KULI BAKA-KOLOSE

1 Yange Paulu, kapositolo ka Kristu Yesu kwitila mu cizango ca Njambi, njili hamo na ndolome yetu Timothi. 2 Njili na kusonekela bakujela, bandolome ba kulongwa ba mu Kolose baje banalikwatasana na Kristu ngwange:

Ngozi yakama na kwoloka bya kutunda kuli Njambi Tate yetu, bikale neni.

3 Simbu yoshe tukakandelela Njambi, Ishe ya Mwata wetu Yesu Kristu mutukamilombelela, 4 mwafwa tunazibi bya likulahelo lyeni muli Kristu Yesu na cizemo cimuli naco kuli bakujela boshe 5 mwafwa ya lilabelelo libanamitulikila mwilu. Mwazibile byeli lilabelelo kwitila mu muzimbu wa busunga uje unapu muzimbu waubwa 6 uje wezile kuli yeni. Ngecilika mwa muzimbu waubwa muuli na kwima bushuka na kulibwezelela mu kaye koshe, mukemwo lalo muuli na kulinga mukati keni kutunda bene ha litangwa limwauzibile na kuzibuka mwamubwa ngozi yakama ya Njambi mu busunga. 7 Ebi bikebyo bimwalilongesele kuli Epafrasi, mukwetu ndungo itwazema uje wapwa muka-kupangela Kristu mu kulongwa mu kutwimanenako. 8 Co lalo watulekele bya cizemo ceni ca ku sipilitu.*

9 Mukemwo kutunda ha litangwa litwazibile ebi, kutwalikelele kumilombelela na kulomba ngwetu mushule na mana a busunga a kuzibuka cizango cendi mu mana oshe na mu kuzibisisa ca ku sipilitu, 10 mangana mwende ngwe muje mwashaka Yehova mangana mumuzibise kubwaha mu byuma byoshe omwo mutwalelelaho kwima bushuka mu bipangi byoshe byabibwa na kubwezelela ku mangana eni a kuzibuka Njambi. 11 Tukalombela lalo ngwetu Njambi amyane nzili yoshe kwesekesa na bumpau bwendi bwa nzili mangana mwase kukolesa mu byuma byoshe na mbunge ya kubandamena na kubwahelela, 12 omwo mukandelela Tate uje namilingisa mupwisemo binapande mangana mutambule ku buswana bwa bakujela baje bali mu ceke.

13 Njambi watwobwele ku moko ya lisusulungu na kutujalwisila mu bumwene bwa Munendi yazema. 14 Kwitila muli ou Munendi, banatupatula na ndando ya kupatula, kulumbununa kutukonekela bubi bwetu. 15 Ikeye wapwa cifwa ca Njambi uje kutwasa kumona, ntwatwa ku byakutanga byoshe, 16 mwafwa kwitila muli ikeye byuma bikwabo byoshe babitangele, mwilu na hasi, byuma bitumona nebi kutwasa kumona, ipwe matanda, nambe bumwata, nambe bifulumende, nambe moko ya kuyula. Byuma bikwabo byoshe babitangele kwitila muli ikeye, co babitangelele ikeye. 17 Co lalo ikeye wakulibanga ku byuma bikwabo byoshe, co kwitila muli ikeye byuma bikwabo byoshe byakeleko, 18 co ikeye mutwe wa mubila, kulumbununa cikungulukilo. Ikeye wakulibanga, ntwatwa kutunda ku batsi mangana apwe wakulibanga mu byuma byoshe, 19 mwafwa Njambi washakele ngwendi kushula kwoshe kukale muli Munendi, 20 co Njambi elwise byuma byoshe kuli ikeye babenya, ipwe bya hano hasi nambe bya mwilu kwitila muli Kristu Yesu ha kunena kwoloka kwitila mu maninga a Kristu abetilile ha citi ca kuyandesela.*

21 Cili bene, yeni mwangunukile kuli Njambi, co lalo mwapwile bitozi bendi, mwafwa bisinganyeka byeni byajendamenene ku bipangi byabibi, 22 oloni hano Njambi namilwisa kuli ikeye babenya kwitila mu mubila wa situ wa uje watsile, mangana mwimane ku mesho endi oku munapu ba kujela na kujeneka citoma na kujeneka hakumyanena mulonga—, 23 cakama lika nga mutwalelelaho mu likulahelo na kuzama ha lubula na kwimana mbe na kujeneka kutunda ku lilabelelo lya uje muzimbu waubwa umwazibile, ubambulwilile byakutanga byoshe bya mwisi ya lilu. Yange Paulu banjangwile njipwe muka-kwambulula ou muzimbu waubwa.

24 Co hano njili na kubwahelela mu tuyando twange mwafwa yeni, co tuyando twa Kristu tunjili na kuliwana natwo mu situ yange kanda tucipwemo. Oku kuyanda kunjili na kuyanda kukwasa mubila wa Kristu uje unapu cikungulukilo. 25 Banjangwile kupwa muka-kupangela eci cikungulukilo kwesekesa na cipangi ca bungamba ca kutunda kuli Njambi cije cibanjanene mwafwa yeni, mangana njambulule lijwi lya Njambi mu kushula, 26 lije linambateselela lihungu lya kujela libashwekele ha simbu ya tutumameno twa myaka* ya kunima na bisemwa bya kunima. Oloni hano banalijombolwela bakujela, 27 baje Njambi nabwahelela kubajombolwela bumpau bwa bufuko bweli lihungu lya kujela lije lyanajombolola mukati ka baka-mafuti, lije linapu Kristu mu kulikwatasana neni, kulumbununa lilabelelo lya bumpau bwendi. 28 Ou bene Kristu ikeye ituli na kwambulula, ikeye ituli na kunangula munu na munu na kulongesa munu na munu mu mana oshe mangana twase kukwasa munu na munu kupwa wa mutunu mu kulikwatasana na Kristu. 29 Mukemwo njili na kupanga na nzili na kulifwita kwitila mu nzili yendi ije ili na kupanga manene muli yange.

2 Mwafwa njishaka muzibuke kulifwita kwakama kunjili na kulifwita hali yeni, na hali baje bali ku Laudisiya, na hali boshe baje kanda banjimoneho laja.* 2 Njili na kulinga ngoco mangana bimbunge byabo babizembeleke, co lalo mangana balikwatasane mu cizemo na kukala na bufuko bwoshe buje butunda mu kuzibisisa bwino, mangana base kukala na mangana a busunga a kuzibuka lihungu lya kujela lya Njambi, lije linapu Kristu. 3 Muli ikeye mukemwo mubanashweke bufuko bwoshe bwa mana nobu bwa mangana. 4 Njili na kwendeka ngoco mangana keti kukale umo amyungumuna na majwi a kukokweya. 5 Nameme kunjesi neni mu mubila, oloni njili neni mu sipilitu, co njinabwahelela kuziba ngwabo muli na kulinga byuma mubinapande, co lalo likulahelo lyeni muli Kristu lili na kukanyama.

6 Ngeci, ngwe mumunatambwila Kristu Yesu Mwata, twaleleleniho kwenda mu kulikwatasana nendi 7 oku mushimbika mizi, na kulitunga muli ikeye, na kukanyama mu likulahelo, ngwe mubamilongesele, na kukandelela kuli Njambi simbu yoshe.

8 Nyanyameni mangana keti kukale umo amyaka mu bundungo kwitila mu bilongesa bya bunu na mu byendeka byangoco bya makuli, bije binemana ha bisemwa bya banu na ha byuma bya mashangumukilo bya kaye, keti hali Kristu. 9 Mwafwa bifwa byoshe bya Njambi binashulu muli ikeye. 10 Mukemwo munatambula byuma byoshe kwitila muli ikeye, uje napu mutwe wa bifulumende byoshe na moko yoshe ya kuyula. 11 Kwitila mu kulikwatasana nendi, neni lalo bamitwalele ku mukanda wa kujeneka kulinga na maboko a banu ha kumishulula mubila wa situ, bamitwalele ku mukanda uje unakundama kuli Kristu. 12 Mwafwa bamitsindile hamo nendi mu cimbwitiko cendi, co kwitila mu kulikwatasana nendi, neni bamisangwile hamo nendi mwafwa ya kukulahela cipangi ca nzili ca Njambi uje wamusangwile ku batsi.

13 Co lalo, nameme mwapwile ngwe batsi mwafwa ya kubulumuna kweni na cifwa cimwakelemo ca kujeneka kuya ku mukanda wa situ yeni, Njambi wamiyoyesele hamo nendi. Mu ngozi yendi, watukonekelele byuma byoshe bitwabulumwine 14 na kuzimangana bibasonekele ha lipapelo lya kusoneka na maboko lije lyakele na mashiko, lije lalo lyakele na kutulwisa. Nalitundisa mu ngila ha kulipameya ha citi ca kuyandesela.* 15 Kwitila mu citi ca kuyandesela,* nashulula bifulumende na moko ya kuyula na kubiseza mutotototo mu kumwesa ku mbunga ngwendi nabifungulula, co ali na kwija nabyo mu cendo ca baka-kuhyana baje balisamba.

16 Ngeci, keti mwecelele munu amisompe ha byuma bimulya na kunwa nambe bya kunyunga cilika, nambe bya kunyunga ngonde yaiha, nambe kunyunga sabata. 17 Ebi byuma binapu munzinzime wa byuma bili na kwija kulutwe, oloni cuma haco cinapu Kristu. 18 Keti mutabese munu amyonowese kukatambula cikandelela, munu uje washaka kulikehesa kwa makuli na kulemesa kwa tungelo “oku emanena” byuma byanamono. Ou munu ali na kulifwimba lika ngoco na bisinganyeka byendi bya situ, 19 co kakwatele na nzili ku mutwe, uje kwitila muli ikeye mubila woshe uli na kutambula biutonda, co unalikwatasana hamo kwitila mu manunga awo na mu mishisha yawo, co uli na kukola na nzili ya kutunda kuli Njambi.

20 Nga mwatsile hamo na Kristu kutalesa ku byuma bya mashangumukilo bya kaye, co bika lalo bimuyoyela ngwe baka-kaye ha kulyaka yeni babenya kwisi ya mashiko a kwendeka ngwawo: 21 “Keti unone, keti umakele, keti ukwate,” 22 kulumbununa byuma bije binyonga nga banabipangesa, kwesekesa na mashiko na bilongesa bya banu? 23 Nameme ebi byuma bisholoka ngwe bya mana mu cifwa ca kulemesa ca kulimangela na kulikehesa kwa makuli, kulumbununa kuyandesa manene mubila, kubyesi na seho mu kulwisa mashungu a situ.

3 Oloni nga bamisangwile hamo na Kristu, twaleleleniho kutonda byuma bya mwilu muje mwanatumama Kristu ku liboko lya Njambi lya cilyo. 2 Akeni bisinganyeka byeni ku byuma bya mwilu keti ku byuma bya hasi. 3 Mwafwa mwatsile, co kuyoya kweni banacishweke na Kristu mu kulikwatasana na Njambi. 4 Kristu uje napu kuyoya kwetu mubakamusholola, neni nawa bakamisholola hamo nendi mu bumpau.

5 Ngeci, tsiyeni mashungu a bilyo byeni a hano hasi: bupangala,* mazilo, mashungu a kulilala a kutubakanesa, mashungu amabi na nuna, kulumbununa kulemesa tumponya. 6 Butenu bwa Njambi buli na kwija mwafwa yebi byuma. 7 Neni bene omu mukemwo mumwakele na kuyoyela* kunima. 8 Oloni hano munapande kumbila kuti byuma byoshe ebi: butenu, kulubala, bubi, majwi amabi, na byendeka bya shwamwa mu kanwa keni. 9 Keti mulikwise umo na mukwabo. Shululeni bunu* bwa laja na bilinga byabwo, 10 na kuzala bunu bwabuha buje bubali na kupwisa bwabuha kwitila mu mangana a busunga kwesekesa na cifwa ca Uje wabutangele, 11 buje kubwesi na Kagriki nambe Kajuda, kuya ku mukanda nambe kujeneka kuya ku mukanda, muka-kwija, Kasitya,* ndungo nambe wa kupatuka, oloni Kristu napu byuma byoshe mu byoshe.

12 Ha kupwa baje banangula Njambi, bakujela, baje bazema, zaleni mema ku mbunge, ngozi, kulikehesa,* kuwa mbunge na mbunge ya kubandamena. 13 Twaleleleniho kwecelela buzeye bwa umo na mukwabo na kulikonekela umo na mukwabo kutundilila kwisi ya mbunge nameme nga kuli umo ali na cuma cali na kuyayabala hali mukwabo. Ngecilika mwanamikonekela Yehova kutundilila kwisi ya mbunge, neni nawa munapande kulinga ngoco. 14 Kubwezelela ku byuma byoshe ebi, zaleni cizemo mwafwa cikeco cikakutila byuma byoshe hamolika mu kulumbunuka.

15 Co lalo kwoloka kwa Kristu kuyule mu bimbunge byeni* mwafwa bamisanenene oku ku kwoloka mu mubila umolika, co mweseni kukandelela. 16 Lijwi lya Kristu lizame manene muli yeni na mana alyo oshe. Twaleleleniho kulilongesa na kulishongangeya* umo na mukwabo na bisamu, na myaso ya kushangazala Njambi, na myaso ya ku sipilitu ya kwimba na kukandelela, na kwimbila Yehova mu bimbunge byeni. 17 Byuma byoshe bimulinga, mu majwi nambe mu bilinga, byoshe bilingeni mu lizina lya Mwata Yesu oku mukandelela Njambi Tate kwitila muli ikeye.

18 Eni banakazi, lyakeni kwisi ya banalume beni ngwe mucinapande muli Mwata. 19 Eni banalume, twaleleleniho kuzema banakazi beni, co keti mukale manene na butenu* kuli bakebo. 20 Eni bana, ononokeni bisemi beni mu byuma byoshe, mwafwa eci cizibisa Mwata kubwaha. 21 Eni baishe ya bana, keti mulubalese bana beni mangana keti bazeye. 22 Eni bindungo, ononokeni bashukulu beni ba banu* mu byuma byoshe, keti lika nga bali na kumitalelela, mangana muzibise lika banu kubwaha, oloni lingeni ngoco kutundilila kwisi ya bimbunge byeni. Lingeni ngoco mwafwa ya kuzibila Yehova lyoba. 23 Byoshe bimuli na kupanga bipangeni na mwonyo* weni woshe ngwe muli na kupangela Yehova keti banu, 24 mwafwa muzibuka ngweni Yehova ikeye akamyana buswana kupwa cikandelela. Pangeleni Shukulu uje napu Kristu. 25 Cili bene, uje alinga byuma byabibi bakamwana kashitiko mwafwa ya byuma byabibi byanalingi, co kukwesi kangu.

4 Eni bashukulu, yoyeni na bindungo beni mu kusungama na mu ngila yaibwa, mwafwa muzibuka ngweni neni muli na Shukulu yeni mwilu.

2 Twaleleleniho kulombela, lingeni ngoco oku mutwalelelaho kutona na kukandelela. 3 Ha simbu imolika, netu nawa tulombeleleniko mangana Njambi ase kutushokolwela cikolo mangana twambulule lijwi na lihungu lya kujela lya Kristu lije libananjakela mu malyenge, 4 co lalo mangana njase kulyambulula ngwe munjinapande kulyambulwila.

5 Twaleleleniho kwenda na mana nga muli na banu ba hanja oku mupangesa mwamubwa simbu yeni. 6 Majwi eni apwe amabwa simbu yoshe, apwe a kutoba mwongwa mangana muzibuke mwakukumbulwila munu na munu.

7 Tikikasi, ndolome yange injazema, muka-kupanga wa kulongwa, mukwetu ndungo muli Mwata, akumileka mizimbu yange yoshe. 8 Njili na kumutuma kuli yeni mangana muzibuke mutunendukila, co lalo mangana akuzembeleke bimbunge byeni. 9 Ali na kwija na Onesimasi, ndolome yange wa kulongwa, injazema, uje watunda okwo bene. Bakumileka byuma byoshe bili na kulingiwa kuno.

10 Alistakasi, mukwetu lipanditi, namimenekako, na Maki mushoni ya Banabasi nendi namimenekako (ou Maki ikeye uje itwamishikile ngwetu mumutambule mwamubwa nga aija kuli yeni), 11 na Yesu uje ibasana ngwabo Justasi nendi namimenekako. Aba banapu baka-kuya ku mukanda, co bakebo lika bakwetu baka-kupanga banjili na kupanga nabo bya Bumwene bwa Njambi, co bananjizembeleka* manene. 12 Epafrasi, ndungo ya Kristu Yesu uje watundoko kuli yeni, namimenekako. Ali na kulifwita kumilombelela mangana kumamaneselelo mwimane mbe oku munakulahela manene cizango ca Njambi coshe. 13 Mwafwa njili na kwana bukaleho hali ikeye ngwange ali na kulifwita mwafwa yeni na baje bali mu Laudisiya na mu Hilapoli.

14 Luka, muka-kusaka injazema, namimenekako, na Dimasi nendi namimenekako. 15 Njimenekeleniko bandolome mu Laudisiya na ndokazi Nimfa na cikungulukilo cije cikakungulukila ku njibo yendi. 16 Mumumanesa kutanda ou mukanda mukati keni, utumeni lalo na ku cikungulukilo ca baka-Laudisiya mangana nakwo bakautande, co lalo neni mutande mukanda wa kutunda ku Laudisiya. 17 Co lalo lekeni Akipasi ngweni: “Aka mbunge ku cipangi ciwatambwile kuli Mwata mangana ucishulisilile.”

18 Yange Paulu, tambuleni mitende yange injinasoneka na liboko lyange. Anukeni malyenge ange. Ngozi yakama ikale neni.