KU BAHEBELU

1 Kusañulu, Njambi wendekele kuli bakukulwila betu kwitila mu tupolofweto ha bisimbu byabingi na mu bingila byabingi. 2 Co kumamaneselelo a matangwa ano, ali na kwendeka kuli yetu kwitila muli Mwana, uje yangwile kupwa swana wa byuma byoshe, co lalo kwitila muli ikeye wakeleko tutumameno twa myaka.* 3 Ikeye ali na kusholola bumpau bwa Njambi, co lalo ikeye bene wapwa cifwa comu mwafwa Njambi, co ikeye ali na kukwasa byuma byoshe bitwaleleleho kukalako na lijwi lya nzili yendi. Co mwamanesele kujelesa bubi bwetu, watumamene mwilu ku liboko lya cilyo lya uje Wakama. 4 Ngeci watubakanene tungelo mwafwa waswanene lizina lya bulemu manene lije litubakana mazina abo.

5 Kangelo muka yendekele Njambi ngwendi: “Yobe u munange, lelo njinapu nji isho”? Co lalo ngwendi: “Njipwa nji ishe, co ikeye apwa munange.”? 6 Oloni mwatuma lalo Ntwatwa yendi hano hasi endeka ngwendi: “Tungelo ba Njambi boshe bamutsikamene.”

7 Co lalo ha tungelo endeka ngwendi: “Tungelo bendi abapwisa sipilitu, co baka-kumupangela abapwisa milangi ya tuhya.” 8 Oloni hali Mwana endeka ngwendi: “Njambi ikeye litanda lyobe myaka yoshe, co mulamu wa Bumwene bwobe unapu mulamu wa kusungama. 9 Wazemene bilinga bya kusungama, co wazindile kupokola mashiko. Mukemwo Njambi, Njambi yobe, wakubwabesele mazi na kukulingisa ubwahelele manene kutubakana bakweni boshe.” 10 Co lalo ngwendi: “Obe Mwata, ku mashangumukilo wajalele lubula lwa lifuti-libu, co melu anapu bipangi bya maboko obe. 11 Bikanyonga, oloni yobe ukakalako. Bikakulubala ngeci mwa cizalo, 12 co ukabibunga-bunga ngwe kalipai, co ukabicinca ngwe bizalo. Oloni yobe kuukatenguluka, co myaka yobe kuikahu.”

13 Oloni kangelo muka yalekele ngwendi: “Tumama ku liboko lyange lya cilyo kweta noho hanjikakela bitozi bobe kupwa ngwe citwamo ca kulyata mendi obe”? 14 Kuma boshe kubapwile basipilitu baje bali na kupanga cipangi ca kujela, babakatumu kuya na kupangela baje bakaswana kwoboka ndi?

2 Mukemwo kunapu kwa seho kuli yetu kwaka manene mbunge ku byuma bitunazibi mangana keti tungumuke. 2 Mwafwa nga lijwi libendekele kwitila mu tungelo lyapwile lya busunga, co lalo munu wapokwele lishiko na kujeneka kwononoka watambwile kashitiko kwesekesa na kwakula kwa kusungama, 3 co twasa kutewa bati nga tunombwanesa eci kwoboka cakama ngacije? Mwafwa eci kwoboka babangele kucendeka kwitila muli Mwata wetu, co baje bamuzibile batwanene bukaleho ngwabo cinapu ca busunga, 4 co lalo Njambi nendi walikwatasanene nabo mu kwana bukaleho kwitila mu bizibukiso na bikomokeso na bipangi bya nzili bya kuliseza-seza na kwitila mu sipilitu ya kujela ije yanene kwesekesa na cizango cendi.

5 Mwafwa lifuti-libu lije lili na kwija, lije lituli na kwendeka, kalyakele mu nzili ya tungelo. 6 Oloni mukaleho umo wendekele ngwendi: “Munu wapwa iyajo mangana umwanuke, nambe muna munu wapwa iyajo mangana umunyunge? 7 Wamupwisile wa mwisi kamandondo ku tungelo, wamwanene cilongo ca bumpau na kasingimiko na kumwangula atale bipangi bya maboko obe. 8 Unaka byuma byoshe mwisi ya mendi endi.” Njambi mwakele byuma byoshe mwisi yendi, nacimo cahi casezele cije kakele mwisi yendi. Nameme ngoco, ha simbu ino kutwesi na kumona byuma byoshe bili mwisi yendi. 9 Oloni hano tuli na kumona Yesu uje ibapwisile wa mwisi kamandondo ku tungelo, banamuziki cilongo ca bumpau na kasingimiko mwafwa ya kuyanda kweta na ku kutsa, mangana kwitila mu ngozi yakama ya Njambi ase kutsila banu boshe.

10 Byuma byoshe kubili mangana binene bumpau kuli Njambi, co lalo kubili mwafwa yendi. Co mu kushaka kwana bumpau bana babangi, kunapande kuli ikeye kulingisa Muka-kwimanena Wakama wa kwoboka kwabo apwe wa kulumbunuka kwitila mu tuyando. 11 Mwafwa uje ali na kubajelesa, na baje babali na kujelesa boshe batunda kuli umolika, ngeci kazibi shwamwa kubasana ngwendi bandolome bendi, 12 ngwe muje mwali na kwendeka ngwendi: “Njikambulula lizina lyobe ku bandolome bange, njikakushangazala na myaso mukati ka cikungulukilo.” 13 Co lalo ali na kwendeka ngwendi: “Njikamukulahela.” Co lalo ngwendi: “Tala, yange na banike babandondo bananjana Yehova.”

14 Ngeci ha kuwana ngwe “banike babandondo” bali na mutamba mu maninga na mu situ, mu ngila imolika, nendi lalo wakele na mutamba mu byuma bya kulifwa, mangana kwitila mu kutsa kwendi, ase kumanesa uje ali na bingila bya kunena kutsa, kulumbununa Liyabolo, 15 co lalo mangana apatule boshe baje bakele mu bundungo mu kuyoya kwabo kwoshe mwafwa ya kutewa kutsa. 16 Mwafwa keti tungelo bene ali na kukwasa, oloni ali na kukwasa bana* ba Abrahamu. 17 Ngeci wapandele kupwa ngwe “bandolome” bendi mu byuma byoshe mangana apwe kapilistu wahakamwa, muka-kutetela, co lalo wa kulongwa mu byuma bya kukundama kuli Njambi, mangana ane mulambu wa kwilwisa banu kuli Njambi* mwafwa ya bubi bwabo. 18 Ha kuwana ngwe nendi wayandele mubakele na kumweseka, asa kukwasa baje babali na kweseka.

3 Ngeci, bandolome bakujela, babanasana kuya mwilu, singanyekeseseni hali Yesu uje napu kapositolo na kapilistu wahakamwa uje itunataba.* 2 Wapwile wa kulongwa kuli Njambi uje wamwangwile ngwe Mosesa nendi mwapwile wa kulongwa mu njibo yoshe ya Njambi. 3 Mwafwa Yesu bamumona ngwabo napande kukala manene na bumpau kutubakana Mosesa, mwafwa uje atunga njibo bakamusingimika manene kutubakana njibo. 4 Cili bene, njibo na njibo kuli umo waitungile, oloni byuma byoshe Njambi ikeye wabitangele. 5 Mosesa wapwile wa kulongwa ha kupwa muka-kupanga mu njibo yoshe ya Njambi, co eci capwile bukaleho bwa byuma bibakwendeka kulutwe, 6 oloni Kristu wapwile wa kulongwa ha kupwa mwana mu kutwamenena njibo ya Njambi. Yetu njibo ya Njambi, nga tukakateya kwendeka mu kuzituka na kukakateya ku lilabelelo lije lituli na kulishashela kweta na kumamaneselelo.

7 Ngeci, kunapu lika ngwe muinendeka sipilitu ngwayo, “Lelo nga mutolilila ku lijwi lyendi, 8 keti mukaluwise bimbunge byeni ngwe mubalingile bakukulwila beni ha simbu ibanjishangumwine na kunjilubalesa manene ngwe mubalingile ha litangwa libanjesekele mu mambo 9 muje mubanjesekele bakukulwila beni nameme bamwene bipangi byange ha myaka 40. 10 Mukemwo eci cisemwa canjizibisile bunyengwe, co njendekele ngwange: ‘Simbu yoshe bali na kungumuka mu bimbunge byabo, co kubazibuka bingila byange.’ 11 Mukemwo njalisingile mu kulubala ngwange: ‘Kubakakobela mu kuhwima kwange.’”

12 Bandolome, nyanyameni kutewa kukala umo kuli yeni atunda kuli Njambi wa kuyoya na kukala na mbunge yaibi ya kujeneka likulahelo. 13 Oloni twaleleleniho kulishongangeya umo na mukwabo ha litangwa na litangwa, cakama lika kubanalisana ngwabo “Lelo,” mangana keti kukale umo akaluwisa mbunge mwafwa ya nzili ya bubi ya kungumuna. 14 Mwafwa cili bene tukala na mutamba muli* Kristu nga tukakateya ku likulahelo litwakele nalyo hakulibanga kweta na kushongo. 15 Kunapu lika ngwe mubyendeka Bisoneka ngwabyo, “Lelo nga mutolilila ku lijwi lyendi keti mukaluwise bimbunge byeni ngwe mubalingile bakukulwila beni ha simbu ibanjishangumwine na kunjilubalesa manene.”

16 Mwafwa beya bazibile lijwi lya Njambi kutundaho bamushangumuna na kumulubalesa manene? Kuma keti boshe baje batundile mu Ijipiti baje bakele mwisi ya Mosesa ndi? 17 Co lalo Njambi wazibilile beya bunyengwe ha myaka 40? Kuma keti baje balingile bubi baje mibila yabo yalundumukilile mu mambo ndi? 18 Kuli beya kwalisingile ngwendi kubakakobela mu kuhwima kwendi? Kuma keti kuli baje kubononokele ndi? 19 Ngeci kubasele kukobela mu kuhwima kwendi mwafwa kubakele na likulahelo.

4 Ngeci, ha kuwana ngwe cikulaheso ca kukobela mu kuhwima kwendi anga kucicili, tunyanyameni* kutewa kukala umo hakati keni asholoka ngwe onwa kweta ha seteko yeci cikulaheso. 2 Mwafwa netu banatwambulwila muzimbu waubwa ngwe nabo mubabambulwililewo, oloni lijwi lije libazibile kulyabakwasele, mwafwa kubakele na likulahelo ngwe libakele nalyo baje batolililile. 3 Mwafwa yetu tuli na likulahelo tukobela mu kuhwima kwendi ngwe mwendekele ngwendi: “Mukemwo njalisingile mu kulubala ngwange, ‘Kubakakobela mu kuhwima kwange,’” nameme bipangi byendi te binahu laja kushwa hakashangumukilile kukalako kaye. 4 Mwafwa ku cisoneka cimo nendeka ha litangwa lya bu 7 ngwendi: “Co Njambi wahwimine ha litangwa lya bu 7 ku bipangi byendi byoshe.” 5 Co lalo nendeka ngwendi: “Kubakakobela mu kuhwima kwange.”

6 Ngeci, ha kuwana ngwe kucili bamo baje banapande kukobelamo, co lalo baje bababangele kwambulwila muzimbu waubwa kubakobelelemo mwafwa ya kujeneka kwononoka, 7 mukemwo nangula lalo litangwa munima ya kwita kwa simbu yailaha, lije lyanendeka mu Samu ya Devidi ngwendi: “Lelo,” ngwe muunabanga kwendeka uno mukanda ngwawo, “Lelo nga mutolilila ku lijwi lyendi keti mukaluwise bimbunge byeni.” 8 Mwafwa ngwe Joshua wabatwalele mu mwela wa kuhwima, ngwe Njambi kendekele lalo litangwa lyeka mu kwita kwa simbu. 9 Ngeci, kucili kuhwima kwa sabata kwa banu ba Njambi. 10 Mwafwa munu uje nakobela mu kuhwima kwa Njambi nahwimi laja ku bipangi byendi ngwe Njambi mwanahwimi ku bipangi byendi.

11 Ngeci tulingeni mwoshe mutwasela mangana tukobele omu mu kuhwima, mangana keti kukale umo kononoka ngwe mubalingile bakebo. 12 Mwafwa lijwi lya Njambi lyapwa lya kuyoya, co lyakala na nzili, co lyapwa lya kubambuka kutubakana moko ya mukwale ya bubela kubali, co lituba kuketa bene na ha kwangununa myonyo* na sipilitu,* na manunga na busoso, co lyasa kunanguka bisinganyeka na butumbe bwa mu mbunge. 13 Co kukwesi cuma ca kutanga cije cinabanda ku mesho endi, oloni byuma byoshe bili hakujela na hashandangala mu mesho a uje itunapande kukalitabela kuli ikeye.

14 Ngeci, ha kuwana ngwe tuli na kapilistu wakama wahakamwa uje wakobelele mwilu, Yesu muna Njambi, tutwaleleleniho kwendeka byendi ku mbunga. 15 Mwafwa kapilistu wahakamwa ituli nendi, keti uje kasa kutuzibila mema ku mbunge ha buzeye bwetu embwe, oloni tuli na uje ibaneseka mu byuma byoshe ngwe yetu, oloni wa kujeneka bubi. 16 Ngeci, tushweneni ku litanda lya ngozi yakama oku tunazituka kwendeka, mangana tutambule kutetela na kuwana ngozi yakama bije bitukwasa ha simbu inapande.

5 Mwafwa kapilistu wahakamwa woshe ibambata mukati ka banu bamwangula mangana abemaneneko mu bipangi bya kukundama kuli Njambi, mangana ane bwana na milambu ya kufwika bubi. 2 Asa kuzibila mema ku mbunge baje bali kunzimba na baje bali na kusebuka* mwafwa nendi ali na buzeye bwendi, 3 ngeci nendi napande kwana bwana bwa kufwika bubi bwendi babenya ngwe mwanena bwana bwa kufwika bubi bwa bakwabo.

4 Munu kasa kulyaka ikeye babenya ha cipangi ca bulemu kubanga bamwakeho kuli Njambi ngwe muje mubakele Aloni. 5 Mu ngila imolika, Kristu kalipwisile ikeye babenya kapilistu wahakamwa mangana alyane bumpau embwe, oloni bamwanene bumpau kuli Uje wamwendekele ngwendi: “Yobe u munange, lelo njinapu nji isho.” 6 Ngwe mwanendeka ku cisoneka cikwabo lalo ngwendi, “U kapilistu myaka yoshe ngwe mwa Meukizedeki.”

7 Ha simbu yakele hano hasi,* Kristu walambelelele na kulomba na kutambeka manene na misozi kuli uje asa kumwobola ku kutsa, co bamuzibile mwafwa wazibilile Njambi lyoba. 8 Nameme wapwile mwana, walilongesele kupwa wa kwononoka ha tuyando twamwene. 9 Co mubamupwisile wa kulumbunuka, wapwile muka-kunena kwoboka kwa myaka yoshe kuli baje bamwononoka, 10 mwafwa Njambi namwangula kupwa kapilistu wahakamwa ngwe mwa Meukizedeki.

11 Tuli na byabingi bya kwendeka hali ikeye, oloni kwakukalu kubilumbununa mwafwa muli na bulwa mu kuziba kweni. 12 Nameme ha simbu ino munapandele kupwa balongesi, oloni mutonda lalo munu aputuke kumilongesa byuma bya mashangumukilo bya majwi a kujela a Njambi, co muneluka lalo ku kutonda mabele keti byakulya bya kukola. 13 Mwafwa woshe atwalelelaho kuyoya mabele kazibuka lijwi lya kusungama, mwafwa napu mwanike wamundondo. 14 Oloni byakulya bya kukola binapu bya banu ba kukola baje banalongesa nzili yabo ya kunanguka kwitila mu kuipangesa mangana base kwangununa byabibwa ku byabibi.

6 Ngeci, ha kuwana ngwe tunatubakana bilongesa bya mashangumukilo bya Kristu, tulifwiteni kukola ku sipilitu. Keti tujale lalo lubula, kulumbununa kulilongesa bya kutenguluka ku bipangi bya kutsa na kukulahela Njambi, 2 kulilongesa bya bimbwitiko na kukambeka maboko, nebi bya kusanguka kwa batsi na kusompa kwa myaka yoshe. 3 Cili bene tukola ku sipilitu nga Njambi atabesa.

4 Co kutalesa kuli baje babatwililile ceke, baje bamakelele bwana bwa mwilu, baje batambwile sipilitu ya kujela, 5 baje banamakela lijwi lyalibwa lya Njambi na nzili ya katumameno ka myaka* kaje kali na kwija kulutwe, 6 oloni hano banau, kubabwaha kubalingisa batenguluke lalo, mwafwa banapameya lalo Muna Njambi ha citi bakebo babenya na kumuzibisa shwamwa ku mbunga. 7 Mwafwa libu likatambula bibezikiso kutunda kuli Njambi mulikanu mema a nyonzi aje akanyokelaho kushwa kumo, co likamenesa bimbuto bije bikwasa baje banalimiho. 8 Oloni nga limenesa mingonga na bimena bya mambimbo, co balibyana na kushaka bene kulisinga, mamaneselelo balyenyeka.

9 Nameme tuli na kwendeka ngacije, oloni kuli yeni batwazema, twazibuka ngwetu byuma byabibwa bilingiwa kuli yeni, byuma bije binakundama ku kwoboka. 10 Mwafwa Njambi wapwa wa kusungama, ngeci kasa kwibala bipangi byeni na cizemo cimunamwesa mwafwa ya lizina lyendi omwo munapangela bakujela na kutwalelelaho kubapangela. 11 Oloni njishungwiya ngwange umo na umo weni apange na nzili mangana akale na lilabelelo lya kushula, lya kukanyama kweta na kushongo, 12 mangana keti mukale na bulwa, oloni mutembwinine baje baswana bikulaheso kwitila mu kukala na likulahelo na mbunge ya kubandamena.

13 Mwafwa Njambi mwakulahesele Abrahamu, walisingile babenya mwafwa naumo wahi namutubakana uje yasele kulisinga nendi. 14 Wendekele ngwendi: “Cili bene njikakubezikisa, cili bene njikakupwisa mbunga yakama.” 15 Co Abrahamu mwamwesele mbunge ya kubandamena, watambwile eci cikulaheso. 16 Mwafwa banu bakalisingi na uje nabatubakana, co kulisinga kwabo kukamanesa bimata byoshe, mwafwa kukamwesa ngwakwo bibanendeka bya busunga. 17 Mu ngila imolika, Njambi mwamwesele hakujela kuli baje bakaswana cikulaheso ngwendi biyongola byendi kubikatenguluka, walisingile mangana amwese ngwendi byanendeka bya busunga. 18 Walingile ngoco mangana kwitila mu byuma bibali bije kubyasa kutenguluka, bije bimwesa ngwabyo Njambi kasa kwendeka makuli, yetu tunatewela kuli Njambi, base kutushongangeya manene tukakateye ku lilabelelo lije libanatwakela halutwe. 19 Tuli neli lilabelelo lije linapu ngwe cimikiso ca bwato ca myonyo yetu lije linapu lya busunga, co lalo lya kukanyama, co eli lilabelelo litukobelesa kweta na kusambwa ya nanga, 20 muje mwanatukobelelako uje ali na kutushatuka kulutwe, Yesu, uje napu kapilistu wahakamwa myaka yoshe ngwe Meukizedeki.

7 Mwafwa ou Meukizedeki, mwene wa Salema, kapilistu ka Njambi Wahakamwa Manene, washeshele Abrahamu uje wakele na kutunda mu kutsiya bimyene, co wabezikisile Abrahamu, 2 co Abrahamu wamwanene cabulikumi ku byuma byoshe. Lizina lyendi balinungulula ngwabo “Mwene wa Kusungama,” co lalo ikeye mwene wa Salema, kulumbununa “Mwene wa Kwoloka.” 3 Nameme kesi na ishe, kesi na ina, kesi na cikota, kesi naha hawanashangumukila matangwa endi, nambe mamaneselelo a kuyoya kwendi, oloni napu kapilistu myaka yoshe omwo banamupwisa ngwe Muna Njambi.

4 Mwamono bukama bwou munalume uje yanene Abrahamu, mutwe wa naanga,* cabulikumi ku byuma byoshe byabibwa byafungulwile. 5 Cili bene, kwesekesa na Lishiko, bana ba Levi baje babanene cipangi ca bupilistu babashikile ngwabo bambate byabulikumi ku banu, kulumbununa ku bandolome babo nameme nabo bapwile bana* ba Abrahamu. 6 Oloni ou munalume uje katundile ku cikota cabo watambwile byabulikumi kuli Abrahamu, co wabezikisile uje ibanene bikulaheso. 7 Co naumo wahi asa kubyana ngwendi wamundondo ikeye ibabezikisa kuli wakama. 8 Balevi baje batambwile byabulikumi bakele na kutsa, oloni uje mukwabo watambwile byabulikumi, Bisoneka bili na kwana bukaleho ngwabyo ali na kuyoya. 9 Co twasa kwendeka ngwetu nameme bene Levi uje ali na kutambula byabulikumi nendi wanene byabulikumi kwitila muli Abrahamu, 10 mwafwa Levi wapwile mutekulwila* wa Abrahamu uje akasemuka kulutwe. Ebi byabulikumi wabyanene kwitila muli Abrahamu ha simbu ibamusheshele kuli Meukizedeki.

11 Nga banu basele kupwa ba kulumbunuka kwitila mu cipangi ca bupilistu ca Balevi (mwafwa naco capwile mutamba wa Lishiko libanene banu), co mwafwa bika kwapandele kukala lalo kapilistu mukwabo uje akapwa ngwe Meukizedeki keti ngwe Aloni? 12 Ha kuwana ngwe bupilistu bali na kubutengulula, Lishiko nalyo banapande kulitengulula. 13 Mwafwa munu ibanendeka byendi watundile ku muyati weka kuje kanda kucikaleho laja munu apangela ku mutula. 14 Mwafwa tuzibuka mwamubwa ngwetu Mwata wetu watunda ku muyati wa Juda, oloni Mosesa nacimo cahi cendekele cije cimwesa ngwaco oku ku muyati kukatunda tupilistu.

15 Co ei ñanda tuizibisisa bwino omwo kwija kapilistu weka wa kulifwa na Meukizedeki, 16 uje napu ngoco kwitila mu nzili ya kuyoya ije kuyasa kunyonga, keti kwitila mu lishiko lije linemana ha cisemwa ca banu. 17 Mwafwa Bisoneka binana bukaleho hali ikeye ngwabyo: “U kapilistu myaka yoshe ngwe mwa Meukizedeki.”

18 Ngeci, lishiko lya laja banalitundisako mwafwa linazeye, co kulyesi na kupanga. 19 Mwafwa Lishiko kulyalingisile cuma nambe cimo cipwe ca kulumbunuka, oloni kwija kwa lilabelelo lyalibwa kwalingisile byuma bipwe bya kulumbunuka, co eli lilabelelo likelyo lili na kutushwenesa kuyehi na Njambi. 20 Co lalo ha kuwana ngwe Njambi walisingile mwapwisile Yesu kapilistu 21 (mwafwa cili bene kuli banu babapwisile tupilistu kwa kujeneka kulisinga, oloni Yesu bamupwisile kapilistu kwitila mu kulisinga kwalisingile Uje wendekele ngwendi: “Yehova nalisingi, co katengulula bisinganyeka byendi, nalisingi ngwendi, ‘U kapilistu myaka yoshe’”), 22 mukemwo Yesu napu cishimbikiya ca cikumiiyo cacibwa. 23 Co lalo babangi bapwile tupilistu bakuswanesa, mwafwa kutsa kwabonowesele kutwalelelaho kupwa tupilistu. 24 Oloni mwafwa Yesu ikeye atwalelelaho kuyoya myaka yoshe, wahi amuswana ha bupilistu bwendi. 25 Ngeci asa lalo kwobola baje bashwena kuli Njambi kwitila muli ikeye, mwafwa wayoya simbu yoshe, co asa kubalambelelako.

26 Mwafwa kunatupande kukala na kapilistu wahakamwa wa cifweci, uje akamwesa kulongwa cije kucesi kutenguluka, wa kujeneka mulonga, wa kujeneka kujwala, ibanangununa kuli baka-bubi, ibanajundula na kumwaka helu ya melu. 27 Kalifwile na baje tupilistu bahakamwa, mwafwa ikeye kapandele kwana milambu ha litangwa na litangwa, ashangumuke na mulambu wa bubi bwendi, co asina ana wa banu, mwafwa ikeye walingile ngoco lumolika kunahu mwalyanene ikeye babenya. 28 Mwafwa Lishiko lyangwile banu baje bali na buzeye kupwa tupilistu bahakamwa, oloni lijwi lya kulisinga libalisingile munima ya Lishiko lyangwile mwana kupwa kapilistu wahakamwa uje ibanapwisa wa kulumbunuka myaka yoshe.

8 Co simpi yakama ha byuma bituli na kwendeka ei: Tuli na kapilistu wahakamwa wa cifweci uje natumama mwilu ku liboko lya cilyo lya litanda lya uje Wakama. 2 Ou kapilistu napu lalo muka-kupanga mu mwela wa kujela na mu tenti ya busunga yashimbikile Yehova keti munu. 3 Mwafwa kapilistu wahakamwa woshe bakamwangula mangana ane bwana na milambu, ngeci kwapandele na kuli ou lalo mangana akaleko na cimo ca kwana. 4 Ngwe wakele hano hasi, ngwe kapwile kapilistu, mwafwa kuli laja banu baje bali na kwana bwana kwesekesa na Lishiko. 5 Cipangi ca kujela cibali na kupanga aba banu cinapu cakumwenako na munzinzime wa byuma bya mwilu. Kunapu lika ngwe Mosesa mwashakele kutunga tenti, Njambi wamwanene lishiko mwafwa Njambi wendekele ngwendi: “Mona ngwobe upanga byuma byoshe kwesekesa na muje munjakumweselele ha munkinda.” 6 Oloni hano Yesu natambula cipangi ca bulemu bwakama mwafwa napu lalo muka-kuwanesa cikumiiyo cacibwa cije cibanazameka na mashiko a bikulaheso byabibwa.

7 Ngwe cije cikumiiyo cakulibanga kucakele na kapenga ngwe kukwapandele lalo kukala cikumiiyo camucibali. 8 Mwafwa nawana kapenga mu banu mwanendeka ngwendi: “‘Taleni! Matangwa ali na kwija,’ ngwendi Yehova, ‘omwo njikalinga cikumiiyo caciha na njibo ya Isalele na njibo ya Juda. 9 Eci cikumiiyo kucikapu ngwe cije cinjalikumiiye na bakukulwila babo ha litangwa linjabakwatele ku liboko lyabo na kubatundisa mu lifuti lya Ijipiti mwafwa kubatwaleleleho kukala mu cikumiiyo cange mukemwo njalikelele kubanyunga,’ ngwendi Yehova.

10 “‘Mwafwa eci cikeco cikumiiyo cinjikalikumiiya na njibo ya Isalele munima yowo matangwa,’ ngwendi Yehova. ‘Njikaka mashiko ange mu bisinganyeka byabo na kuwasoneka mu bimbunge byabo. Co njikapwa Njambi yabo, bakebo bakapwa banu bange.

11 “‘Co kukukakala munu akalongesa mukwabo yatunga nendi nambe ndolome yendi ngwendi: “Zibuka Yehova!” Mwafwa boshe bakanjizibuka, kutunda ku wamundondo kutwala ku wakama manene. 12 Mwafwa njikabatetela ku bilinga byabo bya kuhenga, co kunjikanuka lalo bubi bwabo.’”

13 Mwanendeka ngwendi “cikumiiyo caciha,” nalingisa cije ca laja cijeneke kupanga. Co cije kucesi na kupanga cije lalo cili na kukulubala, ololo cihwa.

9 Mwafwa cikumiiyo ca laja cakele na mashiko amwesele mwakupangela cipangi ca kujela, na mwela waco wa kujela wa hano hasi. 2 Mwafwa tenti ibatungile yakele na milili ibali. Mu mulili wakulibanga mwakele citumbikilo ca bindeya na mesa na makende a kwana kuli Njambi.* Ou mulili bausana ngwabo Mwela wa Kujela. 3 Oloni kunima ya nanga yamucibali kwakele mulili wa mu tenti ubasana ngwabo Mwela wa Kujela Manene. 4 Omu mu mulili mwakele cikango ca goldi ca kwenyekela isense na cikasha ca cikumiiyo ca kukwita goldi. Mu cikasha mwakele njaba ya goldi ije yakele na manna, co muje mu cikasha mwakele lalo mulamu wa Aloni uje wamenene maputa, na bimbazubwila bya mamanya a cikumiiyo, 5 co hakamwa yeci cikasha hakele bakerubi ba bumpau baje bafwikile cifwiko ca kwilwisa banu kuli Njambi.* Nameme ngoco, ino keti ikeyo simbu ya kwendeka koma na koma kebi byuma.

6 Mubamanesele kupanga ebi byuma mu ngila ei, tupilistu bakele na kukobela mu mulili wakulibanga wa tenti simbu yoshe na kupanga cipangi ca kujela. 7 Oloni kapilistu wahakamwa wakele na kukobela mu mulili wamucibali likalyendi, lumolika ha mwaka. Kakele na kukobelamo maboko-boko lika embwe, oloni wakele na kukobelamo na maninga aje akele na kwana mwafwa ya bubi bwendi na bubi bwa banu bubalingile mu kujeneka kuzibuka. 8 Ngeci, sipilitu ya kujela inamwesa bwino ngwayo ngila ya kuya mu mwela wa kujela te kanda baijombolole ha simbu ikwakele tenti yakulibanga. 9 Ei tenti inapu cifwisa ca byuma biliko ha simbu ino, co kwesekesa nomu mubanabwahesela, bwana na milambu bali na kubyana. Nameme ngoco, kubyasa kulingisa citakutaku ca uje ali na kupanga cipangi ca kujela cipwe ca kulumbunuka. 10 Byakundamene lika ku byakulya na byakunwa na bisemwa bya kutana bya kuliseza-seza.* Byakele na mashiko a kukundama lika ku mubila, co babyakeleko kweta na ha simbu ibangwile ya kusungamesa byuma.

11 Oloni Kristu mwezile, ha kupwa kapilistu wahakamwa wa byuma byabibwa bije binalingiwa laja, wakobelele mu tenti yakama ya kulumbunuka manene keti ya kupanga na maboko, kulumbununa keti ya hano hasi. 12 Wakobelele mu mwela wa kujela keti na maninga a bimembe nawa a bana ba bingombe, oloni na maninga endi babenya walingile ngoco lumolika kunahu, co watwobwele myaka yoshe. 13 Mwafwa nga maninga a bimembe na bingombe na lito lya muna ngombe wa lwabo bibashamwina baje banapu ba kujwala, bibajelesa mangana situ yabo ipwe ya kujela, 14 batico maninga a Kristu uje kwitila mu sipilitu ya myaka yoshe walyanene ikeye babenya kuli Njambi kwa kujeneka cuma ca kumupayela, kuma maninga endi kuwasa kujelesa bitakutaku byetu ku bipangi bya kutsa mangana twase kupangela Njambi wa kuyoya cipangi ca kujela ndi?

15 Mukemwo napu muka-kuwanesa cikumiiyo caciha. Wapwile muka-kuwanesa mangana baje babanasana batambule cikulaheso ca buswana bwa myaka yoshe. Ebi byuma byoshe binasiwa, mwafwa ya kutsa kwendi kuje kunabasokola ku kupokola mashiko mu cikumiiyo ca laja kwitila mu ndando ya kupatula. 16 Mwafwa kuje kuli cikumiiyo kubanga kutse munu uje awanesa cikumiiyo, 17 mwafwa cikumiiyo cikakala na nzili nga kutsa cinasholoka, mwafwa kucesi kukala na nzili nga munu uje awanesa cikumiiyo aciyoya. 18 Nameme cikumiiyo ca laja kucashangumukile kupanga kwa kujeneka maninga. 19 Mwafwa Mosesa mwamanesele kuleka banu mashiko oshe a mu Lishiko, wambatele maninga a bana ba bingombe nawa a bimembe na mema na bwanda bwa kubenga, na hisopu,* co washamwinine libulu* na banu boshe, 20 co wendekele ngwendi: “Awa akewo maninga a cikumiiyo canamishiki Njambi ngwendi mucinyunge.” 21 Washamwinine lalo maninga ha tenti na ha bitenga byoshe bya kupangesa mu cipangi ca kujela. 22 Cili bene kwesekesa na Lishiko, bwingi bwa byuma bakabijelesa na maninga, co kubanga maninga etike, keti ngoconi kukonekela kucikalako.

23 Ngeci kwapandele kujelesa ebi byuma bimanenako byuma bya mwilu mu ngila ei, oloni byuma bya mwilu bikebyo bitonda milambu yaibwa ya kutubakana ei. 24 Mwafwa Kristu kakobelele mu mwela wa kujela wa kupanga na maboko, uje unapu cifwisa ca byuma habyo, oloni wakobelele bene mwilu, co hano nasholoka ku mesho a Njambi mu kutwimanenako. 25 Oku kukwalumbunwine ngwabo alyane lwalwingi ngwe mwakele na kulingila kapilistu wahakamwa uje wakele na kukobela mu mwela wa kujela mwaka na mwaka na maninga, akewo nawa keti endi. 26 Keti ngoconi ngwe nayanda lwalwingi kushwa hakashangumukilile kukalako kaye, oloni hano nalisholola ikeye babenya lumolika kunahu kumamaneselelo a tutumameno twa myaka* mangana amanese bubi kwitila mu mulambu wendi babenya. 27 Ngecilika kutsa lumolika mucinabandamena banu boshe, co munima babasompe, 28 mu ngila imolika Kristu nendi bamwanene lumolika kunahu mangana ambate bubi bwa banu babangi. Co mwakasholoka lwamucibali kakutala lalo bya bubi, co boshe baje bali na kumutonda manene mangana boboke, bakamumona.

10 Ha kuwana ngwe Lishiko lyakele na munzinzime wa byuma byabibwa bije bija kulutwe, keti oco cuma haco, kulyasa* kulingisa baje bali na kushwena kuli Njambi bapwe ba kulumbunuka kwitila mu milambu ya kulifwa ibanatwalelelaho kwana mwaka na mwaka. 2 Ngwe ikabapwisa ba kulumbunuka, kuma ngwe kubalikelele kwana milambu ndi? Mwafwa baje bali na kupanga cipangi ca kujela mubabajelesa, ngwe bitakutaku byabo bibaleka ngwabyo kubesi na bubi. 3 Oloni ei milambu ikanukisa banu bubi bwabo mwaka na mwaka, 4 mwafwa maninga a bingombe nawa a bimembe kuwasa kumanesa bubi.

5 Ngeci, mwezile mu kaye wendekele ngwendi: “‘Kuwashakele milambu na bwana, oloni wanjibwaheselele mubila. 6 Kuwatabele bwana bwa mutunu bwa kwenyeka, na bwana bwa kufwika bubi.’ 7 Co njendekele ngwange: ‘Tala! Njinaija (ngwe mubanasoneka byange mu libulu lya kuzenga) na kulinga cizango cobe, obe Njambi.’” 8 Mwamanesele kwendeka ngwendi: “Kuwashakele, co lalo kuwatabele milambu na bwana, na bwana bwa mutunu bwa kwenyeka, na bwana bwa kufwika bubi,” milambu ije ibakana kwesekesa na Lishiko, 9 co wendekele ngwendi: “Tala! Njinaija na kulinga cizango cobe.” Atundisa byakulibanga mangana azameke byamucibali. 10 Mwafwa yeci “cizango,” banatujelesa kwitila mu kwana mubila wa Yesu Kristu lumolika kunahu.

11 Co lalo, kapilistu na kapilistu akemana mu mwela wendi ha litangwa na litangwa, mangana apange cipangi ca kujela na kwana milambu ya kulifwa kushwa kumo ije kuyasa kumanesa bubi bwoshe. 12 Oloni ou munu wanene mulambu umolika wa kufwika bubi myaka yoshe, co watumamene ku liboko lya cilyo lya Njambi. 13 Kutunda bene oho nabandamena kweta noho habakakela bitozi bendi kupwa ngwe citwamo ca kulyata mendi endi. 14 Mwafwa kwitila muli ou mulambu umolika wanene, nalingisa baje babali na kujelesa bapwe ba kulumbunuka myaka yoshe. 15 Co lalo sipilitu ya kujela nayo inana bukaleho kuli yetu muinendeka ngwayo: 16 “‘Eci cikeco cikumiiyo cinjikalikumiiya nabo munima yowo matangwa,’ ngwendi Yehova, ‘Njikaka mashiko ange mu bimbunge byabo na kuwasoneka mu bisinganyeka byabo.’” 17 Co lalo ngwayo: “Co kunjikanuka lalo bubi bwabo na bilinga byabo bya kupokola mashiko.” 18 Co kuje kubanakonekela ebi byuma, kukwesi lalo bwana bwa bubi.

19 Ngeci bandolome, ha kuwana ngwe tunazituka* kukobela mu ngila iya mu mwela wa kujela kwitila mu maninga a Yesu, 20 ngila ije yatushokolwelele kupwa ngila yaiha ya kuyoya ije ipulyasana kweta na kusambwa ya nanga, nanga ije imanena mubila wendi. 21 Co ha kuwana ngwe tuli na kapilistu wakama uje atala njibo ya Njambi, 22 tushweneni kuli Njambi na bimbunge byetu byoshe na likulahelo lyakama ha kuwana ngwe bimbunge byetu banabijelesa ku citakutaku cacibi ha kubishamwina maninga, co lalo mibila yetu banaitanesa na mema a kujela. 23 Tukakateyeni kwendeka bya lilabelelo lyetu ku mbunga kwa kujeneka kuzeya, mwafwa uje nakulahesa wapwa wa kulongwa. 24 Tulyakeni mbunge* umo na mukwabo mangana tulishongangeye kukala na cizemo na kupanga bipangi byabibwa. 25 Keti twombwanese kukunguluka hamolika ngwe bamo mubali naka kalingolingo, oloni tulishongangeyeni umo na mukwabo, maneneni mumunamono ngweni eli litangwa lili na kushwena hayehi.

26 Mwafwa nga tulinga bubi bwa shakelo munima ya kukala na mangana a busunga a kuzibuka busunga, co kukwesi lalo mulambu wa bubi unasalako, 27 oloni cuma cinasalako lika cinapu kubandamena kusompa na butenu bwa kushukuma buje bukanyongesa baje bali na kulwisa Njambi. 28 Woshe wombwanesele Lishiko lya Mosesa bamutsiile kwa kujeneka kumuzibila mema ku mbunge ha bukaleho bwa banu babali nambe batatu. 29 Co musinganyeka ngweni kashitiko kakupwa hali kanapande kutambula uje nalyatangela Muna Njambi, uje lalo namono ngwendi maninga a cikumiiyo aje abamujelesele nawo keti a seho, uje lalo nalubalesa sipilitu ya ngozi yakama ha kuishaula? 30 Mwafwa tuzibuka Uje nendeka ngwendi: “Yange njilinga shambandinga, yange njilwisila.” Co lalo lijwi lyendi ngwalyo: “Yehova ikeye akasompa banu bendi.” 31 Cinapu cuma ca kutewesa kutambula kashitiko kuli Njambi wa kuyoya.

32 Oloni anukeni matangwa a kunima, aje amwakolesele manene oku mulifwita na tuyando mubamitwililile ceke. 33 Simbu imo bamishawile na kumiyandesa ku mbunga, bisimbu bikwaboco mwayandele* hamolika na baje bakele na kuliwana nobu bukalu. 34 Mwafwa mwazibilile mema ku mbunge baje bakele mu kamenga, co mwatwaleleleleho kupwa ba kubwahelela mubamipukwile byuma byeni, mwafwa mwazibukile ngweni muli na bufuko bwabubwa buje bukalako myaka yoshe.

35 Ngeci, keti mumbile kuti kusimpa* ceni cije cibakamyanena cikandelela cakama. 36 Mwafwa munapande kukolesa mangana munima ya kulinga cizango ca Njambi, mwase kukatambula cuma canamikulahesa. 37 Mwafwa “kunasala simbu yaindondo lika,” co “uje ali na kwija ololo eta, co kakotokela.” 38 “Oloni muka-kusungama wange ayoya mwafwa ya likulahelo lyendi,” oloni “nga elukila munima kunjimushaka.” 39 Yetu keti tu banu baje belukila munima ku kunyonga, oloni tu banu baje bali na likulahelo mangana tunyungilile myonyo yetu.

11 Likulahelo lyapwa lilabelelo lya kukanyama lya byuma bitunalabelela, lyapwa bukaleho bwa kushula* bwa byuma bya busunga bije kanda tumone. 2 Mwafwa yeli likulahelo, banu ba kusañulu batambwile bukaleho bwa kutunda kuli Njambi buje bwamwesele ngwabwo bamuzibisile kubwaha.

3 Mwafwa ya likulahelo, tunananguka ngwetu tutumameno twa myaka* batwakeleko kwitila mu lijwi lyendekele Njambi, mwafwa byuma bituli na kumona binatundu ku byuma bije kutwesi na kumona.

4 Mwafwa ya likulahelo, Abele wanene Njambi mulambu waubwa kutubakana wa Kaini. Co mwafwa yeli likulahelo, watambwile bukaleho buje bwamwesele ngwabwo wapwile wa kusungama, mwafwa Njambi watabele* bwana bwendi. Co nameme watsa, acili na kwendeka kwitila mu likulahelo lyendi.

5 Mwafwa ya likulahelo, Inoki bamunungulwile mangana keti amone kutsa, co kubamuwanene mwafwa Njambi wamunungulwile. Mwafwa simbu kanda bamunungulule, watambwile bukaleho buje bwamwesele ngwabwo wazibisile Njambi kubwaha. 6 Co lalo kwa kujeneka likulahelo kukwasiwa kuzibisa Njambi kubwaha mwafwa woshe ashwena kuli Njambi napande kutaba ngwendi Njambi kwali, co lalo ngwendi ikeye muka-kwana cikandelela kuli baje bali na kumutonda manene.

7 Mwafwa ya likulahelo, Nowa wamwesele ngwendi wazibilile Njambi lyoba mubamulekelele cimweja byuma bije te kanda bisholoke, co washongele bwato mangana obole bakunjibo yendi. Co mwafwa yeli likulahelo wahisile kaye, co waswanene kusungama kuje kutunda mu kukala na likulahelo.

8 Mwafwa ya likulahelo, Abrahamu mubamusanene, wononokele mwaile ku mwela uje wapandele kukatambula kupwa buswana. Waile nameme kazibukile kwakele na kuya. 9 Mwafwa ya likulahelo, wayoyele ngwe muka-kwija mu lifuti lya cikulaheso, ngwe uje ali mu lifuti lya bungenzi. Wayoyele mu bitenti na Isaki na Jakobu, baje bapwile baswana hamolika nendi mu cikulaheso ca kulifwa. 10 Mwafwa wabandamenene nganda ije ili na lubula lwa busunga, ije yanamanga Njambi na kuitunga.

11 Mwafwa ya likulahelo, Sala nendi watambwile nzili ya kukita mwana, nameme te natubakana myaka ya kukita, mwafwa wamwene uje wanene cikulaheso ngwendi wa kulongwa. 12 Ngeci, kuli munalume uje wapwile ngwe natsi, kwasemukile bana babangi ngwe bingongonosi bya mwilu, co batumine manene ngwe mushekesheke wa ku kalunga-ndonga.

13 Boshe aba, batsile na likulahelo lyabo nameme kubamwene kulishulisilila kwa bikulaheso, oloni babimwenenene halako, co babitambwile na kulyambulula ku mbunga ngwabo bapwile bangenzi na baka-kunyunyumana muje mu lifuti. 14 Mwafwa baje bali na kwendeka mu ngila ei bali na kumwesa bwino ngwabo bali na kutonda mwela uje upwa wabo bene. 15 Oloni ngwe batwaleleleleho kwanuka ku mwela kubatundile, ngwe bawanene mwakwilukilako. 16 Co hano banashungwiya mwela waubwa, kulumbununa mwela uje unakundama mwilu. Ngeci, Njambi kazibi shwamwa kumusana ngwabo Njambi yabo mwafwa nababwahesela nganda.

17 Mwafwa ya likulahelo, Abrahamu mubamwesekele, kwapwile lika ngwe wanene Isaki. Abrahamu mwatambwile bikulaheso mu kubwahelela, washakele kwana munendi umolika, 18 nameme bamulekele ngwabo: “Baje babakasana ngwabo bana* bobe bakapwa baje bakatunda kuli Isaki.” 19 Oloni wamwene ngwendi Njambi asa kumusangula ku batsi, co wamutambwile bene ku batsi mu cifwisa.

20 Mwafwa ya likulahelo, Isaki nendi wabezikisile Jakobu na Isau kutalesa ku byuma bije byakele na kwija kulutwe.

21 Mwafwa ya likulahelo, Jakobu mwakele hayehi na kutsa, wabezikisile bana ba Jozefu, co walemesele Njambi oku nalizamenena ha mulamu wendi.

22 Mwafwa ya likulahelo, Jozefu mwakele hayehi na kutsa, wendekele bya kutunda mu Ijipiti kwa bana Baisalele, co wanene mashiko kutalesa ku bitsiya byendi.*

23 Mwafwa ya likulahelo, Mosesa mwasemukile, bisemi bendi bamushwekele ha bingonde bitatu, mwafwa bamwene ngwabo uje mwana wapwile wamubwa, co kubatewele lishiko lya mwene. 24 Mwafwa ya likulahelo, Mosesa mwakolele wabyanene kumusana muna muna Falo wa munakazi, 25 wangwile kuyandela hamo na banu ba Njambi kutubakana kulikuwa senga ya bubi ha simbu yaindondo, 26 mwafwa wamwene kushauka kwendi ha kupwa Wakubwabesa* kupwa bufuko bwakama kutubakana bufuko bwa Ijipiti, mwafwa watalele shwii ha cikandelela cakatambula kulutwe. 27 Mwafwa ya likulahelo, watundile mu Ijipiti, oloni katewele butenu bwa mwene mwafwa watwaleleleleho kukolesa ngwe uje ali na kumona Uje kubesi kumona. 28 Mwafwa ya likulahelo, walingile Paseka na kushamwina maninga mangana muka-kunyongesa keti abulumune* bana babo ba bantwatwa.

29 Mwafwa ya likulahelo, bajabukile Kalunga-ndonga wa Kubenga ngwe baje benda ha nunda, oloni baka-Ijipiti mubalingile ngwabo baitemo, mema abalehwile.

30 Mwafwa ya likulahelo, bibumbe bya Jeliko byalundumukile omwo banu babizengulukile ha matangwa 7. 31 Mwafwa ya likulahelo, Rahabu wa lihule katsile hamolika na baje kubononokele, mwafwa watambwile tunenga mu kwoloka.

32 Co bika lalo binjendeka? Mwafwa simbu kuinjitabesa nga njitwalelelaho kwendeka bya Gidioni, Balaki, Samsoni, Jefuta, Devidi na Samwele na tupolofweto bakwabo. 33 Mwafwa ya likulahelo, bahyanene bumwene, banenele kusungama, batambwile bikulaheso, bashokele tunwa twa bindumba, 34 bazimine nzili ya tuhya, batewele ku moko ya mukwale, bapwile bakuzeya, oloni babapwisile baka-nzili, bapwile baka-nzili mu nzita, bahyanene maswalale baje babalwisile. 35 Banakazi batambwile batsi babo baje basangukile, oloni banu bamo babayandesele mwafwa kubatabele kubapatula na ndando ya kusokola mangana bawane kusanguka kwakubwa. 36 Bamo babakele mu ceseko omwo babashendumwine na kubapupanga makote, bamoni babakele bene mu malyenge na mu tumenga. 37 Babashele mamanya, babakele mu ceseko, babasahele hakati, babatsiile na moko ya mukwale, bendanganene oku banazala bilambu bya bimanga na bilambu bya bimembe ha simbu ibakele mu bujene, mu kayando, babalingile mwamubi, 38 co kaye kukabafwililile. Bakele na kwendangana mu mambo na ha minkinda na kuyoya mu manzenzengoma na mu mena a lifuti-libu.

39 Co boshe aba, nameme batambwile bukaleho bwabubwa buje bwamwesele ngwabwo bazibisile Njambi kubwaha mwafwa ya likulahelo lyabo, oloni kubamwene kulishulisilila kwa cikulaheso, 40 mwafwa Njambi wamwenenene cimweja cikandelela cetu cacibwa mangana keti babapwise ba kulumbunuka kwa kujeneka yetu.

12 Ngeci, ha kuwana ngwe tuli na mbunga yakama* ya bakaleho baje banatuzengeleka, tumbileni kuti byuma byoshe bije binatulemenena, na bubi buje bukatushetula bwasi, co tukoleseni omwo tushatuka mu bweho bwa kushatuka bubanatwakela halutwe 2 oku tunatala shwii kuli Muka-kwimanena Wakama na Muka-kulumbunwisa likulahelo lyetu, Yesu. Mwafwa ya kubwahelela kuje kubamutulikililile kulutwe, wakolesele ha citi ca kuyandesela.* Kakele mbunge ku kumushaula kubamushawile, co natumama ku liboko lya cilyo lya litanda lya Njambi. 3 Cili bene, singanyekeseseni manene hali uje wakolesele omwo baka-bubi bamwendekele majwi a kumulwisa mu kulibindamesa bakebo babenya, mangana keti mujuke, na kuzeya.

4 Mumuli na kulifwita kulwisa bubi, kanda mucilwe nabwo kweta na ku kutsa. 5 Co munebala bene hibya majwi anamikanyamesa Njambi a kumisana ngwendi mu bana bendi, a kwendeka ngwawo: “Munange, keti wombwanese kunangula kwa kutunda kuli Yehova, nambe kuzeya nga akwolola. 6 Mwafwa Yehova akanangula uje yazema, mukemwo bene, akatatula* woshe uje yatambula kupwa munendi.”

7 Munapande kukolesa, mwafwa ei inapu ngila yakuminangwilamo.* Njambi akamilingi ngwe mwakalingi bana bendi. Mwafwa mwana muka kubanangwile kuli ishe? 8 Oloni nga kubaminangwile, co keti mu bana bendi, oloni mu bana ba munu weka. 9 Co lalo, batatetu ba bunu bakele na kutunangula, co twakele na kubasingimika. Kuma kutwapandele oni kulyaka manene kwisi ya Tate wa kuyoya kwetu kwa ku sipilitu mangana tuyoye ndi? 10 Mwafwa batunangwile ha simbu yaindondo kwesekesa nomu mubamwene ngwabo mukemwo mwamubwa, oloni ikeye ali na kulinga ngoco mangana tuwane bukwasi, co lalo tupwe ba kujela ngwe ikeye. 11 Cili bene, kukwesi kunangula kukazibisa munu kubwaha ha simbu ibamunangula, oloni kukazibisa kubabala ku mbunge. Nameme ngoco, mu kwita kwa simbu, kulingisa baje babanalongesa noku kunangula beme bushuka bwa kwoloka bwa kusungama.

12 Ngeci, kanyameseni maboko aje ali na kujenjela na mabuli aje anazeye, 13 co twaleleleniho kwolola bingila bya mendi eni mangana cije cinatenguka keti citunde mu ngangu yaco, oloni cikanguke. 14 Kabangeyeni kwoloka omwo muyoya na banu boshe na kukabangeya kujela, mwafwa kwa kujeneka eci, munu kasa kumona Mwata. 15 Nyanyameni mangana keti kukale umo onwa kutambula ngozi yakama ya Njambi, mangana keti kumene muzi wa bushungu uje unena bukalu na kujwalesa banu babangi. 16 Co lalo nyanyameni mangana mukati keni keti mukale muka-bupangala* nambe uje kamwesa kukandelela ku byuma bya kujela ngwe mwalingile Isau uje watambasanene* lisesa lyendi lya kupwa ntwatwa na cakulya ca kulya lumolika. 17 Mwafwa muzibuka ngweni mu kwita kwa simbu mwashakele kuswana cibezikiso, bamubyanene. Nameme wesekele manene kutengulula bisinganyeka bya ishe omwo walilile na misozi, walisinine ngoco.

18 Mwafwa kumwashwenene ku cuma cimwasa kukwata cije cili na kushukuma na tuhya, na ku lishelwa lya kuzibala na lisusulungu na lihunzi lyakama, 19 na ku kwohya kwa lupembo na lijwi lije lyakele na kwendeka, co banu mubalizibile balombele ngwabo keti babaleke byuma bikwabo. 20 Mwafwa bazibile lyoba mubazibile lishiko lya kwendeka ngwalyo: “Nameme kasitu nga alyata kuje ku munkinda, banapande kumwasha mamanya.” 21 Co lalo byuma byasholokele byatewesele manene mukemwo Mosesa wendekele ngwendi: “Njili na kuziba lyoba, co njili na kujaja.” 22 Oloni munashwene ku Munkinda wa Siyone na ku nganda ya Njambi wa kuyoya, kulumbununa Jelusalema ya mwilu na ku makulukazi a tungelo 23 baje banalikungulwila hamo, na kuli baje ba mu cikungulukilo ca ntwatwa babanasoneka mazina abo mwilu, na kuli Njambi Lyako wa boshe, na ku kuyoya kwa ku sipilitu kwa banu ba kusungama babanapwisa ba kulumbunuka, 24 na kuli Yesu muka-kuwanesa cikumiiyo caciha, na ku maninga a kushamwina, aje ali na kwendeka mwamubwa kutubakana maninga a Abele.

25 Moneni ngweni kumubyana kutolilila* kuli uje ali na kwendeka. Mwafwa nga baje babyanene kutolilila kuli uje wakele na ku bana binangulo bya Njambi hano hasi kubasele kutewa, co musinganyeka ngweni yetu twasa kutewa nga tutalesa nima uje ali na kwendeka netu kutundilila mwilu ndi? 26 Ha simbu ije lijwi lyendi lyaningangesele lifuti-libu, oloni hano nakulahesa ngwendi: “Njikaningangesa lalo lifuti-libu, keti lifuti-libu lika, oloni na lilu.” 27 Co lijwi lya kwendeka ngwalyo “lalo” limwesa ngwalyo bakatundisako byuma bije byasa kuninganga, kulumbununa byuma bibanapanga, mangana byuma bije kubininganga bikaleko. 28 Ngeci, ha kuwana ngwe tutambula Bumwene buje kubwasa kuninganga, tutwaleleleniho kutambula ngozi yakama, ngozi ije itulingisa twase kupangela Njambi cipangi ca kujela na lyoba na kasingimiko mu ngila ije yatambula. 29 Mwafwa Njambi yetu wapwa tuhya tuje tunyongesa.

13 Cizemo ceni ca kuzema bandolome citwalelele. 2 Keti mwibale kutambula bangenzi,* mwafwa mu kulinga ngoco bamo batambwile tungelo kwa kujeneka kuzibuka. 3 Anukeni baje bali mu kamenga* ngwe neni muli hamolika nabo mu kamenga. Anukeni na baje babali na kuyandesa mwafwa neni muli mu mubila wa situ.* 4 Bulo bukale na kasingimiko ku mesho a banu boshe, co mwela wa bulo keti baujwalese, mwafwa Njambi akasompa baka-bupangala* na baka-kulinga bukoi. 5 Yoyesi yeni keti ipwe ya kuzema bimbongo, oloni jaukeni na byuma bimuli nabyo. Mwafwa nendeka ngwendi: “Kunjikamiseze, kunjikamyumbila kuti.” 6 Ngeci tupweni ba kusimpa na kwendeka ngwetu: “Yehova ikeye mukwasi wange, kunjizibi lyoba. Bika byasa kunjilinga munu?”

7 Anukeni baje bali na kutwamenena mukati keni, baje banendeka lijwi lya Njambi kuli yeni, co omwo musinganyekesesa ha bubwa bunatundu mu futisi yabo, tembwinineni likulahelo lyabo.

8 Yesu Kristu ikeye umolika izau na lelo na myaka yoshe.

9 Keti mungumuke na bilongesa bya cingenzi bya kuliseza-seza, mwafwa kwakubwa kukanyamesa mbunge na ngozi yakama, kutubakana kuikanyamesa na byakulya* bije kubikwasa baje banabisingimika manene.

10 Tuli na mutula uje baka-kupanga cipangi ca kujela ku tenti kubesi na lisesa lya kulya byuma biliho. 11 Mibila ya tusitu baje maninga abo bakele na kuwatwala mu mwela wa kujela kupwa bwana bwa kufwika bubi bwakele na kwana kapilistu wahakamwa, bakele na kuyenyekela hanja ya cilombo. 12 Yesu nendi wayandelele hanja ya cikolo ca nganda mangana ajelese banu na maninga endi. 13 Ngeci, tuyeni kuli ikeye hanja ya cilombo oku batushaula ngwe mubamushawile, 14 mwafwa kuno kutwesi na nganda ije itumamenena, oloni tuli na kutonda manene ije ili na kwija. 15 Kwitila muli Yesu, simbu yoshe twaneni Njambi mulambu wa kushangazala, kulumbununa bushuka bwa mu tunwa twetu tuje tukambulula lizina lyendi. 16 Co lalo keti mwibale kulinga byabibwa na kulipangela na bakweni byuma bimuli nabyo mwafwa milambu ya cifweci ikazibisa Njambi kubwaha.

17 Ononokeni baje bali na kutwamenena mukati keni na kulyaka kwisi yabo mangana bapange eci cipangi mu kubwahelela, keti na kulinyenyeta, mwafwa bali na kuminyunga,* co bakalitabela kuli Njambi, keti ngoconi eci ciminenela bukalu.

18 Twaleleleniho kutulombelela, mwafwa twakulahela ngwetu tuli na citakutaku ca busunga* omwo tushaka kupwa baka-busunga mu byuma byoshe. 19 Oloni njimishongangeya manene ngwange mulombele mangana banjilwise bwasi kuli yeni.

20 Co Njambi wa kwoloka, uje wasangwile kanyungi wakama wa bimanga, Mwata wetu Yesu oku ali na maninga a cikumiiyo ca myaka yoshe, 21 amyane byuma byoshe byabibwa mangana mulinge cizango cendi. Co lalo kwitila muli Yesu Kristu tulomba Njambi atukwase kulinga byuma bije bimuzibisa kubwaha. Kuli ikeye kukale bumpau myaka yoshe. Ameni.

22 Ngeci bandolome, njimishongangeya ngwange mutolilile mwamubwa awa majwi anjinamishongangeya mwafwa njinamisonekela lika mukanda wawihi. 23 Zibukeni ngweni ndolome yetu Timothi banamupatula. Nga aija bwasi, co njija hamo nendi munjija na kumimona.

24 Njimenekeleni boshe baje bali na kutwamenena mukati keni na bakujela boshe. Baje bali mu Itali banamimeneka.

25 Ngozi yakama ikale neni mubaboshe.