MUKANDA WAKULIBANGA KULI TIMOTHI

1 Yange Paulu, kapositolo ka Kristu Yesu ha kushika kwa Njambi Mwobole wetu, noku kwa Kristu Yesu uje napu lilabelelo lyetu. 2 Njili na kusonekela Timothi,* uje napu munange bene mu kukulahela ngwange:

Ngozi yakama na kutetela na kwoloka bya kutunda kuli Njambi Tate na kuli Kristu Yesu Mwata wetu bikale nobe.

3 Ngecilika munjakushongangeyeye ngwange usale mu Efeso munjakele hayehi na kuya ku Masedonia, na hano nawa njicikushongangeya bene ngoco ngwange ukande banu bamo mangana keti balongese bilongesa bya makuli, 4 co lalo keti bake mbunge ku biñanda bya makuli na ku kutandanga bikota bya banu. Byuma bya cifweci kubyesi kunena byuma byabibwa, oloni bikanene lika bihula bya kujeneka seho, co lalo kubyesi kunena byuma bya kutunda kuli Njambi bije bikanyamesa likulahelo. 5 Butumbe bwa awa mashiko bunapu bwa kutulingisa tukale na cizemo cije citunda mu mbunge ya kujela na ku citakutaku cacibwa na ku likulahelo lya busunga. 6 Mwafwa ya kubyana ebi byuma, bamo banongumuka na byendeka bya kujeneka seho. 7 Bashaka kupwa balongesi ba lishiko, oloni kubesi na kuzibisisa byuma bibali na kwendeka nambe byuma bibanakakateya manene.

8 Tuzibuka ngwetu Lishiko lyapwa lyalibwa nga munu alipangesa bwino* 9 oku azibuka ngwendi lishiko kubalyakelele munu wa kusungama, oloni balyakelele baka-kupokola mashiko na baka-kutengulukila, baka-kujeneka kuzibila Njambi lyoba na baka-bubi, bakujeneka kulongwa* na baka-kujwalesa byakujela, baka-kutsiya baishabo na baka-kutsiya bainabo, baka-kutsiya banu, 10 baka-bupangala,* banalume baje balala bakwabo banalume,* baka-kwiba banu, baka-makuli, baka-kulisinga byuma bya makuli na byuma byoshe bije bilwisa bilongesa byabibwa* 11 kwesekesa na bumpau bwa muzimbu waubwa wa Njambi wa kubwahelela uje ubanjanene.

12 Mwafwa njikandelela kuli Kristu Yesu Mwata wetu, uje wanjanene nzili mwafwa wanjimwene ngwendi nji wa kulongwa ha kunjana eci cipangi, 13 nameme hakulibanga njapwile muka-kushaula na muka-kuyandesa na muka-likamba. Nameme ngoco, wanjitetelele mwafwa njakele kunzimba, co lalo kunjakele na likulahelo. 14 Oloni ngozi yakama ya Mwata yalibwezelelele manene kuli yange hamolika na likulahelo na cizemo cije cakala naco Kristu. 15 Awa majwi a kwendeka ngwawo: Kristu wezile mu kaye na kwobola baka-bubi anapu a busunga. Co kuli aba baka-bubi, yange muka-bubi kutubakana boshe. 16 Nameme ngoco, banjitetelele mangana kwitila muli yange muka-bubi kutubakana boshe, Kristu Yesu amwese manene mbunge yendi ya kubandamena, na kunjipwisa mwanja kuli baje bamukulahela mangana bakawane kuyoya kwa myaka yoshe.

17 Co kuli Mwene wa myaka yoshe, uje kesi kutsa, uje kubasa kumona, Njambi umolika, kuli ikeye kukale kasingimiko na bumpau myaka yoshe. Ameni.

18 Njikwana awa mashiko munange Timothi, kwesekesa na bupolofweto bubendekele hali yobe mangana mu kulitombola nobu bupolofweto wase kutwalelelaho kulwa nzita yaibwa 19 oku unyunga likulahelo na citakutaku cacibwa, bije bibanombila kuti banu bamo na kulingisa likulahelo lyabo libihye ngwe bwato buje bunatabozoka. 20 Himeneya na Alekizanda banapu bamo babo, co njinabana kuli Satana mangana kubanyanyamesa cibalongese kujeneka kushaula Njambi.

2 Cakulibanga, njimishongangeya ngwange malombelo a kulambelela Njambi, na malombelo, na malombelo a kulombelela bakweni, na malombelo a kukandelela alombeleleni banu boshe, 2 na bimyene na boshe baje bali na bitwamo byakama,* mangana tutwaleleleho kuyoya mwamubwa na mu kwoloka oku tulyana kupangela Njambi na kwaka mbunge ku byuma. 3 Njambi Mwobole wetu wamona eci cuma kupwa cacibwa, co lalo acitambula, 4 co ashaka ngwendi banu ba miyati yoshe boboke na kweta ha kukala na mangana a busunga a kuzibuka busunga. 5 Mwafwa kuli Njambi umolika, na muka-kuwanesa uje ali mukati ka Njambi na banu, Kristu Yesu. Ou munalume 6 walyanene ikeye babenya kupwa ndando ya kupatula banu boshe* ya kupwisa hamo. Eci cikeco cibakana bukaleho ha simbu yaco. 7 Mwafwa yobu bukaleho, mukemwo banjangwile kupwa muka-kwambulula na kapositolo na mulongesi wa baka-mafuti mu biñanda bya likulahelo na busunga. Njili na kwendeka busunga, kunjesi na kukwisa.

8 Ngeci, njishungwiya ngwange mu mitambela mwoshe banalume batwaleleleho kulombela, bajundule maboko abo a kujela kwa kujeneka butenu na bimata. 9 Mu ngila imolika, banakazi banapande kuzala mwamubwa,* mu kulikehesa na mu kusinganyeka mwamubwa,* keti mu kulibinda bindisi ya kukomokesa na kulicakeya na goldi nambe bimpasi* nambe kuzala bizalo bya ndando yakama, 10 oloni banapande kuzala mu ngila ije inapande banakazi baje balitumbula ngwabo bali na kupangela Njambi mu kulongwa, kulumbununa kwitila mu bipangi byabibwa.

11 Munakazi alilongese oku noloka na kulyaka manene kwisi. 12 Kunjitabesa ngwange munakazi alongese nambe kukala na moko hali munalume, oloni napande kwoloka lika kulu. 13 Mwafwa Adama ikeye ibabangele kutanga, asina kwije Eva. 14 Co lalo Adama keti ikeye ibakwisile, oloni munakazi ikeye ibakwisile, co wapwile muka-kupokola lishiko. 15 Oloni munakazi bamunyungilila kwitila mu kukita bana, cakama lika nga atwalelelaho* kukala na likulahelo na cizemo na kupwa wa kujela na kusinganyeka mwamubwa.*

3 Awa majwi anapu a busunga: Nga munu ali na kupanga na nzili mangana apwe kanyungi, co ali na kushungwiya cipangi cacibwa. 2 Ngeci, kanyungi kapandele kukala na cuma ca kumupayela, napande kupwa munalume uje ali na munakazi umolika, muka-kulinga byuma mu kwesekela, muka-kusinganyeka mwamubwa,* muka-kulinga byuma mubinapande, muka-kutambula bangenzi, uje asa kulongesa. 3 Keti citakwa, keti muka-lwozi, oloni muka-kuzibisisa, keti muka-bicokota, keti muka-kuzema bimbongo. 4 Napande kupwa munu uje atwamenena mwamubwa bakunjibo yendi, uje ali na bana balyaka kwisi, baje baka manene mbunge ku byuma, 5 (mwafwa nga munu kazibuka kutwamenena bakunjibo yendi babenya, co asa kunyunga bati cikungulukilo ca Njambi?). 6 Keti uje nataba ololo, kutewa alijundula, co bamusompa ngwe mubanasompo Liyabolo. 7 Co lalo napande kukala na lutsimo lwalubwa* ku banu ba hanja mangana keti ashauke* ku banu na kuwila mu muheto wa Liyabolo.

8 Bangamba ba cikungulukilo nabo banapande kwaka mbunge ku byuma, keti baka-bindaka bibali,* keti baka-kunwa manene binyu, keti baka-nuna ya kushaka kuwana byuma mu linyanyamena, 9 bapwe baka-kunyunga lihungu lya kujela lya likulahelo na citakutaku ca kujela.

10 Co lalo babeseke tahi na kumona indi banapande, asinoni bapwe baka-kupanga ha kuwana ngwe kubesi na cuma ca kubapayela.

11 Banakazi nabo banapande kwaka mbunge ku byuma, keti bapwe baka-kubiisa bakwabo mazina, oloni balinge byuma mu kwesekela, bapwe ba kulongwa mu byuma byoshe.

12 Ngamba wa cikungulukilo napande kupwa munalume wa munakazi umolika, uje atwamenena mwamubwa bana bendi na bakunjibo yendi. 13 Mwafwa banalume baje bapanga mwamubwa baliwanena lizina lyalibwa, co bazituka manene kwendeka bya likulahelo lyabo muli Kristu Yesu.

14 Njili na kukusonekela ebi byuma nameme njakulahela ngwange nange ololo njija kuli yobe. 15 Oloni mwalinga byuma hamo njikotokela kwija, co uzibuke muunapande kuyoyela mu njibo ya Njambi ije inapu cikungulukilo ca Njambi wa kuyoya, cije cinapu ngunzi na manda ya kunyungilila busunga. 16 Cili bene, lihungu lya kujela lya kulyana kupangela Njambi lyapwa lyakama: ‘Bamusholwele mu situ, bamusanene ngwabo muka-kusungama mu sipilitu, washolokele ku tungelo, bamwambulwile mukati ka baka-mafuti, bamutabele mu kaye, bamutambwile mwilu na bumpau.’

4 Oloni lijwi lyanahwiminina Njambi* linendeka ha kujela ngwalyo mu bisimbu bya kulutwe bamo bakatunda mu likulahelo, co bakaka mbunge ku biñanda bya kuhwiminina* bije byungumuna na ku bilongesa bya badimona, 2 mwafwa ya kulikwisa kwa banu bamo baje bendeka makuli, baje bitakutaku byabo binashilitila ngwe cibebe ca tuhya. 3 Bakabindika banu kulyambata na kushika banu ngwabo bajenjuke ku byakulya byanatanga Njambi ngwendi baje bali na likulahelo, co lalo bazibuka mwamubwa busunga babilye na kukandelela. 4 Mwafwa cuma coshe canatanga Njambi cinapu cacibwa, co nacimo cahi cibanapande kubyana nga bacitambula na kukandelela, 5 mwafwa bacijelesa na lijwi lya Njambi na lilombelo.

6 Muupangesa eci cinangulo mu kunangula bandolome, upwa muka-kupangela Kristu wamubwa uje nakuta na majwi a likulahelo na bilongesa byabibwa biunakabangeya mwamubwa. 7 Byana biñanda bya makuli bya kujeneka seho ngwe bije bibakendeka banakazi ba kukola. Oloni kala na cilengo ca kulizilisa yobe babenya mu kulyana kupangela Njambi. 8 Mwafwa bweho bwa kukanyamesa mubila bukwasa lika kamandondo, oloni kulyana kupangela Njambi kukwasa mu byuma byoshe mwafwa hakeho hanemana cikulaheso ca kuyoya ha simbu ino na kuyoya ca kulutwe. 9 Awa majwi anapu a busunga, co tunapande kuwatambula na maboko abali. 10 Mukemwo tuli na kupanga na nzili na kulifwita mwafwa tunaka lilabelelo lyetu hali Njambi wa kuyoya, uje napu Mwobole wa banu ba miyati yoshe, maneneni baje ba kulongwa.

11 Twalelelaho kwana awa mashiko na kuwalongesa. 12 Keti utabese munu akulumbilise mwafwa ya bukwenje bwobe. Oloni pwa mwanja kuli bakulongwa mu byendeka, mu bilinga, mu cizemo, mu likulahelo na mu kujela. 13 Twalelelaho kwaka mbunge ku kutandela ku mbunga, ku kukanyamesa,* na ku kulongesa, kweta noho hanjikezila. 14 Keti wecelele bwana bubakwanene kwitila mu bupolofweto omwo bakulunu bakambekele maboko abo hali yobe. 15 Singanyekesesa ha byuma ebi. Akako manene mbunge mangana kukola kwobe kusholoke ha kujela ku banu boshe. 16 Simbu yoshe linyunge yobe babenya na kwaka mbunge ku bilongesa byobe, mwafwa nga ulinga ngoco, co ulyobola yobe babenya na kwobola baje bakutolilila.

5 Keti upaye manene munalume wa kukola, oloni mulambelele ngwe isho, bakwenje ngwe bandolome bobe, 2 banakazi ba kukola ngwe banoko, bambanda ngwe bandokazi bobe, linga ngoco na kujela kwoshe.

3 Aka mbunge* ku bifwile baje banapu bifwile bene.* 4 Oloni nga kuli fwile uje ali na bana nambe batekulu, co aba bacililongese tahi kulyana kupangela Njambi mu binjibo byabo na kwilwisila bisemi babo na bakuku yabo bije binabapande, mwafwa eci cinapu cacibwa ku mesho a Njambi. 5 Co munakazi uje napu fwile bene, uje nasala mu bujene bwakama naka lilabelelo lyendi muli Njambi, co ali na kutwalelelaho kulambelela na kulombela mutanya na butsiki. 6 Oloni uje nalikobelesa mu senga mangana akutise mashungu* endi, natsi nameme ali na kuyoya. 7 Ngeci, twalelelaho kubana awa mashiko mangana keti bakale na cuma ca kubapayela. 8 Cili bene nga munu kanyungu baje banapu bendi, maneneni bakunjibo yendi, nabyana likulahelo, co nabihya manene kutubakana bene na uje kesi na likulahelo.

9 Fwile banapande kumwaka ha mukana nga ali na myaka 60 na kuya kwilu, nga wakele na munalume umolika, 10 nga natsimana na bipangi byabibwa, nga walelele bana, nga wakele na kutambula bangenzi, nga wajwelesele mendi a bakujela, nga wakwasele baje bakele na kuyanda, nga wakele na kulyana kupanga bipangi byoshe byabibwa.

11 Oloni keti wake bifwile ba bambanda ha mukana mwafwa nga mashungu abo a kulilala abazikinina kupanga cipangi ca Kristu, bakebo bangula kushomboka. 12 Co bakala na mulonga mwafwa banombila kuti likulahelo libakele nalyo hakulibanga.* 13 Co lalo balizilisa kujeneka kupanga, baya na kuyebuka lika mwaya binjibo. Keti lika kujeneka kupanga, oloni bapwa lalo baka-kufweya na baka-kulikobelesa mu biñanda byambala oku baya na kwendeka byuma bije kubapandele kwendeka. 14 Ngeci, njishaka ngwange bambanda bashomboke na kukita bana na kunyunga mwamubwa binjibo byabo na kujeneka kwana baka-kulwisa bukobelelo bwa kutulwisa. 15 Bamo lajoko bene banabongumuna na kukaba Satana. 16 Nga kuli munakazi wa kutaba uje ali na babushoko ba bifwile napande kubakwasa mangana cikungulukilo keti cikale na citele, oloni case kukwasa baje banapu bifwile bene.

17 Bakulunu baje bali na kutwamenena mu ngila yaibwa banapande kubana manene kasingimiko, maneneni baje bali na kupanga na nzili mu kwendeka na mu kulongesa. 18 Mwafwa cisoneka ngwaco, “Keti ukute ngombe ku kanwa nga ali na kujungula bimbuto,” co lalo ngwaco, “Muka-kupanga napande kutambula fweto yendi.” 19 Keti utabe mulonga ubana munalume wa kukola,* kubanga nga kuli bukaleho bwa bakaleho babali nambe batatu. 20 Baje bali na kulinga bubi, bendekele ku mesho a boshe mangana bakwabo bamweneko.* 21 Njikushika manene ku mesho a Njambi na Kristu Yesu na tungelo babanangula ngwange wononoke awa mashiko kwa kujeneka kutala munu ku mesho nambe kukala na kangu.

22 Keti uzambwile kukambeka munu maboko,* nambe kukala na mutamba mu bubi bwa bakweni. Twalelelaho kupwa wa kujela.

23 Keti unwe mema lalo,* oloni nwanwanwako tubinyu twatundondo mwafwa yomwo mwimo lyobe na kubinja-binja kwobe.

24 Bubi bwa banu bamo babuzibuka ku mbunga, co oho bene bubatwala ku kubasompa, oloni bwa bamo bukajomboloka kulutwe. 25 Mu ngila imolika, bipangi byabibwa babizibuka ku mbunga, oloni bije binabanda kubitwalelelaho lika kupwa bya kushweka.

6 Baje bali ku joko ya bundungo banapande kutwalelelaho kusingimika bashukulu babo, mangana lizina lya Njambi na bilongesa byendi keti babyendeke mwamubi. 2 Co lalo, baje bali na bashukulu ba kutaba, keti bashaule bashukulu babo mwafwa bashukulu babo banapu bandolome. Oloni banapande kupanga na mbunge imolika, mwafwa baje bawana bukwasi ku cipangi cabo cacibwa banapu baka-kutaba, baje lalo babazema.

Twalelelaho kubalongesa ebi byuma na kubakanyamesa. 3 Nga munu alongesa bilongesa byeka, co lalo kataba mashiko aje atunda kuli Mwata Yesu Kristu, nambe kutaba bilongesa byabibwa* bije binalitombola na kulyana kupangela Njambi, 4 ali na kulijundula, co kazibisisa cuma coshe-coshe, washaka manene bimata na kulibyanangana ha majwi. Ebi byuma bikanene cipululu, lwozi, kulibiisa mazina* kulisinganyekela byuma byabibi, 5 na bimata bya kujeneka kuhwa, ha biñanda byabindondo bya banu bali na bisinganyeka bya kuhenga, baje banalikele kuzibisisa busunga. Basinganyeka ngwabo munu napande kuwanenaho cimo ha kulyana kupangela Njambi. 6 Cili bene, nga tulyana kupangela Njambi, hamolika na kujauka na byuma bituli nabyo tuwana byuma byabingi. 7 Mwafwa cahi citunaija naco mu kaye, co lalo cahi citwambata mututundamo. 8 Ngeci, nga tuli na byakulya na bizalo* tujauka nebi byuma.

9 Oloni baje bashaka manene kufuka bawila mu ceseko na mu muheto na mu mashungu amangi a bulema a kubulumuna aje abiisa banu. 10 Cizemo ca bimbongo cinapu muzi wa byuma byabibi bya miyati yoshe, co mwafwa ya kukala neci cizemo, bamo banatundu mu kukulahela, co banalitibanga bakebo babenya na byuma byabingi bije bizibisa kubabala.

11 Oloni yobe munu wa Njambi, tewa oku ku byuma. Kabangeya kusungama, kulyana kupangela Njambi, likulahelo, cizemo, kukolesa na kuwa mbunge. 12 Lwa nzita yaibwa ya likulahelo. Kwatelela na nzili kuyoya kwa myaka yoshe kuje kubakusanenene, kuje lalo kuwendekele mwamubwa ku mbunga ku mesho a bakaleho babangi.

13 Njikwana awa mashiko ku mesho a Njambi uje akanyungu byuma byoshe mangana biyoye na ku mesho a Kristu Yesu uje ha kupwa mukaleho wendekele mwamubwa ku mbunga ku mesho a Pontiasi Pilato. 14 Njikushika ngwange unyunge lishiko kwa kujeneka citoma na cuma ca kukupayela, kweta na ku kusholoka kwa Mwata wetu Yesu Kristu 15 kuje kwakasholoka ou Muka-kuyula umolika wa nzili, wa kubwahelela ha bisimbu bibanangula. Wapwa Mwene wa baje bali na kuyula ngwe bimyene na Mwata wa baje bali na kuyula ngwe bimyata, 16 ikeye lika kasa kutsa, uje wakala mu ceke cije kubasa kushwena, uje naumo munu wamumona wahi, nambe uje asa kumumona, kuli ikeye kukale kasingimiko na nzili ya myaka yoshe. Ameni.

17 Longesa* baje banafuku mu katumameno ka myaka ino* ngwobe keti balijundule* na kukulahela bufuko buje bwasa kuhwa simbu yoshe-yoshe, oloni bakulahele Njambi uje akatwana mu bwingi byuma byoshe bitukalikuu. 18 Baleke bapange bipangi byabibwa, bafuke mu bipangi byabibwa, bapwe baka-kwana, bazituke kulipangela byuma byabo na bakwabo, 19 banyungilile mwamubwa lubula lwalubwa lwa kulutwe kupwa bufuko bwabo, mangana base kukwatelela na nzili kuyoya kwa busunga.

20 Timothi, nyunga byuma bibanakwana, tunda ku byendeka bya kujeneka seho bije bibiisa byuma bya kujela, na ku bimata bibali na kwendeka ngwabo “mangana.” 21 Mu kushaka kumwesa ngwabo bali nawa mangana, bamo banatundu mu kukulahela.

Ngozi yakama ikale nobe.