KULI TITO

1 Yange Paulu, ndungo ya Njambi na kapositolo ka Yesu Kristu kwesekesa na likulahelo lya baje banangula Njambi, kwesekesa lalo na mangana a busunga a kuzibuka busunga buje bwendelela na kulyana kupangela Njambi. 2 Co bunemana ha lilabelelo lya myaka yoshe lije lyatukulahesele Njambi kusañulu, uje kasa kukwisa. 3 Oloni ha simbu yendi inapande, walingisile lijwi lyendi balizibuke kwitila mu cipangi ca kwambulula cibanjanene kwesekesa na kushika kwa Njambi, Mwobole wetu. 4 Njili na kusonekela Tito, munange bene mu likulahelo lije lituli nalyo ngwange:

Ngozi yakama na kwoloka bya kutunda kuli Njambi Tate na kuli Kristu Yesu Mwobole wetu bikale nobe.

5 Njakusezele mu Krete mangana wolole byuma bije binahenge na kwangula bakulunu mu nganda na nganda ngwe muje munjakushikile ngwange: 6 mukulunu kapandele kukala naha hakumwanena mulonga, napande kupwa munalume uje ali na munakazi umolika, uje ali na bana ba kutaba baje kubatsimanene na bilinga byabibi,* co lalo keti baka-kutengulukila. 7 Mwafwa ha kupwa ngamba ya Njambi, kanyungi kapandele kukala naha hakumwanena mulonga, keti mwatala-temo, keti muka-kulubala bwasi, keti citakwa, keti muka-lwozi, keti muka-nuna ya kushaka kuwana byuma mu linyanyamena, 8 oloni napande kupwa muka-kutambula bangenzi, muka-kuzema bubwa, muka-kusinganyeka mwamubwa,* wa kusungama, muka-kumwesa kulongwa cije kucesi kutenguluka, muka-kukwata mbunge, 9 muka-kukakateya ku lijwi lya kulongwa* oku alongesa mu butongwe, mangana ase kushongangeya* kwitila mu kulongesa kwakubwa* na kwendekela baje bali na kulwisa.

10 Mwafwa kuli baka-kutengulukila babangi na baka-kwendeka byuma bya kujeneka seho, na baka-kukwisa, maneneni baje banakakateya bya kuya ku mukanda. 11 Unapande kushoka tunwa twabo, mwafwa aba bene banu bali na kungumuna banu boshe mu binaanga ha kulongesa byuma bije kubapandele kulongesa, mwafwa ya kushaka lika kuwanenaho bimo mu linyanyamena. 12 Umo wabo, kapolofweto kabo bene, wendekele ngwendi: “Baka-Krete bakendeka makuli simbu yoshe, bapwa bikashama ba kutewesa, bolwa baje batsa ha kulya.”

13 Obu bukaleho bunapu bwa busunga. Ngeci, twalelelaho kubendekela manene mangana bapwe bakulikangula mu likulahelo, 14 keti batolilile ku bisimo bya Bajuda na ku mashiko a banu baje banatundu mu busunga. 15 Byuma byoshe binapu bya kujela ku banu bakujela, oloni ku banu ba kujwala, ba kujeneka likulahelo, nacimo cahi ca kujela, mwafwa bisinganyeka byabo na bitakutaku byabo binapu bya kujwala. 16 Bakendeka ku mesho a banu ngwabo bazibuka Njambi, oloni banamubyana mu bipangi byabo, mwafwa banapu ba bunyengwe, kubesi kuziba, co kubabatabesele kupanga bipangi byoshe-byoshe byabibwa.

2 Oloni yobe twalelelaho kwendeka byuma bije binalitombola na bilongesa byabibwa.* 2 Banalume ba kukola balinge byuma mu kwesekela, bake mbunge ku byuma, basinganyeke mwamubwa, balikangule mu likulahelo na mu cizemo na mu kukolesa. 3 Mu ngila imolika, banakazi ba kukola bakale na bifwa bya kujela, keti baka-kubiisa bakwabo mazina, keti bakale mu bundungo bwa kunwa manene binyu, bapwe balongesi ba byuma byabibwa 4 mangana base kunangula* bambanda bazeme banalume babo, na kuzema bana babo, 5 basinganyeke mwamubwa, bapwe ba kujela, bapange ha binjibo byabo, bapwe bababwa, balyake kwisi ya banalume babo mangana lijwi lya Njambi keti balyendeke mwamubi.

6 Mu ngila imolika, twalelelaho kushongangeya bakwenje basinganyeke mwamubwa. 7 Pwa mwanja waubwa mu bipangi byoshe byabibwa. Longesa byuma bya kujela* oku wakako manene mbunge 8 na kupangesa majwi amabwa* aje kubasa kupaya mangana baka-kulwisa bazibe shwamwa, keti bawane cuma cacibi ca kwendeka hali yetu. 9 Bindungo balyake kwisi ya bashukulu babo mu byuma byoshe, babazibise kubwaha, keti bakale na milingu, 10 keti babebile, oloni bapwe ba kulongwa mu byuma byoshe, mangana mu byuma byoshe bamwese bubwa bwa bilongesa bya Mwobole wetu, Njambi.

11 Mwafwa ngozi yakama ya Njambi banaisholola, co inanene kwoboka ku banu ba miyati yoshe. 12 Ili na kutulongesa kubyana yoyesi ya kujeneka kuzibila Njambi lyoba na mashungu a kaye, co lalo ili na kutulongesa tupwe baka-kusinganyeka mwamubwa, ba kusungama, na kupwa ba kulyana kupangela Njambi mu katumameno ka myaka ino,* 13 simbu tubandamena cuma cacibwa citunalabelela na kusholoka kwa bumpau bwa Njambi wakama na kwa Mwobole wetu, Yesu Kristu, 14 uje walyanene ikeye babenya hali yetu mangana atupatule* ku yoyesi yoshe ya kupokola mashiko na kulijelesela ikeye babenya banu baje banapu bufuko bwendi bwa kulitila, baje bali na ntwima ya kupanga bipangi byabibwa.

15 Twalelelaho kwendeka ebi byuma na kunangula* na kwendekela. Linga ngoco na moko ibanakwana. Keti utabese munu akulumbilise.

3 Twalelelaho kubanukisa ngwobe balyake kwisi na kwononoka bifulumende na baje bali na moko ya kuyula, na kulibwahesela kupanga bipangi byoshe byabibwa. 2 Keti bendeke munu mwamubi, keti bapwe baka-bicokota, oloni bapwe baka-kuzibisisa, bapwe baka-kuwa mbunge ku banu boshe. 3 Mwafwa netu kunima kutwakele na mana, kutwakele na kwononoka, bakele na kutungumuna, twapwile bindungo ba mashungu a kuliseza-seza na bindungo ba senga, twakele na kulinga bubi, twakele na cipululu, twazibisile bunyengwe, na kulizinda umo na mukwabo.

4 Oloni ngozi ya Mwobole wetu Njambi na cizemo cendi ku banu mubyasholokele, 5 (keti mwafwa ya bipangi bya kusungama bitwalingile, oloni mwafwa ya kutetela kwendi), watwobwele kwitila mu kututanesa kuje kwatuyoyesele, na mu kutupwisa babaha kwitila mu sipilitu ya kujela. 6 Wetilile ei sipilitu mu bwingi hali yetu kwitila muli Yesu Kristu Mwobole wetu, 7 mangana munima ya kutupwisa ba kusungama kwitila mu ngozi yendi yakama, twase kupwa baswana kwesekesa na lilabelelo lya kuyoya kwa myaka yoshe.

8 Awa majwi anapu a busunga, co njishaka ngwange utwaleleleho kusindakana ha biñanda ebi mangana baje banataba kuli Njambi bake bisinganyeka byabo ku kupanga bipangi byabibwa. Ebi byuma binapu byabibwa, co bikwasa banu.

9 Oloni keti ulikobelese mu bimata bya bulema na mu kutandanga bikota bya banu na mu kulikanangana na mu kulilwisila ha Lishiko, mwafwa ebi byuma kubyesi na seho, co lalo byangoco. 10 Byana munu uje akundwiya kacibunga ka kulimanena nga unamunangula lwakulibanga na lwamucibali, 11 mwafwa uzibuka ngwobe munu wa cifweci natundu mu ngila, ali na kulinga bubi, co nalihisa laja ikeye babenya.

12 Munjituma Atemasi nambe Tikikasi kuli yobe ulinge mwoshe muwasela wakunjiwane ku Nikopoli, mwafwa kukekwo kunjinayongola kukala cisika coshe. 13 Longekeya mwamubwa Zenasi uje azibuka Lishiko na Apolo mangana keti bajeneke bimo mu bungenzi bwabo. 14 Oloni banu betu nabo balilongese kupanga bipangi byabibwa mangana base kukwasa nga kwija bukalu bwa kukasumuna, mangana keti batumame lika ngoco.*

15 Boshe banjili nabo banakumenekako, njimenekeleko boshe baje bazema yetu mu likulahelo.

Ngozi yakama ikale neni mubaboshe.