MUKANDA WAKULIBANGA WA IWANO

1 Njili na kusoneka ha cuma cije cakeleko kushwa ku mashangumukilo, citwazibile cendeka, citwamwene na mesho etu kapu, citwatalesesele, citwakwatele na maboko etu, cije cinapu lijwi lya kuyoya. 2 (Eyo, eci kuyoya bacisholwele kuli yetu, co twamwene na kwana bukaleho na kwambulula kuli yeni kuyoya kwa myaka yoshe cije cakele kuli Tate, co wacisholwele kuli yetu). 3 Cije citwamwene na kuziba cikeco cituli na kumyambulwila mangana neni mulikwatasane netu. Likwatasano lili mukati ketu neni likelyo likwatasano lili mukati ka Tate na Munendi Yesu Kristu. 4 Co tuli na kusoneka ebi byuma mangana tubwahelele manene.

5 Ou ukewo muzimbu utwazibile kuli ikeye, co tuli na kuwambulula kuli yeni ngwetu: Njambi wapwa ceke, co muli ikeye kumwesi lisusulungu. 6 Nga twendeka ngwetu, “Tuli na kulikwatasana nendi,” oloni tutwalelelaho kwenda mu lisusulungu, oho co tuli na kukwisa, co kutwesi na kuyoya kwesekesa na busunga. 7 Oloni nga tuli na kwenda mu ceke ngwe ikeye mwali mu ceke, oho co tunalikwatasana umo na mukwabo, co lalo maninga a Munendi Yesu atujelesa ku bubi bwoshe.

8 Nga twendeka ngwetu, “Kutwesi na bubi,” tuli na kulikwisa yetu babenya, co busunga kubwesi muli yetu. 9 Nga twendeka bubi bwetu, co atukonekela na kutujelesa ku bilinga bya kuhenga byoshe mwafwa wapwa wa kulongwa, co lalo wa kusungama. 10 Nga twendeka ngwetu, “Kanda tucilingeho bubi,” oho co tuli na kumupwisa muka-makuli, co lalo lijwi lyendi kulyesi muli yetu.

2 Eni bana bange banjazema, njili na kumisonekela ebi byuma mangana keti mulinge bubi. Nameme ngoco, nga kuli umo alinga bubi, tuli na mukwasi* kuli Tate, Yesu Kristu, uje wapwa wa kusungama. 2 Napu mulambu wa kwilwisa banu kuli Njambi,* mwafwa ya bubi bwetu, keti bubi bwetu lika, oloni nobu bwa kaye koshe. 3 Nga tutwalelelaho kwononoka mashiko endi, co tumwesa ngwetu tunamuzibuka. 4 Uje endeka ngwendi, “Njinamuzibuka,” oloni kanyungu mashiko endi, napu muka-makuli, co busunga kubwesi muli ikeye. 5 Oloni nga munu ononoka lijwi lyendi, co amwesa ngwendi cili bene wazema Njambi. Nga tulinga eci, co tumwesa ngwetu tunalikwatasana nendi. 6 Uje atwalelelaho kulikwatasana nendi napande kutwalelelaho kwenda ngwe mwendele Yesu.

7 Eni banjazema, kunjesi na kumisonekela lishiko lyaliha, oloni lije bene lya laja, lije limwakele nalyo kutunda ku mashangumukilo. Eli lishiko lya laja linapu lijwi limwazibile. 8 Njili na kumisonekela lalo lishiko lyaliha lije lyakabangeyeye ikeye lije limuli na kukabangeya neni lalo. Mwafwa lisusulungu lili na kuhwa, co ceke ca busunga cinashangumuka laja kutwa.

9 Uje endeka ngwendi ali mu ceke, oloni wazinda ndolome yendi, acili mu lisusulungu. 10 Uje wazema ndolome yendi atwalelelaho kukala mu ceke, co muli ikeye kumwesi citanwiso. 11 Oloni uje wazinda ndolome yendi ali mu lisusulungu, co ali na kwenda mu lisusulungu, co lalo kazibuka kwali na kuya mwafwa lisusulungu linazibalesa mesho endi.

12 Eni bana bange banjazema, njili na kumisonekela mwafwa banamikonekela bubi bweni mwafwa ya lizina lyendi. 13 Eni baishe ya bana, njili na kumisonekela mwafwa munazibuka uje wakalako kushwa ku mashangumukilo. Eni bakwenje, njili na kumisonekela mwafwa munahyana uje wamubi. Eni bana babandondo, njili na kumisonekela mwafwa munazibukoni Tate. 14 Eni baishe ya bana, njili na kumisonekela mwafwa munazibuka uje wakalako kushwa ku mashangumukilo. Eni bakwenje, njili na kumisonekela mwafwa mu ba kukanyama, co lijwi lya Njambi lili muli yeni, co munahyana uje wamubi.

15 Keti muzeme kaye nambe byuma bili mu kaye. Nga munu azema kaye, co cizemo ca Tate kucesi muli ikeye, 16 mwafwa byuma byoshe bili mu kaye, ipwe mashungu a situ na mashungu a mesho nambe kutembesa byuma byali nabyo munu mu kuyoya,* ebi byuma byoshe kubyatundile kuli Tate, oloni byatunda mu kaye. 17 Co lalo kaye kali na kuhwa hamolika na mashungu ako, oloni uje alinga cizango ca Njambi akalako myaka yoshe.

18 Eni bana bange banjazema, ino inapu simbu ya mamaneselelo ngwe mumwazibile ngweni muka-kulwisa Kristu ali na kwija, nameme hano bene baka-kulwisa Kristu babangi banasholoka, mukemwo tunazibuka ngwetu ino inapu simbu yamamaneselelo. 19 Batundile kuli yetu mwafwa kubapwile betu,* mwafwa ngwe bapwile betu ngwe banatwalelelaho kukala netu. Oloni batundile kuli yetu mangana kusholoke ngwabo keti boshe banapu betu. 20 Co wakujela ikeye wamibwabesele, co lalo mubaboshe muzibuka busunga. 21 Munjili na kumisonekela, keti ngwabo kumuzibuka busunga, oloni mubuzibuka, co lalo kukwesi makuli atunda ku busunga.

22 Iya muka-makuli? Kuma keti uje abyana ngwendi Yesu keti ikeye Kristu ndi? Ou ikeye muka-kulwisa Kristu, uje abyana Tate na Mwana. 23 Woshe abyana Mwana kalikwatasanene na Tate. Woshe ataba Mwana nalikwatasana na Tate lalo. 24 Oloni yeni twaleleleniho kunyunga byuma bimwazibile kushwa ku mashangumukilo. Nga mutwalelelaho kunyunga byuma bimwazibile kushwa ku mashangumukilo, co mutwalelelaho lalo kulikwatasana na Mwana na kulikwatasana na Tate. 25 Co lalo kuyoya kwa myaka yoshe kukekwo kwanatukulahesa.

26 Njili na kumisonekela ebi byuma mwafwa bamo bashaka kumyungumuna. 27 Kumibwabesa camibwabesele ikeye cicili muli yeni, co kukwesi munu napande kumilongesa. Oloni kumibwabesa camibwabesele cikeco cinapande kumilongesa byuma byoshe, co cinapu ca busunga, co kucesi kukwisa. Ngecilika mucamilongesele, twaleleleniho kulikwatasana nendi. 28 Ngeci eni bana bange banjazema, twaleleleniho kulikwatasana nendi mangana mubakumusholola twase kwendeka mu kuzituka na kujeneka kuziba shwamwa na kwiluka munima ha kukalako kwendi. 29 Nga muzibuka ngweni wapwa wa kusungama, muzibuka lalo ngweni woshe uje alinga byuma bya kusungama nasemuka kuli ikeye.

3 Taleni bukama bwa cizemo canatumwesa Tate hakulinga batusane ngwabo tu bana ba Njambi! Co cili bene tu bana bendi. Mukemwo kaye kukatuzibuka, mwafwa kukamuzibukile. 2 Eni banjazema, hano tunapwoni bana ba Njambi, oloni kanda bacitusholwele mutukafwa. Tuzibuka ngwetu mubakamusholola tukapwa ngwe ikeye, mwafwa tukamumona muje bene mwafwa. 3 Co woshe ali neli lilabelelo alijelesa ikeye babenya ngwe omwo uje wapwa wa kujela.

4 Woshe atwalelelaho kulinga bubi atwalelelaho lalo kupokola mashiko, co bubi bwapwa kupokola mashiko. 5 Muzibuka lalo ngweni bamusholwele mangana atundise bubi bwetu, co muli ikeye kumwakele bubi. 6 Woshe atwalelelaho kulikwatasana nendi kesi kutwalelelaho kulinga bubi. Woshe atwalelelaho kulinga bubi kamuzibuka, co lalo kamukulahelele. 7 Eni bana bange banjazema, keti kukakale munu amyungumuna. Uje atwalelelaho kulinga byuma bya kusungama napu wa kusungama ngwe uje mwanapu wa kusungama. 8 Uje atwalelelaho kulinga bubi ali ku mutamba wa Liyabolo, mwafwa Liyabolo natwalelelaho kulinga bubi kushwa ku mashangumukilo.* Ebi bikebyo bibasholwelele Muna Njambi mangana amanese* bipangi bya Liyabolo.

9 Woshe nasemuka kuli Njambi kesi kutwalelelaho kulinga bubi, mwafwa mbuto* ya Njambi itwalelelaho kukala muli ou munu, co kasa kutwalelelaho kulinga bubi mwafwa nasemuka kuli Njambi. 10 Bana ba Njambi na bana ba Liyabolo tubazibukila aha: Woshe katwalelelaho kulinga byuma bya kusungama kesi ku mutamba wa Njambi, co lalo woshe wazinda ndolome yendi kesi ku mutamba wa Njambi. 11 Mwafwa ou ukewo muzimbu umwazibile kushwa ku mashangumukilo ngweni munapande kulizema umo na mukwabo. 12 Keti mupwe ngwe Kaini uje wakele ku mutamba wa uje wamubi, co watsiile ndolome yendi, co bika byamutsiilile? Mwafwa bipangi byendi byapwile byabibi, oloni bya ndolome yendi byapwile bya kusungama.

13 Bandolome, keti mukomoke mukanamizindi kaye. 14 Tuzibuka ngwetu twapwile ngwe tu batsi, oloni hano tuli na kuyoya mwafwa twazema bandolome betu. Uje kesi na cizemo atwalelelaho kupwa wa kutsa. 15 Woshe wazinda ndolome yendi wapwa muka-kutsiya banu, co muzibuka ngweni kukwesi muka-kutsiya banu akawana kuyoya kwa myaka yoshe. 16 Mukemwo twazibuka cizemo mwafwa ya uje wanene kuyoya* kwendi mwafwa yetu, co netu tunapande kwana kuyoya* kwetu mwafwa ya bandolome betu. 17 Oloni woshe ali na bufuko bwa muno mu kaye, co amona ndolome yendi ali mu bujene, oloni abyana kumuzibila mema ku mbunge, co cizemo ca Njambi citwalelelaho bati kukala muli ikeye? 18 Eni bana bange banjazema, cizemo cetu keti cipwe lika ca mu majwi nambe ca ha kanwa, oloni cipwe ca mu bilinga na mu busunga.

19 Ha cuma eci tuzibuka ngwetu tuli ku mutamba wa busunga, co tusimpisa* bimbunge byetu ngwetu Njambi watuzema 20 nameme bimbunge byetu bitupaya, mwafwa Njambi wakama kutubakana bimbunge byetu, co azibuka byuma byoshe. 21 Eni banjazema, nga bimbunge byetu kubitupaya, co twendeka kuli Njambi mu kuzituka, 22 co byoshe bitumulomba atwanabyo, mwafwa tuli na kunyunga mashiko endi na kulinga byuma bije bili na kumuzibisa kubwaha. 23 Cili bene eli likelyo lishiko lyendi lyatwanene: ngwendi tukulahele lizina lya Munendi Yesu Kristu na kulizema umo na mukwabo ngwe mwatushikile ngwendi tulinge. 24 Co lalo uje anyunga mashiko endi atwalelelaho kulikwatasana nendi, co nendi alikwatasana nou munu. Co mwafwa ya sipilitu yatwanene, tuzibuka ngwetu atwalelelaho kulikwatasana netu.

4 Eni banjazema, keti mutabe majwi oshe a kuhwiminina, oloni makeleni majwi a kuhwiminina mangana mumone indi atunda kuli Njambi, mwafwa tupolofweto ba makuli babangi banakobela mu kaye.

2 Majwi a kuhwiminina a kutunda kuli Njambi mwasa kuwazibukila aha: Majwi oshe a kuhwiminina aje ataba ngwawo Yesu Kristu wezile mu situ atunda kuli Njambi. 3 Oloni majwi oshe a kuhwiminina aje kuwataba Yesu, kuwatundu kuli Njambi. Co awa akewo majwi a kuhwiminina a muka-kulwisa Kristu amwazibile ngwawo ali na kwija, co anaija laja mu kaye.

4 Eni bana bange banjazema, muli ku mutamba wa Njambi, co munahyana mwafwa uje nalikwatasana neni wakama kutubakana uje nalikwatasana na kaye. 5 Bali ku mutamba wa kaye mukemwo bali na kwendeka byuma bya kaye, co kaye kali na kubatolilila. 6 Yetu tuli ku mutamba wa Njambi. Woshe nazibuka Njambi atutolilila. Woshe kesi ku mutamba wa Njambi katutolilila. Eci cikeco citukwasa twangunune ñanda ya kuhwiminina ya busunga na ñanda ya kuhwiminina ya makuli.

7 Eni banjazema, tutwaleleleniho kulizema umo na mukwabo, mwafwa cizemo catunda kuli Njambi, co woshe wazema bakwabo nasemuka kuli Njambi, co azibuka Njambi. 8 Woshe kazemene bakwabo kazibuka Njambi, mwafwa Njambi wapwa cizemo. 9 Njambi watujombolwelele cizemo cendi mu ngila ei: Watumine Munendi umolika mu kaye mangana tuwane kuyoya kwitila muli ikeye. 10 Njambi mwamwesele eci cizemo keti ngwabo yetu twamuzemene, oloni Njambi ikeye watuzemene, co watumine Munendi kupwa mulambu wa kutwilwisa kuli ikeye* mwafwa ya bubi bwetu.

11 Eni banjazema, nga omu mukemwo mwatuzemene Njambi, co netu lalo tunapande kulizema umo na mukwabo. 12 Naumo wahi wamonaho laja Njambi. Nga tutwalelelelaho kulizema umo na mukwabo, Njambi atwalelelaho kukala netu, co cizemo cendi cipwa ca kulumbunuka kuli yetu. 13 Tuzibuka ngwetu tutwalelelaho kulikwatasana nendi, co nendi atwalelelaho kulikwatasana netu mwafwa natwana sipilitu yendi. 14 Co lalo netu tunalimwena na mesho etu, co tuli na kwana bukaleho ngwetu Tate natumu Munendi kupwa Mwobole wa kaye. 15 Woshe ataba ngwendi Yesu wapwa Muna Njambi, Njambi atwalelelaho kulikwatasana nowo munu, co owo munu nendi atwalelelaho kulikwatasana na Njambi. 16 Co tunazibuka na kutaba ngwetu Njambi watuzema.

Njambi wapwa cizemo, co woshe atwalelelaho kumwesa cizemo atwalelelaho kulikwatasana na Njambi, co Njambi nendi atwalelelaho kulikwatasana nendi. 17 Mu ngila ei, cizemo banacimwesa manene kuli yetu mangana tukazituke kwendeka* ha litangwa lya kusompa, mwafwa ngecilika mwanafu uje, netu mukemwo mutunafu muno mu kaye. 18 Mu cizemo kumwesi lyoba, oloni cizemo cakama cikatundisa lyoba, mwafwa lyoba likatukibakiba. Cili bene uje ali na lyoba kesi na cizemo ca kulumbunuka. 19 Tukamwesa cizemo, mwafwa ikeye wabangele kutuzema.

20 Nga munu endeka ngwendi, ‘Njazema Njambi,’ oloni wazinda ndolome yendi, wapwa muka-makuli. Mwafwa uje kazemene ndolome yendi uje yamona, kasa kuzema Njambi uje kanda amone. 21 Co natushiki ngwendi woshe wazema Njambi napande lalo kuzema ndolome yendi.

5 Woshe akulahela ngwendi Yesu ikeye Kristu nasemuka kuli Njambi, co lalo woshe wazema Njambi Tate wazema bana ba Njambi. 2 Nga tuzema Njambi na kwononoka mashiko endi, co tuzibuka ngwetu twazema bana ba Njambi. 3 Mwafwa kuzema Njambi kulumbununa kunyunga mashiko endi, co mashiko endi kuwapwile a kulema, 4 mwafwa woshe* nasemuka kuli Njambi nahyana kaye, co likulahelo lyetu likelyo linahyana kaye.

5 Iya asa kuhyana kaye? Kuma keti uje nakulahela ngwendi Yesu wapwa Muna Njambi ndi? 6 Yesu Kristu wezile na mema na maninga keti na mema lika, oloni wezile na mema na maninga. Sipilitu nayo ili na kwana bukaleho, mwafwa sipilitu yapwa busunga. 7 Mwafwa kuli byuma bitatu bili na kwana bukaleho: 8 Sipilitu na mema na maninga, co ebi byuma bitatu binalitombola.

9 Cinonwa bukaleho bwa banu tubutaba, kuma bukaleho bwa Njambi kutwapandele kubutaba ndi? Mwafwa Njambi ikeye bene ali na kwana bukaleho hali Munendi. 10 Munu uje akulahela Muna Njambi nataba mu mbunge yendi bukaleho bwanana Njambi kuli ikeye. Munu uje kakulahelele Njambi namupwisa muka-makuli mwafwa kakulahelele bukaleho bwanana Njambi hali Munendi. 11 Co bukaleho bwali na kwana Njambi obu: Watwanene kuyoya kwa myaka yoshe, co oku kuyoya kuli muli Munendi. 12 Woshe nalikwatasana na Mwana ali noku kuyoya. Uje kalikwatasanene na Muna Njambi kesi noku kuyoya.

13 Njili na kumisonekela ebi byuma mangana muzibuke ngweni muli na kuyoya kwa myaka yoshe, yeni munakulahela lizina lya Muna Njambi. 14 Co eci cikeco citunakulahela* kuli ikeye, ngwetu cuma coshe citulomba kwesekesa na cizango cendi atuziba. 15 Co nga tuzibuka ngwetu atuziba mu byuma byoshe bituli na kulomba, tuzibuka ngwetu tuli na byuma byoshe bitulomba mwafwa tunabilombo kuli ikeye.

16 Nga munu amona ndolome yendi ali na kulinga bubi buje kubutwala ku kutsa, amulombeleleko, co Njambi amwana kuyoya, eyo, ana kuyoya kuli baje kubesi na kulinga bubi buje butwala ku kutsa. Kuli bubi buje butwala ku kutsa. Obu bubi keti bukebo bunjili na kumuleka ngwange abulombelele. 17 Bilinga byoshe bya kuhenga byapwa bubi. Nameme ngoco, kuli bubi kubutwala ku kutsa.

18 Tuzibuka ngwetu woshe nasemuka kuli Njambi kesi kutwalelelaho kulinga bubi, oloni uje nasemuka kuli Njambi* amunyungilila, co uje wamubi kasa kumukwata.* 19 Tuzibuka ngwetu tuli ku mutamba wa Njambi, oloni kaye koshe kali mu nzili ya uje wamubi. 20 Oloni tuzibuka ngwetu Muna Njambi naija, co natwana kuzibisisa* mangana tukale na mangana a kuzibuka uje wapwa wa busunga, co tunalikwatasana na uje wapwa wa busunga kwitila muli Munendi Yesu Kristu. Ou ikeye Njambi wa busunga na kuyoya kwa myaka yoshe. 21 Eni bana banjazema, linyungeni ku tumponya.