Twaleni Lutwe mu Chipangi cha Kupwitha Vanu Kupwa Vandongethi
1. Vyuma muka vishakahala mangana vanu vakovoke?
1 Mithzimbu ya chipangi cha mwaka wa 2014, imwetha ntwima ya vanu va Njambi ya kwambulula muthzimbu wauvwa wa Vumwene. (Mat. 24:14) Tuli na kwambulula muthzimbu wa mu Mbimbiliya ku vanu vavangi kwitila mu kwambulwila ku njuvo na njuvo na mu vikampeni vya kulitila vya kwana matilakiti na tumapapelo twa kulanya vanu na kwambulwila ku vimbunga vya mu chitingitingi. Tunapande kukwatha manene vanu kupwavandongethi va Yesu mu kulilongetha navo Mbimbiliya mangana vakovoke.—1 Tim. 2:4.
2. Vihula muka vitunapande kulihula mangana vitukwathe kukala na lishungu lya kushangumuka vilongetha vya Mbimbiliya?
2 Pweni na Lishungu lya Kushangumuka Chilongetha cha Mbimbiliya: Mukathoneka mu kushula mithzimbu ya munu imunawana, uje namwetha kuvwahelela na kumwendela, mangana mukashangumuke nendi chilongetha cha Mbimbiliya ndi? Litangwa lika limwethekele kumwetha munu mutukalilongethela Mbimbiliya ha vungendthzi vwa kulivanga? Litangwa lika limwashangumukile kulilongetha Mbimbiliya na vaje vamukatwalela mangazini? Mwamwethaho laja munu vindiyo ya Ki Kabakalani ha lu Swanela ku Ituta Bibele? na Tuto ya Bibele I Eziwanga Cwani? kuli vaje vamukakovela navo sikola na vaje vamukapanga navo na vanu vamwatunga navo na vavushoko na vandambo ndi? Nga mupangetha katambo ka kuthindumuna, mukaleke vaje vakambataho mavulu ngweni mwatha kulilongetha navo Mbimbiliya kwa kujeneka kufweta ndi?
3. Vyuma muka vyatha kutukwatha mangana tulongethe vuthunga mwamuvwa?
3 Vukwathi vwa Kutunda Kuli Yehova na Yesu: Yesu wamwethele ngwendi tunapande kufwitangana na kuwanako vingila vimo vyakwambulwilamo, omwo washikile ngwendi ‘pwitheni vanu kupwa vandongethi’ na kukanyametha ngwendi “yeni.” Katuthethzele likalyetu, oloni wakulahethele ngwendi akala netu. (Mat. 28:19, 20) Yehova lalo natwana sipilitu yendi ya kujela na vyuma vya kupangetha, cho lalo ali na kutwana vilongetha vije vitukwatha kulongetha vanu vuthunga. (Zak. 4:6; 2 Koli. 4:7) Twatha kulomba mangana tupwe na “chithzango” na ndthzili ya kupanga echi chipangi cha theho.—Fili. 2:13.
4. Mwafwa vika tunapande kupanga chipangi cha kupwitha vanu kupwa vandongethi?
4 Tukapu va kuvwahelela mutukambulula muthzimbu wauvwa. Oloni nga tulongetha munu na kumukwatha kwenda hamo lika netu mu “ngila ya. . . ku mwonyo,” cho tuvwahelela manene (Mat. 7:14; 1 Tes. 2:19, 20) Nga twaka manene mana ku chipangi cha kupwitha vanu kupwa vandongethi, cho tuthzivitha Yehova kuvwaha uje “kashaka umo akanyonge, oloni ashaka ngechi voshe vatenguluke kutunda ku vivi vyavo.”—2 Pet. 3:9.