MUKANDA WAKULIBANGA WA PITA

1 Yange Pita, kapositolo ka Yesu Kristu. Njili na kusonekela baje bananyunyumana muno mu kaye, baje banashandokela mu Pontasi, mu Galatiya, mu Kapadosha, mu Asia, na mu Bithinia, baje babanangula 2 kwesekesa na mangana a Njambi Tate a kuzibukila cimweja byuma, co banabajelesa na sipilitu mangana bononoke na kubashamwina maninga a Yesu Kristu:

Ngwange ngozi yakama na kwoloka bikale neni mu bwingi.

3 Bashangazale Njambi, Ishe ya Mwata wetu Yesu Kristu, mwafwa kwesekesa na kutetela kwendi kwakama watulingisile tusemuke lalo mangana tukale na lilabelelo lya kuyoya kwitila mu kusanguka ku batsi kwa Yesu Kristu, 4 mangana tukale na buswana buje kubwasa kubola, bwa kujeneka mazilo, buje kubwasa kuhwa. Obu buswana banamitulikilabwo mwilu 5 yeni babali na kunyungilila na nzili ya Njambi kwitila mu likulahelo mwafwa ya kwoboka kuje kubasholola mu simbu yamamaneselelo. 6 Mwafwa yeci cuma, munabwahelela manene, nameme munayanda na byeseko bya kuliseza-seza ha kasimbu kakandondo, 7 mangana likulahelo lyeni libaneseka, lije lyapwa lya seho kutubakana goldi ije inyonga nameme banayeseka na tuhya, limilingise bamishangazale na kumyana bumpau na kasingimiko ha kusholoka kwa Yesu Kristu. 8 Nameme kumwamumwene, oloni mwamuzema. Nameme hano kumwesi na kumumona, oloni mwamukulahela, co munabwahelela manene na kubwahelela cakama cije kutwasa kulumbununa, 9 mwafwa mukatambula cikandelela mwafwa ya likulahelo lyeni, kulumbununa kwoboka kweni.

10 Tupolofweto baje bapolofwetele bya ngozi yakama ibanamibwahesela behozwele na kutondesesa manene byoku kwoboka. 11 Batwaleleleleho kutondesesa biyakele na kwendeka sipilitu ije yakele muli bakebo kutalesa kuli Kristu mangana bazibuke simbu nambe mwaka. Ei sipilitu yanenene cimweja bukaleho bwa tuyando twapandele kuyanda Kristu na bumpau buje bwakele na kwija kulutwe. 12 Babajombolwelele ngwabo kubakele na kulipangela bakebo babenya, oloni bakele na kupangela yeni, co byuma bibambulwile bikebyo bibanambulula baje banamyambulwila muzimbu waubwa kwitila mu sipilitu ya kujela ije itunda mwilu. Ebi byuma tungelo nabo banashungwiya kubizibuka.

13 Ngeci libwaheseleni mu bisinganyeka byeni kupanga bipangi. Singanyekeni mwamubwa. Kulaheleni ngozi yakama ibakamizibila ha kusholoka kwa Yesu Kristu. 14 Ha kupwa bana ba kwononoka, keti mutabese mashungu amwakele nawo mumwakele kunzimba amimunge, 15 oloni pweni ba kujela mu bilinga byeni byoshe ngwe uje wamisanene mwanapu Wakujela, 16 mwafwa banasoneka ngwabo: “Munapande kupwa ba kujela, mwafwa yange nji wa kujela.”

17 Nga muli na kusana Tate uje akasompo munu kwesekesa na bipangi byendi kwa kujeneka kangu, co kaleni na lyoba ha simbu imunacinyunyumana muno mu kaye. 18 Mwafwa muzibuka ngweni mubamipatwile ku kuyoya kweni kwangoco kuje kubamisezelele bakukulwila beni, kubamipatwile na byuma bije bibola bya kufwa ngwe siuva nambe goldi. 19 Oloni bamipatwile na maninga a seho a Kristu ngwe a muna manga wa kujeneka kapenga na citoma. 20 Cili bene bamuzibukile cimweja simbu kanda kaye kakaleko, oloni bamusholwele kumamaneselelo a bisimbu mwafwa yeni. 21 Kwitila muli ikeye munataba muli Njambi, uje wamusangwile ku batsi na kumwana bumpau mangana mukale na likulahelo na lilabelelo muli Njambi.

22 Ha kuwana ngwe munalijelesa yeni babenya ha kwononoka busunga, muli na cizemo ca kujeneka kulikwisa ca kuzema bandolome. Ngeci, lizemeni manene umo na mukwabo kutundilila kwisi ya mbunge. 23 Mwafwa banamilingisa musemuke lalo, keti na mbuto ije ibola, oloni na mbuto ije kuyasa kubola* kwitila mu lijwi lya Njambi wa kuyoya uje wakalako myaka yoshe. 24 Mwafwa “banu boshe banapu ngwe mwila, co bumpau bwabo bwoshe bunapu ngwe bintemo bya mu shwata. Mwila ukajujwama, co bintemo bikalakumuka, 25 oloni lijwi lya Yehova likalako myaka yoshe.” Co eli “lijwi” linapu muzimbu waubwa ubamyambulwilile.

2 Ngeci umbileni kuti bubi bwoshe, na makuli, na kulikwisa, na cipululu, na kulyendeka mwamubi. 2 Ha kupwa ngwe bimbututu baje banasemuka ololo, kaleni na lishungu lya kunwa mabele a lijwi lya Njambi a kujeneka kukumbasana na cimo, mangana amikwase mukole na kwoboka, 3 cakama lika nga munalimwena ngweni Mwata wakala na ngozi.

4 Banu banabyana limanya lya kuyoya, oloni Njambi nalyangula na kulimona ngwendi lya seho. Mumushwena oku ku limanya 5 ha kupwa mamanya a kuyoya, bali na kumitunga kupwa njibo ya ku sipilitu, kupwa bupilistu bwa kujela, mangana mwane milambu ya ku sipilitu ije yatambula Njambi kwitila muli Yesu Kristu. 6 Mwafwa Cisoneka ngwaco: “Taleni! Njili na kwaka limanya mu Siyone, limanya linjinangula, limanya lya seho lya mu mbango lya lubula, co woshe alikulahela kakalibeye.”

7 Kuli yeni napu wa seho mwafwa mu baka-kutaba, oloni kuli baka-kujeneka kutaba kapwile wa seho. Mwafwa Bisoneka ngwabyo, “limanya libabyanene baka-kutunga likelyo linapu limanya lya seho lya mu mbango,”* 8 co napu “limanya lya kutanwisa na libwe lya kulubalesa.” Bali na kutanuka mwafwa kubesi na kwononoka lijwi. Ebi bikebyo bibabangwilile. 9 Oloni yeni munapu “muyati ubanangula, tupilistu baje banapu lalo bimyene, muyati wa kujela, muyati uje unapu bufuko bwa kulitila, mangana mwambulule kwoshe bya bubwa”* bwa Uje wamisanene kumitundisa mu lisusulungu na kuminena mu ceke cendi cacibwa. 10 Mwafwa hakulibanga kumwapwile muyati, oloni hano munapu muyati wa Njambi, hakulibanga kubamitetelele, oloni hano banamitetela.

11 Eni banjazema, njimishongangeya ha kupwa baka-kwija, na banu baje bananyunyumana muno mu kaye ngwange twaleleleniho kujenjuka ku mashungu a bunu aje ali na kumilwisa. 12 Twaleleleniho kukala na bilinga byabibwa mukati ka baka-mafuti mangana mubamyendeka ngwabo mu baka-kubiisa, bakebo babenya bapwe bakaleho ba bipangi byeni byabibwa, ngeci bane Njambi bumpau ha litangwa lyendi lya kwilula.

13 Mwafwa ya Mwata, lyakeni kwisi ya boshe baje bali na moko, ipwe bimyene mwafwa bali helu lyeni, 14 nambe bangubulu mwafwa mwene ikeye nabangula mangana bane kashitiko kuli baje balinga byabibi na kushangazala baje balinga byabibwa. 15 Mwafwa cinapu cizango ca Njambi ngwendi omwo mulinga byuma byabibwa mwase kwolwesa banu ba kujeneka kuzibisisa baje bali na kwendeka byuma bya bulema. 16 Pweni banu ba kupatuka keti mupangese kupatuka kweni kupwa hakulishwekela mangana mulinge bubi, oloni pweni bindungo ba Njambi. 17 Singimikeni banu boshe, zemeni bandolome beni boshe, zibileni Njambi lyoba, singimikeni mwene.

18 Bangamba balyake kwisi ya bashukulu babo na kubazibila lyoba lije linabapande, keti lika ku bashukulu bababwa, baka-kuzibisisa, oloni na kuli baje babakalu kubazibisa kubwaha. 19 Mwafwa kunapu kwakubwa nga munu akolesa mu bukalu na kumuyandesa kwa kujeneka mulonga mwafwa ya citakutaku cendi kuli Njambi. 20 Mwafwa bubwa muka buuwana nga ukolesa mubakupupa mwafwa ya kulinga bubi? Oloni nga ukolesa mwafwa ya kulinga bubwa eci cinapu cacibwa kuli Njambi.

21 Obu bukebwo buyoye bubamisanenene, mwafwa Kristu nendi wayandele mwafwa yeni na kumisezela mwanja mangana mukabangeye mwamubwa myanja yendi. 22 Kalingile bubi, co mu kanwa kendi kumwakele makuli. 23 Mubakele na kumutuka, kabelwisilile matuka, mwakele na kuyanda, kashungwiiye munu, oloni walyakele mu maboko a Uje akasompo mu busunga. 24 Wambatele bubi bwetu mu mubila wendi ha citi mangana batupatule ku bubi, co tuyoyele kulinga byuma bya kusungama. Co “bimbandu byendi byamyolesele.” 25 Mwafwa mwapwile ngwe bimanga baje banazimbala, oloni hano muneluka kuli kanyungi na muka-kunyunga myonyo yeni.

3 Mu ngila imolika, eni banakazi lyakeni kwisi ya banalume beni mangana nga kuli bamo baje kubesi na kwononoka lijwi base kubakokweya kwa kujeneka lijwi kwitila mu bilinga bya banakazi babo, 2 mwafwa balimwena bilinga byeni bya kujela na kasingimiko keni kakama. 3 Kulibwahesa kweni keti kupwe lika kwa hanja, kwa kubinda binkambu na kuzala byuma bya goldi nambe bizalo byabibwa, 4 oloni kupwe kwa munu wa mukati, kwa mu mbunge, kuje kukwasa kubola, kwa kwoloka na kuwa mbunge, kuje kunapu kwa seho manene ku mesho a Njambi. 5 Mwafwa omu mukemwo mubakele na kulibwahesa banakazi ba kujela ba kusañulu baje bakulahelele Njambi. Bakele na kulyaka kwisi ya banalume babo 6 ngwe Sala uje wononokele Abrahamu na kumusana ngwendi mwata. Co munapu bana bendi, cakama lika nga mutwalelelaho kulinga byabibwa na kujeneka kukala na lyoba.

7 Mu ngila imolika, neni banalume twaleleleniho kuzibisisa* banakazi beni omwo mukala nabo. Basingimikeni mwafwa bapwa ngwe byuma bya buma ha kupwa banakazi, co lalo bakaswana neni kuyoya mwafwa ya ngozi yakama ya Njambi, mangana malombelo eni keti onwe kweta.

8 Mukumanesa, mubaboshe kaleni na biyongola bimolika, lizibileni ngozi, kaleni na cizemo ca kuzema bandolome, kaleni na mema ku mbunge na kupwa ba kulikehesa. 9 Keti mwilwisile bubi nambe kwilwisila matuka, oloni yeni bezikiseni mwafwa obu bukebwo buyoye bubamisanenene, mangana mwase kuswana cibezikiso.

10 Mwafwa “woshe ashaka kuyoya na kumona matangwa amabwa napande kunyunga ndaka yendi ku byuma byabibi na kanwa kendi ku kwendeka makuli. 11 Atunde ku byuma byabibi, co alinge byuma byabibwa, atonde kwoloka na kucikabangeya. 12 Mwafwa mesho a Yehova anatala ha banu ba kusungama, co matwi endi ali na kutolilila ku kulambelela kwabo, oloni cihanga ca Yehova cinalubalela baje bali na kulinga byuma byabibi.”

13 Cili bene, iya amibulumuna nga mupanga byuma byabibwa na ntwima? 14 Oloni nameme nga muyanda mwafwa ya kusungama, mupwa ba kubwahelela. Nameme ngoco, keti mutewe bibatewa* nambe kukala mu citanga. 15 Oloni moneni Kristu kupwa wa kujela mu bimbunge byeni ha kupwa Mwata. Simbu yoshe libwaheseleni kukumbulula woshe uje amihula bya lilabelelo lyeni, oloni lingeni ngoco mu kuwa mbunge na kasingimiko kakama.

16 Twaleleleniho kukala na citakutaku cacibwa mangana mu byuma byoshe bibamyendeka mwamubi, baje bamyendeka mwamubi bazibe shwamwa mwafwa ya bilinga byeni byabibwa ha kupwa baka-kukabangeya Kristu. 17 Mwafwa kwakubwa kuyanda mwafwa ya kulinga byuma byabibwa, nga Njambi nacitabesa, kutubakana kuyanda mwafwa ya kulinga byuma byabibi. 18 Mwafwa Kristu watsile lumolika mwafwa ya bubi bwa banu. Ou munu wa kusungama watsililile baka-kujeneka kusungama mangana amitwamenene kuli Njambi. Bamutsiile na mubila wa situ, oloni bamuyoyesele na mubila wa sipilitu. 19 Co mwakele omu mu cifwa, waile na kwambulwila basipilitu baje bali mu kamenga, 20 baje kubononokele omwo Njambi wakele na kumwesa mbunge ya kubandamena mu simbu ya Nowa mubakele na kushonga bwato muje mubobokelele banu babandondo ku mema, kulumbununa myonyo* 8.

21 Cimbwitiko cije cinalifu neci cuma, hano naco cili na kumyobola (keti ha kutundisa mazilo a situ, oloni ha kulomba Njambi ngweni mukale na citakutaku cacibwa) kwitila mu kusanguka kwa Yesu Kristu. 22 Ali ku liboko lya cilyo lya Njambi, mwafwa waile mwilu, co tungelo na moko na binzili babyakele mwisi yendi.

4 Ha kuwana ngwe Kristu wayandele mu situ, neni libwaheseleni kukala na bisinganyeka ngwe byakele nabyo ikeye, mwafwa munu uje nayanda mu situ nalikele bubi, 2 mangana ha simbu inasalako yayoya mu situ, keti ayoye kwesekesa nebi bibashaka banu, oloni ayoye kwesekesa na cizango ca Njambi. 3 Mwafwa simbu imunabiisa kunima imwakele na kulinga cizango ca baka-mafuti inapumo, imwakele na kwenda mu bilinga byabibi kwa kujeneka shwamwa,* mu mashungu a kutubakanesa, mu kunwa manene, mu bilika bya kalwa,* mu kunwa ca kulihyana, na mu kulemesa tumponya kuje kubanabindika mu mashiko. 4 Banakasama mwafwa munalikele kulikwatasana nabo mu bilinga byabo byabibi bya mazilo, mukemwo bali na kumyendeka mwamubi. 5 Oloni aba banu bakalitabela kuli uje nalibwahesela kusompa baka-kuyoya na batsi. 6 Mukemwo muzimbu waubwa bawambulwile na kuli baje banatsi, mangana nameme babasompe mu situ mu kumona kwa banu, base kuyoya mu kulitombola na sipilitu mu kumona kwa Njambi.

7 Oloni mamaneselelo a byuma byoshe ali muyehi. Ngeci, singanyekeni mwamubwa, simbu yoshe anukeni kulombela. 8 Kutundaho, lizemeni manene umo na mukwabo, mwafwa cizemo cikafwiki bubi bwabwingi. 9 Litambuleni umo na mukwabo kwa kujeneka kuyayabala. 10 Munu na munu banamwana bwana. Ngeci bupangeseni mu kukwasa bakweni ha kupwa bangamba bababwa baje bakwasa bakwabo batambule ngozi yakama ya Njambi ije ili na kusholoka mu bingila bya kuliseza-seza. 11 Nga munu endeka, endeke majwi a kutunda kuli Njambi. Nga umo apangela bakwabo, alinge ngoco kwesekesa na nzili yanamwana Njambi mangana Njambi bamushangazale mu byuma byoshe kwitila muli Yesu Kristu. Bumpau na nzili byapwa byendi myaka yoshe. Ameni.

12 Eni banjazema, keti mukomoke mwafwa ya kuliwana na byeseko bya kufwa ngwe tuhya, ngwe ngwabo byuma bili na kulingiwa kuli yeni binapu byacingenzi. 13 Oloni twaleleleniho kupwa ba kubwahelela mwafwa bimuli na kuyandela bikebyo byayandelele na Kristu mangana mubwahelele na kulisamba ha simbu ya kusholola bumpau bwendi. 14 Nga bali na kumishaula* mwafwa ya lizina lya Kristu, bwaheleleni mwafwa sipilitu ya bumpau, eyo, sipilitu ya Njambi ili hali yeni.

15 Oloni keti kukale umo mukati keni ayanda mwafwa ya kutsiya munu, nambe bwizi, nambe kulinga byuma byabibi, nambe kulikobelesa mu biñanda byambala. 16 Oloni nga umo ayanda mwafwa ya kupwa muka-Kristu, keti azibe shwamwa, oloni atwaleleleho kwana Njambi bumpau na kuyoya ngwe muka-Kristu. 17 Mwafwa ino ikeyo simbu ibanangula mangana kusompa kushangumukile mu njibo ya Njambi. Co nga oku kusompa kushangumukila mukati ketu, co cifwa bati kuli baje kubesi na kwononoka muzimbu waubwa wa Njambi? 18 “Nga munu wa kusungama napande kupanga na nzili mangana Njambi amwobole, co cifwa bati kuli muka-kujeneka kuzibila Njambi lyoba na muka-bubi?” 19 Ngeci, baje bali na kuyanda mwafwa ya kulinga cizango ca Njambi batwaleleleho kulyaka mu maboko a Ishamatanga wa kulongwa oku balinga byuma byabibwa.

5 Ngeci, yange ha kupwa mukulunu ngeci mweni na mukaleho uje nalimwena tuyando twa Kristu, uje lalo akatambwila hamo neni bumpau buje bubakasholola, njili na kulambelela* bakulunu bali mukati keni ngwange: 2 Nyungeni butanga bwa Njambi buje buli mu maboko eni ha kupwa tunyungi babwo, keti mu kumisindiya, oloni kutundilila kwisi ya mbunge ku mesho a Njambi, keti mwafwa ya kushaka kuwanenaho bimo, oloni mu kulyana yeni babenya, 3 keti mu kuyula baje banapu buswana bwa Njambi, oloni pweni mwanja ku butanga. 4 Co nga kanyungi wakama banamusholola, mukatambula cilongo ca bumpau cije kucitsitsibala.

5 Mu ngila imolika, eni bakwenje lyakeni kwisi ya banalume ba kukola.* Oloni mubaboshe likeheseni* omwo mulikwatasana na bakweni mwafwa Njambi akalwisi baka-kulijundula, oloni akamwesa ngozi yakama kuli baka-kulikehesa.

6 Ngeci, likeheseni mwisi ya liboko lya Njambi lya nzili mangana amijundule ha simbu inapande. 7 Umbileni bishoti byeni hali ikeye mwafwa wamyaka mbunge. 8 Singanyekeni mwamubwa, toneni, citozi ceni Liyabolo ali na kwendangana ngwe ndumba ali na kubuluma uje ali na kutonda yalya. 9 Oloni mubyaneneni, kanyameni mu likulahelo, oku muzibuka ngweni tuyando tumuli na kumona tuketwo tuyando twa kulifwa tubali na kuliwana natwo bandolome beni boshe mu kaye. 10 Oloni nga munayanda ha kasimbu kakandondo, Njambi uje washula na ngozi yakama, uje wamisanenene ku bumpau bwendi bwa myaka yoshe mu kulikwatasana na Kristu, ikeye babenya akamanesa kumilongesa, akamikanyamesa, akamikolesa, akamilingisa mwimane na nzili. 11 Kuli ikeye kukale nzili myaka yoshe. Ameni.

12 Munjinamisonekela awa majwi amandondo, njinapangesa Siuvenasi* uje injamona kupwa ndolome wa kulongwa mangana njimishongangeye na kumyana bukaleho bwa kushula ngwange ei ikeyo ngozi yakama ya Njambi ya busunga. Imanenimo na nzili. 13 Munakazi ali mu Babiloni uje ibangwile ngeci mweni namimenekako. Munange Maki nendi namimenekako. 14 Limenekeni umo na mukwabo na kulitsemba kwa cizemo.

Kwoloka kukale neni mubaboshe munalikwatasana na Kristu.