KUJOMBOLOLA KUBAJOMBOLWELELE IWANO

1 Kujombolola* kuje kwajombolwele Yesu Kristu, kuje kwamwanene Njambi mangana amwese bindungo bendi byuma bilingiwa ololo. Co Yesu watumine kangelo kendi na kumwesa bizibukiso kuli ndungo yendi Iwano kwitila muli ou kangelo. 2 Ou Iwano ikeye wanene bukaleho bwa lijwi lyendekele Njambi, na bukaleho bwanene Yesu Kristu, eyo, wanene bukaleho bwa byuma byoshe byamwene. 3 Nabwahelela uje atanda mu kutambekela, na baje baziba majwi obu bupolofweto, na baje banyunga byuma bibanasonekamo, mwafwa simbu ibanangula ili hayehi.

4 Yange Iwano. Njili na kusonekela bikungulukilo 7 bije bili mu provinsi ya Asia ngwange:

Kaleni na ngozi yakama na kwoloka bya kutunda kuli Njambi “Uje aliko, uje wakeleko, uje ali na kwija.” Ei ngozi yakama na kwoloka binatundu lalo ku bisipilitu 7 bije bili kulutwe lwa litanda lyendi, 5 binatundu lalo kuli Yesu Kristu “Mukaleho wa Kulongwa,” “ntwatwa kutunda ku batsi,” na “Muka-kuyula bimyene ba hasi.”

Kuli uje watuzema uje watupatwile ku bubi bwetu kwitila mu maninga endi babenya, 6 co natupwisa bumwene na tupilistu kuli Njambi yendi na Ishe, eyo, kuli ikeye kukale bumpau na nzili myaka yoshe. Ameni.

7 Taleni! Ali na kwija mu mashelwa, co mesho oshe akamumona, hamolika na baje bamutubile. Co miyati yoshe ya hasi ikamwesa busiwa mwafwa yendi. Mukemwo bene, Ameni.

8 “Yange Aufa na Omega,”* ngwendi Yehova Njambi, “Uje aliko, uje wakeleko, uje ali na kwija, Muka-nzili Yoshe.”

9 Yange ndolome yeni Iwano, uje nalikwatasana neni mu tuyando na mu bumwene na mu kukolesa mu kulikwatasana na Yesu. Njakele ha liñanda lya Patimosi mwafwa ya kwendeka bya Njambi na kwana bukaleho bwa Yesu. 10 Sipilitu yanjilingisile njikale mu litangwa lya Mwata. Co kunima yange, njazibile lijwi lyakama ngwe lupembo 11 ngwalyo: “Biumona bisoneke mu libulu lya kuzenga na kulituma ku bikungulukilo 7: ku Efeso, ku Simina, ku Pegamamu, ku Tiatila, ku Sadisi, ku Filadefia na ku Laudisiya.”

12 Njatengulukile ngwange njimone ali na kunjendekesa. Munjatengulukile, njamwene bitumbikilo bya bindeya bya goldi bya kupwa 7. 13 Mukati ka citumbikilo ca bindeya njamwene umo wa kufwa ngwe muna munu, nazala cizalo cacilaha kweta na ku mendi, na mwiba wa goldi ha nulo. 14 Binkambu bya ku mutwe wendi byapwile bya kutoka ngwe bwanda bwa kutoka, ngwe mema a kukonda, co mesho endi apwile ngwe milangi ya tuhya. 15 Mendi endi apwile ngwe kopa yaibwa nga ili na kwenyuka mu lutengo, co lijwi lyendi lyafwile ngwe kucuma kwa mema amangi. 16 Co mu liboko lyendi lya cilyo mwakele bingongonosi 7, co mu kanwa kendi mwakele na kutunda moko ya mukwale yailaha, ya kubambuka, ya bubela kubali, co cihanga cendi cabyakumine ngwe litangwa nga lyabyakula manene. 17 Munjamumwene njawililile ku mendi endi ngwe munu wa kutsa.

Co wanjikambekele liboko lyendi lya cilyo na kunjileka ngwendi: “Keti uzibe lyoba. Yange Wakulibanga na Wamamaneselelo, 18 na wakuyoya, co njatsile, oloni tala! Njili na kuyoya myaka yoshe, co njili na masapi a butsi nawa a Cihilo.* 19 Co soneka byuma biunamono, na byuma biliko, na byuma bije bikalingiwa munima yebi. 20 Ebi bikebyo bililumbununa lihungu lya kujela lya bingongonosi 7 bije biunamono mu liboko lyange lya cilyo, neli lya bitumbikilo bya bindeya bya goldi bya kupwa 7: Bingongonosi 7 bimanena tungelo ba bikungulukilo 7, co bitumbikilo bya bindeya 7 bimanena bikungulukilo 7.

2 “Sonekela kangelo wa cikungulukilo ca ku Efeso ngwobe: Ebi bikebyo byuma byali na kwendeka uje nakwata bingongonosi 7 mu liboko lyendi lya cilyo, co ali na kwendangana mukati ka bitumbikilo bya bindeya bya goldi bya kupwa 7 ngwendi: 2 ‘Njizibuka bilinga byobe na kufwitangana kwobe na kukolesa kwobe. Njizibuka ngwange kuwasa kwecelela banu bababi, co lalo njizibuka ngwange ukeseka baje bali na kwendeka ngwabo bapwa tupositolo okuni keti tupositolo, co unawana ngwobe banapu baka-makuli. 3 Unatwalelelaho kukolesa na kukakateya mwafwa ya lizina lyange, co kuwajukile. 4 Nameme ngoco, bukalu bunjinawana kuli yobe obu: unaseze cizemo ciwakele naco hakulibanga.

5 “‘Anuka haje hawakele haje haunau, co tenguluka na kulinga bilinga bije biwalingile hakulibanga. Nga kuutenguluka, njija kuli yobe, co njakutundisa citumbikilo cobe ca bindeya mu mwela waco. 6 Nameme ngoco, kuli cuma cimo ciuli na kulinga mwamubwa: wazinda bilinga bya kacibunga ka kulimanena ka Nikolasi kaje kanjazinda nange. 7 Uje ali na matwi azibe biili na kwendeka sipilitu ku bikungulukilo, ngwayo: Uje ahyana, njikamutabesa kulya ku muti wa kuyoya, uje uli mu paradaisi ya Njambi.’

8 “Co sonekela kangelo wa cikungulukilo ca ku Simina ngwobe: Ebi bikebyo byuma byali na kwendeka ‘Wakulibanga na Wamamaneselelo,’ uje watsile, co ali na kuyoya lalo, ngwendi: 9 ‘Njizibuka kayando kobe na buhutu bwobe nameme unafuku, co njizibuka kushaula kubali na kukushaula baje bakalisana ngwabo Bajuda okuni keti Bajuda, oloni bapwa sinagogi ya Satana. 10 Keti uzibe lyoba mwafwa ya tuyando tuuliwana natwo. Tala! Liyabolo atwalelelaho kwaka bamo beni mu kamenga mangana bamyeseke mu bingila byoshe, co muliwana na kayando ha matangwa 10. Pwa wa kulongwa kweta na ku kutsa kwobe, co njikakwana cilongo ca mwonyo. 11 Uje ali na matwi azibe biili na kwendeka sipilitu ku bikungulukilo, ngwayo: Uje ahyana kakatsi kutsa camucibali.’

12 “Sonekela kangelo wa cikungulukilo ca ku Pegamamu ngwobe: Ebi bikebyo byuma byali na kwendeka uje ali na moko ya mukwale yailaha, ya kubambuka, ya bubela kubali, ngwendi: 13 ‘Njizibuka kuwakala, kukekwo bene kuje kuli litanda lya Satana. Nameme ngoco, unatwalelelaho kukwata na nzili lizina lyange, co kuwabyanene kunjikulahela nameme mu matangwa a Antipasi, mukaleho wange wa kulongwa uje ibatsiilile okwo kumwakala, kuje kwakala Satana.

14 “‘Nameme ngoco, bukalu bumo bunjinawana kuli yobe obu: kuli bamo mukati kobe bali na kukabangeya bilongesa bya Balamu uje walongesele Balaki kwakela bana ba Isalele citanwiso, mangana balye byakulya bibanana ku tumponya na kulinga bupangala.* 15 Mu ngila imolika, mukati kobe muli banu bamo banakakateya ku bilongesa bya kacibunga ka kulimanena ka Nikolasi. 16 Ngeci, tenguluka. Nga kuulingi ngoco, njili na kwija bwasi-bwasi kuli yobe, co njakulwa nabo na moko ya mukwale yailaha ya mu kanwa kange.

17 “‘Uje ali na matwi azibe biili na kwendeka sipilitu ku bikungulukilo, ngwayo: Uje ahyana, njimwanako manna ya kushweka, na kumwana limanya lya kutoka. Haje ha limanya banasonekaho lizina lyaliha lije na umo wahi alizibuka kubanga uje alitambula.’

18 “Sonekela kangelo wa cikungulukilo ca ku Tiatila ngwobe: Ebi bikebyo byuma byali na kwendeka Muna Njambi uje ali na mesho ngwe milangi ya tuhya na mendi ngwe kopa yaibwa, ngwendi: 19 ‘Njizibuka bilinga byobe, na cizemo cobe na likulahelo lyobe na cipangi cobe na kukolesa kwobe. Njizibuka ngwange bilinga byobe bya ololo binatubakana bije biwalingile hakulibanga.

20 “‘Nameme ngoco, bukalu bunjinawana kuli yobe obu: uli na kwecelela uje munakazi wa lizina lya Jezebele, uje akalisana ngwendi kapolofweto, co ali na kulongesa na kungumuna bindungo bange mangana balinge bupangala* na kulya byuma bibanana ku tumponya. 21 Njamwanene simbu ya kutenguluka, oloni shendi kutunda ku bupangala* bwendi. 22 Tala! Ololo njimulingisa abinje manene, co baje bali na kulinga nendi bukoi njibalingisa baliwane na kayando kakama, kubanga nga batenguluka na kuseza bilinga byendi. 23 Njikatsiya bana bendi na mushongo uje utsiya, mangana bikungulukilo byoshe bizibuke ngwabyo yange njikelula bimbunge na bisinganyeka bya mukati, co njikana munu na munu kwesekesa na bilinga byendi.

24 “‘Oloni yeni boshe ba mu Tiatila, yeni boshe kumwesi na kukabangeya ebi bilongesa bya Jezebele, yeni kumwazibukile ebi bilongesa bibali na kusana ngwabo “byuma bya kuloba bya Satana,” njimileka ngwange: kunjimitwiki citele cikwabo. 25 Nameme ngoco, twaleleleniho kukwata na nzili bimuli nabyo kweta noho hanjikezila. 26 Woshe ahyana na kunyunga bingila byange kweta na kushongo, njikamwana moko hali baka-mafuti 27 ngwe munjinatambwila moko kuli Tate. Co akayula* banu na mulamu wa cikubo mangana akababwabwanye ngwe ndeho ya buma ibanabwabwanya. 28 Co njikamwana ngongonosi ya mutondo. 29 Uje ali na matwi azibe biili na kwendeka sipilitu ku bikungulukilo.’

3 “Sonekela kangelo wa cikungulukilo ca ku Sadisi ngwobe: Ebi bikebyo byuma byali na kwendeka uje ali na bisipilitu 7 bya Njambi na bingongonosi 7, ngwendi: ‘Njizibuka bilinga byobe. Uli na lizina lika ngwabo uli na kuyoya, oloni unatsi. 2 Tona, co kanyamesa byuma binasalako bije byashakele kutsa, mwafwa njinawana ngwange kuwapangele bipangi byobe mu kushula ku mesho a Njambi yange. 3 Ngeci, twalelelaho kwanuka biwatambwile nebi biwazibile na kutwalelelaho kubinyunga na kutenguluka. Cili bene nga kuutenguluka, njikaija ngwe mwizi, co kuukazibuka nambe kamandondo simbu injikaija kuli yobe.

4 “‘Nameme ngoco, uli na banu babandondo mu Sadisi baje kubajwalesele bizalo byabo, co bakenda nange oku banazala bizalo bya kutoka, mwafwa banapande. 5 Uje ahyana, akazala bizalo bya kutoka, co kunjikatundisa lizina lyendi mu libulu lya kuyoya, oloni njikataba lizina lyendi ku mesho a Tate na ku mesho a tungelo bendi. 6 Uje ali na matwi azibe biili na kwendeka sipilitu ku bikungulukilo.’

7 “Sonekela kangelo wa cikungulukilo ca ku Filadefia ngwobe: Ebi bikebyo byuma byali na kwendeka wakujela, uje wapwa wa busunga, uje ali na sapi ya Devidi, uje akalingi nga nashokolola, wahi asa kushoka, co nga nashoko, wahi asa kushokolola, ngwendi: 8 ‘Njizibuka bilinga byobe. Tala! Njinakushokolwela cikolo cije naumo wahi asa kucishoka. Njizibuka lalo ngwange uli na nzili yaindondo, co unanyungu lijwi lyange na kupwa wa kulongwa ku lizina lyange. 9 Tala! Njikalingisa baje bali mu sinagogi ya Satana baje bakendeka ngwabo bapwa Bajuda bene okuni keti Bajuda, oloni bali na kukwisa, njikabalingisa baije na kutsikama ku mendi obe na kubalingisa bazibuke ngwabo njakuzema. 10 Ha kuwana ngwe unanyungu biwazibile bya kukolesa kwange,* nange njikakunyunga ha ola ya kweseka ije ili na kwizila lifuti-libu lyoshe kwa kweseka baje bakala ha lifuti-libu. 11 Njili na kwija bwasi-bwasi. Twalelelaho kukwata na nzili biuli nabyo mangana keti kukale umo akunyeka cilongo cobe.

12 “‘Uje ahyana, njikamupwisa ngunzi mu tempele ya Njambi yange, co kakatundumo lalo. Njikamusoneka lizina lya Njambi yange na lizina lya nganda ya Njambi yange, likelyo Jelusalema Yaiha ije ili na kusikumuka kutunda mwilu kuli Njambi yange, co lalo njikamusoneka lizina lyange lyaliha. 13 Uje ali na matwi azibe biili na kwendeka sipilitu ku bikungulukilo.’

14 “Sonekela kangelo wa cikungulukilo ca ku Laudisiya ngwobe: Ebi bikebyo byuma byali na kwendeka Ameni, mukaleho wa kulongwa, wa busunga, wakulibanga ku byuma byanatanga Njambi, ngwendi: 15 ‘Njizibuka bilinga byobe, ku kutonola kuuwila, ku kushaluka kuuwila. Ngwe ngwabo unatonwele nambe kushaluka. 16 Ngeci, ha kuwana ngwe u wa ngwinyengwinye, ku kushaluka kuuwila, ku kutonola kuuwila, njikujekula mu kanwa kange. 17 Mwafwa uli na kwendeka ngwobe, “Njinafuku, co njinalikungulwila bufuko, co na cuma cimo cinjitonda cahi,” oloni kuuzibuka ngwobe unabindama, uli na kuzibisa ngozi, u kahutu, u kapuputwa, co lalo uli mutotototo. 18 Njikushongangeya ngwange ulande goldi ibanajelesa na tuhya kuli yange mangana ufuke na kulanda bizalo bya kutoka mangana uzale, kutewa banu bamona mutotototo wobe, co uziba shwamwa. Landa na bumbanda bwa mesho ukwite mu mesho obe mangana umone.

19 “‘Boshe baje banjazema, njibendekela na kubanangula. Ngeci, kaleni na ntwima, co tengulukeni. 20 Tala! Njinemana ku cikolo, njili na kutota. Nga umo aziba lijwi lyange na kushokolola ku cikolo, co njikobela mu njibo yendi na kulya nendi kulya kwa mangwezi, co nendi alya nange. 21 Uje ahyana, njikamutabesa atumame nange ha litanda lyange, ngwe yange munjahyanene, co njatumama na Tate ha litanda lyendi. 22 Uje ali na matwi azibe biili na kwendeka sipilitu ku bikungulukilo.’”

4 Munima yebi, njamwene cikolo ca kushokoloka mwilu, co lijwi lyakulibanga linjazibile lije lyanjendekesele lyazibikile ngwe lupembo, lyendekele ngwalyo: “Ija muno mwilu, co njakukumwesa byuma binapande kulingiwa.” 2 Munima lika yebi, sipilitu ya Njambi yashangumukile kupanga muli yange, co njamwene litanda lije lyakele mu mwela walyo mwilu, co kwakele umo watumamene haje ha litanda. 3 Uje watumameneho washolokele ngwe limanya lya jasipa na limanya lya sadiasi,* co nkongolo ije yasholokele ngwe limanya lya emarodi yazengelekele litanda lyoshe.

4 Co matanda 24 azengelekele lije litanda. Haje ha matanda hatumamene bakulunu 24 baje bazalele bizalo bya kutoka, co ku mitwe yabo kwakele bilongo bya goldi. 5 Kuje ku litanda kwatundile mihyato na majwi na bililimo. Kulutwe lwalyo kwakele bindeya 7 bya tuhya bije byakele na kushukuma, co ebi bimanena bisipilitu 7 bya Njambi. 6 Kulutwe lwa litanda kwakele cuma cakufwa ngwe kalunga-ndonga uje washolokele ngwe gilasi, ngwe limanya lya kristo.

Haje hali litanda na kuzengeleka litanda hakele byakutanga bya kuyoya biwana bije byashulile na mesho ha mubila woshe kulutwe na kunima. 7 Cakutanga ca kuyoya cakulibanga cafwile ngwe ndumba, co cakutanga ca kuyoya camucibali cafwile ngwe ngombe, co cakutanga ca kuyoya camucitatu, cakele na cihanga ngwe ca munu. Co cakutanga ca kuyoya camuciwana cafwile ngwe ngonga uje ali na kupulula. 8 Cimo na cimo ca bije byakutanga bya kuyoya biwana cakele na mambaba 6, aje mambaba ashulile na mesho hanja na mukati. Co simbu yoshe butsiki na mutanya bikendeka ngwabyo: “Wa kujela, wa kujela, wa kujela Yehova Njambi, Muka-nzili yoshe uje wakeleko, uje aliko, uje ali na kwija.”

9 Simbu yoshe ebi byakutanga bya kuyoya mubikana bumpau na kasingimiko na kukandelela kuli uje natumama ha litanda uje wayoya myaka yoshe, 10 bakulunu 24 bakatsikama ku mesho a Uje natumama ha litanda na kulemesa uje wayoya myaka yoshe na kwaka bilongo byabo kulutwe lwa litanda na kwendeka ngwabo: 11 “Obe Yehova Njambi yetu, unafwila kutambula bumpau na kasingimiko na nzili, mwafwa yobe watangele byuma byoshe, co mwafwa ya cizango cobe mukemwo byakeleko, co wabitangele.”

5 Co njamwene libulu lya kuzenga lya kusoneka noku-noku,* lije libapatele na tupateso 7 lili mu liboko lya cilyo lya Uje watumamene ha litanda. 2 Co njamwene kangelo wa nzili ali na kutambeka ngwendi: “Iya nafwila kupatununa tupateso twa libulu lya kuzenga na kulizengununa?” 3 Oloni naumo wahi mwilu nambe ha lifuti-libu nambe mwisi ya lifuti-libu wasele kuzengununa lije libulu lya kuzenga nambe kutalamo. 4 Co njalilile manene, mwafwa kubawanene nambe umo uje wafwililile kuzengununa lije libulu lya kuzenga nambe kutalamo. 5 Oloni umo wa baje bakulunu wanjilekele ngwendi: “Oloka, keti ulile. Tala! Ndumba wa ku muyati wa Juda, muzi wa Devidi nafungulula mangana apatunune tupateso 7 twa libulu lya kuzenga na kulizengununa.”

6 Co njamwene muna manga uje washolokele ngwe bamutsiile nemana kuje kuli litanda* na byakutanga bya kuyoya biwana na mukati ka bakulunu. Ou muna manga wakele na mambinga 7 na mesho 7, co aje mesho emanena bisipilitu 7 bya Njambi bije bibanatumu mu kaye koshe. 7 Co haje bene washwenene na kwambata libulu lya kuzenga mu liboko lya cilyo lya uje watumamene ha litanda. 8 Mwambatele lije libulu, byakutanga bya kuyoya biwana na bakulunu 24, batsikamene kulutwe lwa Muna Manga, co umo na umo wabo wakele na kalyalya na malonga a goldi a kushula isense. (Ei isense imanena malombelo a bakujela.) 9 Co bakele na kwimba mwaso wauha ngwabo: “Unafwila kwambata eli libulu lya kuzenga na kupatununa tupateso twalyo, mwafwa bakutsiile, co walandelele Njambi banu na maninga obe kutunda mu miyati yoshe na mu bindaka na mu banu na mu mafuti, 10 co wabapwisile bumwene na tupilistu kuli Njambi yetu, co bakapwa bimyene na kuyula lifuti-libu.”

11 Co njamwene tungelo babangi banazengeleka litanda na byakutanga bya kuyoya na bakulunu, co njazibile na majwi abo. Kutuma kwabo bapwile bita bya makulukazi na makulukazi a makulukazi, 12 co bakele na kwendeka na lijwi lya kutaluka ngwabo: “Muna Manga uje ibatsiile, ikeye nafwila kutambula nzili na bufuko na mana na kukanyama na kasingimiko na bumpau na kushangazala.”

13 Co njazibile byakutanga byoshe mwilu na ha lifuti-libu na mwisi ya lifuti-libu, na ha kalunga-ndonga na byuma byoshe byakalamo byendeka ngwabyo: “Kuli ou natumama ha litanda na kuli Muna Manga kukale kushangazala na kasingimiko na bumpau na nzili myaka yoshe.” 14 Bije byakutanga bya kuyoya biwana byakele na kwendeka ngwabyo “Ameni.” Co bakulunu batsikamene na kulemesa Njambi.

6 Co njamwene Muna Manga mwapatunwine kapateso kamo ka tupateso 7, co njazibile cimo ca bije byakutanga bya kuyoya biwana cendeka na lijwi lya kufwa ngwe cililimo ngwaco: “Ija!” 2 Co munjatalele, njamwene kabalu wa kutoka, co uje walondeleho wakele na buta bwa lusipa. Bamwanene cilongo, co waile oku afungulula na kumaneselela kufungulula kwendi.

3 Mwapatunwine kapateso kamucibali, njazibile cakutanga ca kuyoya camucibali cendeka ngwaco “Ija!” 4 Kwasholokele kabalu mukwabo wa kubenga ngwe tuhya, co uje walondeleho bamutabesele kutundisa kwoloka mu kaye, mangana banu balitsiyange, co lalo bamwanene moko ya mukwale yakama.

5 Mwapatunwine kapateso kamucitatu, njazibile cakutanga ca kuyoya camucitatu cendeka ngwaco “Ija!” Co njatalele, co njamona kabalu wa kuzibala, co uje walondeleho wakwatele bipeseleso bibali mu liboko lyendi. 6 Njazibile cuma cazibikile ngwe lijwi mukati ka byakutanga bya kuyoya biwana cendeka ngwaco: “Kilo imo ya tiliku bailande na dinari* imo, co makilo atatu a mbali bawalande na dinari imo, co keti mubiise mazi a olive na binyu.”

7 Mwapatunwine kapateso kamuciwana, njazibile lijwi lya cakutanga ca kuyoya camuciwana lyendeka ngwalyo: “Ija!” 8 Co njatalele, co njamona kabalu wa kutokoloka, co uje walondeleho lizina lyendi ikeye Kutsa. Co Cihilo* cakele na kumukaba mu likosi. Co babanene moko ha mutamba umo wa mitamba iwana ya lifuti-libu mangana batsiye banu kupangesa moko ya mukwale yailaha, na njala, na mushongo uje utsiya, na bikashama ba hasi.

9 Mwapatunwine kapateso kamucitanu, njatalele kwisi ya mutula, co njamwene myonyo* ya baje babatsiilile lijwi lya Njambi na bukaleho bubanene. 10 Co batambekele ngwabo: “Obe Mwata Wahakamwa ya Byoshe, yobe wa kujela, wa busunga, tangwa lika liukasompa na kulinga shambandinga kuli baje bakala hasi mwafwa ya maninga etu abanetila?” 11 Co umo na umo wabo bamwanene cizalo ca kutoka, co babalekele ngwabo bahwimeko kamandondo, kweta noho haikapwilamo nambala ya bakwabo bindungo na bandolome babo baje bakele hayehi na kubatsiya ngwe mubatsiilile bakebo.

12 Co njamwene mwapatunwine kapateso ka bu 6, co kwakele lindunduma lyakama, co litangwa lyazibalele bwii ngwe cikeleya ca maka,* co ngonde yoshe yafwile ngwe maninga, 13 co bingongonosi bya mwilu byawililile hasi ngwe bikuyu bya kujeneka kuhya mubikau ku muti nga unaninganga na lihunzi lyakama. 14 Co lilu balibungile ngwe mubakabungu libulu lya kuzenga, co lyazimukile, co malundu oshe na mañanda oshe bawatundisile mu myela yawo. 15 Co bimyene ba hasi na bimyata bakama na bakulunu ba maswalale na baka-kufuka na baka-nzili na bindungo boshe na banu boshe ba kupatuka bakalishwekele mu manzenzengoma na mu mamanya a ku minkinda. 16 Co batwaleleleleho kuleka minkinda na mamanya ngwabo: “Tuwileni na kutushweka ku mesho a Uje natumama ha litanda na ku butenu bwa Muna Manga, 17 mwafwa litangwa lyakama lya butenu bwabo linete, co iya asa kwimana?”

7 Munima yebi, njamwene tungelo bawana banemana mu bimbango biwana bya lifuti-libu, banakwata na nzili mahunzi awana a lifuti-libu mangana keti kukale lihunzi lihuwila ha lifuti-libu nambe ha kalunga-ndonga nambe ha muti woshe-woshe. 2 Co njamwene kangelo mukwabo akanduka kutunda ku butuhukilo bwa litangwa* oku nakwata ciganto ca Njambi wa kuyoya. Co watambekele kuli baje tungelo bawana, baje batambwile moko ya kubiisa kaye na kalunga-ndonga, 3 ngwendi: “Keti mubiise lifuti-libu nambe kalunga-ndonga nambe miti, kubanga noho hatukamanesela kwaka biganto ha maholo a bindungo ba Njambi yetu.”

4 Co njazibile nambala ya baje babakele ciganto, bapwile 144,000, batundile ku miyati yoshe ya bana ba Isalele:

9 Munima yebi njatalele, co njamwene mbunga yakama ya banu baje naumo wahi wasele kubalaba, baje batundile mu mafuti oshe na mu miyati yoshe na mu banu boshe na mu bindaka byoshe, bemanene halutwe lwa litanda na halutwe lwa Muna Manga oku banazala bizalo bya kutoka, co bakwatele minango ya mashakabale mu maboko abo. 10 Co batwaleleleho kutambeka na lijwi lya kutaluka ngwabo: “Kwoboka kwetu kwatunda kuli Njambi uje natumama ha litanda na kuli Muna Manga.”

11 Tungelo boshe na bakulunu na byakutanga bya kuyoya biwana bemanene oku banazengeleka litanda, co batsikamene halutwe lwa litanda na kulemesa Njambi, 12 oku bendeka ngwabo: “Ameni. Kuli Njambi yetu kukale kushangazala na bumpau na mana na kukandelela na kasingimiko na nzili na kukanyama myaka yoshe. Ameni.”

13 Umo wa baje bakulunu wanjihwile ngwendi: “Beya aba banazala bizalo bya kutoka, co banatundu kuli?” 14 Haje bene njamukumbulwile ngwange: “Mwata, yobe uzibuka.” Co wanjilekele ngwendi: “Aba bakebo banatundu mu kayando kakama, co banakushu bizalo byabo na kubijelesa mu maninga a Muna Manga. 15 Mukemwo bali halutwe lwa litanda lya Njambi, co bali na kumupangela cipangi ca kujela butsiki na mutanya mu tempele yendi, co Uje natumama ha litanda akajangumwina tenti yendi hali bakebo. 16 Kubakatsi lalo njala nambe kutsa lalo lihwila, co lalo kubakenye na litanya nambe kubabuka na kushaluka, 17 mwafwa Muna Manga uje ali kuje kuli litanda* akabanyunga na kubatwamenena ku tubwelubwelu twa mema a kuyoya. Co Njambi akasikumuna misozi yoshe ku mesho abo.”

8 Mwapatunwine kapateso ka bu 7, mwilu mwolokele kuluu ha simbu ya kweta ku hafu ya ola. 2 Co njamwene tungelo 7 baje bakemana ku mesho a Njambi, co babanene mapembo 7.

3 Co kangelo mukwabo uje wakwatele cikango ca isense ca goldi wezile na kwimana ku mutula, co bamwanene isense yaingi mangana ayane hamolika na malombelo a bakujela boshe ha mutula wa goldi uje wakele kulutwe lwa litanda. 4 Co bwisi bwa isense ije yakele mu liboko lya kangelo hamolika na malombelo a bakujela byaile ku mesho a Njambi. 5 Oloni haje bene uje kangelo wambatele cikango ca isense na kucishulisa na tuhya twa haje ha mutula na kutumbila ha lifuti-libu. Co kwakele bililimo na majwi na mihyato na lindunduma. 6 Co baje tungelo 7 baje bakwatele mapembo 7 balibwaheselele kuwohyesa.

7 Kangelo wakulibanga wohyesele lupembo lwendi. Co kwakele nyonzi ya mamanya na tuhya bije byalishingasanene na maninga, co babyumbilile hasi. Co mutamba umo wa mitamba itatu ya ha lifuti-libu bawenyekele, co mutamba umo wa mitamba itatu ya miti bawenyekele, co bimena byoshe babyenyekele.

8 Kangelo wamucibali wohyesele lupembo lwendi. Co cuma ca kufwa ngwe munkinda wakama uje uli na kwenya na tuhya bacumbilile mu kalunga-ndonga. Co mutamba umo wa mitamba itatu ya kalunga-ndonga watengulukile kupwa maninga. 9 Co mutamba umo wa mitamba itatu ya byakutanga bya kuyoya bya mu kalunga-ndonga watsile, co mutamba umo wa mitamba itatu ya mato watabozokele.

10 Kangelo wamucitatu wohyesele lupembo lwendi. Co ngongonosi yakama ije yakele na kushukuma ngwe milangi yawile kutunda mwilu, co yawililile ha mutamba umo wa mitamba itatu ya bindonga na ha tubwelubwelu twa mema. 11 Lizina lya ije ngongonosi lyapwile Cimena ca Kulula. Co mutamba umo wa mitamba itatu ya mema watengulukile kupwa wa kulula ngwe cije cimena ca kulula, co awa mema atsiile banu babangi mwafwa awa mema apwile a kulula.

12 Kangelo wamuciwana wohyesele lupembo lwendi. Co mutamba umo wa mitamba itatu ya litangwa na mutamba umo wa mitamba itatu ya ngonde na mutamba umo wa mitamba itatu ya bingongonosi babipupile mangana mutamba umo wa mitamba itatu yabyo uzibale, co kukwakele ceke ku mutamba umo wa mitamba itatu ya mutanya na ku mutamba umo wa mitamba itatu ya butsiki.

13 Co njamwene ngonga ali na kupulula mu bukambwila, co lalo njamuzibile endeka na lijwi lya kutaluka ngwendi: “Lubinda, lubinda, lubinda lweni muli hasi, mwafwa ya bilumo bya mapembo a tungelo batatu banasalako baje bali hayehi na kwohyesa mapembo abo!”

9 Kangelo wamucitanu wohyesele lupembo lwendi, co njamwene ngongonosi ije yawililile hasi kutunda mwilu, co bayanene sapi ya ku mbulu.* 2 Ije ngongonosi yashokolwele kuje ku mbulu,* co bwisi bwa kufwa ngwe buje bukakumuka mu lutengo bwakakumukile mu mbulu,* co buje bwisi bwazibalesele litangwa na mpunzi. 3 Co muje mu bwisi mwatundile bimbimba baje bezile ha lifuti-libu, co babanene moko ije bene moko ibali nayo na manyewe ba ha lifuti-libu. 4 Babalekele ngwabo keti babiise mwila nambe bimena nambe miti, oloni bashume lika banu baje kubesi na ciganto ca Njambi ha maholo abo.

5 Co baje bimbimba kubabatabesele kutsiya aba banu, oloni babatabesele lika babayandese ha bingonde 5, co aka kayando kafwile ngwe kayando kakamono munu nga linyewe namushumu. 6 Mu matangwa aje, banu bakashakezeka kutsa, oloni kubakaciwana, co bakashungwiya ngwabo batse, oloni kutsa cikabatewa.

7 Baje bimbimba basholokele ngwe tubalu baje banalibwahesela kuya ku nzita. Ku mitwe yabo kwakele byuma bije byasholokele ngwe bilongo bya goldi, co bihanga byabo byafwile ngwe bihanga bya banu, 8 oloni bakele na binkambu ngwe bya banakazi. Mayo abo apwile ngwe mayo a bindumba, 9 co bakele na bikinga-nulo bya kufwa ngwe bya bikubo, co bilumo bya mambaba abo byazibikile ngwe bilumo bya matemba abali na kukoka tubalu baje bashatukila ku nzita. 10 Co lalo bakele na mikila ije yakele na tumambimbo ngwe manyewe, co ku mikila yabo kukekwo kwakele nzili ya kuzibisa banu kubabala ha bingonde bitanu. 11 Bali na mwene yabo, uje napu kangelo muka-kutala bya mbulu.* Lizina lyendi mu Cihebelu ikeye Abadoni,* oloni mu Cigriki lizina lyendi Apolyoni.*

12 Lubinda lumo luneti. Taleni! Kuli lubinda lukwabo lubali lucili na kwija munima yebi byuma.

13 Kangelo wa bu 6 wohyesele lupembo lwendi. Co njazibile lijwi litunda ku mambinga a ku mutula wa goldi uje uli ku mesho a Njambi 14 lyendeka kuli kangelo wa bu 6 uje wakwatele lupembo ngwalyo: “Zitula tungelo bawana baje babanakutu ku ndonga yakama ya Yufreti.” 15 Co baje tungelo bawana baje balibwaheselele ije ola, na lije litangwa, na ije ngonde, na uje mwaka, babazitwile mangana batsiye mutamba umo wa mitamba itatu ya banu.

16 Kutuma kwa maswalale baje balondele tubalu kwapwile makulukazi abali a makulukazi.* Njazibile nambala yabo. 17 Co tubalu banjamwene mu cimona na baje balondeleho basholokele ngacije: Bakele na bikinga-nulo bya mubala wa kubenga ngwe tuhya na blu ngwe hicisi na yelo ngwe saufa, co mitwe ya baje tubalu yapwile ngwe mitwe ya bindumba, co tuhya na bwisi na saufa byatundile mu tunwa twabo. 18 Co mutamba umo wa mitamba itatu ya banu watsile notu tuyando tutatu: tuhya na bwisi na saufa bije byatundile mu tunwa twabo. 19 Mwafwa nzili yaba tubalu ili mu tunwa twabo na ku mikila yabo, mwafwa mikila yabo inafu ngwe manyoka, co ili na mitwe, co bakapangesa ei mikila mu kuzibisa banu kubabala.

20 Oloni baje banu boshe basaleleho baje kubatsile notu tuyando kubatengulukile kutunda ku bipangi bya maboko abo. Kubalikelele kulemesa badimona, na tumponya ba goldi, naba ba siuva, naba ba kopa, naba ba mamanya, naba ba biti baje kubasa kumona nambe kuziba nambe kwenda. 21 Co kubatengulukile ku bubi bwabo na kwecela kutsiya banu na kwecela bilinga byabo bya budimona na kwecela bupangala* bwabo na kwecela bwizi bwabo.

10 Co njamwene kangelo mukwabo wa nzili asikumuka kutunda mwilu nazala lishelwa. Ku mutwe wendi kwakele nkongolo, cihanga cendi capwile ngwe litangwa, co mendi* endi apwile ngwe bingunzi bije byasholokele ngwe tuhya. 2 Wakwatele kalibulu ka kuzenga mu liboko lyendi. Aka kalibulu kapwile ka kuzengununa. Lindi lyendi lya cilyo lyalyatele ha kalunga-ndonga, co lindi lyendi lya cimoshwe lyalyatele ha lifuti-libu. 3 Co watambekele na lijwi lyakama ngwe ndumba uje ali na kubuluma. Co mwatambekele, majwi 7 a bililimo endekele.

4 Co munjazibile bije bililimo 7 byendeka, njashakele kushangumuka kusoneka, oloni njazibile lijwi lya kutunda mwilu lyendeka ngwalyo: “Pata ebi byuma bibinendeka bililimo 7, co keti ubisoneke.” 5 Uje kangelo injamwene nemana ha kalunga-ndonga na ha lifuti-libu, wajundwilile liboko lyendi lya cilyo mwilu, 6 co walisingile na uje wayoya myaka yoshe, Uje watangele lilu na byuma byoshe bilimo na lifuti-libu na byuma byoshe bilimo na kalunga-ndonga na byuma byoshe bilimo, ngwendi: “Simbu ya kubandamena inahu. 7 Oloni mu matangwa aje omwo kangelo wa bu 7 akashaka kwohyesa lupembo lwendi, lihungu lya kujela lije lyanambulula Njambi ngwe muzimbu waubwa ku bindungo bendi baje banapu tupolofweto likalishulisilila bene.”

8 Njazibile lijwi lya kutunda mwilu lyendeka nange lalo ngwalyo: “Ya ukambate kaje kalibulu ka kuzenga kaje kabanazengununa kaje kali mu liboko lya kangelo uje nemana ha kalunga-ndonga na ha lifuti-libu.” 9 Njaile kuli uje kangelo na kumuleka ngwange anjane kaje kalibulu. Wanjilekele ngwendi: “Kambate ukalye, co kakalulisa mwimo lyobe, oloni mu kanwa kobe kakapwelelela ngwe buki.” 10 Njambatele kaje kalibulu mu liboko lya kangelo na kukalya, co munjakalile, mu kanwa kange kapwelelelele ngwe buki, oloni mwimo lyange mwalulile. 11 Co banjilekele ngwabo: “Unapande kupolofweta lalo bya banu na bya mafuti na bya bindaka na bya bimyene babangi.”

11 Co wanjanene lihongo* lya kufwa ngwe mulamu na kunjileka ngwendi: “Katuka ukaseteke mwela wa kujela wa tempele ya Njambi na mutula na baje bali na kulemeselamo. 2 Oloni cipango cije cili hanja ya mwela wa kujela wa tempele ciseze, keti uciseteke mwafwa banacana ku baka-mafuti, co bakalyatangela nganda ya kujela ha bingonde 42. 3 Co njikalingisa bakaleho bange babali bapolofwete ha matangwa 1,260 oku banazala bikeleya.” 4 Aba bakaleho babali bemanena miti ibali ya olive na bitumbikilo bya bindeya bibali, co banemana ku mesho a Mwata wa lifuti-libu.

5 Nga kuli umo ashaka kubabulumuna, co mu tunwa twabo mutunda tuhya tuje tunyongesa bitozi babo. Omu mukemwo mubanapande kutsiila baje bashaka kubabulumuna. 6 Bali na moko ya kushoka lilu mangana nyonzi keti inyoke mu matangwa abapolofweta. Bali lalo na moko ha mema ya kuwapwisa maninga na kulingisa byuma byabibi bya kuliseza-seza bilingiwe lwalwingi ha lifuti-libu kwesekesa nomu mubashakela.

7 Mubakamanesa kwana bukaleho, cikashama uje akatunda mu mbulu* akalwa nabo nzita, co akabahyana na kubatsiya. 8 Co mibila yabo ikakala mu ngila yakama ya mu nganda yakama ije ibasana mu cifwisa ngwabo Sodoma na Ijipiti, muje mubatsiilile lalo Mwata wabo ha citi. 9 Co bwingi bwa banu na miyati na bindaka na baka-mafuti, bakatalelela ije mibila ha matangwa atatu na hafu, co kubakatabesa ngwabo ije mibila baitsinde. 10 Co baje bakala hasi bakabwahelela na kulisamba mwafwa banatsi, co bakalitumina bwana umo na mukwabo, mwafwa aba tupolofweto babali bayandesele baje bakala ha lifuti-libu.

11 Mukwetile matangwa atatu na hafu, sipilitu ya kuyoya ya kutunda kuli Njambi yabakobelele, co bemanene. Baje babamwene bazibile manene lyoba. 12 Co njazibile lijwi lya kutaluka litunda mwilu libaleka ngwalyo: “Ijeni muno mwilu.” Ngeci baile mwilu mu lishelwa, co bitozi babo babamwene.* 13 Ha ola ije bene kwakele lindunduma lyakama, co mutamba umo wa mitamba 10 ya nganda wawile, co lije lindunduma lyatsiile banu 7,000, co banu boshe baje basaleleho bazibile manene lyoba, co banene Njambi wa mwilu bumpau.

14 Lubinda lwamucibali luneti. Taleni! Lubinda lwamucitatu luli na kwija bwasi-bwasi.

15 Kangelo wa bu 7 wohyesele lupembo lwendi, co mwilu mwazibikile majwi endeka ngwawo: “Bumwene bwa kaye bunatenguluka kupwa Bumwene bwa Mwata wetu na Kristu wendi, co akayula ngwe mwene myaka yoshe.”

16 Co bakulunu 24 baje batumamene ha matanda ku mesho a Njambi batsikamene na kukulamena hasi na kulemesa Njambi 17 ngwabo: “Twakukandelela Yehova Njambi, Muka-nzili Yoshe, uje aliko, na uje wakeleko, mwafwa unambata nzili yoshe yakama na kushangumuka kuyula ngwe mwene. 18 Oloni baka-mafuti balubalele, co nobe wamwesele butenu bwobe, co simbu ibanangula yetele, ya kusompa batsi na kwana cikandelela ku bindungo bobe baje banapu tupolofweto na bakujela na baje bali na kuzibila lizina lyobe lyoba, babandondo na bakama, na kunyongesa baje bali na kubiisa kaye.”

19 Co mwela wa kujela wa tempele ya Njambi, uje uli mwilu washokolokele, co njamwene cikasha cendi ca cikumiiyo mu mwela wendi wa kujela wa tempele, co kwakele mihyato ije yakele na kuwemuna, na majwi, na bililimo, na lindunduma, na nyonzi yakama ya mamanya.

12 Co mwilu mwasholokele cizibukiso ca kukomokesa. Njamwene munakazi nazala litangwa, mwisi ya mendi endi mwakele ngonde, ku mutwe wendi kwakele cilongo ca bingongonosi 12, 2 co wakele na cikute. Ha kuwana ngwe wakele hayehi na kusulumuna, wakele na kulila na kulyandazeka mwafwa ya kubabala kwakele na kuziba.

3 Mwilu mwasholokele cizibukiso cikwabo. Taleni! Njamwene canzangombe wa kubenga ngwe tuhya ali na mitwe 7 na mambinga 10. Ku mitwe yendi kwakele tubilongo 7. 4 Mukila wendi wakokele mutamba umo wa mitamba itatu ya bingongonosi bya mwilu na kubiwisila hasi, ha lifuti-libu. Co uje canzangombe watwaleleleho kwimana kulutwe lwa uje munakazi wakele hayehi na kusulumuna, mangana mwasulumuna alye uje munendi.

5 Uje munakazi wasulumwine mwana wa munalume. Ou mwana ikeye akanyunga baka-mafuti boshe na mulamu wa cikubo. Co bamukwebwile na kumutwala kuli Njambi na ku litanda lyendi. 6 Uje munakazi watewelele mu mambo muje mwamubwaheselele Njambi mwela, muje lalo mubakamushukile ha matangwa 1,260.

7 Co mwilu mwakatukile nzita. Mikaele* na tungelo bendi balwile na canzangombe, co canzangombe na tungelo bendi nabo balwile, 8 oloni kubahyanene,* co kubakele lalo na mwela mwilu. 9 Co uje canzangombe wakama, linyoka wa kusañulu, uje ibasana ngwabo Liyabolo na Satana, uje ali na kungumuna lifuti-libu lyoshe, bamumbilile hasi na tungelo bendi nabo babombilile hasi hamolika nendi. 10 Co njazibile lijwi lyatambekele mwilu ngwalyo:

“Kwoboka kunaijoni, na nzili, na Bumwene bwa Njambi yetu, na moko ya Kristu wendi, mwafwa muka-kubangeya bandolome betu biñanda banamumbila hasi, uje ali na kubabangeya biñanda butsiki na mutanya ku mesho a Njambi yetu. 11 Co bamuhyanene mwafwa ya maninga a Muna Manga na lijwi lyabo lya bukaleho, co kubazemene myonyo* yabo nameme mubalitalele na kutsa. 12 Ngeci bwaheleleni yeni melu neni mwakalamo, oloni lubinda lwa lifuti-libu na kalunga-ndonga mwafwa Liyabolo nasikumuka kuli yeni oku nalubala manene, mwafwa azibuka ngwendi nasala lika na simbu yaindondo.”

13 Co canzangombe mwamwene ngwendi banamumbila hasi, wayandesele uje munakazi wakitile mwana wa munalume. 14 Oloni uje munakazi bamwanene mambaba abali a ngonga wakama mangana ase kupulula na kuya mu mambo ku mwela wendi kuje kubakamushukile ha simbu, na bisimbu na hafu ya simbu,* kulako na linyoka.

15 Co uje linyoka wapambele mema ngwe ndonga munima ya munakazi mangana uje munakazi abombele muje mu ndonga. 16 Oloni lifuti-libu lyakwasele uje munakazi. Lyashamene mu kanwa na kulehula ije ndonga yapambele canzangombe. 17 Ngeci canzangombe walubalelele manene uje munakazi, co waile na kulwa nzita na bana* ba uje munakazi baje basaleleho baje bakele na kunyunga mashiko a Njambi na kupanga cipangi ca kwana bukaleho bwa Yesu.

13 Co uje canzangombe wemanene ha mushekesheke wa ku kalunga-ndonga.

Co njamwene cikashama atunda mu kalunga-ndonga ali na mambinga 10 na mitwe 7. Ku mambinga endi 10 kwakele tubilongo, oloni ku mitwe yendi kwakele mazina a kushaula. 2 Uje cikashama injamwene washolokele ngwe ingwe, oloni mendi endi apwile ngwe a mbeya. Kanwa kendi kapwile ngwe kanwa ka ndumba. Canzangombe wanene uje cikashama nzili na litanda lyendi na moko yakama.

3 Njamwene mutwe umo wa uje cikashama wabulumukile manene, oloni ije mbandu yashakele kumutwala ku kutsa te inolo. Co banu boshe ba hasi bakabangeyeye uje cikashama oku bali na kumukomoka. 4 Co balemesele uje canzangombe mwafwa wanene moko uje cikashama, co balemesele na uje cikashama na majwi a kwendeka ngwawo: “Iya napu ngwe cikashama? Iya asa kulwa nendi?” 5 Uje cikashama bamwanene kanwa ka kwendeka byuma byakama na majwi a kushaula, co bamwanene na moko ya kupanga ha bingonde 42. 6 Co washamene mu kanwa na kushaula Njambi, na lizina lyendi, na mwela wendi mwakala, na baje bakala mwilu. 7 Bamutabesele kulwa nzita na bakujela na kubahyana, co bamwanene moko ha miyati yoshe na ha banu boshe na ha bindaka byoshe na ha mafuti oshe. 8 Co boshe baje bakala ha lifuti-libu bakamulemesa. Kushwa hakashangumukilile kukalako kaye, mazina abo nalumo lwahi lubawasonekele mu libulu lya kuyoya lya Muna Manga uje ibatsiile.

9 Uje ali na matwi azibe. 10 Nga umo banamuyongwela ngwabo aya mu bundungo, aya bene mu bundungo. Nga umo atsiya munu na moko ya mukwale,* banapande bene kumutsiya na moko ya mukwale. Mukemwo bakujela banapande kukolesa na kukala na likulahelo.

11 Co njamwene cikashama mukwabo atunda mu lifuti-libu. Wakele na mambinga abali ngwe a muna manga, oloni washangumukile kwendeka ngwe canzangombe. 12 Ou cikashama, wapangesele moko yoshe ya uje cikashama wakulibanga oku uje cikashama wakulibanga ali na kumona. Co walingisile lifuti-libu na baje batungaho balemese uje cikashama wakulibanga uje wakele na mbandu yashakele kumutwala ku kutsa ije yolele. 13 Co walingile bizibukiso byakama na kulingisa tuhya tutunde mwilu na kwija hasi oku banu bali na kumona.

14 Ou cikashama, wongumwine baje bakala ha lifuti-libu, mwafwa ya bizibukiso bibamutabesele kulinga oku cikashama wakulibanga ali na kumona. Walekele baje bakala ha lifuti-libu ngwendi bamunge cifwisa ca cikashama uje ibabulumwine na moko ya mukwale, oloni wayoyele. 15 Co bamutabesele kushokwela muku* ku cifwisa ca cikashama wakulibanga mangana cije cifwisa ca cikashama case kwendeka na kulingisa batsiye boshe baje babyana kulemesa cifwisa ca cikashama wakulibanga.

16 Ou cikashama wasindiiye banu boshe, babandondo na bakama, ba kufuka na tuhutu, bakupatuka na bindungo, ngwendi babake cizibukiso ha maboko abo a cilyo nambe ha maholo abo, 17 co lalo ngwendi wahi asa kulanda nambe kulandesa kubanga uje ali na cizibukiso, kulumbununa lizina lya cikashama wakulibanga nambe nambala ya lizina lyendi. 18 Aha hakeho hanapande munu kukala na mana: Woshe asa kuzibisisa ananguke nambala ya cikashama wakulibanga, mwafwa inapu nambala ya munu.* Ei nambala inapu 666.

14 Njatalele, co njamwene Muna Manga nemana ha Munkinda wa Siyone ali na banu ba kupwa 144,000 baje babanasoneka lizina lyendi na lizina lya Ishe ha maholo abo. 2 Njazibile cilumo citunda mwilu ngwe cilumo ca mema amangi na cilumo ca cililimo cakama. Cilumo cinjazibile cafwile ngwe ca baka-kwimba baje bali na kwimbila hamo tulyalya twabo. 3 Co bali na kwimba mwaso uje uzibika ngwe mwaso wauha kulutwe lwa litanda na kulutwe lwa byakutanga bya kuyoya biwana na kulutwe lwa bakulunu. Wahi wasele kuzibuka uje mwaso kubanga baje ba kupwa 144,000 baje babanalanda ha lifuti-libu. 4 Aba bakebo kubalijwalesele na banakazi, co kanda balilaleho na banakazi. Bakatwalelelaho kukabangeya kwoshe kwaya Muna Manga. Babalandele mukati ka banu mangana bapwe bushuka bwakulibanga kuli Njambi na kuli Muna Manga. 5 Mu tunwa twabo kubawanenemo makuli, co kubakele na cuma ca kubapayela.

6 Co njamwene kangelo mukwabo ali na kupulula mu bukambwila. Wakele na kwambulula muzimbu waubwa wa myaka yoshe kuli baje bakala ha lifuti-libu, kuli baka-mafuti oshe na miyati yoshe na bindaka byoshe na banu boshe. 7 Wakele na kwendeka na lijwi lya kutaluka ngwendi: “Zibileni Njambi lyoba na kumwana bumpau mwafwa simbu yendi ya kusompa inete. Ngeci lemeseni uje watangele lilu na lifuti-libu na kalunga-ndonga na tubwelubwelu twa mema.”

8 Kangelo mukwabo wamucibali wamukabele. Wakele na kwendeka ngwendi: “Nau! Babiloni Wakama nau, uje walingisile mafuti oshe anwe binyu bya mashungu* a bupangala* bwendi.”

9 Kangelo mukwabo wamucitatu wabakabele. Wakele na kwendeka na lijwi lya kutaluka ngwendi: “Nga kuli umo alemesa cikashama na cifwisa cendi na kutambula cizibukiso ha luholo lwendi nambe ha liboko lyendi, 10 nendi akanwa binyu bya butenu bwa Njambi bwa kujeneka kushingasana na cuma cimo, buje bubetila mu nganja yendi ya butenu, co bakamuyandesa na tuhya na saufa ku mesho a tungelo bakujela na ku mesho a Muna Manga. 11 Boshe baje balemesa cikashama na cifwisa cendi, na baje batambula cizibukiso ca lizina lyendi, bwisi bwa tuhya tuje tuli na kubayandesa butwalelelaho kukakumuka myaka yoshe, co butsiki na mutanya kubawana kuhwima. 12 Mukemwo bakujela banapande kukolesa, baje bali na kunyunga mashiko a Njambi na kutwalelelaho kukulahela Yesu.”

13 Co njazibile lijwi litunda mwilu lyendeka ngwalyo, “Soneka ngwobe: Banabwahelela baje batsila kuli Mwata kutunda ha simbu ino kuya kulutwe. Sipilitu ngwayo, eyo, bahwime ku kufwitangana kwabo mwafwa byuma bibafwitanganene bibakaba.”

14 Co munjatalele, njamwene lishelwa lya kutoka, co uje watumameneho washolekele ngwe muna munu, wazalele cilongo ca goldi ku mutwe wendi, co wakwatele cekesi ya kubambuka mu liboko lyendi.

15 Kangelo mukwabo, watundile mu mwela wa kujela wa tempele. Watambekelele uje wakele ha lishelwa ngwendi: “Pangesa cekesi yobe na kushangumuka kuteja mwafwa simbu ya kuteja inete, mwafwa bimbuto bya lifuti-libu binahi.” 16 Co uje watumamene ha lishelwa wakobelesele cekesi yendi mu lifuti-libu, co watejele lifuti-libu.

17 Kangelo mukwabo lalo watundile mu mwela wa kujela wa tempele wa mwilu, nendi wakele na cekesi ya kubambuka.

18 Co kangelo mukwabo lalo watundile ku mutula, co wakele na moko ha tuhya. Watambekelele uje ali na cekesi ya kubambuka ngwendi: “Pangesa cekesi yobe na kukungulula makasha-kasha a binyu bya lifuti-libu, mwafwa bushuka bwabyo bwa binyu bunahi.” 19 Uje kangelo wakobelesele cekesi yendi mu lifuti-libu na kukungulula binyu bya ha lifuti-libu na kubyumbila mu citikilo ca binyu cakama ca butenu bwa Njambi. 20 Cije citikilo ca binyu bakele na kucitikila hanja ya nganda, co mwatundile maninga aje ashamukilile mwilu kuketa bene na ku bimingo bya tubalu, bulako bwa kweta ku makilomita 296.

15 Co njamwene cizibukiso cikwabo mwilu, capwile cakama, co lalo ca kukomokesa. Njamwene tungelo 7 na tuyando 7. Otu tuketwo twamamaneselelo mwafwa mutuhwa, co na butenu bwa Njambi bene bunahu.

2 Co njamwene cuma ca kufwa ngwe kalunga-ndonga uje washolokele ngwe gilasi inalikumbasana na tuhya. Njamwene na baje bahyanene cikashama na cifwisa cendi na nambala ya lizina lyendi, bemanene ku kalunga-ndonga uje washolokele ngwe gilasi oku banakwata tulyalya twa Njambi. 3 Bakele na kwimba mwaso wa Mosesa ndungo ya Njambi, na mwaso wa Muna Manga ngwabo:

“Yehova Njambi Muka-Nzili Yoshe, bipangi byobe byapwa byakama, co lalo byabibwa. Yobe Mwene wa myaka yoshe, bingila byobe byapwa bya kusungama, co lalo bya busunga. 4 Obe Yehova, iya kakakuzibila lyoba na kwana bumpau lizina lyobe ha kuwana ngwe yobe lika ukamwesa kulongwa cije kucesi kutenguluka? Baka-mafuti boshe bakaija ku mesho obe na kukulemesa mwafwa banamono ngwabo mashiko obe a kusungama.”

5 Mubyahwileko ebi, njatalele, co njamwene mwela wa kujela wa tenti ya bukaleho banaushokolola mwilu. 6 Njamwene na tungelo 7 bakele na tuyando 7 batunda mu mwela wa kujela, banazala bizalo bya kujela bya lineni ya kubyazima na miba ya goldi ha binulo byabo. 7 Cimo ca bije byakutanga bya kuyoya biwana, canene baje tungelo 7 malonga 7 a goldi a kushula na butenu bwa Njambi uje wayoya myaka yoshe. 8 Co mwela wa kujela washulile na bwisi mwafwa ya bumpau bwa Njambi na nzili yendi, co naumo wahi wasele kukobela mu mwela wa kujela kweta noho hatwahwililile tuyando 7 twa baje tungelo 7.

16 Co njazibile lijwi lya kutaluka litundilila mu mwela wa kujela lyendeka ku tungelo 7 ngwalyo: “Yeni muketile malonga 7 a butenu bwa Njambi ha lifuti-libu.”

2 Kangelo wakulibanga waile, co waketilile lilonga lyendi ha lifuti-libu, co bimbandu byakama bya kubabala byayandesele banu baje bakele na cizibukiso ca cikashama na baje balemesele cifwisa cendi.

3 Wamucibali wetilile lilonga lyendi mu kalunga-ndonga, co mema oshe atengulukile ngwe maninga a munu wa kutsa, co byakutanga bya kuyoya* byoshe byatsile. Eyo, byoshe byakele mu kalunga-ndonga byatsile.

4 Wamucitatu wetilile lilonga lyendi mu bindonga na mu tubwelubwelu twa mema, co byapwile ngwe maninga. 5 Njazibile kangelo uje ali na moko ha mema endeka ngwendi: “Yobe uliko, uje lalo wakeleko, Uje akamwesa kulongwa cije kucesi kutenguluka, wapwa u wa kusungama mwafwa unanene eci kusompa, 6 mwafwa betilile maninga a bakujela na tupolofweto, co unabana ngwobe banwe maninga. Kunabapande.” 7 Co njazibile mutula wendeka ngwawo: “Eyo, Yehova Njambi, Muka-nzili Yoshe, kusompa kwobe kwapwa kwa busunga na kusungama.”

8 Kangelo wamuciwana wetilile lilonga lyendi ha litangwa, co litangwa balitabesele kwenyeka banu na tuhya. 9 Co baje banu benyele, mwafwa ya kushaluka kwakama, oloni bashawile lizina lya Njambi uje wakele na moko ha tuyando otu, co kubatengulukile na kumwana bumpau.

10 Kangelo wamucitanu wetilile lilonga lyendi ha litanda lya cikashama, co bumwene bwaco bwazibalele, co banu bashangumukile kulishumanga ha bindaka byabo mwafwa ya kubabala cibakele na kuziba, 11 oloni bashawile Njambi wa mwilu mwafwa ya kubabala kubakele na kuziba na bimbandu byabo, co kubatengulukile kutunda ku bipangi byabo.

12 Kangelo wa bu 6 wetilile lilonga lyendi ha ndonga yakama ya Yufreti, co mema amwo omine mangana abwahese ngila ya bimyene batunda ku butuhukilo bwa litangwa.*

13 Co njamwene majwi a kuhwiminina a kujwala* atatu, aje asholokele ngwe mambotwe atunda mu kanwa ka canzangombe na mu kanwa ka cikashama na mu kanwa ka kapolofweto wa makuli. 14 Awa majwi anapu a kuhwiminina ku badimona, co bali na kulinga bizibukiso na kuya ku bimyene ba ha lifuti-libu na kubakungulwila hamo ku nzita ya litangwa lyakama lya Njambi Muka-nzili Yoshe.

15 “Taleni! Njili na kwija ngwe mwizi. Nabwahelela uje atwalelelaho kutona na kuzala bizalo byendi mangana keti ende mutotototo, co banu bamone bushwamwa bwendi.”

16 Co babakungulwilile ku mwela ubasana mu Cihebelu ngwabo Amagidoni.*

17 Kangelo wa bu 7 wetilile lilonga lyendi mu lihunzi, co njazibile lijwi lya kutaluka litundilila mu mwela wa kujela ku litanda, ngwalyo: “Kunahu.” 18 Co kwakele mihyato yakele na kuwemuna na majwi na bililimo. Kwakele na lindunduma lyakama lije kanda likaleko kutunda habatangelele munu ha lifuti-libu. Lije lindunduma lyapwile lyakama manene. 19 Nganda yakama yalipangele mutatu, co binganda bya baka-mafuti byawile, co Njambi wanukile Babiloni wakama ngwendi bamwane nganja ya binyu ya butenu bwendi Njambi. 20 Co mañanda oshe atewele, na minkinda kubaiwanene. 21 Co nyonzi yakama ya mamanya yanyokele banu kutunda mwilu, limanya limo na limo lyalemene kweta ku talenti* imo, co banu bashawile Njambi mwafwa ya kayando ka nyonzi ya mamanya mwafwa kaje kayando kapwile kakama manene.

17 Co umo wa baje tungelo 7, uje wakwatele malonga 7 wezile na kunjileka ngwendi: “Ija, co njakukumwesa mubakasompela lihule wakama, uje natumama ha mema amangi, 2 uje ibalingile nendi bupangala* bimyene ba hasi, co banu bakala hasi bapendele na binyu bya bupangala* bwendi.”

3 Co wanjambatele mu nzili ya sipilitu na kunjitwala mu mambo, co njamwene munakazi natumama ha cikashama wa kubenga, uje washulile na mazina a kushaula, co wakele na mitwe 7 na mambinga 10. 4 Uje munakazi wazalele bizalo bya mubala wa pepo na bya kubenga, co walicakeyeye na byuma bya goldi na mamanya a seho na bimpasi.* Wakwatele nganja ya goldi ije yashulile na byuma bya bunyengwe na bya kujwala bya bupangala* bwendi. 5 Ha luholo lwendi basonekeleho lizina lije linapu lihungu, ngwabo: “Babiloni Wakama, ina ya mahule na ina ya byuma bya bunyengwe bya hasi.” 6 Co njamwene uje munakazi napende maninga a bakujela na maninga a bakaleho ba Yesu.

Munjamumwene njakasamene manene. 7 Co uje kangelo wanjihwile ngwendi: “Bika biunalikasamena? Njikuleka lihungu lyou munakazi na lya cikashama uje ali na mitwe 7 na mambinga 10 haje hanalondo ou munakazi. 8 Uje cikashama iunamwene, kwakele, hano wahiko, co ololo atunda mu mbulu,* co akanyonga. Baje bakala ha lifuti-libu, baje mazina abo kubawasonekele mu libulu lya kuzenga lya kuyoya kushwa hakashangumukilile kukalako kaye bakakasama kumona ngwabo uje cikashama wakeleko, hano wahiko, oloni akakalako lalo.

9 “Munu napande kukala na mana mangana azibisise ei ñanda: Mitwe 7, imanena minkinda 7 haje hanatumama uje munakazi. 10 Co kuli bimyene 7: Batanu banau, umo kwali, mukwabo kanda ete, oloni mwaija akalako lika simbu yaindondo. 11 Co uje cikashama wakeleko, hano wahiko, ikeye lalo napu mwene wa bu 8, oloni atunda haje bene ha bimyene 7, co akanyonga.

12 “Mambinga 10 aunamwene, emanena bimyene 10 baje kanda batambule bumwene, oloni bali na kutambula moko ha kupwa bimyene ha ola imo na cikashama. 13 Boshe aba bali na biyongola bimolika, ngeci bali na kwana nzili na moko yabo kuli uje cikashama. 14 Bakalwa na Muna Manga, oloni ha kuwana ngwe ikeye napu Mwata wa bimyata na Mwene ya bimyene, Muna Manga akabafungulula. Co lalo baje bali hamo nendi, baje banasana, banangula, bakulongwa, nabo bakafungulula.”

15 Wanjilekele ngwendi: “Aje mema aunamwene, haje hatumamene uje lihule, emanena banu na mbunga ya banu na baka-mafuti na bindaka. 16 Co mambinga 10 aunamwene, na cikashama, bakazinda uje lihule, co bakabiisa bufuko bwendi na kumuseza mutotototo, co bakalya situ yendi na kumwenyeka na tuhya. 17 Mwafwa Njambi naka butumbe bwendi mu bimbunge byabo ngwendi balinge byanayongola. Eyo, bashulisilile biyongola byabo bimolika bya kwana bumwene bwabo kuli cikashama, kweta noho hawakalishulisilila majwi a Njambi. 18 Co munakazi iunamwene, emanena nganda yakama ije ili na bumwene buje buli na nzili ha bimyene ba lifuti-libu.”

18 Mubyahwileko ebi, njamwene kangelo mukwabo asikumuka kutunda mwilu, ali na moko yakama, co lifuti-libu lyakele mu ceke mwafwa ya bumpau bwendi. 2 Watambekele na lijwi lyakama ngwendi: “Nau! Babiloni wakama nau, co napwoni limbo lya badimona na basipilitu* boshe ba kujwala, na tuzila boshe ba kujwala. 3 Mafuti oshe anapende mwafwa ya binyu bya mashungu* a bupangala* bwendi, co bimyene ba ha lifuti-libu baje balingile nendi bupangala,* na baka-mingoso ba ha lifuti-libu bafukile mwafwa ya bufuko bwakele nabwo kwa kujeneka kuziba shwamwa.”

4 Co njazibile lijwi likwabo litunda mwilu ngwalyo: “Eni banu bange tundeni kuli ikeye nga kumwashakele kulikwatasana nendi mu bubi bwendi na kutambula ku tuyando twendi. 5 Mwafwa bubi bwendi bunatumu manene kuketa na mwilu, co Njambi nanuka bilinga byendi bya kuhenga.* 6 Mulingeni ngwe muje mwalingile bakwabo, eyo, mwilwisileni lubali ha byuma byanalingi, mu nganja yashingasanene lumo, mushingasanenenimo lubali. 7 Ha kuwana ngwe walyanene bumpau ikeye babenya na kukala na bufuko buje kesi na kuzibila shwamwa, napande kuyanda na kukala mu busiwa mwafwa ali na kwendeka mu mbunge yendi ngwendi: ‘Nji mwene, co keti nji fwile, kunjikazibi busiwa.’ 8 Mukemwo tuyando twendi na kutsa kwendi na busiwa bwendi na njala yendi bikaija mu litangwa limolika, co bakamulunguwisa na tuhya, mwafwa Yehova Njambi uje namusompo wakala na nzili.

9 “Co bimyene ba ha lifuti-libu baje balingile nendi bupangala* na kukala nendi mu bufuko kwa kujeneka shwamwa, bakalila na kumwesa busiwa mwafwa yendi mubakamona bwisi bwa kwenya kwendi. 10 Bakemanena halako mwafwa ya lyoba libakaziba mubakamona kayando kendi, co bakendeka ngwabo: ‘Obe nganda yakama, Babiloni yobe nganda ya kukola, cabihya manene, cabihya manene, mwafwa banakusompo mu ola imolika!’

11 “Baka-mingoso ba ha lifuti-libu nabo bakamulila na kuziba busiwa, mwafwa wahi oni alanda byuma byabo byoshe, 12 byuma byoshe bya goldi, siuva, mamanya a seho, bimpasi, lineni yaibwa, binanga bya mubala wa pepo, binanga bya siuki na binanga bya kubenga na byuma byoshe bya kupanga ha miti ya lwengo lwalubwa na byuma byoshe bya kupanga ha mambinga a binjamba na ha miti yaibwa na ha kopa na ha bikubo na ha mamanya a mamabor, 13 na sinamoni, byuma bya lwengo lwalubwa bya ku India,* isense, mazi a lwengo lwalubwa, isense ya kutoka, binyu, mazi a olive, fulawa yaibwa, tiliku, bingombe, bimanga, tubalu, matemba, bindungo na myonyo ya banu. 14 Eyo, bushuka bwabubwa buwashungwiiye banakunyekebwo, na byakulya byoshe bya kutobala na byuma byoshe byabibwa binatundu kuli yobe, co kuukabiwana lalo.

15 “Baka-mingoso baje balandesele ebi byuma, baje bafukilile hali ikeye bakemanena halako mwafwa ya lyoba libakaziba mubakamona kayando kendi, co bakalila na kuziba busiwa 16 na kwendeka ngwabo: ‘Obe nganda yakama, yobe wakele na kuzala lineni yaibwa, ya mubala wa pepo nei ya kubenga, yobe wakele na kulicakeya byuma bya goldi, mamanya a seho na bimpasi,* cabihya manene, cabihya manene, 17 mwafwa buje bufuko bwabwingi bwoshe banabubiisa mu ola imolika!’

“Co tupitau ba mato boshe na baka-kwenda mu mato na baka-kujabula mato na boshe baje bayoyela mu kalunga-ndonga bakemanena halako, 18 co bakalila oku banatala ha bwisi bwa kwenya kwendi na kwendeka ngwabo: ‘Nganda muka yafwile ngwe ei nganda yakama?’ 19 Bakalilakumwina likungu mu mitwe yabo na kutetubuka manene na kulila na kuziba busiwa na kwendeka ngwabo: ‘Cabihya manene, cabihya manene, mwafwa nganda yakama ije yafukisile boshe baje bakele na mato ku kalunga-ndonga banaibiisa mu ola imolika!’

20 “Eni melu neni bakujela neni tupositolo neni tupolofweto, bwaheleleni ha byuma binalingiwa kuli ikeye, mwafwa Njambi namisompelaye!”

21 Co kangelo wa nzili wajundwile limanya lya kufwa ngwe limanya lyakama lya kulolela bunga na kulyumbila mu kalunga-ndonga na kwendeka ngwendi: “Omu mukemwo mubakombila Babiloni nganda yakama mu bwasi-bwasi, co kubakamuwana lalo. 22 Co kuli yobe kubakazibiko lalo cilumo ca baka-kwimba baje bembila hamolika tulyalya, na ca baka-kwimba, na baka-kwimba tunamutolilo, na ca baka-kwimba mapembo. Kubawana lalo kuli yobe muka-kupanga bipangi bya maboko wa mutongwe uje akalingi mingoso, nambe cilumo ca limanya lya kulolela bunga kubakacizibi lalo kuli yobe. 23 Co kuli yobe kukwesi ceke ca ndeya cikatundako lalo, nambe lijwi lya cambato nambe lya shombolwa lije likazibika lalo kuli yobe, mwafwa baka-mingoso bobe bakebo bakele na bitwamo byakama ha lifuti-libu, co wongumwine mafuti oshe na bilinga byobe bya budimona. 24 Eyo, maninga a tupolofweto na awa a bakujela na awa a banu boshe baje babatsiile ha lifuti-libu bawawanene kuli ikeye.”

19 Mubyahwileko ebi, njazibile cuma cazibikile ngwe lijwi lya kutaluka lya mbunga yakama mwilu. Bendekele ngwabo: “Shangazaleni Jah!* Kwoboka na bumpau na nzili byapwa bya Njambi yetu, 2 mwafwa kusompa kwendi kwapwa kwa busunga na kusungama. Nasompo lihule wakama uje wajwalesele lifuti-libu na bupangala* bwendi, co nalingila shambandinga maninga a bangamba bendi aje ali mu maboko a lihule.” 3 Co haje bene bendekele lwamucibali ngwabo: “Shangazaleni Jah!* Bwisi bwa kwenya kwa lihule butwalelelaho kukakumuka myaka yoshe.”

4 Co bakulunu 24 na byakutanga bya kuyoya biwana batsikamene hasi na kulemesa Njambi uje ali ha litanda ngwabo: “Ameni! Shangazaleni Jah.”*

5 Co lalo lijwi lyatundile ku litanda ngwalyo: “Twaleleleniho kushangazala Njambi yetu, yeni bindungo bendi, yeni mukamuzibila lyoba, babandondo naba bakama.”

6 Co njazibile cuma cazibikile ngwe lijwi lya mbunga yakama, ngwe cilumo ca mema amangi, ngwe cilumo ca bililimo byakama. Bendekele ngwabo: “Shangazaleni Jah,* mwafwa Yehova Njambi yetu, Muka-nzili Yoshe, nashangumuka kuyula ngwe mwene! 7 Tubwaheleleni na kulisamba na kumwana bumpau, mwafwa cilika ca bulo bwa Muna Manga cinete, co munakazi wendi nalibwahesa. 8 Eyo, banamutabesa kuzala bizalo bya lineni ya kubyakuma, ya kujela, yaibwa, mwafwa lineni yaibwa imanena bilinga bya kusungama bya bakujela.”

9 Co wanjileka ngwendi, “Soneka ngwobe: Banabwahelela baje babanalanya ku kulya ca mangwezi ca cilika ca bulo bwa Muna Manga.” Co wanjileka lalo ngwendi: “Awa anapu majwi a Njambi a busunga.” 10 Munjazibile ebi njatsikamene ku mendi endi ngwange njimulemese. Oloni wanjikandele ngwendi: “Habwe! Keti ulinge ngoco! Nange nji ndungo lika ngeci mwobe na bandolome bobe baje bali na kupanga cipangi ca kwambulula bukaleho bwa kutalesa kuli Yesu. Lemesa Njambi! Mwafwa bukaleho bwa kutalesa kuli Yesu bukebwo buli na kuhwiminina bupolofweto.”

11 Njamwene lilu linashokoloka, co munjatalele, njamwene kabalu wa kutoka. Uje walondeleho bakamusana ngwabo Kulongwa na Busunga, co akasompo na kulwa nzita mu kusungama. 12 Mesho endi apwa ngwe milangi ya tuhya, co ku mutwe wendi kwakele tubilongo twatwingi, co banamusoneka lizina lije naumo wahi alizibuka kubanga ikeye lika. 13 Wazalele cizalo ca helu cije cakele na maninga. Lizina lyendi ikeye Lijwi lya Njambi. 14 Co lalo maswalale ba mwilu bakele na kumukaba munima oku banalondo ha tubalu. Bazalele lineni ya kutoka, ya kujela, yaibwa. 15 Co mu kanwa kendi mwatundile moko ya mukwale yailaha ya kubambuka ya kutsiisa baka-mafuti, co akabanyunga na mulamu wa cikubo. Co lalo wakele na kulyatangela mu citikilo ca binyu ca butenu bwa Njambi Muka-nzili Yoshe. 16 Ha cizalo cendi ca helu, eyo, ha litafu lyendi banamusoneka lizina ngwabo, Mwene wa bimyene na Mwata wa bimyata.

17 Munjatalele, njamwene kangelo nemana mu litanya, co watambakanene tuzila boshe ba mwilu ngwendi: “Ijeni kuno, kungulukileni kuno ku kulya ca mangwezi cakama ca Njambi, 18 mangana mulye situ ya bimyene na situ ya bakulunu ba maswalale na situ ya banalume ba nzili na situ ya tubalu na ya baje banalondoho na situ ya banu boshe ba kupatuka na bindungo babandondo na bakama.”

19 Co njamwene cikashama na bimyene ba ha lifuti-libu na maswalale babo banalikungulula hamo mangana balwise uje nalondo ha kabalu na kulwisa maswalale bendi. 20 Co uje cikashama bamukwatele, hamolika na kapolofweto wa makuli uje wakele na kulinga bikomokeso oku uje cikashama ali na kumona. Wapangesele ebi bikomokeso mu kungumuna baje batambwile cizibukiso ca cikashama na baje balemesele cifwisa cendi. Co boshe mu bubali bwabo babombilile butona mu lishali lya tuhya lije lishukuma na saufa. 21 Oloni baje basaleleho, boshe babatsiile na moko ya mukwale ije yatundile mu kanwa ka uje walondele ha kabalu, co tuzila boshe bakutile situ yabo.

20 Co njamwene kangelo atunda mwilu aija hasi, nakwata sapi ya ku mbulu,* na lilyenge lyakama mu liboko lyendi. 2 Wakwatele canzangombe, linyoka wa kusañulu, uje wapwa Liyabolo na Satana, co wamukutile myaka 1,000. 3 Wamumbilile mu mbulu* na kushokako na kumupatelamo mangana keti ongumune lalo baka-mafuti kweta noho haikahwila myaka 1,000. Munima yebi banapande kumupatula ha simbu yaindondo.

4 Njamwene matanda, co baje batumameneho babanene moko ya kusompa. Eyo, njamwene myonyo* ya baje babatsiile* mwafwa ya kwana bukaleho bwa Yesu na kwendeka bya Njambi, na baje kubalemesele cikashama nambe cifwisa cendi, baje lalo kubatambwile cizibukiso cendi ha maholo abo na ha maboko abo. Bayoyele na kuyula ngwe bimyene na Kristu myaka 1,000. 5 (Batsi bakwabo boshe kubayoyele kubanga noho hayahwililile myaka 1,000.) Eci cikeco kusanguka cakulibanga. 6 Boshe baje bali na mutamba mu kusanguka cakulibanga banabwahelela, co lalo banapu bakujela. Hali aba kutsa camucibali kucesi na nzili, oloni bakapwa tupilistu ba Njambi na Kristu, co bakayula ngwe bimyene hamolika na Kristu myaka 1,000.

7 Co muikahwa lika myaka 1,000, Satana bakamupatula mu kamenga kendi, 8 co akaya na kungumuna baje baka-mafuti mu bimbango biwana bya lifuti-libu, kulumbununa Gogi wa Magogi, mangana abakungulwile hamo ku nzita. Kutuma kwabo kukapwa ngwe mushekesheke wa kalunga-ndonga. 9 Co bajalakanene ha lifuti-libu lyoshe na kuzengeleka cilombo ca bakujela na nganda yazema Njambi, oloni mwilu mwatundile tuhya, co twabenyekele. 10 Co Liyabolo uje wakele na kubongumuna bamumbilile mu lishali lya tuhya na saufa, muje mwakele cikashama na kapolofweto wa makuli, co bakabayandesa* butsiki na mutanya myaka yoshe.

11 Co njamwene litanda lyakama lya kutoka na Uje watumameneho. Co lifuti-libu na lilu byatewele ku mesho endi, co kubabiwanene lalo. 12 Co njamwene batsi bakama naba babandondo banemana kulutwe lwa litanda. Mabulu a kuzenga nawo bawazengunwine. Oloni bazengunwine libulu likwabo lya kuzenga. Lyapwile libulu lya kuzenga lya kuyoya, co batsi babasompele kwesekesa na byuma bibanasoneka mu mabulu a kuzenga, kwesekesa na bilinga byabo. 13 Co kalunga-ndonga wecelele batsi bakelemo, na kutsa na Cihilo* nabyo byecelele batsi bakelemo, co munu na munu bamusompele kwesekesa na bilinga byendi. 14 Co kutsa na Cihilo* babyumbilile mu lishali lya tuhya. Lishali lya tuhya limanena kutsa camucibali. 15 Co lalo woshe kubawanene mu libulu lya kuyoya bamumbilile mu lishali lya tuhya.

21 Co njamwene lilu lyaliha na lifuti-libu lyaliha. Lilu lya laja na lifuti-libu lya laja bineti, co na kalunga-ndonga wahiko. 2 Co lalo njamwene nganda ya kujela, Jelusalema Yaiha, itunda mwilu kuli Njambi, yalibwahesa ngwe shombolwa uje nalibwahesela munalume wendi. 3 Co njazibile lijwi lya kutaluka litundilila ku litanda ngwalyo: “Taleni! Tenti ya Njambi ili hamolika na banu. Akakala nabo, co bakapwa banu bendi. Njambi babenya akakala nabo. 4 Akasikumuna misozi yoshe ku mesho abo, co kutsa kucikakalako lalo nambe busiwa nambe kulila nambe kuziba kubabala. Byuma bya laja bineti.”

5 Co Uje watumamene ha litanda wendekele ngwendi: “Tala! Byuma byoshe njibipwisa byabiha.” Co lalo wendekele ngwendi: “Soneka, mwafwa awa majwi anapu a kulongwa,* co lalo a busunga.” 6 Co wanjilekele ngwendi: “Awa majwi analishulisilila. Yange Aufa na Omega,* mashangumukilo na mamaneselelo. Woshe natsi lihwila njikamwana mema a kuyoya a bwana a mu kabwelubwelu. 7 Woshe ahyana akaswana ebi byuma, co njikapwa Njambi yendi, ikeye akapwa munange. 8 Oloni baka-lyoba na baje kubesi na likulahelo na baje bazibisa bunyengwe na baka-kutsiya banu na baka-bupangala* na baka-kulinga bilinga bya budimona na baka-kulemesa tumponya na baka-makuli boshe, mutamba wabo unapu mu lishali lije lishukuma na tuhya na saufa. Eci cilumbununa kutsa kwamucibali.”

9 Kangelo umo ku tungelo 7 baje bakele na malonga 7 aje ashulile na tuyando twamamaneselelo twa kupwa 7 wezile na kunjileka ngwendi: “Ija, co njakukumwesa shombolwa uje napu munakazi wa Muna Manga.” 10 Co wanjambatele mu nzili ya sipilitu na kunjitwala ha munkinda wakama, waulaha. Co wanjimwesele nganda ya kujela, Jelusalema, ije yakele na kutunda mwilu kuli Njambi, 11 co yakele na bumpau bwa Njambi. Kubyakula kwayo kwafwile ngwe limanya lya seho manene, ngwe limanya lya jasipa lije libyakuma ngwe gilasi. 12 Yakele na cibumbe cakama cacilaha na bikolo 12 kuje kwakele tungelo 12. Ha bikolo basonekeleho mazina 12 a miyati ya bana ba Isalele. 13 Ku butuhukilo bwa litangwa kwakele bikolo bitatu, ku kunto* kwakele bikolo bitatu, ku mbwela* kwakele bikolo bitatu, ku bulahukilo bwa litangwa kwakele bikolo bitatu. 14 Cije cibumbe ca nganda cakele lalo na lubula lwa mamanya 12, co haje ha mamanya hakele mazina 12 a tupositolo 12 ba Muna Manga.

15 Co uje wakele na kwendeka nange wakwatele lihongo lya goldi lya kusetekesa mangana aseteke nganda na bikolo byayo na cibumbe cayo. 16 Ije nganda yakele na bimbango biwana bya kupwa hamolika. Mu bulaha bwayo yapwile hamolika na mu bwihi bwayo. Mwasetekele ije nganda na lihongo, yapwile makilomita a kweta ku 2,220. Mu bulaha bwayo na mu bwihi bwayo na mu bulaha bwayo bwa kuya mwilu yapwile hamolika. 17 Wasetekele lalo na cibumbe ca nganda, capwile mamita a kweta ku 64 kwesekesa na kuseteka kwa munu kuje kunapu hamolika na kuseteka kwa kangelo. 18 Cibumbe ca nganda bacitungile na jasipa, co nganda baitungile na goldi yaibwa ngwe gilasi. 19 Lubula lwa cibumbe ca nganda balubwahesele na mamanya a seho a kuliseza-seza: lubula lwakulibanga lwapwile lwa jasipa, lwamucibali lwa safaya, lwamucitatu lwa kesedoni, lwamuciwana lwa emarodi, 20 lwamucitanu lwa sadoni, lwa bu 6 lwa sadiasi, lwa bu 7 lwa krisoliti, lwa bu 8 lwa beri, lwa bu 9 lwa topazi, lwa bu 10 lwa krisopasi, lwa bu 11 lwa hicisi, lwa bu 12 lwa ametisi. 21 Co lalo bije bikolo 12 byapwile bya bimpasi* 12, cikolo na cikolo bacipangele ha mpasi* imolika, co ngila yakama ya mu nganda yapwile ya goldi yaibwa ngwe gilasi.

22 Mukati kunjamwenemo tempele mwafwa Yehova Njambi Muka-nzili Yoshe na Muna Manga bakebo banapu tempele yayo. 23 Ije nganda kuitondo ceke ca litangwa nambe ca ngonde mwafwa bumpau bwa Njambi bukebwo buli na kuitwila ceke, co ndeya yayo inapu Muna Manga. 24 Baka-mafuti bakenda mu ceke cei nganda, co bimyene ba hasi bakanena bumpau bwabo omu mu nganda. 25 Bikolo byayo kubakabishoko litangwa lyoshe lya mutunu, mwafwa kukukakala butsiki. 26 Co bumpau na kasingimiko bya baka-mafuti bakabinena omu mu nganda. 27 Oloni cuma coshe ca kujwala nambe munu woshe alinga byuma bya bunyengwe na muka-makuli kakakobelamo nambe kamandondo kubanga baje babanasoneka mu libulu lya kuzenga lya kuyoya lya Muna Manga bakebo bakakobelamo.

22 Co wanjimwesele ndonga ya mema a kuyoya aje apwile a kutoka ngwe limanya lya kristo. Ije ndonga yatundile ku litanda lya Njambi na Muna Manga. 2 Yetile hakati ka ngila yakama ya mu nganda. Ku sambweli na sambweli lya ndonga kwakele miti ya kuyoya ije yakele na kwima bushuka lwa kupwa 12 mwaka na mwaka, kulumbununa ngwabo yakele na kwima lumo ngonde na ngonde, co maputa a ije miti apwile a kukangwisa baka-mafuti.

3 Co kukukakala lalo cisingo. Oloni litanda lya Njambi na Muna Manga likakala mu nganda, co bindungo bendi bakamupangela cipangi ca kujela. 4 Co bakamona cihanga cendi, co lizina lyendi likakala ha maholo abo. 5 Butsiki kubukakalako lalo, co kubakatondo ceke ca ndeya nambe ca litangwa, mwafwa Yehova Njambi akabatwila ceke, co bakayula ngwe bimyene myaka yoshe.

6 Co kangelo wanjilekele ngwendi: “Awa majwi anapu a kulongwa,* co lalo a busunga. Eyo, Yehova Njambi uje wahwimininine tupolofweto, natumu kangelo kendi mangana amwese bindungo bendi byuma binapande kulingiwa ololo. 7 Taleni! Njili na kwija bwasi-bwasi. Nabwahelela uje anyunga majwi a bupolofweto ali omu mu libulu lya kuzenga.”

8 Yange Iwano, yange njazibile na kumona ebi byuma. Munjabizibile na kubimona, njatsikamene ku mendi a uje kangelo wanjimwesele ebi byuma ngwange njimulemese. 9 Oloni wanjikandele ngwendi: “Habwe! Keti ulinge ngoco! Nange nji ndungo lika ngeci mwobe na bandolome bobe, tupolofweto, baje bali na kunyunga majwi ali omu mu libulu lya kuzenga. Lemesa Njambi.”

10 Co lalo wanjilekele ngwendi: “Keti upate awa majwi a bupolofweto ali omu mu libulu lya kuzenga, mwafwa simbu yawo ibanangula ili muyehi. 11 Muka-kujeneka kusungama atwalelele mu bilinga byendi bya kujeneka kusungama, co muka-mazilo atwalelele mu bilinga byendi bya mazilo. Oloni muka-kusungama atwalelele mu bilinga byendi bya kusungama, na munu wa kujela nendi atwalelele mu bilinga byendi bya kujela.

12 “‘Taleni! Njili na kwija bwasi-bwasi, co cikandelela cinjana njili naco mangana njakwilwisile munu na munu kwesekesa na bipangi byendi. 13 Yange Aufa na Omega,* wakulibanga na wamamaneselelo, mashangumukilo na mamaneselelo. 14 Banabwahelela baje bakusha bizalo byabo mangana base kukala na moko ya kuya ku miti ya kuyoya, co lalo mangana base kukobelela ku bikolo mubakobela mu nganda. 15 Hanja hali tutali* na baka-kulinga bilinga bya budimona na baka-bupangala* na baka-kutsiya banu na baka-kulemesa tumponya na banu boshe baka-kukwisa bakwabo na kuzema makuli.’

16 “‘Yange Yesu, njatumine kangelo kange mangana akumyane bukaleho bwebi byuma mangana bikwase bikungulukilo. Yange muzi na muna Devidi na ngongonosi ya mutondo.’”

17 Co sipilitu na shombolwa bili na kutwalelelaho kwendeka ngwabyo, “Ija!” Co woshe ali na kuziba endeke ngwendi, “Ija!” Co woshe natsi lihwila aije. Woshe ashaka aije akunwe mema a kuyoya a bwana.

18 “Njili na kwana bukaleho kuli munu woshe aziba awa majwi a bupolofweto ali omu mu libulu lya kuzenga ngwange: Nga munu abwezelela ku byuma ebi, Njambi akamubwezelela ku tuyando tubanasoneka omu mu libulu lya kuzenga. 19 Co nga munu atundisa ku majwi ali omu mu libulu lya kuzenga lyobu bupolofweto, co Njambi akamulingisa ajeneke kukala na mutamba ku muti wa kuyoya mu nganda ya kujela, kulumbununa byuma bije bibanasoneka omu mu libulu lya kuzenga.

20 “Uje ali na kwana bukaleho bwebi byuma ali na kwendeka ngwendi, ‘Eyo, njili na kwija bwasi-bwasi.’”

“Ameni! Ija, Mwata Yesu.”

21 Ngozi yakama ya Mwata Yesu ikale na bakujela.