Cilengo cange cinapu ca kumuzibuka na kuzibuka nzili ya kusanguka kwendi na kuyanda ngwe mwayandelele, na kutaba kutsa ngwe mwatsile ikeye, 11 mangana njimone indi njasa kukasanguka ku batsi ha kusanguka cakulibanga.

12 Keti ngwabo njacitambula laja nambe ngwabo bananjipwisa laja wa kulumbunuka, oloni njili na kulifwita mangana njimone ngwange njitambula bene cuma cije canjangwilile Kristu Yesu. 13 Bandolome, kunjesi na kulimona ngwange njatambula laja eci cuma. Oloni cuma cinjili na kulinga eci: Njili na kwibala byuma bya kunima na kwolobela byuma bya kulutwe, 14 Njili na kufwitangana kweta ha cilengo mangana njikatambule cikandelela cananjisanena Njambi mwilu kwitila muli Kristu Yesu. 15 Ngeci, yetu tunakolo ku sipilitu, tusinganyekeni kwesekesa nebi byuma binjinamileke, oloni nga kumusinganyeka mu ngila ei, Njambi amikwasa musinganyekemo. 16 Nameme ngoco, hoshe-hoshe hatunete mu kukola, tutwaleleleniho kwenda mwamubwa omu mu ngila ya kulifwa.

17 Bandolome, mubaboshe njitembwinineni, co kengeni mesho eni hali baje bali na kwenda mu ngila ije inalitombola na mwanja utwamimwesele. 18 Mwafwa kuli babangi—banjakele na kwendeka kushwa kumo, oloni hano njili na kubendeka na misozi—mwafwa bali na kwenda ngwe bitozi ba citi ca kuyandesela* ca Kristu. 19 Mamaneselelo abo anapu kunyonga, co njambi yabo napu mafu abo, co bumpau bwabo bunapu shwamwa yabo, co bali na kusinganyeka lika byuma bya hasi. 20 Oloni yetu tu ba mwilu, co tuli na kubandamena manene mwobole wa kutunda mwilu, Mwata Yesu Kristu, 21 uje akatengulula mibila yetu ya kuzeya na kuipwisa ngwe mubila wendi wa bumpau kwitila mu nzili yendi yakama ije ili na kumulingisa ase kwaka byuma byoshe mwisi yendi.

4 Ngeci, bandolome bange banjazema, banjinashungwiya kumona, yeni kubwahelela kwange na cilongo cange, imaneni mbe muli Mwata ngwe munjinabanga kumileka, eni banjazema.

2 Njishongangeya Yudia na Sintike ngwange bakale na biyongola bimo muli Mwata. 3 Nobe lalo njikulomba, mukwetu wa kulongwa mutukapangela, ngwange utwaleleleho kukwasa aba banakazi. Aba banakazi hamolika na Klementi na bakwetu boshe mutukapangela banalifwiti* kupanga hamo nange mu kwambulula muzimbu waubwa. Aba boshe mazina abo ali mu libulu lya kuyoya.

4 Bwaheleleni simbu yoshe muli Mwata. Njicendekamo lalo ngwange bwaheleleni! 5 Kuzibisisa kweni kusholoke ku banu boshe. Mwata ali muyehi. 6 Keti mulishoshomwene ha cuma nambe cimo, oloni mu byuma byoshe, lombeni Njambi bimutonda kwitila mu lilombelo na kulambelela, hamolika na kukandelela, 7 co kwoloka kwa Njambi kuje kunatubakana kuzibisisa kwoshe kunyunga bimbunge byeni na bisinganyeka* byeni kwitila muli Kristu Yesu.

8 Mukumanesa bandolome, twaleleleniho kwaka mbunge* ku byuma byoshe bya busunga, ku byuma byoshe bya seho manene, ku byuma byoshe bya kusungama, ku byuma byoshe bya kujela, ku byuma byoshe binena cizemo, ku byuma byoshe bibendeka mwamubwa, ku byuma byoshe byabibwa na ku byuma byoshe bibashangazala. 9 Byuma byoshe bimwalilongesele kuli yange na bije bimwatabele na kuziba na kumona mu kulikwatasana nange, bilingeni, co Njambi wa kwoloka akala neni.

10 Njinabwahelela manene muli Mwata mwafwa hano munashangumuka lalo kunjaka mbunge. Nameme mwanjakele mbunge, oloni kumwawanene lika ngila ya kumweselamo ngoco. 11 Kunjesi na kwendeka ngoco mwafwa ya bujene embwe, mwafwa njinalilongesa kujauka na byuma binjili nabyo nameme byuma bifwe bati. 12 Njizibuka mwakuyoyela na byuma byabindondo na mwakuyoyela na byuma byabingi. Mu byuma byoshe, nameme byuma bifwe bati, njalilongesa byuma bije kubazibuka banu babangi, njalilongesa mwakuyoyela na byakulya byabingi na mwakuyoyela na njala, mwakuyoyela na byuma byabingi na mu bujene. 13 Njinakanyama mu byuma byoshe mwafwa ya uje akanjana nzili.

14 Nameme ngoco, mwalingile mwamubwa kunjikwasa mu kayando kange. 15 Neni baka-Filipi muzibuka ngweni mumwalilongesele muzimbu waubwa lwakulibanga, munjatundile ku Masedonia, kukwakele cikungulukilo ceka canjikwasele mu ñanda ya kwana na kutambula, kubanga yeni lika, 16 mwafwa munjakele mu Tesalonika ha simbu yaindondo mwanjituminineko bimo bya kulikwasa nabyo, keti lumolika, oloni lubali. 17 Keti ngwabo njili na kutonda bwana embwe, oloni njitonda bushuka buje bubwezelela ku bufuko bweni. 18 Nameme ngoco, njili na byoshe binjitonda, binatubakana bene binjitonda. Njili na byuma byabingi, ha kuwana ngwe njinatambula bwana bumunanjitumina bwanaija nabwo Epafroditu buje bunapu ngwe lwengo lwalubwa, mulambu watambula Njambi, uje umuzibisa kubwaha. 19 Co Njambi yange amyana byuma byoshe bimutonda kwesekesa na bufuko bwendi bwa bumpau, kwitila muli Kristu Yesu. 20 Co kuli Njambi yetu, Tate yetu kukale bumpau myaka yoshe. Ameni.

21 Menekeni bakujela boshe baje banalikwatasana na Kristu Yesu. Bandolome banjili nabo kuno banamimenekako. 22 Bakujela boshe banamimenekako maneneni bakunjibo ya Sezale.

23 Ngozi yakama ya Mwata Yesu Kristu ikale neni mwafwa ya bimbunge byeni byabibwa.