Byuma Byalingisile Kapilistu Umo Atunde mu Bulombelo Bwabo

Tulekeniko bya buyoye bweni bwa ku bwanike.

Njasemukilile mu Italy mu 1943. Njakolelele mwimbo na bandolome na bandokazi bange. Batate bapwile bandimi, co lalo bapwile baka-kushonga. Bisemi betu bashakele ngwabo tupwe baka-Katolika bababwa.

Bika byamilingisile mutonde kupwa kapilistu?

Munjapwile mwanike njashakele manene kutolilila ku tupilistu mu ceci. Njashakele manene mubakele na kwendekela na bilika bimo bibakele na kulinga. Co nange njashakele kupwa kapilistu. Munjakele na myaka 13, banana banjitwalele ku sikola ije yakele na kulingisa banike ba bakwenje balibwahesele bilongesa bya kuloba bya bupilistu.

Mwakele na kupangesa Mbimbiliya mu bilongesa byeni?

Ngoco bene kamandondo. Munjakele na myaka 15, mulongesi umo wanjanene libulu limo ngacije lya Biñanda Byabibwa bya buyoye bwa Yesu na cipangi ca kwambulula calingile. Co njelukilile-elukilile kulitanda. Munjakele na myaka 18, njaile ku Rome ku mayuniveziti a Katolika aje ali na kutwamenena popu. Njalilongesele Cilatini, Cigriki, biñanda bya kusañulu, bilongesa bya mwakuyoyela, bilongesa bya mubakasinganyekela banu, na bilongesa bya bunjambi na bulombelo. Nameme twakele na kwendeka majwi a mu mikanda imo ya mu Mbimbiliya itwakwatele mu mutwe na kutolilila omwo bakele na kutanda Mbimbiliya Lyacalumingo, kutwakele na kulilongesa Mbimbiliya.

Mwapwile mukulunu wa sikola imo ya bulombelo bwa Katolika. Eci Cipangi Cambateselele na kulongesa, indi bati?

Cipangi cange cakama capwile ca kutwamenena. Oloni kwakele bilongesa bimo binjakele na kulongesa bije byakele mwisi ya Second Vatican Council.

Bika byamilingisile mushangumuke kujeneka kukulahela bulombelo bweni?

Kwakele byuma bitatu. Ceci yakele na kulikobelesa mu bupolitiki. Bantwama ba bulombelo na bakwabo basele kulilingila bukwizi. Bilongesa bimo bya Katolika nabyo kubyakele na kumoneka ngwe bikebyo bwino. Cakumwenako, Njambi wa cizemo asa kuyandesa bati banu myaka yoshe munima ya kutsa? Kutundaho, kuma Njambi ashaka ngwendi twilukile-ilukile malombelo a kulifwa oku twakwata nambe kuzala cilindakano?a

Co mwalingile bati?

Njalombelele oku njili na kusotola misozi. Kutundaho, njalandele Mbimbiliya ya Katolika ibatumbula ngwabo Jerusalem Bible na kushangumuka kuitanda. Oyo Mbimbiliya te batunda bene ha kuituhula mu ndaka ya Ciitaly. Co litangwa limo Lyacalumingo munjakele na kushanda mikanjo yange munima ya Misa, banalume babali bezile ha sikola. Balizimbwile ngwabo bapwile Bakaleho ba Yehova. Twambatele simbu ya kutubakana ola oku tusimutwiya bya Mbimbiliya nebi biyendeka ha byuma bimwesa bulombelo bwa busunga.

Obo bangenzi byamyendelele mwabamwene bati?

Njashakele manene endekesi yabo ije yamwesele ngwayo bakulahelele bibakele na kwendeka nomu mubakele na kuwanenamo bwasi mikanda mu Mbimbiliya ya Katolika. Kutundoho, Mukaleho umo wa lizina lya Mario washangumikile kunjendela. Wakele na kukwata mbunge, co lalo wapwile wa kulongwa mwafwa wakele na kutwendela nameme kukale nyonzi nambe kushaluke. Wakele na kwohyesa ngenjo ya ha cikolo ca mutungo mutwakele Lyasapalalo na Lyasapalalo mutondo ku ma 9.

Bakweni tupilistu bakele na kumona bati owo mangenzi a Bakaleho bakele na kumyendela?

Njakele na kubalanya ngwange tukale hamo nabo mutwakele na kulilongesa, oloni naumo wahi wakeleko mbunge. Yangeni mwane njakele na kulikuwa! Njalilongesele byuma bya kufwa ngwe byanecelela Njambi tuyando tutwaleleleho. Ha myaka yaingi njashekele kuzibuka binamulingisa alinge ngoco.

Bati bakulunu beni, yanini bakebo indi kubakele na kushaka kumizeyesa?

Mu 1975, njakutile mangenzi amangi a kuya ku Rome mu kushaka kubalumbunwina biyongola byange. Bakulunu besekele kutengulula biyongola byange, oloni naumo wahi wapangesele Mbimbiliya. Co lya 9 January, 1976, njasonekelele ku Rome kubaleka ngwange njecelele kupwa muka-Katolika. Omwo kwetile matangwa abali, njatundile mu njibo ya tupilistu, co njalondele kumboyo na kuya ku ciwano ca Bakaleho ba Yehova. Oho ha ciwano hakungulukilile bikungulukilo byabingi. Co byuma byoshe byalingiwile oho ha ciwano byalisezelele kulako na byuma binjezililile! Munu na munu wakele na Mbimbiliya, co boshe bakele na kwendelela na baka-kwendeka omwo bakele na kusimutwiya ha biñanda bya kuliseza-seza.

Mubyakele na kulingiwa byoshe obyo, baka-naanga yeni bakebo balingile bika?

Bwingi bwabo banjilwisile manene. Oloni njanangukile ngwange shongo yange umo wa mukwenje wakele na kulilongesa Mbimbiliya na Bakaleho mu Lombardy, mutambela wa ku kunto ya Italy. Njaile na kumumona, co Bakaleho banjakawanene banjikwasele kuwana cipangi na kwakukala. Mu mwaka wa kulifwa bene owo, banjimbwitikile na kupwa umo wa Bakaleho ba Yehova.

Yanini indi mukalibeye mwafwa ya byuma bimwalyangwilile?

Naana! Embwe mwane. Hano njiliziba kushwenya manene kuli Njambi mwafwa binjizibuka kutalesa kuli ikeye binemana ha Mbimbiliya, keti ha bilongesa bya banu nambe cisemwa ca bulombelo. Co lalo njasa kulongesa bakwetu busunga bunjinalilongesa.