MUKANDA WAMUCIBALI KULI TIMOTHI

1 Yange Paulu, kapositolo ka Kristu Yesu kwitila mu cizango ca Njambi kwesekesa na cikulaheso ca kuyoya kuje kunaija kwitila muli Kristu Yesu. 2 Njili na kusonekela Timothi munange injazema ngwange:

Ngozi yakama na kutetela na kwoloka bya kutunda kuli Njambi Tate na kuli Kristu Yesu Mwata wetu bikale nobe.

3 Njili na kukandelela kuli Njambi uje injili na kupangela cipangi ca kujela ngwe mubalingile bakukulwila bange, co njili na kulinga ngoco na citakutaku ca kujela. Butsiki na mutanya, kunjalikelele kukwanuka mu malombelo ange a kulambelela. 4 Munjili na kwanuka misozi yobe, njili na kushungwiya manene kukumona mangana njibwahelele manene. 5 Mwafwa njanuka bwino likulahelo lyobe lya kujeneka kulikwisa lije lyabangele kukala muli kuku yobe Loisi na muli noko Yunisi, co njakulahela lalo ngwange na muli yobe mulili.

6 Ngeci, njili na kukwanukisa ngwange bwana bwa Njambi buje buli muli yobe buwatambwile munjakukambekele maboko ubushambeye ngwe tuhya. 7 Mwafwa Njambi katwanene sipilitu ya lyoba, oloni watwanene sipilitu ya nzili, nei ya cizemo, nei ya kusinganyeka mwamubwa. 8 Ngeci keti uzibe shwamwa kwana bukaleho bwa Mwata, nambe kuzibila yange shwamwa, yange lipanditi mwafwa yendi, oloni libwahesele kuyandela muzimbu waubwa ha kukulahela nzili ya Njambi. 9 Watwobwele, co watusanene ngwendi tupwe bakujela, keti mwafwa ya bipangi byetu, oloni mwafwa ya biyongola byendi na ngozi yendi yakama. Ei ngozi watumweseleyo mu kulikwatasana na Kristu Yesu kusañulu, 10 oloni hano naisholola ha kujela kwitila mu kusholoka kwa Mwobole wetu Kristu Yesu uje namanesa kutsa, co natujombolwela mwakuwanena kuyoya na kujeneka kubola kwitila mu muzimbu waubwa 11 uje ubanjangwilile ngwabo njipwe muka-kwambulula na kapositolo na mulongesi.

12 Mukemwo njili na kuyanda ngacije, oloni kunjesi na kuziba shwamwa. Mwafwa njizibuka Uje injinakulahela, co njinakulahela ngwange asa kunyunga binjinaka mu maboko endi kweta nolyo litangwa. 13 Twalelelaho kunyunga majwi amabwa* aje awazibile kuli yange, na kumwesa likulahelo na cizemo bije bitunda mu kulikwatasana na Kristu Yesu. 14 Nyunga ebi byuma byabibwa bibanakwana, binyunge na sipilitu ya kujela ije ili muli yetu.

15 Uzibuka mwamubwa ngwobe banu boshe ba mu provinsi ya Asia bananjikengesa nima, kwambateselela na Figelu na Hemagoni. 16 Njilomba ngwange Mwata* atetele bakunjibo ya Onesifola, mwafwa kakangi Onesifola wakele na kunjihwimisa, co kazibilile shwamwa malyenge ange. 17 Oloni munjakele mu Loma, wanjitondele manene, co wanjiwanene. 18 Njilomba ngwange Mwata Yehova amwane kutetela ha litangwa lije. Nobe uzibuka mwamubwa bipangi byanapanga mu Efeso.

2 Ngeci, yobe munange, twalelelaho kuwana nzili mu ngozi yakama ije ili muli Kristu Yesu. 2 Co ebi byuma biwazibile kuli yange, bije bibakundwiiye bakaleho babangi, ebi byuma byane ku banu ba kulongwa, co nabo bakapwisamo mangana bakalongese bakwabo. 3 Ha kupwa liswalale wamubwa wa Kristu Yesu, libwahesele kuyanda. 4 Kukwesi munu uje wapwa liswalale alikobelesa mu mingoso* ya mu kuyoya nga ashaka kuzibisa kubwaha uje namukobelesa cipangi ca buswalale. 5 Nameme bene mu bweho, kubesi kwana cilongo kuli munu uje ali na kulihyana na bakwabo kubanga nehe kwesekesa na mashiko. 6 Ndimi uje akapanga na nzili ikeye napande kupwa wakulibanga kulya bushuka. 7 Simbu yoshe singanyeka ha byuma binjili na kukuleka. Mwata akukwasa uzibisise* byuma byoshe.

8 Anuka ngwobe Yesu Kristu bamusangwile ku batsi, co lalo wapwile muna Devidi* kwesekesa na muzimbu waubwa unjili na kwambulula 9 uje unjili na kuyandela, co lalo ukewo ubananjikutila ngwe cikenya. Nameme ngoco, lijwi lya Njambi kubalikutile. 10 Mukemwo njili na kutwalelelaho kukolesa mu byuma byoshe mwafwa yaba babanangula mangana nabo boboke kwitila muli Kristu Yesu na kutambula bumpau bwa myaka yoshe. 11 Awa majwi anapu a busunga a kwendeka ngwawo: Cili bene nga twatsile hamo nendi, tukayoya lalo hamo nendi. 12 Nga tutwalelelaho kukolesa, tukayula hamolika nendi ngwe bimyene. Nga tumubyana, nendi lalo akatubyana. 13 Nga kutupu ba kulongwa, ikeye atwalelelaho kupwa wa kulongwa mwafwa kasa kulibyana ikeye babenya.

14 Twalelelaho kubanukisa ebi byuma na kubashika* ku mesho a Njambi ngwobe keti balilwisile ha majwi, mwafwa kulinga ngoco kukwesi na seho, kubulumuna* lika baje bali na kutolilila. 15 Linga mwoshe muwasela kulyana kuli Njambi mu ngila ije imuzibisa kubwaha, na kupwa muka-kupanga uje kesi neci cazibila shwamwa, na kulongesa lijwi lya busunga mu ngila inapande. 16 Oloni byana byendeka bya kujeneka seho bije bibiisa byuma bya kujela, mwafwa bibwezelela lika manene ku kujeneka kuzibila Njambi lyoba, 17 co lijwi lyabo lili na kujalakana ngwe mbandu ya mukongo. Himeneya na Filetasi nabo banapu bamo babo. 18 Aba banalume banatundu mu busunga, bali na kwendeka ngwabo kusanguka kunalingiwa laja, co bali na kungumuna likulahelo lya banu bamo. 19 Nameme ngoco, lubula lwa Njambi lwakukola anga lucinemana, co luli neci ciganto cili na majwi a kwendeka ngwawo, “Yehova azibuka banu bendi,” nawa a kwendeka ngwawo, “Woshe ali na kusana ha lizina lya Yehova abyane bilinga bya kuhenga.”

20 Mu njibo yakama kumwakele bitenga bya goldi lika nebi bya siuva, oloni mwakala nebi bya biti, nebi bya buma, co bimo bakabipangesa ku byuma bya bulemu, oloni bikwabo ku byuma bya kujeneka bulemu. 21 Ngeci, nga umo alyangununa kuli ebi bitunendeka kumamaneselelo, co apwa cikwata ca kupangesa ku byuma bya bulemu, cibanajelesa, cije cikwasa babenyaco, cibanabwahesela kupangesa mu bipangi byoshe byabibwa. 22 Ngeci, tewa ku mashungu a bukwenje, oloni kabangeya kusungama, likulahelo, cizemo, kwoloka, hamolika na baje basana Mwata na mbunge ya kujela.

23 Co lalo byana bimata bya bulema, bya kujeneka seho ngwe muuzibukila ngwobe bikanene lwozi. 24 Mwafwa ndungo ya Mwata kapandele kulwa, oloni napande kupwa wamubotsi* ku boshe, uje asa kulongesa, uje asa kukwata mbunge nga banamubiisila, 25 uje asa kulongesa baka-kulwisa mu kuwa mbunge. Hamo Njambi abatabesa batenguluke* mangana base kukala na mangana a busunga a kuzibuka busunga 26 na kushangumuka kusinganyeka mwamubwa na kupusunuka mu muheto wa Satana ha kuwana ngwe banabakwata butona ngwabo balinge cizango cendi.

3 Oloni zibuka ngwobe mu matangwa a mamaneselelo byuma bikakaluwa na kutewesa. 2 Mwafwa banu bakapwa baka-kulizema bakebo babenya, baka-kuzema bimbongo, baka-kulishasha, baka-kulyalesa, baka-kushaula, baka-kujeneka kwononoka bisemi, baka-kujeneka kukandelela, bakujeneka kulongwa, 3 baka-kujeneka kuzema bakwabo, baka-kubyana kulitabasana na bakwabo, baka-kubiisa bakwabo mazina, baka-kujeneka kukwata mbunge, bakutewesa, baka-kujeneka kuzema bubwa, 4 bingungu, bamwatala-temo, baka-kulijundula, baka-kuzema senga kutubakana kuzema Njambi, 5 baje basholoka ngwe bali na kuzibila Njambi lyoba, oloni yoyesi yabo kuyesi na kumwesa ngoco. Tunda ku banu ba cifweci. 6 Mukati kaba mukemwo mukatundu banu baje bakalibembela mu binjibo na kulabula banakazi ba kuzeya baje banalemenena na bubi, baje banongumuka na mashungu a kuliseza-seza, 7 baje bakalilongesa simbu yoshe, oloni kubesi na kukala na mangana a busunga a kuzibuka busunga.

8 Ngwe Janesi na Jambresi mubalwisile Mosesa, naba nawa mukemwo mubali na kulwisila busunga. Banu bacifweci banabihya manene mu bisinganyeka, co banababyana mwafwa kubesi na kwenda kwesekesa na likulahelo. 9 Nameme ngoco, noku kubaya bene kwahi mwafwa bulema bwabo busholoka ha kujela ku banu boshe ngwe mukwafwile kuli baje banalume babali. 10 Oloni yobe unakabangeya bwino kulongesa kwange, kuyoya kwange, biyongola byange, likulahelo lyange, mbunge yange ya kubandamena, cizemo cange, kukolesa kwange, 11 na mapakeso na tuyando ngwe bije binjaliwanene nabyo mu Antioke na mu Ikoniamu na mu Listra. Njakolesele omu mu mapakeso, co Mwata wanjobwelemo mwoshe. 12 Co boshe baje bashaka kuyoya mu kulyana kupangela Njambi mu kulikwatasana na Kristu Yesu nabo babapakesa. 13 Oloni banu bababi na baka-kulikwisa bakatundoni ha bubi na kuya mweka, bakongumuna banu oku nabo bali na kungumuka.

14 Oloni yobe twalelelaho mu byuma biwalilongesele bije bibakukokweyeye kutaba, mwafwa uzibuka kuwalilongeselebyo, 15 co lalo uzibuka ngwobe kushwa ku bumbututu bwobe unazibuka bisoneka bya kujela, bije byasa kukulingisa ukale na mana mangana woboke kwitila mu kukulahela Kristu Yesu. 16 Bisoneka byoshe babihwimininine kuli Njambi, co bikwasa mu kulongesa, mu kwendekela, mu kusungamesa byuma, na mu kunangula mu kusungama, 17 mangana munu wa Njambi ase kupanga mwamubwa cipangi na kulibwahesela kupanga cipangi coshe cacibwa.

4 Njikushika ku mesho a Njambi na Yesu Kristu uje akasompa baka-kuyoya na batsi kwitila mu kusholoka kwendi na Bumwene bwendi ngwange: 2 Ambulula lijwi, linga ngoco bwasi-bwasi, mu bisimbu byabibwa na mu bisimbu byabikalu. Bendekele, bakande, banangule, linga ngoco na mbunge ya kubandamena na butongwe bwa kulongesa. 3 Mwafwa kukaija simbu ije kubakashaka kutolilila ku bilongesa byabibwa,* oloni kwesekesa na mashungu abo bakalikungulwila balongesi mangana bakabaleke byuma bibashaka kuziba ku matwi abo. 4 Bakabyana kutolilila ku busunga, co bakaka mana ku biñanda bya makuli. 5 Oloni yobe, nyunga bisinganyeka byobe mu byuma byoshe, kolesa mu bukalu, panga cipangi ca muka-kwambulula,* panga cipangi cobe mu kushula.

6 Mwafwa banashangumuka laja kunjitila ngwe bwana bwa byakunwa, na simbu yange ya kupatuka bene ili muyehi. 7 Njinalu nzita yaibwa, njinashatuka kweta na kushongo, njinanyungu likulahelo. 8 Kutunda hano, bananjitulikila cilongo ca kusungama cije Mwata uje wapwa lyako wa kusungama akanjana ha litangwa lije, keti yange lika yakana, oloni akana na boshe baje bazema kusholoka kwendi.

9 Linga mwoshe muwasela mangana wije kuno bwasi-bwasi. 10 Mwafwa Dimasi nanjiseze mwafwa nazeme katumameno ka myaka ino,* co nai ku Tesalonika, Kriseni nai ku Galatiya, Tito nai ku Damatiya. 11 Luka lika ikeye ali nange, ija na Maki mwafwa ikeye anjikwasa mu cipangi. 12 Oloni njinatumu Tikikasi ku Efeso. 13 Muwija, unjitwileko kalipai ka lisika kanjasezele mu Troasi kuli Kapasi, na mabulu a kuzenga, maneneni a bilambu.

14 Alekizanda muka-kufula byuma bya kopa wanjilingile mwamubi manene. Yehova amwilwisila kwesekesa na bilinga byendi. 15 Nobe unapande kunyanyama nendi mwafwa walwisile manene muzimbu wetu.

16 Munjakele na kulyamena hakulibanga naumo wahi wanjimanenene, oloni boshe banjisezele. Njambi keti abane mulonga. 17 Oloni Mwata wemanene kuyehi nange na kunjana nzili mangana njase kupanga mu kushula cipangi ca kwambulula, co miyati yoshe yase kuziba muzimbu. Co wanjobwele mu kanwa ka ndumba. 18 Mwata anjilwila ku bipangi byoshe byabibi, co anjobola mangana njikakobele mu Bumwene bwendi bwa mwilu. Kuli ikeye kukale bumpau myaka yoshe. Ameni.

19 Njimenekeleko Priska na Akwila na bakunjibo ya Onesifola.

20 Elastasi nasalele mu Korinte, oloni Trofima njamuseze ali na kubinja mu Miletasi. 21 Linga mwoshe muwasela wete kuno simbu kanda cisika cishangumuke.

Yubulasi na kumenekako na Padeni na Linasi na Kulodia na bandolome boshe.

22 Mwata akale nobe mwafwa ya mbunge yobe yaibwa. Ngozi yendi yakama ikale nobe.