MUKANDA WAMUCIBALI WA PITA

1 Yange Simoni Pita, ndungo na kapositolo ka Yesu Kristu. Njili na kusonekela baje banawana likulahelo lije lili na seho ngwe eli lyetu kwitila mu kusungama kwa Njambi yetu na Mwobole wetu Yesu Kristu ngwange:

2 Ngozi yakama na kwoloka bipwe byabingi kuli yeni kwitila mu mangana a busunga a kuzibuka Njambi nawa a kuzibuka Yesu Mwata wetu. 3 Mwafwa nzili ya Njambi inatwana byuma byoshe bije bitukwasa tuyoye na kutukwasa tulyane kupangela Njambi kwitila mu mangana a busunga a kuzibuka Uje watusanene na bumpau bwendi na bubwa bwendi. 4 Kwitila muli ebi byuma, natukulahesa byuma bya seho, byakama manene, mangana kwitila muli ebi byuma mwase kukala na mibila ya ku sipilitu ngwe Njambi. Nalingi ngoco mwafwa tunatewe ku byuma byabibi bya muno mu kaye bije bikaija mwafwa ya mashungu amabi.

5 Ngeci, pangeni manene na nzili mangana ku likulahelo lyeni mubwezeleleko bubwa, ku bubwa bweni mubwezeleleko mangana, 6 ku mangana eni mubwezeleleko kukwata mbunge, ku kukwata mbunge kweni mubwezeleleko kukolesa, ku kukolesa kweni mubwezeleleko kulyana kupangela Njambi, 7 ku kulyana kupangela Njambi mubwezeleleko cizemo ca kuzema bandolome, ku cizemo ca kuzema bandolome mubwezeleleko cizemo ca kuzema banu boshe. 8 Mwafwa nga ebi byuma bikala muli yeni na kutuma manene, bimilingisa mupange na kwima bushuka omwo mupangesa mangana a busunga a kuzibuka Mwata wetu Yesu Kristu.

9 Mwafwa woshe uje kesi nebi byuma napu kapuputwa, nafwiki mesho endi mangana keti amone ceke,* co nebala ngwendi bamujelesele ku bubi bwendi bwa kusañulu. 10 Ngeci bandolome, pangeni na nzili mangana mutwaleleleho kupwa ba kulongwa ha kupwa banu babanasana na babanangula, mwafwa nga mutwalelelaho kulinga ebi byuma kumukonwa. 11 Co bakamyana kubezika kwakama kwa kukobela mu Bumwene bwa myaka yoshe bwa Mwata wetu na Mwobole wetu Yesu Kristu.

12 Mukemwo njishaka ngwange njimyanukise ebi byuma simbu yoshe nameme mubizibuka, co lalo munazameka mu busunga buje buli muli yeni. 13 Oloni njinamono ngwange kunapande kumyanukisa ebi byuma simbu njicili muno mu tabanakele,* 14 mwafwa njizibuka ngwange tabanakele yange ololo baitundisa ngwe mwanjilekele ha kujela Mwata wetu Yesu Kristu. 15 Simbu yoshe njipanga na nzili mangana nga njinai mwase kwanuka* ebi byuma.

16 Mutwamilekele bya nzili na kukalako kwa Mwata wetu Yesu Kristu, kutwamilekele biñanda bya makuli bibanalimangela banu mu linyanyamena, oloni byemanene ha byuma bitwalimwenenene, bya bukama bwendi. 17 Mwafwa watambwile kasingimiko na bumpau kuli Njambi Tate wa bumpau omwo bamulekele majwi a kwendeka ngwawo: “Ou ikeye Munange, injazema, akanjizibisa kubwaha.” 18 Twazibile awa majwi atunda mwilu mutwakele nendi ha munkinda wa kujela.

19 Mukemwo tunakulahela manene ngwetu byuma byoshe byanendeka Njambi bikalishulisilila. Akeni mbunge ku byuma byoshe ebi. Awa majwi apwe ngwe ndeya mu bimbunge byeni, ije itwa ceke mu lisusulungu (twaleleleniho kulinga ngoco kweta noho hakukakila na ha kutuhuka kwa litota). 20 Mwafwa muzibuka eci cuma ca seho ngweni kukwesi bupolofweto bwa mu Bisoneka buje bwatunda ha biyongola bya banu. 21 Mwafwa bupolofweto kubwezile mu kushaka kwa banu, oloni banu bakele na kwendeka byuma bya kutunda kuli Njambi oku babatwamenena na sipilitu ya kujela.

2 Nameme ngoco, kwezile lalo tupolofweto ba makuli mukati ka banu ngwe mubaija lalo balongesi ba makuli mukati keni. Bakanena tubibunga twa kulimanena na kubyana bene babenyabo uje wabalandele, co balikokela bwasi kunyonga. 2 Co lalo banu babangi bakabatembwinina mu kulinga byuma byabibi kwa kujeneka shwamwa,* co ngila ya busunga bakayendeka mwamubi mwafwa ya aba banu. 3 Co lalo mwafwa ya nuna yabo, bakaminyanyamena na majwi a makuli. Oloni kashitiko kabo kababangwilile kusañulu, kukesi na kulikoka, co kunyonga kwabo kuli mu ngila.

4 Cili bene Njambi kalikelele kwana kashitiko tungelo baje balingile bubi, oloni wabombilile mu Tatarasi* oku nabaka mu malyenge a lisusulungu lya kuzibala manene mangana babandamene kubasompa. 5 Co kalikelele kwana kashitiko kaye ka kusañulu, oloni wanyungililile Nowa muka-kwambulula bya kusungama na bakwabo 7 omwo Njambi wanenele libazi ha kaye ka banu ba kujeneka kuzibila Njambi lyoba. 6 Co mwanyongesele binganda bya Sodoma na Gomola na kubipwisa lito, wabipayele mangana amwese mwanja wa byuma bikaija kulutwe kuli baka-kujeneka kuzibila Njambi lyoba. 7 Co wobwele Lote munu wa kusungama uje wakele na kuziba manene kubabala ku mbunge mwafwa ya bilinga byabibi bya kujeneka shwamwa* bya baka-kupokola mashiko, 8 mwafwa ha litangwa na litangwa ou munu wa kusungama wayandele mwakele mukati kabo mwafwa ya kumona na kuziba bilinga byabo bya kupokola mashiko. 9 Ngeci bene, Yehova azibuka mwakwobwela mu byeseko banu baje banalyana kumupangela, oloni baka-kujeneka kusungama banabanyungila kubanyongesa ha litangwa lya kusompa, 10 maneneni baje bashaka kujwalesa situ ya bakwabo na baje bali na kulumbilisa baje bali na moko.*

Bapwa ba kukaluka na kutindibala, kubesi na lyoba lya kwendeka mwamubi baje bali na bumpau. 11 Oloni tungelo nameme bapwa ba kukanyama, co lalo bakala na nzili, kubesi kwendeka mwamubi balongesi ba makuli, mwafwa tungelo basingimika Yehova. 12 Oloni aba banu bapwa ngwe tusitu ba kujeneka mana baje bakalingi byuma kwa kujeneka kusinganyeka, baje banasemukila kubakwata na kubanyongesa, co bali na kwendeka mwamubi byuma bije kubazibuka. Aba banu bakanyonga mwafwa ya bilinga byabo babenya bije bibatwala ku kunyonga. 13 Fweto yabo ikapwa kashitiko mwafwa ya bilinga byabo byabibi.

Bakazibi kubwaha kuyoya buyoye bwa senga nameme mutanya mwelu. Banapu bitoma na tupenga baje bashaka kusimutwiya bilongesa byabo bya makuli oku bali na kulya hamo neni. 14 Mesho abo anashulu na bukoi, co kubasa kulikela kulinga bubi, co lalo bakakokweya banu ba kuzeya. Bali na mbunge ibanalongesa nuna. Banapu bana ba kusingiwa. 15 Banaseze ngila ya kusungama, co banabongumuna. Banakabangeya ngila ya Balamu muna Beoli, uje wazemene fweto yatambula mu bilinga byabibi. 16 Oloni bamwendekelele mwafwa wapokwele lishiko. Cimulu wa kujeneka kwendeka wendekele ngwe munu na kwonowesa uje kapolofweto kulinga byuma bya bulema.

17 Aba banu banapu tubwelubwelu twa kujeneka mema na mbundu ije ili na kupekumuka na lihunzi lyakama, co banabatulikila lisusulungu lya kuzibala bwii. 18 Byuma bibali na kwendeka kubiziba ngwe bya seho, oloni byangoco. Bali na kulinga byuma byabibi kwa kujeneka shwamwa* na kulingisa banu bakale lalo na mashungu amabi, co bali na kubakokweya balinge lalo byuma byabibi bije bibanaseze. 19 Nameme bali na kubakulahesa kupatuka, oloni bakebo babenya banapu bindungo ba bubi. Mwafwa nga munu bamuhyana kuli mukwabo, co napu ndungo ya uje namuhyana.* 20 Cili bene nga munima ya kutunda oku ku byuma bya mazilo bya mu kaye kwitila mu mangana a busunga a kuzibuka Mwata na Mwobole Yesu Kristu belukila lalo oku ku byuma, co bibahyana. Ngeci, mamaneselelo abo apwa amabi manene kutubakana mashangumukilo abo. 21 Kwakubwa ngwe kubazibukile ngila ya kusungama, kutubakana kuizibuka, co kutundaho lalo baseza mashiko a kujela abatambwile. 22 Bicinendeka cisimo ca busunga binalishulisilila kuli bakebo, cije cendeka ngwaco: “Katali neluka ku bishanjo byendi, co ngulu ibanatanesa nakalimbundunga lalo mu mandoba.”

3 Eni banjazema, ou unapu mukanda wamucibali unjili na kumisonekela ngwe munjamisonekelele wakulibanga. Njili na kumyanukisa mangana njindule cashu ceni ca kusinganyeka mwamubwa. 2 Njili na kumyanukisa ngwange munapande kwanuka bibabangele kwendeka tupolofweto ba kujela, na mashiko a Mwata na Mwobole kwitila mu tupositolo beni. 3 Hakulibanga zibukeni ngweni mu matangwa a mamaneselelo baka-sembulule bakaija na sembulule yabo, co bakalinga byuma kwesekesa na mashungu abo 4 na kwendeka ngwabo: “Kukalako kwendi kubakulahesele kuli kuli? Mwafwa kushwa habatsililile bakukulwila betu byuma binatwalelelaho bene kufwa ngwe mubyafwile kushwa ha kutanga kwa kaye.”

5 Mwafwa bali na kulitangesa ei ñanda ya busunga ya kwendeka ngwayo kusañulu kwakele melu na lifuti-libu lije lyatufukile mu mema na kukala mu mema kwitila mu lijwi lya Njambi. 6 Co kwitila muli ebi byuma, kaye ka mu simbu ije kanyongele mukajalelele na mema. 7 Oloni kwitila mu lijwi lya kulifwa, melu na lifuti-libu biliko hano banabitulikila tuhya, co banabitulika kweta na ha litangwa lya kusompa neli lya kunyongesa banu ba kujeneka kuzibila Njambi lyoba.

8 Oloni eni banjazema, keti mwibale ei ñanda ya kwendeka ngwayo litangwa limo kuli Yehova linapu ngwe myaka 1,000, co myaka 1,000 inapu ngwe litangwa limo. 9 Yehova kesi kwishwala kushulisilila byanakulahesa ngwe mubakasinganyeka banu bamo ngwabo akeshwala, oloni ali na kumwesa mbunge ya kubandamena kuli yeni, mwafwa kashaka ngwendi kukanyonge nambe umo, oloni ashaka ngwendi boshe batenguluke. 10 Nameme ngoco, litangwa lya Yehova likaija ngwe mwizi, co haje ha litangwa lilu likaziluka na cililimo, co byuma mubikashaluka manene bikanyongolokota, co kaye na bipangi bilimo bikajomboloka.

11 Ha kuwana ngwe ebi byuma byoshe bikanyongolokota mu ngila ei, liluleni mangana mumone ngweni munapande kupwa banu ba cifwa muka mu futisi ya kujela na mu bilinga bya kulyana kupangela Njambi 12 omwo mubandamena na kwanuka* kukalako kwa litangwa lya Yehova lije likanyongesa melu mu milangi ya tuhya, co byuma bikanyongolokota mwafwa ya kushaluka manene. 13 Oloni kuli melu amaha na lifuti-libu lyaliha bije bituli na kubandamena kwesekesa nomu mwanakulahesa, co omu mukakala kusungama.

14 Ngeci eni banjazema, ha kuwana ngwe muli na kubandamena ebi byuma, pangeni na nzili mangana akumiwane kumwesi na citoma na kapenga, co lalo akumiwane mu kwoloka. 15 Co moneni mbunge ya kubandamena ya Mwata wetu kupwa kwoboka ngwe mwamisonekelele lalo ndolome yetu itwazema, Paulu, kwesekesa na mana abamwanene. 16 Wendekele ebi byuma ngwe mwakalingi mu mikanda yendi yoshe. Nameme ngoco, byuma bimo bilimo byabikalu kubizibisisa, co baje bali kunzimba* na baje banazeye bali na kubihengesa ngwe mubali na kulinga na Bisoneka bikwabo byoshe, co balinenela kunyonga.

17 Ngeci eni banjazema, ha kuwana ngwe munazibuka ebi byuma, nyanyameni mangana keti mungumuke hamolika nabo na bubi bwa baka-kupokola mashiko na kuwa mu kukolesa kweni. 18 Oloni twaleleleniho kukola mu ngozi yakama na mu mangana a kuzibuka Mwata na Mwobole wetu Yesu Kristu. Kuli ikeye kukale bumpau ha simbu ino na myaka yoshe. Ameni.