6 Kuma Kulombela Kwasa Kumikwasa Ndi?

KUMA kulombela kwasa kutukwasa ndi? Mbimbiliya imwesa ngwayo kutukwasa. Ngwayo malombelo a bangamba ba Njambi ba kulongwa akabakwasa. (Luka 22:40; Yakomba 5:13) Kulombela kutukwasa tushwenye kuli Njambi. Co lalo kwasa kutukwasa nga tuli mu bishoti na kutukwasa ku mubila. Mu ngila muka?

Lingeni ngwe mwakala na mwanike, co litangwa limo atambula bwana. Kuma mumulongesa ngweni kuliziba lika ngwendi nakandelela kuli obo banamwana bwana kunapumo ndi? Indi mumulongesa kumwesa ngoco? Nga twendeka byuma bimo bili ku mbunge yetu, tumwesa mutuli na kulizibila, co lalo tubyanuka bwasi. Kuma omu mukemwo mukunafwila na kusimutwiya na Njambi ndi? Eyo, mukemwo bene. Tucisimutwiyeniko ha miyati imo ya malombelo.

Malombelo a kukandelela. Kukandelela kuli Tate yetu mwafwa ya byuma byabibwa byanatulingila kutulingisa tumone mwanatubezikisila. Co kulinga ngoco kutulingisa tupwe ba kubwahelela na kumona byuma mu ngila yaibwa.—Filipu 4:6.

Cakumwenako: Yesu wakandelelele kuli Ishe mwafwa ya kutolilila ku malombelo endi na kuwakumbulula.—Yowano 11:41.

Malombelo a kulomba likonekelo. Nga tulomba Njambi ngwetu atukonekele, tumwesa ngwetu citakutaku cetu cili na kupanga mwamubwa. Tumwesa lalo ngwetu twananguka bubi butunalingi, co twatenguluka. Co lalo kutulizibi kukala manene na mulonga.

Cakumwenako: Ndabiti walombelele kuli Njambi mangana amwese ngwendi watengulukile, co wakele na kuziba kubabala ku mbunge.—Myaso 51.

Malombelo a kulomba Njambi atutwamenene na kutwana mana. Kulomba Yehova ngwetu atutwamenene na kutwana mana atutonda mangana twangule mwamubwa byakulinga kutukwasa tupwe ba kulikehesa. Kutukwasa kwanuka ngwetu kuli hayalenga nzili yetu na kutulingisa tukulahele manene Tate yetu wa mwilu.—Visimo 3:5, 6.

Cakumwenako: Solomoni walombele Njambi mangana amutwamenene na kumwana mana a kuyula mwamubwa Baisalele.—1 Vimyene 3:5-12.

Malombelo a kulomba bukwasi nga tuli mu bukalu. Kulombela kuli Njambi ha simbu ituli mu bishoti kutulingisa tulizibe bwino ku mbunge na kutulingisa tukulahele manene ikeye kutubakana kulikulahela yetu babenya.—Myaso 62:8.

Cakumwenako: Mwene Asa walombelele kuli Yehova omwo bitozi ba nzili bashakele kumulwisa.—2 Mizimbu 14:11.

Malombelo a kulomba Njambi akwase bakwetu baje bali mu bukalu. Malombelo a cifweci atukwasa tuzeme manene bakwetu na kukala na mema ku mbunge.

Cakumwenako: Yesu walombele Njambi akwase bandongesi bendi.—Yowano 17:9-17.

Malombelo a kushangazala Njambi. Nga tushangazala Yehova mwafwa ya bipangi na bifwa byendi byabibwa, co tumumwesa kasingimiko na kumwana bumpau. Malombelo a cifweci lalo atulingisa tushwenye manene kuli ikeye ha kupwa Njambi yetu na Tate yetu.

Cakumwenako: Ndabiti washangazalele Njambi mwafwa ya byuma byanatanga.—Myaso 8.

Kulombela lalo kutukwasa kukala mu “kwoloka kwa Njambi kuje munu naumo wahi asa kuzibisisa.” (Filipu 4:7) Kukala mu kwoloka muno mu kaye kanashulu na bishoti kunapu kubezika. Co lalo kukwasa munu alikangule ku mubila. (Visimo 14:30) Oloni kuma twasa kulinga ngoco mu nzili yetu lika, indi kubanga kukale byuma bimo bije bitukwasa?