Vavuthamba Va Njambi Veya?

Yesu Kilisitu wapwa Muna Yehova, cho wapwa lalo kavuthamba wendi wakama. Thimbu kanda Yesu ayije hano hathi nakuyoya ngwe munu, wakele munu wa ndthzili wa kusipilitu mwilu. (Yowano 17:5) Cho wethzile hano hathi nakulongetha vanu vuthunga vwa Njambi. (Yowano 18:37) Omwo wakele hano hathi, wanene mwonyo wendi mangana ovole vanu vakwononoka vatunde ku vuvi nakukuthsa. (Loma 6:23) Thimbu yino Yesu ikeye Mwene wa Vumwene vwa Njambi, vuje vwapwa fulumende ya mwilu yije yikanena Palandaisi hano hathi.—Kujombolola 19:16.

Tungelo navo vapwa vavuthamba va Njambi. Tungelo kuvaputukile kuyoya hano hathi ngwe vanu, embwe. Njambi wavatangele mwilu thimbu kanda atange kaye. (Yombi 38:4-7) Tungelo vapwa vavangi manene. (Ndanyele 7:10) Ava vavuthamba va Njambi va mwilu vashaka ngwavo vanu valilongethe vuthunga vwa Yehova.—Kujombolola 14:6, 7.

Njambi wakala lalo na vavuthamba vendi hano hathi, cho wavatumbula ngwendi vakaleho vendi. Mukaleho akendeka vyatanekeya hali munu nambe ha chuma nga ali mu ndthzango yakuthompela. Vakaleho va Yehova vakaleke vakwavo vyuma vivatanekeya hali Yehova na viyongola vyendi. (Isaya 43:10) Vakaleho va Yehova vashaka kumikwatha mulilongethe vuthunga vwa Yehova ngwe muvashaka tungelo. Vashaka ngwavo neni mupwe kavuthamba ka Njambi.